Chronological

5  Amale tuˈnt taakˈen Dios chin cwel byeta, pero min chin xyutˈena tiˈj, cuma ktzkiˈn oj tbaj twiˈ kxumlal, kcaman jun acˈaj kxumlal. Cjawel bint, yaaˈn cyuˈn xjal, sino tuˈn Dios, bix cˈajbel te junx maj tuj cyaˈj. ² Tej tiˈj lux koˈ etoˈ tuj kxumlal te jaˈlewe, nim qˈuixcˈaj at kiˈj. Juˈ tzunj kaj tuˈn kocx tuj juntl kxumlal acˈaj tuj cyaˈj. ³ Jaxxixte ko oquel tuj jun acˈaj kxumlal, tuˈntzen yaaˈn ẍbikl kanem. ⁴ Tej tiˈj lux kxumlal at jaˈlewe, nim qˈuixcˈaj niyˈx tuˈn, bix nim bisbajil toc kiˈj. Pero amale atet qˈuixcˈaj, ja te kaj, yaaˈn tuˈn kcyim, sino tuˈn kocx tuj juntl kxumlal acˈaj. Kaj tuˈn toc jmiˈn baj te t‑xel jpjel. ⁵ Ja te Dios o binchante ke tuˈn at juntl acˈaj kxumlal, bix o tzaj tkˈoˈnxin Espíritu Santo tuˈn tten kuya, te techel il tiˈj cbinel tuˈnxin tuˈn at acˈaj kxumlal te junx maj.

⁶ Juˈ tzunj, key hermano, ma cywix ncˈuˈja. Ntzkiˈna ntiinxa tuya kxumlal te jaˈlewe, bix minaˈx npona tuya Kaaw. ⁷ Amale minaˈxet toc ncyeˈyena twitzxin, pero cnlaˈya twitzxin tuˈnj o tzˈoc ke ncˈuˈja tiˈ Dios. ⁸ N‑el nniˈya tiˈj ti pjel wiˈja, bix nchin ayona tuˈn wexa tuj nxumlala at jaˈlewe, tuˈntzen npona tuya Kaaw. ⁹ Juˈ tzunj waja tuˈn wela baˈn tuj twitz Kaaw. Katzenle tuˈnj taakˈen Kaaw chin cymela, bix ka min, pero cˈoquelx wipena tiˈj tuˈn wela baˈn tuj twitzxin, ¹⁰ cuma cykilca ke ocslal ko pomel twitz Cristo laˈ alcye jun kˈij, tuˈntzen toc tcyeˈyenxin cykilcaj e bint kuˈn twitz txˈotxˈ. Ka baˈn e bint kuˈn, kcaman jun kcotz tiˈj. Pero ka min e bint baˈn kuˈn, cxeˈl kxooˈn kcotz.

Nkbaˈn Pablo cye xjal tuˈn tbint cyten tuya Dios

¹¹ N‑el nniˈya tiˈj cˈoquel tcyeˈyen Kaaw ti tten in akˈanana tuj taakˈenxin. Juˈ tzunj nimxix cnnimiya, bix juˈ tzunj n‑oc wipena tiˈj tuˈn tcub cyiˈ xjal tuˈn cyocslan tiˈj Cristo. Ttzkiˈn Dios nchin kˈumena tyol tuj tumelxix, bix nuket juˈx cyey tzˈelxit cyniˈya tiˈj nchin kˈumena tyolxin tuj tumel. ¹² Nxiˈ nkbaˈna nchin akˈanana tuj tumel, yaaˈn te nimbil wiiba cywitza, sino nxiˈ nkbaˈna tuˈntzen baˈn cyyola wiˈja cyej xjal nchi binchan taakˈen Dios, yaaˈn tuˈn cyajxix chi ajben te Dios tuya cykil cyanem, sino nuk te cycyeˈybil xjal. ¹³ Yal weya, jnbint wuˈna yaaˈn tuˈn toc cyniman xjal nbiˈya. Ka nchin txˈujta tuj cywitza, pero nuk tuˈn wajbela te Dios. Bix ka nxiˈ nkˈumena tuj ttxolan, tetzen tajbel te cyey. Pero mintiiˈ nbint wuˈna tet weya cˈabel. ¹⁴ Tuˈnj o tbincha Cristo wiˈja, waja tuˈn nxiˈ lpeya tiˈj ti tten tuˈnxin, bix yaaˈn te tajbel weya. N‑el kniyˈ tiˈj tuˈnj oc kˈakˈen tcˈuˈjxin kiˈj, e cyimxin tiˈ kil. E cyimxin te kxel. Juˈ tzunj n‑el kniyˈ tiˈj tisen e cyim cykilca koˈ tuyaxin. ¹⁵ E cyimtzen Cristo tiˈ cykilca koˈ tuˈntzen miˈn txiˈ kjyoˈntl nuk tikˈch te kex, sino tuˈntzen kajben tej xjal e cyim te kxel bix e jatz itzˈjxin tuj cyamecy tuˈntzen ttzaj tkˈoˈnxin kchunkˈlal te junx maj.

