Chronological

Jun tneel uˈj e xiˈ ttzˈiˈben apóstol Pedro

Jun kˈolbebl tuˈn apóstol Pedro

1  Inayena Pedro, jun t‑xel Jesucristo. Nxiˈ ntzˈiˈbena ja uˈj lu te cyey ocslal cyuj departamento te Ponto, Galacia, Capadocia, Asia, bix Bitinia. Ma chi el tz̈itja. Cyisen jun wikxitl xjalkey twitz txˈotxˈ. ² Jatxe tuj tneel ttzkiˈn Kman Dios alcyej xjal at cˈoquel te ttanem. Ma tzˈel tpaˈn Espíritu Santo ejeeˈy cyiˈ niyˈtl xjal tuˈn cyoca te ttanem Dios. Ma chi jaw scyˈoˈna tuˈn toc cybiˈna Jesucristo, bix tuˈn cycleta tuˈnj tcyamecy tej t‑xiˈ toyen ttz̈qˈuel te chojbil kil. Tzajxit nim t‑xtalbil Dios cyibaja, bix nimxit chi temela tuj ttz̈yal.

At kˈukbabl kcˈuˈj tiˈj kkab mintiiˈ tbajlel

³ Knimsaˈwaxittzen tbi Dios, ja tman Kaaw Jesucristo. Nimxsen ma tzaj tkˈoˈn Dios lastim ke, cuma ma tzaj tkˈoˈn jun acˈaj kchunkˈlal. Cuma e jatz itzˈj Jesucristo tuj cyamecy, juˈ tzunj ko tzalajel cuma laˈ alcye jun kˈij ko temel tuyaxin te junx maj. ⁴ Ckiikˈel jun kkab mintiiˈ tbajlel bix mlay txiˈ tuj il bix mlay tzkij. Ja kkab lu cˈuˈn tuˈn Dios tuj cyaˈj te ke. ⁵ Cuma ma tzˈoc ke cycˈuˈja tiˈ Dios, ctzaaltzen tonen Dios ejeeˈy tuˈn tipemal tuˈn tiyˈx cyuˈna ojxe cyiikˈentey cycotza. Bix tuj mancˈbil kˈij ccyiikˈela jcolbil ma baj tnincˈuˈn Dios cyey.

⁶ Juˈ tzunj, chi tzalajxa, amale atet maj il tiˈj jaˈlewe tuˈn tiyˈx qˈuixcˈaj cyuˈna jun rato. ⁷ Cyocslabla tisen oro. Il tiˈj tuˈn tocx oro tuj kˈakˈ, tuˈntzen tyeecˈaj ka oro. Katzen il tiˈj tuˈn tocx oro tuj kˈakˈ, amale pjelet oro laˈ alcye jun kˈij, mas il tiˈj tuˈn toc pena cyiˈja, tuˈntzen tyeecˈaj ka jaxxix cyocslabla tiˈ Dios. Amale nimxsen cˈajbel oro, pero mas cˈajbel cyocslabla. Bix oj tul meltzˈaj Jesucristo, ka ma chicˈaj jaxxix cyocslabla, chi elela baˈn tuj twitz, bix cjawel tnimsaˈn ejeeˈy, bix ctzaal tkˈoˈn nimbil cyey. ⁸ Bajx cyiley Jesucristo, pero n‑oc takˈxin cyey. Bix amale mint n‑oc cycyeˈyena jaxin jaˈlewe, pero nimxsen nchi tzalaja tiˈjxin tuya jun cytzalajebla mlay kbaj, cuma n‑oc ke cycˈuˈja tiˈjxin, ⁹ bix cuma tuˈnj ja cyocslabla tiˈjxin, chi cletel tzuna.

¹⁰ Jatxe ootxa, kej tyolel Dios e cykˈume tiˈj jun xtalbil at tuˈn tul, jaj colbil ma cyiikˈa. Pero min el cyniyˈ tiˈj colbil, bix nim e cub tenke ximal tiˈj. ¹¹ Tuˈnj Espíritu Santo e kˈoj tuˈn Cristo, e cykˈume at tuˈn tul jun xjal laˈ alcye jun kˈij scyˈoˈn tuˈn Dios, bix at tuˈn tiyˈx nim qˈuixcˈaj tuˈn ja xjal lu, bix at tuˈn toc te cawel tibaj cykilca. Bix nim e cyajbe tuˈn tel cyniyˈ tiˈj alcyej xjal scyˈoˈn tuˈn Dios, bix alcyej kˈij tuˈn tul. ¹² Tuˈnj Espíritu Santo, e tyeecˈaj cyexin j‑e cykˈume at tuˈn tbaj, yaaˈn tuˈn tbaj te cye, sino mas yaj te ke. Bix ma kˈumj tpocbalel ja colbil lu cyey cyuˈn kbalte tyol Dios. O chi kˈumenxin tuˈnj tipemal Espíritu Santo o tzaj smaˈn tuj cyaˈj, bix tpocbalel cycolbila, jax juˈx ke t‑ángel Dios tuj cyaˈj cyaj tuˈn tel cyniyˈ tiˈj.

