Chronological

Jun yecˈbil te ke tuˈn Abraham

4  Cykˈoˈnc cycˈuˈja tiˈj Abraham, jxin tneel cyiyˈjil judío. ¿Ti tten tel jiquen twitz Dios? ² Nuket e xiˈxin jiquen twitz Dios tuˈnj baˈn tbinchbenxin e bint tuˈnxin, atettzele toclenxin tuˈn e jaw tnimsan tiibxin. Pero tuj twitz Dios, el Abraham baˈn yaaˈn tuˈnj baˈn e tbinchaxin. ³ Cˈoquel cycˈuˈja tiˈj ti toc tuˈn tyol Dios. Tz̈i cyjulu: “Oc ke tcˈuˈj Abraham tiˈ Dios. Juˈ tzunj e tzaj kˈoˈn te Abraham tuˈn jiquen taˈ twitz Dios,” tz̈i tyol Dios tuˈn t‑xiˈ tyeecˈan jiquen e tema Abraham twitz Dios yaaˈn tuˈnj jun baˈn e bint tuˈnxin, sino nuk tuˈnj t‑xtalbil Dios. ⁴ N‑eltzen kniyˈ tiˈj oj nakˈanan jun xjal, bixsen ntzaj tkˈoˈn taaw akˈuntl pwak te. Yaaˈn tcotz ntzaj kˈoˈn, sino twiˈ tcˈuˈjxin, cuma otk tzˈakˈananxin. ⁵ Ja tzunj xjal min tzˈakˈanan, bix ka ntzaj kˈoˈn pwak te, yaaˈn twiˈ tcˈuˈj, sino nuk tcotz. Tiˈj ja techel lu qˈuelel kniyˈ tiˈj ka n‑oc ke tcˈuˈj jun aj il tiˈ Dios, ctkˈaˈ Dios xtalbil te, yaaˈn twiˈ tcˈuˈj. Bix ja xtalbil lu, jaj tuˈn toc jiquen twitz Dios. ⁶ Juˈx e tkba David ootxa at t‑xtalbil Dios tibaj jun xjal yaaˈn tuˈnj baˈn tbinchben e bint tuˈn, sino tuˈnj ntzaj kˈoˈn te tuˈn jiquen taˈ twitz Dios. Tz̈i David cyjulu: ⁷ “Kej xjal o najset cyil, ejeeˈtzen xjalja at t‑xtalbil Dios cyibaj. ⁸ Kej xjal o chi binchan il pero ya mintl chi ul tuj tcˈuˈj Kaaw, ejeeˈtzen xjalja at t‑xtalbil Dios cyibaj,” tz̈i David.

⁹ Kape tuj cywitz juun xjal ctkˈaˈ Dios ja xtalbil lu nuk te cyej xjal ncpet cychuˈl te techel t‑xjal Dioske, bix min ma takˈ te cyej yaaˈn kˈiˈn jtechel lu cyuˈn. Pero yaaˈn juˈwa. Tz̈i tyol Dios cyjulu: “Tuˈnj tocslabl Abraham tiˈ Dios, e tzaj kˈoˈn texin tuˈn jiquen taˈxin twitz Dios,” tz̈i tyol Dios te yecˈbil yaaˈn tuˈnj toc techel tiˈ tchuˈl. ¹⁰ Cxeˈl nkanena cyej xjal judío, ¿jtoo e tkba Dios jiquen taˈ Abraham twitzxin? ¿Otkpa bint tuˈn tcpet Abraham tej ttzaj tkbaˈn Dios jiquen taˈ Abraham twitz Dios, ma mitknaˈx? Mitknaˈx. Juˈ tzunj qˈuelel kniyˈ tiˈj yaaˈn tuˈnj tej tcpet tchuˈlxin e tkba Dios baˈnxin twitz Dios. ¹¹ Mas yaj e tkba Dios tuˈn toc tkˈoˈnxin jun cˈupbil tiˈ tchuˈlxin tetzen techel jiquentzen taˈxin tuˈnj tocslablxin tiˈ Dios. Cˈoquel kcˈuˈj tiˈj mitknaˈx toc techel tiˈ Abraham tej tkbante Dios jiquen taˈxin twitz Dios. Juˈtzen e baj tnincˈuˈn Dios tiˈj, tuˈntzen toc Abraham te mambaj te cykilca kej xjal yaaˈn judío at tuˈn toc ke cycˈuˈj tiˈ Dios mas yaj amale minttiiˈ techel toc cyiˈj, tuˈntzen jax juˈx cye tuˈn cyocslabl chi oquel jiquen twitz Dios tisen te Abraham. ¹² Ja tzunkej xjal judío, kej xjal e cpet cychuˈl te techel t‑xjal Dioske, jax juˈx o cub tnincˈuˈn Dios tiˈj tuˈn toc Abraham te cyxeˈchel, cuma jaxin tneel xjal kˈilte ja techel lu. Pero jaxin cyxeˈchel nuk oˈcx ka n‑oc ke cycˈuˈj tiˈ Dios tisen e bint tuˈn Abraham tej mitknaˈx toc techel tiˈjxin.

