Chronological

Tneel uˈj e xiˈ ttzˈiˈben Pablo te Timoteo

Jun kˈolbebl tuˈn apóstol Pablo te Timoteo

1  Inayena, Pablo, ma cub ntzˈiˈbena ja uˈj lu te tey, Timoteo, cuma inayena smaˈn tuˈn Jesús te tyolel tuˈn tajwalel Dios, Coˈpl ke, bix tuˈn tajwalel Kaaw Jesús, Scyˈoˈn tuˈn Dios, jaj xin kˈuklec kcˈuˈj tiˈj. ² Timoteo, jay tisen jun ncwal, cuma kˈuklecxix tcˈuˈja tiˈ Jesús. Wajtzen tuˈn ttzaj t‑xtalbil Dios tibaja, bix nuket tzaj kˈaˈben tcˈuˈjxin tiˈja, bix tente tuj ttz̈yal tuˈn Kman Dios bix tuˈn Kaaw Jesús.

Tej tkbante Pablo tuˈn miˈn t‑xiˈ cybiˈn ocslal cyyol xnakˈtzal nicˈbil yol

³ At‑xe kˈij tej nxiˈya tuj txˈotxˈ te Macedonia. Tzulcˈatzen tuj tcˈuˈja oc ncubsaˈn nwitz tey tuˈn tcyaja tuj tnom te Efeso. Ncubtzen ntzˈiˈben ja uˈj lu tey tuˈn toc tilel tuˈna tuˈnx tcyaja te cawel cyibaj xjal tuj tja Dios tuj Efeso, cuma cyxol xjal tuj tja Dios at xjal nxnakˈtzan nicˈbil yol. Wajtzen jay cawen cyibaj xjal tuˈn tbaj twiˈ jnicˈbil yola. ⁴ Cawenxsen kej xjala tuˈn miˈn tzˈoc cyxnakˈtzaˈn cypocbal ootxa xjal o baj cyniqˈuen, cuma nuk nicˈbil yol, nuk kˈoj tzin tjyoˈn, bix min pon baj twiˈ, bix nuk amleˈn nxiˈ tiiˈn. Jaxitle at amleˈn cyiˈ xjal te tja Dios te xnakˈtzalec jaxxix tyol Dios, bix tuˈn toc ke cycˈuˈj xjal tiˈjxin. ⁵ Nxiˈtzen nkbaˈn tey juˈwa jaj tuˈn toc takˈ jun xjal cye ocslal tuˈn cykil cyanem, bix tuˈntzen toc takˈ cye, il tiˈj ctzaal tkbaˈn cyanem, il tiˈj ctzaal itzˈj tiˈ jun cynaabl baˈn, bix jaxxix cyuˈn ka kˈuklec cycˈuˈj tiˈ Dios. ⁶ Pero kej xjal nchi xnakˈtzan tiˈj jnicˈbil yola, lastimxse, cuma kej yol nbaj cyxnakˈtzaˈn cye xjal, yaaˈn juˈ n‑ocatle, sino nuk ncub meltzˈajtl cyyol te mintiiˈ baˈn tajbeˈna. ⁷ Nuk ja n‑oc takˈ cyej tuˈn cyoc te nmak xnakˈtzal tley Moisés, bix nke cycˈuˈj tuˈn cyyol, pero min tzˈel cyniyˈ tiˈj ti nxiˈ cyyolen. ⁸ Ktzkiˈnte ka baˈnte tley Moisés, pero ka ma tzˈajben tuj tajbel‑lel tisex o tzaj tkˈoˈn Dios. ⁹ Tcublen bintte tley Moisés yaaˈn te cye cyej xjal nuk jaj baˈn ncub cybinchen. E cub bintte ley te tzuybel cyej xjal aj il. Ejeeˈtzen aj ilj yuwin, bix xool cynaabl, te cyej sbuˈn, bix xsunkej xjal min cybi Dios bix min cybi ti jilel jxjan, cyej xjal ncub byonte cyman bix cytxu, cykilca kej byol, ¹⁰ te cyej xjal at cypaj, bix te cyej xinak nchi jaw meltzˈaj tuya juntl xinak bix te cyej xuuj nchi jaw meltzˈaj tuya juntl xuuj, te cyej tzyul xjal te qˈueybil te juntl wik, te cyej ẍtakˈ, bix xsunkej ẍtakˈ tstiwa n‑oc cyniqˈuen ka jax cyuˈn twitz Dios, bix xsunkej xjal ncub cybinchen tikˈchtl jilel tkaˈyel tuj tley Dios. ¹¹ Oj nxiˈ nkbaˈna jbaˈn tpocbal Jesús, jxin oc kˈonte wajwalela te kbalte cye xjal, bixse n‑el cyniyˈ xjal tiˈ cyil.