¹⁶ Ya miˈntl chin jyona jwexa wajbila, sino nuk jaj tajbil Cristo. Juˈ tzunj oj toc ncyeˈyena cynaabl xjal, ya miˈn chin octla te mlolte cynaabl tisenj tej yaaˈn ocslal kena. Tej yaaˈn ocslal kena, tuj nwitza mintiiˈ tajbel Cristo, pero jaˈlewe min cub nbisetla juˈwa. ¹⁷ Ka at tmojbabl tiib jun xjal tuya Cristo, attzen jun acˈaj tnaabl. Ya mintl nxiˈ lpe tiˈj tnaabl te ootxa, cuma ya kˈiˈntl jun tnaabl acˈaj tuˈn. ¹⁸ Cykilcaj lu jatzen jun t‑xtalbil Dios kibaj. Nejl aj kˈoj koˈ tiˈ Dios, pero jax Dios e binchante tuˈn tcyim Cristo twitz cruz, tuˈntzen tbaj tilel kkˈoj tuya Dios. Bix o tzaj tkˈoˈn Dios jwaakˈena te kˈumlte cye cykil xjal tuˈntzen tweˈ jcykˈoj tuya Dios. ¹⁹ Nxiˈ nkˈumena Dios e binchante o tzˈoc Cristo tuj castiwa nuk tiˈ cyil xjal. Nuk tuˈnj tcyimlen Cristo tiˈ cyil xjal o bint tuˈn Dios tuˈn tel ttzakpiˈn ke xjal tuj castiwa. Jwaakˈena o tzaj tkˈoˈn Dios, jaj tuˈn t‑xiˈ nkˈumena ja yol lu cye xjal. ²⁰ Juˈ tzunj inayena jun t‑xel Cristo. Tuˈn nyola, Dios ncubsan twitz cye cykil xjal tuˈn cyoc tuyaxin. Inayena, t‑xel Cristo, nchin kbaˈna cye xjal: “Tuˈnxit tweˈ cykˈoja tuya Dios,” ntz̈i. ²¹ Kaaw Jesús mintiiˈ texin til. Pero ja Dios aj kˈonte cykil kil tibaj Jesús bix o penayinxin te kxel, tuˈntzen jiquen koˈ twitz Dios oj at kmojbabl kiib tuya Jesús.

6  Nchin akˈanana tuya Dios te kˈumlte t‑xtalbil. Juˈ tzunj cxeˈl ncubsaˈn nwitza cyey tuˈn miˈn tzˈel cyxooˈna jnxiˈ nkˈumena. ² Cˈoquel cycyeˈyena ti toc tuˈn tyol Dios. Tz̈i Dios te jun xjal cyjulu: “Tej tpon tumel tuˈn t‑xiˈ nkˈoˈna xtalbil tey, e nbiˈya tyola bix e tzaj wonena. Bix tej tpon tumel tuˈn tcleta wuˈna, bix e xiˈ wonena,” tz̈i Dios. Ja tzunj yol lu nyeecˈan at jun kˈij tuˈn kiikˈente jun t‑xtalbil Dios, bix nxiˈ nkˈumena cyey jatzen kˈij lu.

