Chronological

Jun uˈj e cub ttzˈiˈben Pablo cye ocslal tuj tnom Colosas

Jun kˈolbebl tuˈn apóstol Pablo

1  Inayena Pablo. Dios o scyˈonte weya tuˈn wajbena te jun t‑xel Jesucristo. At hermano Timoteo wuyena. ² Nxiˈ ntzˈiˈbena ja uˈj lu te cyey ocslal tuj tnom te Colosas, ejeeˈy hermano cyiw eteˈy tuj cymojbabl cyiiba tuya Cristo, jxjal e tscyˈo Dios tuˈn tcawen. At‑xit t‑xtalbil Kman Dios cyibaja, bix tzajxit tkˈoˈnxin cyey tuˈn cytena tuj ttz̈yal.

Tej tnaˈn Pablo Dios cyiˈj ocslal

³ Jaca maj oj nchin naˈna Dios, Tman Kaaw Jesucristo, nxiˈ nkˈoˈna chjonte texin cyiˈja. ⁴ Nchin kˈona chjonte texin, cuma ma nbiˈya ma tzˈoc ke cycˈuˈja tiˈ Cristo Jesús, bix cuma n‑oc cyakˈ cykil ocslal cyey. ⁵ Bix chjonte te Dios at jun baˈn te cyey kayon cyiˈja tuj cyaˈj. Tpocbalj tbanel e cub cybiˈna tej tpon jaxxix yol tiˈj colbil cyey cyxola. ⁶ Bix tisen ma pon pocbablte colbil cyey cyxola, jax ma pon tuj nimtl tnom. Bix tisen jawne njaw tz̈ˈiy jun awal, jaxse juˈx ntz̈ˈiy tyol Dios tuj cykilca twitz txˈotxˈ. Bix jaxse juˈx cyxola, jatxe tej cybintiya jjaxxix yol tiˈj colbil cyey, bix el cyniˈya tiˈj ka jaxxix, otzen cub cychˈixpuˈna cynaabla.

⁷ Ja tzunj baˈn xnakˈtzbil lu tiˈj colbil cyey, jaj xin Epafras e pon kˈinte cyey. Jaxin jun wuyena tuj taakˈen Cristo. N‑oc takˈxin weya, bix nakˈananxin cyiw tuj taakˈen Dios. Ma tzˈajbenxin te jun nxela baˈn tuj akˈuntl cyxola. ⁸ Bix ma tzaj tkbaˈnxin weya nim n‑oc cyakˈ niyˈtl ocslal cyey, cuma at Espíritu Santo cyuyey.

⁹ Yal weya, jatxe tej nbintiya e cyocslay Cristo, min ma cyaj nkˈoˈna tuˈn nnaˈna Dios cyiˈja. Nchin kanena texin tuˈn tel cyniˈya tiˈj tajbilxin tuˈnj cyilbila kˈoˈn tuˈn Espíritu Santo bix tuˈnj ti tten tuˈn tel cyniˈya tiˈj alcyej jaxxix bix alcyej ẍtakˈ, ¹⁰ tuˈntzen t‑xiˈ cyiiˈna cychunkˈlala baˈnxix twitz Kaaw, tuˈn ttzalajxin cyiˈja tuj cykilca nbint cyuˈna. Nchin kanena texin tuˈn cybinchana baˈn cye cabtl, bix tuˈn tel mas cyniˈya tiˈjxin. ¹¹ Nimxsen tipemalxin, bix nchin kanena texin tuˈn cycywixa tuˈn jawnex tipemalxin, tuˈntzen cyweˈxixa tuya pasyensya bix tzalajebl oj n‑oc qˈuixcˈaj cyiˈja. ¹² Bix nchin kanena te Kman Dios tuˈn cykˈontiya chjonte texin tuj cyanema. Tuˈnxin ma ko chˈixpet, tuˈntzen at koclen tuˈn kiikˈente kkab ctzaal tkˈoˈnxin te ke, ejooˈ ocslal. ¹³ Ma ko etz tiiˈnxin tjakˈ tcawbil taaw il, bix ma cub tkˈoˈnxin ejooˈ tuj tcawbil Tcwalxin, jxin Cristo n‑oc takˈ texin. ¹⁴ Nuk tuˈn tcyimlen Tcwalxin ma chjet kil bix ma cub najset.

