Chronological

Jun uˈj e cub ttzˈiˈben Pablo cye ocslal aj Efeso

Jun kˈolbebl tuˈn apóstol Pablo

1  Key hermano tuj tnom te Efeso,

Inayena Pablo. Scyˈoˈn kena tuˈn Dios tuˈn wajbena tiˈj waakˈena te t‑xel Cristo Jesús. Ncub ntzˈiˈbena ja uˈj lu te cyey, ejeeˈy n‑ocxix ke cycˈuˈj tiˈj Cristo Jesús. ² Tzajxit t‑xtalbil Kman Dios tuya Kaaw Jesucristo cyibaja, bix cyuˈnxit‑xin chi temey tuj ttz̈yal.

Ntzaj tkˈoˈn Dios cykil t‑xtalbilxin kibaj nuk tuˈnj o tzˈel ttz̈qˈuel Jesús twitz cruz

³ Ko nimanxit Dios, tman Kaaw Jesucristo. Tuˈnj kmojbabl kiib tuya Cristo o tzaj tkˈoˈn Dios ke cykil xtalbil at tuj cyaˈj, bix ja Espíritu Santo ntzaj kˈinte jxtalbil te ke. ⁴ Jatxe ootxa otk cub tnincˈuˈn Dios tuˈn kcoˈpj tuˈn kel junx tuya Cristo. Tej mitknaˈx tbint twitz txˈotxˈ, otk baj tnincˈuˈn Dios tuˈn ttzaj tkˈoˈn xinj xtalbil lu te ke. E tbincha Dios lu kiˈj nuk tuˈn Cristo. E cub tnincˈuˈnxin tuˈn kel junx tuya Cristo tuˈntzen kten sakxix bix tuˈn mintiiˈ kil twitzxin. ⁵ Tuˈnj tkˈakˈbil tcˈuˈjxin kiˈj, jatxe tuj tneel e baj tnincˈuˈnxin tuˈn koc te tcwalxin tuˈn Jesucristo. Juˈ e cub tnincˈuˈnxin tuˈn ttzaj tkˈoˈnxin ke, ⁶ tuˈntzen tjaw knimsaˈn tbixin cykil t‑xtalbilxin kibaj. A tanemxin tiˈj Tcwalxin, bix tuˈnj kmojbabl kiib tuya Tcwalxin, jax juˈx o tiikˈxin ejooˈ te tcwalxin. ⁷ Tisen pres koˈ tjakˈ kil nejl, pero ya at kmojbabl kiib tuya Cristo. Juˈ tzunj ya o ko clet tuj kil. E chjet kil tuˈn Tcwalxin tej tel ttz̈qˈuel bix e cyim te kxel. Yal jaˈlewe o najset kil. ¡Nimxsen jun t‑xtalbil Dios ntzaj tkˈoˈnxin ke! ⁸ ¡Nimxsen jun baˈn o tzaj tkˈoˈnxin ke! ¡Nimxsen tnaabl Dios te nicˈulte cykilcaj lu! ⁹ J‑e baj tnincˈuˈn Dios jatxe ootxa, jaj tuˈn tel cykilca junx tjakˈ tcawbil Cristo. Bix o tzaj tkˈoˈn Dios ke tuˈn tel kniyˈ tiˈj jaj e cub tnincˈuˈnxin jatxe tuj tneel pero eˈwen taˈ kwitz nejl. ¹⁰ Oj tjapan baj cykilca tkˈijlal, o niqˈuet tuˈn Dios cykilcaj at tuj cyaˈj bix twitz txˈotxˈ cyjel tjakˈ tcawbil Cristo.

¹¹ Key hermano, tuˈn kmojbabl kiib tuya Kaaw Jesús o ko oc te t‑xjal Dios. Jatxe tuj tneel o tnicˈu Dios tuˈn kocx te t‑xjalxin, bix nbint tuˈnxin cykilcaj o baj tnincˈuˈnxin kiˈj. ¹² Ejooˈtzen judío tneel tnom ayon tiˈj tulel Cristo. E bint tuˈn Dios tuˈn koca te t‑xjalxin tuˈntzen tjaw knimsaˈn tbixin.

¹³ Yaltzen cyey ocslal yaaˈn judío, jax t‑xjal Dioskey. Tej toc cybiˈna jyol jaxxix tiˈj coˈpbil ke, oc ke cycˈuˈja tiˈ Jesús. Juˈ tzunj e tzaj tkˈoˈn Dios Espíritu Santo tuj cyanema, tisen otk tkba Dios, tetzen techel t‑xjaltzen Dios ejeeˈy. ¹⁴ Najben Espíritu Santo ke tuˈntzen tzinen taˈ alcye jun kˈij cxeˈl tiiˈn Dios ejooˈ tuˈn kten tuyaxin te junx maj. Jatzen kkabj. O cub tnincˈuˈn Dios juˈwa tuˈntzen tjaw knimsaˈn tbixin.

Tej tnaˈn Pablo Dios tuˈn ttzaj tkˈoˈn Dios cynaabl ocslal

¹⁵ Cuma t‑xjal Dios ejeeˈy, juˈ tzunj min nchin weˈya nnaˈna Dios cyiˈja. O nbiˈya nim n‑oc ke cycˈuˈja tiˈ Kaaw Jesús bix nim tkˈakˈbil cycˈuˈja at cyiˈ cabtl ocslal. ¹⁶ Ojtzen nnaˈna Dios cyiˈja, ¹⁷ nxiˈxix ncubsaˈna nwitza te jawnex Kman Dios, tman Kaaw Jesucristo, tuˈn ttzaj tkˈoˈnxin cynaabla. Bix nxiˈ nkaniya texin tuˈn t‑xiˈ tyeecˈaxin cyey ti ttenxin, tuˈntzen tel mas cyniˈya tiˈj Dios. ¹⁸ Bix nxiˈ ncubsaˈna nwitza texin tuˈn tjkontexin cynaabla tuˈntzen tel cyniˈya tiˈj cykilcaj tzin cyyoˈna o tkba Dios tuˈn tkˈonte bix o tzaj ttxcoˈnxin ejeeˈy te niyˈbelte. Ejooˈ ocslal ckiikˈel jun jawnex kxab te Dios. ¹⁹ Bix nxiˈ nkaniya texin tuˈn tel cyniˈya tiˈj jawnexsen junx maj tipemalxin kibaj, bix minteyˈxse tumel tiiˈn. Jtipemalxin najben texin tuˈn ttzaj tonenxin ejooˈ, ²⁰ juˈxse tipemalxin ajben texin tej tjatz titzˈjsaˈnxin Cristo tuj cyamecy, bix juˈxse tipemalxin e tzaj tkˈoˈnxin te Cristo tuˈn tcub ke tuj tmankˈabxin tuj cyaˈj te cawel. ²¹ O tzaj tkˈoˈn Dios te Cristo tuˈn tcawen cyibaj cykil cawel. O tzaj tkˈoˈnxin te Cristo tuˈn tcawen yaaˈn nuk tuj ja tyem lu, sino juˈx tuj jtyem tzul. ²² O cyaj tkˈoˈn Dios cykilca at te Cristo tuˈn tten tjakˈ tcawbil. Bix tex Cristo o tzaj tkˈoˈnxin tuˈn tcawen tibaj cykilca ocslal. ²³ Ejooˈ ocslal tisen t‑xumlal Cristo, jkwiˈ nkˈonte kchunkˈlal te junx maj. Mintiiˈ jun lugar mintn‑alxin tuj, sino at‑xin.