³ Tuj taakˈen Dios n‑oc ncˈuˈja tiˈj tuˈn miˈn bint kaˈ wuˈna, tuˈntzen min‑al jun xjal baˈn tjaw yolen wiˈja, tuˈn miˈn tzˈel t‑xooˈn jnxiˈ nkˈumena. ⁴ N‑oc wipena tiˈj tuˈn t‑xiˈ nyeecˈana jaxxix jun t‑akˈanal Dios kena. Juˈ tzunj, tuj taakˈen Dios niyˈx qˈuixcˈaj wuˈna tuya pasensya. At maj nimxsen qˈuixcˈaj bix bisbajil n‑oc weya. ⁵ At maj nxiˈ tzˈuˈn wiˈja cyuˈn xjal, bix at maj nchin ocxa tuj tzeeˈ nuk tiˈj tyol Dios. At maj cyakbajnin eteˈ xjal wiˈja hasta nchi jaw kˈojl weya. At maj sicninxsen kena tuj taakˈen Dios cuma cyiwxsen nchin akˈanana. Bix at maj n‑ex juun akˈbil wuˈna mintiiˈ nwatla n‑oc, bix at maj ncub npaˈna weyaj. ⁶ Bix jax juˈx tuˈn jun baˈn nnaabla ncub nyeecˈana jun t‑akˈanal Dios jaxxix kena. Jiquen jun nnaabla nxiˈ wiiˈna, bix n‑el nniˈya tiˈj alcye jaxxix bix nxiˈ nnimana. Niyˈx wuˈna oj toc cyyajlaˈn xjal inayena, bix nchin binchana jun baˈn cye cabtl. Nchix lpewa tiˈ Espíritu Santo, bix at tkˈakˈbil ncˈuˈja jaxxix tiˈ cabtl. ⁷ Tuˈnj tkˈumj jun jaxxix tyol Dios, bix tuˈnj tchicˈajax tipemal Dios oj t‑xiˈ nkˈumena tyol, nxiˈ nyeecˈana jun jaxxix t‑akˈanal Dios kena. Tisen ke soldado nchi kˈojl tuya macbil te biybil tuj cymankˈab taˈ, bix cyneẍ kˈilte juntl macbil te makbilte tuˈn miˈn chi akˈ, juˈxsen nchin kˈojla weya tuya kaˈ tuˈnj baˈn nbint wuˈna bix tuˈnj ncolbil wiiba twitz il. ⁸ Oj t‑xiˈ nkˈumena tyol Dios, at xjal tzin cybiˈn inayena, pero at juuntl n‑el cyiiqˈuen inayena. At juun nchi yolen baˈn wiˈja, pero at juuntl nchi yolen kaˈ wiˈja. Amale tujet tumel nchin yolena, at juun tzin cykbaˈn ẍtakˈ kena. ⁹ Amale atet juun xjal tzin cykbaˈn yaaˈn jun jaxxix t‑xel Cristo kena, pero at nim xjal n‑el cyniyˈ tiˈj jaxxix t‑xel Cristo kena. At xjal cyaj tuˈn ncub byeta, pero lux kena iˈtza. Nim o chin iˈya tuj castiwa, pero minaˈn cycaman tuˈn ncuba. ¹⁰ Tuj cywitz juun xjal, nchin bisena, pero nchin tzalaja. Bix amale tzint cykbaˈn juun xjal mebe xjal kena, pero nim xtalbil te tyol Dios nxiˈ nkˈoˈna cye nim xjal. Bix amale minttiiˈ at wuyena, pero at cykilca kˈinemal at wuyena tuˈnj mojbabl wiiba tuya Cristo.

¹¹ Key ocslal tuj Corinto, ma txiˈ nkbaˈna cyey cykilca niyˈ tuj ncˈuˈja, cuma nim n‑oc cyakˈa weya. ¹² Jminaˈn tbint jaj tkˈakˈbil cycˈuˈja wiˈja, yaaˈn jweya te cyey. ¹³ N‑oc cyakˈa weya tisen jun mambaj n‑oc cyakˈ tcwal te. Juˈ tzunj cˈoquel wakˈa cyey tisentzen n‑oc cyakˈ cyman cwal cye.

