Chronological

Cristo bix Melquisedec

7  Jax e ten Melquisedec jun jawnex bix te junx maj pala jatxe ootxa. Bix jaxin jun techlal tiˈ Jesús te pala jaˈlewe. Jatxe ootxa jxin Melquisedec jaxse jun xinj nintzaj cawel tuj tnom te Salem, bix palaxin twitz Dios. Bix at jun e baj. Tejtzen tul meltzˈaj Abraham cyuya ke t‑akˈanalxin tej otk xcye Abraham tibaj jun cloj alakˈ cawel, bix e xiˈ Melquisedec te clulte Abraham tuj be. Tejtzen cymojbante cyiibxin tuya Abraham, bix e tcyˈiwla Melquisedec ja Abraham. ² Bix e xiˈ tkˈoˈn Abraham te tcotz Melquisedec jun tlajan paˈ tiˈj tikˈch otk tzˈel tiiˈnxin tuj cykˈab alakˈ tuj kˈoj.

Yaltzen te Melquisedec tbi, jatzen japeninaj “jiquenxix.” Bix at juntl tbixin, “cawel te ttxubtxjal.”

³ Bix juˈx e ten Melquisedec jun pala te junx maj mintiiˈ t‑xeeˈ titzˈjlenxin bix mintiiˈ t‑xeeˈ tcyimlenxin, cuma minteyˈ tumel alcye tmanxin bix alcye ttxuxin, cuma mintiiˈ tzin tkbaˈn tyol Dios cyiˈjxin. Bix mintiiˈ tzin tkˈumen tyol Dios tej titzˈj Melquisedec bix tej tcyimxin. Juˈ tzunj ja tzunxin jun techlal te Jesús, Tcwal Dios, cuma ja Tcwal Dios kpala te jaˈlewe te junx maj mintiiˈ tbajlel.

⁴ Yaltzen cyey, at juun ncuble cybisena ejeeˈ pala cyxol tiyˈjil Abraham mas jawnex twitz Jesús, kpala te jaˈlewe. Pero yaaˈn juˈwa. Cycyeˈyenctzen nimxsen t‑xiˈlen Melquisedec, ja techlal te Jesús. Hasta ja kiyˈjil Abraham e xiˈ kˈonte toybil te Melquisedec, bix n‑el kniyˈ tiˈj jaj nkˈinte jun toybil juntl mas jawnex twitzj nxiˈ kˈonte. ⁵ Yaltzen cye xjal judío, ke pala cyxol ejeeˈj tiyˈjil Leví, ke tchman Abraham. Bix tuˈnj tley Moisés at cyoclen kej pala tiyˈjil Leví tuˈn tel cyiiˈn tlajan paˈ cyoybil cye kej niyˈtl xjal judío. Amale cyiyˈjilalexit cyiib, ja ley e kˈumente tuˈn cykanen. ⁶ Pero jatzen te Melquisedec, amale yaaˈnt tiyˈjil Leví, bix e tiikˈ jun toybil Abraham, tij tchman Leví. Jaj lu nyeecˈan at tajwalel Melquisedec tuˈn toc te pala bix tuˈn tkˈinte toybil jun xjal tecˈax tley Moisés.

Bix yaaˈn nuk e tiikˈ Melquisedec toybil Abraham, bix tuyax e tcyˈiwlaxin ja Abraham, amale jat Abraham nimxsen il tiˈj tuˈn tcyaj tkˈoˈn Dios tyol tuyaxin. ⁷ Ja lu nyeecˈan mas jawnex Melquisedec twitz Abraham, cuma jax jaj ncyˈiwlante tibaj juntl mas jawnex twitzj ncyˈiwlet.

⁸ Bix at juntl tumel tzin tyeecˈan mas jawnex Melquisedec cywitz kej pala tiyˈjil Leví. Ke pala tiyˈjil Leví nchi cyimke, cuma xjalke. Yaltzen te Melquisedec, mintiiˈ tumel tcyimlen. Ja jun pala te junx maj. Bix jax jun pala mintiiˈ t‑xeeˈ tbajlel mas jawnex twitz kej pala nchi cyim.

Juˈtzen ja Melquisedec jun pala mas jawnex, bix jaxsen n‑echlan tiˈ kpala Jesús te jaˈlewe. ⁹ Yaaˈn te Leví bix ke tcwal oc te pala mas jawnex twitz Melquisedec. Amale e cyiikˈet‑xin cyoybil xjal, jax jaan ke cyexin e cyakˈ cyoybil te Melquisedec. Yaaˈna ejeeˈxin e xiˈ kˈonte, cuma mitknaˈx cyitzˈjxin, sino tuˈn Abraham, ¹⁰ cuma tej t‑xiˈ tkˈoˈn Abraham toybil te Melquisedec, icxa jaxin e yolen cyiˈj cykilca tchman, cuma jaxin tiyˈjil cykilca kxeˈchel.