Ma bint kten tuya Dios tuˈn tcyimlen Cristo twitz cruz

¹⁵ Key hermano, ja tzunj xin Tcwal Dios lu tzin techlaˈn te ke tiiˈn Dios, cuma min chicˈaj Dios. Mas jawnex Tcwal Dios cyxol cykilca xjal bix at‑xin tibaj cykilca. ¹⁶ Mas jawnexxin, cuma tuˈnxin e bint cykilca at. E tbinchaxin cykilca at twitz cyaˈj bix cykilca at twitz txˈotxˈ. E tbinchaxin cykilca chicˈaj bix cykilca yaaˈn chicˈaj. Kej nejenel aj te tuj cyaˈj bix alcyejtl‑le nchi cawen, e tbincha Tcwal Dios cykilca. Jaxin binchalte cykilca at, bix cykilca at te tajbel texin. ¹⁷ E tenxin tuj tneel tej mitknaˈx tbint twitz cyaˈj bix twitz txˈotxˈ, bix tuˈn tipemalxin at cykilca tuj tumel. Kˈiˈn tuˈnxin cykilca at. ¹⁸ Bix tisen ncawen kwiˈ tibaj kxumlal, juˈtzen nejenelxin kibaj cykilca koˈ ocslal. Bix jaxin tneel xjal tuˈn tjatz itzˈj juntl maj tuj cyamecy te junx maj, tuˈntzen tocxin te Cawel tibaj cykilca, hasta tibaj cyamecy. ¹⁹ Tzin techlaˈnxin tiiˈn Dios, cuma e tajbe Kman Dios tuˈn tkˈoj texin cykilca tipemal bix tnaabl Dios. ²⁰ Bix e tajbe Dios tuˈn tten cykilca at twitz cyaˈj tuyaj cykilca at twitz txˈotxˈ tuj ttz̈yal tuya Dios nuk tuˈn Cristo. Bix tuˈn tcyamecyxin twitz cruz e bint tuˈn Dios tuˈn tbint kten tuya Dios.

²¹ Yaltzen cyey, nejl cycyˈiy Dios. Oc cykˈoja tiˈjxin tuj cyanema, bix nuk kaˈ e cybinchay. ²² Pero amale aj iletkey nejl, pero jaˈlewe ma bint tuˈn Dios tuˈn tbint cytena tuyaxin. Tuˈn tcyamecy Tcwalxin tej toc te xjal, chi pomela sakxix bix mintiiˈ cyila bix mintiiˈ cypalta twitzxin. ²³ Pero chi pomela nuk ka wiˈlxix cyocslabla tiˈ Cristo bix ka min cyaj cycyeˈyena tuˈn cyayona tiˈj tbanel ctzaal tkˈoˈn Dios cyey. Ja yol lu tiˈj colbil cyey ma tzˈoc cybiˈna, jaxj yol nkˈumj tuj cykilca twitz txˈotxˈ. Tuˈn t‑xiˈ npocbaˈna ja yol lu e tscyˈo Dios inayena.

Jun taakˈen Pablo tuˈn tajben cyxol ocslal

²⁴ Nchin tzalaja tzalu tuj tzeeˈ, cuma ma takˈ Dios weya tuˈn tiyˈx qˈuixcˈaj wuˈna tuj taakˈen Cristo. Jqˈuixcˈaj niyˈx wuˈna najben tuˈn cytz̈ˈiya tuj cyocslabla, bix n‑el nniˈya tiˈj jniyˈx wuˈna tuj nxumlala cˈajbel cye t‑xjal Cristo. ²⁵ Jweya waakˈen tuˈn wajbena cye t‑xjal Cristo, te cyey ocslal yaaˈn judío, cuma e jaw tscyˈoˈn Dios inayena tuˈn wajbena cyej xjal yaaˈn judío. Tajxin tuˈn tabij tyolxin cyuˈn cykil xjal. ²⁶ Jatxe tuj tneel, eˈwen taˈ ja tyolxin lu cywitz xjal. Pero jaˈlewe, ma yecˈaj te cyej xjal o chi oc te t‑xjalxin. ²⁷ E tajbexin tuˈn tyeecˈanxin cye t‑xjalxin jawnexsen jun xtalbil o baj tnincˈuˈnxin, tuˈn ttzaj tkˈoˈnxin cyexin, judíole, yaaˈnle judío. Bix ja jawnex tyolxin lu eˈwen taˈ nejl, pero chicˈaj jaˈlewe, jaj tuˈn tocx Cristo tuj kanem, tuˈntzen kpon junx tuyaxin tuya Dios.

²⁸ Juˈ tzunj, nuk tiˈj Cristo nchin yolena oj nxiˈ nkˈumena cye xjal. Nxiˈ ncubsaˈna nwitza cye cykil xjal tuˈn cyocslan tiˈjxin, bix tuj tumel nxiˈ nkˈoˈna xnakˈtzbil tiˈjxin cye cykil xjal, tuˈntzen cypon tzˈaklxix twitz Dios tuˈnj cymojbabl cyiib tuya Cristo. ²⁹ Tuˈn cypon tzˈakl, nchin akˈanana cyiw. Nim n‑oc wipena tiˈj, bix ma tzaj tkˈoˈn Cristo tipemal weya tuˈn tbint wuˈna.

