Chronological

Jun uˈj cye xjal aj Israel

Ma tzaj tkbaˈn Dios tyol ke tuˈn Tcwalxin

1  Tuj tyem ootxa Dios e kˈumente cye ke kxeˈchel nim maj bix chˈimacˈa tten. Cyuˈntzen ke tyolelxin e tkbaˈxin. ² Yaltzen tuj jtyem te jaˈlewe, tuˈn Tcwalxin o cyaj tyolenxin ke te junx maj. Bix tuˈn Tcwalxin e tbincha Dios cykilca at twitz txˈotxˈ bix twitz cyaˈj. Tetzen te Tcwalxin o cyjaˈ tkˈoˈnxin cykilca tuj tkˈab, bix o tzˈocxin te Taaw tibaj cykilca twitz txˈotxˈ. ³ Tisen tken kˈij tzin techlaˈn tiiˈn tzunj kˈij, juˈtzen Tcwal Dios tzin techlaˈn te ke tiiˈn jawnex tnaabl bix tipemal bix tbanel Dios. Ja tzunxin kˈilte te cykilca tuj tumel tuˈn tipemal tyolxin. Ja tzunxin e cyim tuˈntzen ttxjonte kil, bix o ponxin tuj tmankˈab Dios tuj cyaˈj te cawel tuya Dios.

Mas nim toclen tcwal Dios cywitz ke ángel

⁴ Attzen juun xjal cyxola ncub cybisena tiˈj ka jaj tley Moisés kˈoˈn cye ke kxeˈchel mas nintzaj twitzj te Jesús jaˈlewe, cuma ejeeˈ tsanjel Dios tuj cyaˈj e tzaj kˈonte. Pero ja te Tcwal Dios mas jawnex twitzj cyej tsanjel Dios tuj cyaˈj, bix juˈ tzunj mas tzˈakl tyolxin. ¡Jawnexsen jun tbi toclenxin! ⁵ Ktzkiˈn mas jawnex Tcwal Dios twitzj cye tsanjel Dios tuj cyaˈj cuma nuk te Tcwal e cyjaˈ tkˈumen Dios ja yol lu: “Jaˈlewe cˈoquel nkˈoˈn tbiy te Ncwal, bix tuya jawnex taakˈena.” Juˈ e tkba Dios te Tcwal jatxe nejl, yaaˈn te jun ángel. Bix juˈx min e tkˈumexin tuj tyolxin tiˈj jun ángel ja yol lu: “Inayena Tmana, bix jay Ncwala,” tz̈i tyol Dios. ⁶ Bix juntl. Oj ttzaj tiiˈn Dios Tcwal twitz txˈotxˈ juntl maj tuˈn toc te tneel cawel, cxeˈl tkbaˈnxin: “Enterake tsanjel Dios tuj cyaˈj chi cwel maje twitz Tcwal Dios,” tz̈i tyol Dios. ⁷ Bix cyiˈj tzunj tsanjel Dios tuj cyaˈj tz̈i Dios: “Tisen jun cykˈiˈk cˈulel bix qˈuiyel bix tisen jun tken kˈakˈ cjawel julen bix cwel baj, juˈtzen ke ángel nuk chi ulel ajx yecˈl cyiib,” tz̈i tyol Dios. ⁸ Pero tiˈtzen Tcwal Dios, tz̈i Dios te Tcwal: “Tujtzen tkˈukˈbila, jay Dios, ccawela te junx maj. Jun tcawbila jaxse jun cawbil jiquen. ⁹ Bix te junx maj o tjoya jun baˈn bix o tzˈel t‑xooˈna jun kaˈ. Juˈ tzunj ma scyˈeta te cawel wuˈn. Juˈ tzunj te tey at mas tzalajebl cywitz ke ángel,” tz̈i Dios te Tcwal, tz̈i tyol Dios.

¹⁰ Bix at juntl e kbet nejl. Tuj tyol Dios nkˈumente: “Tz̈i Dios te Tcwal: ‘Jay, Taaw, ja tzuna e binchante cykil twitz txˈotxˈ tuj tneel, bix tuya tkˈaba e binne cykil twitz cyaˈj. ¹¹ Pero ja tzunkej e tbinchay chi naˈl, twitz txˈotxˈ tuya cyaˈj, pero jay, mintiiˈ tbajlela. Cuma cykil kej e tbinchay tisen xbalen chi tiil. ¹² Cwel buchj txˈotxˈ tuya cyaˈj tisen jun xbalen kˈanak mintiiˈ cˈajbeletl, bix il tiˈj cchˈixpetel. Pero tey, jaxa te junx maj. Mlay pon baj ttyema, bix mlay chˈixpeta,’ tz̈i Dios te Tcwal,” tz̈i tyol Dios. ¹³ Dios bajx tkbaˈ te jun tsanjel tuj cyaˈj tisen e xiˈ tkˈumenxin jun maj te Tcwalxin. Tz̈i cyjulu: “Kequey tuj nmankˈaba, ojxetzen tcub nkˈoˈna tjakˈ tkena kej xjal chiˈlel tiˈja bix cycyˈi tuˈn tcawena cyibaj,” tz̈i Dios te Tcwal, tz̈i tyol Dios. ¹⁴ ¡Min! Ke cye ángel nuk espírituke nchi ajben te onlte Dios. Yaaˈn cawelke tisen Tcwal Dios. Jatzen Dios nxiˈ kˈoncye te onel bix cˈojlal cyej xjal ocslal.