Tja Dios koˈ, jaj jun Dios iˈtz

¹⁴ Key hermano, miˈn tzˈoc cylichˈon cyiiba junx maj cyuya kej xjal yaaˈn ocslal. Kej xjal jiquen nbint cyuˈn yaaˈn junx taˈ cynaabl cyuyaj xjal nuk kaˈ nbint cyuˈn, tisen spiˈyen yaaˈn junx taˈ tuya klolj. ¹⁵ ¿Ti tten at tmojbabl tiib Cristo tuya taaw il? ¿Bix ti tten at tmojbabl tiib jun ocslal tiˈ Cristo tuya jun xjal min tzˈocslan tiˈ Cristo? ¹⁶ ¿Bix ti tten ka ma tzˈocx jun sant tuj tja Dios? Kej nchi niman Dios mlay tuˈn at cymojbabl cyiib cyuyaj kej nchi niman sant, cuma najl Dios kxol ejooˈ ocslal, jxin Dios iˈtz. Jatxe ootxa e tzaj tkbaˈn Dios cyej e xiˈ lpe tiˈjxin: “Chin najala cyxola bix chin betela cyxola. Chin oquela te Cydiosa, bix chi oquela te nxjala. ¹⁷ Juˈ tzunj qˈuelel cypaˈn cyiiba cyiˈ kej xjal yaaˈn nxjala, tuˈntzen miˈn chi binchana j‑il nbint cyuˈn, bix tuˈntzen cyajbena oˈcx te weya. Ka cbinel cyuˈna juˈwa, chi xeˈl wocslaˈna te nxjala. ¹⁸ Juˈtzen chin oquela te Cymana jaxxix, bix ejeeˈy chi oquela te ncwala,” tz̈i Dios, Cawel tibaj cykilca, cye aj Israel jatxe ootxa.

7  Nim o tkba Dios tuˈn tkˈonte ke. Juˈ tzunj cykˈoncja cykaˈyela. Key hermano n‑oc cyakˈa weya, il tiˈj cyjel cykˈoˈna tiˈj cykil kaˈ taj cychuˈla bix miˈn cheˈx lpey tiˈj cynaabla kaˈ. Ka cyaja tuˈn cynimana Dios, cykˈoˈnc cycˈuˈja tiˈj tuˈn cyoca sak.

O tzalaj Pablo cyiˈj aj Corinto tej toc ke cycˈuˈj tiˈ Dios

² Key hermano, juntl maj cxeˈl ncubsaˈna nwitza cyey tuˈn toc kˈakˈen cycˈuˈja wiˈja. Mintiiˈ jun kaˈ o tzˈoc nbinchaˈna tiˈ jun xjal, bix min o txiˈ tnaabl jun xjal tuj il wuˈna, bix min‑al jun o cub yaaˈna tuˈn tel wiiˈna tpwak, tisen tzin tkbaˈn juun. ³ Yaaˈnja wajbila tuˈn cyoc wilena, cuma cˈulel tuj cycˈuˈja ti e nkbaya cyey nejl. E xiˈ nkˈumena cyey nim n‑oc cyakˈa weya. Kale ma chin cyima bix kale chin itzˈjela, pero we tkˈakˈbil ncˈuˈj cyiˈja mlay weˈ. Nim n‑oc ke ncˈuˈja cyiˈja. ⁴ Nim nchin yolena baˈn cyiˈja cywitz xjal. Amale niyˈxet qˈuixcˈaj wuˈna, ma jaw nimset ncˈuˈja bix ma chin jaw tzalaja tuˈnj o nbiˈya cypocbala. ⁵ Tej wula tzalu tuj Macedonia te ebilte cypocbala, nchin ajkelena cyiˈja cuma mintiiˈ cypocbala. Nim qˈuixcˈaj oc wiˈja. At wajkelbila cyiˈja, bix nim xjal tzalu oc kˈoj wiˈja. ⁶ Pero Dios ncub kˈukbante cycˈuˈj j‑ocslal nchi bisen. Tuˈn tkˈukbante ncˈuˈja, jaxin e xiˈ smante Tito wiˈja. ⁷ Bix in tzalaja, yaaˈn nuk tuˈnj otk tzul Tito wiˈja, sino juˈx in tzalaja cuma ulxin tuya baˈn cypocbala. Tej tten Tito cyuyey, e cywix tcˈuˈj cyuˈna. E tzaj tkbaˈnxin weya n‑oc juch cycˈuˈja wiˈja, bix ultl wilela cyey cuma otk chi oc kˈojla wiˈja, bix ya cyajtla tuˈn cyonena wiˈja tuya cykil cycˈuˈja. Tej nbintiya cypocbala baˈn, nimxsen in jaw tzalaja cyiˈja.