Tej t‑xiˈ tkˈoˈn Pablo chjonte te Kaaw Jesús

¹² Nxiˈ nkˈoˈna chjonte te Kaaw Jesús, cuma o tzaj tkˈoˈn wipemala tuˈn npanteya tuj waakˈena, bix cuma ma ke tcˈuˈjxin wiˈja, bix ma chin kˈoja te wajbelela. ¹³ Cykil ma bint tuˈnxin wiˈja, bix jaj o tzˈoc nkˈoˈna qˈuixcˈaj te Jesús tuya nyola, bix e njoy ke ocslal lepch tiˈ Jesús te biybil bix te pjetel. Pero te Kaaw Jesús e tenx texin tanem we wiˈj, cuma weya mintknaˈx woca te ocslal, bix min el nniˈya tiˈj ti jilel e cub nbinchena, cuma eˈla tuj nwitza baˈn ncub nbinchena twitz Dios, bix min el nniˈya tiˈj ka ja Jesús Dios. ¹⁴ Amale otket tzˈoc nbinchena tiˈjxin, pero nimx t‑xtalbilxin e tzaj wibaja. Juˈ tzunj n‑oca wocslaˈn Jesús, bix n‑ocx takˈxin we.

¹⁵ At jun tyol jilj cykil xjal baˈn toc ebinte. Nbyan cyjulu: “Ul Jesús twitz txˈotxˈ te coˈpl cyej aj il,” tz̈i tyol jilj. Cyxoltzen aj il, inayena mas aj il. ¹⁶ Bix amale inayentwe mas aj il cywitz aj il, pero te Jesús e tzaj tyeecˈa texin tanemxin wiˈj, tuˈn toc tyeecˈaxin ka min jaaˈ baˈn toca baj tcˈuˈjxin. Bix tuˈntzen nim tcˈuˈjxin wiˈja, matzen cub tkˈoˈnxin jun techlal cywitzj xjal at tuˈn cyocslan te Jesús alcye kˈij bix ccyiikˈeltzen cychunkˈlal te junx maj. ¹⁷ Juˈ tzunj knimacˈatzen Dios, cuma jaxin Cawel, mintiiˈ titzˈjlenxin bix miˈn cyimxin, bix mlay baj twiˈ tuˈnxin, bix mi nuketpe chicˈajax Dios, bix nuk jacˈaxin junx maj iyˈna tilbil tiˈj. Nukettzen jacˈaxin s̈‑ij bix naˈj te junx maj.

¹⁸ Jaˈlewe, Timoteo, wey ncwala, ja tzuna o tzˈoc kˈoˈn tiˈj te xnakˈtzal tyol Dios cyuˈn tij tajwilel tja Dios. Yaltzen jaˈlewe inayentzen chin oquel kˈonte taakˈena. Kˈimtzen tuya cykil tcˈuˈja. Kˈoˈnc nim tipena te bajsalcˈa twiˈj nicˈbil xnakˈtzaˈn. Kˈoˈnc tipena tiˈj taakˈena lu cyiw, tisen oj nkˈojl jun soldado tuj kˈoj. ¹⁹ Cˈojlam tiiba tiˈj tajbela, bix tiˈj ncub tbinchena. Baˈnx tcˈuˈja tiˈ Dios, bix tcˈojlaˈxa tnaabla. At cabtl xjal min txiˈ cycˈuˈj tiˈ cynaabl. Juˈ tzunj o txaˈ tzˈak cyanem tiˈ Dios. ²⁰ Juˈtzen e baj cye Himeneo bixse Alejandro. Ejeeˈ tzunja weya o chin naˈn Dios cyiˈj tuˈn tcuyante Dios tuˈn cyoc tuj cawbil tuˈn taaw il, Satanás, tuˈn tul tuj cycˈuˈj tuˈn miˈn baj cyyasen Kman Dios.

Jun xnakˈtzbil tiˈj ti tten tuˈn knaˈn Dios

2  Nkbaˈxsen tey ti ctemela tuj tja Dios. Tneelxixsen cxeˈl nkbaˈn tey tuˈn t‑xiˈ tkbaˈna cye xjal cxeˈlxix cycubsaˈn cywitz te Dios tiˈ cabtl xjal, yaaˈn nuk tiˈjcˈa cnaˈla Dios, bix cxeˈl cykˈoˈn chjonte te Dios tiˈj tikˈch tzin tkˈoˈn Dios te cykil xjal. ² Bix cxeˈl cykanen te Dios cyibaj xjal cawel bix cykilca kej tocsen cyajwalel, tuˈntzen tbint cycawen, tuˈntzen kten tuj ttz̈yal bix tuj txubtx, tuˈntzen kcub yutˈe twitz Dios. ³ Jatzente baˈnja, bix baˈntzen tuj twitz Dios, Clol ke. ⁴ Bix taj tzunxin tuˈn cykil xjal clet tuj tkˈab il, bix tuˈn tel cyniyˈ tiˈj alcyej jaxxix, yaaˈn nuk ejooˈcˈa. ⁵ Junxte Dios at, bix junxte xjal at te mojbalec cye xjal tuya Dios. Ja Jesús, Scyˈoˈn tuˈn Dios, ⁶ cuma tej tpon tumel jaxte Jesús e xiˈ kˈonte tiib tuj cyamecy tuˈn tclet cykil xjal tuj tkˈab il. Tej mintknaˈx tpon tumel tuˈn tcyim Jesús, min cytzkiˈn xjal ka taj Dios tuˈn cyclet cykil xjal tuj il. ⁷ Ejeeˈtzen cye yol jlu jaxxix, bix jawnex, bix ke cyej yol lu yaaˈn nuk te cye kej xjal judío, sino te cykil xjal twitz txˈotxˈ. Bix tuˈntzen tkbaj ja yola te cykil xjal, otzen chin oc tchˈiquen Dios te tsanjel bix te tyolel Jesús. Jwe nxiˈ nkbaˈna jaxte, yaaˈn ẍtakˈbilte.