Ma ko txquet tuˈn Dios tuˈn koc te ttanem

¹³ Juˈ tzunj, nuk binne cytena tuˈn cybinchantiya tajbil Dios, bix cytzyum cyiiba twitz tkaˈyel. Bix miˈn baj cycˈuˈja tiˈj xtalbil ctzaal kˈoˈn cyey oj tul meltzˈaj Jesucristo. Nuk chi ayonxa tiˈj tuya cykil cycˈuˈja. ¹⁴ Cuma tcwal Dioskey, juˈ tzunj cybima tyol. Miˈn txiˈ cycuyana tajbil cyxumlala yaaˈn baˈn, tisenj e cysey tej min el cyniˈya tiˈj tajbil Dios. ¹⁵ E ttxoc Dios ejeeˈy tuˈn cyoca te ttanem Dios. Juˈ tzunj, chi tena sakxix, tisen te Dios sakxix. ¹⁶ Tzin tkbaˈn tyol Dios cyjulu: “Chi tena sakxix, cuma sakxix kena,” tz̈i Dios tuj tyol. ¹⁷ N‑oc cykˈoˈna Dios te cymana. Pero jax juˈx ja Cymana Dios cˈoquel te Juez tibaj taakˈen cykilca xjal. Bix oj cyoc xjal tuj xkelbil twitzxin, miˈn txiˈ tcyeˈyenxin ka jawnex jun xjal bix ka ajnintz. Juˈ tzunj, cyyeecˈanx nim cynimbila twitzxin tzalu twitz txˈotxˈ joocˈtzen nchi ayona tuˈn cypona tuya Dios, bix tuˈn tten baˈn cykilca cybinchbena. ¹⁸ Jcychunkˈlala e xiˈ cyiiˈna nejl, otk cyxnakˈtza cyiyˈjila cyey, pero mintiiˈ cˈajbela. Ma chi coˈpja tuj ja cychunkˈlala lu, bix cytzkiˈna twiˈj cycolbila yaaˈn oro bix yaaˈn pwak te plata at tbajlel. ¹⁹ Chi lokˈeta tuyaj jawnex tcyamecy Cristo tej tel tz̈itj ttz̈qˈuel tiˈj, tisen oj nxiˈ oyet jun tal carnel mintiiˈ tpalt bix sakxix. ²⁰ Tej mitknaˈx tbint twitz txˈotxˈ, otk baj tnincˈuˈn Dios tuˈn cycleta tuˈn Cristo, pero maa jaˈlewe ma tzaj yeecˈan Cristo twitz txˈotxˈ tuˈn t‑xiˈ tcoˈpan ejeeˈy. ²¹ Nuk tuˈn Cristo nbint cyuˈna tuˈn cyocslana tiˈ Dios e jatz titzˈjsaˈn Dios ja Cristo tuj cyamecy, bix ma tzaj tkˈoˈn Dios texin tuˈn toc te mas jawnex tibaj cykilca. Nuk tuˈn Cristo baˈn tuˈn cyoc lpey tiˈ Dios, bix baˈn tuˈn cyayona tiˈj tuˈn cytena tuya Dios.

²² Tuˈnj Espíritu Santo, ma tzˈoc cybiˈna jaxxix yol, bix ma chi oca sakxix. Ya ma kˈoj cyipemala tuˈn tocxix cyakˈ ke ocslal cyey. Juˈ tzunj, cˈoquel cyakˈ ke ocslal cyuyey cyey tuya cykil cycˈuˈja. ²³ Ma kˈoj jun acˈaj cychunkˈlala. Min e tzaj ja acˈaj cychunkˈlala lu tiˈj cyiyˈjila tej cyul itzˈja, cuma yaaˈn te junx maj ja cychunkˈlala lu oj n‑ul itzˈj jun xjal, sino ma tzaj acˈaj cychunkˈlala lu tuˈn tyol Dios nim tipemal mintiiˈ tbajlel. ²⁴ Tzin tkbaˈn tyol Dios cyjulu: “Cykilca xjal tisen cˈul, bix cybinchben bix cynimbil cyiib jawnex tisen txmaquel cˈul, bix tisen oj ntzkijtl cˈul bix txmaquel n‑el tzˈak, juˈx xsunj pjel cye xjal tuyaj ma bint cyuˈn. ²⁵ Pero tyol Dios ctemel te junx maj,” tz̈i tyol Dios. Bix ja tzunj tyol Dios lu e kˈumj cyey tej tpon tpocbal colbil cyey cyxola.

