Chronological

Tej tpon Pablo tuj tcwentel Macedonia bix tuj tcwentel Grecia

20  Tejtzen tbaj twiˈ jkˈoj e jaw, bix e tzaj ttxcoˈn Pablo ke ocslal te Efeso, tuˈn t‑xiˈ tkˈoˈnxin ke tyolxin baˈn cye.

Tejtzen tpon baj ke tyolxin, bix e kˈolbenxin cyuya ocslal, bix e xiˈxin tuˈn tiyˈxxin tuj mar, tuˈn tponxin tuj ttxˈotxˈ Macedonia. ² Tejtzen tponxin tuj Macedonia, bix akˈ Pablo betel tuj jaca juun tnom. Tuj jaca juun lugar oc tnimsaˈnxin, bix oc tkˈoˈnxin cyipemal ocslal tuya tyolxin. Cwa tetzxin tuj Macedonia, bix e ponxin tuj ttxˈotxˈ Grecia. ³ Jatztzen Grecia e tema Pablo oxe xjaw. Tejtzen tpon baj oxe xjaw tuj Grecia, bix e cub tniqˈuen Pablo tiˈj tuˈn tocxxin tuj tbarcxin, tuˈn t‑xiˈxin tuj ttxˈotxˈ Siria, te ocne. Pero tejtzen binne ttenxin tuˈn tocxxin tuj barc, bix e tbixin ka tuˈn niqˈuen cyuˈn judío tuˈn ttzyet‑xin. Entonces bix e cub tchˈixbeˈnxin tiˈj, bix e xiˈxin tuˈn tkenxin tuj Macedonia juntl maj, tuˈn t‑xiˈ tiiˈn jun barc jaxin.

Juˈj e xiˈ ttzˈiˈben Pablo cye ocslal tuj Roma

Kˈolbebl tuˈn Pablo cye ocslal tuj Roma

1  Key ocslal tuj Roma,

Inayena Pablo. Jun t‑akˈanal Jesucristo kena. Scyˈoˈn kena tuˈn Cristo te kbalte jbaˈn tyol Dios. ² Jtyol Dios tzin nkbaˈna tiˈj colbil ke jaxj e cyaj tkˈoˈn Dios cye kbalte tyol Dios nejl. Tzˈiˈben cyuˈn tuj tyol Dios jawnex. ³ Jbaˈn tyol Dios lu nyolen tiˈj Tcwal Dios. Oc Tcwal Dios te xjal, bix tej titzˈjxin, ocxin te tiyˈjil David. Jatzen xjalja Kaaw Jesucristo. ⁴ Pero amale oquet‑xin te xjal, pero Tcwal Dios texin. Jatztzen e chicˈajaxen tuya nim tipemal tej tjatz itzˈjxin tuj cyamecy juntl maj. ⁵ Ja tzunxin e tzaj kˈonte waakˈena te weya tuˈn woca te t‑xelxin. Nchin kˈumena tyol Dios tuj cykilca tnom tuˈntzen t‑xiˈ cyniman xjal Dios tuˈnj n‑oc ke cycˈuˈj tiˈ Cristo. ⁶ Bix cyxoltzen cykilca tnom cyuyax xsuna ejeeˈy te Roma. Cyuyaxa o chi oca te t‑xjal Jesucristo. ⁷ Tetzen cyey, ejeeˈy ocslal te tnom Roma, nxaˈ ntzˈiˈbena ja wuˈja lu. N‑oc cyakˈa te Dios. Tuˈnxit t‑xtalbil Kman Dios bix Kaaw Jesucristo tzaaj cyibaja, bix tzajxit cykˈoˈnxin te cyey tuˈn cytena tuj ttz̈yal.