Ma ko clet tuˈn t‑xtalbil Dios kibaj

2  Key hermano, nejl cyimne eteˈy. Amale iˈtzet cyxumlala, cyimne eteˈy, cuma e tenkey tuj cyila. ² Nejl kaˈ e cybinchay, tisen nbint cyuˈn kej xjal lepch nuk tiˈ tnaabl te twitz txˈotxˈ. Bix e cynimey taaw il, jaj taaw il ncawen cyibaj biman eteˈ kibajxe min chicˈaj, jaxj taaw il nakˈanan tuj cyanem kej xjal min txiˈ cyniman tyol Dios. ³ Juˈ e tema cykil koˈ nejl. E tena koˈ cyxolj xjal yaaˈn ocslal. Nuk e xiˈ lpe koˈ tiˈj nuk tikˈch taj kxumlal bix tiˈj nuk tikˈch kaˈ e cub kbisen. Juˈ tzunj e tzaaˈ nim tkˈoj Dios kibaj, tisen jaˈlewe ntzaj tkˈoj Dios cyibaj kej xjal min cyocsla Dios. ⁴ Nim n‑oc tkˈoˈntlxin lastim ke, cuma nim n‑oc kakˈ texin. ⁵ Nejl cyimne koˈ tuˈn kil. Pero tuˈnj kmojbabl kiib tuya Cristo, o tzaj tkˈoˈn Dios ke jaxj chunkˈlal e tzaj tkˈoˈnxin te Cristo tej tjatz titzˈjsaˈnxin tuj cyamecy. Tuˈn tzunj t‑xtalbil Dios kibaj, ma ko cleta. ⁶ At mas tipemal Cristo Jesús tuˈn tcawen tibaj cykilca, bix tuˈn kmojbabl kiib tuyaxin, nko cawen junx tuyaxin, tuˈn kcaman tiˈj taaw il. ⁷ Ejeeˈ tzunj lu kkˈinemal o tzaj tkˈoˈnxin te ke, ejooˈ at kmojbabl kiib tuya Cristo Jesús. Bix tuˈn tzunj kkˈinemal tuˈn Dios te ke, ejooˈ t‑xjalxin, cxeˈl tyeecˈan Dios te cykil xjal cyuj kej tyem chi ul, nimxsen jun t‑xtalbilxin te ke, ejooˈ ocslal, tuˈntzen tchicˈajax tkˈakˈbil tcˈuˈjxin kiˈj. ⁸ Tuˈn t‑xtalbil Dios kibaj, bix cuma o tzˈoc ke kcˈuˈj tiˈ Tcwalxin, o ko clet tuj il. Yaaˈn kuˈnx ma ko cleta, sino ja coˈpbil ke jun kcotz tuˈn Dios. ⁹ Yaaˈn tuˈn ti jilel baˈn nbint kuˈn ko cletel, sino tuˈnj coˈpbil ke o takˈ Dios, tuˈntzen min‑al jun ke baˈn tuˈn tjaw tniman tiib tiˈj twitz Dios. ¹⁰ O ko clet nuk tuˈnj t‑xtalbil Dios o tzaj tkˈoˈn ke. Tuˈnj kmojbabl kiib tuya Cristo Jesús o ko oc te t‑xjal Dios, tuˈntzen tbint jun baˈn kuˈn. Tiˈj tzunja e tbinchaˈ Dios ejooˈ jatxe tuj tneel.

At ttxubt xjal kxol jaj tcyimlen Cristo twitz cruz

¹¹ Juˈ tzunj, key hermano, cynaˈmcˈa yaaˈn ejeeˈy t‑xjal Dios nejl, cuma yaaˈn aj Israelkey. Ncub cybisen aj Israel jaˈlewe nuk ejeeˈ t‑xjal Dios, cuma at jun techel n‑oc cykˈoˈn tiˈ cyxumlal. Ejeeˈ tzin cykbaˈn juntl wik xjal yaaˈn te Dioskey, cuma mintiiˈ techel n‑oc tiˈ cyxumlala. Pero n‑oc cykˈoˈn techel cyiˈj nuk tuˈn cyex cykˈab. ¹² Nejl tiˈjxe xjal te Israel eteˈy. Mintiiˈ cymojbabl cyiiba tuya Cristo, bix mintiiˈ tumel cyuyey tiˈj cykilcaj otk tkba Dios tuˈn tkˈonte. E tenkey twitz txˈotxˈ min‑al jaxxix Dios cyuyey, bix min ayonkey tiˈj jun coˈpbil cyey. ¹³ Pero jaˈlewe at cymojbabl cyiiba tuya Cristo Jesús. Amale nakchet eteˈy tiˈ Dios nejl, pero jaˈlewe, tuˈnj tcyimlen Cristo, at cyoclena tuya Dios. ¹⁴ Nejl at jun kˈoj cyxol xjal judío bix kej xjal yaaˈn judío. Ja kˈoj lu tisen jun tapya tcuˈx cyxol cycaˈbel wikan. Pero jaˈlewe ejeeˈy yaaˈn judío bix ejooˈ judío mintiiˈ kˈoj tcuˈx kxol. Cykilca koˈ at kmojbabl kiib tuya Cristo, bix juˈ tzunj junx wik xjal koˈ. ¹⁵ Jtapya tcuˈx cyxol cycaˈbel wikan xjal nejl, jatzen leyj e cyaj tkˈoˈn Dios te cye judío nejl nimcˈa iken tuˈn. Pero tej tcyim Cristo twitz cruz, biˈx el tiiˈn tipemal jcyley judío te paˈlte cye xjal, tuˈntzen cyoc cykil xjal te junx t‑xjal Dios. Juˈtzen e cwaˈ tkˈoˈn Cristo ttxubtxjal t‑xol cycaˈbel wikan. ¹⁶ Tuˈntzen tcyimlen Cristo twitz cruz, ejooˈ judío bix ejeeˈy yaaˈn judío o ko oc te junx cloj xjal. Cykiltzen koˈ baˈn kten tuj ttz̈yal tuya Kman Dios. Tuˈn tcyimlen Cristo e cymaˈ kˈoj cyxol judío bix kej yaaˈn judío. ¹⁷ Tej tul Cristo twitz txˈotxˈ, bixsen e tkbaxin tpocbalj ttxubtxjal cye cykilca xjal. E tkˈumexin cyey, ejeeˈy yaaˈn judío min otk cyiikˈa ley te Dios, bix e tkˈumexin te cye judío otk cyiikˈ ley te Dios bix oc cybiˈn jaca kˈij. ¹⁸ Judíole koˈ, bix yaaˈnle judío koˈ, tuˈn Cristo baˈn tuˈn kocx cykilca koˈ twitz Dios. Bix tuˈn junx Espíritu Santo at koclen tuˈn kocx twitz Dios.

