Chronological

Tej t‑xiˈ ttzˈiˈben Pablo juntl uˈj cye ocslal tuj tnom Corinto

Jun kˈolbebl tuˈn Pablo cye ocslal aj Corinto

1  Key hermano tuj tnom te Corinto,

Inayena Pablo. Dios o scyˈonte weya tuˈn wajbena te jun t‑xel Cristo Jesús. Nxiˈ ntzˈiˈbena ja uˈj lu te cyey t‑xjal Dios tuj Corinto. Tuˈnxit tajben jwuˈja, yaaˈn nuk te cyey, sino tuyaxa te cykilca ocslal tuj cykilcatl tnom iken tuˈn txˈotxˈ te Acaya. At Hermano Timoteo tzalu wuyena, bix baˈn tuj twitzj nxiˈ ntzˈiˈbena cyey. ² At‑xit t‑xtalbil Kman Dios bix Kaaw Jesucristo cyibaja, bix nuket tzaj cykˈoˈnxin cyey tuˈn cytena tuj ttz̈yal.

Jun qˈuixcˈaj tiˈ Pablo pero ja Dios ncyiwsante tcˈuˈj

³ Jawxit knimsaˈn tbi Dios, Tman Kaaw Jesucristo. N‑oc kˈaˈben tcˈuˈjxin kiˈj, bix jaxin ncyiwsante kcˈuˈj. ⁴ Oj niyˈx qˈuixcˈaj kuˈn, Dios ncyiwsante kcˈuˈj, tuˈntzen oj niyˈx qˈuixcˈaj cyuˈn cabtl ocslal, ejooˈtzen baˈn t‑xiˈ cyiwsante cycˈuˈj, tisenj n‑oc tcyiwsaˈnte Dios ke kcˈuˈj. ⁵ Nim qˈuixcˈaj qˈuiyax kuˈn oj kxiˈ lpe tiˈ Cristo. Katzen nim niyˈx qˈuixcˈaj kuˈn, jax nim ncyiwsan Dios kcˈuˈj tuˈn Cristo. ⁶ Jatzen weya, o tziyˈx qˈuixcˈaj wuˈna tuj waakˈena te kbalte cyey ti tten tuˈn cycleta. Bix oj toc cycyeˈyena tiiˈn o tcyiwsa Dios ncˈuˈja tuˈn tiyˈx qˈuixcˈaj wuˈna, jax juˈx cyey ccyiwsetel cycˈuˈja, tuˈntzen oj toc pena cyiˈja tisen oc pena wiˈja, qˈuiyax cyuˈna. ⁷ Weya kˈukl ncˈuˈja cyiˈja ka niyˈx cyuˈna oj toc pena cyiˈja. Ntzkiˈna tisen te Dios ntzaj tcyiwsaˈn weya ncˈuˈj tuˈn tiyˈx wuˈna oj toc pena wiˈja, jaxsen juˈx cyey. Ctzaal tcyiwsaˈn Dios cycˈuˈja tuˈn tiyˈx cyuˈna oj toc pena cyiˈja.

⁸ Key hermano, waja tuˈn tel cyniˈya tiˈj ti ttenj qˈuixcˈaj iyˈx wuˈna tej ntena tuj txˈotxˈ te Asia. Nim qˈuixcˈaj oc weya, tejxe tbaj wipena tuˈn tiyˈx wuˈna, bix tuj nwitza tuˈn ncyima tuˈnj qˈuixcˈaj oc weya. ⁹ El jax tuj nwitza tuˈn ncyima. Juˈ e baj weya, tuˈntzen toc ke ncˈuˈja tiˈ Dios tuˈn witzˈja, yaaˈn nuk wiˈja. Dios baˈn tjatz itzˈjsante ke tuj cyamecy. ¹⁰ Jaxin e clonte weya tej chˈitk ncyima, bix n‑oc ke ncˈuˈja tiˈjxin tuˈn tcoˈpantexin inayena tuˈn miˈn chin cyima. Jaxin ccoˈplte weya tuj cykˈab xjal tuˈn miˈn chin cyima cyuj kˈij chi ul. ¹¹ Bix ka nchi naˈna Dios wiˈja, nim tajbel te onbil weya. Ka nim cybaja nchi naˈna Dios wiˈja, jax nim xjal baˈn t‑xiˈ cykˈoˈn chjonte te Dios oj tkˈontexin t‑xtalbilxin wibaja.

Tej tcub tchiˈxbeˈn Pablo tuˈn t‑xiˈ mas yaj tuj tnom Corinto

¹² Key hermano, jaxxix jweya nyol bix juˈ tzin tkbaˈn ncˈuˈja o txiˈ wiiˈna nchunkˈlala tuj tumel bix yaaˈn e cub yaaˈnkey. Min in xiˈ lpeya tiˈ tnaabl te twitz txˈotxˈ, sino o tzˈoc ke ncˈuˈja tiˈ Dios tuˈn ttzaj tonenxin inayena, tuˈntzen t‑xiˈ wiiˈna nchunkˈlala jiquenxix. O txiˈ wiiˈna nchunkˈlala tuj tumel cywitz cykil xjal, pero ejeeˈtzen cyey, mas cytzkiˈna nnaabla cywitz cykilcatl xjal. ¹³ Cytzkiˈntla jiquen nnaabla, cuma kej wuˈja nxiˈ ntzˈiˈbena cyey tzinen cyaˈ. Jnyola nxiˈ tuj wuˈja yaaˈn caˈba tten tuˈn cycub tzpeta tuˈn. Cutz̈it tel cyniˈya tiˈj nyola te junx maj. Weya nyol, yaaˈn squetcˈajnin taˈ tuˈn cyxiˈy tuj il tuˈn. ¹⁴ Nuk alx juun cyey n‑el cyniˈya tiˈj nyola. Ojat tel cyniˈya tiˈj waja tuˈn cytzalaja wiˈja, tisenj chin tzalajela cyiˈja tej kˈij oj tul meltzˈaj Kaaw Jesús te cyeyˈlte ka baˈn waakˈena cyxola.