Tuˈnj oc ke tcˈuˈj Abraham tiˈ tyol Dios o tcama jun tkab

¹³ Qˈueleltzen kniyˈ tiˈj oc Abraham jiquen twitz Dios nuk tuˈnj oc ke tcˈuˈjxin tiˈj ti e tkba Dios texin. Juˈtzen e cyjaˈ tkbaˈn Dios jun cykab te Abraham bix cye ke tchmanxin. E tkba Dios tuˈn tcyaj tkˈoˈn texin entera twitz txˈotxˈ, yaaˈn tuˈnj e nimanxin tiˈ ley, sino tuˈnj e tenxin jiquen twitz Dios tuˈnj tocslablxin tiˈj Dios. ¹⁴ Nuket chi camal xjal jcykab tzin tkˈoˈn Dios nuk oˈcx tuˈnj cyniman ley, mintzeletiiˈ il tiˈj tuˈn toc ke kcˈuˈj tiˈj e tkba Dios, bix nuktzele tajxtl Dios e cyaj tkbaˈn tyol te Abraham bix cye ke tchman. ¹⁵ Kej xjal n‑oc cyipen tuˈn cyniman tley Dios tuˈn cycaman t‑xtalbil Dios, mlay cyiikˈ t‑xtalbil Dios, sino ccyiikˈelcye oˈcx tkˈoj Dios, cuma mi nuk jun xjal nniman entera ley. Oˈcx nuket minttiiˈ ley baˈntzele cyten xjal tuˈn miˈn tzˈel cyxooˈn ley.

¹⁶ Juˈtzen qˈuelela kniyˈ tiˈj yaaˈn tuˈnj nko niman tiˈ ley ko kabel tuˈn Dios, sino nuk tuˈn kocslabl tiˈ Dios. Bix cuma nuk tuˈnj kocslabl, juˈ tzunj ktzkiˈn jkkab tzin tkˈoˈn Dios yaaˈn twiˈ kcˈuˈj, sino kcotz. Nuket nko ayon tiˈj twiˈ kcˈuˈj tuˈnj oc kniman tley Dios, mlay kcaman, pero ka nko ayon tiˈj kcotz e cyaj tkbaˈn Dios tuˈn tkˈonte, il tiˈj tuˈn kiikˈente. Bix jkkab lu ctkˈaˈ Dios te cykilca kej xjal nchi binchan j‑e bint tuˈn Abraham, tisencˈa tchman Abraham. Ctkˈaˈ Dios yaaˈn nuk cyej xjal judío e cyiikˈ tley Moisés, sino jax juˈx cyekej xjal yaaˈn judío, cykilca kej xjal n‑oc ke cycˈuˈj tiˈ Dios tisen e bint tuˈn Abraham. Jaxin t‑xeˈchel te cykilcaj n‑oc ke tcˈuˈj tiˈ Dios. ¹⁷ Tz̈i Dios te Abraham cyjulu: “Ma cyaj nkˈoˈna te tey tuˈn toca te t‑xeˈchel te nimcˈa wik xjal” tz̈i Dios tuj tyol Dios. Amale minttiiˈ tcwal Abraham otk tzˈitzˈj, pero tuj twitz Dios ya otk tzˈoc Abraham te t‑xeˈchel te nimcˈa wik xjal. Bix oc ke tcˈuˈj Abraham tiˈj e tkba Dios texin, cuma el tniyˈxin tiˈj baˈn tuˈn Dios tuˈn tkˈonte tipemal te jun xjal tijtl tisencˈa cyimne, bix baˈn tuˈn Dios tuˈn toc tcyeˈyen jminaˈx tbaj bix baˈn tuˈnxin tuˈn tyolen tiˈj jminaˈx tbaj tisencˈa otk baj tilel. ¹⁸ Juˈ tzunj ayon Abraham tiˈj e cyaj tkbaˈn Dios, amale tujet cywitz xjal mlay bint. El jax tuj twitzxin tuˈn tocxin te t‑xeˈchel te nimcˈa wik xjal, cuma otk tkba Dios texin cyjulu: “Nimxsen tajlal tiyˈjila qˈuitzˈjel,” tz̈i Dios. ¹⁹ El tniyˈ Abraham tiˈj minxtiiˈ titzˈjel jun tcwalxin, cuma chˈixcˈa yaaˈn jun syent jnabkˈi ttyemxin, bix el tniyˈxin tiˈj jax juˈx t‑xuˈlxin mlayx tuˈn talenxuj. Pero tocslablxin tiˈ Dios min e cub baj. ²⁰ Nukx nayonxin tiˈj tcwalxin otk cyaj tkbaˈn Dios texin, bix e cywixxin mas tuj tocslablxin, bix e jaw tnimsaˈnxin tbi Dios. ²¹ Tuya cykil tcˈuˈjxin oc ke tcˈuˈjxin tiˈ Dios tuˈn tbint j‑otk cyaj tkbaˈn Dios texin. ²² Tiˈj tzunj lu e tkba Dios jiquen taˈxin twitz Dios.

