Chronological

Alcye kej chi cletel cyxol aj Israel

11  Amale elet cyxooˈn ke t‑xjal Dios j‑e tkba Dios, ¿pero opa tzˈel t‑xooˈn Dios ejeeˈ? Min. Inayena jun tumel min o tzˈel t‑xooˈnxin cykilca, cuma jun aj Israel ken weya, pero min o tzˈel t‑xooˈnxin inayena. T‑xeˈchel Abraham kena, bix te Benjamín kena. ² Kej xjal o chi oc te t‑xjal Dios, ejeeˈj ya ttzkiˈntlxin jatxe tuj tneel at tuˈn cyoc te t‑xjalxin, min o tzˈel t‑xooˈnxin. Tuj cykil tyem at juun xjal e xiˈ lpeke tiˈ Dios. ¿Mimpa cytzkiˈna ti toc tuj tyol Dios tiˈ Elías tej toc tkanbilxin twitz Dios cyiˈ aj Israel? ³ E xiˈ tkbaˈn Elías te Kaaw cyjulu: “Taat, o cub cybyoˈn aj Israel cykilca ke tyolela. O cub cyxiten ke altar jaaˈ e naˈna koˈya tbiy. Bix yal jaˈlewe nuk inayena o chin cyaj itzˈj cyuˈn, bix nchi jyon wiˈja tuˈn ncuba,” tz̈i Elías. ⁴ ¿Pero ti e tzaj tkbaˈn Kaaw texin? E tzaj tkbaˈn cyjulu: “Yaaˈn tjunala o cyaja, cuma at wuuk miltl xinak nchi naˈn nbiˈya, bix min o cub cychˈecy twitzj sant Baal tbi te cynaabl Dios,” tz̈i Kaaw te Elías. ⁵ Bix jax juˈx jaˈlewe. At juun xjal cyxol aj Israel jaˈlewe o chi oc te t‑xjal Dios. Bix o chi oc te t‑xjalxin nuk tuˈnj o tzaj tkˈoˈnxin t‑xtalbilxin cye. ⁶ Cuma t‑xjal Dios koˈ tuˈnj t‑xtalbil Dios, mlaytzen txiˈ kkbaˈn t‑xjal Dios koˈ tuˈnj baˈn o bint kuˈn. Ka tuˈnj baˈn o bint kuˈn, yaaˈntltzen tuˈnj t‑xtalbil Dios.

⁷ Juˈ tzunj, ¿ti qˈuelela kniyˈ tiˈj? Qˈuelel kniyˈ tiˈj kej aj Israel n‑oc cyipen tuˈn cyoc jiquen twitz Dios, pero min o chi caman tuˈn cyoc jiquen twitzxin. Pero kej cyxol aj Israel o tzˈoc ke cycˈuˈj tiˈ Dios, te cye o kˈoj tuˈn cyoc jiquen twitzxin. Yaltzen niyˈtlkej, cycyˈi e xiˈ cyniman Dios, ⁸ tisen tzin tkbaˈn tuj tyol Dios: “E cyaj tkˈoˈn Dios ejeeˈ tuˈn cyten tuya jun cyanem cyimne, bix tuya jun cynaabl mintiiˈ n‑ocx tuj, tisencˈa min tzˈex tuj cywiˈ. Juˈ cyten nejl, bix juˈx cyten jaˈlewe,” tz̈i tyol Dios. ⁹ Ejeeˈ tzunja tisenj e tkba David. Tz̈i David cyiˈj aj Israel cyjulu: “Jcykˈinemal cˈoquel te tzyul cye nuk tuˈn t‑xiˈ tiiˈn ejeeˈ tuj il. Jatzen cycastiwaj. ¹⁰ Chi cyjel tuj klolj tuˈn miˈn tzˈel cyniyˈ tiˈj. Bix cyil cbinelxsen tisen jun cyiketz mlay chi jaw tjakˈ,” tz̈i David tuj tyol Dios.