Miˈn tzˈel kxooˈn jun coˈpbil ke

2  Bueno, cuma n‑el kniyˈ tiˈj Tcwal Dios mas nintzaj, il tiˈj cˈoquel kocslaˈn tyolxin. Juˈ tzunj cˈoquelxix kcˈuˈj tiˈj jaxxix yol te coˈpbil o kbi, tuˈntzen miˈn ko el tzpet tiˈj. ² Ja tzunj tley Moisés kˈoˈn cye ke kxeˈchel cyuˈn tsanjel Dios tuj cyaˈj, ilxix tiˈj tuˈn tbint cyuˈn. Ja tzunkej min e cynima, bix e cubke tuj castiwa jaxxix toclen. ³ Katzen o chi cub ke kxeˈchel tuj castiwa tuˈn min e cybi tley Moisés, jaxse juˈx ke jaˈlewe, mlay ko el libre tiˈj kcastiwa tzul yaj ka ma tzˈel kxooˈn jun coˈpbil ke mas jawnex twitzj ley nejl. Ja Kman Jesús tneel xjal e kˈumente jyol te coˈpbil, bix mas yajxitl ke t‑xel Jesús e cyyeecˈa ke ka jax, bix kocslaˈ. ⁴ Jax Kman Dios e yeecˈante jax tuˈn nim tipemalxin bix tuˈn tbaj bint‑xin bix tuya nim techlal, bix tuˈn tipemal Espíritu Santo o tzaj tkˈoˈn ke, te teeylex juun laˈ alcye tkˈaˈxin.

Oc Cristo te jun xjal, bix n‑el tniyˈ tiˈj ti tten tuˈn tniyˈ qˈuixcˈaj tuˈn

⁵ Tzultzen jun kˈij oj tul jun acˈaj cawbil twitz txˈotxˈ. Tuj tzunj cawbil yaaˈn ke ángel chi cawel twitz txˈotxˈ, sino ja te Tcwal Dios. ⁶ Kˈoˈnc cycˈuˈja tiˈj ti toc tuj tyol Dios. Tz̈i jun xjal te Dios cyjulu: “Nuk xjal koˈya, pero tey nintzaj Diosa. Pero amale Diosate, ntzaj tkˈoˈna nimxix il tiˈj kiˈja. ¿Tuˈn tikentzen nnaˈnajey kiˈja, bix tuˈn tikentzen nlabtey kiˈja, ejooˈya xjal? ⁷ Jay e kbante yaaˈn nim tcawbil ke xjal cywitz ke ángel jun rato jaˈlewe. Pero at jun kˈij tkˈaˈy jun tajwalel xjal tuˈn tcawen, bix tibaj cykilj e tbinchay. ⁸ Cykil cyjel tjakˈ tcawbil tuˈna. ¡Axsen tbanel jun tumel tuˈna!” tz̈i jun xjal te Dios, tz̈i tyol Dios.

Juˈtzen n‑eˈla kniyˈ tiˈj laˈ alcye jun kˈij Dios ctzaal kˈonte cykil, cyuyax ke ángel, tuj tkˈab jun xjal. ¿Pero opa kil jlu? Minaˈx. ⁹ Pero te Jesús o kil jun xjal o tzˈoc ttzyuˈn tuˈn tbint alcyej nbyan tuj tyol Dios oc pjel. Tej tcubxin twitz txˈotxˈ, ocxin menos chˈin cywitz ke ángel. Ocxin te xjal tuˈn tcub tenxin kuya, tuˈntzen tcyimxin te t‑xel cykilca xjal, tuˈntzen cyiikˈente xjal t‑xtalbil Dios. Pero ya o jaw tnimsaˈn Dios ja Jesús mas tbanel bix mas nintzaj, cuma o tziyˈx qˈuixcˈaj tuj cyamecy tuˈnxin.

¹⁰ Entonces, tej tcyim Jesús, ja tzunja e baj tnincˈuˈn Dios. Cykil e bint tuˈn Dios, bix cykilca te te Dios. Bix taj Dios cykilca ke tcwal tuˈn cypon jaaˈ taˈxin. Juˈtzen jun tumel e tkba Dios tuˈn ttzket‑xix tuˈn Jesús tuj qˈuixcˈaj, cuma ja Jesús tuˈn tcub nejl cywitz xjal jaaˈ taˈ Dios, bix te kˈilx cye xjal tuya Dios. ¹¹ Ke, o ko jaw tiiˈnxin tuj tzˈil tuˈntzen sakxix koˈ twitz Dios, ejooˈtzen tcwal Dios. Bix Tcwal Dios ja Jesús, o txjonte ke tuˈn kajben te Dios. Juˈx te Jesús bix ejooˈ, junx Kman tuyaxin. Juˈ tzunj te Tcwal Dios min chˈixewxin tuˈn tkbante hermano koˈ tuyaxin. ¹² Tuj tyol Dios tzin tkbaˈn Tcwal Dios ka ejooˈ termano. Cˈoquel cycˈuˈja tiˈj tz̈i Tcwal Dios te Dios cyjulu: “Chin yolela tiˈja cyuya ke wermaniya tuˈn tel cyniyˈ tiˈja al cyey. Bix chin nimela twitza cyxol ke wermaniya tuj tjay,” tz̈i Tcwal Dios te Dios, tz̈i tyol Dios. ¹³ Bix juntl tumel. Tz̈i Tcwal Dios cyjulu: “Juˈx weya n‑oc ke ncˈuˈja tiˈ Dios,” tz̈i tyol Dios. Juˈtzen tumel junx Tcwal Dios cyuya xjal. Bix tuj tyol Dios tz̈i Tcwal Dios cyjulu: “Lu kena ntiina cyuya ke tcwal Dios e tzaj tkˈoˈn Dios we.” ¹⁴ Ke tcwal jun xjal jax ttz̈qˈuel bix tchuˈl cyuya cabtl titzˈen. Jaxse juˈx te Jesús oc te xjal tuˈntzen telxin junx cyuya xjal, bix tuˈn tbint tuˈn tcyimxin tisen ke xjal nchi cyim, bix tuˈntzen tjaw itzˈjxin tuj cyamecy, tuˈn tel tiiˈnxin tipemal taaw cyamecy. Juˈtzen e tcamaxin tibaj taaw il. ¹⁵ Juˈtzen e tbinchaxin tuˈntzen cytzokpaj xjal tiˈj ttz̈i cyamecy cyiˈj, cuma tuˈntzen ttz̈i cyamecy cyiˈj eteˈcx tjakˈ tcawbil taaw il.