2  Jaxte nim n‑oc wipena cyiˈja. Waja tzˈel cyniˈya tiˈj nim nchin naˈna Dios cyiˈja, bix cyiˈj ocslal tuj tnom te Laodicea, bix cyiˈj niyˈtl ocslal min cytzkiˈn nwitza. ² Nbint wuˈna juˈwa tuˈn cycywixa tuˈnj cymojbabl cyiiba oj n‑oc cyakˈ cyuyey cyey. Bix nchin naˈna Dios tuˈn telxix cyniˈya tiˈj jjawnex tumel ma cub tnincˈuˈn Kman Dios. Eˈwen taˈ j‑e cub tnincˈuˈn Dios nejl, pero chicˈaj jaˈlewe, jaj tuˈn cycleta tuˈn Cristo. ³ Jcynaabla taj tzaj tkˈoˈn Dios tisen jun kˈinemal. Pero nuk tuˈn Cristo ccyiikˈela ja kˈinemal lu.

⁴ Ma txiˈ nkbaˈna jlu cyey tuˈn miˈn chi cub tzpeta tuˈnj cyeca xnakˈtzbil, pero ẍtakˈ. ⁵ Tumelte tuˈn t‑xiˈ nkˈoˈna ja yol lu cyey, cuma amale mintn‑al kena cyxola, pero nim nchin labta cyiˈja. Pero jax nchin tzalaja cyiˈja, cuma ma nbiˈya junx taˈ cynaabla bix min ma yucch cyocslabla tiˈ Cristo.

⁶ Cuma o tzˈoc ke cycˈuˈja tiˈ Cristo Jesús, bix ma tzˈel cyniˈya tiˈj jaxin Cawel cyibaja, juˈ tzunj cxeˈl cyiiˈna cychunkˈlala tuya cynimbila tiˈjxin. ⁷ Cyiwxit taˈ cyocslabla tiˈjxin, tisen jun tzeeˈ min yucch ka wiˈlxix tlocˈ tuj txˈotxˈ. Chi tz̈ˈiyxita tuj tyol Dios tuˈnj cymojbabl cyiiba tuyaxin. Cˈoquel cyipena tiˈj tuˈn cyweˈxixa tuj jxnakˈtzbil jaxxix kˈoˈn cyey. Bix nimxix cykˈonxa chjonte te Dios.

Jun acˈaj kchunkˈlal o tzaj tkˈoˈn Cristo

⁸ Key ocslal, cycˈojlanx cyiiba tuˈn miˈn chi cub sbuˈna, cuma at xjal cyaj tuˈn cyoc lpey tiˈj cyex cyxnakˈtzbil. Pero mintiiˈ tajbel bix ẍtakˈ cyxnakˈtzbilxin. Jt‑xeeˈ cyxnakˈtzbilxin nuk cyyol xjal te ootxa bix cynaabl nuk tiˈj tikˈch te twitz txˈotxˈ. Min tzaj cyxnakˈtzbilxin tiˈ Cristo. ⁹ Chi oquel lpey nuk tiˈjxin, cuma jaxin Dios. Tujx t‑xumlalxin at cykilca tipemal bix tnaabl Dios. ¹⁰ Bix cuma at cymojbabl cyiiba tuya Cristo, tetzen junx maj ma kˈoj cychunkˈlala tuˈn Dios. Mintiiˈ juntl. Yaaˈntzen tumel tuˈn cyocxa tjakˈ cycawbil juntl cawel, cuma ja Cristo Cawel cyibaj cykilca cawel. ¹¹ Bix mintiiˈ il tiˈj tuˈn tel keset ttzˈumel twiˈ cytzˈalbila. Nejl, cyxol aj Israel il tiˈj tuˈn tel keset ttzˈumel twiˈ cytzˈalbil. Pero jaˈlewe, ttanem Dioskey tuˈnj tel tiiˈn Cristo jcynaabla kaˈ tej cyocslana tiˈjxin. ¹² Tuˈnj cymojbabl cyiiba tuyaxin, tisencˈa e cuˈx maketkey tuyaxin tej tcyimxin. E cyim jcynaabla aj il tuyaxin. Jax tej tjatz itzˈjxin juntl maj tuj cyamecy, jax tuˈnj cymojbabl cyiiba tuyaxin, tisencˈa e jatz itzˈjkey tuyaxin. Ma kˈoj jun acˈaj cychunkˈlala tuˈnj cyocslana tiˈ Dios, ja Dios e tyeecˈa tipemal tej tjatz titzˈjsaˈn ja Cristo tuj cyamecy. ¹³ Nejl, tisen cyimnekey tuj twitz Dios, cuma e cybinchay il bix cuma yaaˈn t‑xjal Dioskey. Pero jaˈlewe, ma takˈ Dios cychunkˈlala tuˈnj cymojbabl cyiiba tuya Cristo, bix ma cub tnajsaˈnxin cykilca cyila. ¹⁴ Nejl, e tkba ley il tiˈj tuˈn kcyim te junx maj, tuˈn tchjet kcˈasben te Dios tuˈn tlaj kil. Pero jaˈlewe, ma tkba Dios mintiiˈtl kcˈasben, cuma el tiiˈnxin kcˈasben bix aj tkˈoˈnxin tibaj Cristo, tuˈntzen tchjet tuˈn Cristo twitz cruz. ¹⁵ Bix tej tjatz titzˈjsaˈnxin ja Cristo juntl maj tuj cyamecy, el tiiˈnxin tipemal taaw il bix cyipemal cykil biman. E tzaj cychˈixew cywitz cykilca at tuj cyaˈj bix entera twitz txˈotxˈ tej t‑xcyexin cyibaj tuˈnj tjatzlen itzˈj Cristo.

