Chronological

Uˈj e xiˈ ttzˈiˈben Pablo cye ocslal tuj tnom Filipos

Jun kˈolbebl tuˈn apóstol Pablo

1  Key hermano tuj tnom te Filipos,

Inayena Pablo. Cxeˈl nsmaˈna jun uˈj cyey te kˈolbebl cyey. At Timoteo wuyena, bix juˈx te nxiˈ tsmaˈnxin jun kˈolbebl cyey. Keya, t‑akˈanal Cristo Jesús koˈya, bix waja tuˈn tpon ja uˈj lu cyxola, te cyeke akˈanal cyxol ocslal tuj tnom te Filipos, tuyax te cykilca ocslal, ejeeˈj kˈuklec cycˈuˈj tiˈ Cristo Jesús. ² Tuˈnxit Kman Dios tuya Kaaw Jesucristo tzaj kˈonte nim cyxtalbil cyey, bix cyuˈnxit‑xin chi cub tena tuj ttz̈yal.

Tej tnaˈn Pablo Dios cyiˈj ocslal

³ Jaca maj oj nchi ula tuj ncˈuˈja, nxiˈ nkˈoˈna chjonte te Dios cyiˈja. ⁴ Min chin weˈya naˈna Dios cyiˈja, bix oj nbint wuˈna juˈwa, ntzalaj wanema, ⁵ cuma jatxe tuj tneel tej cyocslana bix jaˈlewe nchi oney wiˈja tuj waakˈena tiˈ tpocbaj jbaˈn tpocbal coˈpbil ke tiˈ kil. ⁶ Tej cyocslana jcoˈpbil ke, akˈ Dios akˈanal tuj cyanema tuˈntzen tcyaj cynaabla baˈn. Bix ntzkiˈna ctzketel cynaabla tuˈn Dios oj tul meltzˈaj Cristo Jesús. ⁷ Tumel taˈ lu kenwe lu nchin kˈon chjonte te Dios cyiˈja, cuma nim n‑oc cyakˈa we. Ka ntiina tuj tzeeˈ nuk tuˈn tyol Dios bix ka tzakpiˈn kena tuˈn t‑xiˈ nyeecˈana cye cawel jtyol Dios tiˈj coˈpbil ke jmero jaxxix, pero tzinx nchi oney wiˈja. ⁸ Bix ttzkiˈn Dios n‑oc cyakˈa weya, bix ja tzunj tkˈakˈbil ncˈuˈja cyiˈja ma takˈ Cristo Jesús weya.

⁹ Key hermano, oj nchin naˈna Dios cyiˈja, nxiˈ nkanena te Dios tuˈn ttz̈ˈiy tkˈakˈbil cycˈuˈja cyiˈ cabtl cyermaney ocslal, bix tuˈn ttz̈ˈiy cynaabla, bix tuˈn tel cyniˈya tiˈj alcye jaxxix, ¹⁰ tuˈntzen cyscyˈontey alcye baˈn bix tuˈn tcyaj cycyeˈyena jyaaˈn baˈn, bix tuˈn t‑xiˈ cyiiˈna jun cychunkˈlala baˈn, tuˈn min‑al baˈn toc te yolel jun kaˈ yol tiˈj, tuˈntzen cyela baˈn tuj cywitz xjal hasta ojxe tul meltzˈaj Cristo. ¹¹ Tuˈn tipemalj o kiikˈ te Jesucristo baˈn t‑xiˈ kiiˈn jun kchunkˈlal jiquenxix, bix oj tbint kuˈn juˈwa, njaw knimsaˈn tbi Dios.

Tuˈnj qˈuixcˈaj o tziyˈx tuˈn Pablo ajben cuma tuˈn o kˈumj mas tpocbal jcoˈpbil ke tuˈn Jesús