²³ Entonces n‑el kniyˈ tiˈj nuk tuˈnj tocslabl Abraham oc Abraham jiquen twitz Dios. Ja yol lu yaaˈn nuk tiˈjxin nyolene, ²⁴ sino jax juˈx nyolen kiˈj. Jax juˈx koˈ, jiquen etoˈ twitz Dios, cuma jax juˈx o tzˈoc ke kcˈuˈj tiˈj Dios e jaw titzˈjsaˈn Kaaw Jesús juntl maj tuj cyamecy. ²⁵ E tzaj tkˈoˈn Dios Kaaw Jesús tuˈn tbyet tuˈn kil, bix e jaw titzˈjsaˈn Dios jaxin juntl maj tuj cyamecy cuma otk bint tuˈnxin tuˈn koc jiquen twitz Dios.

Jiquen koˈ twitz Dios tuˈnj n‑oc ke kcˈuˈj tiˈ Jesucristo

5  Entonces, jiquen koˈ twitz Dios tuˈnj n‑oc ke kcˈuˈj tiˈ Dios. At ttz̈yaltl etoˈ tuya Dios tuˈnj e bint tuˈn Kaaw Jesucristo. ² Bix tuˈnj e bint tuˈn Kaaw, bix tej toc ke kcˈuˈj tiˈj e bint tuˈnxin, e kˈoj t‑xtalbil Dios ke tuˈn koc jiquen twitz Dios. Bix nko tzalaj, cuma nko ayon laˈ alcyej kˈij oj kten tuya Dios tuya jun kchunkˈlal tbanelxix. ³ Bix nko tzalaj yaaˈn nuk oˈcx tuˈnj kˈij tzul, sino jax juˈx oj toc qˈuixcˈaj kiˈj, cuma n‑el kniyˈ tiˈj oj tiyˈ qˈuixcˈaj kwitz, cbineltzen tuˈn tiyˈx kuˈn. ⁴ Bix oj niyˈx qˈuixcˈaj kuˈn, cyjeltzen knaabl mas baˈn. Bix oj ncyaj knaabl mas baˈn, nko ayontzen tiˈj o cyaj tkbaˈn Dios ke. ⁵ Bix mlay ko ayon nuk kajx, cuma jaxte cjapanel baj Dios tiˈ tyol. Ktzkiˈntl te Dios mlay ko el t‑xooˈn Dios tuj jkˈij tzul, cuma at tumel kuya ntzaj kˈakˈen tcˈuˈjxin kiˈj. O tzaj tkˈoˈnxin Espíritu Santo ke, bix nakˈanan Espíritu tuj kanem tuˈntzen tel kniyˈ tiˈj n‑oc kakˈ te Dios. ⁶ Tzinen taˈ n‑oc kakˈ texin, cuma tej tpon tumel, e tzaj tkˈoˈnxin Cristo tuˈn tcyim te kxel. Aj il koˈ nejl, bix min‑al jun clol ke tuˈn kcoˈpj twitz kcastiwa tzul tkˈoˈn Dios. ⁷ Katzen at jun xjal baˈn tnaabl, pero amale baˈnt tnaabl, pero min‑al jun xjal jacˈa takˈ tiib te t‑xel tuˈn tcyim. Jacˈatzele at juun cykˈaˈ cyiib tuˈn tcyim te t‑xel jun xjal baˈn tnaabl, pero cykilcatle xjal jacˈa jaw kleeˈ tiˈj. Pero min‑al jun xjal cymel te t‑xel jun xjal kaˈ tnaabl. ⁸ Pero yal te Dios, e tzaj tkˈoˈnxin Cristo twitz txˈotxˈ tuˈn tcyim te kxel, amale aj ilet koˈ. Tiˈj tzunj lu e tyeecˈanxin tkˈakˈbil tcˈuˈjxin kiˈj. ⁹ Cuma oc kakˈ texin tej etoˈx tuj kil, qˈueleltzen kniyˈ tiˈj oj kpon tuj kˈij te stisbil tzul, nimxsen cˈonelxin kiˈj tuˈn Cristo tuˈn ktzakpet tiˈj kcastiwa binne tuˈn Dios, cuma jaˈlewe yaaˈn aj il koˈ twitz Dios, sino jiquen etoˈ twitzxin tuˈnj e bint tuˈn Cristo tej tel tz̈itj ttz̈qˈuel Cristo tuˈn kil. ¹⁰ Jnxiˈ nkbaˈna cuma e tzaj tkˈoˈn Dios tuˈn kten tuj ttz̈yal tuyaxin tuˈnj tcyimlen Tcwal te kxel tej lux koˈke nko chiˈlec tiˈjxin, qˈueleltzen kniyˈ tiˈj miˈntzen jawtl tkˈojxin kiˈj tuj jkˈij te stisbil tzul, cuma yaaˈntzen nko chiˈlectl tiˈjxin. Bix cuma onen Tcwalxin kiˈj tej tcyim, mlaytzen cyaj tkˈoˈnxin tonbilxin kiˈj jaˈlewe, cuma iˈtz tzunxin. ¹¹ Pero yaaˈn oˈcx tuˈn kclet twitz kcastiwa tuˈn Dios, sino jax juˈx nko tzalaj tiˈj Dios tuˈnj e bint tuˈn Kaaw Jesucristo tuˈn tweˈ tkˈoj Dios kiˈj.

