Chronological

Jun tcab uˈj e xiˈ ttzˈiˈben apóstol Pablo te Timoteo

Jun kˈolbebl tuˈn apóstol Pablo

^1-2 Timoteo ncwal, achena wuˈn. Ntzˈiˈbex xsunja juntl uˈj lu tey. Tzajxit cyxtalbil Kman Dios bix Kaaw Jesús tibaja, bix tzajxit kˈaˈben cycˈuˈjxin tiˈja, bix tente tuj ttz̈yal.

Inayena Pablo, tyolel Jesús. Smaˈn kena tuˈn Dios te kbalte cye xjal ma cyaj tkˈoˈn Dios tyol alj ma tzˈoc maje tchunkˈlal tuya Jesús, Scyˈoˈn tuˈn Dios, at tchunkˈlal te junx maj.

Il tiˈj tuˈn kyolen tiˈj Cristo cye xjal

³ Ojtzen nchin yolen tuya Dios, tzin nchin ajbenwe texin tuya jun sak nnaabl, tisex ke te njaya ootxa e xiˈ cynaˈn cyexin Dios, nxiˈ nkˈoˈnwe chjonte te Dios tiˈja, bix nchin naˈnwe Dios tiˈja te kˈijl bix te koniyan. ⁴ Tzinx n‑ul tuj ncˈuˈj tetz taˈl twitza tej kbaj kˈolben tuˈn kpax. Wajxse tzˈoc ncyeˈyen naja juntl maj, tuˈn njaw tzalaj. ⁵ Tzinx n‑ul tuj ncˈuˈj tiˈj tey tanem kˈiˈn tuˈna tiˈ Dios. Tneelxix oc ten tanem tyaaˈy Loida bixsen ttxuy Eunice. Ejeeˈtzen xuj e ten cyanem tiˈ Dios nejl, bix tzinen tuj nwitz ka juˈx tey.

⁶ Juˈ tzunj we waj txiˈ wokxenan tey tuˈn tjaw titzˈjsaˈna jtipemala te cawel tuj tja Dios o tiikˈa te Dios tej tcub nkˈoˈn nkˈab tibaja tuˈn toc tajwalela. ⁷ Bincham taakˈena tuya cykil tcˈuˈja, cuma o tzaj tkˈoˈnte Dios Espíritu Santo ke. Juˈ tzunj yaaˈn ilxixte tiˈj tuˈn ttzaj ttz̈i kiˈj, cuma tuˈn Espíritu Santo at kipemal, bixsen kanem tiˈ Dios, bix tuˈn t‑xiˈ kiiˈn ttxolan.

⁸ Juˈ tzunj miˈn tzˈel chˈixewey tiˈ tyol Kaaw Jesús, bix miˈn tzˈel chˈixewey wiˈj, tiˈj lu ken intiiˈnctz tuj tzeeˈ nuk tiˈjcˈa tyol Jesús, sino cuyanx jtey qˈuixcˈaj tzul tiˈj oj t‑xiˈ tpocbaˈna ka baˈn cycoˈpj xjal, tisenj weya lu kena intiiˈnctz tuj tzeeˈwa. Dios tey tzul kˈonte tipemal tuˈn tiyˈx qˈuixcˈaj tuˈna oj tcub tzˈaka. ⁹ Jatzente Diosj o coˈpente ke, bix o koˈx ttxcoˈnxin tuˈn t‑xiˈ kiiˈn jun kchunkˈlal jiquenxix. O ko tcoˈpete Dios tuˈn koc te t‑xjalxin, yaaˈn nuk tuˈn kiikˈente tcoˈpbil Dios tuˈnj baˈn ncub kbinchen, sino tuˈn t‑xtalbilte Dios kibaj. Juˈ tcublen tniqˈuenxin tiˈj jatxe tuj tneel. ¹⁰ Nejl min e telniˈyaxte ti e cub tniqˈuenxin tiˈj coˈpbil ke. Pero tejtzen tul jlet Jesús, Coˈpl ke, twitz txˈotxˈ, bixse e jaw chicˈajax tnicˈbenxin tiˈj tuˈn kcoˈpj. Tejtzen tjatz itzˈj Jesús juntl maj, o cyaj ttzinenxin tiˈj ke ocslal chi jawel itzˈj juntl maj, bix te junx maj, tuya acˈaj cyxumlal mlay cyim. ¹¹ Tuˈn tzunj kbaj te ja yol lu, Dios o tzaj kˈonte we wajwalela te tyolelxin bix te xnakˈtzal cye cykil xjal, cyuyax kej xjal yaaˈn judío. ¹² Tuˈnxix xsunja luxse niyˈ nwitza. Pero kˈuklwe ncˈuˈj, cuma ntzkiˈnwe aliˈj kˈukleca ncˈuˈj, bix ntzkiˈnxixwe ka cwel tcˈuˈn wexin wanem o txiˈ wokxenan texin, texaj kˈij oj npon tuyaxin.