¹² Key hermano, lu ken ntiincˈtz tuj tzeeˈ tzalu. Pero waja tuˈn cybintey tuj nwitza jqˈuixcˈaj niyˈx wuˈna tzalu tuj tzeeˈ o tzˈajben te jun baˈn, cuma o kˈumj mas tpocbalj coˈpbil ke tuˈn Jesús. ¹³ Cykilca ke cysoldado cawel bix juˈx niyˈtl kej xjal nchi akˈanan ttxlaj cawel cytzkiˈn ntiincˈtza tuj tzeeˈ nuk tiˈj waakˈena tuj taakˈen Cristo. ¹⁴ Bix juˈx, chˈixcˈa yaaˈn cykilca ocslal tuj ja tnom lu, oj n‑oc cycyeˈyen inayena tuj tzeeˈ tzalu, mas n‑oc ke cycˈuˈj tiˈ Kaaw bix at mas cyanem tuˈn t‑xiˈ cykˈumen tyol Dios mintiiˈ ttz̈i cyiˈj. ¹⁵ Nchi kˈumen tpocbal Cristo, amale atet juntl wik nchi pocban nuk tuˈn cyxqˈueybil tiˈj weya nyol tuˈn tel cyyol mas baˈn twitzj weya, cuma at niyˈ tuj cycˈuˈj wiˈja. Pero at nim ocslal nkˈumen tyol Dios tujxix tumel. ¹⁶ Ejeeˈtzen ocslalj nchi akˈanan tujxix tumel cuma n‑oc wakˈa cye, bix cytzkiˈn o tzaj tkˈoˈn Dios waakˈena te tyolel tiˈj coˈpbil ke. ¹⁷ Pero jatzen cabtl yaaˈn tujxix tumel nchi kˈumen tpocbal Cristo yaaˈn tuˈn n‑oc takˈxin cye, sino tuˈn cyxqˈueybil tuˈn tiyˈ nejl cyyol nwitza bix tuˈn toc cykˈoˈn tchyonel tiˈ wanema. Nchi binchan jlu nuk tuˈnj lu kena ntiincˈtz tuj tzeeˈwe. ¹⁸ Pero mintiiˈwe waj te. Ka tuj tumel bix ka nuk tuˈn cyxqˈueybil, pero tkˈumj tyol Cristo, bix nchin tzalaja tiˈj.

Bix juˈx nchin tzalaja ¹⁹ cuma ntzkiˈna tuˈn cynabla Dios wiˈja Espíritu Santo onen tiˈ Jesucristo jax juˈx cˈonel wiˈja tuˈntzen cykilca qˈuelel baˈn wiˈja. ²⁰ Oj tpon kˈij chin pomela cywitz cawel te txˈolbal wiiba, ka tuˈn wex tzakpeta bix ka tuˈn ncub byeta, nuket miˈn tzˈel nxooˈna Cristo tuˈn witzˈja. Tuya cykil ncˈuˈja waja tuˈn tjaw nnimsaˈna tbi Cristo tuj stis cywitz cawel, tisex tten wuˈna, ka tuˈn witzˈja bix ka tuˈn ncyima. ²¹ Tuj nwitza yaaˈn il tiˈj ka tuˈn witzˈja bix ka tuˈn ncyima, cuma ka ma chin itzˈja at woclena tuˈn wajbena mas te Cristo twitz txˈotxˈ, bix ka ma chin cyima jax at woclena tuˈn npona tuya Cristo. ²² Cycaˈbel jbeˈwa baˈn tuj nwitza. Ojattzen ttzaj kˈoˈn weya tuˈn nscyˈonteya alcye mas baˈn, jacˈa mlay tuˈn nscyˈonteya alcye cyxol. Ka iˈtzxe kena, cbinel mas akˈuntl baˈn tzalu wuˈna. ²³ Pero katzen ma chin aja tuˈn npona tuya Cristo, mas baˈn twitzj ntiina tzalu twitz txˈotxˈ. Juˈ tzunj cyiw chˈin tuˈn tel nniˈya tiˈj alcye mas baˈn. Tuˈn npona tuya Cristo masxsele baˈn te weya, ²⁴ pero te cyey mas baˈn tuˈn at kena cyuyey tzalu twitz txˈotxˈ. ²⁵ Bix cuma il tiˈj tuˈn wajbeˈna cyey, jax tuj nwitza chin cyjela cyxola tzalu twitz txˈotxˈ, tuˈntzen cyxiˈ wonena tuˈn cytzketa bix tuˈn cytzalaja tuj cyocslabla, ²⁶ bix tuˈntzen t‑xiˈ cykˈoˈna chjonte te Cristo Jesús wiˈja oj npona cyxola juntl maj.