2  Cuma ma chi oca te ttanem Dios, juˈ tzunj, key ocslal, cykˈoˈncj cykilca yaaˈn baˈn. Miˈn cub cyyajlaˈna ke xjal, bix miˈn chi oca te xmeletzˈ. Miˈn chiˈl cycˈuˈja tiˈ cyuyena, bix miˈn chi cub tena iken yol kaˈ tiˈ cyuyey. ² Tisen jun ẍlak ntzeyˈ tcˈuˈj tiˈ cychˈuˈ, jax juˈx cyey, ntzeyˈxit cycˈuˈja tiˈj tyol Dios sakxix yaaˈn tzˈil, tuˈntzen cytz̈ˈiy tuˈn tuj cyocslabla. ³ Ma cyiikˈa t‑xtalbil Dios jun maj. Chi oca tisen jun tal neeˈ ma txiˈ jun maj tchˈuˈ, bix tajx mastl. ⁴ Tisen najben jun xak te tkˈukˈlel jun jaaˈ, jax juˈx te Kaaw. Jaxin tkˈukˈlel kchunkˈlal, tisen jun xak iˈtz. Juˈ tzunj, chi lkˈetza tuyaxin. El cyiiqˈuen xjal jaxin, pero te Dios, ma jaw tscyˈoˈn jaxin, bix nimxsen cˈajbelaxin. ⁵ Tisen oj njaw cybinchaˈn xjal lookˈ tibaj tkˈukˈlel jaaˈ tuˈn tbint jun jaaˈ, jax juˈx cyey, cymojbanx cyiiba tuya Kaaw tuˈn cyoca tisen jun tja Dios jaaˈ najla Dios. Bix tisenj tej t‑xiˈ cykˈoˈn pala oybil te Dios, juˈx cyey, chi ajbena te Dios. Oj nchi ajbena te Dios juˈwa, jax jun oybilkey te Dios, bix tiikˈel Dios cyoybila, cuma at cymojbabl cyiiba tuya Jesucristo. ⁶ Ktzkiˈn jlu, cuma tzin tkbaˈn tyol Dios cyjulu: “Jeyˈ, cwel nkˈoˈna jun jawnex xak te cytanem nxjala, jun tkˈukˈlel jaaˈ scyˈoˈn wuˈna, bix kej xjal n‑oc ke cycˈuˈj tiˈj ja xak lu, yaaˈn nuk cyajx cˈoquel ke cycˈuˈj tiˈj,” tz̈i tyol Dios. ⁷ Juˈ tzunj, cyey ma chi ocslana, jawnexsen ja xak lu tuj cywitza. Pero te cyej xjal min ma chi ocslan, tzin tkbaˈn tyol Dios cyjulu: “Jxak el cyiiqˈuen kej binchal jaaˈ, ma tzˈoc te tkˈukˈlel jaaˈ, bix jawnex,” tz̈i tyol Dios. ⁸ Jax tzin tkbaˈn: “Tuj cywitz xjal, tiˈj Clol cye cxeˈl nkˈoˈna, tisen jun xak tcub tuj cybe nchi jaw pitcˈaj tiˈj, bix tisen jun tzlom nchi jaw jilpaj xjal twitz,” tz̈i tyol Dios. Nchi jaw tzˈak tiˈj cuma cycyˈi tuˈn toc cybiˈn. Juˈ tzunj, il tiˈj nchi jaw tzˈak.

Ejeeˈ kej xjal scyˈoˈn tuˈn Dios

⁹ Perotzen cyey, t‑xjal Dioskey. Scyˈoˈnkey tuˈn Dios tuˈn cyajbena te kbalte tyolxin cyxol xjal bix tuˈn cyajbena tuj taakˈen jrey tibaj cykilca. Ttanem Dios sakxixkey, bix taj Dios tuˈn cytena nuk te texin. Ma ttxoc Dios ejeeˈy tuˈn cyetza tuj klolj bix tuˈn cytena tuj spiˈyen, tuˈntzen t‑xiˈ cykbaˈna jawnex colbil cye xjal o bint tuˈn Dios. ¹⁰ Nejl, yaaˈn ttanem Dioskey. Pero jaˈlewe, ma chi oca te ttanem Dios. Nejl, min e cyiikˈa tlastim Dios. Pero jaˈlewe, ma cyiikˈa.

