Chronological

Tneel uˈj e xiˈ ttzˈiˈben apóstol Juan

Jun Yol Iˈtz Kˈolte Kchunkˈlal te Junx Maj

1  Nxiˈ ntzˈiˈbena cyey tiˈj Cristo, Yol Iˈtz Kˈolte Kchunkˈlal te Junx Maj. Tej mitknaˈx tbint twitz cyaˈj bix twitz txˈotxˈ, ya attl. O kbiˈna jaxin, ejooˈya t‑xelxin, bix o kila tuˈn tbakˈ kwitza. O tzˈoc kcyeˈyena, bix o tzˈoc kmocoˈna tuˈn kkˈaba. ² E tzaj tyeecˈan jun chunkˈlal tzin tkˈoˈn Dios, bix oc kcyeˈyena. Jaxxix kuˈna. Bix keya kaakˈen tuˈn t‑xiˈ kkˈumente cyey ti tten kchunkˈlal ntzaj tkˈoˈn Dios te junx maj. E ten jxjal kˈilte kchunkˈlal tuya Kman Dios, bix e tzaj tyeecˈan te keya ti tten tnaabl Dios. ³ Bix j‑o kila bix j‑o kbiya, ja tzunja nxiˈ kkˈumena te cyey, tuˈntzen jax juˈx cyey tenxit cymojbabl cyiiba tuya Kˈolte cychunkˈlala, tisen keya at kmojbabl kiiba. Tzin nkbaˈna at kmojbabl kiib tuya Kman Dios bix tuya Tcwalxin, Jesucristo. ⁴ Nxiˈ ntzˈiˈbena kej yol lu tuˈn cytzalaja kuyena.

Ja te Kman Dios jun spiˈyen

⁵ Jatzen yolja e kbiya te Jesucristo bix nxiˈ kkˈumena te cyey, cyjulu: Ja te Dios spiˈyen, bix mintiiˈ chˈin klolj at tuya. ⁶ Ka nxiˈ kkbaˈn at kmojbabl kiib tuya Dios pero ka nko bet tuj klolj, nko ẍtakˈentzen, bix min nkoˈx lpe tiˈj yol jaxxix. ⁷ Pero ka nko bet tuj spiˈyen, tisen te Dios at tuj spiˈyen, attzen kmojbabl kiib kxolx, bix txjoˈn koˈ tiˈ cykilca kil tuˈn tcyamecy Jesucristo, Tcwal Dios.

⁸ Katzen nxiˈ kkbaˈn mintiiˈ kil, ncub ksbun kiib, cuma min nxiˈ kocslaˈn yol jaxxix tiˈj ti kten. ⁹ Pero ka nxiˈ kkbaˈn kil twitz Dios, cnajseteltzen kil tuˈnxin, bix qˈuelel ttxjoˈnxin kanem tiˈ cykilca il, cuma cbinel jma cyaj tkbaˈnxin, bix at toclen tuˈn tcub tnajsaˈnxin kil, cuma ma cyim Tcwalxin tuˈn tchjet kil. ¹⁰ Pero ka nxiˈ kkbaˈn min nko binchan il, nxiˈ kkbaˈn ka ẍtakˈ Dios, bix min nxiˈ kocslaˈn yol tiˈj ti kten.

Ja te Cristo jun Onel ke nyolen te kxel twitz Kman Dios

2  Key wuya nim n‑oc cyakˈa weya, nxiˈ ntzˈiˈbena jyol lu te cyey tuˈntzen miˈn chi binchana il. Pero ka ma chi binchana il, at jun Onel ke nyolen te kxel twitz Kman Dios, ja te Jesucristo. At toclen tuˈn tyolen twitz Dios, cuma mintiiˈ til, ² bix cuma e cyim te chojbil kil. Bix yaaˈn nuk oˈcx tuˈn tlaj kil e cyim. E cyim te chojbil cyil cykilca xjal twitz txˈotxˈ.