²⁷ Key hermano, waja tuˈn npona cyeyˈl cyey. Pero matzen oca matzen miˈna, pero at jun waja txiˈ ntzˈiˈbena cyey ilxix tiˈj. Waja tuˈnxix t‑xiˈ cyiiˈna cychunkˈlala tujxix tumel, cuma ejeeˈy ocslal lepchec tiˈ Cristo. Nbiˈxita ka waˈlxix key tuj cyocslabla, bix junx cyanema, bix junx cynaabla, bix junx n‑oc tilel cyuˈna tuˈn t‑xiˈ cytz̈itpuˈna tyol Dios tiˈj coˈpbil ke. ²⁸ Bix nukxit mintiiˈ cytz̈i kej xjal nchi kˈojlec cyiˈja. Ka waˈlxix key tuj cyocslabla cywitz kej cycyˈi Jesús, jatzen jun techel te cyej mintiiˈ cytxolan bix ya tuˈn cyxiˈ tuj castiwa, bix jun techel ejeeˈy at cytxolena bix otzen chi cleta tuˈn Dios. ²⁹ O tzaj kˈoˈn cyey, yaaˈn nuk tuˈn cyocslana tiˈ Cristo, sino tuyax qˈuiyax qˈuixcˈaj cyuˈna tiˈj. ³⁰ Juˈtzen e baj wiˈja tej ntiina cyxola. E cyila jqˈuixcˈaj in iˈyena wiˈja nejl, bix o cybiy ntiina tuj tzeeˈ juntl maj jaˈlewe.

O cub tmanse tiib Cristo, juˈ tzunj o jaw nimsaˈnxin

2  Key hermano, katzen wermanakey, il tiˈj tuˈn tcyiwset ncˈuˈja cyuˈna, bix ka n‑oc wakˈa cyey, bix ka il tiˈj tuj cywitza tuˈn at kmojbabl kiib tuˈn Espíritu Santo, bix ka cyaja tzaj cykˈukˈbaˈna ncˈuˈja, ² chin cybiˈxix chˈina tiˈj ja nyola cxeˈl nkbaˈna. Ka ma cybiy, nimxsen chin tzalajel cyiˈja. Junx qˈuelela cynaabla, bix junxxit tzˈoc takˈ cyuyey cyey, bix junxxit cycˈojlan cyiiba, bix junxxit cybey, bix mojlxit cyakˈmala. ³ Cykˈoncja cyxqˈueybila, bix miˈn chi jaw cyocsabla cyiiba tuj cyakˈmala. Mas baˈn chi yutˈeqˈuey. Miˈn txiˈ cykbaˈna ka mas nintzajkey cywitz xjal, sino mas baˈn jaca juun cyey cwel bisente tiˈj cykilca xjal mas il tiˈj cywitza. ⁴ Jaca juun cyey miˈn chi jyon nuk te cyey jun baˈn, sino tuyax te juntl cyuyey.

⁵ Ja tzunja e tbincha Cristo Jesús. Amale jat xinj xjal Scyˈoˈn tuˈn Dios te cawel tibaj cykilca, pero iyˈx qˈuixcˈaj tuˈnxin nuk kiˈjcˈa. Bix cwel kbisen tiˈj alcyej baˈn te juntl xjal tisen e cub tbisen Cristo Jesús cyiˈ xjal. ⁶ Amale Dioset‑xin, pero min e tzyun xinj toclenxin te cawel tisen Dios. ⁷ Bix e cyaj ttzakpiˈn xinj toclenxin cawelxin tuj cyaˈj, tuˈntzen tocxin te xjal tzalu twitz txˈotxˈ. Ulxin twitz txˈotxˈ, yaaˈn te cawelxin, sino te ajbelelxin. ⁸ Bix yaaˈn nuk ocxin te xjal, sino tuyax ocxin te cyiikˈbil xjal. Nim el cyiiqˈuen xjal jaxin, hasta tejxe tcub cybyoˈn xjal jaxin twitz cruz tisen jun byol xjal. E tcuyaxin jlu tuˈntzen tnimantexin ti e tajbe Dios. ⁹ Juˈ tzunj o jaw tiiˈn Dios jaxin tuˈn tocxin te mas jawnex bix tibaj cykilca, bix o tzˈoc tkˈoˈn Dios jun tbixin mas jawnex twitz cykilca biybaj, cuma jaxin taaw tibaj cykilca. ¹⁰ Tzul jun kˈij oj cykil xjal cwel maje twitz Jesús, kej eteˈ tuj cyaˈj, kej eteˈ twitz txˈotxˈ, bix kej eteˈ tjakˈxe txˈotxˈ. ¹¹ Tuj tzunj kˈij tzul, entera ke xjal qˈuelel cyniyˈ tiˈj ja Jesucristo taaw cykilca. Ojtzen cykilca xjal ckbalte juˈwa, njawtzen cynimsaˈn xjal tbi Kman Dios.