¹¹ Yaltzen cye pala tiyˈjil Leví cyxol judío, ajbenke te tlocˈ tley Moisés. ¿Pero ajbenpake te kˈol cyipemal xjal tuˈn cyoc xjal tzˈaklxix? Min. Cyexin cyaakˈen nuk te kanlte xtalbil cyibaj xjal tuya chojbil cyil. Nuket e bint cyuˈn tuˈn cyoc xjal tzˈaklxix bix tuˈn cycoˈpj xjal tuj cyil, mintetletiiˈ il tiˈj ttzaj jun wikxitl pala tisen Melquisedec, jatzen Jesús, junxitl pala yaaˈn t‑xeˈchel Aarón, jnintzaj tneel pala cyxol pala tiyˈjil Leví. ¹² Ktzkiˈn ka o pon baj cyaakˈen pala te Leví, jax juˈx il tiˈj o pon baj tley Moisés. Te ke jaˈlewe, at jun wikxitl pala. ^13-14 Ktzkiˈn tuj tley Moisés, il tiˈj nuk ejeeylex ke tiyˈjil Leví oc te pala. Pero te Kman Jesús, yaaˈn tiyˈjil Leví, cuma jatz itzˈja cyxol xjal te Judá, bix at tumel min‑al jun xjal tiyˈjil Judá e jaw kˈonte chojbil cyil xjal twiˈ altar tuj tja Dios. Tuj tley Moisés min‑al jun xjal tiyˈjil Judá oc taakˈen te pala. Juˈ tzunj tzinen taˈ o chˈixpet ley, cuma te Jesús yaaˈn jun pala tisen Aarón. ¹⁵ Bix juntl. Mas tzinen taˈ at jun acˈaj ley te ke jaˈlewe, cuma o tzˈoc jun wikxitl pala tisen Melquisedec. Tuj tyol Dios min nbyan at tulel jun pala tisen Aarón. Te tzin tkbaˈn at tulel jun pala tisen Melquisedec. ¹⁶ Bix ja tzunj pala at tulel o tzul. Jatzen Jesús. Min oc Jesús te pala tuˈn tipemal jun ley nuk cyex xjal te Leví bix at tbajlel cychunkˈlal, sino ocxin te pala tuˈn tipemal jun chunkˈlal te tex, mintiiˈ tbajlel, tisen te Melquisedec. ¹⁷ Juˈx ttena, cuma juˈ tz̈i Dios. Cycyeˈyenc juntl maj ti toc tuˈn Dios te Tcwal tuj tyol Dios: “Jay cˈoquel te pala te junx maj, tisen Melquisedec,” tz̈i Dios te Tcwal.

¹⁸ Nukettzen e bint tley Moisés ootxa tuˈn cycyaj xjal jiquenxix, jaxitle kˈiˈn kuˈn jaˈlewe. ¹⁹ Pero min e bint. Juˈ tzunj il tiˈj cyjel tiˈjxe, tuˈntzen t‑xiˈ kiiˈn jun mas baˈnxix, tuˈntzen kpon tzˈaklxix twitz Dios. Ja tzunj lu jaj tuˈn baˈn kpon twitz Dios tuˈn jun nicˈul tiˈj mas baˈn cywitz kej pala te ootxa.

²⁰ Jatzen nicˈul tiˈj mas baˈn ja Jesús, bix jaxin mas baˈn cuma najbenxin te piador tiˈj acˈaj trat, cuma ocxxin te pala tuˈn tipemal tjurament Dios. ²¹ Yaltzen cyekej tiyˈjil Leví, ocke te pala, pero yaaˈn tuˈn tipemal tjurament Dios. Bajx tkbaˈ Dios tuˈn cyoc te pala te junx maj. Nuk tiˈjcˈa Jesús tzin tkbaˈna tyol Dios jaxxix tuˈn toc Jesús te pala te junx maj. Tz̈i tyol Dios cyjulu: “E tkˈume Dios te Tcwal tuya jun jurament yol, bix ya mlay tchˈixpetl tyolxin. Bix ja yol e tkˈumexin te Tcwalxin tuya jun jurament cyjulu: ‘Jay cˈoquel te pala te junx maj, tisen Melquisedec,’ tz̈i Dios te Tcwal,” tz̈i tyol Dios.

²² Bix yaaˈn nuk oˈcx jun mas baˈn piador, sino tuyax jaxin o tzˈoc te piador tiˈj jun mas baˈn trat kiˈj twitz trat te nejl.

²³ Bix juntl tumel. Ja Jesús jun pala mas baˈn yaaˈn nuk tiˈj e cyjaˈ tjurament Dios, sino tuyax jaxin pala te junx maj. Nejl nimxsen cybaj pala e ten te nicˈul tiˈj cyiˈ xjal tuya Dios. Pero bix e cyimke, bix e cyaj weˈ cyaakˈen, bix il tiˈj ocxtl cyxel. Yaaˈn te junx majke. ²⁴ Pero te Jesús, mintiiˈ tbajlelxin. Min tzˈoc taakˈen tuj tkˈab juntl. Min‑al juntl baˈn tcyaj te t‑xel. ²⁵ Juˈ tzunj jaxin baˈn tcoˈpante ke jaxxix toclen ka ma koˈx lkˈe twitz Dios nuk tuˈn Jesús. Bix ka nko cubsan kwitz te Dios, bix tocxsen Jesús onlte ke twitz Dios. Bix cuma te Jesús mintiiˈ tbajlel texin, junx maj at‑xin yolel kiˈj twitz Dios.

²⁶ Juˈ tzunj tzinenxix tiˈj jatzen jun nintzaj kpala jkajbeˈxix te junx maj. Jiquenxix, mintiiˈ tilxin, bix puro sakxix, taj junxitl twitzj keˈj binchal il, bix o jaxxin mas tibajxe twitz cyaˈj, jaaˈ taˈ Dios. ²⁷ Te Jesús, yaaˈn tisen juntl wik nintzaj pala. Ejeeˈ tzunja il tiˈj cwel cybyoˈn alimaj cykil kˈij, tuˈntzen t‑xiˈ cyoyen te Dios te chojbil il, tneel tiˈj cye cyil, bix tecˈaxtl tiˈtl cye xjal cyil. Pero te Jesús, e xiˈ tkˈoˈn jun chojbil te junx maj, bix te cykil cyil xjal, jaj tej t‑xiˈ toyen tiibxin te junx maj tiˈ cyil xjal twitz cruz.

