Chronological

Yaaˈn baˈn cyyolena kaˈ tiˈ juntl ocslal tiˈj alcye wik twa

14  At juun ocslal tuj cywitz at il tiˈj tuˈn cyniman nim ley tuˈn cyel baˈn twitz Dios. Ncub cykˈoˈn pablte cywa cychiˈ cycˈaˈ, bix nchi niman kˈij te nimbil, amale yaaˈntl il cyiˈj lu tuj twitz Dios. Cyiikˈemke cyxola kej ocslal lu minaˈx tel cyniyˈ tiˈj, pero yaaˈn te cyiilbila tiˈj cynaabl kˈiˈn cyuˈn juˈwa. ² Ja tzunkej ocslal n‑el cyniyˈ tiˈj, cytzkiˈn baˈn tuˈn t‑xiˈ cyniyˈbeˈn cykilca wikan chiˈpj. Pero kej ocslal min tzˈel cyniyˈ tiˈj tzin cykbaˈn kaˈx tej lu, bix juˈ tzunj jacˈa nuk itzaaj jacˈa txiˈ kuˈn. ³ Jatzen ke cyey n‑el cyniyˈ tiˈj baˈn tuˈn t‑xiˈ cyniyˈbeˈna cykilca wikan waabj, miˈn tzˈel cyiiqˈuena kej ncub cybisen yaaˈn baˈn tuˈn t‑xiˈ cyuˈn. Bix jatzen ke cyey ncub cybisena kaˈ tuˈn t‑xiˈ cyniyˈbeˈna cykilca kej lu, miˈn chi yolena cyiˈkej nxiˈ cyuˈn, cuma o tiikˈ te Dios ejeeˈ te t‑xjal. ⁴ ¿Ejeeˈpa tzuna at cyoclen tuˈn cykbantey ka ma tzˈel jun ocslal baˈn twitz Dios bix ka min? Min, cuma j‑ocslal lu te Dios, bix nuk ja te Dios kbalte ka ma tzˈel baˈn bix ka min. Pero miˈn chi labta cyibaj cyuyey, cuma chi elelcye baˈn, cuma te te Dios taakˈen tuˈn cyel baˈn, bix cbinel taakˈenxin tuˈnxin.

⁵ Kej ocslal min tzˈel cyniyˈ tiˈj tzin cykbaˈn at kˈij mas jawnex te nimbil twitz Dios. At juuntl ocslal tzin cykbaˈn cykil kˈij juniyˈ taˈ twitz Dios. Cyiˈj tzunj lu, miˈn tzˈoc cybiˈna ka at xjal cyaj baj cynincˈuˈn alcye baˈn te cyey, sino ejeeˈ cyey kbalte ka cyaja cynimana jun kˈij bix ka min. ⁶ Kej ocslal tzin cyniman kej kˈij mas jawnex tuj cywitz, nbinttzen cyuˈn tuˈntzen cyniman twitz Kaaw. Jax juˈx kej ocslal min cyniman jun kˈij, jax nbint cyuˈn tuˈn cyniman twitz Kaaw. Jax juˈx kej ocslal nchi chyon chiˈpj, pero yaaˈn tuˈn n‑el cyiiqˈuen Kaaw, sino cuma baˈn tuj twitz Kaaw tuj cywitz. Tuj cywitz ja Dios nkˈonte. Juˈtzen nxaˈ cykˈoˈn chjonte te Dios. Bix kej ocslal min txiˈ cychyoˈn chiˈpj, jax juˈxe cyaj cyniman Kaaw, bix jax nxiˈ cykˈoˈn chjonte te Dios tiˈj ntzaj kˈoˈn cye. ⁷ Cykilca koˈ at tzalu tuˈn kajben te Kaaw. Yaaˈn etoˈ tzalu te kajbelel kwitzx. Kchunkˈlal yaaˈn te kex, bix hasta tuyax kcyamecy yaaˈn te kex. ⁸ Tuj cykilca, kchunkˈlal‑le, kcyamecyle, te texin. Ka iˈtzx koˈ bix ka cyimnen koˈ, tuj tcwent‑xin etoˈ. ⁹ Nuk tuˈn tocxxin te Kaaw cykilca koˈ, iˈtzle, cyimnele, e cyimxin bix e jatz itzˈjxin juntl maj tuj cyamecy. ¹⁰ Juˈ tzunj, ¿tumelpa oj nuk nchi txololona tiˈj ti nbint cyuˈn ke cyuyey? ¿Bix tumelpa oj n‑el cyiiqˈuena kej ocslal min tzˈel cyniyˈ tiˈj? Min, cuma cykilca koˈ ko pomel baj twitz Cristo tuˈntzen toc tcyeˈyenxin ejooˈ ka baˈn e bint kuˈn bix ka kaˈ. ¹¹ Jaxte cykilca koˈ ko oquel tuj xkela, cuma tzin tkbaˈn Dios tuj tyol cyjulu: “Jaxte inayena Dios iˈtz, bix jaxte cykil xjal il tiˈj chi oquel nwitza bix chi cwel maje nwitza, bix cykbaˈ weya cyjulu: ‘Jay Dios,’ tz̈i cybel xjal weya,” tz̈i Dios tuj tyol Dios. ¹² Juˈ tzunj, qˈuelel kniyˈ tiˈj te te Dios kkˈaˈ kcwent tiˈj kchunkˈlal, yaaˈn cye ocslal.