Ejooˈ ocslal juˈ koˈ tisen ke cheˈw nchi txaken tuj klolj

¹² Juˈ tzunj, key hermano, tisen Jesús e cub tbisenxin cyiˈ xjal mas twitzj texin, jax juˈx cyey il tiˈj cxeˈl cyiiˈna ti tten tuˈnxin. Amatzenle mintn‑al kena cyxola jaˈlewe, pero cybima nyola. Cykˈoˈnctzen cyipena tuˈn tcub cybinchaˈna jbaˈn te cyej cabtl cyuyey mas twitzj cyey, tuˈntzen cycyaja tuj tumel. ¹³ Jatzen Dios nakˈanan tuj cyanema, tuˈntzen cyaja jtaj Dios, bix ntzaj tkˈoˈnxin cyipemala tuˈn cybinchantey alcyej tajxin. ¹⁴ Miˈn chi labta bix miˈn chi kˈojla, ¹⁵ tuˈntzen kej xjal yaaˈn ocslal baˈn cyyol cyiˈja, bix tuˈntzen sakxixkey twitz Dios, cuma ejeeˈy t‑xjal Dios. Ka nchi binchana kaˈ tisen kej xjal yaaˈn ocslal, yaaˈntzen tumelkey te yecˈbil cywitzj xjal yaaˈn ocslal. Ejeeˈ tzunkey tisen ke cheˈw nchi txaken tuj klolj. ¹⁶ Tisen jun luz n‑el txaken tuj klolj, juˈtzen japenina ke cyey ka kˈiˈnxix jun tumel cyuˈna, tuˈntzen cyocslante xjal tyol Dios. Ka nbint cyuˈna juˈwa, chin tzalajel cyiˈja oj tul meltzˈaj Cristo cyeyˈlte waakˈena o bint wuˈna cyxola. Pero ka yaaˈn eteˈy tuj tumel, at nchˈixewa cyiˈja twitz Cristo, cuma minxtiiˈ otk tzˈeˈla waakˈena. ¹⁷ Cuma in oneya tej cyocslana tiˈ Jesús, kape chin cwel byet naja tiˈj. Katzen ma tzˈajben ncyamecya tuˈn ttzket cyocslabla, tuˈn cykil ncˈuˈja tuˈn ncyima. ¹⁸ Lu ken nchin tzalaj cyiˈja, bix juˈx cyey chi tzalajela wiˈja.

Timoteo bix Epafrodito

¹⁹ Key hermano, ka ma takˈ Kaaw Jesús, pon nchkˈoˈn Timoteo cyuyey, tuˈntzen tul meltzˈaj tuya cypocbala tiiˈn eteˈy, tuˈntzen tcyiwset ncˈuˈja cyiˈja. ²⁰ Cxeˈl nchkˈoˈn Timoteo, cuma n‑oc cyakˈa te tisex inayena. Min‑al juntl tzalu ncub tbisen jbaˈn te cyey tisej keya. ²¹ Cykil ke ocslal tzalu nuk oˈcx n‑oc takˈ cye tiˈ cyitzˈjel. Min nchi jyon tiˈj alcyej taj Cristo Jesús. ²² Pero te Timoteo yaaˈn juˈ tisen ejeeˈ. Cytzkiˈntla tiiˈn tzˈakˈananxin. Amale atet ti il nbaj, min o cyaj tkˈoˈnxin taakˈenxin. O tzˈakˈananxin wuyena tuj taakˈen Dios te kbalte tpocbal coˈpbil ke tisen jun cwal najben te tman. ²³ Mintiiˈ tumel ti pjel wiˈj. Pero ojtzen nbinte ti pjel wiˈja, cxeˈl nsmaˈna Timoteo cyuyey. Cutz̈it nbinte naj ti pjel wiˈj. ²⁴ Pero ka ma takˈ Kaaw, inayentzen chin pon cyuyey.