³ Ojtzen n‑oc kbiˈn tyol Cristo, n‑eltzen kniyˈ tiˈjxin. ⁴ Ka nxiˈ tkbaˈn jun xjal: “Ntzkiˈna Cristo,” ka tz̈i, pero min nbint tley Cristo tuˈn, jun ẍtakˈ xjal. Min ma tzˈocx yol jaxxix tuj tanem. ⁵ Pero nuk laˈ alcyexja jun xjal ma tzˈoc tbiˈn tyol Cristo, tzin tyeecˈan ma tzket‑xix tkˈakˈbil tcˈuˈj tiˈ Dios. Tuˈnj knimbil tiˈ Cristo n‑el kniyˈ tiˈj at kmojbabl kiib tuya. ⁶ Alcyej xjal tzin tkbaˈn junx taˈ tuya Cristo, ilxix tiˈj tuˈn t‑xiˈ tiiˈn tnaabl tisen e bint tuˈn Cristo tej tten twitz txˈotxˈ. ⁷ Key ocslal n‑oc cyakˈa weya, ja mandamyent lu yaaˈn jun acˈaj ley bajx cybiy, sino jun yol o cybiy te ootxa, ja jun yol o cybiy jatxe tuj tneel.

Jun acˈaj ley

⁸ Pero jaˈlewe cxeˈl ntzˈiˈbena cyey tiˈj jun ley acˈaj, jaj tuˈn toc cyakˈ cyuyey cyey. Ja ley lu o cyaj yeecˈat tuˈn Jesucristo, bix jax juˈx cyey ma cyaj cyyeecˈana. Tzinen taˈ jlu, cuma nbaj tilel tyem te klolj, bix ma tzyet tyem te spiˈyen. ⁹ Ka at jun ocslal tzin tkbaˈn ka nbet tuj spiˈyen, pero n‑el tiiqˈuen juntl ocslal, lux nbet tuj klolj. ¹⁰ Yaltzen te cyej ocslal n‑oc takˈ niyˈtl ocslal cye, jatzen ocslalja nbet tuj spiˈyen. Bix mlay jaw tzˈak tuj tbe, tisen tej tbet tuj klolj nejl. ¹¹ Pero j‑ocslal n‑el tiiqˈuen juntl ocslal, jatztzen taˈ tuj klolj bix nbet tuj klolj. N‑el tzpet tuj tbe, cuma tisen jun mos̈ tuj klolj.

¹² Key wuya nim n‑oc cyakˈa weya, nxiˈ ntzˈiˈbena cyey cuma o najset cyila tuˈn Dios tuˈnj o bint tuˈn Cristo. ¹³ Key ocslal mas tij, nxiˈ ntzˈiˈbena cyey cuma cytzkiˈna Cristo, jaj xjal at jatxe tuj tneel. Key ocslal maa cwalx, nxiˈ ntzˈiˈbena te cyey cuma ma chi xcyey tibaj taaw il.

Key ocslal n‑oc cyakˈa weya, nxiˈ ntzˈiˈbena te cyey cuma ma cytzkiˈna Kman Dios. ¹⁴ Key ocslal mas tij, nxiˈ ntzˈiˈbena cyey cuma cytzkiˈna jxjal ya attl tej mitknaˈx tbint twitz txˈotxˈ, ja te Cristo. Key ocslal maa cwalx, nxiˈ ntzˈiˈbena te cyey cuma cyiw eteˈy tuj cyocslabla, bix cuma nakˈanan Dios tuj cyanema tuˈnj tyolxin, bix cuma ma chi xcyey tiˈj taaw il.

¹⁵ Miˈn tzˈoc cykˈaˈbena tiˈj achbil te twitz txˈotxˈ bix tikˈch at twitz txˈotxˈ. Ka nuk oˈcx taj jun xjal tikˈch at twitz txˈotxˈ, min tzˈoc takˈ Kman Dios te. ¹⁶ Miˈn tzˈoc cykˈaˈbena alcyej taj kxumlal bix alcyej taj tbakˈ kwitz, bix miˈn tzˈoc cykˈon cyiiba te nintzaj bix tuˈn tcnet nimcˈa cyuˈna, tuˈn tjaw nimsan cyiiba, cuma yaaˈn junx taˈ tkˈakˈbil kcˈuˈj tiˈj tikˈch at twitz txˈotxˈ tuya tkˈakˈbil kcˈuˈj tiˈ Dios. ¹⁷ Pjel twitz txˈotxˈ tuyax cykilca achbil at twitz txˈotx. Pero tej xjal nbinchan tajbil Dios, ctemel te junx maj.