¹³ Cyeˈyencxix ka jay nxiˈ kban te ja yol lu o tzˈoc tbiˈna wiˈj, bix miˈn cub tchˈixbeˈna, bix kbanxse tuya jun tnaabla ka kˈuklec tcˈuˈja tiˈ Jesús bix kˈakˈ tanema tiˈ Dios bix cyiˈ xjal, laˈ jaaˈ cpomela canan tipemala tuˈn Jesús. ¹⁴ Tuyatzen tonbil Espíritu Santo iˈtz kuya, tcˈojlaˈy jcyeca tyol Dios o txiˈ tkbaˈnxin tey, tuˈn min‑al cub chˈixbente.

¹⁵ Timoteo, ttzkiˈntl tzuna chˈixcˈa yaaˈn cykil xjal itzkil twitz Dios tuj txˈotxˈ te Asia jaaˈ taˈy, cyuyacˈaxtl jxin Figelo bix Hermógenes, ma cyaj cyeˈyente we. ¹⁶ Pero at‑x juuntl xjal min cyaj cyeˈyente we, tisenj jun najaj te tja Onesíforo. Cyˈiwlaˈnxitke tuˈn Dios, cuma amale intiiˈnctzetwe tuj tzeeˈ, jatzen Onesíforo oc nimsante ncˈuˈj, bix min el chˈixwe wexin wiˈj. ¹⁷ Tej ttenxin Roma, min in xiˈ tcyeˈyen wexin, sino e jyonxin wiˈj, tejxe ncnet tuˈnxin. ¹⁸ N‑el tniˈya tiˈj ti tten toc tonenxin ke xjal tuj tnom te Efeso jaaˈ najley. Nuket tzˈoc t‑xel texin tuˈn Kaaw Jesús oj tpon tumel tuˈn kbaj tnincˈuˈnxin.

Jun tbanelxix soldado te Jesucristo

2  Nim xjal o cyaj cyeˈyente Jesús. Yaltzen tey ncwal, tcuya tzuna tuˈn ttzaj tipemala tuˈn Dios, tuˈn tcub weˈy twitz Dios, cuma mojleca tuya Jesús. ² Ti jilel kej yol o tzˈoc tbiˈna wiˈj cywitz nim xjal, kbanxse cyej xjal baˈn toc ke kcˈuˈj cyiˈj tuˈn tbint‑xix cyxnakˈtzan te cabtl.

³ Tziyˈxse tuˈna ti jilel qˈuixcˈaj qˈuiyeley tuj taakˈen Jesús, tisenj weya, bix tisenxix jun soldado niyˈx tuˈn tuj taakˈen tcawel. ⁴ Kej soldado min tzˈaj cycˈuˈj tiˈ ti jileltl, cuma il tiˈj n‑oc cycˈojlaˈn cycawel. Jaxse juˈx tey, miˈn tzˈel tiiˈna tcˈuˈja tiˈ taakˈen Jesús. ⁵ Jaxse juˈx, ka at jun ajkelel tuj jun skach, ka min xbaj t‑xnakˈtzan tiib te ajkelel, bix ka min s‑oc tcˈuˈj tiˈj tkaˈyel cxeˈl kˈonte tuj il tuj tsakech, mlay tcama tcotz. ⁶ Jaxse juˈx cab xjal akˈanal tuj jun camon akˈuntl. Ja tzunj mas nim tzˈakˈanan, jaxse jaj ckˈil tej tneel twitz awal. ⁷ Xiˈmanxse tiˈj ti tzin tyeecˈan jyol cyiˈ soldado bix jyol tiˈ jun ajkelel bix jyol cyiˈj akˈanal tuj camon akˈuntl, bix Dioste cwel kˈonte tumel tuˈn tel tniˈya cyiˈj techlala.