²⁸ Bueno, key hermano, nejl, jtley Moisés oc tkˈoˈn juun xjal tuˈn cyoc te pala, pero amale tocxet juun te mas nintzaj pala cyxol, mintiiˈ cyipen tuˈn tel cyxooˈn il, bix cwa cycyim. Pero ya jaˈlewe, mas yaj tibajxe tley Moisés, at jun wikxitl kpala, yaaˈn tuˈn tley Moisés, sino tuˈn tjurament Dios. Jatzen kpala jtzˈaklxix bix mintiiˈ tcyimlel, bix scyˈoˈn tuˈn Dios.

Jun acˈaj trat o bint tuˈn Cristo mas baˈn twitzj kˈanak trat

8  Key hermano, alcyej nxiˈ nkbaˈn ja tzunj lu: At jun nintzaj kpala. Jaxin mas jawnex cywitz cykil pala te ootxa. Bix nuk jacˈaxin jun pala il tiˈj o japaxin tuj cyaˈj jaaˈ ncawen Dios tibaj cykilca, bix o cub kexin tuj tmankˈab Dios. ² Jatzen nakˈanana te pala tuj mero ttxuylal tuj cyaˈj Dios binchalte. Yaaˈntzen nakˈanana tuj nintzaj tja Dios cyxol xjal judío xjal binchalte, bix nuk techel tiˈj mero ttxuylal at tuj cyaˈj.

³ Yaltzen cyaakˈenj cykilca nintzaj pala tzalu twitz txˈotxˈ, jatzen cyaakˈenj te oylxte cotz bix chojbil il te Dios. Juˈtzen tten cyxol ke pala te twitz txˈotxˈ, bix jax juˈx te Jesús tuj cyaˈj, jax il tiˈj tuˈn t‑xiˈ toyen jun chojbil il cyiˈ xjal. Kej xin pala te twitz txˈotxˈ, nuk nxiˈ cyoyen alimaj. Pero te Jesús, jaxin o txiˈ toyen tiibxin te junx maj.

⁴ Nukettzen tcub Jesús twitz txˈotxˈ, yaaˈntetle pala te oylxte chojbil kil, cuma tzin tkbaˈn tley Moisés at‑x jun cloj nchi ajben te pala. Juˈ tzunj min tzˈajben Jesús te pala twitz txˈotxˈ, sino tuj cyaˈj.

⁵ Ootxa, jatzen Dios e cyaj tyol tuˈn tbint jun nintzaj jaaˈ jaaˈ akˈanana ke pala. E tajbexin cyoybil xjal bix tja Dios tzalu twitz txˈotxˈ nuk jun xlequemal tej at jawne, bix nuk jun techel tiˈj jun jaxxix at tulel, jaj Kman Jesús jun mero oˈcxcˈa chojbil il at pomlel twitz Dios tuj mero tlugar Dios. Kcyeˈyenc ti toc tuˈn Dios te Moisés tej ttzyet tbinchante tneel nintzaj tja Dios. Tz̈i Dios cyjulu: “Kˈoˈnc tcˈuˈja tiˈj tuˈn tbint tja Dios tisex e xiˈ nyeecˈan tey tej tjapey twiˈ witz,” tz̈i Dios te Moisés. Ja lu nyeecˈan tej tcyaj tkˈumen Dios te Moisés ja techel lu, nuk te jun techel tiˈ jun ttxuylal.

⁶ Juˈ tzunj kej pala najbenke tuj tja Dios tzalu twitz txˈotxˈ nuk techlal tej ttxuylal at tulel. Pero yaltzen jaˈlewe, ja tzunj ttxuylal at tulel o tzul, bix jax mas jawnex bix mas najben jun ttxuylal twitz techlal. Bix yaaˈn nuk jaj lu, sino tuyax tiˈj acˈaj trat e nincˈun Jesús tuya Dios kiˈj mas baˈn twitzj trat te nejl. Mas baˈn acˈaj trat, cuma mas e bint twitzj tneel. ⁷ Tneel trat min ajben tuˈn cypon xjal sakxix tiˈ cyil te junx maj. Nuket e bint tuˈnj tneel trat te Dios, mintle e tzaj juntl te tcab. ⁸ Cxeˈl nyeecˈana cyey tuj tyol Dios tneel trat e cyaj cye xjal yaaˈnxix tzˈakl bix juˈ tzunj il tiˈj tuˈn tul juntl acˈaj. Tuj tyol Dios tz̈i Dios cyjulu: “Cpomel jun kˈij oj tcub nkˈoˈn jun acˈaj trat cyuya xjal aj Israel bix aj Judá. ⁹ Ja tzunj acˈaj trat yaaˈntzen juˈtl tisenj e cub bint wuˈna nejl cyuya kej ootxa cyxeˈchel tej cyetz wiiˈna tuj txˈotxˈ te Egipto. Min e cybi tzunj trat nejl. Juˈ tzunj e cyjaˈ nkˈoˈnke tiˈjxe. ¹⁰ Ja tzunj trat cwel nkˈoˈn cyuya xjal aj Israel laˈ alcye jun kˈij juˈtzen ctemela julu. Cˈoquex nkˈoˈn nyol tuj cyanem xjal, tuˈntzen cyocslante xjal nyol. Yaaˈn tisen nejl, nuk twitz jun xak e cub bint te tzˈibbil e cyjaˈ ntzˈiˈben nyol. Bix inayen tzuna chin oquel te Cydios, bix ejeeˈtzen chi oquel te nxjala. ¹¹ Ojtzen tel cyniyˈ cykil ke xjal wiˈj, mintiiˈ il tiˈj tuˈn toc tkˈumen jun xjal cye cabtl tuˈn tel cyniyˈ wiˈj, mi nuket cyeke tuya bix mi nuket cyeke te tja, cuma tuj tzunj kˈij tzul cyajbe xjal nyola yaaˈn lomoˈn ke xjal tiˈj sino tuˈn cyex cygana, tele ajnintz xjal bix tele nmak xjal. ¹² Bix cwel nnajsaˈna cyil, bix mlay tzaj nnaˈntla juntl maj,” tz̈i Dios tuj tyol Dios.