Tzul jun jawnex ẍtakˈ xjal kˈojlel tiˈ Cristo

¹⁸ Key wuya n‑oc cyakˈa weya, ma ko ocx cyuj mancˈbil kˈij. O cybiy cyuj mancˈbil kˈij tzul jun jawnex ẍtakˈ xjal kˈojlel tiˈ Cristo. Pero ya jaˈlewe ma chi ul jlet nim xjal ẍtakˈ nchi kˈojl tiˈ Cristo. Juˈ tzunj, n‑el kniyˈ tiˈj o ko ocx cyuj mancˈbil kˈij. ¹⁹ Kxol ma chi exke. Pero amale e tentke kxol, pero mintiiˈ kmojbabl kiib cyuya. Nuket at cymojbabl cyiib kuyake, jaxitle eteˈ kxol. Pero ma chi ex, bix juˈ tzunj e cyyeecˈa yaaˈn junx eteˈ kuya.

²⁰ Perotzen cyey, yaaˈn tisen ejeeˈ. Ma kˈoj Espíritu Santo te cyey, bix cykilca key n‑el cyniˈya tiˈj yol jaxxix. ²¹ Juˈ tzunj, min nxiˈ ntzˈiˈbena tuˈn tel cyniˈya tiˈj, cuma ma tzˈel cyniˈya tiˈj yol jaxxix, bix n‑el cyniˈya tiˈj mlay tzaj jun yol ẍtakˈ tiˈj yol jaxxix. ²² Cxeˈl nkbaˈna cyey alcye xjal tzin tkbaˈn yaaˈn Jesús ja Scyˈoˈn tuˈn Dios te cawel, jatzen ẍtakˈ xjal. Alcye xjal tzin tkbaˈn jlu, jatzen xjalja aj kˈoj tiˈj Kman Dios bix tiˈj Tcwalxin. ²³ Alcyej xjal n‑el tiiqˈuen ja Cristo te Clol te, yaaˈntzen t‑xjal Kman Dios. Pero alcyej xjal tzin tkbaˈn Tcwalte Dios ja Cristo, attzen Kman Dios tuya.

²⁴ Yaltzen cyey, cyaj tenxit tuj cyanema ja jaxxix yol e cybiy tej tpon tpocbal Cristo cyxola. Ka ma cyaj ten ja jaxxix yol tuj cyanema, attzen cymojbabl cyiiba tuya Tcwal Dios bix tuya Kman Dios. ²⁵ Bix j‑o cyaj tkbaˈn Jesucristo tuˈn ttzaj tkˈoˈn ke, ja kchunkˈlal te junx maj.

²⁶ Kej yol lu nxiˈ ntzˈiˈbena cyey tuˈn cycˈojlan cyiiba cywitz kej ẍtakˈ xnakˈtzal n‑oc cykˈon cyiib tuˈn cyel tzpeta. ²⁷ Cyey, ja Espíritu Santo e tzaj tkˈoˈn Jesucristo cyey at cyuyey. Juˈ tzunj, mintiiˈ il tiˈj tuˈn cytena tjakˈ juntl wik xnakˈtzal yaaˈn jiquen. Nxnakˈtzan Espíritu Santo cykilca jaxxix te cyey. Jaxxix t‑xnakˈtzbil, yaaˈn ẍtakˈ yol. Juˈ tzunj, junx chi tena tuya Cristo, tisen ma txiˈ t‑xnakˈtzaˈn Espíritu Santo cyey.

²⁸ Key wuya nim n‑oc cyakˈa weya, jaˈlewe cxeˈl nkbaˈna cyey tuˈn cycyaj tena junx tuya Cristo, tuˈntzen mintiiˈ ttz̈i cyiˈja bix mintiiˈ cychˈixewa twitzxin oj tul meltzˈajxin.

²⁹ N‑el cyniˈya tiˈj jiquenxix te Dios. Juˈ tzunj, oj nxiˈ tiiˈn jun xjal tnaabl jiquenxix, n‑eltzen cyniˈya tiˈj jatzen xjal ja tcwal Dios.