Tej tkbante Pablo tuˈn tpon kˈolbelte cye ocslal eteˈ tuj Roma

⁸ Tneelxix, cxeˈl nkbaˈna cyey nchin kˈona chjonte te Dios nuk tuˈn Jesucristo cyiˈja cykilcakey. Tuj cykilca twitz txˈotxˈ ma tzˈabij cyiw eteˈy tuj cyocslabla. ⁹ Tuya cykil ncˈuˈja nchin ajbena te Dios tuˈnj nchin kˈumena jbaˈn tpocbal Tcwalxin. Bix ttzkiˈn Dios min chin weˈya nkaniya onbil cyey te Dios. ¹⁰ Jaca kˈij nchin kanena texin tuˈn ttzaj tkˈoˈnxin amleˈn weya tuˈn npona cyxola. Kape chˈix tpon tumel tuˈn tkˈontexin amleˈn wiˈja tuˈn npona cyuyey. ¹¹ Wajxsen chin pon cyuyey, tuˈntzen tcyaj nkbaˈna cyey ti ma tkba Dios weya, tuˈntzen cycywixa mas tuj cyocslabla. ¹² Pero yaaˈn nuk ejeeˈy chi cywixela mas tuj cyocslabla, sino jax juˈx weya ctzaal cynimsaˈna ncˈuˈja oj npona cyxola. Oj toc ncyeˈyena ka cyiw eteˈy tuj cyocslabla tiˈ Cristo, jatzen cyiwsabl ncˈuˈja, tisenxj oj toc cycyeˈyena inayena cyiw ntiiniya tuj wocslabla, jax juˈx cyey ccywixel cycˈuˈja. ¹³ Key hermano, waja cybiy chˈima maj e cub wuˈna tuˈn npona cyxola maa tuj Roma. Pero hasta jaˈlewe mix nchin poniya. E wajbeˈya tuˈn npona tuˈn nkˈumena tyol Dios cyey, tuˈntzen tajben cyey, tisen o bint wuˈna cyxol niyˈtl ocslal yaaˈn judío. ¹⁴ O tzaj tkbaˈn Dios weya tuˈn t‑xiˈ nkbaˈna te cykilca xjal j‑o tzaj tkbaˈn weya. Il tiˈj cxeˈl nkbaˈna cyej xjal griego bix cyej xjal yaaˈn griego, bix cyej xjal nmak xjal, bix cyej xjal ajnintzxse. ¹⁵ Juˈ tzunj nim nganiya tuˈn t‑xiˈ nkbaˈna baˈn tpocbal Cristo te cyey aj Roma, tisen o bint wuˈna cye niyˈtl xjal.

Jun tipemal tpocbal Cristo

¹⁶ Weya mintiiˈ nchˈixewa tuˈn t‑xiˈ nkbaˈna tpocbal Cristo, cuma tzin tyeecˈan jaja tipemal Dios. Te cyekej tzin cyocslaˈn, ejeeˈtzen chi cletel. Seyle judíoke oc cybiˈn jtpocbal ja yol lu nejl, bix seyle yaaˈn aj judíoke, pero ja yol lu at tajbel tuˈn cyclet. ¹⁷ Najben tpocbal Cristo, cuma tzin tkbaˈn ti tten tuˈn cyoc xjal jiquen twitz Dios. Oˈcx oj toc ke tcˈuˈj jun xjal tiˈ Cristo, jiquentzen taˈ twitz Dios. Tzin tkbaˈn tyol Dios cyjulu: “Jiquen taˈ jun xjal twitz Dios nuk oˈcx tuˈnj n‑oc ke tcˈuˈj tiˈ Dios,” tz̈i tyol Dios.