⁸ Amale e bisetkey tej t‑xiˈ nkˈoˈna ilbil cyey tuj wuˈja nejl, pero tuj nwitza baˈn te cyey. In bisena, cuma tuˈnj wuˈja e xiˈ cyey, e jaw bisenkey. Pero nuk jun rato e bisenkey. ⁹ Amale e bisetkey tiˈj wuˈja, pero jaˈlewe nchin tzalaja e xiˈ nsmaˈna j‑uˈj cyey, cuma tuˈnj cybisa e cyaj cykˈoˈna cyila. Tuˈnj cybisa min e xiˈ xitjkey tuˈn, sino nuk ajben tuˈn tcyaj cykˈoˈna cyila tisen taj Dios. ¹⁰ Jkbis baˈn tuj twitz Dios jaj ka ma cyaj cykˈoˈn xjal cyil tuˈn, tuˈntzen cyclet. Bix ka tuˈn cyclet, mlay tzajtl cybis tiˈj. Pero yal kej xjal te twitz txˈotxˈ min cyaj cykˈoˈn cyil, oˈcx tajbel cybis tuˈn cyxiˈ tuj il. ¹¹ Pero cyey, o chi bisena tisen taj Dios. Juˈ tzunj tuya cykil cycˈuˈja o cyajbey tuˈn cyweˈy cykˈojla wiˈja. E cyajbey tuˈn tel nniˈya tiˈj min tziyˈxtl til j‑ocslal aj il cyuˈna. Bix tzin cynaˈna cychˈixewa tiˈj. Bix e tzaj ttz̈i cyiˈja tuˈnj ilbil cyey at tuˈn tpon wuˈna. Bix cyajtla cyila inayena. Bix cyajtla tuˈn ntzalaja cyiˈja, bix o cub cykˈoˈna tcastiwa jxjal e binchan jnintzaj tkaˈyel. Tiˈj cykilcaj lu o tzˈel nniˈya tiˈj o cyaj cykˈoˈna te junx maj j‑il otk tziyˈx cyuˈna nejl. ¹² E xiˈ nsmaˈna jun wuˈja cyey cyiw t‑xiˈlen, pero ttzkiˈn Dios yaaˈn nuk tuˈn tcub cykˈoˈna j‑ocslal aj il tuj castiwa, bix yaaˈn nuk tuˈn tajben tej xjal iiqˈuen tuˈn til, sino tuˈn tel cyniˈya tiˈj at jun jaxxix cyanema wiˈja. ¹³ Juˈ tzunj ya miˈntl chin bisena, sino nchin tzalaja.

Pero min chin tzalaja nuk oˈcx cuma o tzaj cynimsaˈna ncˈuˈja, sino jax juˈx nchin tzalaja cuma ntzalaj Tito cyiˈja. Nim otk tzˈajkel tcˈuˈjxin cyiˈja, pero o til mintiiˈtl cykˈoja wiˈja. ¹⁴ E xiˈ nkbaˈna te Tito: “Ctzaal cybiˈn aj Corinto nyola,” ntz̈iya, bix yaaˈn chˈixbajil weya nyol, cuma jax o tzˈeˈla nyola. Tisenx e xiˈ nkbaˈna cyey nuk oˈcx alcyej jaxxix, jaxse juˈx o tzˈel jaxxix j‑e xiˈ nkbaˈna te Tito cyiˈja. ¹⁵ Oj nchi ula tuj tcˈuˈj Tito, nim ntzalaj Tito cyiˈja, cuma cykilcakey e cybiy tyol bix tuya cykil cycˈuˈja e bint cyuˈna cykilcaj e tkba cyey. ¹⁶ Bix yaltzen weya, nchin tzalaja cyiˈja, cuma n‑oc ke ncˈuˈja cyiˈja.