⁸ Miˈn tzˈel tuj tcˈuˈja ka Jesús, Scyˈoˈn tuˈn Dios, xjal texin, jatze eˈla itzˈjxin cyiˈ te tja cawel David. Bix jax Diosxin, cuma e telniˈyax tej tjatz itzˈjxin tuj tcyamecyxin. Ja tzunj lu tloqˈuel jbaˈn tpocbal kˈiˈn wuˈna. ⁹ Tuˈn tzunj baˈn tpocbala niyˈxsewe takˈ wuˈn, hasta nchin cub ẍpet tuya cadena tuj tzeeˈ tisen jun byol xjal. Pero te Dios tyol, tzakpiˈnxte tuˈn tel tpocbal tuj cykil twitz txˈotxˈ. Yaaˈn ẍpoˈnte tisenj weya. ¹⁰ Pero cykilj qˈuixcˈaj qˈuiyax wuˈn, qˈuiyaxwe wuˈn cuma tuˈntzen cybinte jxjal xiˈnen te ocslal Jesús, tuˈntzen baˈn cyiikˈente jcoˈpbil o toye Jesús, bix tuˈntzen cypon tuya Jesús, tuˈn cyten tuyaxin te junx maj tuj jun lugar axse banel bix tzinxse ntxakakan. ¹¹ Te ja tyol jilj lu, jax teja. Tz̈i cyjulu: “Ka ma txiˈ kkˈon kiib tuj cyamecy nuk tiˈjcˈa Jesús, ko itzˈjeltzen tuyaxin. ¹² Ka ma tziyˈx qˈuixcˈaj kuˈn nuk tiˈjcˈaxin, attzen koclel tuyaxin tuj tcawbilxin. Ka min xcyaj kkˈoˈn tuj chicˈaj ka te Jesús ejooˈ, ja tzunxin cyjel kˈonte tuj chicˈaj ka yaaˈn texin ejooˈ. ¹³ Pero texin tzinx nbint texin tuˈn ti jilel tzin tkbaˈnxin, bix mlay cub tchˈixbeˈn texin tyolxin, amale mint bint ke kuˈn alcyej nxiˈ kyolen,” tz̈i tyol jilj.

Jun seyˈ bix baˈn xnakˈtzal tuj twitz Dios

¹⁴ Kbanxse ti toc wuˈn cye xjal, bix tzinenxse kbanx cye twitz Dios tuˈn miˈn baj cypetxen cyiib tiˈj yol tuj tyol Dios. Oj cyakˈ petxl cyiib juˈwa, mintiiˈ baˈn tajbeˈna, bix alj ma tzˈoc ebinte, nuk akˈbilcye tuj il. ¹⁵ Pjelxix t‑xnakˈtzaˈna tiˈj ti ctemela tuˈn toca te jun xjal seyˈ bix baˈn twitz Dios. Oj tbint tuˈna juˈwa, mintiiˈxix il tiˈj tjaw chˈixewey tiˈj tiiˈn xnakˈtzana cye xjal. Xnakˈtzam tyol Dios cye xjal tuˈn tcyajxix tzinen tuj cywitz.