Cykil koˈ at tuˈn tcub kcastiwa

¹⁸ Yaltzen cyej xjal min tzˈoc cybiˈn bix nuk jaj kaˈ nbint cyuˈn, n‑el kniyˈ tiˈj ctzaal castiwa tuˈn Dios tuj cyaˈj cyibaj. Tuˈnj kaˈ nbint cyuˈn, ya mintl ncheˈx lpe tiˈ Dios jaxxix. ¹⁹ Yaaˈn tuˈnj min tzˈel cyniyˈ tiˈj, cuma o txiˈ tyeecˈan Dios cye ti tten. ²⁰ Telniyˈ ti tten Dios, cuma jatxe tej tbaj tbinchaˈnxin twitz txˈotxˈ jatzen tyeecˈantexin nimxsen tipemalxin. Amale yaaˈnt chicˈajxin, n‑el cyniyˈ xjal tiˈj at‑xin. Oj n‑oc cycyeˈyen cykilca o bint tuˈnxin, n‑eltzen cyniyˈ tiˈj at Dios, bix at tipemalxin te junx maj. Juˈ tzunj mlay chi akˈtl xjal oj ttzaj tkˈoˈnxin cycastiwa tuˈnj el cyiiqˈuen jaxin. ²¹ Amale ot tzˈel cyniyˈ tiˈj at Dios, pero min o jaw cynimsaˈn tbixin. Min o txiˈ cykˈoˈn chjonte texin, sino o cyocsla juntl xnakˈtzbil yaaˈn jaxxix tiˈj ti tten tbinlen twitz txˈotxˈ. Tuˈnj o cheˈx lpeke tiˈj yol te tzpetsalcye, biˈx o cyaj ttzpetke tuˈn. ²² O chi kban ka n‑el cyniyˈ tiˈj, pero min o tzˈel cyniyˈ tiˈj. ²³ Min o jaw cynimsaˈn tbi Jdios mintiiˈ tbajlel, sino nuk oˈcx cye xjal o jaw cynimsaˈn cyechel xjal bix cyechel chˈit bix cyechel lbaj bix cyechel mastl alimaj. O jaw cynimsaˈn ke xjal kej lu, pero cyimneke. ²⁴ O cyaj cycolen Dios. Nuk kaˈ o cyajbe tuˈn tbint cyuˈn. Juˈ tzunj o chi cyaj tcyeˈyen Dios tuˈnx cyxiˈ lpe tiˈj kaˈ cyajbil. Bix tuj chˈixbajilxse o chi pone baj tuˈnj kaˈ o bint cyuˈn tuya cyxumlal. ²⁵ Min o cheˈx lpeke tiˈ tyol Dios jaxxix, sino o cheˈx lpeke nuk tiˈj ẍtakˈbil yol. Min o jaw cynimsaˈn xjal tbi jxin Dios binchal cykilca, sino nuk oˈcx cye xjal o jaw cynimsaˈn kej tbinchbil Dios. Pero ja Dios tuˈn tnimj te junx maj. Juˈxit tzuna.

²⁶ Cuma nuk ejeeˈj tbinchbil Dios o jaw cynimsaˈn, juˈ tzunj o chi cyaj tcyeˈyen Dios tuˈn cyxiˈ lpe tiˈj cyajbil te chˈixbajil. Tisen tzunkej xuuj, yaaˈntl nuk cye xinak o chi ajbeˈnake tisenx tten achbil, sino bix o chi jaw meltzˈaj xuuj cyuya xuuj. ²⁷ Jax juˈx ke xinak, o cyaj cykˈoˈn cyachbil cyuya xuuj, tuˈntzen cyjaw meltzˈaj xinak cyuya xinak tuya nim cyachbil cyiˈj. Nimxsen chˈixbajil oj cyjaw maje xinak cyuya xinak. Cuma o cyaj cykˈoˈn Dios, ccyiikˈeltzen cycastiwa.

²⁸ Kej o tzˈel cyiiqˈuen Dios, tuj cywitz yaaˈn il tiˈj tuˈn tel cyniyˈ tiˈ Dios. Juˈ tzunj o chi cyaj tcyeˈyen Dios tuˈn t‑xiˈ cyiiˈn cyex cyajbil yaaˈn baˈn, tuˈntzen tbint cyuˈn cykilca yaaˈn tuj tumel. ²⁹ Nuk oˈcx jyaaˈn baˈn tuj twitz Dios nbint cyuˈn. Nuk lepchke tiˈ cykil kaˈ. Nuk n‑el cycˈuˈj tiˈj cye juntl. Nuk nchi yasen cyiˈ xjal. Nuk nchiˈl cycˈuˈj cyiˈ cabtl. Byol xjalke. Aj kˈojke. Sbul xjalke. Iicˈbel xjalke. Nuk nchi yolen kaˈ tiˈ cabtl. ³⁰ Nuk nchi kˈumen cypaltel xjal cye cabtl. Iicˈbel Dioske. Nchi jaw cyakbil cyxol xjal. Mintiiˈ onbil cyaj. Nuk nbaj cyniman cyiib. Nuk nchi ximan tiˈ jun kaˈ tuˈn tbint cyuˈn. Min cybi tcawbil cyman. ³¹ Min tzˈel cyniyˈ tiˈj baˈn tuya kaˈ. Min nbint cyuˈn alcyej nxiˈ cykˈumen. Min tzˈoc cyakˈ ke te cyja cye. Ka at jun kˈoj, cycyˈi tuˈn tbaj tilel. Mintiiˈ tkˈakˈbil cycˈuˈj cyiˈ cabtl. ³² Tzin tkbaˈn tyol Dios cykil kej xjal nchi binchan kej kaˈ lu, ccyiikˈeltzen cycastiwa, jaj tuˈn cycyim. Amale n‑elet cyniyˈ tiˈj chi cymel tuˈnj kaˈ nbint cyuˈn, pero min chi weˈ tuˈn tbint mas il cyuˈn. Bix yaaˈn oˈcx nbint il cyuˈn, sino nchi jaw tzalaj oj nbint il cyuˈn cabtl.