Tuˈn t‑xiˈ kkˈoˈn jun onbil tuya cykil kcˈuˈj

8  Key hermano, jaˈlewe waja txiˈ nkbaˈna cyey ti nbaj cyxol ocslal tuj cykilca tnom tuj Macedonia. Tuˈn t‑xtalbil Dios cyibaj, o cycaman pwak te onbil cye mebe ocslal tuj Jerusalén. ² Amale nimet e niyˈbet ke ocslal te Macedonia tuj qˈuixcˈaj, bix amale penat nchi itzˈja tuˈn tcyajlal, pero tuˈn cytzalajebl e xiˈ cykˈoˈn jun onbil tuya cykil cycˈuˈj. ³ Inayena tstiwa e xiˈ cykˈoˈn onbil tuya cykil cycˈuˈj, bix e xiˈ cykˈoˈn laˈ niyˈ chˈin e cnet cyuˈn, bix e xiˈ chˈintl tibaj. ⁴ Nim e cubsanke cywitz weya tuˈn t‑xiˈ nkˈoˈna xtalbil cye tuˈn cyonen cyiˈ ocslal judío. ⁵ E xiˈ cyonen kej ocslal tisenj e wajbeˈya, bix e bintl mas jawnextl cyuˈn. Yaaˈn nuk e tzaj cykˈoˈn cypwak, sino e xiˈ cykˈon cyiib te Kaaw bix mas yaj te weya, tisen taj Kaaw. ⁶ Ojat tbint cyuˈna juˈwa. Juˈ tzunj o chin cubsan nwitza te Tito tuˈn tpon cyxola juntl maj, tuˈntzen tbaj bint taakˈen otk tzyet cyxola nejl, jaj tej cyakˈa chmolte pwak te cye ocslal mebe tuj Jerusalén. ⁷ Chˈimacˈa o bint cyuˈna baˈn. Nim n‑oc ke cycˈuˈja tiˈ Dios. Bix baˈn t‑xiˈ cykˈumena tyol Dios. Bix n‑el cyniˈya tiˈj tyol Dios. Bix nchi akˈanana tuya cykil cycˈuˈja tuˈn cyela baˈn tuj nwitza. Bix at cyanema wiˈja. Yal jaˈlewe, tisen cykilca o bint cyuˈna tuj tumel, jax juˈx cykˈoˈnc cyipena tiˈj tuˈn t‑xiˈ cyonena kej judío mebe. ⁸ Min chi oc nlojoˈna tiˈj tuˈn cychmona pwak. Nuk nxiˈ nkbaˈna cyey ke ocslal tzalu tuj Macedonia nim nchi yeecˈan lastim cye mebe, tuˈntzen toc ncyeˈyena ka juˈx cyey ka at lastim cye mebe cyuˈna tuya cykil cycˈuˈja. ⁹ Il tiˈj cxeˈl cykˈoˈna cyoybila, cuma cytzkiˈna xtalbil o cyaj tkˈoˈn Kaaw Jesucristo cyey. Amale kˈinet xsunxin tuj cyaˈj, pero ocxin te mebe xjal twitz txˈotxˈ nuk tuˈn tyeecˈaxin tkˈakˈbil tcˈuˈjxin cyey, tuˈntzen tajben tmebeyilxin tuˈn cyiikˈentey t‑xtalbil Dios.

¹⁰ Cxeˈl nkˈoˈna jun consejo te cyey, cuma ja cˈabel te onbil te cyey. Ma bint jun jnabkˈi e cub cybisena tuˈn cychmona jun cyoybila cye mebe judío. Ejeeˈy tneel ocslal tuˈn tcub cybisena juˈwa. Bix yaaˈn nuk e cub cybisena, bix akˈkey binchalte. ¹¹ Pero ma pon tumel tuˈn tjaw baj cychmona jcyoybila. Tuj tneel e cyajbey tuˈn tcub cychooˈna tuya cykil cycˈuˈja, pero ma pon tumel tuˈn tcub baj cyuˈna j‑o tzˈoc cytxˈaakena. Teeylex juun cyey ckˈolte laˈ niyˈ chˈin baˈn tcnet cyuˈna. ¹² Ka tuya cykil cycˈuˈja nchi kˈona laˈ niyˈ chˈin baˈn t‑xiˈ cykˈoˈna, ntzalaj Dios cyiˈja. Ka at juun cyey mlay cnet nim cyuˈn, pero cykˈaˈx chˈin, ntzalajtzen Dios cyiˈj. ¹³ Tzin nkbaˈna baˈn tuˈn t‑xiˈ cykˈoˈna cyoybila laˈ niyˈ chˈin ncnet cyuˈna, cuma yaaˈn baˈn tuˈn mintiiˈtl cyey cyjel oj t‑xiˈ cykˈoˈna onbil cye mebe. Nuktzen tzin nkbaˈna il tiˈj ko onel cye mebe. ¹⁴ Pero ntzkiˈnwe jaˈlewe yaaˈn mebekey. Juˈ tzunj baˈn cyonena cyiˈj xjal pena nchi itzˈja. Kape laˈ alcye jun kˈij chi oquela te mebe xjal, bix ja tzunkej xjal mebe jaˈlewe chi oquel te kˈine, bix ejeeˈtltzen chi onel cyey tuˈn cyitzˈja. Juˈtzen at kitzˈjel te cykilca koˈ. ¹⁵ Tz̈i tyol Dios cyjulu: “Jxjal e jaw tchmoˈn nim waabj e cutz tkˈoˈn Dios, mintiiˈ ttxˈaken e cyaj. Ja tzunj xjal e jaw tiiˈn nuk chˈin, at twa jaca kˈij tuˈn titzˈj,” tz̈i tyol Dios cyiˈj xjal tuj tzkij txˈotxˈ tej tcuˈtz tuj cyaˈj jun wik cywa “maná” tbi.