¹³ Tej tyolen Dios tiˈj jun acˈaj trat, nyeecˈan ya tuj twitzxin ya kˈanaktl trat te nejl. Otk tzˈoc tley Moisés te kˈanak, bix ktzkiˈn alcyej n‑oc kˈanak, ya tuˈn tex xeˈt, ya min tzˈajbentl.

9  Yaltzen tiˈj tneel trat tuˈn Dios cyuya xjal at ttxoˈlan ti tten tuˈn cynaˈn xjal Dios. Bix tuˈntzen cynaˈn Dios, at jun nintzaj xjan tja Dios cyxol. ² Bix tuj nintzaj tja Dios at caˈba cwart. Tneel cwart Xjan tbi. Bix tcab cwart maa t‑xeeˈ Masxsen Xjan tbi. Tujtzen tneel cwart at jun jawnex tcublel ten luz bix jun jawnex mes tcublel ten xjan pan. ³ Cyxoltzen jcaˈba cwart at jun nintzaj xbalen tcuˈx cyxol. Tujxe tzunj xbalen te cwart Masxsen Xjan jatztzen e tena Dios. ⁴ Tiˈjxetzen xbalen tcwaˈ jun altar te oro te patbil incienso te Dios. Bix tujtzen cwart mas xjan tocxe jun nintzaj caxa oro ttxˈotxˈel. Tujxetzen caxa tcuˈxa jun xara. Tujtzen xara tcuˈxa jun txab jpan e tzaj ttz̈iten Dios cye aj Israel tej cynajan tuj tzkij txˈotxˈ. Bix juˈx tcuˈx tuj caxa tbardón Aarón j‑otk tzaj xulen bix j‑otk tzaj xmacalin. Bix juˈx kej caˈba pisar te xak tcuˈx tuj caxa jaaˈ tzˈiˈbena jlaaj tcawbil Dios. ⁵ Bix tcub twiˈ caxa at caˈba techel jun wik querubín cybi, bix liyˈpuˈn cyxiicyˈ twiˈ caxa jaaˈ e tnajsa Dios cyil xjal. Pero ya ktzkiˈntl ttxoˈlan te nejl tuj tja Dios. Mintiiˈ amleˈn tuˈn woc tena kbalte mastl cyey ti tten.

⁶ Kane cykilcake binne juˈwa tuj tja Dios, ocx ke pala jaca kˈij tuj xjan tneel cwart tuˈn tbint cyaakˈen tuj. ⁷ Yaltzen tej xjanxsen cwart tujxe xbalen, nuk ja mas nintzaj pala ocx tuj, bix nuk jun maj jaca jnabkˈi, bix mlay tzˈocxxin ka mintiiˈ tz̈iyˈ kˈiˈn tuˈnxin. Tejtzen tocxxin tuj, bix e xiˈ ttz̈itenxin tz̈iyˈ te alimaj twiˈ caxa te chojbil jtexin til bix xsunj cye niyˈtl xjal. ⁸ Cyuya ja lu, jatzen Espíritu Santo nkˈonte tumel ke ka najbenx tneel cwart, cykilca xjal mintiiˈ toquel tuj cwart xjanxsen jaaˈ e ten Dios. ⁹ Ja tzunj lu nkˈumente katzen kˈiˈnx cyreligión xjal cyuˈn te ootxa tuˈn cypon tuya Dios, mlay chi pon. Bix ja tzunj lu tzin techlaˈn te ke ti nbaj jaˈlewe. At‑x xjal nxiˈ cyoyen chojbil cyil te Dios, bix at‑x xjal tzin cynimanx cycostumbre n‑el cytxjoˈn cykˈab te jun cynimbil tuj cyley, pero min tzˈajben te txˈajbil tuj cyanem, ¹⁰ cuma ka ntxjon jun xjal tiˈj tisenj tten tuˈn, nuk tiˈ t‑xumlalxin n‑el ttxjoˈnxin, yaaˈn tuj tanemxin. Max cyaj tanemxin tisex tten. Juˈx te cykil oybil, waabjle, cˈaˈpjle, bix cykiltl costumbre at, nuk techlal. Mintiiˈ n‑oc tbinchen tiˈ cyanem xjal. Ajben nuk te techel joocˈtzen n‑ul mero jaxxix.