Alcye o bint tuˈn Adán bix alcye o bint tuˈn Cristo

¹² Juˈtzen tten, key hermano, tuˈnj e bint tuˈn jun xjal, ja Cristo, at kchunkˈlal te junx maj. Pero tuˈnj e bint tuˈn juntl xjal tuj tneel, oc il twitz txˈotxˈ, bix juˈ tzunj cykil xjal oc tjakˈ tcawbil cyamecy. Tuˈnj aj ilke, eteˈ xjal tjakˈ tcawbil cyamecy. ¹³ Yaaˈn eteˈ xjal tjakˈ tcawbil cyamecy tuˈnj min txiˈ cyniman ley. Ktzkiˈntl jlu tuˈnj ti e baj tej mitknaˈx ttzaj tkˈoˈn Dios tley Moisés. Amale minttiiˈ ley e kˈoj cye xjal, pero at il cyxol xjal, cuma e cyim ke xjal. ¿E cyimpake tuˈnj il e bint cyuˈn? Min, cuma n‑el kniyˈ tiˈj ka mintiiˈ ley, mintiiˈ baˈn tel cyiiqˈuen. ¹⁴ Pero e biˈn kuˈn e cyim cykilca xjal e ten twitz txˈotxˈ tej mitknaˈx tkˈoj ley te Moisés. Amale mint el cyxooˈn jun ley e takˈ Dios tisenj el t‑xooˈn Adán, pero cykil e cyim. Ja tzunj lu nkˈonte tumel e cyimke yaaˈn tuˈnj el cyxooˈn jun ley, sino tuˈnj cyiyˈjil Adán. J‑il e bint tuˈn Adán biˈx e tiikˈ cykil xjal. Jax juˈx j‑e bint tuˈn Jesucristo mas yaj jax biˈx e cyiikˈ ke xjal. ¹⁵ Pero j‑o tzul kibaj tuˈnj e bint tuˈn Cristo yaaˈn juˈ tisenj ul kibaj tuˈnj e bint tuˈn Adán, cuma jcoˈpbilte ke ul tuˈn Cristo mas tipemal twitzj cyamecy ul kibaj tuˈn Adán. Amale oquet ke xjal tjakˈ tcawbil cyamecy tuˈnj il e bint tuˈn Adán, pero jxtalbil ntzaj tkˈoˈn Dios cye xjal tuˈnj e bint tuˈn Jesucristo, nbajtzen twiˈ cyamecy tuˈn, cuma mas tipemal. ¹⁶ Jcoˈpbil ke e tzaj tkˈoˈn Dios, e cub tyeecˈan mas tipemal twitzj il e bint tuˈn Adán. Tuˈnj nuk junx il e bint tuˈn Adán, e tkba Dios cykilca xjal oc te kaˈ twitzxin. Pero amale atet nim il jaˈlewe, jcoˈpbil e tzaj tkˈoˈn Dios at tipemal tuˈn tnajset cykilca il, yaaˈn nuk oˈcx te Adán til. ¹⁷ Katzen nuk tuˈn til jun xjal oca ke xjal tjakˈ tcawbil cyamecy, yajtzen tuˈn Jesucristo chi eletz tzokpaj xjal tjakˈ tcawbil cyamecy, cuma mas jawnex tipemalxin, bix chi cawel tuyaxin te junx maj, ejeeˈj nchi ocslan tiˈj jawnex t‑xtalbil Dios, ejeeˈj jiquen eteˈ twitz Dios.