¹⁶ Juˈ tzunj, miˈn txiˈ cykˈoˈna amleˈn cyej xjal cyaj tuˈn cynimana jley te ootxa tzin tkbaˈn alcyej baˈn tuˈn t‑xiˈ cywaaˈna, bix alcyej baˈn tuˈn t‑xiˈ cycˈaˈna, bix alcyekej ninkˈij il tiˈj tuˈn cyiyˈsantey, bix alcyej kˈij xjan tuj xjaw il tiˈj tuˈn cynimana, bix tuˈn cynimana jkˈij te ajlabl. ¹⁷ Tisen n‑ocx nejl tipemal jun xjal tuj jaaˈ twitz, kej ley te ootxa lu ajben nuk tisen jun xlequemal tej at tulel. Pero ma pon baj twiˈ cˈajbela nuk te techel, cuma ma tzul jttxuylal, ja Cristo. ¹⁸ Miˈn tzˈoc cybiˈna kej xjal tzin cykbaˈn min pon cyyola tuya Dios. Mas baˈn tneel juˈ cxeˈl cye ángel, tz̈ike, tuˈn cyyeecˈana ka maanskey. Tzin cykbaˈnxin o tzaj tkˈoˈn Dios jun yecˈbil tuj cywitziyˈxin, bix juˈ tzunj at cyoclenxin tuj cywitzxin tuˈn cycawenxin cyibaja. Pero mintiiˈ cyoclenxin, cuma jncheˈx lpexin tiˈj, nuk ja cynaablxin kaˈ nkbante. ¹⁹ Tisen o chi el txˈomet‑xin tiˈ t‑xnakˈtzbil Cristo. Qˈuelel cyniˈya tiˈj ma tz̈ˈiy jun xumlalbaj bix ttzyun tiib cyuˈn tyakayil nuk oˈcx ka min ma tzˈel txˈomet tiˈ twiˈ. Jax juˈx ejooˈ. Tisen kwiˈ ja Cristo, bix ejooˈ ocslal tisen tocslabl Cristo. Ko tz̈ˈiyal tuj kocslabl tisen taj Dios bix ko temel junx nuk oˈcx ka min ma ko el txˈomet tiˈj t‑xnakˈtzbil Cristo.

²⁰ Ma cyim cynaabla kaˈ tuya Cristo, bix mintiiˈ il tiˈj tuˈn cyxiˈ lpey tiˈj cynaabl xjal te twitz txˈotxˈ tuˈn cyela baˈn twitz Dios. Juˈ tzunj, ¿tikentzen nxiˈ cyiiˈna cychunkˈlala tisencˈa tjakˈx ley te twitz txˈotxˈkey? ²¹ Oj t‑xiˈ cykbaˈn xjal: “Miˈn txiˈ cywaaˈna jlu. Miˈn txiˈ cyniyˈbeˈna jlu. Miˈn tzˈoc cymcoˈna jlu. Xjan kej lu,” tz̈ike ¿tiken nchi cuyana cyuya? ²² Min tzˈajben kej waabj bix kej cˈaabj lu tuˈn tcnet cychunkˈlala te junx maj, cuma oj cyajben kej lu cye xjal, n‑el baj cyipen. Nuk cyxnakˈtzbil xjal kej ley tiˈj alcyej tuˈn t‑xiˈ cywaaˈna bix alcyej tuˈn t‑xiˈ cycˈaˈna. ²³ Tuj cywitza, cyeca kej ley lu. Nchi yolen tiˈj alcyej costumbre tuˈn tbint cyuˈna tuˈn cyela baˈn twitz Dios, bix nchi kˈon tumel tiˈj ti tuˈn tbint cyuˈna tuˈn cyyeecˈan cyiiba cywitz xjal ka maanskey, bix nchi xnakˈtzan il tiˈj tuˈn toc cykˈoˈna castiwa cye cyxumlala. Pero amale baˈnt tcyeˈyenc cyxnakˈtzbil, pero mintiiˈ cˈajbel tuˈn cytzakpeta tiˈj tajbil cynaabla kaˈ.

3  Key ocslal, cuma e jatz itzˈj Cristo juntl maj tuj cyamecy, jax juˈx cyey, tuˈnj cymojbabl cyiiba tuyaxin, o chi jatza tuyaxin tuya jun acˈaj cychunkˈlala. Juˈ tzunj, cykˈoˈnc cycˈuˈja tiˈ Cristo tuj cyaˈj, jaaˈ kˈuklexin tuj tmankˈab Dios. ² Chi jyona alcye taj Dios. Miˈn tzˈoc cykˈoˈna tajbel oˈcx jat te twitz txˈotxˈ, ³ cuma ejeeˈy tisen jun cyimne ma tzakpet tiˈj tikˈch at twitz txˈotxˈ. At cychunkˈlala tuya Cristo. Bix cychunkˈlala acˈaj tuya Cristo, yaaˈn chicˈaj jaˈlewe, cuma eˈwen Cristo tuya Dios. ⁴ Jaxin Kˈol cychunkˈlala te junx maj, bix oj tyeecˈanxin tiibxin juntl maj, cchicˈajaxeltzen ka jawnexsenxin, bix chi temela tuyaxin oj tcawenxin.