⁸ Yaltzen jaˈlewe wajtzen nuket jakˈch chi cwaˈ ten xinak naˈl Dios. Pero wajwe chi naˈlxix xinak Dios tuya jun cyanem sakxix, yaaˈn nchi kˈojl. ⁹ Bix kej xuuj, tuˈn cybaj bint tuya cyxbalen, pero tujxix tumel, yaaˈn te cynimbil cyiib cywitz xjal. Bix miˈn txiˈ cyiiˈn nim amleˈn te tbinchaj cyiib, tuˈn tbaj xebat cywiˈ, tuˈn tocx tuj cyẍquin, ma cycwenchj te oro ma te perla, bix ma nintzaj cyxbalen. ¹⁰ Tetzen t‑xelj amleˈn cxeˈl tiiˈnj tbinchaj cyiib, ja tzunj tuˈn tbintl jtbanel cyuˈn. Bix jatzen te baˈnj te cyej xuuj cyaj chi nimante Dios. ¹¹ Kej xuuj, oj cyxiˈ tuj tja Dios, cˈoquelxix cybiˈn, bix nuk chi cwel yutˈe, yaaˈn cwel cyyeecˈan cyiib ka cutzen baˈn cyuˈn. ¹² Ncyˈiwa tuˈn tel tiiˈn xuuj tipemal xinak tuj xnakˈtzaˈn, bix ncyˈiwa tuˈn cycawen xuuj cyibaj xinak. Cuma caˈba tten. ¹³ Tneel, cuma ja te Adán, xinak, e cub tbinchen Dios nejl. Tcabxitltzen tcub bintte Eva, xuuj. ¹⁴ Tcabtzen, jatzen xuuj e jkonte tbe il, cuma ja te xuuj e cub yajlet tuˈn Satanás, yaaˈnte Adán. ¹⁵ Juˈ tzunj, e xaˈ kˈoˈn cye xuuj cycastiwa tuˈn toc cytz̈ˈis̈ente cye cyal. Pero amale e kˈojet cycastiwa, chi cletel, ka juchxix cycˈuˈj tiˈ Dios, ka tuˈn cykil cyanem, bix ka sakxix cyanem.

Ti ctemel tchunkˈlal jun taj tzˈoc te nincˈul tiˈj tuj tja Dios

3  O kbaj al jun taj tzˈoc tkˈaˈben te nincˈul tiˈj ma te cawel cyibaj xjal tuj tja Dios, baˈnte. Baˈn tocxte, ² pero al ma tzˈoc te nincˈul tiˈj tuj tja Dios, tuˈn miˈn yolj cyuˈn xjal. Cwelxix ten tuj tbanel tuya junx t‑xuˈl, bix cxeˈl tiiˈn jun tchunkˈlal nuk yalnix, bix cxeˈlxix tbisen tiˈj, baˈntzen tbiˈnc cyuˈn xjal bix tcuyan tuˈn twutan jun xjal tja, bix baˈnxix te xnakˈtzal cyxol xjal. ³ Jun cawel tuj tja Dios mintiiˈ tuˈn toc te bola, mitetpe jyol kˈoj, bix mitetpe lmolec xjal tiˈj te taj. Yaaˈntzen juˈ ctemela, sino jun xinak mixbenxix kˈojl, jun xinak baˈn chewsan kˈoj cyxol xjal, bix mitetpe tziyˈ tuj tcˈuˈj nuk te cambl pwak. ⁴ Cbinelxix tnincˈun tuj tja, bix ebil ke tcwal. ⁵ Cuma ka jun xjal mixben nincˈun tex tja, jeyˈ, ¿titzen tseˈ tuˈn tbint tnincˈun tuj tja Dios? ⁶ Jxjal ma tzˈoc te tajwilel tja Dios, yaaˈnt loj jun maantk tzke toclen te ocslal, cuma chˈinnchˈe axse qˈuelela tuj twitz ma taj tuya cubsaj witzbaj, bix cwelx tzˈak, tisex tcublen tzˈak Satanás tuj cyaˈj bix ocxin te taaw il. ⁷ Bix jax il tiˈj cwel ten tuya jun tnaabl baˈn cyuyaj xjal yaaˈn ocslal, tuˈn miˈn jaw ikj yol tiˈ tja Dios cyuˈn xjal. Jatzen tcˈoˈbel bimanj, tuˈn tel iiqˈuet tyol tajwilel tja Dios.