¹⁸ Juˈ tzunj, tiˈj nuk jun maj min e tniman Adán tley Dios, e tkba Dios il tiˈj chi xeˈl cykilca xjal tuj castiwa. Pero te Cristo, e tnima texin ja Dios tej t‑xiˈ tkbaˈn Dios texin tuˈn tcyimxin. Bix tiˈ tzunj juˈwa junx tnimbil Cristo, at tuj tkˈab Dios tuˈn t‑xiˈ tkbaˈn jiquen ke xjal twitzxin, bix tuˈn ttzaj tkˈoˈnxin cychunkˈlal te junx maj. ¹⁹ Tumel eˈla e tkba Dios il tiˈj chi xeˈl xjal tuj castiwa, cuma tuˈn til jun xjal oc ke xjal aj il. Jax tumelte oj tkbante Dios jiquen eteˈ xjal twitzxin, cuma tuˈnj tnimbil jun xjal ja Cristo, jaxte e cyajtzen ke xjal jiquen twitzxin.

²⁰ Yaltzen te tley Moisés, ¿tikentzen e tzaj tkˈoˈn Dios? E tzaj tkˈoˈn Dios tuˈn tcub tyeecˈanxin oj at tcawbilxin, mascˈa n‑el cyxooˈn xjal tcawbilxin. Pero amale mascˈat e binchanx ke xjal il, pero t‑xtalbil Dios mas tipemal twitzj il e bint cyuˈn xjal. ²¹ Mas tipemal t‑xtalbil Dios, tuˈntzen miˈn ko tentl tjakˈ tcawbil cyamecy, sino tuˈntzen juˈ ko temel tjakˈ t‑xtalbil Dios. O tkba Dios jiquen koˈ twitzxin tuˈnj e bint tuˈn Kaaw Jesucristo. Juˈ tzunj at kchunkˈlal te junx maj mintiiˈ tbajlel.

Tuˈnj kmojbabl kiib tuya Cristo otzen cyaj jknaabl aj il te ootxa

6  Katzen juˈ ttena ja t‑xtalbil Dios at mas tipemal twitz il, jeyˈ, kape nxiˈ cybisena tiˈj tuˈn tbint mas il cyuˈna, cuma tuj cywitza cˈajbel cyila te Dios tuˈntzen tyeecˈante jaj te Dios t‑xalbil at mas tipemal. ² ¿Pero tikentzen tzakpiˈn koˈ tjakˈ tcawbil il tuˈn Cristo ka nuk kajx tuˈn kmeltzˈaj juntl maj tuˈn tbint il kuˈn? ¿Mimpa tzˈel cyniˈya tiˈj o cyim tej knaabl aj il? ³ Cytzkiˈntl tzuna tej kocslan tiˈ Cristo Jesús, octzen koˈ junxsen tuyaxin. Attzen kmojbabl kiib tuyaxin. ¿Pero mimpa tzˈel cyniˈya tiˈj tuˈn kmojbabl kiib tuyaxin, tisenxsen e xiˈ koˈ tuyaxin tej tcyimxin? ⁴ Tuˈn tzunj kmojbabl kiib tuya Cristo, otzen cyaj jknaabl aj il te ootxa tuj cyamecy tuˈnxin. Bix tisen e jatz itzˈjxin juntl maj tuj cyamecy tuˈn tipemal Kman Dios, jax juˈx o tzˈitzˈj jun kchunkˈlal acˈaj. ⁵ Jaxte at jun acˈaj kchunkˈlal, cuma at kmojbabl kiib tuya Cristo yaaˈn nuk oˈcx tej tcyimxin, sino jax juˈx tej tjatz itzˈjxin tuj cyamecy. Juˈ tzunj at kchunkˈlal acˈaj. ⁶ Qˈuelel kniyˈ tiˈj jaan jknaabl aj il e cyim tuya Cristo twitz cruz. E cub byet‑xin tuˈntzen tbaj tilel cykil il, tuˈntzen miˈntl ko ten tjakˈ tcawbil il. ⁷ Tisentzen jun xjal cyimne miˈn tentl tjakˈ tcawbil juntl xjal, cuma otk cyim, jax juˈx koˈ, yaaˈn etoˈ tjakˈ tcawbil il ka at kmojbabl kiib tuya Cristo. Tzakpiˈn koˈ tiˈ tcawbil il, cuma tuˈn kmojbabl kiib tuya Cristo, o cyim jknaabl aj il. ⁸ Cuma e cyim knaabl aj il tuˈn kmojbabl kiib tuya Cristo, jaxte cˈajbel kmojbabl kiib tuyaxin tuˈn at kchunkˈlal acˈaj tuyaxin, cuma yaaˈn nuk oˈcx e cyimxin, sino jax juˈx e jatz itzˈjxin juntl maj tuj cyamecy. ⁹ Tuˈn kmojbabl kiib tuyaxin, mlay ko aj meltzˈaj tjakˈ tcawbil cyamecy, cuma ktzkiˈn e jatz itzˈjxin juntl maj tuj cyamecy bix mlay cyimxin, cuma jcyamecy mintiiˈtl tcawbil tibajxin. ¹⁰ Miˈn cyimxin juntl maj, cuma tej tcyimxin, e baj tilel il te junx maj. E cyaj il tuˈnxin tuj cyamecy, bix itzˈjxin tuˈn tajbenxin te Dios. ¹¹ Jax juˈxse ke. Qˈuelel kniyˈ tiˈj tuˈn kmojbabl kiib tuyaxin o cyaj kkˈoˈn kil, bix at kchunkˈlal acˈaj tuˈn kajben te Dios.