²⁵ Pero amale mat pon Timoteo mas yaj, tuj nwitza il tiˈj tuˈn tpon nchkˈoˈna Epafrodito cyuyey jaˈlecˈa naja. Chjonte cyey ma tzaj cychkˈoˈna ja Epafrodito te kˈolte jun onbil weya cyuˈna. Baˈn o tzˈajbenxin we te yolel cyiˈja te onlte weya tzalu tuj taakˈen Kaaw Jesús, bix o tziyˈx qˈuixcˈaj tuˈnxin wuyena. ²⁶ E yebt‑xin tzalu, bix jacˈa o pon tumel cyuyey. Juˈ tzunj najkelenxin. Bix juˈx nipax tcˈuˈjxin cyiˈja. Juˈtzen waja tzˈaj nchkˈoˈn xina cyuyey. ²⁷ Jaxte nim e yebt‑xin. Jacˈa chˈixcˈa min e baj texin. Pero Dios e tzaj kˈonte lastim texin, bix e tkˈana Dios jaxin, bix itzˈjxin. Nuket e cyimxin, masxetzele bis oc weya. Juˈ tzunj tej ttzaj tkˈoˈn Dios lastim texin, tuyaxa te weya.

²⁸ Juˈ tzunj, tuˈntzen cytzalaja oj toc cycyeˈna jaxin bix baˈntlxin, tuya cykil ncˈuˈja pon nchkˈoˈnxin cyuyey. Ojtzen nchi tzalaja tiˈjxin, bix oj t‑xiˈ nbiˈna, jax juˈx weya tzalu tuj tzeeˈ ya miˈn chin biseltla cyiˈja oj t‑xiˈ nbiˈna min chi bisena wiˈja. ²⁹ Ojtzen tponxin cyxola, cykˈimxin tuya cykil cycˈuˈja bix tujxix tumel, bix nuket at chˈin cynaabla twitzxin, cuma jaxin jun t‑akˈanal Kaaw, ³⁰ bix cuma ajbenxin tuj taakˈen Cristo chˈix mi eˈla twiˈxin tiˈj. Ejeeˈy min onenkey wiˈja cuma nakch eteˈy, pero te cyxela o tzˈonen Epafrodito wiˈja tzalu, bix o tziyˈx qˈuixcˈaj tuˈnxin tuˈnj e bint tuˈnxin tuj taakˈen Cristo.

Ti tten tuˈn koc tzˈaklxix

3  Mancˈbiltzen, key hermano tuj Filipos, waja txiˈ nkˈoˈna juntl cyiwsabl cycˈuˈja. Chi tzalaj tzuna tuˈnj baˈn cytena twitz Kman Dios tuˈn Kaaw. Juˈ o txiˈ nkˈoˈna cyey nejl, pero jacˈa il tiˈj cxeˈl nkbaˈna cyey juntl maj. Pero mintiiˈ nbaj tuˈn t‑xiˈ nkˈoˈna tumel cyey juntl maj, cuma te cye cyey tajbelel.

² Chi elel lkˈey cyiˈ kej xjal tzin cykbaˈn tuˈn cyela baˈn twitz Dios, il tiˈj tuˈn cynimantey jley te ootxa tuˈn tel cpet twiˈ tzˈalbil xinak. Kej nchi kˈumente juˈwa, ejeeˈtzen aj kˈoj tiˈ Dios. ¡Ti ttenj juˈwa cˈoquel cykesena cychuˈla tuˈn cyoca te t‑xjal Dios! ³ Ko oquel te t‑xjal Dios, yaaˈn tuˈn toc keset kchuˈl, sino tuˈn kniman Dios tuj kanem. Il tiˈj tuˈn toc ke kcˈuˈj tiˈ Cristo Jesús, yaaˈn cyiˈj kbinchbil tiˈjxe kanem tisen tzin cykbaˈn.