¹⁹ Entonces, key hermano yaaˈn judío, nejl yaaˈn ejeeˈy t‑xjal Dios. Pero yaaˈntl tiˈjxe eteˈy te t‑xjal Dios, sino t‑xjal Dios key kuyena. Ya junx elninakey tuya Dios. ²⁰ Ejooˈ t‑xjal Dios tisen jun jaaˈ. Ke cyxnakˈtzbil ke tyolel Dios bix ke t‑xel Jesús o cyaj cykˈoˈn ke, ejeeˈ tzunja tisen tkˈukˈlel jaaˈ. Bix Cristo Jesús tisentzen xcbil te tipemal, ²¹ tuˈntzen cyiw jaaˈ, tuˈntzen miˈn tzˈel xitj niyˈ ttxˈotxˈel. Tisentzen jun jaaˈ tlichon tiib tuya xcbil bix juˈtzen nbinne jun jaaˈ, juˈxsen kewa ejooˈ ocslal tuya Cristo. Tuˈnj kmojbabl kiib tuya Cristo, junx elnina t‑xjal Dios koˈ, tuˈntzen kajben te Dios te sakxix t‑xjal. ²² Bix cyuyaxa, tuˈnj cymojbabl cyiiba tuya Cristo, bix t‑xjaltltzen Dios ejeeˈy, bix attzen Espíritu Santo cyuyey.

Jun taakˈen Pablo tuˈn t‑xiˈ tkbaˈn tpocbal Cristo Jesús te cyej yaaˈn judío

3  Entonces, key hermano, ejeeˈy ocslal yaaˈn judío eteˈy tajlal t‑xjal Dios, bix juˈ tzunj inayena, Pablo, nchin naˈna Dios cyiˈja. Ntiincˈtza tuj tzeeˈ nuk tiˈ tkˈumj tpocbal Cristo Jesús te cyey yaaˈn judío. ² Jatzen waakˈenja o tzaj tkˈoˈn Dios, bix ntzkiˈna o cybiy tiˈj ja waakˈena lu. ³ O cybiy Dios o tzaj tyeecˈan weya j‑e baj tnincˈuˈn nejl pero min e tyeecˈa. Matzen cyaj ntzˈiˈbena chˈin tiˈj e baj tnincˈuˈn Dios kiˈj cykilca koˈ jatxe ootxa. ⁴ Oj cyakˈa xnakˈtzal tiˈj ma ntzˈiˈbiya tuj wuˈja, qˈuelel cyniˈya tiˈj nim o tzˈel weya nniˈya tiˈj ti e baj tnincˈuˈn Dios min e chicˈajax nejl. Jatzen e cub tnincˈuˈn Dios tiˈj, jaj tuˈn tcub tkˈoˈn Dios cykilca at tjakˈ tcawbil Cristo. ⁵ Ootxa min‑al jun el tniyˈ tiˈj ti e baj tnincˈuˈn Dios, pero jaˈlewe o tzaj tyeecˈan Dios tuˈn Espíritu Santo cye ke t‑xel Jesús bix ke tyolel Dios o tzˈoc cykˈon cyiib tuˈn cyajben tuj taakˈen Dios. ⁶ Bix alcyej o tzaj tyeecˈan Dios cye t‑xel Jesús bix ke tyolel Dios ja tzunj lu: Yaaˈn nuk ejeeˈ ocslal judío, sino cyuyax ke ocslal yaaˈn judío ccyiikˈel cykilj o takˈ Dios. Tuˈnj oj toc cyocslaˈn coˈpbil tuˈn Cristo Jesús, cyuyaxsen chi oquel tajlal t‑xjal Dios.

⁷ Yaaˈn inayena scyˈolte tuˈn tkˈumj tyol Dios wuˈna. Jatzen Dios o tzaj kˈonte weya tuˈn t‑xiˈ nkˈumena ja yol lu, bix tuˈn tipemalxin nbint wuˈna. ⁸ Amale inayenta mas aj il nejl twitz cykilca xjal tuj nwitza, pero o tzaj tkˈoˈn Dios waakˈena te cxeˈl nkˈumena tyol Dios cye xjal yaaˈn judío. Bix jnxiˈ nkˈumena, jaj ka ma tzˈoc tkˈon tiib jun xjal tiˈ Cristo, attzen tkˈinemal tbanelxsen mi nuk binel tajlaj. ⁹ O tzaj tkˈoˈn Dios weya tuˈn t‑xiˈ nkˈumena cye cykil xjal tiˈj e baj tnincˈuˈn Dios jatxe ootxa tuj ewjel. Tuj tneel, jxin e binchante cykilca at min e cub tyeecˈanxin j‑e baj tnincˈuˈnxin, ¹⁰ tuˈntzen cyjaw kleeˈ jaˈlewe cykilca ke ángel bix ke biman. E tajbe Dios tuˈn kajben ejooˈ ocslal te jun yecˈbil cywitz kej ángel bix kej biman nchi cawen cyxol cyaˈj, tuˈntzen tel cyniyˈ tiˈj nimxsen baˈn tuˈn Dios. ¹¹ Cykil tzunj lu e baj tnincˈuˈn Dios jatxe tuj tneel, bix tuˈn Cristo Jesús, Kaaw, e pjaˈ bint. ¹² Bix at kmojbabl kiib tuya Cristo tuˈnj kocslabl tiˈj. Juˈ tzunj tuya cykil kcˈuˈj bix mintiiˈ ttz̈i kiˈj, baˈn tuˈn kocx twitz Kman Dios. ¹³ Entonces, key hermano, ntiina tuj tzeeˈ tzalu, cuma e xiˈ nkbaˈna tyol Dios cyey. Niyˈx qˈuixcˈaj wuˈna, pero cxeˈl ncubsaˈna nwitza cyey miˈn baj cycˈuˈja ti pena ntiiniya, sino oˈcx cxeˈl cykˈoˈna chjonte wiˈja.