Ti ctemel tchunkˈlal jun diácono

⁸ Jaxse juˈx kej onlte tajwilel tja Dios, cybiˈxix chˈin. Miˈn chi cub tzˈak tuj cyyol cywitz xjal, bix mitetpe tuˈn cyoc bola, bix jax mitetpe tuˈn cycaman pwak tuj tkaˈyel. ⁹ Bix cwelxix cycˈuˈn tyol Dios tisecˈax tten ttzajlen tkˈoˈn Dios, cuma cytzkiˈnxixa ka jax tyol Dios. ¹⁰ Baˈn cyniyˈbet jxjala nejl ka baˈnke te onel. Katzen mintiiˈ jun cykaˈyel, baˈntzen cyajben te onl tajwiyel. ¹¹ Jaxse juˈx kej xuuj onl tajwilel, baˈnx chi cwel ten, yaaˈn tuˈn cycub ten xtzˈiml yol, mitetpe tuˈn cycub ten balkˈajel ma iken yol, sino nukxix yalnix tiˈ cynaabl, bix baˈnxix toc ke cycˈuˈj xjal cyiˈj. ¹² Jun onl tajwilel tja Dios cˈoquelxix nuk te tchmil junx xuuj, bix cbinelxix tnincˈun ke tcwal bix tikˈch te tuj tja. ¹³ Kej onel nbint‑xix cyaakˈen cyuˈn tuj tja Dios, ejeeˈ tzunj a cyanem xjal cyiˈj, bix kˈuklxix cycˈuˈj oj nchi akˈ yolel tiˈ cyocslabl tiˈ Jesús cyuya xjal.

Jun kocslabl o tzaj tkˈoˈn Dios nimxse t‑xiˈlen

¹⁴ Xiˈman wuˈna tuˈn nxiˈ naja cyeyˈl tey, pero ncubtzen ntzˈiˈbena ja uˈj lu tey ¹⁵ yaaˈn ka nchin tzyetcˈa, cuma wajtzen ttzkiˈntla ti ctemela cynaabl jxjal te tja Dios, cuma te tja Dios te te Dios iˈtz, bix cuma ejeeˈcye xjal te tja Dios iklte bix cˈojlal tej jax tyol Dios. ¹⁶ Jatzen jax tyol Dios, jkocslabl, o tzaj tkˈoˈn Dios, maˈxse t‑xiˈlen, tisen toc tuˈnj bitz: “Oc Dios te xjal, Jesús. E cub tyeecˈan Espíritu Santo ka ja Jesús Scyˈoˈn tuˈn Dios, bix cykilj e bint tuˈn Jesús baˈnxse eˈla. Axse eˈlaxin tuj cywitz tsanjel Dios. Bix ex tpocbalxin tuj cykil yol twitz txˈotxˈ. Bix oc cyocslaˈn nim xjal jaxin. Bix e kˈiijxin tuj cyaˈj juntl maj,” tz̈i bitz.

Nim xjal qˈuelel tpaˈn tiib tanem tiˈ tyol Dios

4  Pero tzinenxix tcyaj tuj chicˈaj tuˈn Espíritu Santo ka cyuj kˈij chi ul nim xjal qˈuelel tpaˈn tiib tanem tiˈ tyol Dios. Juˈ chi xeˈl lpetl tiˈ cyxnakˈatz jxjal lepch cyxnakˈatz cyiˈj xewbaj yajlal bix ma bimanj. ² Kej xjal chi cwel ten xnakˈtzal cyej cynicˈbil biman, ejeeˈtzen xjalj junx maj ẍtakˈ. Nimxse cyẍtakˈbil ya tzpetpajninxtltzen cynaabl. ³ Ja tzunkej xjal juˈ baˈn cyuˈna cycyˈitltzen chi oc maje xinak tuya cyxuˈl, bix n‑octzen cyxnakˈtzaˈn cye xjal ka at juun wik waabj mixben tniyˈbej. Pero o cub tbinchaˈnte Dios cykil wik waabj cye tcwalxin tuˈn t‑xiˈ cywaaˈn, bix tuˈn toc chjonte te Dios tiˈj. ⁴ Cykil tej e cub tbinchen Dios, baˈnte. Juˈ tzunj mintiiˈ chˈin baˈn tel cyxooˈn xjal, sino ccyiikˈelxix tuˈn t‑xtalbil Dios. ⁵ Tuˈn tnaˈj Dios tiˈ waabj, n‑eltzen cyniyˈ xjal tiˈj ka ja Dios kˈoltzte, bix cuma juˈ toc tuˈn Dios. Bix ka o tzaj tkˈoˈn Dios, cykiltzen baˈn, yaaˈn nuk alcyexte baˈn.