⁴ Ka il tiˈj nim cbinel kuˈn tuˈn koc te t‑xjal Dios, inayena nim o bint wuˈna twitz cykilcatl. ⁵ Te twajxakan kˈij witzˈjlena e cpet nchuˈla juˈwa te techel inayena t‑xjal Dios, tisen tkbaˈn tley Moisés. Aj Israel kena, bix tiyˈjil Benjamín kena, jaj mas nintzaj tiyˈjil cyxol mastl cyiyˈjil Israel, bix nyola hebreo, jaj cyyol ke te Israel, bix mero te judío kena, yaaˈn paˈn tten wiyˈjil, bix cyxol kej xjal nimalxix tuj tley Moisés, inayena jun mas nimalxix cywitz, cuma in tena cyxolj cloj te fariseo lepchke xjal tiˈj tley Moisés. ⁶ Cyiwxsen in eˈleya tuj tley Moisés bix juˈ tzunj in oc lpeya cyiˈ ocslal te yajlalcye bix te byolcye, cuma min e cybi tley Moisés. Bix weya tuj tley Moisés, cykilxsen in nimeya. Minxsentiiˈ e cyaj wuˈna tiˈjxe. ⁷ Cykil xsunj lu o bint wuˈna, pero min ajben weya tuˈn woca te t‑xjal Dios. Amale kej nimal tuj tley Moisés nxiˈ cykbaˈn cykilj lu e bint wuˈna ootxa at cyajbelel, pero jaˈlewe n‑el nniˈya tiˈj mintiiˈ tipemal twitzj te Cristo. ⁸ Bix yaaˈn oˈcx kej lu, pero tuyax cykilcatl o bint wuˈna bix cykilcatl at wuyena ya mintzentiiˈtl tcˈojlalel n‑oc nkˈoˈna twitzj tcˈojlalel n‑oc nkˈoˈna te Waaw Cristo Jesús bix tuˈn toc nkˈon wiiba tuyaxin. ⁹ Jaja mas nintzaj twitz cykilcatl tuj nwitz, jaj tuˈn n‑oc nkˈon wiiba tuya Cristo. Mlay ncamiya tuˈn wela baˈn twitz Dios tuˈn n‑oc nnimena tley Moisés. Ja te at tajbelj, jaj tuˈn toc ke ncˈuˈja tiˈ Cristo. Ja tzunja waja. ¹⁰ Waja tzˈel nniˈya tiˈ Cristo jaxxix, bix tuˈn t‑xiˈ wiiˈna jun nchunkˈlala tzˈaklxix tuˈnj tipemal Dios ajben tuˈn tjaw tiiˈn ja Jesús tuj cyamecy, bix waja tuˈn tiyˈx qˈuixcˈaj wuˈna hasta ojxe ka ma chin cyima tiˈj nuk tuˈn nxiˈ lpeya tiˈjxin mas twitzj tuˈn nxiˈ lpeya tiˈj alcye waja. ¹¹ Ka ma txiˈ wiiˈna nchunkˈlala juˈwa, laˈ alcye jun kˈij chin jawetz tiiˈn Dios tuj cyamecy.

¹² Pero min txiˈ nkˈumena ya ma chin pona tzˈaklxix. At‑x tuˈn ntzketa. Pero n‑oc wipiya tuˈn ttzket nnaabla, cuma jaj tuˈn ntzketa e tajbe Cristo Jesús tej tcoˈpante inayena tuˈn woca te t‑xjalxin. ¹³ Key hermano, jaxte minaˈx ntzketa, pero ya min txiˈ nbisentla tiˈj niyˈj e baj weya nejl, sino ya juˈ nxiˈtl ncwenta tiˈj nejl nwitza. ¹⁴ Cˈoquel wipena tiˈj tuˈn tcyaj nnaabla mas tzˈaklxix, tuˈntzen ncamana ncotza te Dios. Tzin ttxcoˈn Dios ejooˈ tuya jun nintzaj txocbil tuˈn kpon tzˈaklxix, bix nuk tuˈn Cristo Jesús baˈn tbint kuˈn tuˈn kpon tzˈaklxix.

¹⁵ Pero at juun cyxola ncub cybisena tiˈj ya ma chi oca tzˈaklxix. Pero nuket baˈn tuˈn tcub cybisena minaˈx cytzketa. Pero katzen cycyˈiy tiˈj nxiˈ nkbaˈna, jax Dios cwel kˈonte tumel cyey minaˈx cytzketa. ¹⁶ Pero amale mint tzˈel cyniˈya tiˈj entera ti taj Dios, pero cynimamj o bint cyuˈna.