Mlay tzˈel kniyˈ tiˈj niyˈ chˈin pomnina tkˈakˈbil tcˈuˈj Cristo

¹⁴ Cuma n‑el nniˈya tiˈj ejeeˈy t‑xjal Dios, juˈ tzunj nchin cub majeya twitz Kman Dios cyiˈja. ¹⁵ Jatzen Kmanj, bix juˈ tzunj ejooˈ ocslal tcwal Dios. Jaxin Cyman kej o chi pon tuj cyaˈj, bix Cyman cyej eteˈx twitz txˈotxˈ. ¹⁶ Bix jawnexsen tbixin. Ojtzen nchin naˈna Kman cyiˈja, tzin nkaniya texin tuˈn ttzaj tkˈoˈnxin tipemalxin tuj cyanema tuˈn Espíritu Santo, tuˈntzen tcyiwset cyanema. ¹⁷ Bix nchin kanena te Dios tuˈn toc ke cycˈuˈja te junx maj tiˈj Cristo, tuˈntzen tten Cristo tuj cyanema. Ka wiˈl cyocslabla tiˈj Cristo tuj cyanema juˈwa, cyiwtzen taˈ tkˈakˈbil cycˈuˈja, tisen jun tzeeˈ min yucch ka wiˈl tlocˈ junx maj tuj txˈotxˈ. ¹⁸ Ka nbint cyuˈna juˈwa, ejeeˈy ocslal cyuyax cykil niyˈtl ocslal qˈuelel cyniˈya tiˈj niyˈ chˈin pomnina baj tkˈakˈbil tcˈuˈj Cristo. ¹⁹ Mlay bint tmloj cuma nimxsen. Ojtzen tel cyniˈya tiˈj jtkˈakˈbil tcˈuˈj Cristo, amale mint tzˈel cyniˈya tiˈj entera, jax ctzketel cynaabla tisen taj Dios.

²⁰ ¡Ko nimanxit tbi Dios! ¡Jawnexsen tipemal Dios! Bix tuya nim tipemalxin nakˈananxin tuj kanem. Mintiiˈ jun miˈnt bint tuˈnxin. Baˈn tuˈn ttzaj tkˈoˈnxin mastl twitzj nxiˈ kkanen, bix mas baˈn nbint tuˈnxin twitzj ncub kbisen. ²¹ ¡Nimjxit Dios te junx maj kuˈn, ejooˈ t‑xjal Dios at kmojbabl kiib tuya Cristo Jesús!

Ja Espíritu Santo kˈolte jun kmojbabl kiib

4  Entonces, key hermano, Dios o txconte cyey tuˈn cyoca te t‑xjalxin. Juˈ tzunj nchin cubsan nwitza cyey tuˈn t‑xiˈ cyiiˈna jun cynaabla jiquen, cuma t‑xjal Dioskey. Yaltzen weya, ntiina tuj tzeeˈ nuk tuˈn nchin ajbeˈna te Kaaw. ² Miˈn jaw cyniman cyiiba, bix miˈn baj t‑xelen tiib cykˈoja, bix tenx cypasensyey. Ka cyaja t‑xiˈ cyyeecˈana tkˈakˈbil cycˈuˈja te juntl xjal, cxeˈl cyonena. ³ Miˈn txiˈ cyxooˈna cymojbabl cyiiba o tzaj tkˈoˈn Espíritu Santo cyey, sino cyjyoma tuˈn tel cynaabla junx, tuˈntzen cytena tuj ttz̈yal. ⁴ Nxiˈ nkbaˈna cyey junx qˈuelel cynaabla, cuma tuj twitz Dios nuk junx cloj elnina t‑xjal. Bix nuk junx Espíritu Santo at. Bix nuk junx tcawbil Dios tzul, bix o txcon Dios kiˈj te ayolte tzunj tcawbil. ⁵ Junx Kaaw at, bix nuk junx kocslabl tiˈ Kaaw at, bix at nuk junx bautismo, jaj junx chombil ke tuˈn koc te junx cloj tuya Dios. ⁶ Bix nuk junx Kman Dios at kibaj. Jaxin ncawen tibaj cykilca koˈ, bix nakˈananxin kxol cykilca koˈ, bix at‑xin tuj cykilca kanem.

⁷ Junx elnina koˈ, pero kaakˈen tecˈalex te juun. O tzaj tkˈoˈn Cristo te jaca juun ke tecˈalex taakˈen tuˈn kajben cyxol ocslal, laˈ niyˈ chˈin o takˈ Cristo te jaca juun ke. ⁸ Cˈoquel cycyeˈyena ti toc tuˈn tyol Dios tiˈj t‑xtalbil Cristo cye t‑xjal Dios. Tz̈i cyjulu: “Tej tjax Cristo tuj cyaˈj, e tyeecˈatzen otk tcolxin ke xjal tuj il, bix e tzaj tkˈoˈnxin tecˈax taakˈen juun,” tz̈i tyol Dios. ⁹ Yaltzen tiˈj ti japenina jyol “e jaxxin tuj cyaˈj,” katzen jax e jaxxin tuj cyaˈj, jax il tiˈj e cuˈtzxin tuj cyaˈj tuj tneel tuˈn tulxin hasta maa twitz txˈotxˈ. ¹⁰ Jaxj xin e cuˈtz tuj cyaˈj bix ul twitz txˈotxˈ, jaxxin o japan tuj cyaˈj cyibajxe twitz cyaˈj, tuˈntzen ttenxin tibajxe cykilca. Mintiiˈ jun lugar mint o tziyˈxin tuj.

