Chronological

Jun uˈj e xiˈ ttzˈiˈben apóstol Pablo te Tito

Jun kˈolbebl tuˈn Pablo te Tito

1  Inayena, Pablo, nxiˈ ntzˈiˈbena ja uˈj lu te tey, Tito. Jun t‑akˈanal Dios kena, bix tuj taakˈenxin, nchin ajbena te jun t‑xel Jesucristo. Jweya waakˈen, jaj tuˈn cyocslan xjal tiˈ Cristo bix tuˈn tel kniyˈ tiˈj kocslabl, ejooˈ t‑xjal Dios, bix ti tten tuˈn t‑xiˈ kiiˈn knaabl tisen taj Dios. ² Ejooˈ xjal ma txiˈ kiiˈn ja kocslabl lu, baˈntzen tuˈn kayon tiˈj jun kchunkˈlal mintiiˈ tbajlel, cuma cpomel baj Dios tyol tiˈ. Mixbe ẍtakˈenxin. Tej mitknaˈx tbint twitz txˈotxˈ, e tkba Dios tuˈn t‑xiˈ tkˈoˈnxin cychunkˈlal cye t‑xjalxin te junx maj. ³ Bix tej tpon tumel, e tzaj tyeecˈanxin j‑e baj tnincˈuˈnxin tuj tneel. Bix cyxol ke tyolelxin nejl te ja tyolxin lu, ma takˈxin weya tuˈn t‑xiˈ npocbaˈna. Ja te Dios, Clol ke, ma tkba weya tuˈn t‑xiˈ nkˈumena.

⁴ Tey, Tito, tisen ncwaltey, bix jun ncwala jaxxix, cuma junx kocslabl bix baˈntzen txiˈ lpey tiˈj j‑e xiˈ nxnakˈtzaˈna tey. Tzajxit cyxtalbil Kman Dios tuyax Kaaw Jesucristo tibaja, bix tzajxit kˈaˈben cycˈuˈjxin tiˈja, bix tzajxit cykˈoˈnxin tuˈn ttena tuj ttz̈yal.

Jun taakˈen Tito tuj txˈotxˈ te Creta

⁵ E cyaj nkˈoˈna jay tuj txˈotxˈ te Creta, cuma e wajbeˈya tuˈn tonena cyiˈj ocslal tuˈn t‑xiˈ cyiiˈn cychunkˈlal tuj tumel, cuma at‑x chˈintl tuˈn tbint cyuˈna, bix tuˈn tetz tscyˈoˈna juun cawel tuj jaca juun tnom tuˈn tcyaj cynincˈuˈn cyxol ocslal, tisen e nkbaya tey nejl. ⁶ Alcyekej xjal ma tzˈetz tscyˈoˈna tuˈn cyoc te cawel cyuj tja Dios, il tiˈj tuˈn t‑xiˈ cyiiˈn cychunkˈlal tujxix tumel, tuˈntzen min‑al kaˈ tyol cyiˈjxin. Chi cwelxix tenxin tuj tbanel tuya cyxuˈlxin. Bix chi xeˈl lpe cycwalxin tiˈ Dios, yaaˈn tiˈj nuk tikˈch taj cyxumlalkˈa. Bix miˈn chi kˈojkˈa tiˈ cymankˈa, tuˈntzen miˈn yolj cyuˈn xjal cyiˈjkˈa. ⁷ Kej cawel cyxol ocslal, cuma chi oquelxin te t‑akˈanal Dios, juˈ tzunj il tiˈj cxeˈl cyiiˈnxin cychunkˈlalxin jiquenxix, tuˈntzen mintiiˈ kaˈ yol cyuˈn xjal cyiˈjxin. Yaaˈnt lo kej xin iyˈnen tibaj cynaabl. Miˈn jaw cykˈojxin tuj ajkelbil. Mitetpe tuˈn cyocxin bola. Miˈn tzˈoc cypjuˈnxin ke xjal. Yaaˈnt lo kej xin nuk cyaj tuˈn cycaman pwak. ⁸ Scyˈonwe kej ocslal nchi kˈon posada bix waabj oj cypon xjal cyja, bix tuya cykil cycˈuˈjxin cbinel jbaˈn cyuˈnxin. Cwelxix cytzyun cyiibxin twitzj kaˈ. Chi temelxin jiquenxix twitz Dios bix cywitz xjal. Cxeˈl cyiiˈnxin cynaablxin tisen taj Dios. Miˈn cyjoyxin tuˈn cybinchanxin tkaˈyel. ⁹ Il tiˈj tuˈn cytenxin cyiw tuj jjaxxix xnakˈtzbil e kˈoj cyexin, tuˈntzen t‑xiˈ cyxnakˈtzaˈnxin alcyej jaxxix cye niyˈtl ocslal, bix tuˈn tcub cyiˈj kej tzpetsal cyuˈnxin oj nchi kˈojl cyiˈjxin.