Jun colbil cye xjal yaaˈn judío

¹¹ N‑eltzen kniyˈ tiˈj o tzˈel cyxooˈn aj Israel ja Cristo. Pero cxeˈl nkanena cyey, ¿qˈuelelpa cyxooˈn mas yaj? Min, yaaˈn te junx maj o tzˈel cyxooˈn. Pero tej tel cyxooˈn ja Cristo nejl, ja tzunja cyil otzen tzˈajben tuˈn cyclet kej xjal yaaˈn Israel. Bix ja lu cˈajbel cye aj Israel, cuma oj cylonte tkˈaˈ Dios te cyekej yaaˈn Israel tuˈn cyclet, cˈoqueltzen lochˈ cycˈuˈj tiˈj tuˈntzen ejeeˈn tuˈn cyclet. ¹² Cuma o tzˈajben te cyej xjal yaaˈn judío tuˈn tkˈoj xtalbil cye tuˈnj tel‑len cyxooˈn aj Israel ja Cristo, bix cuma o tzˈajben te cyej xjal yaaˈn judío tuˈn cyiikˈente jun baˈn tuˈnj tel‑len cyiiqˈuen aj judío jxtalbil e takˈ Dios, ¿yaaˈmpatzele jax nimxsen mastl xtalbil ccyiikˈel kej yaaˈn judío oj tul jkˈij tuˈn cyocslan kej xjal judío tiˈ Cristo?

¹³ Key xjal yaaˈn judío, il tiˈj qˈuelel cyniˈya tiˈj tuˈnj oj cyocslan ntanema tiˈ Cristo, cˈajbeltzen waakˈena tuj nwitza. Amale smaˈnt kena tuˈn Cristo tuˈn nkˈumena tpocbalxin te cyej xjal yaaˈn judío, ¹⁴ waja tuˈn tajben waakˈena cye ntanema. Waja tuˈn toc cycyeˈyen kej xjal judío jxtalbil e kˈoj cye tuj tneel pero tuˈn tel‑len cyiiqˈuen, o kˈoj te cyej yaaˈn judío, tuˈntzen tel cycˈuˈj tiˈj ja xtalbil lu te cyex, tuˈntzen cyclet. ¹⁵ Bix ka ma chi clet ke ntanema, ¿cˈajbelpa loj lu te cyej xjal yaaˈn judío? Oc. Cuma o tzˈajben te cyej yaaˈn judío tuˈn cyoc tuj ttz̈yal tuya Dios tiˈj tel‑len cyiiqˈuen ke judío tiˈ Cristo, juˈ tzunj mas cˈajbel te cyej yaaˈn judío ka ma chi ocslan kej judío tiˈ Cristo, cuma chi jawetz itzˈj tuj cyamecy.

¹⁶ Kej xjal judío t‑xjal Dioske tuj tneel. ¿Bix juˈxpele chi pomela baja? Cxeˈl nkbaˈna cyey jun tumel. Ka at jun cluj ttxˈotxˈel pan, bixsen qˈuelel piẍet jun tkiyˈ te niyˈbebl, ka baˈn jqˈuelel piẍet, qˈueleltzen kniyˈ tiˈj baˈn entera pan, cuma junx ttxˈotxˈel. Jax juˈx jun tzeeˈ. Ka baˈn tloqˈuel, jax baˈn ke tkˈab, cuma jax tzeeˈ.