Jun ootxa kchunkˈlal bix jun acˈaj kchunkˈlal

⁵ Juˈ tzunj, oj taj cyxumlala jkaˈ, cybyom tzuna ja tajbil lu. Tisen tzunj, ka taj cyxumlala tuˈn cyjyona pajbaj, miˈn cyakˈa amleˈn te cyxumlala. Miˈn chi jaw meltzˈaja xinak tuya xinak, xuuj tuya xuuj. Miˈn nuk tzˈoc takˈ xuuj te xinak, bixse xuuj tiˈ xinak. Miˈn tzˈoc cybiˈna cyxumlala oj taj jcyachbila yaaˈn tumel. Bix miˈn tzˈoc cykˈaˈbena tikˈch at, cuma oj cyaja tikˈch at, bix yaaˈn Dios, tisencˈa nchi nimana cywitz sant. ⁶ Miˈn chi binchana kej il lu, cuma ctzaal tkˈoˈn Dios castiwa cyibaj kej xjal nbint cyuˈn juˈwa. ⁷ Nejl, tej aj ilkey, e bint kej il lu cyuˈna. ⁸ Pero jaˈlewe, ocslalkey. Juˈ tzunj, cykˈoˈncja kej il lu. Miˈn tzaj cykˈoja. Miˈn chi kˈojla cyiˈ xjal. Cybajsancˈaja cyiicˈbila cyiˈ xjal. Miˈn chi yolena kaˈ cyiˈj xjal, bix miˈn tzˈoc cykˈoˈna xmucchbil cye xjal. Miˈn txiˈ cykbaˈna tzˈil yol. ⁹ Bix miˈntl chi ẍtakˈena cyxola, cuma ma chi ela tjakˈ tcawbil cynaabla kaˈ nuk taj tuˈn tbint kaˈ cyuˈna. ¹⁰ Ma kˈoj jun acˈaj cynaabla e bint tuˈn Dios, bix cyakˈanan Dios tuˈn toc ja acˈaj cynaabla lu junx tuyaj texxin tnaabl, tuˈntzen telxix cyniˈya tiˈjxin. ¹¹ Bix cuma at jun acˈaj cynaabla, yaaˈntzen il tiˈj ka aj griegokey bix ka yaaˈn aj griegokey. Judío lokey, yaaˈnle judíokey, jun wikxitl‑le xjalkey, ajnintzle xjalkey, tjakˈle tcawbil juntl xjal eteˈy, cawel lokey, yaaˈn il tiˈj. Nuk oˈcx ja te Cristo il tiˈj. Bix jaxin at cyuya cykil ocslal.

¹² At jun acˈaj cynaabla. T‑xjal Dioskey bix sakxixkey bix n‑oc cyakˈa te Dios. Juˈ tzunj il tiˈj chi yeecˈala cyanema cyiˈ juntl, bix tuˈn cykˈona xtalbil cye juntl, bix tuˈn miˈn jaw cyniman cyiiba, sino tuˈn t‑xiˈ cyiiˈna jun cynaabla maans, bix tuˈn tten cypasensyey. ¹³ Tziyˈx cyuˈna cyxolxa oj at cypaltela. Oj nbinchan jun ocslal jun kaˈ cyiˈja, cynajsam til. Tisen te junx maj ma cub tnajsaˈn Cristo cyila, jax juˈx cyey, cynajsam cyil juntl ocslal. ¹⁴ Bix mas il tiˈj twitzj cykilca, jaj tuˈn toc cyakˈ cyiiba cyey, cuma tuˈn tkˈakˈbil cycˈuˈja ctemel cymojbabl cyiiba. ¹⁵ Cykˈonx cyiiba tuˈn cytena tuj ttz̈yal tuya cykil ocslal, cuma e tscyˈo Dios ejeeˈy tuˈn cytena junx. Bix cykˈonx chjonte te Dios. ¹⁶ Cykˈoˈnc cyipena tiˈj tuˈn tnojxsen cyanema tuya xnakˈtzbil tiˈ Cristo. Tuˈn tbint jlu, cyxnakˈtzam tyol Dios cyxolxa tuya cynaabla, bix cykˈonx cynaabla cyxolxa. Bix oj cybitzena tiˈ salmo bix tiˈ bitz bix tiˈ tyol Dios, chi bitzela tuya nim chjonte te Dios tuj cyanema. ¹⁷ Bix cykilcaj ncub cybinchaˈna bix nxiˈ cykbaˈna, cybinchama tisencˈa tyolel Kaaw Jesúskey. Bix cykˈonxa chjonte te Kman Dios tuˈnxin.