¹⁰ Hermano, ilxsen tiˈj tuˈn tcub tkˈoˈna cyxol ocslal ejeeˈj at cynaabl, cuma at nim xjal cyxola cycyˈi chi ocx tjakˈ cawbil cyuj tja Dios. At xjal mintiiˈ tajbel cyxnakˈtzbil bix sbul xjalke. Cyxol kej nchi sbun juˈwa, mas ncnet kej xjal judío cyxol. ¹¹ Il tiˈj tuˈn tmaket cytzi kej tzpetsal lu, cuma tuˈnj cyxnakˈtzbilxin yaaˈn tumel, nxiˈ cyocslabl xjal tuj il cyuˈnxin. At maj entera ocslal tuj jun jaaˈ nchi tzpet tuj cyocslabl cyuˈnxin. Bix nchi kˈonxin cyxnakˈtzbilxin takˈ nuk tuˈn cycamanxin pwak cyiˈj ocslal. Jun chˈixbajil jlu.

¹² Hermano, at nim il tiˈj tuˈn cycawen ke cawel cyiw tuj cyocslabl cyibaj ocslal tuj Creta. At jun maj e xiˈ tkbaˈn jun nintzaj aj Creta at tnaabl cyjulu: “Ejooˈ aj Creta jun wik xjal nuk nko ẍtakˈen. Tisen xoˈj koˈ. Cyˈaj xjal koˈ, bix nko kˈon kiib nuk tuˈn tnoj kcˈuˈj,” tz̈ixin, bix tex Cretaxin. ¹³ Jax tuˈnxin. Juˈ tzunj, cˈoquel ilen chˈina cyiˈ ocslal, tuˈntzen cytenxin cyiw tuj cyocslablxin tiˈj Cristo. ¹⁴ Xnakˈtzanxa baˈn, tuˈn miˈntl txiˈ cybiˈnxin cyxnakˈtzbil judío yaaˈn jaxxix, bix tuˈn miˈntl cynimanxin cyley kej xjal n‑el cypaˈn cyiib tiˈj jaxxix yol. ¹⁵ Cyxol xjal at jun yol tzin tkbaˈn cyjulu: “Kej xjal sakxix tuj cyanem, sak taˈ cykilca tuj cywitzxin,” tz̈i yol. Pero kej xjal yaaˈn sak tuj cyanem, ejeeˈj min chi ocslan tiˈ Cristo tuˈn cyclet, cykilca n‑oc cykˈoˈn te yaaˈn baˈnj tuˈn tbint bix tuˈn t‑xiˈ cywaaˈn. Mlay tzˈel cyniyˈ tiˈj alcyej baˈn, cuma tzˈilx cynaablxin bix cyanemxin. ¹⁶ Tzin cykbaˈnxin ka cytzkiˈnxin Dios, pero tuˈnj kaˈ nbint cyuˈnxin, tzinen taˈ nuk ten cyuˈnxin. Kaˈkexin twitz Dios. Min chi nimanxin Dios. Mlay chi ajbenxin te Dios tuˈn tbint jun akˈuntl baˈn cyuˈnxin.