Tzul tkˈoˈn Dios tcastiwa teeylex juun laˈ alcye xbint tuˈn

2  Ja tzunkej xjal cyxola nchi mlon tiˈ cybinchbil kej xjal kaˈ nbint cyuˈn, cyuyax mlay cycol cyiib twitz Dios. Ka tzin cykbaˈna aj il kej xjal lu tuˈnj kaˈ nbint cyuˈn, cyuyaxa aj ilkey, cuma nbint cyuˈna tisenx nbint cyuˈn. ² Tzin cykbaˈna cyjulu: “Ejooˈ ktzkiˈn tkˈaˈ Dios cycastiwa te cykilca kej xjal nbint il cyuˈn juˈwa, laˈ alcye il nbint cyuˈn,” tz̈ikey. ³ Ka nchi yolena cyiˈ aj il tuˈnj il nbint cyuˈn, bix juˈx key nbint il cyuˈna, ¿tiiˈn cwaˈ cybisena chi elela libre tiˈ cycastiwey tzul tuˈn Dios? ⁴ O tzaj tkˈoˈn Dios nim xtalbil te cyey. Chˈima maj o weˈ tkˈojxin cyiˈja bix o tziyˈx tuˈnxin cyiˈja. Pero miˈn tkba cycˈuˈja ka miˈn tzaj cycastiwey tuˈn Dios tuˈnj cyila. O tzaj tkˈoˈnxin kej xtalbil lu tuˈntzen tcyaj cykˈoˈna cyila. ⁵ Pero kej cyxola n‑el cyxooˈn t‑xtalbil Dios, bix min cyaj cykˈoˈn cyil, nbaj tchmoˈn Dios cycastiwa. Ccyiikˈel cycastiwa oj tpon tumel tuˈn toc jaca juun xjal tuj xkelbil tuˈn Dios, bix cˈoquel tcyeˈyenxin tiˈxix tumel. ⁶ Ctzaal tkˈoˈnxin teeylex juun laˈ alcye xbint tuˈn. ⁷ Ctzaal tkˈoˈnxin chunkˈlal te junx maj cyej xjal nbint jtajbil Dios cyuˈn bix n‑oc cyipen tuˈn cypon tuya Dios bix tuˈn cycaman cycotz bix cychunkˈlal mintiiˈ tbajlel. ⁸ Pero ja tzunkej xjal min cyniman ti taj Dios bix nuk nchi jyon cyex cyajbil bix nuk jaj kaˈ nbint cyuˈn, cyibajtzen cˈuˈla tkˈoj Dios bix cycastiwa. ⁹ Jaca juun xjal aj il nim qˈuixcˈaj bix nim bisbajil qˈuiyax tuˈn tuj tcastiwa. Judíole, bix yaaˈnle judío, pero cykil aj il ccyiikˈel cycastiwa. ¹⁰ Ja tzunkej xjal baˈn nbint cyuˈn, chi pomel jaaˈ taˈ Dios bix chi camal cycotz bix chi temel tuj ttz̈yal. Judíole, bix yaaˈnle judío, pero cykilca kej nchi binchan baˈn, cycaman cycotz. ¹¹ Oj toc tcyeˈyen Dios ke xjal, min‑al jun mas jawnex twitz juntl. ¹² Cykilca kej xjal cyaj tuˈn tbint il cyuˈn, judíole, yaaˈnle judío, pero ccyiikˈel cycastiwa tuˈn Dios. Kej xjal yaaˈn judío min e cybi ti toc tuˈn tley Moisés. Juˈ tzunj miˈn tzˈoc tcyeˈyen Dios ejeeˈ laˈ ka e cynima tley Moisés bix ka min. Pero ctzaal tkˈoˈn Dios cycastiwa, cuma e binchanke il. Yal tzunkej xjal judío, e cyiikˈ tley Moisés. Juˈ tzunj jtley Moisés cˈajbel te Dios oj tmlon tiˈ cybinchben, tuˈntzen tkˈontexin cycastiwa kej min e cyniman tley Moisés. ¹³ Yaaˈn kej judío nuk n‑oc cybiˈn tley Moisés chi temel jiquen twitz Dios, sino nuk ejeeˈj nbint cyuˈn alcyej tzin tkbaˈn. ¹⁴ Ja tzunkej xjal yaaˈn judío, amale mint cytzkiˈn tley Moisés, pero tuj cyanem n‑el cyniyˈ tiˈj alcyej baˈn bix tiˈj alcyej yaaˈn baˈn. Ka jaj baˈn nbint cyuˈn, tzin cyyeecˈan at tley Dios tuj cyanem. ¹⁵ Amale mint cytzkiˈn tley Moisés, pero ka kˈiˈn tley Dios cyuˈn, nyeecˈantzen tisenx at tley Moisés tuj cyanem, cuma kej caˈba ley lu junx eteˈ. Ka tzin tkbaˈn cynaabl ka kaˈ nbint cyuˈn bix ka baˈn, juˈtzen ntyeecˈan at tley Moisés tuj cyanem. ¹⁶ Tuj tzunj kˈij oj toc tcyeˈyen Dios cykilca xjal, tujtzen tcwent Jesucristo cˈaale tkˈoˈn Dios tuˈn toc tcyeˈyen jcˈuˈn tuj cyanem xjal. Kej e cyniman, cchicˈajaxel jiquenke twitz Dios. Juˈ toc tuˈn tyol Dios, bix juˈx weya.