Miˈn cub cyxitena jtaakˈen Dios tuj cyanem ocslal

¹³ Juˈ tzunj, miˈn tzˈoc kcyeˈyentl cyiˈ cabtl ocslal laˈ ka nbint baˈn cyuˈn tuj twitz Dios, sino ejooˈj n‑el kniyˈ tiˈj cˈoquel tilel kuˈn tuˈn miˈn bint kuˈn j‑il n‑eˈla tuj cywitzj ocslal min tzˈel cyniyˈ tiˈj, tuˈntzen miˈn cheˈx tuj il. ¹⁴ Ntzkiˈna mintiiˈ chiˈpj kaˈ tuˈn t‑xiˈ chyet, bix tiˈj tzunj lu junx taˈ nyola tuya tyol Kaaw Jesús. Pero ka at jun ocslal nkˈumente at jun wik chiˈpj yaaˈn baˈn tuˈn t‑xiˈ chyet, bix ma txiˈ tchyoˈn, nbinttzen til tuˈn. ¹⁵ Ka ma txiˈ cychyoˈna jchiˈpj mixbe t‑xiˈ chyet tuj twitz juntl ocslal, bix nbinttzen il tuˈn tuˈnj nbint cyuˈna, ntyeecˈantzen min tzˈoc takˈ j‑ocslala cyey. Miˈn txiˈ cytzpetsaˈna j‑ocslal tuˈn tlaj cychiˈy tuˈn t‑xiˈ tuj il tuˈnj cychiˈy nxiˈ cyuˈna, cuma e cyim te Cristo te te. ¹⁶ Amale n‑elet kniyˈ tiˈj cykilca wik chiˈpj baˈn, miˈn txiˈ cychyoˈna cywitzj ocslal min tzˈel cyniyˈ tiˈj, cuma ka ma bint il tuˈn jun ocslal tuˈnj nbint cyuˈna, ckbajeltzen kaˈ e bint cyuˈna. ¹⁷ Miˈn txiˈ cychyoˈna jkaˈ tuj cywitz kej ocslal min tzˈel cyniyˈ tiˈj, cuma tuj tcawbil Dios yaaˈn ja te chiˈpj bix cˈaˈbj il tiˈj, sino ja te il tiˈj, jaj tuˈn t‑xiˈ kiiˈn kchunkˈlal jiquenxix, bix tuˈn kten tuj ttz̈yal, bix tuˈn at tzalajebl ke tzin tkˈoˈn Espíritu Santo. ¹⁸ Katzen juˈ nbint kuˈn, nko ajbentzen te Cristo, bix ctzalajtzen Dios kiˈj, bix ko elel baˈn tuj cywitz xjal. ¹⁹ Juˈ tzunj, cˈoquel kipen tiˈj tuˈn junx ko eˈla kxol tuj ttz̈yal bix tuˈn t‑xiˈ knimsaˈn cyanem ke kuya ocslal. ²⁰ Miˈn cub cyxitena jtaakˈen Dios tuj cyanem ocslal tuˈnj nxiˈ cyuˈna. Jaxte mintiiˈte waabj xjan t‑xiˈ kwaaˈn jaˈlewe, pero ka at juun ocslal chi cwel tzpet tuˈnj nxiˈ cyuˈna, miˈntzen txiˈ cywaaˈna cywitz. ²¹ Mas baˈn tuˈn miˈn txiˈ cychyoˈna chiˈpj, bix mas baˈn tuˈn miˈn txiˈ cycˈaˈna vino, bix mas baˈn tuˈn miˈn txiˈ cywaaˈna alcye juntl wik waabj, twitzj tuˈn t‑xiˈ jun ocslal tuj il tuˈnj cyway. ²² Ja tzunkey n‑el cyniyˈ tiˈj cykilca baˈn tuˈn t‑xiˈ cyuˈna, miˈn chi cub tena txˈolbalte cywitz xjal tiˈ cyway, cuma nuk cyex cyey tuya Dios. Jnbint cyuˈna, ka yaaˈn jun il tuj cywitza, tuj tzalajebl chi temeley. ²³ Pero ka tuj cywitza xjan jnxiˈ cyuˈna tuj twitz Dios, iltzen, cuma nchi binchana jtzin tkbaˈn cycˈuˈja kaˈ tuˈn t‑xiˈ cyuˈna. Ka tzin tkbaˈn cynaabla tuˈn miˈn bint jun cyuˈna, pero nbint, bix jatzen ilj.