Ma ko oc te tcwal Dios

3  Nimxsen ma tzaj tyeecˈan Kman Dios tkˈakˈbil tcˈuˈj kiˈj, cuma ma takˈ te ke tuˈn koc te tcwal Dios. Tuˈn tzunj tcwal Dios koˈ, min tzˈel cyniyˈ xjal te twitz txˈotxˈ kiˈj. Ka min tzˈel cyniyˈ xjal tiˈj Kman Dios, jax juˈx min tzˈel cyniyˈ kiˈj, ejooˈj tcwalxin. ² Key ocslal n‑oc cyakˈa weya, amale mat ko oc te tcwal Dios jaˈlewe, pero minaˈx tchicˈajax ti ko oquela. Pero n‑el kniyˈ tiˈj oj tul jlet Tcwal Dios juntl maj, bix oj klonte tiiˈn tcyeˈncxin, ko oqueltzen sakxix tisex texin. ³ Bix alcyej xjal nayon tiˈj Cristo, ncyajtzen tcyeˈyen il, tuˈn toc sakxix tisen te Cristo sak.

⁴ Alcyej xjal nbinchan il, nkˈojl tiˈj tley Dios, cuma tuˈnj nbinchan il, junx taˈ tuyaj n‑el tiiqˈuen ley. ⁵ Baˈn cyuˈna ul Cristo twitz txˈotxˈ tuˈn tel tiiˈn kil, bix baˈn cyuˈna mintiiˈ il e cub tbinchaˈn. ⁶ Juˈ tzunj, alcyej xjal mojl taˈ tuya Cristo, min nbinchan il. Kej xjal binchal il, min cytzkiˈn jaxin. ⁷ Key wuya n‑oc cyakˈa weya, miˈn chi oc lpey cyiˈ kej xjal ẍtakˈ. Alcyej xjal nbint baˈn tuˈn, tzin tyeecˈantzen ka jiquenxix taˈ, bix ntyeecˈan ka lepch tiˈj Cristo, cuma jiquenxix te Cristo. ⁸ Alcyej xjal nbinchan il, tzin tyeecˈantzen ka lepch tiˈj taaw il, cuma ja te taaw il binchal il jatxix tej tjaw tkˈoj tuya Dios. Pero ul Tcwal Dios twitz txˈotxˈ tuˈn tcub xitj cykilca taakˈen taaw il.

⁹ Ka ma tzˈoc jun xjal te tcwal Dios, ncyaj tcyeˈyen il, cuma nxiˈ tiiˈn tnaabl Dios. Il tiˈj cyjel tcyeˈyen il, cuma tcwal Dioste. ¹⁰ Tzinen taˈ alcyej xjal tcwal Dios bix alcyej xjal n‑oc lpe tiˈj taaw il, cuma kej xjal min nbint baˈn cyuˈn bix min n‑oc cyakˈ ocslal cye, yaaˈn tcwal Dioske. ¹¹ Jatxe tej tpon tpocbal colbil cyxola, o cybiy il tiˈj tuˈn tten tkˈakˈbil cycˈuˈja cyxola. ¹² Miˈn ko oc tisenj xin Caín. Lepchxin tiˈj taaw il, bix e cub tbyoˈnxin titzˈenxin. ¿Tikentzen e cub tbyoˈnxin? Cuma kaˈ tbinchbenxin. Yal tzunj te titzˈenxin, baˈn texin tbinchben titzˈen, bix juˈ tzunj e tzaj chiˈl tcˈuˈjxin tiˈj titzˈenxin. ¹³ Key ocslal, miˈn chi jaw kleeˈy ka ma tzˈel cyiiqˈuen kej xjal yaaˈn ocslal ejooˈ. ¹⁴ Pero kxol, at tkˈakˈbil kcˈuˈj, bixsen tzin tyeecˈan jlu ma ko etz tuj jun be nxiˈ kˈinte ke tuj cyamecy, bix ma ko ocx tuj jun be nxiˈ tiiˈn ejooˈ tuj kchunkˈlal. Alcyej xjal min n‑oc cyakˈ ocslal te, nbettzen tuj jun be nxiˈ tiiˈn tuj cyamecy. ¹⁵ Alcyej ocslal n‑el tiiqˈuen juntl ocslal, byol xjaltze, bix n‑el kniyˈ tiˈj min‑al jun byol xjal at tchunkˈlal te junx maj. ¹⁶ N‑eltzen kniyˈ tiˈj ti tten tuˈn toc cyakˈ ocslal ke, cuma e cyaj tkˈoˈn Cristo jun yecˈbil te ke, jaj tej tcyimxin te kxel. Jax juˈx ke, baˈn tuˈn t‑xiˈ kkˈon kiib tuˈn kcyim tuˈnj tkˈakˈbil kcˈuˈj tiˈ juntl ocslal ka at‑xix il tiˈj. ¹⁷ Ka at jun ocslal mintiiˈ titzˈjel, bix ka ma til juntl ocslal at te titzˈjel, pero min ma txiˈ tonen ocslal mebe, ¿ti toc cyuˈna? ¿Atpa tkˈakˈbil tcˈuˈj tisej te Dios? Mintiiˈ.