¹⁷ Key hermano, cykilcakey cyiiˈnx ti tten wuˈna bix cycnomela ti tten cyuˈn kej kˈiˈn cyuˈn tisej weya. ¹⁸ Pero cykˈoˈnc cycwenta cyiˈj kej nchi kbante jtcyimlen Cristo twitz cruz mintiiˈ il tiˈj. Ejeeˈtzen kˈojlelj tiˈ Cristo. Chˈima maj o txiˈ nkˈumena cyey tuˈn miˈn tzˈoc cybiˈna cyyol, bix juntl maj jaˈlewe. Nchin ookˈ cyiˈj, ¹⁹ cuma chi xeˈl tuj castiwa. Ejeeˈtzen xjalja ncheˈx lpe nuk tiˈj ti taj cyxumlal, yaaˈn tiˈj ti taj Dios. Tuˈnj nbint cyuˈn mintiiˈ cychˈixew, sino nuk nbaj cyniman cyiib tiˈj. N‑oc cykˈoˈn tajbel oˈcx jaj at te twitz txˈotxˈ. ²⁰ Pero te ke ejooˈ ocslal at mastl twitzja at twitz txˈotxˈ, cuma at ktanem tuj cyaˈj. Bix jatztzen ctzaala jxin Coˈplte ke, ja Kaaw Jesucristo, jnko ayon tiˈj. ²¹ Bix oj tulxin, tuya tzunj jax tipemalxin najben texin tuˈn tcawenxin tibaj cykilca tikˈch at, cwel tchˈixbeˈn xinj kxumlal tuya niyˈ ajnintz kchuˈl at jaˈlewe, tuˈntzen koc te jun xumlalbaj tbanelxix tisexj texin.

Tej tkbante Pablo cye ocslal tuˈn cytzalaj tiˈ Kaaw

4  Juˈ tzunj, key hermano n‑oc cyakˈa weya, cykˈoˈnc cyipena tiˈj tuˈn cyweˈxixa tiˈ Kaaw, cuma at mastl twitzja at twitz txˈotxˈ. Cyiˈja nchin tzalaja. Ejeeˈy tisen jun ncotza tuˈn waakˈena e bint wuˈna cyxola.

² Pero cyxola at caˈba xuuj ocslal nchi kˈojl, jaj Evodia tuya Síntique. Key hermano, nchin cubsan nwitz cyexuj tuˈn cycub yutˈexuj bix tuˈn cycub tenxuj tuj tumel, cuma ocslalkexuj. ³ Nchin cubsan nwitz cyexuj, bix jax juˈx cyey jiquenxix tuj taakˈen Dios, tuˈn toc cyipena tuˈn cyonena cyiˈj ke caˈba xuuj kˈojlel tuˈn cytenxuj tuj ttz̈yal, cuma nejl akˈanan tzunkexuj cyiw wuyena tej ntena tuj cytanema tuˈn nkˈumenteya tpocbal Jesús tuya Clemente bix cyuya cabtl ocslal. Mlay bint tzˈibj cykilca cybi tzalu tuj wuˈja, pero tzˈiˈben tuˈn Dios tuj tuˈj jaaˈ taˈ cybi kej xjal at cychunkˈlal te junx maj.

⁴ Chi tzalajaxita cykilcakey tiˈj Kaaw. Bix juntl maj nxiˈ nkˈumena cyey, ¡chi tzalaja! ⁵ Tuˈn tchicˈajax jun baˈn cynaabla cywitz cykil xjal.

At Kaaw nka te onlte ke. ⁶ Juˈ tzunj miˈn baj cycˈuˈja tiˈj ti pjel cyey. Ka at jun il eteˈy, cykanenx te Dios. Pero tuj cykilca nbaj cyiˈja, cykˈonx chjonte te Dios tiˈj tuj cyanema. ⁷ Ka nbint cyuˈna juˈwa, a ttz̈yal ctemel cyanema, bix cynaabla qˈuelel junx tuya tnaabl Cristo Jesús. Nintzajxsen ja tzunj ttz̈yal tzin tkˈoˈn Dios cyey tuˈn tel cyajkelbila tuj cyanema.