¹¹ Bix o tzul jaxxix. O tzul jun acˈaj ti tten tuˈn ktxjet, jaj jxin Scyˈoˈn tuˈn Dios. Bix ja tzunxin te nintzaj pala tiˈj tbanel at tulel. Cxeˈl nkˈumena cyey tiˈj acˈaj o tzul tuˈn ktxjet te junx maj. Tisenj nintzaj pala cyxol judío iyˈ ajx tuj tneel cwart tuj tja Dios tuˈn tocpan maa t‑xeeˈ jaaˈ e ten Dios, juˈxsente Jesús nuk iyˈ ajx cykilca bix o pon tuya Dios, pero yaaˈn tuj jun lugar te twitz txˈotxˈ tbinche xjal, sino tuj jun mas jawnex lugar. ¹² Bix yaaˈn ocpanxin twitz Dios tuya tz̈iyˈ te chiva bix te wacẍ neeˈ tisenj cye nintzaj pala n‑ocpan cyuˈn, sino tuya texte ttz̈qˈuel. Bix yaaˈn chˈima maj ocxin tuya Dios, tisen kej te twitz txˈotxˈ, sino nuk jun maj, tuˈntzen tlokˈontexin ejooˈ tuj tkˈab il te junx maj. ¹³ Nejl, tej toc tz̈itet ttz̈qˈuel chiva bix ttz̈qˈuel toro cyiˈj xjal, ajben tuˈn tchewset cyil xjal, pero nuk te techel. Bix tej toc tz̈itet cyiˈj xjal ttzaˈl neeˈ wacẍ otk baj patet twiˈ xjan altar, ajben te txˈajbil ttzˈilel jun xjal tej toc tmocoˈn jun anem, pero nuk te techel. ¹⁴ Katzen ajben cytz̈qˈuel alimaj cye xjal nejl te txˈajbil cye xjal, yaltzen jaˈlewe mas jawnex tipemal ttz̈qˈuel Jscyˈoˈn tuˈn Dios te txˈajbil ke. Mas tipemal ttz̈qˈuel Jesús te chojbil il, cuma e xiˈ tkˈoˈnxin te Dios jun tchunkˈlalxin te junx maj, bix cuma mintiiˈ tilxin. Jatzen ttz̈qˈuel Jesús ntxjonte knaabl tuˈn jiquen taˈ knaabl, bix tuˈntzen kajben te Dios Iˈtzxix twitzj tej kajben tuj ley ootxa ya cyimnen taˈ.

¹⁵ Tuˈntzen tcyimlen Jesús, o chjeten niyˈ tikˈch cyil xjal e baj bint tuj tcwent tneel trat te Dios ootxa, bix tuˈn tcyimlenxin otzen cyaj jun cyoclen tuˈn cyiikˈente chunkˈlal te junx maj tetzen cyej xjal tzin cybiˈn ntxcon Dios cyiˈj tuj acˈaj trat te Dios.

¹⁶ Pero at juntl tajbel tcyimlen Jesús. Tuˈntzen at tipen j‑acˈaj trat tuya Dios cyiˈ xjal, ilxix tiˈj tuˈn toc tz̈iyˈ tiˈj. Icxa tzunj cyxol xjal. Ojtzen tcyim jun xjal, ke tcwal ckˈilte cykab tuya jun tuˈl tyol cyman. ¹⁷ Pero at tumel kuya mlay kˈoj naj cye ka iˈtzx cyman. Ojxe tcyim cyman, bixsen tcyjel cye tcwal. N‑eltzen kniyˈ tiˈj tuˈn at tipen jun tuˈl yol tiˈj tkab, il tiˈj ojxe tcyim binchal jtuˈl yol. Ka mixe jun cyim, mintiiˈ cykab tcwal. Juˈxsen tten tuya acˈaj trat tuya Dios cyiˈ xjal. Pero nuk tcyimlen Jesús baˈn el twitz Dios. Nuket min e cyim Jesús, mintetletiiˈ tipen j‑acˈaj trat Dios kiˈj, tuˈntzen kiikˈente jun kkab tuˈn Dios. ¹⁸ Ja lu nyeecˈan ke katzen mintiiˈ tz̈iyˈ, mintiiˈ chewsbil il, bix mintiiˈ tipen jun trat. Juˈ tzunj, tuˈn tcyaj bint tneel trat te Dios ootxa, oc tkˈoˈn Moisés tz̈iyˈ tiˈj. Il tiˈj e cyim jun alimaj te kˈol tipemal tneel trat nejl. ¹⁹ Cynaˈntztzen tej tkˈumente Moisés cykil tley Dios cye xjal, e tzaj tiiˈnxin jun tzbil hisopo tbi tuya jun ttxˈaka xbalen tlant carnel cyak tilbil, bix e cuˈx tmuˈnxin tuj ttz̈qˈuel wacẍ bix ttz̈qˈuel chiva smoˈn tuya aˈ, bixsen oc ttz̈itenxin tiˈj jaaˈ tzˈiˈbenc tley Dios twitz xak, bix juˈx oc ttz̈itenxin tz̈iyˈ cyiˈ xjal, ²⁰ bix e xiˈ tkbaˈnxin cye xjal: “Ja tzunj tz̈iyˈ lu ncyaj kˈonte baˈn jtrat te Dios o cyaj cyuyey tuˈn t‑xiˈ cynimana,” tz̈i Moisés cye kxeˈchel tej tcyaj tneel trat te Dios cyuya xjal. ²¹ Juˈx tiˈj nintzaj tja Dios, oc ttz̈iten Moisés jtz̈iyˈ tiˈ tja Dios tuyax cykilca macbil najben tuj tja Dios cye pala tuˈn cyniman Dios.