¹⁸ Key wuya n‑oc cyakˈa weya, yaaˈn nuk oˈcx cxeˈl kkbaˈn n‑oc cyakˈ xjal ke, sino cxeˈl kyeecˈan ka jaxxix kyol tiˈj tkˈakˈbil kcˈuˈj tuya kbinchben. ¹⁹ Tuˈnj toc cyakˈ ocslal ke tuya cykil kcˈuˈj, qˈueleltzen kniyˈ tiˈj ka ma ko oc lpe tiˈ yol jaxxix, bix qˈuelel kniyˈ tiˈj ka jiquen etoˈ twitz Dios. ²⁰ Amale atet maj nxiˈ tkbaˈn kanem yaaˈn baˈn jnbint kuˈn, pero mas nim t‑xtalbil Dios twitzj kil, bix baˈn tuˈn Dios cykilca il nbint kuˈn.

²¹ Key ocslal n‑oc cyakˈa weya, ka baˈn kuˈn mintiiˈ il nbint kuˈn, baˈntzen tuˈn t‑xiˈ kcubsaˈn kwitz te Dios tuya cykil kcˈuˈj. ²² Bix alcyej nxiˈ kkanen texin, ctzaal tkˈoˈnxin te ke, ka ma tzˈoc kbiˈn jtzin tkbaˈnxin bix nbinttzen tajbilxin kuˈn. ²³ Bix jtaj Dios tuˈn tbint kuˈn, cyjulu: Tuˈn t‑xiˈ kocslaˈn ka Tcwal Dios jxin Jesucristo, bix tuˈn tten tkˈakˈbil kcˈuˈj kxol, tisen ma kbaj tuˈnxin te ke. ²⁴ Alcyej xjal ma tzˈoc tbiˈn jma txiˈ tkbaˈn Dios, attzen tmojbabl tiib tuya Dios, bix at Dios tuya. Bix tuˈntzen Espíritu Santo ma tzaj tkˈoˈnxin te ke, ma tzˈel kniyˈ tiˈj at kmojbabl kiib tuya Dios.

Kej xnakˈtzal at Espíritu Santo cyuya bix kej nchi xnakˈtzan ẍtakˈ yol

4  Key ocslal n‑oc cyakˈa weya, miˈn txiˈ cyocslaˈna tyol jaca xnakˈtzal tzin tkbaˈn tyolel Dioste. Oj nyolen jun xnakˈtzal, cykˈoˈnc cyipena tiˈj tuˈn tel cyniˈya tiˈj ka nyolen tuˈn Espíritu Santo bix ka min, cuma at nim xnakˈtzal ẍtakˈ nchi bet cyxol xjal. ² Tzˈelxitzen cyniˈya tiˈj tyol jun xnakˈtzal tiˈj Jesucristo ka nyolen tuˈn Espíritu Santo. Ka nxiˈ tkˈumen ul Tcwal Dios twitz txˈotxˈ bix oc te jun xjal, Jesucristo, tetzen Dios xnakˈtzal lu. ³ Pero ka min nxiˈ tkˈumen jun xnakˈtzal yaaˈn Tcwal Dios te Jesús, yaaˈntzen te Dios, sino junx taˈ tyol tuya tyol nintzaj ẍtakˈ xjal nkˈojl tiˈ Cristo. O cybiy ka tzul, bix kej nchi oc lpe tiˈj ya eteˈtl twitz txˈotxˈ.