Cwel cybisena tiˈj alcyej jiquen bix sakxix

⁸ Mancˈbiltzen nyola te cyey hermano, jaj tuˈn t‑xiˈ cyjyoˈna alcyej jaxxix bix cykilcaj baˈn tuˈn tnimj. Cwel cybisena tiˈj alcyej jiquen bix sakxix bix baˈn. Bix cwel cybisena jun baˈn te juntl cyuyey. Bix cwel cybisena tiˈj alcyej jawnex bix ti tten tuˈn tjaw cynimsaˈna Dios. ⁹ Juˈtzen tzin nseˈn weya bix juˈtzen nxaˈ nkˈumena. Cyiiˈnxa ti tten nbint wuˈna bix alcye o cyxnakˈtzay wiˈja, bix ka nbint cyuˈna juˈwa, chi temela tuj ttz̈yal tzin tkˈoˈn Dios.

Tej ttzaj cyonen kej ocslal aj Filipos ja Pablo

¹⁰ Key hermano, jun nim tzalajebl te weya tej tul jun onbil weya cyuˈna. Nxiˈ nkˈoˈna chjonte te Kaaw cuma o chin tzaj cyonena. Ntzkiˈna e cyajbey tuˈn ttzaj cyonena inayena nejl, pero mix e binne tuˈn cyoney wiˈja. Pero jaˈlewe matzen chin cyoney. ¹¹ Pero min tzin nkbaˈna at palt te witzˈjela. Ma chin nikˈeta tuˈn ntzalaja ka at npwaka bix ka mintiiˈ npwaka. ¹² Niyˈx wuˈna ka at nim witzˈjela bix ka mintiiˈ, ka nojne ncˈuˈja bix ka towl. Bix nuk tiˈxja baj wiˈja, seya mebe kena bix ka kˈina kena, pero tuj txubtx ntiina. ¹³ Cykilca qˈuiyax wuˈna, cuma ja Cristo n‑onen te weya. Jaxin ntzaj kˈonte wipemala. ¹⁴ Pero amale niyˈxet cykilca wuˈna, chjonte cyey nchin tzaj cyonena tuj tzeeˈ tzalu. ¹⁵ Bix jax cucx o chi onena wiˈja, jatxe tej wakˈa kbalte tpocbal Jesús cyxola, hasta jaˈlewe. Cytzkiˈna tuj kˈij tej wexa tuj cytanema tuj lugar te Macedonia, nuk ejeeˈy ona wiˈja. Min‑al juntl cloj ocslal tuj juntl tnom ona wiˈja. Oˈcx ejeeˈy. ¹⁶ Aa, n‑ul tuj ncˈuˈja in tenxa tuj lugar te Macedonia, tuj tnom te Tesalónica, bix e tzaj cyonena inayena tuj jun il in temiya, bix yaaˈn nuk jun maj e tzaj cyonena inayena tej ntena tuj Tesalónica. ¹⁷ Pero yaaˈn tuˈn n‑elwe ncˈuˈja tiˈ cyoybila. Jawe waj tuˈn cyiikˈentey jun baˈn cycotza tuˈn Dios tuˈnj ntzaj cyonena inayena. ¹⁸ Pero te weya, ya at nimwe npwak tuˈn witzˈja, cuma o tzul tiiˈn Epafrodito cykilca e tzaj cykˈoˈna te weya tzalu. Bix jun cyonbila tisen jun cˈocˈsbil njaw twitz Dios bix tisen jun cyoybila twitz Dios. ¹⁹ Juˈ tzunj cchjolte Dios nim t‑xel cyey. Jaxin kˈolte cykil il tiˈj te cyey, cuma texin nimxsen tkˈinemalxin at, bix tuˈn kmojbabl kiib tuya Cristo Jesús, Dios ntzaj kˈonte ke. ²⁰ ¡Axsen tbanel Kman Dios, bix nimjxit tbixin te junx maj. Juˈxit tzuna!

Jun kˈolbebl tuˈn Pablo te mancˈbil yol

²¹ Cykˈoˈnxa jun kˈolbebl wuˈna cye cykil t‑xjal Cristo Jesús jatzewe. Bix juˈx kej hermano eteˈ wuyena tzalu jax at jun kˈolbebl cyuˈn te cykilcakey. ²² Bix juˈx te cykilca ocslal tuj ja tnom lu bix kej ocslal nchi akˈanan tuj jaaˈ te cawel nxiˈ kkˈoˈna jun kˈolbeblcye te cykilca. ²³ At‑xit t‑xtalbil Kaaw Jesucristo cyibaja. Oˈcx nyolja.