Tuj cywitz judío n‑el cyniyˈ tiˈj ti taj Dios

¹⁷ Ejeeˈtzen key judío, at juun cyey tzin cykbaˈna nintzaj t‑xjal Dioskey. Tzin cykbaˈna mintiiˈ cycastiwey tkˈaˈ Dios, cuma ejeeˈy e tjoy Dios tuˈn cyiikˈente cyey tley Moisés. Cuma ejeeˈy e tjoy Dios te t‑xjal, juˈ tzunj njaw cyniman cyiiba. ¹⁸ Tuj cywitza n‑el cyniˈya tiˈj ti taj Dios tuˈn tbint cyuˈna. Tuj cywitza kˈiˈn cyuˈna tuj tumel, cuma jaj tley Moisés xnakˈtzalte cyey ti tten tuˈn cyela baˈn. ¹⁹ Tuj cywitza n‑el cyniˈya tiˈj cykilca, bix juˈ tzunj te cyey cyaakˈena te xnakˈtzalte cyej xjal yaaˈn judío. Tisen mos̈ eteˈ cywitza. Tuj cywitza tuj klolj eteˈ, bix ejeeˈ tzuna te kˈolte spiˈyen te cye. ²⁰ Tuj cywitza ja cyaakˈenja te kbalte tyol Dios te cyej xjal min tzˈel cyniyˈ tiˈj. Tuj cywitza tisen cwalke, bix ejeeˈ tzuna cymaystra, cuma cyuya tzuna taˈ jmera tyol Dios, cuma at tley Moisés cyuyey. ²¹ Tuj cywitza jawnex maystrakey cye cabtl, pero min o cynimey jn‑oc cyxnakˈtzaˈna. Tzin cykbaˈna miˈn tzˈalkˈan jun xjal, pero ejeeˈxa nchi alkˈana. ²² Tzin cykbaˈna miˈn tzˈoc ipan jun xjal tiˈ t‑xuˈl juntl, pero ejeeˈxa nchi oc ipana tiˈ t‑xuˈl cyuyey. Tzin cykbaˈna kaˈ tuˈn toc cyniman xjal ke sant. Nuk ja Dios, tz̈ikey, pero ejeeˈxa min cynimey Dios. ²³ Cuma e tzaj tkˈoˈn Dios tley Moisés cyey, juˈ tzunj njaw cyniman cyiiba, pero min tzˈoc cynimena. Juˈ tzunj nchi yolen kej xjal yaaˈn judío kaˈ tiˈ Dios. ²⁴ Cycyeˈyenx ti toc tuˈn tyol Dios tiˈj lu. “Kej xjal yaaˈn judío, nuk xmucchabl te Dios tzin cykbaˈn tuˈnj kaˈ nbint cyuˈna, ejeeˈy judío,” tz̈i tyol Dios.