¹⁶ At juntl tumel tiken il tiˈj oc Tcwal Dios te xjal. Nuket juˈ tajxin tuˈn tonenxin cye ángel, juˈtle il tiˈj tuˈn tocxin te ángel. Pero juˈ e labte texin te onlte cye xjal. Juˈ tzunj oquexin te xjal, bix te tiyˈjil ootxa kchman Abraham. ¹⁷ Ilxix tiˈj tuˈn ocxin junx kuya, ejooˈ termanoxin, tuˈntzen tbint tuˈn tponxin twitz Dios te yolel kiˈj. O ponxin twitz Dios tuˈntzen tocxin te nintzaj kpala jiquenxix bix n‑oc kˈakˈen tcˈuˈjxin kiˈj, bix tuˈntzen tchjet chojbil kil tuˈnxin. ¹⁸ Otzen tziyˈx qˈuixcˈaj tuˈnxin, bix ocxin tuj niyˈbebl tuˈn taaw il, pero min e tkeyxin. Juˈ tzunj jaxin onlte ke oj koc tuj niyˈbebl.

Jawnex te Jesús twitz Moisés

3  Juˈ tzunj, key hermano sakxix twitz Dios bix scyˈoˈnkey tuˈn Dios tuˈn cyajbena te te t‑xjal, cybisenx tiˈj Jesús, Scyˈoˈn tuˈn Dios, cuma tuj kocslabl ja Jesús smaˈn tuˈn Dios te onel ke bix cuma jaxin te nintzaj kpala te yolel kiˈj twitz Dios. ² Cybisenx tiˈj Jesús ja jun xjal baˈn tuˈn toc ke kcˈuˈj tiˈjxin. E tbixin te junx maj cykilj e tkba Dios, tisen te Moisés e tbi cykilca tyol Dios tej takˈananxin cyxol t‑xjal Dios te ootxa. ³ At juun cyxola ncub cybisena ka ja Moisés mas nintzaj twitzj Jesús bix juˈx mas il tiˈj tley Moisés twitzj tyol Jesús. Pero yaaˈn juˈwa. Ja te Jesús mas nintzajxin twitz Moisés, tisen jun binchal jaaˈ mas nintzaj twitz jaaˈ. ⁴ Jaca juun jaaˈ cbinel tuˈn juun xjal. Pero te Dios jaxin binchalte te cykilca at. ⁵ Jatzen te Moisés e tbi texin te junx maj cykil tyol Dios tuj taakˈenxin te yolel tiˈj ti cbinel tuˈn Dios mas yaj, pero nuk jun akˈanalxin tuj tja Dios cyibaj t‑xjal Dios. ⁶ Yaltzen tej Scyˈoˈn tuˈn Dios, juˈxa e tbi texin te junx maj cykil tyol Dios, pero yaaˈn tisen jun akˈanalxin, sino Tcwal Dios texin, Taaw tibaj cykil t‑xjal Dios, bix ktzkiˈn jun taaw mas nintzaj twitz jun akˈanal. Yaltzen ke, ejooˈ t‑xjal Dios ka kˈiˈnxix kuˈn tuˈntzen kcaman alcyej nko ayon tiˈj.

Ntzaj tkˈoˈn Dios ajlabl cye ke ocslal

⁷ Wajtzen txiˈ nkˈumena cyey jun tumel tiˈj tuˈn tiyˈx cyuˈna tuˈn cyxiˈ lpey tiˈ Jesús hasta ojxe tjapan baj cychunkˈlala. Ka minx cypay, ka cab cycˈuˈja cyxiˈy, juˈ pjel cyey tisen e baj cye kxeˈchel. Cynaˈntztzen ti toc tuˈn Espíritu Santo tuj tyol Dios. Tz̈i cyjulu: “Tz̈i Dios cye xjal judío: ‘Jaˈlewe, ka ma cybiy titzen tzin nkbaˈna, ⁸ miˈn tzˈel cyiiqˈuena, tisen kej cyiyˈjila el cyiiqˈuen j‑e nkbaˈya tej cybet tuj jun najbil tzkij txˈotxˈ, bix juˈtzen oc tenke iylelte weya. ⁹ Jatztzen e n‑oqueya tuj niyˈbebl cyuˈn ke cyxeˈchela ka tuˈn ttzaj nkˈoja cyiˈj, amale tet cyaˈwnak jnabkˈi toclen cycyeˈyen cykilcaj baˈn e wakˈa cye. ¹⁰ Tuˈn tzunj cyniyˈbebl wiˈja, e tzaj nkˈoja cyiˈj, bix e xiˈ nkbaˈn cye: Tuj cyanema nuk cyajx cyey nchi bet‑xa tzpetpajninkey. Bix cycyˈixa tuˈn tbint cyuˈna tuˈn cybeta tuj nbeˈya, ntz̈i cye cyxeˈchela. ¹¹ Juˈtzen e tzaaˈ nkˈoja cyiˈj, bix jaxxix e nkbaya cyexin mlayx chi oc tuj lugar te ajlabl tuj txˈotxˈ te Canaán at tuˈn t‑xiˈ nkˈoˈna cyexin,’ tz̈i Dios cye aj Israel,” tz̈i Espíritu Santo tuj tyol Dios.