¹² Entonces, qˈuelel cyniˈya tiˈj miˈn ko tentl tjakˈ tcawbil il. Juˈ tzunj, key hermano, miˈn cyakˈ cyiiba juntl maj tjakˈ tcawbil il. Miˈn txiˈ cyiiˈna jtajbil cyxumlala yaaˈn baˈn. ¹³ Miˈn txiˈ cykˈoˈna ambil te cyxumlala tuˈn tbinchan kaˈ, sino juˈ cykˈaˈ cyiiba tuˈn cyajbena te Dios. Nejl e tenkey tjakˈ tcawbil cyamecy, pero jaˈlewe o kˈoj acˈaj cychunkˈlala tuˈn Dios. Juˈ tzunj cykˈoˈnc cyipena tuˈn tajben cyxumlala te Dios tuˈn tbint baˈn tuˈn. ¹⁴ Ja te Dios cxeˈl cynimana, cuma yaaˈn eteˈtla tjakˈ tcawbil il. Nejl tej cykˈon cyiiba tiˈ jun ley tuˈn cycleta, e chicˈajaxsen at nim tipemal il cyibaja. Pero jaˈlewe mintiiˈtl tipemal il cyibaja, cuma tuˈn t‑xtalbil Dios o chi tzakpeta tiˈj tej toc chkˈetkey te nimlte tleyxin tuˈntzen cycleta.

Il tiˈj tuˈn kbinchante baˈn cuma te Dios koˈ

¹⁵ Kapetzen tuj cywitza baˈn tuˈn tbint il kuˈn, cuma o kiikˈ t‑xtalbil Dios, bix juˈ tzunj mintiiˈtl il tiˈj tuˈn t‑xiˈ kniman ley. Pero yaaˈnxsele tumel ka nxiˈ cybisena juˈwa. ¹⁶ ¿Mimpa tzˈel cyniˈya tiˈj ka cykˈon cyiiba tuˈn t‑xiˈ cynimana jun xjal, jatzen xjalja cˈoquel te cyaawey? Jax juˈx tuya il. Ka cykˈon cyiiba tuya il, cykˈontzen cyiiba tjakˈ tcawbil il, bix cxeˈl tiiˈn ejeeˈy tuj cyamecy. Pero ka cykˈon cyiiba tuˈn cynimana Dios, ja tzunxin cyaawey, bix chi elela jiquen twitzxin. ¹⁷ Chjonte Dios miˈn chi tentla tjakˈ tcawbil il, sino o cynimana tuya cykil cycˈuˈja jxnakˈtzbil jaxxix e pon cyxola. ¹⁸ O chi tzakpeta tjakˈ tcawbil il. O chi oca tuj tcwent Dios tuˈn tbint baˈn cyuˈna.