¹⁷ Jaˈlewe, nim judío yaaˈn t‑xjal Dios. Ejeeˈtzen tisen cab tkˈab jun wik tzeeˈ olivo tbi min e cyakˈ cywitz. Juˈtzen eˈla txˈometke tiˈ tzeeˈ. Ejeeˈtltzen cyey ocslal yaaˈn judío tisen tkˈab juntl wik tzeeˈ o chi oc wiˈt tiˈ tken olivo. Ya junx elninakey cyuya t‑xjal Dios, bix o kˈoj cyey jax xtalbil, tisex kej tkˈab o chi oc wiˈt junx ncyiikˈen cyipemal tuˈn junx cyloqˈuel. ¹⁸ Pero amale ot chi oca t‑xjal Dios, miˈn cub cybisena ejeeˈy mas baˈn cywitz judío. Ka cyaja ncub cybisena mas baˈnkey, qˈuelel cyniˈya tiˈj nuk tkˈabkey, bix yaaˈn tkˈab ntz̈ˈis̈ente tlocˈ, sino ja tlocˈ ntz̈ˈis̈ente ke tkˈab.

¹⁹ Kape at juun cyey cxeˈl cykbaˈna cyjulu: “Ejooˈya xjal yaaˈn judío mas nintzaj cywitzj judío, cuma kej judío o chi el txˈomet tuˈn koctlke te cyxel,” tz̈ikey. ²⁰ Jax cyuˈna el txˈomet ke judío, pero nuk tuˈn min oc ke cycˈuˈj tiˈ Cristo. Bix ke cyey o chi oca te tajlal nuk tuˈnj cyocslabla tiˈ Cristo. Juˈ tzunj miˈn cub cybisena mas nintzajkey, sino cˈoquel cycˈuˈja tiˈj ti e baj cye judío. ²¹ Cuma el ttxˈoman Dios kej mero t‑xjal tej min e cybi tyolxin, juˈ tzunj cyey, qˈuelel ttxˈomanxin ejeeˈy ka min ma cybiy tyolxin.

²² Juˈ tzunj, il tiˈj qˈuelel cyniˈya tiˈj tzin tkˈoˈn Dios xtalbil, pero jax juˈx tzin tkˈoˈn Dios castiwa. E takˈxin castiwa cyej judío e cub tzˈak tuj il, pero te cyey e takˈxin t‑xtalbilxin cyey. Bix tkˈaˈxxin t‑xtalbilxin cyey ka min ma cyaj cycyeˈyena cyocslabla tiˈ Cristo. Pero ka ma cyaj cyxooˈna cyocslabla tiˈ Cristo, Diostzen qˈuelel txˈomente cyey, tisen tej tel ttxˈomentexin ke judío. ²³ Yaltzen ke judío, ka ma tzul tuj cycˈuˈj bix ka ma tzˈoc ke cycˈuˈj tiˈ Cristo, chi oqueltzen te t‑xjal Dios juntl maj, tisentzen o tzˈel txˈomet tkˈab tzeeˈ bix cˈoquel juntl maj, cuma baˈn tbint jlu tuˈn Dios. ²⁴ Tej cyoca t‑xjal Dios, ejeeˈ tzuna tisentzen oj toc wiˈt juntl wik ttzeˈyel loˈpj tiˈ tken olivo, cyiw tuˈn tbint. Cuma baˈn tuˈn tbint tuˈn Dios juˈwa, yaaˈntzen nim t‑xiˈlen tuˈn tbint tuˈnxin tuˈn cyoc judío te t‑xjalxin juntl maj, cuma ejeeˈ tisen mero tken olivo tuj tneel, yaaˈn tisen juntl wik tzeeˈ tisen ejeeˈy.