Il tiˈj cbinel tajbil Dios kuˈn

¹¹ Key ocslal n‑oc cyakˈa weya, tisen jun wikxitl xjalkey cyxol xjal te twitz txˈotxˈ. Nuk jun rato eteˈy tzalu. Juˈ tzunj, cxeˈl ncubsaˈna nwitza cyey tuˈn miˈn txiˈ cynimana tajbil cynaabla aj il, cuma nkˈojl cynaabla aj il tiˈ cyanema. ¹² Cxeˈl cyiiˈna cychunkˈlala tuj tumel cywitz xjal yaaˈn ocslal, tuˈntzen toc cycyeˈyen cybinchbena baˈn. Amale nchi yolet kaˈ cyiˈja jaˈlewe, pero laˈ alcye jun kˈij cjawel cynimsaˈn tbi Dios, cuma tuˈnj n‑oc cycyeˈyen jbaˈn nbint cyuˈna, chi ocslaltzen tiˈ Dios.

¹³ Il tiˈj cxeˈl cynimana cykilca cawel tcub cyxol xjal, cuma juˈ taj Kaaw. Cynimanx jnintzaj cawel, ¹⁴ bix jax cynimanx ke gobernador, cuma smaˈnke tuˈn cawel tuˈn cykˈonte cycastiwa kej xjal binchal kaˈ, bix tuˈn cyyolen baˈn cyiˈj xjal binchal baˈn. ¹⁵ Taj Dios tuˈn cybinchantiya baˈn tuˈn tmaket cytzi kej xjal cycyˈi jaxxix yol cuma mintiiˈ cynaabl tiˈj. ¹⁶ Ma ttzakpi Dios ejeeˈy, pero yaaˈn tuˈn cyxiˈ lpey tiˈj tikˈch cyaja, sino tuˈn tbint tajbil Dios cyuˈna. ¹⁷ Juˈ tzunj, cykˈonx nimbil te cykilca. Cˈoqˈuelxix cyakˈ ocslal cyey. Cybiˈy Dios. Bix cynimanxa kej cawel.

¹⁸ Yaltzen key xjal nchi akˈanana tjakˈ tcawbil cypatróna, tuˈn toc cybiˈna cyyol, yaaˈn nuk oˈcx tuˈn t‑xiˈ cynimana ke patrón baˈn cynaabl, pero jax juˈx tuˈn t‑xiˈ cynimana ke patrón cyiw. ¹⁹ Amale cyiwet tcawbil cypatróna cyibaja, pero cynimanxa jaxin tuya cypasensyey, tuˈn cynimana Dios, cuma baˈn jlu tuj twitz Dios. ²⁰ Ka ma chi binchana jun kaˈ tiˈ cypatróna, bix ma tzˈoc cypjuˈn ejeeˈy tuˈn tlaj cyila, ¿ti cˈajbela ka ma tziyˈx cycastiwiya cyuˈna tuya cypasensyey? Pero ka ma chi binchana nuk baˈn, pero n‑ocx tpjuˈn cypatróna ejeeˈy, bix ka ma tziyˈx ja qˈuixcˈaj lu cyuˈna tuya cypasensyey, baˈntzen nchi eˈley tuj twitz Dios. ²¹ At‑xit cypasensyey, cuma ma chi txqueta tuˈn Dios tuˈn cyxiˈ lpey tiˈj yecˈbil e cyaj tkˈoˈn Cristo. Iyˈx qˈuixcˈaj tuˈn Cristo, bix tuˈnj qˈuixcˈaj iyˈx tuˈnxin, ma tzˈel baˈn te cyey. ²² Mintiiˈ il e tbinchaxin, bix min e ẍtakˈenxin. ²³ Tej toc cyxmucchaˈn xjal jaxin, mintiiˈ akˈxin. Tej tiyˈx qˈuixcˈaj tuˈnxin cyuˈn xjal, min e xiˈ tkanenxin te Dios tuˈn tcub cycastiwa. Nuk oˈcx e xiˈ tkˈon tiibxin tuj tkˈab Dios, jxin binchal cykilca jiquenxix. ²⁴ Jaxxin e xiˈ ikente kil tej tjaw kˈoˈn t‑xumlalxin twitz cruz, tuˈntzen tel ttzakpiˈnxin ejooˈ tiˈj knaabl aj il, tuˈn kbinchante baˈn. Tuˈnj tcyimlenxin ma ko cleta. ²⁵ Nejl, otk chi el tzpeta tisen ke carnel. Pero jaˈlewe, ma chi ul meltzˈaja tuya Cristo, ja cylel cyey bix cˈojlal cyanema.