¹² Juˈ tzunj, key hermano, ka n‑el kxooˈn tyol jxjal jatzen mero Dios iˈtz, tuˈn tzunj ja lu n‑el kpaˈn kiib tiˈ Dios. Kˈoˈnc cycˈuˈja tiˈj ti e baj cye ke kxeˈchel ootxa tej tel cyiin cyiib tiˈ tyol Kman Dios. Juˈ tzunj cycˈojlam cyiiba miˈn tzˈel cypaˈn cyiiba tiˈ Dios iˈtz, bix miˈn baj cycˈuˈja tiˈ tyol, bix miˈn cyaj cykˈoˈna cybey tuya Dios. ¹³ Nuk oˈcx cynimsam cycˈuˈja cyxola jaca kˈij looj lux tyem at jaˈlewe, tuˈn min‑al jun cyey cub tzpet tnaabl tuˈn il. ¹⁴ Ka kˈiˈnxix kuˈn ojxe kcyim tisenj tej kocslan tuj tneel, attzen mojbabl kiib tuya Jesús, Jscyˈoˈn tuˈn Dios. ¹⁵ Cynaˈntztzen ti toc tuˈn tyol Dios: “Jaˈlewe, ka ma cybiy titzen ntkbaˈn Dios, miˈn cycyiwsay cyanema, tisen e baj cyej xjal el cyxooˈn tyol Dios,” tz̈i tyol Dios. ¹⁶ ¿Altzen cyej xjal el xooˈnte tyol Dios, amale otket cybi? Cykilca kej xjal etz tiiˈn Moisés tuj txˈotxˈ te Egipto, ejeeˈtzen kxeˈchel. ¹⁷ ¿Bix aluyatzen e kˈojle Dios cyaˈwnak jnabkˈi? Cyuya tzunj aj Israel min e cybi, bix cuma min e cybi, ejeeˈ tzunja e cyim tuj najbil tzkij txˈotxˈ. ¹⁸ ¿Bix aluyatzen e tkbaˈ Dios jaxxix tyol tuˈn miˈn chi ocx tuj jun lugar te ajlabl otk takˈ Dios te cynajbil? Cyuya tzun kej xjal min e cybi tyol Dios. ¹⁹ Tzˈelcˈatzen kniyˈ tiˈj min ocxke tuj txˈotxˈ te Canaán tuya Dios tuˈn min e cyocsla tyol Dios.

Juˈtzen min ocx ke kxeˈchel tuj ajlabl, bix juˈtzen ke, miˈn ko ocx tuj jun ajlabl tzin tkˈoˈn Dios ka nbaj kcˈuˈj tiˈ tyol Dios.

4  Tisen nejl, juˈx jaˈlewe, lux tyol Dios tcyajsen kuyawe tuˈn kocx tuj ajlabl tuyaxin. Juˈ tzunj cˈoquelxix kcˈuˈj tiˈj tuˈntzen mi nuket jun kxol cyaj tuˈn miˈn tzˈocx tuj ja ajlabla. ² Ke, o tzˈoc kbiˈn tyol Dios te coˈpl ke, tisen ke kxeˈchel ootxa oc cybiˈn tyol Dios. Pero min ajben cye, cuma nuk oc cybiˈn bix min e cyocsla. Nuket e cyocsla, ajbentzenle cye. ³ Pero ejooˈtzen o kocsla jyol te coˈpbil, ejooˈ tzunja ko oquex tuj jun ajlabl tuya Dios, cuma jax at jun ajlabl ke laˈ alcye jun kˈij. Ja tzunj ajlabl nbyan tuj tyol Dios tej ttz̈i Dios cyjulu: “E tzaj nkˈoja cyiˈj xjal min e cybi nyol, bix e xiˈ nkbaˈn cye jaxxix tuˈn miˈn chi oc tuj ajlabl wuyena,” tz̈i Dios. Ja tzunj yol lu nyeecˈante ya at jun ajlabl te Dios nejl biˈx e baj bint jatxe te tbaj bint twitz txˈotxˈ. ⁴ Tiˈj tej tajlan Dios, tzin tkbaˈn tuj tyol Dios cyjulu: “E ke tcˈuˈj Dios bix ajlanxin te twuukan kˈij tbinlen cykilca taakˈenxin,” tz̈i tyol Dios. ⁵ Bix cyiˈj xjal min cyocsla tuˈn cypon tuj ajlabl tuya Dios, tzin tkbaˈn tuj tyol Dios cyjulu: “Miˈn chi octz ajlal wuyena kej xjal n‑el cyiiqˈuen,” tz̈i Dios tuj tyol.