¹¹ Yaltzen tiˈj ti japenina jyol “e tzaj tkˈoˈnxin tecˈax taakˈen juun,” jaj ti tten tuˈn takˈanan jun ocslal tuˈn tajben cye niyˈtl ocslal te tajbel cye. O tzaj tkˈoˈnxin te juun cye tuˈn cyajben te t‑xelxin. Bix te juuntl o tzaj tkˈoˈnxin te kˈumlte ti otk tyeecˈa Dios cye. Bix te juuntl o tzaj tkˈoˈnxin tuˈn tcub cycˈuˈj kej xjal yaaˈn ocslal tuˈn cyocslan. Bix te juuntl o tzaj tkˈoˈnxin te yecˈlecte cye xjal bix te xnakˈtzal ti japenina tyol Dios. ¹² Bix otzen tzaj tkˈoˈnxin cyaakˈen te cykilca, tuˈntzen cyonen cye niyˈtl ocslal tuˈn cyajben tuj taakˈen Dios, bix tuˈntzen cyajben tuˈn ttzket cynaabl ke t‑xjal Cristo. ¹³ Katzen najben kaakˈen te jaca juun te tajbel te cabtl, ko pomeltzen maje junx tuj kocslabl, bix qˈuelel kniyˈ tiˈ Tcwal Dios, bix ctzketeltzen knaabl, hasta ojxe tpon knaabl tisenj te Cristo tnaabl. ¹⁴ Oj ttzket knaabl juˈwa, waˈlxixse koˈ tuj kocslabl. Yaaˈntzen tisen jun neeˈ koˈ mintiiˈ tipen oj tul juntl xjal ẍbiˈl tuya jun acˈaj t‑xnakˈtzbil te yaˈlcˈate ke. Katzen yaaˈn waˈlxix koˈ tuj kocslabl, bixsen qˈuiyel tiken jt‑xnakˈtzbil ejooˈ tuˈn kpon tuj il, tisen jun cykˈiˈk niyˈ tiken jun tiiˈ tuˈn tpon t‑xooˈn nakch. ¹⁵ Miˈn kbinche tisen kej ẍtakˈ xjal, sino cxeˈlxix kkbaˈn alcyej jaxxix. Bix oj t‑xiˈ kkˈumen, il tiˈj tuya jun tkˈakˈbil kcˈuˈj. Ka nbint kuˈn juˈwa, ctzketeltzen knaabl tisenj te Kaaw, ja Cristo. ¹⁶ Jaxin tisen kwiˈ, bix ejooˈ t‑xjalxin tisen t‑xumlalxin. Ja kwiˈ ncawen ti cbinel tuˈn kxumlal. Bix tecˈax juun iken tuˈn kxumlal najben jaaˈ tuˈn tajbeˈna. Ka najben jaca juun iken tuˈn kxumlal, n‑onentzen te juntl, bix baˈntzen taˈ kxumlal juˈwa, bix ntz̈ˈiytzen. Juˈxse te ke ejooˈ ocslal. Oj najben jaca juun ke, ejooˈ ocslal, cye niyˈtl ocslal tuyaj kaakˈen o kiikˈ tuˈn Kaaw, jatzen n‑oc kˈakˈen tcˈuˈj jun tiˈ juntl, bix ko cywixeltzen tuj kocslabl.

Tej kocslan tiˈ Dios, e tzaj tkˈoˈn Dios jun acˈaj kchunkˈlal

¹⁷ Entonces, key hermano, tuˈn tcawbil Kaaw cxeˈl nkbaˈna cyey tuˈn miˈn cybinchatla tisen kej xjal yaaˈn ocslal tiˈ Dios. Ejeeˈ tzunja mintiiˈ tajbel cynaabl twitz Dios, ¹⁸ bix min tzˈel cyniyˈ tiˈj ti taj Dios. Bix nakchxsen eteˈ tiˈ Dios. Nuk mos̈ taˈ cynaabl tuˈn cyxiˈ tuj be jiquen, cuma nuk oˈcx tuj be kaˈ ncheˈxa. ¹⁹ Ya mintiiˈtl cychˈixew oj nbint il cyuˈn. O tzˈoc cykˈon cyiib te nuk tikˈch cyaj. Min nchi weˈ tuˈn nuk nchi yaẍen cyuya nuk alkˈch xjal. ²⁰ Katzen ejeeˈy ocslal nbint cyuˈna juˈwa, pero yaaˈn te Cristo kbalte tuˈn tbint cyuˈna juˈwa. ²¹ Ka o tzˈel cyniˈya tiˈj jaxxix e cyaj t‑xnakˈtzaˈn Jesús bix e cyaj tyeecˈanxin tej ttenxin twitz txˈotxˈ, bix ka cyaja cheˈx lpey tiˈ tyolxin, ²² cykˈoncjtzen tisenj cytena nejl. Ya miˈntzen chi jyontla tiˈj tikˈch e cyajbey nejl, cuma puro tzˈil ootxa cychunkˈlala. Niyˈj cyachbila nejl nuk te sbulte cyey tuˈn cyxiˈy tuj il. ²³ Il tiˈj cychˈixpum cynaabla tuˈn toc te acˈaj. ²⁴ Tej cyocslana tiˈ Dios, e tzaj tkˈoˈn Dios cyey jun acˈaj cynaabla. Ja tzunj acˈaj cynaabla tisenj tnaabl Dios, bix jiquen bix sakxix bix tbanelxix tnaablxin. Iltzen tiˈj tuˈn tel cyxooˈna jkˈanak bix tuˈn cyocxa tuj acˈaj.

²⁵ ¿Titzen tten tuˈn cyocxa tuj acˈaj cynaabla? Il tiˈj cyjel cykˈoˈna cyẍtakˈbila. Oj cyyolena cyuya ke cyuyey, pero tujxix tumel bix jaxxix cyyola, cuma ka nchi ẍtakˈena, biˈx chi xeˈl xitja tuj cymojbabl cyiiba.

²⁶ Bix ka ma chi jaw kˈojla, miˈn cyakˈa amleˈn te cykˈoja, sino cybinchaˈy tuˈn tbaj tilel tex kˈij. ²⁷ Katzen tzinxa chi kˈojla, nxiˈtzen cykˈoˈna amleˈn te taaw il tuˈn tcaman cyiˈja.

²⁸ Bix kej o chi alkˈan, miˈntzen chi alkˈantl. Baˈn tuˈn cyakˈanana tuj tumel tuˈn cyitzˈja, bix tuˈn t‑xiˈ cyonena juntl xjal pena n‑itzˈja.

²⁹ Ojtzen cyocxa tuj acˈaj cynaabla, miˈntzen cyyoley xmeletzˈtzen yol, sino chi yolela tujxix tumel, tuˈntzen tajben cyyola cye kej nchi oc ebinte.