¹⁶ Chjontetzen te Dios jaxin o cux kˈonte tuj tanem Tito tuˈn at tkˈakˈbil tcˈuˈjxin cyiˈja, tisexj weya. ¹⁷ E tbixin nyola tej t‑xiˈ nkanena texin tuˈn tponxin cyxola, pero cpomelxin yaaˈn nuk tuˈnj e xiˈ nkˈumena, sino cuma tajx texxin ponxin. ¹⁸ Attzen juntl ocslal cxeˈl nsmaˈna junx tuya Tito tuˈn cypon cyuyey. Cykilca ocslal cyuj cykilca tja Dios tzalu cytzkiˈn baˈn tnaablxin, cuma tuya cykil tcˈuˈjxin o tzˈoc tkˈon tiibxin tuj taakˈen Dios. ¹⁹ Bix yaaˈn nuk oˈcx n‑oc ke cycˈuˈj ocslal cyuj cykilca tja Dios tiˈj tnaablxin, sino jax juˈx o jyet‑xin cyuˈn ocslal tuˈn t‑xiˈxin wuyena oj nxiˈya Jerusalén te kˈolte onbil cye mebe. Tuˈnj onbil lu cynimet tbi Dios, bix chicˈajaxet waja tuˈn t‑xiˈ wonena ke mebe ocslal tuj Jerusalén. ²⁰ Cxeˈl tzunj ocslal lu wuyena, tuˈntzen min‑al cjawel wiˈja ka min e xiˈ nkˈoˈna j‑onbil cye mebe tuj tumel. ²¹ Tuya cykil ncˈuˈja waja tuˈn wakˈanana tuj tumel, tuˈntzen wela baˈn twitz Kaaw, pero yaaˈn nuk twitz Kaaw, sino tuyax cywitz xjal.

²² Bix at‑x juntl ocslal cxeˈl nsmaˈna cyey junx cyuya Tito. Bix chˈimpaxe maj txiˈ nkˈoˈna taakˈen, bix e bint tuˈn tuya cykil tnaabl. Nim taj tzaj tonen ejeeˈy tiˈ tchmoj cyoybila, cuma nim n‑oc ke tcˈuˈjxin cyiˈja.

²³ Yaltzen te Tito, jaxin jun akˈanal wuyena bix jaxin npon te nxela cyxola. Ja tzunj caˈbatl ocslal, ejeeˈja nchi pon te cyxel cyxol ocslal tzalu, bix baˈnkexin tuj twitz Cristo. ²⁴ Juˈ tzunj cyyeecˈax cyej oxe ocslal bix cyej cykil ocslal tzalu, at tkˈakˈbil cycˈuˈja cyiˈj ocslal mebe, bix cyyeecˈax nyola jaxxix tiˈj oj tzin nkbaˈna tuˈn tcub baj cyoybila cyuˈna.

9  Pero kape mintiiˈ il tiˈj tuˈn t‑xiˈ ntzˈiˈbena cyey ti tten tuˈn t‑xiˈ cyonena ke ocslal mebe, ² cuma ntzkiˈna tuya cykil cycˈuˈja cyaja tuˈn cyonena. Nxiˈ nkbaˈna cye ocslal tzalu tuj Macedonia ma bint jun jnabkˈi ke cyey ejeeˈy ocslal tuj tcwentel te Acaya akˈkey tuˈn t‑xiˈ cyonena ke ocslal mebe tuj Jerusalén, bix tej toc cybiˈn ke ocslal tzalu ti e cub cynicˈuˈna, jax juˈx tzalu nim ocslal e cyajbe tuˈn cyonen. ³ Pero amale ot txiˈ nkˈumena tzalu ka cyaja chi onena, cxeˈltzen nchkˈoˈna Tito cyuyey tuya tzunj caˈbatl ocslal, tuˈntzen t‑xiˈ cyonen tuˈn tbint cyuˈna, tuˈntzen tel nyola jax cywitz xjal tzalu cyiˈja. E xiˈ nkbaˈna cye ocslal tzalu: “Ntzkˈiˈntla cbinel cye ocslal aj Corinto cyuˈn tuˈn ttzket cyonbil,” ntz̈iya. Juˈ tzunj ejeeˈ tzunj oxe ocslal lu chi pon te nimsalte cycˈuˈja tuˈn tchmet cyonbila, tuˈntzen tel nyola jax cyiˈja, ⁴ tuˈntzen mintiiˈ chˈixbajil cyxola. Laˈ alcye jun kˈij chin pomela cyxola, bix kape tuya cab ocslal te tzalu tuj Macedonia cxeˈl wuyena. Ojtzen kpona, bix klaˈ tzuna ka cycyˈiy chi onena, nimtzele nchˈixewa tiˈj, bix cyuyaxa attzele cychˈixewa tiˈj, cuma cchicˈajaxel amale baˈnt nyola cyiˈja nejl, pero min ma tzˈetl jax. ⁵ Juˈ tzunj ma txiˈ nkanena j‑oxe ocslal tuˈn cypon nejl cyxola nwitza. Ejeeˈtzen chi pon te nimsal cycˈuˈja tuˈn tcub cykˈoˈna jcyonbila nim o cykˈumey, tuˈntzen otk cub baj cyuˈna oj npona. Waja tuˈn tcub cykˈoˈna tuya cykil cycˈuˈja, yaaˈn tuya ẍpiẍen.