15  Juˈ tzunj, key hermano, jatzen ke n‑el kniyˈ tiˈj alcyej il tiˈj twitz Dios, il tiˈj qˈuiyax kej ocslal min tzˈel cyniyˈ tiˈj kuˈn. Yaaˈn tumel tuˈn tcub kbinchaˈn tikˈch kaj cywitz. ² Cxeˈlxix kbisen tiˈj alcyej cˈonel cye tuˈn cytz̈ˈiy tuj cyocslabl, ³ cuma il tiˈj tuˈn tbint kuˈn tisenj e bint tuˈn Cristo. Amale Dioset‑xin, pero min e bint tuˈnxin tiˈj tikˈch e tajbexin, sino iyˈx qˈuixcˈaj tuˈnxin te jun baˈn cye cabtl. Tz̈i Cristo tuj tyol Dios cyjulu: “Nuk tuˈnj nchin ajbena tey, kej xjal nchi kˈojl tiˈja nchi yasen wiˈja,” tz̈i Cristo te Tman. ⁴ Nxiˈ nkbaˈna cyey j‑e cub tzˈiˈbet jatxe ootxa, cuma cˈajbel tyol Dios ke. Tzin tyeecˈan ke yaaˈn nuk kajx niyˈx qˈuixcˈaj cykilca kuˈn, bix tzin tnimsaˈn kcˈuˈj tuˈn kayon tiˈj o cyaj tkbaˈn Dios ke. ⁵ Jatzen Dios n‑onen kiˈj tuˈn tiyˈx cykilca kuˈn. Bix ja te Dios nnimsan kcˈuˈj tuˈnj tyol. Tzajxittzen tkˈoˈn Dios tuˈn cybeta junx, tisen taj Cristo Jesús. ⁶ Chi tena tuya junx cyanema, tuˈntzen tuya junx elnina cyyola cjawel cynimsaˈna tbi Dios, jaxj Tman Kaaw Jesucristo.