Jun tbanel xnakˈtzal tuˈn tajben te Jesús

⁶ Xnakˈtzaˈnc tzunja lu cye ocslal tuˈntzen jay baˈn tajben te Jesús. Tisenj waabj tzin tkˈoˈn tipen kchuˈl, juˈxse tzin tkˈoˈn tyol Dios tipemal kanem. Kˈoˈncxixsen tcˈuˈja tiˈj. ⁷ Pero miˈn txiˈ tcˈuˈja tiˈj tpocbal cyuˈnj ẍtakˈ xjala, a te tbiˈnc pero naˈc yol. Yaaˈntzen juˈwa, sino xnakˈtzam tiiba tuˈntzen tnimena Dios. ⁸ Alj ma baj t‑xnakˈtzaˈn tuˈn tkinpaj tchuˈl, baˈnte, pero nuk te twitz txˈotxˈ teja. Pero tej tuˈn tbaj t‑xnakˈtzan tiiba tiˈ tyol Dios, yaaˈn nuk te twitz txˈotxˈ teja, sino te junx maj. ⁹ Jaxxix tej we ma txiˈ nkbaˈna, bix cykilcakey baˈn toc ebinte. ¹⁰ N‑oc kipen tuya kyol tuˈn cycoˈpj xjal tuj cyil. Nko akˈanantzen bix niyˈx kuˈn cuma ktzkiˈn iˈtzte Dios jaaˈ ma tzˈoca ke kcˈuˈj. Ja tzunxin Cˈojlal cykil xjal, bix tzin tcoˈpaxin kej xjal ocslal te tyolxin. ¹¹ Jayle tzunj yol lu ccawel bix cxnakˈtzal tuˈna.

¹² Amale cwalxita, pero tcˈojlaˈ tiiba tuˈn miˈn tzˈel xeˈta, sino cwelxix tkˈoˈna jun techlal baˈnxix cywitz ocslal tuya tnaabla te yolel, tuyaxix jun tbey jiquen, bix tuya baˈn tanema cyiˈ xjal, bix juch tcˈuˈja tiˈ Dios, bix sakxix jun tnaabla. ¹³ Joocˈtzen nchin ponwe, tenctzen te s̈‑ilwe tyol Dios tuj uˈj tuj tja Dios, bix te nimsalec cycˈuˈj ocslal, bix te xnakˈtzaleccye. ¹⁴ Timoteo, miˈn tzˈel tuj tcˈuˈja ka tuˈn t‑xjikˈben Dios e yolenke tyolel Dios tibaja bix e cub cykˈoˈn tij xjal cawel tuj tja Dios cykˈab tibaja tuˈn toc tajwalela te xnakˈtzal tyol Dios cye xjal. ¹⁵ Junx maj kˈoˈnc tcˈuˈja tiˈj, tuˈntzen toc cycyeˈyen xjal jay ka xiˈnen t‑xiˈy tuya Dios. ¹⁶ Cˈojlam tiiba, bix cˈojlam ti nbaj t‑xnakˈtzaˈna, bix cwelxix weˈy twitz tixja jilel. Katzen ma bint juˈwa, bix ka cuyan tey tuˈn tuˈn t‑xiˈ tkbaˈna jyol te coˈpbil, bix cmeltzˈajel te coˈpbil cyej xjal ma tzˈoc ebinte tey. Juˈtzen ctemela tey, yaaˈntzen tuˈntl tey ka min ẍi coˈpj xjal tuj tkˈab il.

Jbaˈn tuˈn kbinchante cyiˈj mastl ocslal

5  Cwalxa. Juˈ tzunj oj tcub tilen jun tij til, miˈn tzˈoc tilena. Chebe cxeˈl tkbaˈna te tisen tmana. Bix kej xjal cwalx, juˈ chi tseˈy tisen jun te tjay. ² Cˈoquel tcˈojlaˈna kej xuj tij tisex ttxuy. Bix kej txin cwalx, tisen jun taneba. Miˈn tzˈoc tena chilsalec cyetxin.