Kej xjal aj Israel chi oquel te t‑xjal Dios juntl maj

²⁵ Key hermano, cxeˈl nkbaˈna jun tumel cyey min el cyniˈya tiˈj nejl. Pero jaˈlewe waja tuˈn tel cyniˈya tiˈj, tuˈntzen miˈn cub cybisena mas jawnexkey cywitz aj Israel. Kej aj Israel chi oquel te t‑xjal Dios juntl maj laˈ alcye jun kˈij. Qˈuelel cyxooˈn ti taj Dios hasta ojxe cykilcaj xjal yaaˈn aj Israel at tuˈn cyoc te t‑xjal Dios otk chi oc. ²⁶ Ojtzen tpon tumel alcyej kˈij, cykilcatzen aj Israel chi cletel. Ntzaj tkbaˈn tyol Dios cyjulu: “Jclol cye xjal tzul tzalu te tnom te Dios, Sión tbi, bix qˈuelel tiiˈn cyil ke tiyˈjil Jacob,” tz̈i tyol Dios. ²⁷ Bix jax juˈx tzin tkbaˈn Dios tuj tyol cyjulu: “At jun ntrata cyuya aj Israel tuˈn cyoc te ntanema, bix oj tel wiiˈna cyil, otktzen nnimana ntrata cyuya,” tz̈i Dios. ²⁸ Kej judío o tzˈel cyxooˈn tpocbal Clol cye, bix juˈ tzunj aj kˈojke tiˈ Dios tuj twitz Dios. Tuˈnj tel‑len cyxooˈn tyol Dios, o kˈoj te cyey yaaˈn judío tuˈn cyoca te t‑xjal Dios. Pero tuj tneel e tsicyˈ Dios kej judío tuˈn cyoc te t‑xjal. E cyaj tkˈoˈnxin tyolxin cyuya ke cyxeˈchel tuˈn cyoc cyiyˈjil te t‑xjal Dios. Juˈ tzunj chi oqueltzen te t‑xjalxin n‑oc cyakˈ texin. ²⁹ E cyaj tkˈoˈnxin tyolxin at tuˈn tkˈontexin t‑xtalbilxin cye, bix at tuˈn cyoc te t‑xjalxin, bix ktzkiˈn cjapanelxin tiˈ tyolxin. ³⁰ Pjel cyiˈj judío tisenj e baj cyiˈja ejeeˈy yaaˈn judío. Nejl min e cynimana Dios. Pero tej tel cyxooˈn kej judío t‑xtalbil Dios, bixsen oc toyenxin te cyey, bix e cyiikˈa. ³¹ Jax juˈx min cynima kej judío Dios jaˈlewe, pero tzul lastim cye tuˈn Dios, tisenxj ul lastim cyey tuˈnxin. ³² O tyeecˈa Dios cykilca xjal, judíole, yaaˈnle judío, o tzˈel cyxooˈn tyolxin, tuˈntzen toc toyenxin najsbil cyil te cykilca, cuma cykilca at cyil.

³³ Tuˈn tzunj tbajlen tnincˈuˈn Dios, ¡jawnexsen te junx maj jtilbil Dios o txiˈ tyeecˈan! ¡Nimxsen tumel at tuyaxin! Min cnet tuˈn tel kniyˈ tiˈj cykilcaj o baj tnincˈuˈnxin tuˈn tbint, bix mi nuket jun xjal at tumel tuya tiˈj ti tten tuˈn nbint tuˈnxin. ³⁴ Ja lu tisen tzin tkbaˈn tyol Dios. Tz̈i cyjulu: “¿Atpa jun xjal n‑el tniyˈ tiˈj tnaabl Dios? Min‑al. ¿Atpa jun xjal baˈn tuˈn t‑xiˈ tkˈumen te Dios alcyej baˈn tuˈn tbint? Min‑al. ³⁵ ¿Atpa jun xjal cˈasbenel Dios twitz? Min‑al,” tz̈i tyol Dios. ³⁶ Ja te Dios binchalte cykilca at. Jaxin ncawen tibaj cykilca nbaj, bix cykilca at te tajbel texin. ¡Jawxittzen nimset tbixin te junx maj! Juˈxit tzuna.