³⁰ Miˈn cub cykˈoˈna Espíritu Santo tuj bis. At Espíritu Santo te Dios cyuyey te techel ejeeˈy t‑xjal Dios, bix najben tuˈn tzinen taˈ tuˈn cycoˈpja tuˈn Dios te junx maj oj tpon alcye kˈij tuˈn kcoˈpj. ³¹ Cybajsancˈaja cyiicˈbila bix jtikˈch cykˈoja, bix cys̈itz̈ˈbila, bix jkaˈ cyyola tzin cykbaˈna tiˈ juntl xjal. ³² Miˈntzen cybinchay jlu, sino tkˈakˈbil cycˈuˈja tiˈ cyuyey cbinel cyuˈna, bix qˈuelel cyniˈya tiˈj ti ilel taˈ juntl. Cwel cynajsaˈna til juntl cyuyey, tisen o cub tnajsaˈn Dios ke kil tuˈn tcyimlen Cristo.

Ti tten kchunkˈlal ejooˈ ocslal

5  E cub tnajsaˈn Dios cyey cyil, bix ejeeˈy tcwal Kman Dios. Juˈ tzunj cycnomale tuˈn tcub cynajsaˈna cyil xjal, cuma tcwal Dioskey. ² Juch cycˈuˈja tiˈ cyuyey, tisen te Cristo oc juch tcˈuˈjxin kiˈj. Tuˈn tkˈakˈbil tcˈuˈjxin kiˈj, oc tkˈon tiibxin kiˈj bix e cyimxin te kxel tuˈn kil. Tcyimlenxin te jun oybil twitz Dios, bix baˈn eˈla twitz Dios, tisen baˈn n‑eˈla jun cˈocˈsbil cˈoˈcj twitz jun xjal.

³ Yaltzen tiˈj achbil te aj pajlel, miˈntzen cybinchaja cyxola. Bix miˈntzen tzˈoc cyachena jte cyuyey at. Kej xjal ocslal mlay cybinchatl kej kaˈ juˈwa. ⁴ Bix miˈn chi yolena tiˈ jun chˈixbajil yol bix miˈn cyyoley tiˈ yol mintiiˈ tajbelel, bix miˈn chi yolena tuya jawnex yol nuk nxiˈ xeˈt nuk te cynimbil cyiiba twitz cyuyey tajbelel, sino cyyeeqˈuey cyyola ejeeˈy jun wik xjal nkˈonte chjonte te Dios. ⁵ Cytzkiˈna kej xjal nchi yaẍen cyuya pajbaj bix kej nchi yolen tzˈil yol, bix kej nuk tikˈch cyaj tisenxsen nchi niman twitz sant, ejeeˈ tzunja mintiiˈ tuˈn cykaben tuj lugar jaaˈ nchi cawena Cristo tuya Kman Dios.

⁶ Attzen juun xjal tzin cykbaˈn baˈn tuˈn tbint cykilj lu cyuˈn. Pero miˈn chi cub sbuˈna cyuˈn, cuma ke cyej n‑el iiqˈuente Dios chi oqueltzen tuj jun nintzaj castiwa oj ttzaj tkˈoj Dios. ⁷ Juˈ tzunj miˈntzen chi cub majey cyuya kej xjal tzin cykbaˈn jlu. ⁸ Nejl eteˈ tzuna tuj klolj, cuma min el cyniˈya tiˈj ti tten tuˈn t‑xiˈ cyiiˈna jun cynaabla jiquen. Pero yaltzen jaˈlewe, eteˈ tzuna tuj spiˈyen, cuma ya ocslal tzunkey tiˈ Kaaw bix n‑eltzen cyniˈya tiˈj ti tajxin. Juˈ tzunj chi tencˈaxixa tuj tumel, cuma ya eteˈy tuj spiˈyen bix yaaˈn tuj klolj. ⁹ Ka eteˈy tuj spiˈyen, kˈiˈntzen jun cynaabla baˈn, bix jiquenxix chi beteley, bix jaxxix chi yoleley. ¹⁰ Cˈoquelxix cycˈuˈja tiˈj tuˈn tbint cyuˈna jaj qˈuelel baˈn twitz Kaaw. ¹¹ Miˈn chi cub tena cyuya kej eteˈ tuj klolj oj nchi binchan jun yaaˈn baˈn min tzˈajben, sino cxeˈlxix cyiiˈna tuj tumel. Katzen tuj tumel kˈiˈn cyuˈna cywitz, cchicˈajaxeltzen cynaabl kej lu yaaˈn baˈn. ¹² Kaˈxsen jnbint cyuˈn tuj ewjel, hasta jun kchˈixew n‑el kiiˈn ka nko yolen tiˈj nbint cyuˈn. ¹³ Pero oj t‑xiˈ cyiiˈna jun cynaabla jiquen, bix cˈoquel maje cynaabla tuya cynaabl kej nbint kaˈ cyuˈn tuj ewjel, cchicˈajaxeltzen cynaabl yaaˈn jiquen, tisentzen tuj spiˈyen nchicˈajaxtzen ti jilel at. ¹⁴ Tzin tkbaˈn tyol Dios cyjulu: “Ejeeˈy min tzˈel cyniˈya tiˈj, cycˈasem cyiiba, bix chi weyˈtza bix cypaˈmel cyiiba cyiˈkej eteˈ tuj klolj, bix Cristo cjkolte cynaabla tuˈn tel cyniˈya tiˈj,” tz̈i tyol Dios.

¹⁵ Entonces, key hermano, cybisenx tiˈj ti tten tuˈn cybeta tuj tumel. Miˈn chi oca tisen min tzˈel cyniˈya tiˈj, sino qˈuelel cyniˈya tiˈj. ¹⁶ Cybinchama jun baˈn looj lux tyem ata, cuma nim tkaˈyel nbaj jaˈlewe. ¹⁷ Juˈ tzunj miˈn chi oca tisen mintiiˈ tumel cyuyey tiˈj nbaj jaˈlewe, sino cykˈoˈnc cycˈuˈja tiˈj tuˈn tel cyniˈya tiˈj ti taj Kaaw tuˈn tbint cyuˈna te ja tyem jaˈlewe.

¹⁸ Oj n‑oc jun xjal te bola tuˈn vino, ja vino ncawen tibaj, bix nxiˈ tnaabl tuj il tuˈn. Juˈ tzunj miˈnxit cawen vino cyibaja, sino jaxit Espíritu Santo cawen cyibaja. ¹⁹ Ka eteˈy tjakˈ tcawbil Espíritu Santo, chi bitzela cyxola te Kaaw tiˈ jun bitz tuya cykil cycˈuˈja bix tuya jun tzalajebl ntzaj itzˈj tuj cyanema tuˈn Espíritu Santo. ²⁰ Bix tiˈ tbi Kaaw Jesucristo cxeˈl cykˈoˈna chjonte te Kman Dios tiˈ cykilca.