³ Yal tzunkej xuuj viuda, ka jaxxix ka viudakexuj, bix min‑al baˈn toc cˈojlancye, ke xjaltzen te tja Dios baˈn toc cˈojlancye. ⁴ Pero ka at viuda at tal bix ma at ke tchman, entonces cynaˈxixse cwal bix cbineltzen cyuˈn tuˈn toc cycˈojlaˈn cytxu ma cyyaaˈ, tuˈntzen tchjet tz̈ˈis̈bencye tuˈn cytxu. Ja tzunja baˈn tuj twitz Dios. ⁵ Ka jun xuuj viuda jaxxix ka viuda, min‑alx jun iˈtztlte, bix nuk Dios tzin tyoˈnxuj tuˈn tcyajlal, bix min cyaj tnaˈnxuj Dios te kˈijl bix te koniyan tuˈn tcyajlal, baˈntzen toc cycˈojlaˈn xjal te tja Dios jaxuj. ⁶ Pero jun viuda nuk n‑extl tkˈij te jyoj titlte taj ma nuk tikˈchtl tzin tlokˈoˈn tiˈ pwak, jatzen viudaj mixben tcˈojlaj tuˈn tja Dios. ⁷ Kbanxse cykil ja lu cye xjal tuˈntzen tbint cyuˈn, tuˈntzen min‑al yolen cyiˈ xjal. ⁸ Cuma alj ocslal min tzˈoc tcˈojlaˈn ke te tja, mix nbina tuˈn tisej te Dios taj, bix masxse iyˈnan twitz jun xjal yaaˈn ocslal, cuma n‑ocxtlpe cycˈojlaˈncye ke te cyja.

⁹ T‑xoltzen tajlal cybi jxuj viuda nchi onj tuˈn tja Dios, nuk oˈcxcˈa kej xuj te oxcˈal jnabkˈi ma masj, bix baˈnx otk chi cub tenxuj tuya junx cychmilxuj. ¹⁰ Ja tloj jun viuda itzkiˈn twitz tuˈnj baˈn o cub tbinche, tisen tzunj: ka baˈnxix o tzˈoc ttz̈ˈis̈en ke tal, ka baˈn tnaabl cyuyaj xjal e pon tja, ka o tzˈoc tcˈojlaˈn tuya cykil tcˈuˈj kej xjal ocslal, ka o tzˈoc tcˈojlaˈn kej xjal tuj tcyajlal e tema, bix ma ti jileltl tbanel o bint cyuˈn.

¹¹ Pero yaltzen cyej xuj viuda cwalx, miˈn tzˈoc tkˈoˈn ke xuja te tajlal, cuma laˈ ti taj cycˈuˈjxuj, cwel cybinchexuj. Chebetzen ccyajbeˈxuj cychmilxuj juntl maj. Cwatzen oj tel cypaˈn cyiibxuj tuj cyaakˈenxuj tuj tja Dios, ¹² ya otktzen chi cub tzˈakxuj tuj cyyolxuj twitz Dios. ¹³ Bix juntl, nuk nchi iyˈ ttziiˈ jaaˈ, bix tzin cyiikˈen cyˈajel, bix yaaˈntzen nuk nchi oc te cyˈaj, sino tuyaxe xtzˈiml yolke, bix n‑ocx cykˈon cyiib te cawel cyxol xjal, te kbalecx tej yol yaaˈn tumel tuˈn tocx cykbaˈn. ¹⁴ Juˈ tzunj we tuj nwitz tuˈn cymaje kej xuuj viuda cwalx juntl maj, e tten cyal, bix e toc cycˈojlaˈn cyja. Katzen ma bint cyuˈnj xuuj viuda juˈwa, mintzentiiˈ baˈn t‑xiˈ cyyolen xjal tiˈ tja Dios. ¹⁵ Nxiˈ nkbaˈna ja lu cuma at xuuj viuda o cub binchen tej tkaˈyel, o tzˈoc cybiˈn tyol taaw il, Satanás.

¹⁶ Naˈmcˈatzen ka at jun najaj xjal ocslal, bix at jun viuda tuj tja, il tiˈj cˈoquel tonen, tuˈntzen miˈn tzˈoc tiken tja Dios, sictzen baˈn toc tonen tja Dios kej viuda jaxxix min jaaˈ baˈn cyoca itzˈj.

¹⁷ Kej xjal tij tajwilel nbinxix tnincˈun tja Dios, baˈnxixsen cyoc ocslet bix cyoc cˈojlet, bix ejeeˈxixj xin tocsen cyaakˈen te kbal tyol Dios bix te xnakˈtzal, cuma ncyaj cykˈoˈnxin cyaakˈenxin tuˈn tyol Dios. ¹⁸ Juˈtzen toc tuˈn tyol Dios tuj kˈanak stament cyjulu: “Miˈn tzˈoc tkˈoˈna tzuybil ttzi junjil boys ka npjunjil triwa, tuˈn baˈn twaaˈnjil, tuˈn at tipenjil te akˈanal.” Bix juntl: “Tej xjal akˈanal atte tumel tuˈn tchjet,” tz̈i tyol Dios.