Ti tten tuˈn tnajan xinak tuya t‑xuˈl

3  Jax juˈx cyey xuuj, il tiˈj chi yeecˈala cynimbila. Cynimanx cychmila. Ka yaaˈn ocslal ke cychmila, bix ka cycyˈi cyyolena tiˈ tyol Dios, pero ka ma cub cycuyana cyyol, kape at jun kˈij chi ocslal tiˈ Dios tuˈnj cynimbila. ² Kape chi ocslal oj toc cycyeˈyen cynimbila bix jun cychunkˈlala sakxix. ³ Miˈn cybinchay nuk tuˈn baˈn cycyeˈnquey. Cxebjil cywiˈy, bix cycwencha oro, bix cyxbalena wiˈyel, pero miˈn tzˈoc cykˈoˈna te cynimbil cyiiba. ⁴ Mas il tiˈj tuˈn tocxix cycwenta tiˈj cyanema, ka baˈn bix ka yaaˈn baˈn. Tenxit cyanema maans bix txubtx. Pjel cyxbalena, pero cyanema tbanelxix, miˈn baj, bix mas il tiˈj jlu tuj twitz Dios. ⁵ Jatxe ootxa, kej xuuj cyxol ttanem Dios mas oc cykˈoˈnxuj cycwent tiˈj ti tten cyanemxuj twitzj tiiˈn cycyeˈncxuj. Oc kexuj cycˈuˈjxuj tiˈ Dios, bix e xiˈ cynimanxuj cychmilxuj. Juˈ tzunj, chi oquel lpey tiˈj cyyecˈbilxuj. ⁶ Jun yecˈbil te cyey e cyaj tkˈoˈn Sara, t‑xuˈl Abraham te ootxa. Oc tbiˈnxuj tyol tchmilxuj, bix oc tkˈoˈnxuj tbixin te “Taat.” Chi oquela tisen Sara ka ma chi binchay jbaˈn bix mintiiˈtzen ttz̈i cychmila cyiˈja.

⁷ Yaltzen cyey chmilbaj, chi ten tzuna tuj tumel. Chi najana tuya cyxuˈla tuya cynaabla baˈn. Qˈuelel cyniˈya tiˈj yaaˈn nimxix cyipenxuj cywitza. Cykˈonxa nimbil cyexuj, tuˈntzen miˈn ten jun xitbil oj nchi naˈna Dios, cuma cycaˈbela ma cyiikˈa cychunkˈlala te junx maj.

Kej niyˈx qˈuixcˈaj cyuˈn tuˈnj nchi binchan baˈn

⁸ Yaltzen te cykilca key, chi bet‑xita cykilcakey junx. At‑xit cyanema cyxola, bix cˈoquel cyakˈ ocslal cyey, cuma tisen cyitzˈen cyiiba tuˈnj cyocslabla. Qˈuelel cyniˈya tiˈj ka at il taˈ juntl, bix chi oca maans. ⁹ Miˈn xeˈlen cyuˈna oj toc bint jun kaˈ cyiˈja bix oj cyoc yasen xjal cyiˈja, sino cykanenx te Dios tuˈn tkˈonte jun baˈn te cye. E tzaj ttxcoˈn Dios ejeeˈy tuˈn ttzaj tkˈoˈn jun baˈn te cyey. Juˈ tzunj, cykˈoˈnxa jun baˈn te cykilca. ¹⁰ Tzin tkbaˈn tyol Dios cyjulu: “Alcye taj tuˈn tten nim kˈij twitz txˈotxˈ, bix tuˈn tnoj tchunkˈlal tuya baˈn, il tiˈj tuˈn tcub ttzyuˈn ttzi, tuˈn miˈn yolen yaaˈn baˈn, bix tuˈn miˈn cub tsbuˈn juntl. ¹¹ Bix il tiˈj tuˈn tcyaj tcyeˈyen jkaˈ bix tuˈn tbinchante baˈn bix tuˈn toc tipen tiˈj tuˈn tten tuj ttz̈yal cyuya xjal. ¹² Cykˈoˈnc cyipena tiˈj tuˈn tbint jlu cyuˈna, cuma tzin tcˈojlaˈn Dios kej xjal baˈn nbint cyuˈn, bix tzin tbiˈn Dios oj nchi naˈn tiˈjxin. Pero kej xjal kaˈ nbint cyuˈn, kaˈke tuj twitz Dios,” tz̈i tyol Dios.