⁴ Key wuya nim n‑oc cyakˈa weya, te Dioskey, bix min ma cheˈx lpey cyiˈj xnakˈtzal ẍtakˈ, cuma at mas tipemal Espíritu Santo at cyuyey twitzj taaw il nchi oc lpe xnakˈtzal ẍtakˈ tiˈj. ⁵ Kej xnakˈtzal ẍtakˈ, aj ilke, bix juˈ tzunj, nchi yolen tuˈn tel cyyol baˈn tuj cywitz ke aj il, bix nxiˈ cybiˈn aj il cyyol. ⁶ Perotzen keya, te Dios koˈya, ejooˈya xnakˈtzal jaxxix. Kej xjal cytzkiˈn Dios, n‑octzen cybiˈn kyola. Pero kej xjal yaaˈn te Dios, min tzˈoc cybiˈn kyola. Ka ma tzˈoc tbiˈn jun xjal kyola, ma tzˈel kniyˈ tiˈj lepchexsen tiˈj yol jaxxix. Pero ka tcyˈi txiˈ tbiˈn kiˈja, ktzkiˈn ka taj tzˈoc lpe tiˈj yol ẍtakˈ.

At tkˈakˈbil tcˈuˈj Dios kiˈj

⁷ Key ocslal n‑oc cyakˈa weya, tzˈocxit cyakˈ kuya ke, tuˈntzen tchicˈajax tnaabl Dios kˈiˈn kuˈn, cuma ka ma tzˈoc takˈ kiib ke, tzin tyeecˈan jlu tcwal Dios koˈ. Alcyej xjal n‑oc cyakˈ tcwal Dios te, ntyeecˈantzen tcwal Dioste bix ttzkiˈntzen ja Dios. ⁸ Alcyej xjal min n‑oc cyakˈ ocslal te, ntyeecˈantzen min ttzkiˈn ja Dios. Yaaˈn tnaabl tisen tnaabl Dios, cuma n‑oc cyakˈ tcwal Dios te. ⁹ E tzaj tyeecˈan Dios tkˈakˈbil tcˈuˈj kiˈj tej ttzaj tsmaˈn junx Tcwal kxol twitz txˈotxˈ, tuˈntzen kten kchunkˈlal te junx maj tuˈnj e bint tuˈn Tcwalxin. ¹⁰ Yaaˈn tzˈaklxix tkˈakˈbil kcˈuˈj tiˈ Dios. Pero ya te Dios tkˈakˈbil tcˈuˈj kiˈj, tzˈaklxix. E tzaj tsmaˈnxin Tcwalxin kxol, tuˈntzen tcyim te chojbil kil, tuˈntzen tel tiiˈn tkˈoj Dios kiˈj. ¹¹ Key ocslal n‑oc cyakˈa weya, cuma e tzaj tyeecˈan Dios tkˈakˈbil tcˈuˈj kiˈj tuˈnj ttzaj tsmaˈn Tcwal tuˈn tcyim te kxel, juˈ tzunj ilxsen tiˈj cˈoquel kakˈ kiib kxol. ¹² Amale mint o kil twitz Dios, pero n‑el kniyˈ tiˈj najl Dios tuj kanem ka n‑oc kakˈ kxol. Ka ma bint kuˈn juˈwa, nbinttzen tajbil Dios kuˈn. ¹³ Bix jax n‑el kniyˈ tiˈj at kmojbabl kiib tuya Dios bix at Dios kuya tuˈnj ma tzaj tkˈoˈn Dios Espíritu Santo te ke. ¹⁴ Bix jax baˈn kuˈn at Dios kuya, cuma o kila Tcwal Dios bix nxiˈ kkˈumena e tzaj tsmaˈn Dios Tcwal tuˈn toc te Clolte cye xjal. ¹⁵ Alcyej xjal nxiˈ tkbaˈn tuya cykil tcˈuˈj ja te Jesús Tcwal Dios, attzen Dios tuya, bix at tmojbabl tiib tuya Dios. ¹⁶ Ejooˈya t‑xel Cristo, n‑el kniˈya tiˈj ti tten tkˈakˈbil tcˈuˈj Dios kiˈj, bix juˈ tzunj o tzˈoc ke kcˈuˈja tiˈj.