⁶ Key hermano, cxeˈl nkˈoˈna tumel cyey tiˈj ti tten tuˈn tcub cykˈoˈna. Jxjal yaaˈn nim tawal, jax yaaˈn nim tjaˈtxˈen cjawel. Jxjal nim tawal, jax nim tjaˈtxˈen cjawel. ⁷ Teeylex juun xjal cwel tbisen jteˈ tkˈaˈ te cyonbil, bix oj tkˈonte, yaaˈn tuya bisbajil tiˈj bix yaaˈn lojoˈn tiˈj tuˈn tcub tkˈoˈn, sino tuyaxix cykil tcˈuˈj, cuma ntzalajtzen Dios tiˈj jun xjal oj t‑xiˈ tkˈoˈn tuya cykil tcˈuˈj. ⁸ At tipemal Kman Dios tuˈn tkˈonte cykilcaj il tiˈj te cyey tuˈntzen cyitzˈja, bix tuyax tuˈn cyonena cyiˈke cyuyey mebe. ⁹ Tz̈i tuj tyol Dios cyjulu: “Jxjal n‑onen tuya nim cye mebe, juˈx cxeˈl tuya tonbil,” tz̈i tyol Dios. ¹⁰ Dios ntzaj kˈonte iyaj tej xjal awaal tuˈntzen tawan, bix mas yaj ntzaj tkˈoˈnxin jkjatxˈen tuˈntzen at twa. Juˈtzen tten oj cyonena cye mebe. Tisen ntzaj tkˈoˈn Dios iyaj tej xjal awaal tuˈn tawan, juˈxse ntzaj tkˈoˈn Dios cyey tuˈn cyonena cye mebe. Katzen nchi kˈona onbil cye mebe, tisentzen chi awana. Bix tisexsen ntzaj tkˈoˈn Dios jkjatxˈen, juˈxsen ntzajtzen tkˈoˈnxin cyey tuˈn cyonena mastl. ¹¹ Ka nchi oney cye mebe, ctzaal tkˈoˈn Dios mastl cyey, tuˈntzen t‑xiˈ cyonena tuya mastl kej xjal pena nchi itzˈja. Bix oj t‑xiˈ nkˈoˈna cyonbila cyej ocslal tuj Jerusalén pena nchi itzˈja, jax cxeˈl cykˈoˈn chjonte te Dios tiˈj. ¹² Oj t‑xiˈ cyonena ke mebe ocslal, nxiˈ cyonena yaaˈn nuk tuˈn cyitzˈj, sino jax juˈx cxeˈl cykˈoˈn chjonte te Dios. ¹³ Bix cxeˈl cykˈoˈn chjonte te Dios, yaaˈn oˈcx tuˈnj ẍi onena cyiˈj bix cyiˈj cabtl mebe, sino tuyaxsen tzin cyyeecˈana kˈiˈn tyol Cristo cyuˈna, yaaˈntzen nuk tzin cykbaˈna. ¹⁴ Bix cxeˈl cykˈoˈn chjonte te Dios cyiˈja, bix cˈoquel cyakˈa cye, cuma tuˈnj t‑xtalbil Dios cyey o txiˈ cykˈoˈna cye tuya cykil cycˈuˈja. ¹⁵ Chjonte te Dios jun nimxsen t‑xtalbil cyibaja.