¹³ Cxeˈl nkanena cyey, ka ma tzˈoc cykˈon cyiiba tuˈn cybinchantiya nuk jaj baˈn, ¿nchi kˈojlelpale xjal cyiˈja? Min. ¹⁴ Pero ka ma kˈojl jun xjal cyiˈja tuˈn tlaj tzin cybinchaˈna baˈn, jun xtalbil jlu tuˈn niyˈx qˈuixcˈaj cyuˈna tuj taakˈen Dios. Juˈ tzunj, miˈn tzaj ttz̈i cyiˈja, bix miˈn baj cycˈuˈja. ¹⁵ Miˈn chi xoba cywitz xjal, sino nuket chi nimanxa Cristo tuj cyanema, cuma Kaaw. Bix binne cytena tuˈn t‑xiˈ cytxˈolbaˈna cye xjal ka ma tzaj cykanen cyey tiken ma tzˈoc ke cycˈuˈja tiˈ Cristo. Pero chebe cykbanxa cye, bix tuya cynimbila cywitz.

¹⁶ Cybinchama nuk jaj baˈn, tuˈn junx taˈ cybinchbena tuyaj tzin tkbaˈn cyanema. Ojtzen tchicˈajax mintiiˈ cypaltiya, ctzaaltzen cychˈixew kej xjal nchi yasen cyiˈja tuˈn cybinchbena baˈn bix cyocslabla tiˈ Cristo. ¹⁷ Ka taj Dios, mas baˈn tuˈn tiyˈx qˈuixcˈaj cyuˈna tuˈn tlaj jbaˈn nbint cyuˈna, twitzj tuˈn tcub castiwa cyibaja tuˈn tlaj jyaaˈn baˈn nbint cyuˈna. ¹⁸ Cycyeˈyenxa jun yecˈbil e cyaj tkˈoˈn Cristo. Mintiiˈ til, pero e cyim tuˈn klaj yaaˈn tzˈaklxix koˈ, tuˈn tchjet kil te junx maj, tuˈntzen kpon tiiˈn tuya Dios. E cub byet t‑xumlal, pero e jatz titzˈjsaˈn Espíritu Santo jaxin tuj cyamecy. ¹⁹ Bix tuj ja tyem lu, e cuˈx Cristo tuˈn t‑xiˈ tkˈumen cyej xjal otk chi cyim bix jpuˈnke tjakˈ txˈotxˈ. ²⁰ Jatxe ootxa min e cybi kej xjal lu Dios. Tisen tzunj, tej tjaw tbinchaˈn Noé jun barc, nim ayon Dios cyiˈj xjal tuˈn cyajtz meltzˈaj tuya Dios, bix tuya nim cypasensya, pero cycyˈi. Nuk wajxak xjal e clet tuj barc tuj aˈ. ²¹ Bix tisen e clet ke Noé tuˈn barc, ma chi cleta tuˈnj cymojbabl cyiiba tuya Jesucristo, cuma e jatz itzˈjxin juntl maj tuj cyamecy. Min e cletkey tuˈnj costumbre tuˈn tjaw aˈ cywiˈy, sino cuma e xiˈ cykanena te Dios tuˈn ttzaj tkˈoˈn cyey jun acˈaj bix sakxix cynaabla. ²² Yal te Jesucristo, ma pon tuj cyaˈj, bix at tuj tmankˈab Dios. Bix at cykilca ángel bix biman bix cawel tjakˈ tcawbil.

Tuˈn kajben tuya jun koclen o tzaj tkˈoˈn Dios

4  Cuma iyˈx qˈuixcˈaj tuˈn Cristo tuya t‑xumlal bix e cyim tuˈn tchjet kil, juˈ tzunj il tiˈj tuˈn tten jun cynaabla tisen te Cristo. Cuma tuˈnj cymojbabl cyiiba tiˈj tcyimlen Cristo, mintiiˈtl cyaja tiˈ il. ² Ma cyaj cykˈoˈna il tuˈn cyxiˈ lpey tiˈj tajbil Dios cykilca kˈij twitz txˈotxˈ, yaaˈn tiˈj cykilca taj cyxumlala. ³ Nejl, nim kaˈ e bint cyuˈna, tisenj nbint cyuˈn kej xjal min cytzkiˈn Dios. Min e cytzuy cyiiba twitzj kaˈ tajbil cyxumlala, sino oc cybiˈna tikˈch taj cynaabla aj il. Nuk jaj pajbaj lepchkey tiˈj. E bolayinkey, bix nim s̈itz̈ˈbil yaaˈn tumel eteˈy. Bix juntl kaˈ e bint cyuˈna. Oc naˈnkey cywitz sant. ⁴ Bix cuma ma cyaj cycyeˈyena cykilca ja lu, bix miˈntl nchi binchana kaˈ cyuya kej cyuyey te nejl, nchi jawtzen kleeˈ cyiˈja, bix nchi xmucchan cyiˈja. ⁵ Pero tzul jun kˈij cykˈaˈ xjal cycwent twitz Cristo, jaj xjal binne tten tuˈn tul kˈolecte stis te cykilca xjal, kej xjal iˈtzx oj tul, bix kej xjal otk chi cyim. ⁶ Yal tzunkej ttanem Dios o chi cyim, miˈn baj cycˈuˈja cyiˈj, cuma e kˈumj yol te colbil cye, tuˈntzen tten cychunkˈlal te junx maj, tisenj te Dios, amale ilet tiˈj e cyimke tisen niyˈtl xjal.