Tnaabl Dios, jaj tuˈn toc cyakˈ xjal te. Juˈ tzunj, alcyej ocslal n‑oc cyakˈ xjal te, attzen tmojbabl tiib tuya Dios, bix attzen Dios tuya. ¹⁷ Ka at kmojbabl kiib tuyaxin juˈwa, n‑octzen cyakˈ xjal ke tisen taj Dios, bix mintiiˈ ttz̈i kiˈj oj kocx twitz Dios tuj xkel, cuma nxiˈ kiiˈn kchunkˈlal twitz txˈotxˈ tisen te Cristo. ¹⁸ Mintiiˈ ttz̈i kiˈj ka ma tzˈoc cyakˈ xjal ke. Ka tzˈaklxix tkˈakˈbil kcˈuˈj juˈwa, mlaytzen tten ttz̈i kiˈj, cuma min ko ayon castiwa kiˈj tuˈn Dios. Ka min n‑oc cyakˈ xjal te jun xjal tisen taj Dios, attzen ttz̈i castiwa tiˈjxin.

¹⁹ N‑oc takˈ Dios ke cuma tneel oc kakˈ te Dios. ²⁰ Ka ma txiˈ tkbaˈn jun xjal, “N‑oc takˈ Dios weya,” ka tz̈i juˈwa pero n‑el tiiqˈuen juntl ocslal, ẍtakˈ xjal lu, cuma ka min tzˈoc takˈ jun ocslal te baˈn tuˈn toc tcyeˈyen, mlay bint tuˈn toc takˈ Dios te, cuma bajx tzˈoc tcyeˈyen. ²¹ Bix yaaˈn nuk oˈcx jlu, bix jax juˈx ma cyaj tkˈoˈn Dios ja ley lu ke: Alcyej xjal n‑oc takˈ Dios te, ilxsen tiˈj tuˈn toc cyakˈ ocslal te.

Tuˈn kocslabl tzin ncub tiˈ il at twitz txˈotxˈ kuˈn

5  Alcyej xjal tzin tkbaˈn ja te Jesús ja Scyˈoˈn tuˈn Dios te cawel tibaj cykilca, tcwaltzen Dios ja xjal lu. Bix ka jax tuˈn ka n‑oc takˈ Dios te, jax cˈoquel takˈ Tcwal te. ² ¿Bix ti tten qˈuelel kniyˈ tiˈj ka ma tzˈoc cyakˈ tcwal Dios ke? Ka ma tzˈoc takˈ Dios te bix ka nko binchan tley Dios, qˈueleltzen kniyˈ tiˈj n‑oc cyakˈ ocslal ke. ³ Bix il tiˈj qˈuelel cyniˈya tiˈj ka kaj tzˈoc takˈ Dios ke, il tiˈj cbinel tley kuˈn. Pero yaaˈn cyiwxix tuˈn tbint tley. ⁴ Yaaˈn cyiw, cuma alcyej xjal tcwal Dios, attzen tipen tuˈn tcub tiˈj cykilcaj yaaˈn baˈn twitz txˈotxˈ tuˈn. Bix tuˈn tbint tley Dios kuˈn, at kocslabl tiˈ Cristo. ⁵ ¿Bix alj xjal ncub tiˈj kaˈ twitz txˈotxˈ tuˈn? Nuk jaj xjal ma txiˈ tocslaˈn ka ja te Jesús Tcwal Dios.