¹⁶ Oj takˈa xnakˈtzal xjal, xomel jtikˈch yolel mintiiˈ baˈn tajbeˈna, bix te twitz txˈotxˈ, bix jun wikxitl tten tuya tyol Dios, cuma ja tzunja n‑el lakˈbante cye xjal mas tiˈ Dios. ¹⁷ Tisen veneno nxiˈ leˈn tuj cychuˈl xjal, juˈxse cyten jyola te cyanem xjal. Juˈtzen tten cyxnakˈatz Himeneo bix Fileto cye xjal. ¹⁸ O chi cub tzpet tuj yol jaxxix, cuma eteˈcˈa kbalte cye xjal ka yaaˈn juˈ ttenj tyol Dios nbyan ka cjawetz itzˈj kxumlal juntl maj. Cyuˈn tzunj yol lu nxaˈ cyxooˈn cyanem xjal tiˈ Jesús. ¹⁹ Pero te Dios tyol o cyajte tloqˈuel mlay cub xitj. Bix al tzunj ma tzˈoc ebinte tyolxin, tz̈itzen Dios cyjulu: “Ttzkiˈnte Kman Dios al kej texin t‑xjal,” bix “Al kej ma chi naˈnte ka ja Dios Cyaaw, il tiˈj qˈuelel cypaˈn cyiib tiˈj tkaˈyel,” tz̈i Dios.

²⁰ Tuj jun jaaˈ te jun kˈina at lak te oro bix te plata. Ejeeˈ tzunja nintzaj cymunel. Bix jax atte lak te tzeeˈ bix te txˈotxˈ. Ejeeˈ tzunja yaaˈn nintzaj cymunel. ²¹ Jaxse juˈx ka at jun xjal ma ttxˈaj tiib cyuj tkaˈyel o byan wuˈna, baˈntltzen te tajbel‑lel tuj nintzaj taakˈen Dios, tisen tzunj lak nintzaj tmunel tuj twitz taaw. ²² Juˈ tzunj xomel jkaˈ tajbela tuj tcwalela. Tetzen t‑xelja bincham tzunj baˈnxix tuj twitz Dios, cˈoquelxix takˈ tey, baˈnx cwel weˈy twitz Jesús, bix cwel tena tuj ttz̈yal. Jyom tzunja lu cyuyaj xjal jaxxix cyuˈn twitz Dios.

²³ Miˈn tzˈoc tkˈoˈna tcˈuˈja tiˈ tyol jun xjal oj takˈ petxl tyol. Ttzkiˈntl tzuna nuk kˈoj tzin tjyoˈn. ²⁴ Jun onlte Dios, mixben tcub ten tuj kˈoj. Yaaˈn juˈ tewa, sino cwelxix tente tuj baˈn tuya cykil xjal, tbanelxix tnaabl te xnakˈtzal, bix nimx tcˈuˈj oj toc bint jkaˈ tiˈj, ²⁵ bix cxeˈl tkbaˈn tuyaxix tanem cyej xjal n‑oc jyonte tuya kˈoj. Ojtzen t‑xiˈ tkbaˈn onlte Dios cyej xjal jyol kˈoj juˈwa, kapetzen jacˈa tzˈel cyniyˈ tiˈ cyil twitz Dios, bix tuˈn tel cyniyˈ tiˈj alcyej yol jax, ²⁶ tuˈn tel cywatl, bix tuˈn cytzokpaj tuj tkˈab taaw il, jaaˈj tzyuˈnake tuˈn tcub cybinchaˈnj ti jilel tajbil taaw il.