Ko kˈol xnakˈtzbil tuj tumelxix

2  Pero tey, hermano, miˈn txiˈ t‑xnakˈtzaˈna tisen nbint cyuˈn kej lu, sino xnakˈtzanxa cye ocslal jaxxix tyol Dios. ² Kbanx cyej xinak tij tuˈn cyyolen chebe, bix tuˈn t‑xiˈ cyiiˈnxin jun cynaablxin jiquen, tuˈntzen cyniman xjal cyyolxin, bix tuˈn cytzyun cyiibxin twitz il, bix tuˈn cykˈonte cyiibxin nuk tej xnakˈtzbil jaxxix, bix tuˈn toc cyakˈ xjal cyexin, bix tuˈn tiyˈx cyuˈnxin oj n‑oc pena cyiˈjxin. ³ Jax cxeˈl cyiiˈn kej xuuj tijtl cychunkˈlal tuj tumel twitz Dios. Miˈn chi cub ten xtzˈiml yol cyiˈ xjal, bix miˈn chi oc te cˈal kˈeˈn. Cxeˈl cyyeecˈanxuj alcyej baˈn cyej xuuj cwalx. ⁴ Cxeˈl cyxnakˈtzaˈnxuj cyetxin tuˈn toc takˈ cychmiltxin cyuyax cyaltxin cyetxin, ⁵ bix tuˈn cytzyun cyiibtxin, bix tuˈn tten cyanemtxin sakxix, bix tuˈn cyakˈanantxin baˈn tuj cyjatxin, bix tuˈn t‑xiˈ cyyeecˈantxin cyanemtxin cye juntl, bix tuˈn cynimantxin tyol cychmiltxin. Ccybinchaˈ kej txin xuuj cykilcaj lu tuˈntzen miˈn cyyolen xjal kaˈ tiˈj tyol Dios.

⁶ Jax juˈx kej kˈa cwalx, kbanx cyekˈa tuˈn cytzyunte cyiibkˈa twitz cykilca kaˈ. ⁷ Tencˈaya te jun yecˈbil cywitzkˈa ti tten tuˈn tbint baˈn cyuˈnkˈa. Oj t‑xnakˈtzana cyekˈa, yeecˈanx tnimbila tiˈj tyol Dios, bix xnakˈtzanx tyol Dios cabalxix. ⁸ Cˈoquel tcˈuˈja tiˈj tuˈn miˈn tzpet jun yol yaaˈn tumel tuj t‑xnakˈtzbila, tuˈntzen miˈn cyyolen xjal kaˈ tiˈj. Ka ma xnakˈtzana tumel juˈwa, kej xjal cycyˈi jyol jaxxix, ctzaal cychˈixew oj cyyolen kaˈ cyiˈja ejeeˈy ocslal.

⁹ Yal tzunkej akˈanal tuj taakˈen cypatrón, kbanx cyexin tuˈn cynimanxin cyyol cypatrónxin tuj cykilca, bix tuˈn cyakˈananxin baˈn tuj cykilca akˈuntl, tuˈntzen cytzalaj cypatrónxin cyiˈjxin, bix tuˈn miˈn tzˈaj cytzakˈbeˈnxin tyol cypatrónxin. ¹⁰ Bix kbanx cyexin tuˈn miˈn chi alkˈanxin tiˈ cypatrónxin. Nuk oˈcx tuˈn t‑xiˈ cyiiˈnxin cynaablxin jiquenxix, tuˈntzen toc ke tcˈuˈj cypatrónxin cyiˈjxin. Ka ma bint cykilcaj lu cyuˈnxin, cchicˈajaxeltzen ka mejorxix jxnakˈtzbil tiˈ Dios, Clol ke.