Jax juˈx kej xjal yaaˈn judío at tuˈn cyclet jaj ka ma tzˈel cyniyˈ tiˈj colbil

⁷ Juˈ tzunj, tuˈn tjaw nimset tbi Dios, cyiikˈamtzen cyiiba, tisenj e tiikˈ Cristo ejooˈ. ⁸ Ajbenxin te cykilca. E bint taakˈen Dios tuˈnxin cyxol judío, tuˈntzen tjapa cykilcaj otk cyaj tkbaˈn Dios te Abraham bix te Isaac bix te Jacob. ⁹ Bix jax juˈx ajbenxin cyej xjal yaaˈn judío. Akˈananxin tuˈntzen tjaw cynimsaˈn tbi Dios tuˈnj e tzaj lastim cye tuˈn Dios tuˈnj e bint tuˈnxin. Tzin tkbaˈn tyol Dios cyjulu: “Juˈ tzunj cjawel nnimsaˈna tbiy cyxol kej xjal yaaˈn Israel. Chin bitzela tuˈntzen tjaw nimset tbiy,” tz̈i jun xjal tuj tyol Dios tuˈn t‑xiˈ tyeecˈan cjawel nimset tbi Dios cyxolj xjal yaaˈn judío. ¹⁰ Bix tzin tkbaˈntl tyol Dios cyjulu: “Ja tzunkey yaaˈn aj Israel chi tzalaja junx cyuyaj t‑xjal Dios,” tz̈i tyol Dios. ¹¹ Bix tzin tkbaˈntl cyjulu: “Cynimsanwe tbi Kaaw, ejeeˈy yaaˈn aj Israel. Jawxit cynimsaˈn cykilca ke tnom tbi,” tz̈i tyol Dios. ¹² Bix jax juˈx tzin tkbaˈn Isaías, ja tyolel Dios, cyjulu: “Tzul jun tiyˈjil Isaí. Cˈoquel te cawel cyibaj kej xjal yaaˈn aj Israel, bix cˈoquel ke cycˈuˈj tiˈj,” tz̈i Isaías tuˈn t‑xiˈ tyeecˈanxin at Cristo tuˈn tajben te cykil xjal. ¹³ Jatzen tzin tkˈoˈn Dios cyey tuˈn toc ke cycˈuˈja tiˈ Cristo. Bix tuˈnj cyocslabla tiˈ Cristo, tzajxit tkˈoˈn Dios cyey tuˈnj tipemal Espíritu Santo tuˈn at cytzalajebla bix tuˈn cytena tuj ttz̈yal, tuˈntzen tuya cykil cycˈuˈja chi ayola tiˈj cykilcaj o baj tnincˈuˈn Dios cyiˈja.

¹⁴ Key hermano, min baj ncˈuˈja cyiˈja. Ntzkiˈna nojnen cyanema tuya cykilj baˈn, bix ntzkiˈna n‑el cyniˈya tiˈj ti tten tuˈn cyxiˈ lpey tiˈ Dios, bix ntzkiˈna baˈn cyuˈna tuˈn nbaj cyonen cyiiba tuˈn tel cyniˈya tiˈj tyol Dios. ¹⁵ Pero amale n‑elet cyniˈya tiˈ tyol Dios, pero mintiiˈ ttz̈i wiˈja tuˈn tcub ntzˈiˈbena jun cyiw yol cyey tiˈj tyol Dios, tuˈntzen tcˈasj cynaabla. Ma cub ntzˈiˈbena te cyey aj Roma, cuma ja waakˈenja o tzaj tkˈoˈn Dios weya. ¹⁶ O tzaj tkˈoˈnxin weya tuˈn woca te t‑akˈanal Jesucristo te cyej xjal yaaˈn judío. Ja waakˈenja tuˈn t‑xiˈ nkˈumena jbaˈn tpocbal tyol Dios cyej yaaˈn judío, tuˈntzen cytxjet tuˈn Espíritu Santo tuˈn cyel baˈn twitz Dios, tisen jun oybil baˈn tuj twitz Dios. ¹⁷ Juˈ tzunj at woclena tuˈn t‑xiˈ ntxˈolbaˈna cyey tiˈj tyol Dios. O tzaj tkˈoˈn Dios waakˈena, bix nbint wuˈna tuˈn Cristo Jesús. ¹⁸ Yaaˈnxsele tumel tuˈn t‑xiˈ nkbaˈna cyey wuˈntza weya nimxsen taakˈen Dios o bint wuˈna. Juˈ tzunj nxiˈ nkbaˈna nuk tuˈn Cristo nbint taakˈen Dios wuˈna. Tuˈnj waakˈena kˈoˈn weya, nim xjal yaaˈn judío o cyniman tyol Dios. O cyniman tuˈnj o txiˈ nkˈumena bix tuˈnj o bint wuˈna cyxol. ¹⁹ Tuˈn tipemal Espíritu Santo, nimxsen bix jawnexsen techlal e bint wuˈna jaaˈxja in poniya te kbalte tyol Dios, tuˈntzen tyeecˈj jnbint wuˈna jtaakˈen Dios. Juˈylatzen tten tbajlen bint jbaˈn tpocbal Cristo tuj cykil lugar wuˈna. Tneel wakˈa kbalte tuj Jerusalén, bix in pon baja kbalte hasta maa tuj Iliria. ²⁰ Bix tej t‑xiˈ nkbaˈna tyol Dios, ocxsen wipena tuˈn miˈn txiˈ nkˈumena tpocbal colbil ke tuˈn Cristo jaaˈj otk chi pona juntl t‑akˈanal Dios te kbalte, cuma ncyˈiya tuˈn wakˈanana jaaˈ otk tzyeta taakˈen Dios cyuˈn juntl. ²¹ Oˈcx e wajbeˈya tuˈn tel jaxxix ja yol lu tuj tyol Dios. Tzin tkbaˈn cyjulu: “Kej xjal bajx pona tpocbal Clol cye cyxol, cpomeltzen tuˈn cybinte. Kej lugar bajx cybiˈ xjal tiˈj ti tten tuˈn cyclet, qˈueleltzen cyniyˈ tiˈj,” tz̈i tyol Dios.