¹⁹ Cyiw chˈin tuˈn tel cyniˈya tiˈj nyola. Juˈ tzunj ma txiˈ ntzˈiˈbena cyey otk tzˈoc il te cyaawey nejl. Ajben cyxumlala tuˈn tbint kaˈ cyuˈna, bix nim min e xiˈ cynimana ley. Jawnex e jaw cyila. Pero yaltzen jaˈlewe iltzen tiˈj cˈajbel cyxumlala tuˈn tbint jun baˈn cyuˈna. Ka ma bint cyuˈna juˈwa, nchi ajben tzuna te Dios. ²⁰ Nejl tej cytena tjakˈ tcawbil il, mintiiˈ cyaja te tuˈn cyxiˈ lpey tiˈj baˈn. ²¹ ¿Titzen e cycamey tej cybinchana il? Mintiiˈ, cuma oˈcx ma takˈ cychˈixewa jaˈlewe tiˈj e bint cyuˈna nejl, bix cuma at tuˈn cyxiˈy tuj cyamecy tuˈn. ²² Pero yal jaˈlewe o chi etz kˈiˈna tjakˈ tcawbil il. Tjakˈtzen tcawbil Dios eteˈy, bix o kˈoj cyey tuˈn cycub tena sakxix bix tuˈn at cychunkˈlala mintiiˈ tbajlel. ²³ Qˈuelel kniyˈ tiˈj kej xjal nchi ajben tjakˈ tcawbil il, jatzen chojbil cyej cycyamecy. Pero kej xjal cykˈon cyiib te Dios, nkˈontzen Dios cychunkˈlal mintiiˈ tbajlel tuˈnj at cymojbabl cyiib tuya Kaaw Cristo Jesús.

Jun xnakˈtzbil tiˈj mejoblenel

7  Key hermano, ejeeˈy jun wik xjal n‑el cyniˈya tiˈj ti tten ley te twitz txˈotxˈ. Juˈ tzunj cytzkiˈna oj tcyim jun xjal, min cawetl ley tibajxin. Oˈcx tiˈj iˈtz koˈ ncawentzen ley kibaj. ² Cxeˈl nkˈoˈna jun tumel cyey ti tten oj ttzakpet jun xjal tiˈ ley tuˈn cyamecy. Tzin tkbaˈn ley il tiˈj ctemel xuuj tuya tchmil. Jaj iˈtzxxin, attzen xuuj tjakˈ jley tzin tkbaˈn tuˈn tten majebil tuya tchmil. Pero oj tcyim tchmil xuuj, tzakpiˈntltzen taˈ xuuj tuj ley. ³ Katzen ma maje xuuj tuya juntl xinak iˈtzx tchmil, tzin tkbaˈntzen paˈl najleˈntzen xuuj. Pero katzen otk cyim tchmil xuuj, tzakpiˈntzen taˈ xuuj tuj jley tzin tkbaˈn il tiˈj ctemel tuya tchmil. Katzen taj xuuj maje tuya juntl xinak, yaaˈntzen paˈl najleˈnxuj. ⁴ Key hermano, tisenxsen ntzakpet xuuj tiˈ ley te najleˈn tuˈn jun cyamecy, tuˈntzen tmaje tuya juntl xinak, juˈxsen ke. O ko tzakpet tuj tkˈab ley jax tuˈn jun cyamecy, jaj tcyamecy Cristo, tuˈntzen at kmojbabl kiib tuya Cristo, jaj xjal e jatz itzˈj juntl maj tuj cyamecy. At kmojbabl kiib tuya Cristo tuˈntzen kajben te Dios tuˈnj baˈn nbint kuˈn. ⁵ Nejl tej lepchx koˈ tiˈ ootxa knaabl, e bint‑x kuˈn nuk jaj kajbil yaaˈn baˈn. E kajbe tuˈn tbint kuˈn j‑e tkba ley tuˈn miˈn bint kuˈn. Bix tuˈnj e xiˈ lpe koˈ cyiˈj kajbil yaaˈn baˈn, ajben koˈ te taawj kˈilx cye xjal tuj cyamecy. ⁶ Pero jaˈlewe tzakpiˈn koˈ tjakˈ tcawbil ley. Min ko tentl tjakˈ tawbil ley, tisenxsen jun xjal oj tcyim min tentl tjakˈ ley. Ya nko niman Dios yaaˈn tuˈnj chkˈoˈn koˈ tuˈn ley, sino cuma kaj tuˈn kajben texin tuya cykil kcˈuˈj.