⁷ Ntzaj lkˈe jkˈij tuˈn tbaj cykilca. Juˈ tzunj, tenx cynaabla bix cwelxix cytzyun cyiiba, tuˈntzen tbint cyuˈna tuˈn cynaˈna Dios. ⁸ Mas il tiˈj, cˈoquel cyakˈ cyuyey cyey tuya cykil cycˈuˈja, cuma ka at tkˈakˈbil cycˈuˈja cyiˈ cabtl, yaaˈn cyiw tuˈn tnajset cyil cyuˈna. ⁹ Cykˈonxa posada cyxola, bix yaaˈn tuya nbaj cycˈuˈja. ¹⁰ Bix chi ajbenxa cye ocslal tuya laˈ alcyej cyaakˈena ma takˈ Dios cyey, tuˈn cyajbena te Dios, cuma o tzaj tkˈoˈn te jaca juun cyey tuya jun akˈuntl baˈn tbint cyuˈna. ¹¹ Ka ma tzaj tkˈoˈn Dios cyey tuˈn t‑xiˈ cykˈumena tyol cywitz ocslal, chi kˈumenxita jaxxix tyol Dios. Bix ka ma takˈ Dios cyey tuˈn cyajbena cye cabtl, chi ajbena tuya cykil cyipena ma takˈ Dios cyey, tuˈntzen tjaw nimsaˈn Dios tuj cykilca nchi binchana tuˈn Jesucristo. Jawxit nimset tbi Dios, bix cawenxit te junx maj. Juˈ ttena.

Qˈuiyel qˈuixcˈaj kuˈn cuma ocslal koˈ

¹² Key ocslal n‑oc cyakˈa weya, miˈn chi jaw kleeˈy oj n‑oc pena cyiw cyiˈja tisen jun kˈakˈ. Cˈoquel qˈuixcˈaj cyiˈja tuˈn tel niyˈbaj cyiˈja, bix yaaˈn jun wikxitl jlu. ¹³ Oj nbaj jlu, chi tzalaja, cuma at cyoclena tuˈn tiyˈx qˈuixcˈaj cyuˈna tisen e bint tuˈn Cristo. Ka ma tziyˈx qˈuixcˈaj tuˈn tlaj cyocslabla tiˈj Cristo, nim chi tzalajela oj tyeecˈan tiib Cristo tuˈn ttzyet tcawbil jawnex. ¹⁴ Ka ma chi yasen xjal cyiˈja cuma ocslalkey tiˈj Cristo, chi tzalaja, cuma tcub jawnex Espíritu Santo cyibaja, smaˈn tuˈn Dios te yecˈbil ttanem Dioskey. Xmucchaˈn Espíritu Santo cyuˈn xjal, pero cyey, njaw cynimsaˈna tbi. ¹⁵ Ka at jun cyey niyˈx qˈuixcˈaj tuˈn, cutz̈it ka yaaˈn tuˈn tlaj nbyon, bix ka tuˈn tlaj n‑alkˈan, bix ka tuˈn tlaj nbinchan yaaˈn baˈn, bix ka tuˈn tlaj nuk n‑ex tkˈij ttzi cyja xjal. ¹⁶ Pero ka ma tziyˈx qˈuixcˈaj cyuˈna cuma ocslalkey, miˈn tzaj cychˈixewa. Oˈcx tuˈn t‑xiˈ cykˈoˈna chjonte te Dios tiˈj ocslalkey tiˈ Cristo.

¹⁷ Key ocslal, ma pon tumel tuˈn ttzaj tkˈoˈn Dios castiwa cyibaj xjal. Katzen ma takˈ Dios tuˈn toc pena kiˈj, ejooˈ tcwal Dios, ¿ti pjel cyej xjal min ma chi niman jyol tiˈj colbil cye ma tzaj tkˈoˈn Dios? ¹⁸ Tzin tkbaˈn tyol Dios te ootxa cyjulu: “Ka ma tzaj tkˈoˈn Dios tuˈn toc pena tiˈj jun xjal jiquen twitz Dios, yaj tzunj xjal yaaˈn jiquen bix aj il, ¿ti pjel te?” tz̈i tyol Dios.

¹⁹ Juˈ tzunj, oj tiyˈ qˈuixcˈaj cywitza cuma taj Dios, miˈn cyaj cycyeˈyena tuˈn cyokxenena cyiiba tiˈj, bix tuˈn cybinchana baˈn, cuma jaxin binchalte cykilca, bix baˈn tuˈn toc ke cycˈuˈja tiˈjxin.