Ncub tbisen Pablo tiˈj tuˈn t‑xiˈ tuj Roma

²² Tiˈj tzunj waakˈena lu mix e bina tuˈn npona cyxola maa tuj Roma, amale nimet maj e wajbeˈya tuˈn npona cyxola. ²³ Pero jaˈlewe, mintiiˈtl tnom tzalu tuˈn tocx waakˈena tuj. At‑xxe kˈij tzin wajbeˈna tuˈn npona maa cyxola. ²⁴ Juˈ tzunj, npjaˈ nnincˈuˈna tuˈn nweˈya cyxola oj nxiˈya España. Chin temel tzuna cab kˈij cyuyey. Bix nim chin tzalajela oj toc ncyeˈna ejeeˈy. Bix ojtzen wiyˈ aja cyuyey, nuket jacˈa chi onena wiˈja tuj nbeˈya. ²⁵ Pero tneelxix il tiˈj tuˈn nxiˈya tuj Jerusalén, tuˈn t‑xiˈ wiiˈna jun onbil te cye ke ocslal judío o chmet te cye. ²⁶ Ke ocslal cyuj departamento te Macedonia bix Acaya e cyajbe tuˈn t‑xiˈ cysmaˈn jun onbil te cyej ocslal mebe tuj Jerusalén. ²⁷ Amale yaaˈnt judíoke, pero nchi tzalaj tuˈn t‑xiˈ cysmaˈn jun onbil te cyej ocslal judío, cuma tisen jun cycˈasben tuj cywitz tuˈn cykˈonte. At cycˈasben, cuma kej ocslal judío, ejeeˈ e xiˈ kˈonte tyol Dios te cyej lu, tuˈntzen cyclet. Juˈ tzunj tumelte tzin tyeecˈan cyanem kej ocslal yaaˈn judío te cyej ocslal judío tuˈnj t‑xiˈ cysmaˈn j‑onbil cye. ²⁸ Juˈtzen tten wuˈna. Oj wiˈya kˈol tej pwak te cyej ocslal tuj Jerusalén, chin xeˈl tzuna España bixsen chin iˈyela cyeyˈlte cyey tuj nbeˈya. ²⁹ Bix ntzkiˈna oj npona cyxola, junx ko tzalajel tuˈnj t‑xtalbil Cristo kibaj.

³⁰ Key hermano, cxeˈl ncubsaˈna nwitza cyey tuˈn cynaˈna Dios wiˈja. Chi oney wiˈja tiˈj ja lu, cuma ocslal koˈ tiˈ Kaaw Jesucristo, bix cuma kˈoˈn cyey tuˈn Espíritu Santo tuˈn toc wakˈa cyey. ³¹ Cykanenxa onbil te Dios wiˈja tuˈn ncleta cywitzj xjal tuj departamento te Judea min tzˈoc cybiˈn tyol Dios, bix oj t‑xiˈ nkˈoˈna j‑onbil cyej ocslal tuj Jerusalén, cykanenx te Dios tuˈn tel baˈn tuj cywitz, amale kˈoˈnt cyuˈnj ocslal yaaˈn judío. ³² Bix cykanenx te Dios tuˈn npona cyxola, bix tuˈn at nim ktzalajebl oj npona, tuˈntzen knimsante kcˈuˈj. ³³ Tenxit Dios tuya cykilcakey. Nuk ja texin nkˈonte tuˈn kten tuj ttz̈yal. Juˈxit tzuna.