Ti tten tnaabl jun ocslal cyxol xjal

¹⁸ Key xuuj, cxeˈl cyyeecˈana cynimbila twitz cychmila, cuma ocslalkey, bix juˈ taj Kaaw.

¹⁹ Key xinak, cˈoquel cyakˈ cyxuˈla cyey. Miˈn chi yolena cyiw cyexuj.

²⁰ Yaltzen cyey cwal, cxeˈl cybiˈna cymana bix cytxuy tuj cykilca, cuma ntzalaj Dios cyiˈja oj nchi nimana cymana bix cytxuy.

²¹ Yaltzen cyey mambaj bix txuybaj, miˈn tzˈoc cyilena cycwala ka mintiiˈ kaˈ ma bint cyuˈnkˈa, tuˈntzen miˈn baj cycˈuˈjkˈa.

²² Key akˈanal, cxeˈl cybiˈna taaw cyaakˈena twitz txˈotxˈ tuj cykilca. Chi akˈanala tuj tumel yaaˈn nuk oˈcx oj at cypatróna te cyeyˈlte cyey, sino seyˈx chi akˈanala, bix tuya cykil cycˈuˈja. Chi akˈananx yaaˈn nuk tuˈn cyela baˈn cywitz cypatróna, sino tuˈn t‑xiˈ cyyeecˈana cynimbila twitz Dios. ²³ Cykilcaj akˈuntl nbint cyuˈna, cybinchama tuya cykil cycˈuˈja, tisenxsen nchi akˈanana tuya Kaaw bix yaaˈn nuk jaj nchi akˈanana cyuya cypatróna. ²⁴ Amale mint tzin cykˈoˈn cypatróna jun cykaba, pero chi akˈanana baˈn, cuma cytzkiˈntla ctzaal tkˈoˈn Kaaw jun baˈn cychojbila te t‑xel jcyajbela. Ja Kaaw Cristo jxjal nchi ajbena te. ²⁵ Pero kej xjal ma chi binchan kaˈ tuj cyaakˈen, ccyiikˈeltzen jun cycastiwa tuˈn Cristo. Tuj twitzxin min‑al jun xjal mas nintzaj twitz juntl oj t‑xiˈ tcyeˈyenxin cyaakˈen xjal.

4  Key taaw akˈuntl, cykˈonx jun twiˈ cycˈuˈj cy‑akˈanala jiquen, tuˈntzen baˈn tuj twitz Dios, bix ka baˈn akˈanalke, jun twiˈ cycˈuˈj baˈn, cuma cyuyaxa eteˈy tjakˈ tcawbil cypatróna tuj cyaˈj, jaj Dios nxiˈ cyeyente cyey ka ma chi binchana cye cy‑akˈanala tuj tumel.

² Key ocslal tuj Colosas, miˈn cyaj cykˈoˈna tuˈn cynaˈna Dios. Bix chi ximala oj cynaˈna Dios, bix tuya chjonte texin. ³ Bix chi naˈna Dios wiˈja, tuˈn ttzaj tkˈoˈnxin amleˈn weya tuˈn t‑xiˈ nkˈumena jxnakˈtzbil tiˈ Cristo, jaj yol eˈwen taˈ nejl pero chicˈaj tuˈn Dios jaˈlewe. Ntiina tuj tzeeˈ cuma e nkˈumena nejl. ⁴ Juˈ tzunj, chi naˈna Dios wiˈja, tuˈn tchicˈajax ja xnakˈtzbil lu wuˈna, cuma ja weja waakˈen.

⁵ Cxeˈl cyiiˈna cychunkˈlala tuya cynaabla cywitzj xjal min ma chi ocslan tiˈ Cristo. Cyjyonx amleˈn tuˈn cybinchana jun baˈn te cyexin. ⁶ Tisen tzin tkˈoˈn atzˈen ttz̈yal tiˈ waabj, tenxit cyyola tuj ttz̈yal, tuˈntzen cynakˈeta tiˈj tuˈn taj cytzakˈbeˈna te juun xjal tuj tumel.

Jun kˈolbebl tuˈn Pablo cyuya ke tuya cye ocslal aj Colosas

⁷ Yaltzen weya tzalu, cxeˈl ttxˈolbaˈn jxin Tíquico ti ntena cyey. Nim n‑oc takˈxin weya, bix n‑oc ke ncˈuˈja tiˈjxin tuj akˈuntl. Junx nko akˈanana tuj taakˈen Kaaw. ⁸ Nxiˈ nchkˈoˈna jaxin cyuyey tuˈn tel tniyˈxin tiˈj ti cytena, bix tuˈn tcywix cycˈuˈja tuˈnxin. ⁹ Jax juˈx nxiˈ nsmaˈna jxin Onésimo tuyaxin. Aj cytanema ja Onésimo, bix at nim tkˈakˈbil ncˈuˈja tiˈjxin. Nim ma tzˈajbenxin weya. Cxeˈl cykˈumenxin cycaˈbelxin cyey cykilcaj nbaj tzalu.