⁶ Entonces e bint tuˈn Dios tuˈn cypon xjal tuj ajlabl tuyaxin. Pero tuj tneel kej oc ebinte tej ttxconte Dios cyiˈj tuˈn cypon, min e ponke tuˈn tel‑len cyxooˈn tyolxin. Juˈ tzunj at‑x tuˈn cypon xjal tuj ajlabl lu, bix at tumel kuya lux Dios ntxcon kiˈj tuˈn kpon tuyaxin. ⁷ N‑el kniyˈ tiˈj lux baˈn kocx tuj ajlabl tuya Dios, cuma tz̈i tyol Dios tuˈn kpon jaˈlewe. Jyol jaˈlewe e tkba Dios tuˈn David, e tkˈumexin nim jnabkˈi mas yaj twitzj tneel maj e tzaj tkˈoˈnxin jun kˈij tuˈn cypon xjal tuyaxin. E tkba David tuˈn Dios ja yol lu ya ma kbaˈj: “Jaˈlewe, ka cybiˈy jtzin tkbaˈn Dios, miˈn tzˈel cyiiqˈuena tyolxin,” tz̈i David. ⁸ Juˈ tzunj miˈn cub cybisena ka jaj txˈotxˈ te Canaán ajlabl e tkba Dios tuˈn cypon tuj. Canaán nuk jun techel ti tten tuˈn kpon tuj juntl ajlabl. Nukettzen ja Canaán mancˈbil najbil te ajlabl, minttzenle e tkba Dios mas yaj tiˈj jun kˈij tuˈn cypon xjal tuj ajlabl tuyaxin. ⁹ Tiˈj tzunj yol lu qˈuelele kniyˈ tiˈj yaaˈn Canaán jaj ajlabl e tkba Dios, sino at juntl ajlabl mas jawnex tuˈn kocx tuj. ¹⁰ Alcyej ocslal oj tcyim cˈoquex tuj ajlabl bix cweˈbel taakˈen, tisenj te Dios ajlan tej tbaj bint taakˈen. ¹¹ Juˈ tzunj ilxix tiˈj tuˈn toc kcˈuˈj tiˈj tuˈn kpon tuj ajlabl tuya Dios, bix miˈn txiˈ kiiˈn cynaabl kej xjal el cyxooˈn tyol Dios bix min ocke tuya Dios.

¹² Pero miˈntzen cub cybisena ka baˈnj nbint cyuˈna nuk tuya cytziy pero yaaˈn juˈ tuj cyanema, bix miˈn cub cybisena baˈn tuˈn tcub cyewena ti niyˈ tuj cycˈuˈja tuj twitz Dios. Mlay tzˈoc cyyaˈna Dios. Te tyol Dios iˈtzxixte bix at tipemal. Tisen jun machet caˈba ttziiˈ bix binne ttziiˈ baˈn tocx tuj kxumlal, juˈtzen elpenina jtyol Dios baˈn tocx tuj kanem. Cˈoquex te cyeˈyel cykil niyˈ tuj kcˈuˈj, ka baˈn bix ka kaˈ. Jniyˈ tuj kcˈuˈj ẍbiˈk tuj twitz Dios. ¹³ Min‑al jun baˈn tcub ewen twitz Dios. Cykilca chicˈaj tuj twitz Dios. Bix twitz Dios kkˈaˈ jun kumel ti xbaj kbinche bix ti xbaj kbisen.

Ja Jesús nintzaj kpala

¹⁴ At juntl tumel. O pon Jesús, Tcwal Dios, tuj cyaˈj twitz Dios. Bix ja Jesús jatzen nintzaj kpalaj. Ojtzen kpon twitz Dios te kanel, attzen Tcwal Dios te kuya te onl ke. Jatzen kpala jnintzaj te junx maj. Jatzen yolel kiˈj twitz Dios. Juˈ tzunj, miˈn cyaj kcolen ja Jesús, bix miˈn cyaj kcolen kocslabl. ¹⁵ Jatzen yolel kiˈj twitz Dios, bix at jun tkˈakˈbil tcˈuˈjxin kiˈj, cuma n‑el tniyˈxin tiˈj ti tten j‑oj nko oc tuj niyˈbebl tuˈn il, cuma tej tten texin twitz txˈotxˈ tuya t‑xumlal, iyˈ texin twitz cykil niyˈbebl tuˈn il, pero min e cub tzˈakxin tuj il. ¹⁶ Juˈ tzunj, tuˈnxix cykil kcˈuˈj ko lkˈex twitz Dios jaaˈ ncawena, tuˈntzen kiikˈente t‑xtalbil Dios, bix tuˈntzen ktzaj tonenxin oj kniyˈbet tuˈn il.

5  ¿Altzen baˈn tajben te jun nintzaj pala? Tuˈntzen tajben te nintzaj pala, il tiˈj jun xjal, tuˈntzen toc yolel cyiˈ xjal twitz Dios, bix tuˈn t‑xiˈ cykˈoˈn cyoybil xjal te Dios, bix tuˈn t‑xiˈ cykˈoˈn chojbil cyil xjal te Dios. ² Tiˈ tzunj xjal pala jax tzin tnaˈn bix at tpasensya oj at cytzpetpajlenel xjal bix oj nchi cub tzˈak xjal tuj il, cuma jax xsunxin n‑el tniyˈ tiˈj ti tten tuˈn mintiiˈ tipen twitz il, cuma xjalxin. ³ Oj t‑xiˈ toyenxin chojbil il twitz Dios, tiˈj texin til junx tuyaj cye xjal nxiˈ toyenxin, cuma xjalxxin.