¹¹ Hermano, il tiˈj tuˈn t‑xiˈ tkbaˈna cye ocslal tuˈn t‑xiˈ cyiiˈn cychunkˈlal tuj tumel, cuma ma tzaj tyeecˈan Dios t‑xtalbil cye cykil xjal. Tuˈnj t‑xtalbilxin ma tzaj tsmaˈnxin Cristo twitz txˈotxˈ, tuˈntzen kclet. ¹² Bix tuˈnj t‑xtalbilxin ma tzaj tkˈoˈnxin xnakˈtzbil ke ti tten tuˈn tcyaj kkˈoˈn jyaaˈn baˈn twitzxin bix tuˈn miˈntl tzˈoc tachen kcˈuˈj tiˈj nuk tikˈch at twitz txˈotxˈ. Nxnakˈtzanxin ke tuˈn ktzyunte kiib twitzj il, bix tuˈn t‑xiˈ kiiˈn knaabl jiquenxix, bix ti tten tuˈn kel baˈn twitzxin joocˈtzen etoˈx twitz txˈotxˈ. ¹³ Bix cxeˈl kiiˈn kchunkˈlal juˈwa, cuma nko ayon tiˈj jun kˈij te nimxsen tzalajebl, jkˈij oj tul meltzˈaj Jclol ke tuya nimxsen tipemal, jxin Jesucristo, jawnex Diosxin. ¹⁴ E xiˈ tkˈon tiibxin tuˈn tcyimxin te kxel, tuˈntzen kclet tuj tkˈab il bix tuˈn ttxjet kanem. E tbinchaxin jlu tuˈn koc te t‑xjalxin sakxix, jun ttanemxin cyaj tuya cykil cycˈuˈj tuˈn cybinchan jbaˈn.

¹⁵ Cykilcaj lu ma txiˈ nkbaˈna tey, xnakˈtzanx cye ocslal. Cyiwsanx cycˈuˈjxin. At tipemala tuˈn t‑xiˈ tkbaˈna at cyilxin, cuma t‑akˈanal Diostey. Miˈn tzˈel xeˈta oj cycyˈi xjal t‑xnakˈtzbila.

Nuk ocx tuˈn t‑xtalbil Dios jiquen koˈ twitzxin

3  Cxeˈltzen nkbaˈna tey ti tten tuˈn cyten ocslal cyxol kej xjal yaaˈn ocslal. Kbanx cyexin tuˈn toc cybiˈnxin tley gobierno bix tuˈn cynimanxin tyol cykil cawel ncawen cyibajxin tuj tnom. Xnakˈtzanx cyexin tuˈn tbint cyuˈnxin alcyej akˈuntl baˈn tuˈn tbint cyuˈnxin, bix tuya cykil cycˈuˈjxin. ² Bix xnakˈtzanx cyexin tuˈn miˈn chi xooˈnxin kaˈ yol tiˈ juntl, bix tuˈn miˈn chi kˈojxin cyuya xjal. Nuk oˈcx tuˈn cyyeecˈanxin cynaablxin baˈn cywitz xjal, bix tuˈn cyyolenxin maans cyuya xjal.