Cynaabl xjal cyuj kej mancˈbil kˈij

3  Timoteo, wajtzen tzˈel tniˈya tiˈj cyej mancˈbil kˈij chi ultzen tuya nim pena, bix wajtzen tzˈel tniˈya tiˈj tiiˈn cynaabl xjal cyuj kej kˈija. ² Ke xjal nuk ejeeˈx cˈoquel cyakˈ cye, nuk pwak ccyajbeˈ, cˈoquel cykˈon cyiib te nintzaj cywitz xjal, qˈuiyel tuj cycˈuˈj ka nintzajke, bix nim chi oquel chiˈl tiˈ Dios, miˈn tzˈoc cybiˈn cyman, ya mintiiˈtl cybanel, bix ya miˈn tzˈoc tocl tyol Dios tiˈ cywiˈ, ³ mintiiˈtl cyanem, bix ya miˈn tzˈoc kˈaˈben cycˈuˈj tiˈ juntl xjal, nuk chi cwel ten xtzˈiml yol, mlay bint cytzyunte cyiib bix ya miˈn cycuyatl tuˈn toc juntl xjal te tzyulcye, chi oquel te yuwin, bix cyaj kˈojxse cykilj baˈn, ⁴ cxeˈl cykˈoˈn jun cyuya tuj tkˈab juntl xjal, bix cyxooˈ cyiib, axse chi elela tuj cywitz, bix cxeˈl cyjyoˈn laˈ alcye cyaj, yaaˈntl Dios cyjyaˈ. ⁵ Bix at xjal cˈoquel cykˈon cyiib te ocslal Dios nuk tiˈ cycyeˈyenc, pero mintiiˈ tipemal cyocslabl, cuma nuk ten cyuˈn.

Tisen kej xjal caˈba cywitz tisen kej lu matzen chi akˈ jawel jlet jaˈlewe. Mintzentiiˈ toclena cyiˈj xjala, ⁶ cuma cyxol tzunj xjala tocxa cabtl chi oquex tiyˈ cyuj jaaˈ te yolel tiˈ tyol Dios pero jun wikxitl cye cyaj. Tisen tzunj, at xuuj baˈn tcub cycˈuˈj cyuˈn ka jax cyxnakˈatz, cuma ke cyej xuuj naˈcke bix chtˈol cynaabl tuˈn cyil, bix cuma ke cyej xuuj cykilcye yol n‑oc cybiˈn. ⁷ Ejeeˈtzen xuuj nuk nchi xnakˈtzanx, pero mlay pon cnetj jax tyol Dios cyuˈn. ⁸ Ke cyej yajlal xjal, juˈtzen ke cyeja tisen kej xin tchman cawel te Egipto nejl, jxin Janes bix Jambres, e cub bint jun techlal cyuˈnxin tisenj te Moisés, pero bix oc meltzˈajkexin kˈojlel tiˈ Moisés. N‑oc cyxnakˈtzaˈn cyej xjal caˈba cywitz ocslabl, pero nchi oc meltzˈajxin kˈojlel tiˈj jax yol, cuma at ttzacaj cynaablxin, bix min tzˈel cyniyˈxin tiˈj alcye jax. ⁹ Nuk jaaˈx chi pomela weˈxin tuya cyyolxin, pero cwa mlay chi eltlxin baˈn tuˈn tcub tcˈuˈj nimtl xjal cyuˈnxin, cuma tisen kej xin chmambaj te Egipto cwa cycub tzˈakxin, jaxse juˈx kej xjala lwewa cchicˈajaxel cyẍtakˈbil.

¹⁰ Pero tey, yaaˈn juˈy. Mayˈx tzˈel tey tniyˈ tiˈj we nxnakˈatz, bix ti tten weya nnaabl, bix ti waja, bix ti tten kˈuklec ncˈuˈj tiˈ Dios, bix nimxse ncˈuˈja, bix tiiˈn takˈ Dios n‑oc we, bixse wipemala tuˈn tiyˈx wuˈna, ¹¹ bix tiiˈnj ttzyet ntzyuja, bixse qˈuixcˈaj nuk tiˈjcˈa tyol Dios. Ttzkiˈntl tzuna tikˈch e baj we bix tikˈch qˈuixcˈajel in iˈya cyuj tnom te Antioquía, Iconio, bix Listra. Pero jaxse Dios e coˈpante we tuj cykil il. ¹² Jaxse alj ma tajbe txiˈ lpe tiˈ Jesús qˈuiyaxse tchyonel tuˈn. ¹³ Pero tzunkej xjal kaˈ bix kej yajlal xjal mas pjel cyyajlaˈn xjal bix ejeeˈxsen qˈuelel paˈnte mas cyiib tiˈj jax tyol Dios. ¹⁴ Pero amale cykilet ja lu pjel, weˈcˈaxix tey tuj cykilj ma tcana, bix ma tzˈoc ke tcˈuˈja tiˈj, cuma ttzkiˈntl tzuna min baj kxnakˈtzaˈn key tuya nicˈbil yol, ¹⁵ bix ttzkiˈntla jatxe tuj tcwalela ti toc tuˈn tyol Dios. Jatzen tyol Dios ckˈolte tnaabla tuˈn tiyˈ tilbila tiˈj, bix tzin tyeecˈan alcyej tbeyel coˈpbil tuj tkˈab il, tiˈj kˈuklec kcˈuˈj tiˈ Jesús. ¹⁶ Cykilj e cuˈx cytzˈiˈben xjal tuj tyol Dios, cykilte oc t‑xjikˈen Dios. Ja te Dios e xiˈ kˈonte cynaabl xjal te tzˈiblcˈate, yaaˈn ke cye xjal e kbante. Juˈ tzunj najbente te xnakˈtzabl tej jaxxix, bix tuˈn toc chˈiquet jkaˈ, bix tuˈn tel kniyˈ tiˈj tkaˈyel te nincˈul kchunkˈlal, bix tuˈn kbaj xnakˈtzet te kajbelel te Dios, ¹⁷ bix tuˈntzen jun t‑xjal Dios baˈn tbint tuˈn, bix tuˈn binne tten tuj cykil taakˈen Dios.