Nuk tuˈn tcyamecy Cristo n‑el kil

²² N‑eltzen kniyˈ tiˈj tuˈnj ley te ootxa ilxix tiˈj tuˈn toc tz̈iyˈ tiˈj cykilcaj najben cye xjal tuˈn cynaˈn Dios, tetzen techel tuˈntzen sakxix twitz Dios. Tuj tley Moisés, ka mintiiˈ tz̈iyˈ oc tiˈj cykilca, min e tocsla Dios. Bix ka mintiiˈ tz̈iyˈ te chojbil il, min e cub najset il. ²³ Jatzen tumel jniyˈ kej tikˈch ajben te cynaabl Dios il tiˈj tuˈn cytxjet twitz Dios tuya tz̈iyˈ. Pero ja lu nuk te techel tiˈj ti tten tuj cyaˈj tuˈn knaˈn Dios. Bix cykilj at tuj cyaˈj il tiˈj tuˈn ttxjet tuya jun wik chojbil mas baˈn twitz kej chojbil ajbenke te twitz txˈotxˈ. ²⁴ Bix ja tzunj chojbil mas baˈn jatzen Jesús. Cuma Jscyˈoˈn tuˈn Dios min ocx texin tuj jun xjan jaaˈ binchaˈn nuk cyuˈn xjal, bix nuk jun techel tej jaxxix xjan jaaˈ at, sino juˈ o tzˈocx texin tuj cyaˈj. Jatztzen taˈxin twitz Dios te kanl xtalbil kiˈj. ²⁵ Cyxol judío tuj tley Moisés, texe juun jnabkˈi tzˈoc jtneel pala tuj Masxsen Xjan cwart jaaˈ e tema Dios, tuˈntzen t‑xiˈ toyen tz̈iyˈ. Yal te Jesús, yaaˈn texe juun jnabkˈi n‑ocx twitz Dios, cuma junx maj o tzˈocx. Bix yaaˈn texin tisenj cyej nintzaj pala e xiˈ cyoyen tz̈iyˈ nuk te alimaj, sino tex ttz̈qˈuel. ²⁶ Nukettzen il tiˈj texe juun jnabkˈi cxeˈl toyenxin ttz̈qˈuelxin te Dios, jaxittzele il tiˈj tuˈn tcyimxin jaca jnabkˈi jatxe titzˈjlen twitz txˈotxˈ. ¡Pero min! O pon baj twiˈ jtyem bix jley te ootxa, bix ma tzul jun acˈaj tyem. Jaˈlewe o tiikˈ Dios jun toybil te ttz̈qˈuel Tcwal junx maj bix te junx maj te chojbil cykil il.

²⁷ Juˈtzen e cymaˈ Jesús jun maj. Bix jax juˈx jaca juun xjal il tiˈj tuˈn tcyim jun maj oj tpon tumel. Tetzen yaj, iltzen tiˈj tuˈn cyoc tuj cyeˈybil tuˈn Dios. ²⁸ Pero te Jesús, min tzˈoctl texin tuj cyeˈybil, cuma ox tchojxin tuj castiwa tuˈn Dios tuˈn kil. Tneel maj tej tul Jesús, te chjolte cyil xjal. Pero oj tulxin juntl maj, yaaˈn te chjolte cyil xjal, sino te clolte cyej xjal nchi ayon tiˈjxin tuya cykil cycˈuˈj.

10  Juˈ tzunj tzinen taˈ tley Moisés mlay chi cyaj xjal jiquenxix tuˈn. Cyej xjal n‑oc ke cycˈuˈj tiˈj tley Moisés tuˈn cyoc lkˈe tiˈ Dios, mlay, cuma nuk oˈcx jun techel. Tisen oj taj jun xjal tzyet t‑xlequemal jun xjal twitzj tuˈnxix ttzyet jacˈa xjal. Tley Moisés te ootxa nuk oˈcx jun xlequemal tiˈj coˈpbil at tulel mas yajxe tuˈn Jesús. Jchojbil il nxiˈ tkˈoˈn tley Moisés, il tiˈj tuˈn t‑xiˈ oyet jaca jnabkˈi. Juˈ tzunj mlay cyaj jiquen te junx maj cyej xjal n‑oc ke cycˈuˈj tiˈ jun chojbil cyil nuk te juun jnabkˈi. ² Nukettzen e bint tuˈnj chojbil cyil ttz̈qˈuel alimaj tuˈn cycyaj sakxix bix jiquenxix cynaabl xjal te junx maj, ya minttzele e chjet te juntl maj, cuma mintiiˈ il tiˈj. Bix nukettzen e cyaj ke xjal jiquenxix, minttzele naˈn tuˈn cycˈuˈj at‑x cyil. ³ Pero min e bint tuˈn cycyaj xjal jiquenxix. Jaj e bint tuˈnj ley nuk tuˈn tul tuj cycˈuˈj xjal jaca jnabkˈi cykil cyil. ⁴ Cuma mintiiˈ tipemal ttz̈qˈuel toro bix ttz̈qˈuel chiva tuˈn tel il tuˈn, ⁵ juˈ tzunj, tej chˈitk tul Tcwal Dios twitz txˈotxˈ, e xiˈ tkbaˈnxin te Dios: “Tcyˈiy twabl bix oybil cytz̈qˈuel alimaj te chojbil il. Juˈ tzunj o tbinchay jun xumlalbaj te weya tuˈn tcub te chojbil il te junx maj. ⁶ Min ncub tuj twitza ke alimaj paten tzˈeynakke te chojbil cyil xjal. ⁷ Juˈ tzunj nxiˈ nkbaˈn tey: Taat, lu kenwe lu tuˈn tbint wuˈn ti taja, tuˈntzen tbint cykil tyola wiˈj tuj tyola,” tz̈i Tcwal Dios te Dios.