³ Tumelte tuˈn cyyeecˈanxin cynaablxin baˈn cywitz xjal yaaˈn ocslal, cuma nejl, jax juˈx ejooˈ min el kniyˈ tiˈj. Min oc kbiˈn Dios. Bix e xiˈ lpey koˈ nuk tiˈj ẍtakˈ xnakˈtzbil. E ten koˈ tjakˈ tcawbil kxumlal, bix nuk kaˈ e tajbe kxumlal. Ex kkˈij nuk nko binchan jyaaˈn baˈn, bix nuk e chiˈl kcˈuˈj. Oc ten koˈ cyakwusalte ke xjal, bix el kiiqˈuen kiib kxolx. ⁴ Pero amale nimet kaˈ e bint kuˈn, pero e tzaj tyeecˈan Dios, Clol ke, tkˈakˈbil tcˈuˈj kiˈj. Oc kakˈ texin, ⁵ bix e coˈpaxin ke tuj kil. Pero yaaˈn tuˈnj jun kchunkˈlal jiquen ma ko clet, sino nuk oˈcx cuma e tzaj kˈontexin lastim ke. Ma ko clet nuk tuˈnj ttxjontexin kanem, bix tej ttxjet nuk tuˈnj, e kiikˈ jun acˈaj kchunkˈlal bix jun acˈaj knaabl tuˈn Espíritu Santo. ⁶ Tuya cykil tcˈuˈjxin bix tuˈn Jesucristo, Clol ke, e cuˈtz tkˈoˈnxin Espíritu Santo ke. ⁷ Tuˈn tzunj t‑xtalbilxin, jiquen koˈ twitzxin, bix attzen koclen tuˈn kpon tuyaxin te junx maj. Tiˈj tzunj kkab nko ayon tiˈj.

⁸ Jaxxix taˈ jma txiˈ nkbaˈna, bix baˈn tuˈn toc ke kcˈuˈj tiˈj. Kˈumenx tuya tipemala, tuˈntzen t‑xiˈ cykˈon cyiibxin tiˈj tuˈn cybinchanxin baˈn te juntl.

Baˈnxsen kej xnakˈtzbil lu, bix at cˈajbela cye xjal. ⁹ Pero cawenx kej ocslal tuˈn miˈn chi kˈojl cyiˈj xnakˈtzbil min chi ajben. Miˈn chi kˈojlxin tiˈj alcyej cyxeˈchel judío mas jawnex, bix tiˈj alcyej tley Moisés tuˈn cynimantexin. Paˈmel tiiba cyiˈj xnakˈtzbil lu, cuma nuk kˈoj ntjyoˈn, bix mintiiˈ tajbel. ¹⁰ Ka at jun xjal ma takˈ jun xnakˈtzbil yaaˈn jaxxix, kbanx texin tuˈn miˈntl xnakˈtzanxin takˈ. Ka ma txiˈ tkbaˈna tcab maj tuˈn miˈntl cub tkˈoˈnxin kˈoj cyxol ocslal, bix tcyˈixin tuˈn t‑xiˈ tbiˈnxin tyola, ljomax cyxola. ¹¹ Il tiˈj tuˈn tel t‑xooˈna, cuma ttzkiˈna ma txiˈ tnaablxin tuj il. Binchal ilxin, bix jaxxin njyonxin tcastiwaxin.

Tej t‑xiˈ tkbaˈn Pablo te Timoteo alcye tuˈn tbint tuˈn

¹² Cxeˈl nsmaˈna jxin Artemas tuyey bix ka jaj xin Tíquico. Oj tpon jun cyxolxin tuyey, kˈoˈnc tipena tiˈj tuˈn tpon naja tuj tnom Nicópolis, cuma tuj tzunj tnom lu chin temela tuj tyem te cheˈw tzul.

¹³ Ja tzunj xin Zenas, jxin txˈolbal ley, tuyax jxin Apolos, oj cyetzxin tuj ttanema, kˈonx chˈin onbil cyexin, tuˈntzen mintiiˈ pena tuj cybexin. ¹⁴ Yeecˈanx cye ocslal ti tten tuˈn cyonen cyiˈj xjal at pena eteˈ, tuˈntzen cyajben ocslal tuj taakˈen Dios.

Mancˈbil yol cye ocslal

¹⁵ Cykilca kej ocslal at wuyena nxiˈ cykˈoˈn jun cykˈolbebl cyey. Kˈonxa kkˈolbebla cyej xjal n‑oc kakˈa cye bix junx cyocslabl kuyena.

Tzajxit t‑xtalbil Dios cyibaja. Oˈcx nyolja.