²⁵ Ke cyey judío n‑oc ke cycˈuˈja tiˈ cˈupbil ttzˈumel twiˈ cytzˈalbila te techel t‑xjal Dios tzunkey. Baˈn tej cyechela lu, pero oˈcx ka tzin cynimana cykilca tley Moisés. Pero amale atet cyechela toc, pero ka min cynimey tley Moisés, tisencˈax mintiiˈ cyechela. ²⁶ Pero ka at jun xjal yaaˈn judío tzin tniman tley Dios cˈuˈn tuˈn tanem, amale minttiiˈ techel toc tiˈj, pero tuj twitz Dios, t‑xjal Dioste. ²⁷ Ka jun xjal yaaˈn judío nniman tley Dios, amale minttiiˈ techel toc tiˈj, pero telniyˈ t‑xjal Dioste. Pero jun xjal aj judío, ka min tzin tniman tley Moisés, amale ot cpet tchuˈl bix amale atet tley Moisés tuya, pero telniyˈ yaaˈn t‑xjal Dioste. ²⁸ Yaaˈn t‑xjal Dios jun xjal tuˈnj aj judío bix tuˈn oc cpet t‑xumlal. ²⁹ Kej mero t‑xjal Dios ejeeˈj tzin cyniman Dios tuya cykil cycˈuˈj, yaaˈn nuk ejeeˈj o tzˈel keset chˈin cychuˈl. Jun xjal, tuˈn toc te t‑xjal Dios, il tiˈj tuˈn tnimante Dios tuj tanem, yaaˈn nuk tuˈn toc tcyeˈyen tley Dios twitz uˈj. Tuj cywitz judío, kej nchi el baˈn ejeeˈj toc cyechel tiˈ cychuˈl te yecˈbil t‑xjaltzen Dioske. Pero tuj twitz Dios, kej nchi el baˈn, ejeeˈj tzin cyniman Dios tuj cyanem.

3  Kape at juun cyey ctzaal cykanena weya cyjulu: “Katzen juˈ ttena, ¿titzen tajbel tuˈn oc te judío? ¿Ti oc tbinchen tej tel keset cychuˈl judío te techel t‑xjal Dioske?” tz̈i cybela juˈwa. ² Cxeˈl ntzˈakˈbeˈna cyyola, nim ajbeˈna. E tzaj tkˈoˈn Dios cye judío jawnex cyoclen te tzˈiblte bix te cˈuˈlte tyol Dios.

³ Pero kape cykbaˈy weya cyjulu: “Pero at nim judío el cyxooˈn tyol Dios. Juˈ tzunj mlay tniman Dios tyol e cyaj tkˈoˈn cye tuˈn toc te Cydios,” tz̈i cybela juˈwa. Pero cxeˈl nkanena cyey cyjulu: Amale mint e cyniman ke judío, ¿cwelpa tchˈixbeˈn Dios jtyol e cyaj tkˈoˈn? ⁴ ¿Cbinelpa tuˈn Dios juˈwa? ¿Atpa maj min tniman Dios tyol? ¡Yaaˈn juˈwa! Mas baˈn tuˈn t‑xiˈ kkbaˈn cykil xjal ẍtakˈ xjal twitzj tuˈn t‑xiˈ kkbaˈn ka ja Dios yaaˈn jiquen tyol. Tz̈i jun xjal tuj tyol Dios cyjulu: “Kman Dios, jiquen taˈ cykilca tey tyol. Mintiiˈ ẍtakˈbil tuj tyola. Ka ma tzˈoc cymlon xjal tyola tuˈn tcnet jun palt te tyola, pero mintiiˈ palt cnetel cyuˈn,” tz̈i jun xjal, tz̈i tyol Dios te yecˈbil jiquente Dios.