¹⁰ At Aristarco tuj tzeeˈ wuyena, bix nxiˈ tkˈoˈnxin jun kˈolbebl te cyey. Jax juˈx nxiˈ tkˈoˈn Marcos jun kˈolbebl te cyey. Tcwal titzˈen tman Bernabéxin. N‑ul tuj cycˈuˈja j‑e xiˈ nkbaˈna cyey tuˈn tbint cyuˈna ka ma ponxin cyuyey. Cykˈimxin tuya cykil cycˈuˈja.

¹¹ Jax juˈx junxin Jesús, juntl tbixin Justo, nxiˈ tkˈoˈn jun kˈolbebl te cyey. Cyxol kej ocslal n‑onen wiˈja jaˈlewe tuj waakˈena tzalu tiˈj tuˈn ttz̈ˈiy tcawbil Dios, oˈcx kej oxe xjal lu aj judíoke. Nim ma nimset ncˈuˈja cyuˈnxin.

¹² Nxiˈ tkˈoˈn jxin Epafras jun kˈolbebl te cyey. Aj cytanema jaxin, bix jun t‑akˈanal Cristoxin. Nim nnaˈnxin Dios cyiˈja, tuˈn cykˈon cyiiba tiˈj tajbil Dios, bix tuˈn cyweˈxixa tuj cyocslabla. ¹³ Jax wuˈna, nim nchin labta cyiˈja, bix cyiˈj kej ocslal cyuj tnom te Laodicea bix te Hierápolis.

¹⁴ Jax juˈx nxiˈ tkˈolbeˈn jxin Lucas ejeeˈy, jaj xin kˈanel n‑oc takˈ weya. Bix nxiˈ tkˈoˈn jxin Demas jun kˈolbebl te cyey.

¹⁵ Cykˈonxa jun nkˈolbebla te cyej ocslal najlke tuj Laodicea. Bix cykˈonxa jun nkˈolbebla te Ninfas bix te cyej ocslal nchi chmet tuj tjaxuj.

¹⁶ Najsama, oj tbaj cys̈iˈna ja uˈj lu cyxola, cysmanxa cye ocslal tuj Laodicea, tuˈntzen tjaw cys̈iˈnxin cyxolxin. Jax waja tuˈn tjaw cys̈iˈna j‑uˈj nxiˈ nsmaˈna cye ocslal tuj Laodicea.

¹⁷ Cykbanxa ja nyola lu tej xin Arquipo: “Kˈoˈnc tcˈuˈja tiˈj tuˈn tpon baj jtaakˈena ma kˈoj tey tuj taakˈen Kaaw,” tz̈i cybela texin.

¹⁸ Inayena, Pablo, nxiˈ nkˈoˈna jun nkˈolbebla te cyey, pero yaaˈn jun ntzˈiˈbila ncub tzˈiˈbente, sino inayena tuˈnx nkˈaba. Chi naˈna Dios wiˈja, cuma tuj tzeeˈ ntiiniya. Tenxit t‑xtalbil Dios cyuyey.

Oˈcx nyolja.

Jun uˈj e xiˈ ttzˈiˈben apóstol Pablo tej xin Filemón

Jun kˈolbebl tuˈn apóstol Pablo te Filemón

¹ Inayena Pablo. Lu ken ntiiˈnctz tuj tzeeˈwa tuˈn tlaj tyol Jesús. Bix lu Timoteo, jun ocslal wuya at wuya tuj tnom tzalu. Ma cub ntzˈiˈbena ja uˈj lu te tey, Filemón. Kcaˈbela tuya Timoteo ax kanema tiˈja, bix kuya kiib tuj taakˈen Jesús. ² Bix ma txiˈ kkˈoˈna jun kˈolbebl te Apia, jun ocslal kuya, bix te Arquipo, onl ke tuj taakˈen Jesús, bixsen cye ocslal nchi chmet tjay. ³ Jaxit Kman Dios bix Kaaw Jesús, Scyˈoˈn tuˈn Dios, tzaj tz̈itente cyxtalbilxin bix ttz̈yal cyibaja.

Jun tanema Filemón bix tocslabl tiˈ Kaaw Jesús

⁴ Tzinx nxiˈ nkˈoˈnwe chjonte te Dios tiˈja oj n‑ula tuj ncˈuˈj, ⁵ cuma o nbiya ka a tanema bix kˈuklec tcˈuˈja tiˈ Kaaw Jesús, bix cyiˈ t‑xjal Dios. ⁶ Bix nxiˈ nkanen te Dios tiˈja tuˈn toc tjunena ti jilel jbaˈn tuˈna tiˈ Jesús cyuya ocslal, cuma tey tocslabl juˈx tisenj cye. Tej tuˈn tel niyˈ tiˈj cykilj baˈn ntzaj tkˈoˈn Dios cyej xjal n‑oc cymojban cyiib tuya Jesús, njaw tz̈ˈiyte oj toc kjuna jbaˈn kaakˈen najben te Jesús. ⁷ Nchin tzalajwe tzalu bix ma kewe ncˈuˈj, cuma o nbi tiiˈn tanema cyiˈ xjal, bix ti tten n‑oc tnimsaˈna cycˈuˈj ocslal matzewe.