¹⁹ Miˈn tzˈoc tbiˈna til jun xjal tij tajwilel tja Dios ka min‑al caˈba ma oxe te tstiwa tiˈj. ²⁰ Pero cyej xjal tajwilel tja Dios otk chicˈajax otk chi cub tzˈak tuj cyil, il tiˈj cxeˈl tkbaˈna te cywitz cykil xjal tuˈn toc ttz̈i cyiˈj. ²¹ Twitz Dios, twitz Kaaw Jesús, bix cywitz tsanjel Dios tuj cyaˈj, cxeˈlxix nkbaˈn tey tuˈn tbint jma txiˈ nkbaˈn tey, bix miˈn tzˈoc tcyeˈyena ka mas nintzaj jun twitz juntl.

²² Tuˈn toc jun xjal te tajwilel tja Dios, chebe cxeˈl tjyoˈna. Miˈn tzˈoc tkˈoˈn naja. Ka ma tzˈoc tkˈoˈna jun xjal te tajwilel tja Dios, bix cchicˈajaxel jxjala ka at nim til, tisecˈatzen baˈn tilj xjala tuj twitza. Miˈn tzˈocx tkˈon tiiba tjakˈj luwe.

²³ Timoteo, nukx yaaba. Juˈ tzunj yaaˈn nuk aˈ cxeˈl tcˈaˈna, sino tuyax chˈin vino tuˈn tiyˈ tchyonel tcˈuˈja.

²⁴ At xjal ncub bint til tuj chicˈaj, bix cykil xjal itzkilte ka maxe cwel baj twiˈ stis twitz Dios. Bix at xjal ncub bint til tuj ewjel. Pero tixja tten tiˈj, cjawel chicˈajax oj tcub bajset twiˈ stis twitz Dios. ²⁵ Jaxse juˈx ttena, jbaˈn ncub cybinchen xjal, chicˈajte. Bix amale atet tbanel taakˈen ncub tbinchen jun xjal tuj ewjel, mlayx bint tewj te junx maj. Juˈ tzunj miˈn baj bint naj tuˈna tiˈ tnaabl jun xjal.

6  Kej ocslal nchi akˈanancx tjakˈ tcawbil cypatrón, baˈnxix toc cybiˈn tyol tpatrón. Miˈn chi oc te cyˈaj. Cycuyaxix cyaakˈen, tuˈntzen miˈn txiˈ naˈn tbi Dios bix tuˈntzen miˈn txiˈ naˈn kxnakˈatz cyuˈn xjal. ² Bix ka at jun ocslal nakˈanaˈncx tuya jun tpatrón ocslal, cˈoquelx tbiˈn xina tisen jun cawel. Masx cˈoquel tilel tuˈna tuyaxin twitz tuya junxin yaaˈn ocslal, cuma alj nkˈinte tkbel jtaakˈena jax ocslal, bix n‑oc takˈ te Dios. Bix xnakˈtzanx bix kbanx xsunja lu cye xjal.

Baˈn tuˈn t‑xiˈ kniman Dios bix tuˈn ktzalaj tiˈj ntzaj tkˈoˈn ke

³ Attzen xjal nyeecˈan juntl wik xnakˈatz. Axse tbiˈnc cyxnakˈatz, pero yaaˈn junx tten cyyol tuyaj xnakˈatz nxiˈ kˈinte ke te niml Dios, bix yaaˈn baˈn tten cyyol tuya tyol Kaaw Jesús. ⁴ Nuk n‑oc cykˈon cyiib jxjala te nintzaj, bix min tzˈel cyniyˈ tiˈj tixix ttenj jax yol. Nuk nchi jyon jaaˈ qˈueletza jun kˈoj. Tiˈj tzunja n‑etza itzˈj xchiˈlen cˈuˈj, kˈoj, cyakwusaj xjal, icˈbil twitz xjal, ⁵ bix kˈoj min pon baj twiˈ. Alj ma cub xnakˈtzante cyej nicˈbil xnakˈatz, junxse maj otk tzpet ya min tzˈeltl cyniyˈ tiˈj alcyej jax, bix n‑eˈlatzen tuj cywitz nuk te cambl pwak ocslabl tiˈ Dios. Cyimeltzen cyiiba cyiˈj xjala.

⁶ Jaxte juˈ tewa. Te kocslabl tiˈ Dios tbeyel xtalbilte, pero laˈ alj ntzalaj tuyaj chˈin ncnet tuˈn, ⁷ cuma mintiiˈte kˈiˈn kuˈn ktzaj twitz ja txˈotxˈa, bix mintiiˈte baˈn taj kiiˈn. ⁸ Nuk ka at chˈin baˈn t‑xiˈ kwaaˈn bix tuˈn toc chˈin kiˈj, ya baˈntze tkete kcˈuˈj. ⁹ Yal tzunkej cyaj chi oc kˈinan, mintzen cycol cyiib twitzj tkaˈyel ncub jlet cywitz. Tuˈntzen nuk tikˈch cyaj nchi cwaˈ tzˈak tuj cˈoˈbil, ja cˈoˈbilj tbanel n‑el tuj cycˈuˈj, bix ncheˈx tuj il. ¹⁰ Tej nuk pwak n‑oc takˈ, jatzen tloqˈuel nim wik tkaˈyel. At juun xjal nuk tuˈn cykˈaˈbentz tiˈ pwak o tzpet cyanem tiˈ Dios, bix tzin cynojsaˈn cychunkˈlal tuya nim bisbajil.