Jun kˈolbebl tuˈn Pablo cyuya ke tuya cye ocslal aj Roma

16  Jxuuj Febe tbi cxeˈl tiiˈnxuj jwuˈja lu te cyey. Jun baˈn xuuj t‑akˈanal Dios cyxol ocslal tuj tnom te Cencrea. ² Cxeˈl ncubsaˈna nwitza cyey tuˈn t‑xiˈ cycˈojlaˈn jxuuja, tisex nbint cyxol ocslal, cuma ocslalxuj tiˈ Kaaw. Cyonenx‑xuj tuya ti cyitzˈjelaxuj, cuma nim xjal o tonenxuj, bix o tzˈonenxuj wiˈja.

³ Cykˈonxa jun nkˈolbebla te hermana Priscila bix te hermano Aquila. O chi akˈanan junx wuyena tuj taakˈen Cristo Jesús. ⁴ Chˈixcˈama e cwaˈke tuˈntzen ncleta cyuˈn. Juˈ tzunj nim nxiˈ nkˈoˈna chjonte te cye, bix yaaˈn nuk njunala, sino cykilca kej ocslal yaaˈn judío.

⁵ Bix cykˈonxa jun nkˈolbebla te cyej ocslal nchi chmet tuj tja Priscila bix Aquila tuˈn tjaw cynimsaˈn tbi Dios. Bix cykˈonxa jun nkˈolbebla te Epeneto, jun wuyena. Jaxin tneel ocslal tiˈ Cristo tuj departamento te Asia. ⁶ Bix cykˈonxa jun nkˈolbebla te María. Nim o tzˈakˈananxuj cyxola. ⁷ Bix cykˈonxa jun nkˈolbebla te Andrónico bix te Junias. Te ntanema kej xjal lu, bix o chi tenxin tuj tzeeˈ wuyena. Bix t‑xel Cristoke bix nim o bint cyuˈnxin, bix ejeeˈxin nejl ocslal nwitza.

⁸ Cykˈonxa jun nkˈolbebla te hermano Amplias, jun wuyena. ⁹ Bix cykˈonxa jun nkˈolbebla te Urbano. Kuya kiib tuya tuj taakˈen Cristo. Bix cykˈonxa jun nkˈolbebla te Estaquis, juntl wuyena. ¹⁰ Bix cykˈonxa jun nkˈolbebla te Apeles. Iyˈx qˈuixcˈaj tuˈnxin nuk tiˈj Cristo, pero min e cyaj tcyeˈyenxin tocslablxin. Bix cykˈonxa jun nkˈolbebla te cyej ocslal at tuj tja Aristóbulo. ¹¹ Bix cykˈonxa jun nkˈolbebla te Herodión, juntl xjal te ntanema. Bix cykˈonxa jun nkˈolbebla te cyej ocslal at tuj tja Narciso. ¹² Bix cykˈonxa jun nkˈolbebla te Trifena bix te Trifosa. Akˈanalkexuj tuj taakˈen Kaaw. Bix cykˈonxa jun nkˈolbebla te Persida, jun wuyena. Nim o tzˈakˈananxuj tuj taakˈen Kaaw. ¹³ Bix cykˈonxa jun nkˈolbebla te Rufo. Jun ocslal tbanelxix tnaabl. Bix cykˈonxa jun nkˈolbebla te ttxu Rufo. Jaxuj o cˈojlan te weya tisencˈa talxuj inayena. ¹⁴ Bix cykˈonxa jun nkˈolbebla te Asincrito, te Flegonte, te Hermas, te Petrobas, te Hermes, bix cykilca kej ocslal nchi chmet cyuyaxin tuˈn tjaw cynimsaˈn tbi Dios. ¹⁵ Bix cykˈonxa jun nkˈolbebla te Filólogo, bix te t‑xuˈlxin Julia tbixuj, bix te Nereo, bix te xuuj titzˈen Nereo, bix te Olimpas, bix te cyej ocslal nchi chmet cyuyaxin. ¹⁶ Bix juˈx cyxola, cykˈolben cyiiba tuya cykil cycˈuˈja.

Bix jax juˈx cykilca kej ocslal tiˈ Cristo tzalu, jax nxiˈ cykˈoˈn jun kˈolbebl te cyey.