Ti tten tuˈn tten kmojbabl kiib tuj kja

²¹ Bix cxeˈl cyyeecˈana cynimbila cye xjal tuˈnj nchi nimena twitz Cristo.

²² Key hermano, cxeˈl nkbaˈna chˈin cyey tiˈj ti tten tuˈn t‑xiˈ cyyeecˈana cynimbila cye xjal.

Key xuuj, cxeˈl cycuyana alcye tkba cychmila, tuˈntzen t‑xiˈ cyyeecˈana cynimbila twitz Cristo. ²³ Tisenx ja Cristo ncawen kibaj ejooˈ ocslal, jaxsen juˈx at tcawbil jun xinak tibaj t‑xuˈl. ²⁴ Il tiˈj jacˈa chi niman ke xuuj twitz cychmil tuj cykilca, tisen ejooˈ ocslal n‑oc kbiˈn Cristo.

²⁵ Yaltzen cyey xinak, cˈoquel cyakˈ cyxuˈla cyey, tisenxj oc cyakˈ ocslal te Cristo. Jaxin jun yecˈbil te ke ti tten tuˈn toc takˈ jun xjal ke. Oc tkˈon tiibxin kuya hasta e cyimxin kiˈj, ²⁶ tuˈntzen tel txjet kil kiˈj, tisen tzin tkbaˈn tyol Dios, bix tuˈntzen koc te t‑xjal Dios. ²⁷ Juˈtzen tzin bint kten tuˈnxin, tuˈntzen alcye jun kˈij ko pomel twitzxin mintiiˈ ktzˈilel, bix sakxix te junx maj. Ko oquel tisen jun oybil mintiiˈ tpaltel.

²⁸ Juˈ tzunj, key xinak, tisen cyey cˈojlaˈn cyxumlala cyuˈna, jaxsen juˈx cycˈojlay ke cyxuˈla. Jxinak n‑oc takˈ tiib te, jax juˈx n‑oc takˈ t‑xuˈlxin texin, cuma t‑xuˈlxin tisenx ja t‑xumlalxin. ²⁹ Min‑al xjal n‑el iiqˈuente t‑xumlal, sino nuk oˈcx n‑oc tcˈaˈchen bix n‑oc tcˈojlaˈn. Juˈxsen ncˈojlan Cristo kiˈj, ejooˈ t‑xjalxin, ³⁰ cuma tisen t‑xumlalxin koˈ. ³¹ Cycyeˈyenc ti toc tuˈn ootxa tyol Dios. Tz̈i cyjulu: “Oj tpon tumel tuˈn tmaje jun xinak tuya t‑xuˈl, mintiiˈxix tuˈn tnajantl tuya tman bix tuya ttxu, sino ya at tuˈn tnajantl tecˈax tuya t‑xuˈl, bix cycaˈbel chi oquel te junx xumlalbaj,” tz̈i tyol Dios. ³² Ja yol lu tuj ewjel taˈ chˈin bix min chicˈajax cykilca ti japenina nejl. Pero yaltzen jaˈlewe jawnexsen japenina te ke. Tuj nwitza nyolen ja yol lu tiˈj tmojbabl tiib Cristo cyuya ke t‑xjal. ³³ Pero jax juˈx nyolen ja yol lu tiˈj ti tten tmojbabl tiib jun xinak tuya t‑xuˈl. Juˈ tzunj, key hermano, il tiˈj cyey xinak tuˈn toc takˈ cyxuˈla cyey tisen n‑oc takˈ cyiiba cyey, bix cyey xuuj tuˈn t‑xiˈ cynimana cychmila.

6  Yaltzen ejeeˈy cwal, cxeˈl cybiˈna cymana, tuˈntzen t‑xiˈ cyyeecˈana cynimbila twitz Kaaw, tuˈntzen cytena tujxix tumel. ² Jtneel tcawbil Dios tuj Laaj Mandamyent tuya jun cotz tuˈn Dios ka nbint cyuˈn xjal, ja tzunja lu: “Cxeˈl cynimana cymana bix cytxuy. ³ Ka ma bint cyuˈna juˈwa, chi temela tuj ttz̈yal twitz txˈotxˈ, bix nim tken cytyema at,” tz̈i Laaj Mandamyent.

⁴ Yaltzen cyey mambaj bix txuybaj, yaaˈn tumel tuˈn cyoc tena cyakwusalte ke cycwala tuya jun cawbil yaaˈn tuj tumel, sino cytz̈ˈis̈ecke tuya jun cawbilcye tujxix tumel, bix chi xeˈl cyxnakˈtzaˈna tuˈn cyxiˈ lpe tiˈ Kaaw.

⁵ Yaltzen cyey akˈanal tjakˈ tcawbil jun patrón, cxeˈl cybiˈna cypatróna tiˈ cyaakˈena. Chi nimela twitz cypatróna, bix chi akˈanala tuya cykil cycˈuˈja tisenxsen nchi akˈanana tjakˈ tcawbil Cristo. ⁶ Chi akˈanala baˈn yaaˈn nuk oˈcx oj at cypatróna te cyeyˈlte cyey, sino seyˈx chi ocaley, tisexsen nchi akˈanana twitz Cristo. Chi akˈanala tuya cykil cycˈuˈja, cuma juˈ taj Dios tuˈn cyakˈanana. ⁷ Cykˈoˈnc cyipey tiˈj tuˈn cyajbena te cypatróna, tisenxsen nchi akˈanana tuya Kaaw bix yaaˈn nuk jaj nchi akˈanana cyuya xjal. ⁸ Cytzkiˈntla alcye jun kˈij jaca juun xjal ctcaman jun tcotz tkˈaˈ Kaaw laˈ alcye akˈuntl otk bint tuˈn, atle tpatrón, minlen‑al tpatrón.

⁹ Yaltzen ke cyey patrón, jax juˈx baˈnx cyseˈy cynaabla cye cy‑akˈanala. Cykˈoncj cyiw cynaabla cyiˈ ke cy‑akˈanala. Cˈulel tuj cycˈuˈja yaaˈn nuk oˈcxcˈa ke cy‑akˈanala eteˈ tjakˈ tcawbil Kaaw at tuj cyaˈj, sino cyuyaxa eteˈy tjakˈ tcawbilxin. Chi elela junx cyuya cy‑akˈanala twitzxin, cuma tuj twitzxin min‑al jun mas nintzaj twitz juntl.

Juˈtzen tten tuˈn t‑xiˈ cyyeecˈana cynimbila cyxola.