Ja Espíritu Santo nyole jaxxix tiˈj tcwal Dios

⁶ Ja Jesucristo lu el itzˈj tiˈ ttxu tisex tten itzˈj jun xjal, bix lwewa el ttz̈qˈuel tej tcyim. Yaaˈn nuk ul itzˈj. Jax juˈx e cyim, te yecˈbil oc Tcwal Dios te jun xjal. ⁷ Bix jax juˈx tzin tkbaˈn Espíritu Santo ka Tcwal Dios ja Jesús, bix ktzkiˈn mlay ẍtakˈen Espíritu Santo. ⁸ Juˈ tzunj, at oxe tumel tzin cykbaˈn oc Tcwal Dios te xjal. At Espíritu Santo, at titzˈjlen Jesús, bix at tcyimlen Jesús. Junx taˈ cyyecˈbil cyoxel. ⁹ Oj nchi yolen xjal tiˈj jma cyil tuya tbakˈ cywitz, tzintzen kocslaˈn cyyol. Tejtzen ttzaj yolen Dios tiˈ Tcwal, ¿yaaˈmpatzen mas il tiˈj tuˈn t‑xiˈ kocslaˈn tyol, cuma mas jawnex? Bix ma tkba Dios ja Jesús Tcwal. ¹⁰ Alcyej xjal nxiˈ tocslaˈn ka Tcwal Dios ja Jesús, tzin tkbaˈn tanem nxiˈ tocslaˈn tiˈ yol jaxxix. Pero alcyej xjal min txiˈ tocslaˈn ja yol lu, tzin tkbaˈn ẍtakˈ Dios, cuma min txiˈ tocslaˈn jma tzaj tkbaˈn Dios tiˈ Tcwal. ¹¹ Bix jma tzaj tkbaˈn Dios tiˈj Tcwal, cyjulu: Ma tzaj tkˈoˈn Dios kchunkˈlal te junx maj, bix nuk tuˈnj Tcwal ma tzaaˈ tkˈoˈn. ¹² Alcyej xjal o tiikˈ Tcwal Dios, attzen tchunkˈlal te junx maj. Pero alcyej xjal min o tiikˈ Tcwal Dios, mintiiˈ tchunkˈlal te junx maj.

Tej t‑xiˈ tkˈoˈn Juan juntl maj cynaabl ocslal

¹³ Key ma chi ocslana tiˈj Tcwal Dios, ma txiˈ ntzˈiˈbena ja uˈj lu te cyey, tuˈntzen tel cyniˈya tiˈj at cychunkˈlala te junx maj. ¹⁴ Bix alcyej nxiˈ kkanen twitz Dios, bix ka junx taˈ tkanbil tuyaj tajbil Dios, ktzkiˈn nko tzaj tbiˈn. ¹⁵ Bix ka ma tzaj tbiˈn kkanbil junx taˈ tuya tajbil, jax juˈx ktzkiˈn ckiikˈel jma txiˈ kkanen.

¹⁶ Ka ma cyila oj nbinchan jun ocslal jun il, pero yaaˈn ja il tuˈn tel tpaˈn ocslal tiˈj tchunkˈlal te junx maj, baˈn tuˈn t‑xiˈ cycubsaˈna cywitza te Dios tiˈj ocslal nbinchan il, tuˈntzen tnajset til tuˈn Dios. Pero at jun il tuˈn t‑xiˈ tiiˈn jun ocslal tuj cyamecy te junx maj, jaj tuˈn n‑el tiiqˈuen ja Cristo. Ka at jun ocslal nbinchan ja il lu, miˈn txiˈ cycubsaˈna cywitza te Dios tiˈj tuˈn tnajset ja til lu. ¹⁷ Cykilcaj yaaˈn tuj tumel, jatzen ilja tuj twitz Dios. Pero nuk jaj il lu nxiˈ tiiˈn jun xjal tuj cyamecy te junx maj.

¹⁸ Ktzkiˈn kej xjal ma chi oc te tcwal Dios yaaˈn binchal ilke. Cˈojlaˈn koˈ tuˈn Tcwal Dios, bix juˈ tzunj mlay cub kiˈj tuˈn taaw il. ¹⁹ Ktzkiˈn ka te Dios koˈ, bix cykilca xjal twitz txˈotxˈ at tjakˈ tcawbil taaw il. ²⁰ Bix ktzkiˈn ul Tcwal Dios twitz txˈotxˈ, bix ma tzaj tkˈoˈn knaabl, tuˈntzen ktzkiˈn ja, jaj Tcwal Dios jaxxix. Bix at kmojbabl kiib tuya jaxxix Tcwal Dios, Jesucristo. Jatzente Dios jaxxix, ja Kˈolte kchunkˈlal te junx maj.

²¹ Key wuya nim n‑oc cyakˈa weya, miˈn chi naˈna Dios cywitz sant.

Oˈcx nyolja.