Il tiˈj tuˈn kajben te Dios tuya jun kanema sakxix

12  Key hermano, o ko oc ttanem Dios tuˈnj tkˈakˈbil tcˈuˈjxin kiˈj. Juˈ tzunj, nchin cubsana nwitza cyey tuˈn t‑xiˈ cykˈoˈna cyxumlala te Dios tuˈn tajben texin tisen jun oybil iˈtz. Chi ajbena te Dios tuya jun cyanema sakxix bix tuya jun cychunkˈlala baˈn twitzxin. Ka ma bint cyuˈna juˈwa, juˈtzen cjawel cynimsaˈna Dios tuya cykil cycˈuˈja. ² Miˈn cheˈx lpey tiˈ tnaabl te twitz txˈotxˈ, sino juˈ chi xeˈl lpey tiˈ jun cynaabla acˈaj, tuˈntzen cychˈixpeta, tuˈntzen tel cyniˈya tiˈj tajbil Dios, baˈn bix tzˈaklxix.

³ Cuma o takˈ Dios woclena tuˈn t‑xiˈ nkˈumena tyolxin, juˈ tzunj cxeˈl nkˈoˈna te jaca juun cyey jun xnakˈtzbil. Miˈn cub cybisena ka mas nchi ajbena cywitz ke cyuyey, sino cˈaaltz tiˈ cynaabla, cuma o tzaj tkˈoˈn Dios cyaakˈena te cykilcakey tuˈn cyajbena cye ocslal, yaaˈn tuˈn cyoca te mas jawnex. ⁴ Cxeˈl nkbaˈna jun tumel cyey te yecˈbil amale nimet kbaj, pero junx koˈ. At nim iken tuˈn kxumlal, bix cykilcaj iken tuˈn kxumlal at taakˈen. Pero junx xumlalbaj elnina. ⁵ Juˈ japenina ejooˈ ocslal. Nim kbaj, bix jaca juun ke at taakˈen, pero tuˈnj kmojbabl kiib tuya Cristo, junx elnina koˈ.

⁶ Entonces, o tzaj kˈoˈn te jaca juun ke tuya jun akˈuntl baˈn tbint tuˈn. Juˈ tzunj, cybincham jaca juun cyey laˈ alcyej cyaakˈena o takˈ Dios cyey. Ka jaj tkbaj tyol Dios o tzaj kˈoˈn tey, kbanx, pero cˈoquel tipey tiˈj oj t‑xiˈ tkbaˈna, junx qˈuelela tyola tuya t‑xnakˈtzbil Cristo. ⁷ Ka jaj tuˈn tajbena cye xjal o tzaj kˈoˈn tey, tzˈajbenxa cye. Ka jaj tuˈn t‑xnakˈtzana cye xjal o tzaj kˈoˈn tey, xnakˈtzanxke. ⁸ Ka jaj tuˈn t‑xiˈ tnimsaˈna cycˈuˈj xjal o tzaj kˈoˈn tey, cxeˈl tnimsaˈna cycˈuˈj. Ka jaj tuˈn tkˈona onbil cye xjal at il eteˈ o tzaj kˈoˈn tey, onexke tuya cykil tcˈuˈja. Ka jaj tuˈn tbaj tnincˈuˈna ke xjal o kˈoj tey, bincham, bix seyˈ tzˈoquey te nincˈulcye. Bix ka jaj tuˈn toc kˈakˈen tcˈuˈja cyiˈ mebe o kˈoj tey, kˈakˈec tcˈuˈja pero tuya tzalajebl.

⁹ Kˈakˈenc cycˈuˈja tiˈ cyuyey tuya cykil cycˈuˈja, yaaˈn nuk ten cyuˈna. Cyxomel jkaˈ nbint cyuˈn, pero jaj baˈn cˈoquel takˈ cyey.

¹⁰ Cyonenx cyiiba cyxola tuya tkˈakˈbil cycˈuˈja, cuma ocslalkey. Cybiˈy juntl ocslal cyuyey.

¹¹ Chi ajbena te Kaaw tuya cykil cycˈuˈja. Seyˈx chi oqueley tuj taakˈenxin, yaaˈn alkey.