⁸ Key hermano judío, kˈoˈnc cycˈuˈja tiˈj yol e xiˈ tkbaˈn Tcwal Dios te Dios. E xiˈ tkbaˈnxin tcyˈi Dios twabl il te alimaj, bix yaaˈn baˈn oybil te alimaj tuj twitz, bix tcyˈi tzˈeynak twiˈ altar te kˈilbil il, amale tleyet Dios otk tkba tuˈn tbint cykilj lu cyuˈn xjal. ¿Tuˈn tiken tz̈i Tcwal Dios yaaˈn baˈn jlu tuj twitz Dios? ⁹ At tzakˈbeblte tej t‑xiˈ tkbaˈn julu: “Taat, lu kenwe lu tuˈn tbint wuˈn ti taja,” tz̈i Tcwal Dios. Tzinen taˈ n‑el tiiˈnxin jchojbil il te alimaj tuˈntzen tocx juntl chojbil il, jaj texin. ¹⁰ Ja tzunja taj Dios. Taj Dios tuˈn koc te texin, bix ja lu nuk tuˈn t‑xiˈlen tkˈon tiib Tcwalxin tuj cyamecy te chojbil kil te junx maj.

¹¹ Bix juntl tumel. Cxeˈl nkˈumena chˈin tiˈj te junx maj. Cykil kej pala cyxol judío waˈlecxke twitz altar te oylecxte chojbil cyil xjal jaca kˈij, amale minttiiˈ n‑oca tuˈn tel cyil xjal. Waˈlecxke, cuma min pon baj twiˈ cyaakˈen te oylte chojbil il. ¹² Yaltzen tej Scyˈoˈn tuˈn Dios, jun maj bix te junx maj e xiˈ toyen tiib te chojbil il, bix e cub ke tuj tmankˈab Dios. Waˈlecx ke pala, pero te Jesús, kˈuklte. Kˈukltexin, cuma o pon baj twiˈ taakˈenxin te oylte chojbil il. ¹³ Lu ate nayonxin ojxe tcamanxin cyiˈ kej iicˈl texin, tuˈntzen cycyaj tjakˈ tkenxin. ¹⁴ Juˈxsen Jesús, tuˈn nuk jun oybil bix te junx maj, o ko cyjaˈ baˈn twitz Dios, bix juˈx cykil kej xjal cykˈon cyiib tuya Dios.

¹⁵ N‑eltzen kniyˈ tiˈj jaxxix ja yol lu cuma nkˈontzen Espíritu Santo tipemal tuya tyol. E xiˈ tkbaˈn Dios tuj tyolxin tuˈn Espíritu Santo cyjulu: ¹⁶ “Cwel nkˈoˈn jun trat cyiˈ xjal laˈ alcye jun kˈij, bix juˈtzen nseˈya. Cˈoquex nkˈoˈna nleya tuj cyanem, bix cˈoquex ntzˈiˈbena ti waja tuj cynaabl,” tz̈i Dios. ¹⁷ Bix juntl e xiˈ tkbaˈn Dios: “Mlay tzaj nnaˈna cyil xjal bix yaaˈn baˈn o cybincha,” tz̈i Dios. ¹⁸ Juˈwa, cuma o cub najset kil te junx maj, mintiiˈtl il tiˈj tuˈn t‑xiˈ oyet mastl chojbil kil. O bint.

¹⁹ Juˈtzen ttena, key hermano, nuk tuˈn ttz̈qˈuel Jesús at tuˈn koc twitz Dios tuj xjan lugar jaaˈ taˈ texin at koquel jaˈlewe tuya Dios. Juˈ tzunj cˈoquelxix ke kcˈuˈj tuˈn kocx. ²⁰ Te nejl, e jaw jun nintzaj xbalen cywitz xjal tuˈn miˈn chi ocx jaaˈ e tema Dios. Pero tuˈnj tcyimlen Jesús, o cub rotj jmaksbil be twitz Dios te junx maj. Ya baˈn kpon tuj lugar jaaˈ taˈ Dios, cuma o jket jun acˈaj kbe, bix jatzen Jesús kbe. ²¹ Bix jaxin nintzaj pala twitz Dios cyiˈ cykil t‑xjal Dios.

²² Juˈ tzunj, key hermano, cuma baˈn kocx tuya Dios bix cuma at kpala twitz Dios, ko lkˈex twitz Dios tuya cykil kcˈuˈj bix kˈuklxix kcˈuˈj tiˈ Dios, bix miˈn tzaj knaˈn kil, cuma o ko txjet tiˈ kil tuˈn Jesús tisenj kxumlal ntxjet tuya tzˈil tuˈn aˈ sakxix. ²³ Kkˈaˈc kipen tuˈn ktenx tuj kocslabl, bix tuˈn miˈn cub kiˈj tuˈn kaj meltzˈajtl tuj kreligión te ootxa. Kiˈx kocslabl o ko clet te junx maj. Cˈoquel ke kcˈuˈj tiˈj Dios, cuma mlay tzˈexxin tibaj tyolxin. ²⁴ Bix cwel kbisen tiˈj ti tten tuˈn kcyiwsante kiib kxol tuˈn cˈoquel kˈakˈen kcˈuˈj te kuya bix tuˈn kbinchante baˈn.