Kej macbil ntzaj tkˈoˈn Dios ke tuˈn kkˈojl cyuya kej biman

¹⁰ Tuˈntzen tpon baj twiˈ nyola cyey, key hermano, cxeˈl nkbaˈna cyey ti tten tuˈn cyxcyey tibaj kaˈ. At cymojbabl cyiiba tuya Kaaw. Nimxsen tipemalxin at. Bix cuma at cymojbabl cyiiba tuyaxin, juˈ tzunj at tipemalxin te cyey tuˈn cyxcyey tibaj kaˈ. Tzˈajbentzen tipemalxin cyey. ¹¹ Tisen jun soldado te twitz txˈotxˈ ikenxsen tbanel t‑xbalen bix tmacbil tuj kˈoj, jaxsen juˈx cyey. Jax cyikem cyey jtbanel tipemal Kaaw tuˈn tajben cyey tuˈntzen cyweˈxixa twitz taaw kaˈ oj cyoca tuj niyˈbebl tuˈn, tuˈn tbint kaˈ cyuˈna. ¹² Oj kkˈojl, yaaˈn cyuya xjal, sino cyuya kej biman, jawnexsen cyipemal. Min chicˈajke, bix nim cybaj. Ejeeˈtzen bimanja eteˈ twitz cyaˈj tuj klolj. Bix nchi cawen tuˈn tbint kaˈ twitz txˈotxˈ, bix nimxsen pomnina baj cyilbil tiˈj tuˈn cycaman cyibaj xjal twitz txˈotxˈ. ¹³ Juˈ tzunj il tiˈj binne cytena tuyaj tipemal Kaaw tzin tkˈoˈn Dios cyey. Katzen binne cytena juˈwa, baˈntzen cypantey oj tpon jun kˈij nojne tuya kaˈ cyiˈja. Mintzen otk chi iyˈ tzˈaka oj tbaj twiˈ cykˈoja tuya kaˈ. ^14-17 Juˈ tzunj, key hermano, chi ajbenxit jcymacbila tzin tkˈoˈn Dios cyey, tisen nchi ajben cymacbil soldado tuj kˈoj tuˈn cycaman. Jun soldado n‑oc tsinch tcˈuˈj tuˈntzen tbint tkˈojl. N‑oc xcbil ttziiˈ t‑xuucˈ tuˈn miˈn tzˈocx twiˈ espada tuj. Toc t‑xaab tbanel tuˈn miˈn cub tuj kˈoj. Kˈiˈn jun makbil tuˈnxin tuˈn miˈn tzakˈxin cyuˈn tbakˈ scopet oj cyoc xeˈt tiˈ tanemxin. Cjawex tpasbil tisen joˈs̈ tuyax te maksbil twitz te colbil twitz tuˈn miˈn tzakˈ cyuˈn tbakˈ scopet. Bix kˈiˈn tspada tuˈn tuˈntzen t‑xcye tuj kˈoj. Ejeeˈ tzunj lu najben cye soldado tuˈn cykˈojl cyuya enemiwa.

Yaltzen cyey cymacbil oj cykˈojla cyuya biman, ejeeˈ tzunj lu. Jaj nchi yolena jaxxix. Bix jaj kˈiˈn cyuˈna jun cynaabla jiquenxix. Bix jaj n‑el cyniˈya tiˈj tzul Kaaw te cawel twitz txˈotxˈ tuˈn tten twitz txˈotxˈ tuj ttz̈yal. Bix jaj n‑oc ke cycˈuˈja tiˈ Dios, tuˈn tweˈ jcyniyˈbebl biman n‑oc cyxooˈn cyiˈja tisen tbakˈ scopet. Bix jaj cytzkiˈntla o tcol Dios ejeeˈy tuj tkˈab taaw il. Bix jaj tyol Dios najben cyey tuˈn cyxcyey tiˈj niyˈbebl ntzaj cyiˈja tuˈn taaw il. Ejeeˈ tzunj lu te cymacbila tuˈn tajben cyey tuj cykˈoja cyuya ke biman.

¹⁸ Tuj cykilca ti nbaj, chi naˈla Dios, bix tuya tonbil Espíritu Santo te cyey. Oj cynaˈna Dios, nchi binchama tisenxsen nchi itzˈleˈna cyiiba, bix cypaˈxixa tuj kˈoj. Bix yaaˈn nuk cyiˈjquey chi naˈla Dios, sino tuyax tiˈ cykilca ocslal.

¹⁹ Ojtzen cynaˈna Dios, key hermano, tuyax wiˈja, tuˈntzen at nim tipemal nyola oj t‑xiˈ nkˈumena cye xjal j‑eˈwen nejl pero ya o chicˈajax tuˈn Dios. Bix waja tuˈn cynaˈna Dios wiˈja tuˈntzen mintiiˈ ttz̈i wiˈja oj t‑xiˈ nkˈumena. ²⁰ Bix tuˈnj o txiˈ nkˈumena tiˈj o tyeecˈan Dios weya, juˈ tzunj ntiina tuj tzeeˈ. Juˈ tzunj chi naˈna Dios wiˈja tuˈntzen ttzaj tkˈoˈn Dios t‑xtalbil wibaja, tuˈntzen mintiiˈ ttz̈i wiˈja te kbalte tyol Dios mas.

Jun kˈolbebl tuˈn Pablo te mancˈbil yol

²¹ Yaltzen weya, miˈn txiˈ nkbaˈna tuj ja wuˈja lu ti nbaj weya, cuma jxin Tíquico cpomel cyxola, bix oj tponxin, ja tzunxin pjel kˈumentexin cyey ti nbaj weya tzalu. Nim n‑oc takˈ Tíquico weya, bix nim najbenxin weya tuj taakˈen Kaaw. ²² Ttzkiˈnxin cykilca ti nbaj wiˈja, bix juˈ tzunj cxeˈl nsmaˈna xina cyuyey, tuˈntzen t‑xiˈ tkˈumenxin cyey tiiˈn ntena bix tiiˈn cyten wuyena. Oj cybintey tiiˈn etoˈya tzalu, bixsen chi jaw tzalaja.

²³ Key hermano, chi tenxita tuj ttz̈yal tzin tkˈoˈn Kman Dios tuya Kaaw Jesucristo cyey, bix cyuˈnxit‑xin at tkˈakˈbil cycˈuˈja tiˈ niyˈtl ke hermano tuˈnj cyocslabla tiˈ Dios bix tiˈ Kaaw. ²⁴ Tenxit t‑xtalbil Dios cyibaj cykilcakey jn‑oc takˈ Kaaw Jesucristo cyey tuya jun tkˈakˈbil cycˈuˈja jax.

Oˈcx nyolja.