¹² Chi ayona tuya tzalajebl tiˈj o cyaj tkbaˈn Dios ke. Qˈuiyax qˈuixcˈaj cyuˈna. Tuj cykil tyem cynaˈnxa Dios.

¹³ Cxeˈl cyonena kej ocslal at il cyiˈj. Ka taj jun xjal posadayin bix ka taj chˈin twa, cxeˈl cykˈoˈna.

¹⁴ Ka at jun xjal n‑oc yasente cyey, cykanenx te Dios tuˈn tkˈonte jun baˈn te te. Miˈn txiˈ cykanena tcastiwa te Dios.

¹⁵ Ka at jun ntzalaj, chi tzalaja tuya. Ka at jun nbisen, chi okˈa tuya.

¹⁶ Cykˈonx jun baˈn te cyuyey, tisenx nchi jyon cyey jun baˈn te cyey. Miˈn jaw cynima cyiiba, sino ctemel cynaabla tuya cykilca xjal ajnintz cynaabl. Miˈn cub cybisena mas baˈn cyuˈna.

¹⁷ Ka ma tzˈoc bint jun kaˈ cyiˈja, miˈn xeˈlen cyuˈna. Ja cyeja cbinel cyuˈn jaj jun baˈn tuj cywitz cykil xjal.

¹⁸ Cˈoquel cyipena tiˈj tuˈn cytena tuj ttz̈yal tuya cykil xjal. Miˈn chi cyakwusana jun kˈoj.

¹⁹ Key hermano n‑oc cyakˈa weya, miˈn xeˈlen jun kaˈ cyuˈna ka ma tzˈoc bint jun kaˈ cyiˈja cyuˈn xjal. Cykˈonx te Dios tuˈntzen ja Dios ckˈolte cycastiwa. Tzin tkbaˈn Dios tuj tyol cyjulu: “Nuk inayena at woclena tuˈn nkˈonte castiwa te t‑xel jkaˈ nbint cyuˈn xjal. Inayen weya taaw tuˈn nkˈonteya t‑xel,” tz̈i Dios. ²⁰ Juˈ tzunj, ka nkˈojl jun xjal cyiˈja, bix ka ncyim tuˈn weyaj, cykˈonx twa. Bix ka ncyim tuˈn aˈ, cykˈonx tcˈaˈ. Ka nbint cyuˈna juˈwa te te, tzultzen tchˈixew tuj tcˈuˈj. ²¹ Katzen junx ma chi ela kaˈx t‑xel cyuˈna, jaxsen kaˈ otk caman cyibaja. Mas baˈn tuˈn tbint jun baˈn cyuˈna tej xjal tzin tbinchan jun kaˈ cyiˈja.

13  Entera key il tiˈj cxeˈl cynimana kej cawel te twitz txˈotxˈ, cuma ja Dios o cyaj kˈonte tuˈn at cawbil twitz txˈotxˈ, bix ja Dios o cyaj kˈonte tuˈn at kej nchi cawen cyibaj xjal. ² Juˈ tzunj, ka min txiˈ cyniman xjal kej cawel, nchi kˈojltzen tiˈj cawbil o tzaj tkˈoˈn Dios bix ckˈojeltzen cycastiwa cyuˈn cawel, ³ cuma o kˈoj cye cawel yaaˈn tuˈn cykˈonte castiwa te cyej xjal nchi binchan baˈn, sino nuk oˈcx te cyej xjal nchi binchan kaˈ. Ka cycyˈiy tzaj ttz̈i ke cawel cyiˈja, jaj baˈn cybinchama, bix baˈn chi eleley tuj cywitz. ⁴ Cxeˈl cybiˈna ke cawel, cuma ja Dios o cyaj kˈonte cycawbil tuˈn cycawen te jun baˈn te cyey. Pero ka kaˈ nbint cyuˈna, nuktzen eteˈqˈuey tz̈iyel cywitz, cuma yaaˈn nuk cyajx at cawbil cyuya. Ja te Dios o kˈonte cycawbil tuˈn cykˈonte cycastiwa kej nchi binchan kaˈ. ⁵ Juˈ tzunj il tiˈj cxeˈl cynimana ke cawel. Pero yaaˈn nuk oˈcx tuˈn miˈn chi cuba tuj castiwa, sino cuma taj Dios tuˈn t‑xiˈ cynimana ke cawel. ⁶ Bix chi choola alcyej tzin cykanen cawel, cuma Dios o cyaj kˈonte ke cawel tuˈn cycawen, bix tiˈj nchi cawen, nchi ajben te Dios. ⁷ Juˈ tzunj chi choola alcyej il tiˈj tuˈn cykˈontey cye cawel, jaaˈxja tumel tuˈn tchjet. Cxeˈl cynimana alcyekej at cyoclen tuˈn cynimj, bix ctemel chˈin cynaabla cywitz kej at tuˈn cyiikˈente cynaabla.