¹⁷ Key hermano, il tiˈj tuˈn cycˈojlan cyiiba cywitz kej xjal cyxola ncub paˈnte cyey, cywitz kej nchi xnakˈtzan jun xnakˈtzbil yaaˈn junx taˈ tuyaj cyey o tzˈoc cyxnakˈtzaˈna tiˈj tyol Dios, tuˈntzen cytzpeta. Cypamel cyiiba cyiˈj, ¹⁸ cuma kej xjal lu yaaˈn t‑akˈanal Kaaw Cristo, sino nuk nchi xnakˈtzan alcyej baˈn cye tuj cywitz. Tuya yol jawnex pero ẍtakˈ, ncub cysbuˈn kej ocslal mintiiˈ tumel cyuya ka jaxxix chi yolen bix ka min. ¹⁹ Ntzkiˈna min o cheˈx lpey tiˈj jyaaˈn jaxxix, cuma nkˈumj tuj cykil twitz txˈotxˈ nchi niman cyey tyol Dios. Juˈ tzunj nchin tzalaja cyiˈja, pero waja tuˈn cycˈojlante cyiiba cywitz kej xjal cyaj tuˈn tbint kaˈ cyuˈna. Waja tuˈn tel cyniˈya tiˈj alcyej baˈn, pero ncyˈiya tuˈn tel cyniˈya tiˈj ti tten tuˈn tbint jkaˈ. ²⁰ Amatzele tzint chi akˈanan kej lepchec tiˈ taaw il tuˈn tbaj cypaˈn ke ocslal, pero jax juˈx nakˈanan Dios tuˈn cytena tuj ttz̈yal. Oj tpon tumel, Dios cwel waˈbente tuj ajkelbil taaw il, bix cwel kˈoˈn tjakˈ cykena.

Jatzen cyey, tzajxit t‑xtalbil Kaaw Jesucristo cyibaja.

²¹ Timoteo nkˈon jun kˈolbebl cyey. Akˈanalxin wuyena tuj taakˈen Dios. Bix Lucio tuya Jasón bix Sosípater nchi kˈon jun kˈolbebl cyey. Te ntanemake.

²² Inayena, Tercio, jun tzˈiˈbel te Pablo, jax ma txiˈ nkˈoˈna jun kˈolbebl te cyey, cuma ocslal kena.

²³ Nxiˈ tkˈoˈn Gayo jun kˈolbebl cyey. Tjaxin ntiiniya, bix tuj tjaxin nchi chmete ke ocslal tzalu te nimsalte tbi Dios. Jax juˈx Erasto nxiˈ tkˈoˈn jun kˈolbebl cyey. Jaxin cˈuˈl pwak tuj ja tnom lu. Bix nkˈon jxin Cuarto jun kˈolbebl cyey. Jaxin jun ocslal tzalu.

²⁴ Bix weya, nchin kanena te Dios tuˈn ttzaj t‑xtalbil Kaaw Jesucristo cyibaj cykilcakey.

Tej tjaw tnimsaˈn Pablo tbi Dios

²⁵ Mancˈbiltzen, chi xeˈl nkˈoˈna tuj tkˈab Dios. Nuk jaxin at tipemalxin tuˈn cycywixa tuˈntzen cytena jiquen tuj tyol Dios, jaj baˈn tpocbal tiˈj Jesucristo o txiˈ nkˈumena cyey. Jaj tpocbal tiˈ Cristo eˈwen taˈ jatxe ootxa, pero jaˈlewe yaaˈn eˈwentl taˈ. ²⁶ Jaˈlewe lu nkbaja. Jxnakˈtzbil tiˈ Cristo o cyaj tzˈiˈbet cyuˈn kej kbalte tyol Dios. Jaj xin Dios mintiiˈ tbajlel e kbante tuˈn tbint jlu, tuˈntzen tkˈumj tuj cykilca twitz txˈotxˈ jxnakˈtzbil tiˈ Cristo, tuˈntzen cyniman ke xjal jtajbil Dios, jaj tuˈn cyocslan ti Cristo. ²⁷ Oˈcx jun Dios at. Iynen tilbil tibaj cykilca te junx maj. Jawxit nimset tbixin tuˈn Jesucristo te junx maj. Juˈxit ttena.