Ti tten tuˈn t‑xiˈ kiiˈn kchunkˈlal jiquen bix tuˈn toc ke kcˈuˈj tiˈ Dios

¹¹ Perotzen tey, Timoteo, najben te Dios, cteltzen ok tiˈj kˈaˈbj pwak. Tetzen t‑xel ja lu, jyonxsen te ja baˈn, bix kˈinx tchunkˈlala tujxix jiquen, bix keˈc tcˈuˈja tiˈ Dios, bix cˈoquel takˈ cykil xjal tey, bix nimxsen tcˈuˈja, bix maansx tzˈoquey. ¹² Tzˈocxix tilel tuˈna tiˈ tyol Dios bix kˈojl tiˈj tkaˈyel. Oj tbint tuˈna juˈwa, juˈtzen cpomela caney tiˈj tchunkˈlala te junx maj. Tiˈj tzunj tchunkˈlala te junx maj o tzaaˈ ttxcoˈn Dios jay, bix cywitz nim tstiwa o tzaaˈ tkbaˈna ka o tzˈocslaˈna tiˈ Jesús.

¹³ Twitz Dios, nkˈonte tchunkˈlal tikˈch jilel at twitz txˈotxˈ, bix twitz Jesús, Scyˈoˈn tuˈn Dios, jxin mintiiˈ ttz̈i tiˈj tej ttzakˈbeˈn te cawel Poncio Pilato alcyexin bix ti taakˈenxin, cxeˈltzen nkbaˈn tey ¹⁴ ctbiˈcˈa tzuna cykilj nxiˈ nkbaˈn tey. Miˈn cub tzpeta, bix cbinelxix tuˈna tuˈn miˈn chi el t‑xooˈna xjal tiˈja, ojxe tul jlet Kaaw Jesús juntl maj. ¹⁵ Tzultzen jlet Jesús juntl maj, pero ojxe tpon tumel tuj twitz Dios. Nuk jacˈate Kman Dios jawnex twitz tikˈch jilel, bix cyˈiwlaˈn. Jaxin Cawel cyibaj cawel, bix Taaw cykil twitz txˈotxˈ. ¹⁶ Nuk jacˈaxin mlay cyim. Najlxin tuj tken luz tzinxse ntxaken mas twitz tken kˈij. Min‑alxse juntl baˈn tocpan canan tiˈjxin. Min‑al jun xjal o tzˈoc cyeˈyente texin, bix min‑alx baˈn toc cyeˈyente texin. Jawnexxit tzunxin, bix nimxit tipemalxin te junx maj. Juˈxit tzuna.

¹⁷ Kej ocslal nim cykˈinemal twitz ja txˈotxˈa, kbanx cye tuˈn miˈn tzˈoc cykˈon cyiib te nintzaj, bix tuˈn miˈn tzˈoc ke cycˈuˈj tiˈ cykˈinemal, cuma tej kˈinemal mintiiˈxix baˈn toc ke cˈuˈjbaj tiˈj. Nuk jacˈate Dios baˈn toc ke kcˈuˈj tiˈj. Jaxin ntzaj kˈonte tikˈch ke te kniyˈbebl. ¹⁸ Kbanxse cye xjal kˈinan tuˈn yaaˈn jkˈinemal cˈoquel takˈ cye, sino tuˈn toc takˈ cye tuˈn tbint tikˈch tbanel cyuˈn, bix tuˈn tcub cypaˈn cykˈinemal cyuya mebe. ¹⁹ Ojtzen tbint juˈwa cyuˈn, nbajtzen cynincˈun cyiib tuj chunkˈlal tzul, cuma tej chunkˈlal tzul, jatzente chunkˈlalj jaxxix, bix te junx maj.

Tej t‑xiˈ tcyiwsaˈn Pablo tnaabl Timoteo tiˈj alcye tuˈn tbinchante

²⁰ Oˈcx xsunj, Timoteo. Cˈojlam tzunj jax yol ma tzˈoc kˈoˈn tuj tkˈaba. Cˈojlam tiiba tuj cyyol jxjal n‑oc cyniqˈuen tise ka cytzkiˈn tiiˈn Dios, pero mintiiˈ ttxolan cyyol, bix mintiiˈ toclen tuyaj jax yol. ²¹ Miˈn chi oc tbiˈna, cuma at xjal o tzˈoc lpe tiˈj tise ka jax, biˈx o chi cub tzpet, bix o cub tzpet cycˈuˈj tiˈ Dios.

Tzajxit t‑xtalbil Dios cyibaja. Oˈcxsen nyolja.