Tej t‑xiˈ tcubsaˈn Pablo twitz tiˈj Onésimo jaj jun tkˈopaj Filemón

⁸ Juˈ tzunj, amale atet wajwalela tuˈn Jesús tuˈn ncawen tibaja ti pjel tey cuma inayenwe tyolelxin, ⁹ nejl cxeˈl ncubsaˈn nwitz tey tuˈn at tanema. Inayen Pablo, jun tij, toctz tuj tzeeˈ nuk tiˈjcˈa Jesús, ¹⁰ cxeˈl ncubsaˈn nwitz tey tiˈ Onésimo, tkˈopaja. Luxin at wuya tzalu. Jaxin tisen jun ncwal, cuma cyuˈn nyola acˈaj ma jaw itzˈj tanemxin tiˈ Dios, tiˈj ma tzulxin kˈolbel we tuj tzeeˈ.

¹¹ Tej tyem o baj, Onésimo mintiiˈxix ajbeˈnaxin tey. Pero yaltzen jaˈlewe, lu tzunxin najben we, bix nimxsen tajbelelxin tey. ¹² Ma tzˈaj nsmaˈnxin tuyey. Kˈimxin tisecˈax inayen otk chin pon. ¹³ Wajatlewe nuket ata wuya tzalu, bix wajatlewe ma tcyaj Onésimo wuya tzalu te t‑xela, jacˈa tzˈajbenxin we tiˈj lu ken ntiiˈnctz tuj tzeeˈwa nuk tuˈncˈa wocslabl tiˈ Jesús. ¹⁴ Pero mintiiˈwe baˈn toc nbinche, cuma min‑ala at tzalu tuˈn tcuyan tey ja lu. Cuma ka ma tzˈoc ncˈojlaˈnxin tzalu, nuk wuˈnx, yaaˈn tuˈn tey tcˈuˈja. ¹⁵ Cuyamj ti jilel o baj cyjulu. E xiˈ t‑xooˈna tkˈopaja te cab kˈij, tuˈntzen tcamana tiˈ jun ocslal tisen jun titzˈena te junx maj. ¹⁶ Yaaˈn nuk jun kˈopajxin jaˈlewe, sino mas tajbelelxin twitz jun kˈopaj, tisen jun titzˈena n‑oc takˈ tey. Wachexsewe twitzxin. Yaltzen tey, masx baˈn toc takˈxin tey, cuma cˈajbelxin tey, bix tisen jun titzˈena tuj ocslabl. ¹⁷ Juˈ tzunj, ka kuya kiib tuj twitza, jaxse kˈimxin tisenx inayen otk chin pon.

¹⁸ Katzen at o talkˈa tiˈja, ma at cˈasben tey, kˈoncˈax tiˈ nbiya. ¹⁹ Yaaˈn nuk tenwe nyol tiˈj tuˈn nchjonte. Tuˈntzen tcyaj nyol tuj chicˈaj, inayen Pablo ncub ntzˈiˈben ja uˈj lu tuya nkˈab. Yaaˈn jun secrevánt ncub tzˈiˈbente. Cuma e xiˈ nkˈumena tpocbal coˈpbil tey, juˈ tzunj at tcˈasbena we, pero min tzaj nnaˈnwe tey. ²⁰ Jeyˈ, Filemón, jay jun ocslal tiˈ Kaaw Jesús. Bincham xtalbil wiˈj tuˈn tiikˈentey Onésimo tuyaxix cykil tcˈuˈja. Nimsaˈnctzen ncˈuˈj, cuma ocslal koˈ tiˈ Jesús. ²¹ Nxiˈ ntzˈiˈben uˈj tey, cuma kˈuklec ncˈuˈj ka cbinel tuˈna tisenj nxiˈ nkbaˈn tey, bix ntzkiˈn mas cbinel tuˈna twitzj nxiˈ nkanen tey.

²² Nuksama. Bincham chˈin nposada tjay, bix cynaˈm Dios tuˈn wex tzakpet tuj tzeeˈ. Kˈukl ncˈuˈj tuˈn npon canan cyuyey.

Jun kˈolbebl cyuˈn ocslal te Filemón

²³ Epafras, juntl ocslal toctz tuj tzeeˈ, nxiˈ tkˈoˈn jun kˈolbebl tey. ²⁴ Juˈx te Marcos, Aristarco, Demas, bixse Lucas, ejeeˈtzen xinj nchi akˈanan wuya tuj tnom lu, jax nxiˈ cykˈoˈnxin jun kˈolbebl tey.

²⁵ Tzajxit t‑xtalbil Kaaw Jesús cyibaja. Juˈxit tzuna.