Tej t‑xiˈ tcyiwsaˈn Pablo tnaabl Timoteo tiˈj alcye tuˈn tbint tuˈn

4  Timoteo, twitz Dios bix twitz Jesús cxeˈlxix wokxenan tey tuˈn t‑xiˈ tkbaˈna tyol Dios cye xjal, cuma laˈ alcye jun kˈij tzul meltzˈaj Jesús, Scyˈoˈn tuˈn Dios, te cawel tibaj cyil jxjal iˈtzx bixsen te cawel tibaj cyil cykilj xjal chi jawetz itzˈj, bix ccawelxin tibaj twitz txˈotxˈ. ² Juˈ tzunj, ka cyaj xjal cybi bix ka min, pero tey binne ttena te kbalx tyol Dios, cuma Dios cˈoquel cyeˈyente tey tiiˈna tuj tyolxin. Kˈoˈnc tipena tiˈj tuˈn tcub tcˈuˈj xjal ka kaˈ ncub tbinche, bix cxeˈl tkbaˈna tuˈn tcyaj il cyuˈn, bix cxeˈl tkbaˈna cye ti cwel bint cyuˈn, bix nimx tcˈuˈja oj t‑xiˈ tkbaˈna.

³ Cpomel jun kˈij mlay tziyˈxtl jbaˈn xnakˈtzaˈna cyuˈn xjal. Cxeˈl cyjyoˈntl cyxnakˈtzal te xnakˈtzaleccye tiˈj alcyej cye cyaj tzˈoc cybiˈn, cuma mintzentiiˈ cˈoquel tbinchen cye xjal tuj cywitz. ⁴ Nuk cˈaaltz cykˈoˈntl tzalcyiˈj twitzj jax tyol Dios, bix cxeˈl cybiˈn tikˈch nicˈbil yolel. ⁵ Perotzen tey, cˈuˈm alcyej tbey, qˈuiyax tchyonel tuˈna, nuk xnakˈtzanx cyxol xjal ti tten tpocbalj coˈpbil tuˈn Jesús, bix cuyamxix alcyej taakˈena.

⁶ Yal weya, ma pon tumel tuˈn nbyeta nuk tiˈjcˈa Jesús. Ya ma tzul canan tumel ncyamecya. ⁷ Yaltzen te wajbelela te Jesús, bajx cyjaˈ ncyeˈyen wexin, ox tzˈoc nbiˈn wexin tuj tyolxin, bix ox chin weˈwe twitz tyolxin. ⁸ Juˈ tzunj, te tzunj kˈij oj takˈ jxin Kaaw cyeyˈlx tumel, cwiikˈelwe jun nin ncotz texin, cuma jaxin cyeyˈlx tumel tujxix tumel cyibaj xjal. Bix yaaˈn nuk wecˈawe ctzaala tkˈoˈn texin, sino tuyaxe te cykilj xjal n‑oc takˈ cye tuˈn tul meltzˈajxin juntl maj.