⁸ Ka cˈasbenelkey, miˈn tzˈel tuj cycˈuˈja tuˈn cychjontey. Pero ja tzunj tkˈakˈbil cycˈuˈja cyxola tisen cycˈasbena mlay tweˈ. Juˈ tzunj cucx tzˈoc cyakˈ cyuyey cyey. Ka n‑oc cyakˈ cabtl cyuyey cyey, nbinttzen cykilcaj tzin tkbaˈn ley cyuˈna. ⁹ Tzin tkbaˈn ley cyjulu: “Miˈn tzˈel cyiiˈna t‑xuˈl cyuyey. Miˈn cub cybyoˈna xjal. Miˈn chi alkˈana. Miˈn tzˈoc cyachena tikˈch at,” tz̈i ley, bix at mastl tzin tkbaˈn. Jax juˈx tzin tkbaˈn tyol Dios cyjulu: “Tisenx cycˈojlan cyey cyiiba, juˈxsen cˈoquel cyakˈ cyuyey cyey,” tz̈i tyol Dios. Ka juˈ nbint cyuˈna, nchi niman tzuna cykilcaj tzin tkbaˈn ley. ¹⁰ Ka n‑oc cyakˈ xjal cyey, mintzentiiˈ kaˈ n‑oc cybinchena cyiˈj juˈwa. Juˈ tzunj nchi niman tzuna alcyej tzin tkbaˈn ley oj n‑oc cyakˈ cyuyey cyey.

¹¹ Cykilca tzunj lu ma txiˈ nkbaˈna cyey, iltzen tiˈj tuˈn tbint cyuˈna, cuma ktzkiˈn ma pon tumel tuˈn tel kelsaˈn kwatl. Nimxe tyem o tzˈex toclen kocslaˈn Cristo, bix tzajnen ttzaj lkˈe jkˈij tuˈn tulxin te clol ke. ¹² Cpomel baj twiˈ jkˈij tuj kloljil etoˈ. Jkˈij te tulel Cristo ma tzakˈ ulel lkˈe. Tisencˈa chˈix kskix. Juˈ tzunj cyjel cykˈoˈn ja kaˈ nbint tuj kloljil, bix cybinchama jbaˈn nbint tuj spiˈyen. ¹³ Cxeˈlxix kiiˈn kchunkˈlal tuj tumel, yaaˈn tisen kej eteˈ tuj kloljil. Miˈn cybinchay tisen kej xjal nchi bolayin bix nim s̈itz̈ˈbil eteˈ. Miˈn chi binchana tuya pajbaj bix tikˈch taj cyxumlala. Miˈn chi jyona kˈoj cyxola, bix miˈn chiˈl cycˈuˈja tiˈ juntl. ¹⁴ Jcbinel kuˈn jaj cxeˈlxix kiiˈn jun knaabl junx tuya tnaabl Kaaw Jesucristo. Oj taj tnaabla aj il tuˈn tbinchan il, miˈn txiˈ tnimana.