⁴ Bix juntl. Tuˈntzen tajben te jawnex pala, yaaˈn nuk oˈcx jun xjal, sino juˈx il tiˈj jun xjal o scyˈet tuˈn Dios. Min‑al jun baˈn toc tkˈon tiib te nintzaj pala tuˈnx, sino ja te Dios nkˈumente al cˈoquelte nintzaj pala, tisenj e tkˈumexin ja Aarón te nintzaj pala cyxol aj Israel jatxe ootxa.

⁵ Yaltzen tej Scyˈoˈn tuˈn Dios, jatzen xjalja o tzˈoc te tneel pala, cuma min oc tkˈon tiib te nintzaj pala, sino ja te Dios e kˈonte taakˈen tuj tkˈab te pala. Ja lu tzin yecˈj tuˈn tyol Dios. Cycyeˈyenc ti toc tuˈn Dios te Tcwal: “‘Jay ncwala. Jaˈlewe ma txiˈ nkˈoˈna tey te nintzaja,’ tz̈i Dios te Tcwal,” tz̈i tyol Dios. ⁶ Bix at mastl tumel tuj tyol Dios ootxa te kˈumbilte yaaˈn Tcwal Dios e scyˈonte taakˈen te pala. Tz̈i Dios te Tcwal cyjulu: “‘Ja tzuna ma scyˈet wuˈn te pala te junx maj, bix mas jawnexa tisexj te Melquisedec,’ tz̈i Dios te Tcwal,” tz̈i tyol Dios.

⁷ Bix jatzen Jesús najben te nintzaj kpala cuma ocxin te xjal bix iyˈx pena tuˈnxin tisen ejooˈ. Tejtzen tten Jscyˈoˈn tuˈn Dios tzalu twitz txˈotxˈ, tetzen jun koniyan te chˈitk tcyimxin bix akˈxin naˈl Dios bix e xiˈ ts̈iˈnxin te Dios tuˈn takˈ tiˈ tanemxin, tuˈntzen tclet‑xin tuˈn Dios tuj cyamecy. Bix e tbi Dios, cuma otk tnimanxin tyol Dios junx maj. Pero min e tcol Dios jaxin tuˈn min e cubxin, sino nuk tipemalxin e xiˈ tkˈoˈn Dios tuˈn iyˈx tuˈnxin tuj cyamecy tuˈn kil. ⁸ Amale Tcwal Dioset‑xin, il tiˈj tuˈn iyˈx qˈuixcˈaj tuˈnxin, tuˈn tyeecˈantexin ti tten tuˈn tnimantexin tyol Dios tuj qˈuixcˈaj. ⁹ Tejtzen tbaj bint jlu tuˈnxin, bix juˈx e tyeecˈaxin jaxin tzˈaklxix, bixsen ocxin te Clol xjal, tuˈntzen tclontexin kej xjal nchi ocslante texin tiˈj cycastiwa te junx maj. ¹⁰ Bix oc tchˈiquen Dios jaxin te nintzaj palaxin, tetzen yolelxin kiˈj twitz Dios, tisen tzunj xin nintzaj pala Melquisedec e ten nejl twitz Aarón jatxe ootxa.

Kej xjal n‑el cyiiqˈuen tyol Dios, chi xeˈl tuj castiwa te junx maj

¹¹ Key hermano, at nimcˈatl waja txiˈ nkbaˈn cyey, pero cyiw chˈin tuˈn tel cyniˈya tiˈj, cuma chtˈol key tuˈn toc cyxnakˈtzaˈna. ¹² ¡Bix kaape ootxa chi oca ocslal! Nimxe jnabkˈi cyoclena. ¿Tuˈn tikentzen mix n‑eˈla cyniˈya tiˈj tyol Dios? ¿Ti nbaj cyey tiˈj min tzˈel cyniˈya tiˈj? Lastim key mlay chi oca te xnakˈtzal tyol Dios tuˈn min tzˈel cyniˈya tiˈj, sino ilne tiˈj tuˈn cyxnakˈtzetla juntl maj tuj tneel xnakˈtzbil te cyocslabla. Cyey tisen jun neeˈkey tzinx chˈuˈn minaˈn takˈ waaˈl. ¹³ Jcyey cyten tuj cyocslabla nuk tisen jun neeˈ tzinx chˈuˈn, bix min chi xcyey tiˈj tuˈn tbint tej mas jawnex tuj cyocslabla. ¹⁴ Yaltzen te waabj, nuk ejeeˈ kej ma xjal nxiˈ waaˈnte, yaaˈn ke neeˈ. Juˈtzen japenina tyol Dios mas cyiw. Kej ocslal nchi xnakˈtzan tiˈj t‑xnakˈtzbil Dios mas cyiw tuj cyocslabl, ejeeˈ tisenj jun xjal ya ma xjaltl bix nwaaˈntl, yaaˈn nuk tchˈuˈ nxiˈ. Juˈtzen chi tzketel tiˈj ti japenina tyol Dios, bix ti tten ttxoˈlan alcye baˈn bix alcye kaˈ. Pero cyey, nuk cytenxa ajnintz cynaabla tiˈ tyol Dios, bix jatzen kaˈja cuma baˈn tuˈn cyex jilpaja tiˈj.