E tkba Pablo te Timoteo alcye tuˈn tbint tuˈn

⁹ Nuksama, Timoteo, tzˈoc tilel tuˈna tuˈn tul naja cyeyˈl we, ¹⁰ cuma ma chin cyaj cyeˈyena tuˈnj xin Demas tuˈn tikˈch jilelj te twitz txˈotxˈa, bix ma txiˈxin tuj tnom te Tesalónica. Yal tej xin Crescente, o txiˈxin tuj ttxˈotxˈ Galacia. Yal tej xin Tito, juˈ ma txiˈtlxin tuj ttxˈotxˈ Dalmacia. ¹¹ Cyxoltzen wuyena tzalu, nukxix jacˈatl Lucas at wuyena.

Kˈintztzen Marcos tuyey oj ttzaja, cuma at cˈajbela we.

¹² Yal jxin Tíquico, min‑al tzalu, cuma o txiˈ nchkˈoˈnxin tuyey tuj tnom Efeso.

¹³ Oj ttzaja, naˈmcˈa tuˈn ttzaj tiiˈna ja ncapa e cyaj nkˈoˈna tja Carpo tuj tnom te Troas, cyuyaxj libro, bix ejeeˈxixj tzˈuˈn tzˈiˈben cywitz, ejeeˈxix xsunja mas il cyiˈj.

¹⁴ Yal te Alejandro, jxin txnol xcbil, nimxse tkaˈyel ma tzˈoc tbinchexin wiˈj. Diostzele cˈoquel kˈonte t‑xel texin tisenx tikˈch ma tzˈoc tbinchexin wiˈj. ¹⁵ Juˈx tey, cˈojlam tiiba twitzxin, cuma mayˈxse tzˈoc meltzˈajxin kˈojlel tiˈ kxnakˈatz.

¹⁶ Tej npona tneel maj te stisel twitz cawel, min‑al juntl oc clonte we. Cykilca ke ocslal wuya e cyaj cyeˈyente we. Pero cutz̈it ka min s‑oc tkˈoˈn Dios te tajlal cyil. ¹⁷ Pero te Kman Dios e ten wexin wuya, bix e tzaj tkˈoˈn wexin wipemal, tuˈntzen tbint nkbanteya tpocbal tyol Dios te coˈpbil, tuˈntzen toc cybiˈntl nim xjal te jun wikxitl tnom tocx tuj stisbil, tuˈntzen toc cybiˈn jxjal yaaˈn judío mintiiˈ tumel Dios cyuya. Juˈtzen in cleta tuj tkˈab cawel, tisencˈa in cleta tuj ttzi jun balen, tuˈn Dios. ¹⁸ Yal jaˈlewe Dios qˈuelel kˈinte naj we tuj tkaˈyel te junx maj, bix chin aal tiiˈnxin tuj cyaˈj jaaˈ ncawenaxin. ¡Nimaxit tbi Dios te junx maj! ¡Juˈ ttzuna!

Jun kˈolbebl tuˈn Pablo te mancˈbil yol

¹⁹ Kˈonxa jun kˈolbebl tej xuj Prisca bix te tchmilxuj Aquila bixse cye te tja Onesíforo. ²⁰ Yal tej xin Erasto, ma cyajxin tuj tnom te Corinto, bixse Trófimo ma cyajxin tuj tnom te Mileto, cuma yaabxin. ²¹ Bix tzˈoc tilel tuˈna tuˈn tul canana te mintknaˈx tul tyem te nim cykˈiˈk tibaj mar. Ma txiˈ jun kˈolbebl tey cyuˈnj xjal lu: Eubulo, Pudente, Lino, bixse Claudia, bix cabtl ocslal.

²² Tenxittzen Kaaw Jesús tuyey, bix nukxittzen tzaj tkˈoˈn Kman Dios t‑xtalbil tibaj cykilcakey ocslal. Oˈcx xsunj.