⁵ Kej judío tocx cyxola, kapetzen cykbaˈy weya cyjulu: “Yaaˈn tumel ka ma tzaj tkˈoˈn Dios kcastiwa tuˈnj il nbint kuˈn, cuma tz̈i cynkobela ajben te Dios oj nbint il kuˈn, cuma ka mintiiˈ il nbint kuˈn, mlay chicˈajax ja Dios jiquen,” tz̈i cybela. Pero ja tumel lu nuk cynaabl xjal te twitz txˈotxˈ. ⁶ Yaaˈn jaxxix. Ka tzin cykbaˈna yaaˈn tumel tuˈn ttzaj tkˈoˈn Dios tcastiwa jun aj il, jax juˈx tzin cykbaˈna mlay tzˈajben Dios tuˈn toc tcyeˈyenxin jaca juun xjal twitz txˈotxˈ ka baˈn e bint tuˈn bix ka kaˈ. Pero yaaˈn juˈwa. ⁷ Ka mintiiˈ toclenxin tuˈn ttzaj tkˈoˈnxin tcastiwa jun aj il, baˈntzen txiˈ tkbaˈn jun xjal ẍtakˈ cyjulu: “Oj nẍtakˈena, cˈajbeltzen tuˈn tchicˈajax min nẍtakˈen Dios. Juˈ tzunj yaaˈn tumel tuˈn ttzaj tkˈoˈn Dios ncastiwiya, cuma tuˈnj ẍtakˈ nyola cjawel nimset tbixin,” tz̈i xjal juˈwa. ⁸ Kane juˈwa, cxeˈlne kkbaˈn cyjulu: “Il tiˈj ko binchal il, tuˈntzen tchicˈajax ja te Dios baˈn,” tz̈i kbel. At juun tzin cykbaˈn juˈwa, pero ẍtakˈ cyyol. Ctzaal tkˈoˈn Dios cycastiwa te cyej xjal tzin cykbaˈn juˈwa, bix jiquen taˈ cwel cycastiwa tuˈn Dios.

Min‑al jun xjal tzˈaklxix, cykil koˈ at kil

⁹ Entonces, ¿cxeˈlpa kkbaˈn kej xjal wiyˈjila, ke judío, mas baˈnke tuj twitz Dios cywitzj kej xjal yaaˈn judío? ¡Min! Yaaˈn juˈwa, cuma ma txiˈ nkbaˈna cyey cykilca xjal, judíole, yaaˈnle judío, pero tocx tjakˈ tcawbil il. ¹⁰ Tz̈i tyol Dios julu: “Mi nuk jun xjal jiquen twitz Dios. ¹¹ Min‑al n‑el tniyˈ tiˈj ti ttenxin. Min‑al n‑oc tcˈuˈj tiˈjxin tuˈn tnimjxin. ¹² O cyaj cykˈoˈn tbexin cykil xjal. Mintiiˈtl cyajbel texin. Mi nuk jun xjal nbinchan baˈn. ¹³ Jtzin cykbaˈn tuya cytzi kaˈxsen, tisen t‑xewel cyimne tuj camposant. Cyaakˈ oˈcx tajbel te sbul xjal. Oj cyyolen, cytzalajebl cabtl nxiˈ tuj il, tisen n‑oc ttxˈaˈn lbaj tiˈ jun xjal biˈx cyjel tveneno tuj tchuˈl tuˈn t‑xiˈ tuj il. ¹⁴ Nim juubj yol n‑etz tuj cytzi, bix cˈa yol. ¹⁵ Nuk tiˈ chˈin julu ncub cybyoˈn xjal. ¹⁶ Jaaˈxja nchi pona, biˈx nxiˈ cykilca tuj il cyuˈn, bix niyˈx qˈuixcˈaj cyuˈn xjal cyuˈn. ¹⁷ Min cytzkiˈn ti tten tuˈn cyten tuj ttz̈yal. ¹⁸ Min tzul tuj cycˈuˈj tuˈn at ttz̈i Dios cyiˈj,” tz̈i cyley judío te yecˈbil aj il cykil xjal.

¹⁹ Juˈtzen tzin tkbaˈn cyley judío cykilca xjal aj il, bix n‑el kniyˈ tiˈj cyuyax judío, cuma ejeeˈn e tenke tjakˈ tcawbil cyley. Juˈ tzunj min‑al jun cye baˈn tkbante yaaˈn aj il. Cykilca xjal twitz txˈotxˈ, judíole, yaaˈnle judío, il tiˈj chi pomel te kbalte twitz Dios at cyil. ²⁰ Juˈ tzunj, tzinen taˈ min‑al jun xjal twitz txˈotxˈ cxeˈl jiquen twitz Dios tuˈnj e niman jleye tzaj tkˈoˈn Dios cye judío, cuma najben jley nuk oˈcx tuˈn tyeecˈante cykilca koˈ aj il.