Tej t‑xiˈ tkˈoˈn Pedro cynaabl kej nejenel cyxol ocslal

5  Key nejenel cyxola, jax juˈx weya jun nejenel cyxol ocslal kena cyuyey. Oc ncyeˈyena tej tiyˈx qˈuixcˈaj tuˈn Cristo. Bix jaan kena cyuyena cwiikˈela jun jawnex nchunkˈlala oj tyeecˈan tiib Cristo. Juˈ tzunj, nxiˈ nkˈoˈna consejo cyey. ² Tisen jun cylel ncˈojlaˈn ke tcarnel tuˈn, cycˈojlanxa ke ocslal ma cyaj tkˈoˈn Dios tuj cycwenta. Miˈn chi cawena cyibaj cuma ja cyaakˈena, sino tuˈnxix cykil cyanema, bix yaaˈn nuk tuˈn cycamana twiˈ cycˈuˈja, sino tuya cykil cycˈuˈja. ³ Bix miˈn tzˈoc cykˈon cyiiba nuk tuˈn cyoca te cawel cyibaj kej ocslal eteˈ tuj cycwenta. Mas baˈn tuˈn cyoca te jun yecˈbil baˈn, tuˈn cyoc lpe ocslal cyiˈja. ⁴ Ojtzen tul meltzˈaj Nejenel cye cylel, ccyiikˈela jun cycotza jawnex mintiiˈ tbajlel.

⁵ Yaltzen key xinak cwalx, cxeˈl cyyeecˈana cynimbila cye nejenel tuj tja Dios. Bix cykilca key, chi oca maans cyxolxa, cuma at tkˈoj Dios cyiˈ kej xjal nuk nbaj cyniman cyiib, pero kej xjal n‑oc cykˈon cyiib te chˈin, tzin tkˈoˈn Dios t‑xtalbil cye. ⁶ Juˈ tzunj, cˈoquel cykˈon cyiiba te chˈin twitz jawnex Dios te nim tipemal, tuˈntzen ttzaj tkˈoˈn cyey tuˈn cyoca te nim oj tpon tumel. ⁷ Bix cykilca najkelen cycˈuˈja tiˈj, cykˈonxa tuj tcwent Dios, cuma tzin cˈojlan Dios cyiˈja.

⁸ Cytzyun cyiiba twitz il, bix cycˈojlanx cyiiba, cuma nkˈojl taaw il cyiˈja, bix tisen n‑oc lpe jun león tiˈj jun masat tuˈn t‑xiˈ tchyoˈn, jax juˈxa n‑oc tipen taaw il tiˈj ti tten tuˈn cytzyeta tuˈn tuj tkˈab. ⁹ Pero chi weˈxixa twitz, bix chi tena cyiw tuj cyocslabla, cuma cytzkiˈna cykilcatl ocslal twitz txˈotxˈ niyˈx qˈuixcˈaj cyuˈn tisen niyˈx cyuˈna. ¹⁰ Cybajlenxittzen yaaˈna cab kˈij, ctzˈaksaltzen Dios cyey, bix cjawel twaˈbaxin ejeeˈy, bix kˈolte cyipemala, bix cyiwsalte cyey, jax Dios ntzaj kˈonte cykil xtalbil, bix ma ttxoc ejooˈ tuˈn kten tuya te junx maj tuj jawnex tcawbil tuˈn Jesucristo. ¹¹ ¡Jawxit nimset tbi Dios, bix tuˈn tcawen tibaj cykilca te junx maj! Juˈxit tzuna.

Mancˈbil yol cye ocslal

¹² Cxeˈl tiiˈn jxin Silvano ja uˈj lu cyey, cuma n‑oc kexix ncˈuˈja tiˈjxin. Tuˈnj ja caˈba oxe yol lu ma txiˈ ntzˈiˈbena cyey, cutz̈it cywix cyocslabla tuˈn, bix tuˈn miˈn cyaj cycyeˈyena jaxxix yol tiˈj t‑xtalbil Dios. ¹³ Kej ocslal tzalu tuj Babilonia, junx eteˈ cyuyey tuj cyocslabla, bix nxiˈ cykˈoˈn jun cykˈolbebl te cyey. Jax juˈx ncwala Marcos, nxiˈ tkˈoˈn tkˈolbebl te cyey. ¹⁴ Jax juˈx cyey cyxola, cykˈolben cyiiba tuya tkˈakˈbil cycˈuˈja cyel cyiiba. Chi tenxita tuj ttz̈yal, ejeeˈy at cyocslabla tiˈ Cristo.