6  Juˈ tzunj kiyˈxxix tuˈn tbint kuˈn tuˈntzen tel kniyˈ tiˈj cykil tyol Dios, tuˈntzen koc te tzˈaklxix. Miˈn nuk ko oc ten tiˈj tneel xnakˈtzbil s‑oc kxnakˈtzaˈn tej xko ocslan, nuk jax nxiˈ kmeltzˈuˈn. Nuk tuˈn cykil tyol Dios ko pomela tuˈntzen ttzket knaabl. Jtneel xnakˈtzbil s‑oc kbiˈn tej xko ocslan, ejeeˈ tzunj lu. Il tiˈj qˈuelel kxooˈn jniyˈ tikˈch nbint kuˈn nxiˈ kˈonte ke tuj cyamecy te junx maj. Bix tuˈn toc ke kcˈuˈj tiˈ Dios ko cletel tuˈn. ² Bix il tiˈj ko yeecˈal jun techel bautismo cye niyˈtl xjal ka ma ko oc tuya Jesús. Bix xnakˈtzbil tuˈn tcub kkˈoˈn kkˈab tibaj jun acˈaj ocslal te techel otktzen tiikˈ Espíritu Santo. Bix xnakˈtzbil at jun kˈij ko jawetz itzˈj tuya acˈaj kxumlal tuj cyamecy juntl maj. Bix ka min xiˈ kocslaˈn colbil ke ko oqueltzen tuj cyeˈybil tuˈn Dios bix ko pontzen tuj qˈuixcˈaj te mintiiˈ tbajlel twiˈ. Ejeeˈ tzunj lu tneel xnakˈtzbil nxiˈx kmeltzˈuˈn. ³ Tuˈntzen ttzket knaabl, bix tuˈn miˈn ko ex jilpaj tuj kocslabl, il tiˈj kkˈaˈc kcˈuˈj tiˈ mastl, ka ma takˈ Dios.

⁴ Nxiˈ nkbaˈn ka ma takˈ Dios cuma kape at juun min ma takˈ Dios tuˈn tiikˈente jaj mastl tuˈn ttzket, cuma ya ma cyaj cykˈoˈn cyocslabl. Cykˈoˈnc cycˈuˈja tiˈj tuˈn miˈn tzˈel cyiiqˈuena cyocslabla, cuma kej xjal o tzˈel cyniyˈ tiˈj jun jaxxix yol tiˈj coˈpbil cye, bix e cyiikˈ jun cychunkˈlal mintiiˈ tbajlel, bix e cyiikˈ Espíritu Santo, ⁵ bix e cub cytz̈iyˈbeˈn tbanel tyol Dios, bix e cyiikˈ tipemal Dios tuˈn tbint nim techlal cyuˈn, ⁶ katzen ma tzˈel cyiiqˈuen Tcwal Dios, bix ka ma chi aj meltzˈaj tuj cyreligión te ootxa, ya mlay takˈ Dios tuˈn cyaj meltzˈaj juntl maj. Katzen nchi kˈumen cywitz xjal ka ya o tzˈel cyiiqˈuen Tcwal Dios, juˈxsen japenina tisen njaw cykˈoˈn Jesús twitz cruz juntl maj, bix nchi xmucchan tiˈjxin cyisen kej e cub byonte Jesús e xmucchanke.

⁷ Tiˈj tzunj yol ma txiˈ nkˈumena cyey cyjel nkbaˈna jun techel. Cyanem xjal tisen jun txˈotxˈ. Jtyol Dios n‑ocx tuj cyanem tisen jun jbal ncub twitz txˈotxˈ. Katzen ma takˈ txˈotxˈ jun baˈn awal te cyej xjal nchi akˈanan twitz txˈotxˈ, jatzen jun t‑xtalbil Dios. Juˈtzen japenina awal tisen tzunkej xjal oj cyiikˈente jyol te coˈpbil bix chi tzketel. ⁸ Katzen ma takˈ txˈotxˈ nuk chˈiˈxcˈa, juˈtzen japenina tisen tzunj kej xjal oj tel cyiiqˈuen yol te coˈpbil. Tisentzen chˈiˈx nuk cwel patet, juˈx xsunkej xjal n‑el cyiiqˈuen tyol Dios il tiˈj chi cyjel tjakˈ tcawbil Dios, bix sbuˈntltzenke tuˈn Dios.