Ma ko oc te tzˈaklxix nuk tuˈn kocslabl tiˈ Jesucristo

²¹ Pero jaˈlewe o txiˈ tyeecˈan Dios cye xjal at juntl tumel tuˈn cyoc jiquen twitzxin. Yaaˈn tuˈnj ley e tzaj tkˈoˈn Dios cye aj Israel tuˈnj Moisés, sino tuˈnj juntl. Jaj jun be e byan tuˈn Moisés, bix juˈx e byan cyuˈn cabtl tyolel Dios jatxe ootxa. ²² Ja tzunj lu. Ja te Dios kˈolte tuˈn koc jiquen twitzxin, bix ntzaj tkˈoˈnxin ja xtalbil lu te cyej xjal n‑oc ke cycˈuˈj tiˈ Jesucristo. ²³ Cykilca koˈ xjal o ko binchan il. Mi nuket jun xjal o txiˈ tiiˈn tchunkˈlal jiquen tisen tbanel tnaabl Dios. ²⁴ Nuk tuˈnj t‑xtalbil Dios tzin tkbaˈn Dios ejeeˈj n‑oc ke cycˈuˈj tiˈ Cristo, jiquen eteˈ twitzxin. Bix o cyaj tkˈoˈnxin ja xtalbil lu nuk oˈcx tuˈnj e xiˈ tchjoˈn Cristo Jesús chojbil kil tuˈntzen ktzakpet tiˈj kil. ²⁵ E tzaj tkˈoˈn Dios jaxin twitz txˈotxˈ tuˈntzen tel tz̈itj ttz̈qˈuelxin te chojbil il, tuˈntzen tweˈ tkˈoj Dios kiˈj, tuˈntzen koc jiquen twitz Dios tuˈnj kocslabl tiˈ Cristo. Min e tzpet Dios tej tcub tnajsaˈnxin cyil kej xjal ootxa, te mitknaˈx tul Cristo. Tumel tuˈn Dios tej tbint tuˈnxin juˈwa, cuma ttzkiˈnxin tuˈn ttzaj tkˈoˈnxin tcastiwa Cristo te chojbil cykil il. ²⁶ Tej ttzaj tkˈoˈn Dios Cristo te chojbil cyil xjal, e tyeecˈatzen te ke jaˈlewe nbinchanxin cykilca tuj tumel te junx maj. Amale atet il tiˈj tuˈn tkˈontexin castiwa tuˈn tlaj il, cchicˈajaxeltzen jun aj il tisencˈa mintiiˈ til twitz Dios ka ma tzˈoc ke tcˈuˈj tiˈ Jesús.

²⁷ Juˈ tzunj, ¿tumelpa tuˈn tjaw kniman kiib? Min, cuma jiquen koˈ twitz Dios yaaˈn tuˈnj nkoˈx lpe tiˈj jun ley, sino jiquen koˈ tuˈnj toc ke kcˈuˈj tiˈ Cristo. ²⁸ Jaxxix tumelj kˈoˈn te jun xjal tuˈn toc jiquen twitz Dios nuk oˈcx tuˈnj tocslabl tiˈ Cristo, yaaˈn tuˈnj nniman jun ley.

²⁹ At juun cyey ejeeˈy judío tzin cykbaˈna nuk cye judío Dios, yaaˈn cyej xjal yaaˈn judío. Pero cxeˈl nkanena cyey, ¿atpa juntl Dios te cyej xjal yaaˈn judío? ¡Min! Juˈ tzunj, il tiˈj qˈuelel cyniˈya tiˈj Jdios te cyej xjal judío jax Dios te cyej xjal yaaˈn judío, ³⁰ cuma jaxte nuk oˈcx jun Dios at. Ka junx Dios at, judíole, yaaˈnle judío, pero iltzen tiˈj chi oquel cykil xjal te t‑xjal Dios tiˈjx jun be, jaj tuˈnj n‑oc ke cycˈuˈj tiˈ Cristo.

³¹ Kapetzen cxeˈl cykbaˈna cyjulu: “Ka jiquen koˈ twitz Dios nuk tuˈnj kocslabl tiˈ Cristo, mintiiˈtltzen tajbel jley e tzaj tkˈoˈn Dios,” tz̈i cybela. ¡Pero yaaˈn juˈwa! Jtzin nkbaˈna ja ley nkbante tuˈn koc tzˈaklxix twitz Dios, pero nuk tuˈnj n‑oc ke kcˈuˈj tiˈ Cristo o nimj ley kuˈn.