Jawnexsen jun ttz̈i ka ma ko cub tzˈak tuj tkˈab Dios Iˈtz

²⁵ Miˈn cyaj cycolena tuˈn miˈn cub cyjunen cyiiba bix tuˈn miˈn cykˈolbe cyiiba, tisen juuntl cyxola cycyˈi cub cyjunen cyiib cyuya ocslal. Il tiˈj tuˈn tcub cyjunen cyiiba tuˈn tbaj cyonen cyiiba tuj cyocslabla, bix ilxsen tiˈj tuˈn tbaj cyonen cyiiba mas jaˈlewe twitzj nejl, cuma tzajnen tzaj lkˈe jkˈij oj tul meltzˈaj Jesús te kˈol castiwa cyibaj kej xjal cycyˈi Tcwal Dios. ²⁶ Katzen ncyaj kcyeˈyen mancˈbil chojbil kil, ya mintzentiiˈtl. Amale otket kocslaj jaxxix, yaj chojbil il tuˈn Jesús ya mintiiˈtl baˈn tajbeˈna ke, cuma jkil tzin kbinchaˈn, jaj n‑el kxooˈn chjol kil, ja Jesús. ²⁷ Ka n‑el kxooˈnte, oˈcxsen kyoˈ jun cawbil jawnex bix tuj ilxsen tuˈn Dios, bix tuˈn kpon tuj jun kˈakˈ njulen jaaˈ chi pomela kej xjal iicˈbelte Dios. ²⁸ Jax tzul jun jawnex castiwa cuma cyeˈnja ti e baj cye xjal e ten tuj tley Moisés. Tej tel t‑xooˈn jun xjal jtley, bix ka at caˈba oxe tstiwa tiˈj, junxse maj biˈx cwel byet mintiiˈ lastim te xjal. ²⁹ Katzen at nim castiwa tiˈj jun xjal el t‑xooˈn nuk jaj tley Moisés, yaj tzunj xjal n‑el t‑xooˈn Tcwal Dios, mas jawnex til xjal tiˈj, bix mas jawnex tcastiwa. Juˈtzen nbyaˈna jtuj kˈakˈ. Tcyimlen Jesús jatzen jtkˈuklel j‑acˈaj trat tuya Dios kiˈj tuˈn koc te t‑xjalxin. Oj tel tiqˈuen jun xjal colbil te tuˈn tcyimlen Tcwal Dios bix cˈaal meltzˈaj tuˈn toc ke tcˈuˈj tiˈ ttz̈qˈuel alimaj tuˈn ttxjet til, kaˈxsen, cuma ncub twaˈben jxjala Tcwal Dios, bix njaw tiˈ Espíritu Santo. ³⁰ Juˈ tzunj at castiwa tuˈn Dios. Ktzkiˈn jax Dios nkˈumente tuj tyolxin: “Inayena kˈolte castiwa. Bix laˈ alcye jun kˈij cxeˈl nkˈoˈna cycastiwa jaca juun kaˈ xjal tiˈ til,” tz̈i Dios. Bix tuj juntl tyol Dios tz̈i cyjulu: “Ja Dios cˈoquel cyeˈnte ke t‑xjal alcye baˈn bix alcye kaˈ,” tz̈i tyol Dios. ³¹ Key hermano, ¡cycˈojlanx cyiiba! Jawnexsen jun ttz̈i ka ma chi cub tzˈaka tuj tkˈab Dios Iˈtz oj tul meltzˈaj.

³² Juˈ tzunj miˈn cub cybisena tiˈj tuˈn tcyaj cykˈoˈna cyocslabla tiˈ Tcwal Dios, sino cˈulelxix tuj cycˈuˈja tej cyoca te ocslal. Tuj tzunj kˈij nejl iyˈx cyuˈna nim qˈuixcˈaj nuk tuˈn cyocslabla tiˈ Tcwal Dios. ³³ Te nejl, at juun xjal cyxola oc ilet bix oc yaset cywitz nim xjal nuk tuˈn min el cyxooˈna cyocslabla tiˈ Tcwal Dios, bix iyˈx cyuˈna. Bix e xiˈ cyonena kej iyˈx qˈuixcˈaj cyuˈn. ³⁴ E xiˈ cykˈoˈna jun tkˈakˈbil cycˈuˈja cyiˈ ocslal otk chi oc tuj tzeeˈ tuˈn tlaj cyocslabl. Bix min e baj cycˈuˈja tej tel cyiiˈn xjal niyˈ tikˈch cyey tuˈn tlaj cyocslabla. Bix e xiˈ cykˈoˈna tujxix tumel, cuma el cyniˈya tiˈj at jun mas baˈn tuya Dios tuj cyaˈj bix te junx maj twitzj n‑el alkˈet cyiˈja nuk te cab kˈij. ³⁵ Cykilj lu iyˈx cyuˈna nejl tuˈn tlaj cyocslabla tiˈ Tcwal Dios. ¿Tuˈn tiken cyaja t‑xiˈ cytzakpiˈn jaˈlewe? ¡Min! Miˈn txiˈ cytzakpiˈna cyocslabla, cuma nuk tuˈn cyocslabla ccyiikˈela jun cycotza o cyaj tkbaˈn Dios. ³⁶ Il tiˈj tuˈn tiyˈx kuˈn tuˈn tbint kuˈn ti taj Dios, jaj tuˈn miˈn ko aj meltzˈaj, tuˈntzen kcaman kcotz e cyaj tkbaˈn Dios. ³⁷ Cycyeˈyenc ti toc tuˈn Dios tuj tyolxin: “Jxjal Scyˈoˈn wuˈna o kˈumj tuˈn tul, tzul. Mlay weˈ. Tzul. ³⁸ Bix tej xjal jiquen nwitza, jatzen junx maj n‑oc ke tcˈuˈj tiˈj Nscyˈoˈn, bix ccaman tchunkˈlal te junx maj. Pero ka ma cyaj tcolen tocslabl, ya mintiiˈ waj te,” tz̈i Dios tuj tyol. ³⁹ Jatzen ke, nuket yaaˈn ejooˈ cyjel kcolen kocslabl, tuˈn kxiˈ tuj il, sino nuket ejooˈ tisen kej kˈiˈnxix cyuˈn tuˈntzen toc ke cycˈuˈj tiˈ Dios, tuˈntzen cyclet.