Kˈiˈn ootxa knaabl aj il kuˈn

⁷ Katzen tuˈn ley at kil, jeyˈ, ¿kaˈpatzen ley? Min. Te ley min tzˈoc tlojoˈnte ejooˈ tiˈ il. Ulte ley nuk te kbalte at kil. Tisen tzunj, nejl oc nkˈaˈbena tikˈch cye wuyena, pero min el nniˈya tiˈj ka yaaˈn baˈn jlu. Pero tej toc nbiˈna tley Dios ka yaaˈn baˈn toc nkˈaˈbena tikˈch cye xjal at, eltzen nniˈya tiˈj kaˈtzen e bint wuˈna. ⁸ Tej tkbante ley tuˈn miˈn tzˈoc nkˈaˈbena tikˈch at, pero jnnaabla aj il tcyˈi tzˈoc tbiˈn jlu. Oˈcx oc tkˈaˈben tikˈch at. Nukettzen mintiiˈ ley, mintzele e cnet jwila. ⁹ Nejl tej mitknaˈx toc nbiˈna ti toc tuˈn ley, eˈlexse tuj nwitza baˈn kena. Pero tej tul ley jyol wila, e chicˈajaxse iˈtz taˈ wila, bix el nniˈya tiˈj yaaˈn baˈn kena. Cyimnen kena. ¹⁰ Jley e tkba ko camal kchunkˈlal te junx maj ka ma kniman. Pero min e nnimiya, bix nuk e xiˈ tiiˈn kena tjakˈ tcawbil cyamecy. ¹¹ Tuj nwitza ul ley te onl te weya tuˈn ncamana nchunkˈlala te junx maj, pero yaaˈn juˈwa. Ajben nuk tuˈn tyeecˈante aj il kena, bix at tuˈn ncyima tuˈn wila. ¹² Juˈ tzunj, key hermano, amale tzint tyeecˈan tley Dios aj il koˈ, qˈueleltzen kniyˈ tiˈj yaaˈn ley kaˈ. Jaca juun ley sakxsen bix jiquenxsen bix baˈnxsen.

¹³ Kape cykbaˈy yaaˈn baˈn ley, cuma tuˈn ley oc koˈ tjakˈ tcawbil cyamecy. Pero yaaˈn tuˈn te ley. Tuˈn ilte ocx koˈ tjakˈ tcawbil cyamecy. Tuˈnj ootxa knaabl min e xiˈ kniman jley baˈnxix, bix juˈ tzunj ocx koˈ tjakˈ tcawbil cyamecy. Jatzen tajbel leyj nuk tuˈn tchicˈajax kaˈxsen knaabl ootxa. ¹⁴ N‑el kniyˈ tiˈj baˈn ley, cuma jley jax tnaabl Dios. Pero yal ke, at knaabl aj il tjakˈ tcawbil il. ¹⁵ Chicˈaj tjakˈ tcawbil il taˈ ootxa knaabl, cuma jbaˈn kaj tuˈn tbint kuˈn min nbint kuˈn, sino jaj kcyˈi tuˈn tbint, nbint kuˈn. ¹⁶ Katzen tzin kkbaˈn yaaˈn baˈn jnbint kuˈn, nyeecˈatzen jlu baˈn te ley tuj kwitz, cuma jax juˈx ley tzin tkbaˈn jnbint kuˈn yaaˈn baˈn. ¹⁷ Katzen nbint kuˈn jkcyˈi, tzin tyeecˈatzen yaaˈn ejooˈ nko binchante sino knaabl aj il nbinchante. ¹⁸ N‑el kniyˈ tiˈj te junxse maj kaˈ ootxa knaabl aj il, cuma amale kajat tuˈn tbint baˈn kuˈn, pero min tcuyan knaabl aj il tuˈn tbint. ¹⁹ Kaj tuˈn tbint baˈn kuˈn, pero min nbint. Pero jkaˈ kcyˈi tuˈn tbint, nbint kuˈn. ²⁰ Pero ka nbint jkcyˈi, n‑eltzen kniyˈ tiˈj yaaˈn ejooˈ nko binchante il, sino jaj knaabl aj il. ²¹ Juˈ tten kchunkˈlal. Kaj tuˈn tbint baˈn kuˈn, pero jaj knaabl aj il nmyonte. ²² Tuj kanem n‑oc takˈ tley Dios ke, ²³ pero at juntl knaabl nakˈanan te myolte ti taj kanem, jaj knaabl aj il, bix tzyuˈn koˈ tuˈn. ²⁴ ¡Lastim koˈ! ¿Al ccoˈplte ke tjakˈ tcawbil jknaabl kaˈ nxiˈ tiiˈn ejooˈ tuj cyamecy? ²⁵ ¡Cxeˈl kkˈoˈn chjonte te Dios ma ko coˈpj tuˈnxin tuˈn Kaaw Jesucristo!

Juˈtzen ma tzˈel kniyˈ tiˈj tuj kanem kaj tuˈn kniman ley te Dios, pero taj knaabl aj il tuˈnx kxiˈ lpe tiˈ il.