Mlay ko yucch ka ma tzˈoc ke kcˈuˈj tiˈ Cristo

⁹ Jatzen cyey hermano, ma txiˈ nkbaˈna cyey tuˈn miˈn txiˈ cybiˈna cyyol kej nchi xmoxa tuˈn tcyaj cykˈoˈna cyocslabla tiˈ Jesús. Pero min tzin nkbaˈna ma cyaj cykˈoˈna. Ntzkiˈnwe nchi binchana jbaˈn nbint cyuˈnj xjal ocslal. ¹⁰ Bix ttzkiˈn Dios. Bix baˈnxix te Dios. Mlay tzˈel tuj tcˈuˈjxin cykilj baˈn o cybinchay bix jun tkˈakˈbil cycˈuˈja cyiˈj kej cyermaney. Bix ncyeˈyen Dios o chi onena cyiˈke cyuyey tuˈn cyitzˈj, bix chi onenxa juˈxa. ¹¹ Pero tisenx seyˈkey tuj tkˈakˈbil cycˈuˈja cyiˈj cyermaney, juˈxsen waja seyˈkey tuˈn tel cyniˈya tiˈj jaca juun cyey jawnen chi jawela tuj mas jawnex xnakˈtzbil, tuˈn cytzketa, ojxe cycyima, tuˈntzen cycamana tiˈj entera cycotza tzin cyyoˈna. ¹² Cykˈoˈncja chtˈolkey. Cyiiˈnxa ti e baj cye kej o chi caman tiˈj cycotz e tkba Dios. Cye e camanke tiˈj nuk tuˈn oc ke cycˈuˈj tiˈ Dios bix tuˈn minx e baj cygana. Bix juˈx ke, min tzˈoc ke kcˈuˈj nuket mintiiˈ il tiˈj, cuma ctzketel tuˈn Dios cykil tyol. ¹³ Cyiiˈnx tisen te Abraham. Oc ke texin tcˈuˈj tiˈ tyol Dios e cyaj tkˈoˈn Dios tuyaxin. Min e baj tcˈuˈjxin, cuma tuya jun jurament mintiiˈ tuˈn tcub tchˈixbeˈn tyol e cyaj tkˈoˈn Dios tyol tuya Abraham. E cyaj tkˈoˈn Dios tyol tuya jun jurament tiˈ tex tbi, bix mintiiˈtl biybaj mas jawnex twitz te Dios tuˈn tajben te jun “tzkinn Dios jurament.” ¹⁴ E tkba Dios te Abraham cyjulu: “Jax wuˈna cxeˈl nkˈoˈna nim xtalbil tibaja bix nkˈaˈya nim tchmana,” tz̈i Dios. ¹⁵ Bix oc ke tcˈuˈj Abraham tiˈ tyol Dios bix e tyo tuya chewˈ tnaabl, bix juˈtzen e tcamanaxin alcyej otk tkba Dios texin.

¹⁶ Ojtzen taj jun xjal tuˈn tcyaj tyol mas jaxxix cywitz juntl xjal tuˈn tcub cyiˈj, nxiˈ tkˈoˈn tipemal tyol tuˈn tocx tipen tiˈ tipemal juntl xjal mas nintzaj twitzxin. Tisetzen tkbaˈn jun xjal, “Jaxxixwe wuˈn, tzkinn Dios jurament,” ya otktzen cyaj tyol tuj tzinen juˈwa, bix mintzentiiˈ baˈn cycub ten txololol tuˈn. ¹⁷ Yaltzen te Dios, min‑al juntl xjal mas nintzaj twitzxin tuˈn tocx tkˈoˈn tipemal tyolxin. Cycyeˈyenc tej tcyaj tkˈoˈn Dios tyol te Abraham, tuˈn t‑xiˈ tkˈoˈn mas tipemal tyolxin tuˈn tcyaj mas jaxxix tyolxin, nuk oˈcx tuˈn Dios e tzaj tipemal tyol te Abraham. “Jaxwe wuˈn” tz̈i Dios te Abraham. Tiˈj tzunj jurament lu e cyaj tuj tzinen ja Dios mlay tchˈixbe tyol te kxeˈchel Abraham cyuya ke tchman. Il tiˈj tuˈn tbint tuˈnxin. Bix tej tcyaj tkˈoˈn Dios tuya Abraham ja yol tiˈj xtalbil, jax yol te ke jaˈlewe.

¹⁸ Juˈtzen n‑el kniyˈ tiˈj te tyol Dios o cyaj tkˈoˈn ke tuˈn tkˈonte xtalbil kibaj, jax. Tneel e cyaj tyolxin, bix n‑el kniyˈ tiˈj mlay ẍtakˈen Dios. Tcab, e xiˈ tkˈoˈnxin tipemal tiˈ tyolxin tuya jun jawnex jurament. Nuktzen kyoˈ tiˈj t‑xtalbilxin o cyaj tkˈoˈnxin ke, ejooˈ ma ko clet tuj il. ¹⁹ Bix tej kyoˈ jatzen jun kchunkˈlal tuya Dios te junx maj. Bix jatzen Jesús o binchante jaxxix tej kyoˈ, cuma ya o ponxin nejl kwitz tuya Dios. Jatzen mojbalecte ke tuya Dios. Jatzen e jkonte jun be kwitz tuˈn kocx twitz Dios. At jun tumel. Cytzkiˈna tuj nintzaj tja Dios cyxol judío at jun nintzaj xbalen tcub maksbil ttziˈj cwart xjanxsen jaaˈ e ten Dios, tuˈn miˈn chi ocx xjal twitz Dios. Pero tejtzen tcyim Jesús, e cub t‑xiten Dios jnintzaj xbalen. Jatzen jun techel ya baˈn kocx twitz Dios, yaaˈntzen tisen nejl. Ya jaˈlewe mintzentiiˈ maksbil kwitz tcub tuˈn Dios tuˈn miˈn ko ocx. ²⁰ Cytzkiˈna tuj cyreligión judío te ootxa, nuk ja nintzaj pala cyxol judío oc tuj xjan cwart tujxe xbalen jaaˈ e ten Dios, bix nuk jun maj jaca jnabkˈi. Pero tejtzen tcub rotj jxbalen tcub maksbil cywitz xjal, bixsen e pon baj twiˈ tuˈn tocxtl tzunj nintzaj pala twitz Dios te yolel kiˈj, cuma ya jatzen Jesús o pon twitz Dios tuj cyaˈj te yolel kiˈj te junx maj. Ja tzunxin o tzˈoc te kpala te junx maj, bix jaxin o jkonte be kwitz tuˈn kocx twitz Dios. Jawnex bix te junx maj toclen Jesús te jawnex pala jaˈlewe, tisex te Melquisedec jun nintzaj bix te junx maj pala jatxe ootxa.