¹⁵ Tuj tneel tuj nwitza at tuˈn cytzalaja oj toc cycyeˈyena inayena. At npomlela cyuyena caˈba maj te onlte cyey. ¹⁶ Otk cub nnincˈuˈna tuˈn wiˈya cyxola tuj Corinto, tuˈntzen wula mas yaj tuj Macedonia. Mas yajxe at npomlela cyxola juntl maj. Bix jax juˈx otk cub nnincˈuˈna tuˈn ttzaj cykˈoˈna onbil weya tuˈn nxiˈya maa tuj Judea. ¹⁷ Juˈtzen otk cub nbisena tiˈj nejl, pero e cub nchiˈxbeˈntla j‑e wajbeˈya tuj tneel. Juˈ tzunj at juun cyey tzin cykbaˈna yaaˈn jaxxix toclen nyola. Tuj cywitza ncub nchˈixbeˈna nyola tisen kej xjal yaaˈn ocslal. ¹⁸ Pero ttzkiˈn Dios taj ncˈuˈja tuˈn tbint wuˈna alcyej cxeˈl nkbaˈna tuˈn tbint wuˈna, ¹⁹ cuma il tiˈj tuˈn nxiˈ lpeya tiˈ tnaabl jxjal tzin nkˈumena. Tej ntena cyxola tuya Silvano bix tuya Timoteo, e xiˈ nkˈumena tpocbal Tcwal Dios, Cristo Jesús, bix cytzkiˈna bajx tkbaˈ Cristo tuˈn tbint jun tiiˈ tuˈnxin bix mint elpe bajxin twitz. ²⁰ Ktzkiˈntltzen elpe baj Cristo tiˈ tyol, cuma tuˈnxin elpe baj Dios cykilcaj otk cyaj tkbaˈn cye xjal. Juˈ tzunj oj t‑xiˈ kkbaˈn “Amen” te Dios te yecˈbil njaw knimsaˈn tbixin, tuˈn Cristo tzin kkbaˈn juˈwa. ²¹ O takˈ Dios weya bix te cyey tuˈntzen kten cyiw tuj kmojbabl kiib tuya Cristo. Ja Dios lu e scyˈonte weya tuˈn woca tuj taakˈen. ²² Tex Dios e tzaj tkˈoˈn Espíritu Santo ke te techel t‑xjal Dios koˈ.

²³ E cub nnincˈuˈna tuˈn npona cyxola, pero mas yaj e cub nchˈixbeˈna nyola, cuma nuket in iˈya cyxola, iletltzele tiˈj tuˈn cyoc wilena. Pero ttzkiˈn Dios min e wajbeˈya tuˈn cyoc wilena. Juˈ tzunj e nchˈixbeˈya tuˈn miˈn chin iˈya cyxola tuj Corinto. ²⁴ Katzen nchi oc wilena, yaaˈn tuˈnj yaaˈn kena taaw cyocslabla. Oˈcx tuˈn cyxiˈ wonena tuˈn cytzalaja. Yal tej cyocslabla tiˈ Dios, cyiw taˈ.

2  Juˈ tzunj, key hermano, min in iˈya cyeyˈlte cyey, cuma nuket in iˈya cyxola, otle chi oc wilena, bix e cyajet lokey tuj bis tuˈn nyola. ² Pero nuket e cyajkey tuj bis tuˈn nyola, ¿altzen baˈn ttzaj kˈukbante ncˈuˈja? Mintlen‑al. ³ Juˈ tzunj e xaˈ nsmaˈna wuˈja cyey nejl. E wajbeˈya tuˈn tcyaj cykˈoˈna cykilj kaˈ nbint cyuˈna looj mitknaˈx npona cyxola, tuˈntzen ntzalaja cyiˈja, yaaˈn tuˈn nbisena cyiˈja. Tuj nwitza junelne taˈ cyyola wuyena nuket min chin tzalaja cyiˈja, jax mlay chi tzalaja wiˈja. ⁴ Tej t‑xiˈ nsmaˈna wuˈja cyuyey, e tzaj chˈin nbisa bix e xiˈ wokˈjeˈna, cuma il tiˈj oc wilenkey. Pero min e wajbeˈya tuˈn cybisena. Nuk e wajbeˈya tuˈn t‑xiˈ nyeecˈana nim tkˈakˈbil ncˈuˈja cyiˈja. Juˈ tzunj min in pona cyxola tisenj otk cub nnincˈuˈna.

Il tiˈj tuˈn tcub cynajsaˈna jtil jun ocslal bix tuˈn t‑xiˈ cycyiwsaˈna tcˈuˈj

⁵ Ja tzunj ocslal cyxola e tbincha jun kaˈ, o tzaj chˈin nbisa tiˈj. Pero yaaˈn nuk te weya ja bis lu, sino mas nim te cyey. Pero min txiˈ nkbaˈna ka cykilca key e bisenkey tiˈj, cuma kape yaaˈn jax. ⁶ Tnimal cybaja e cyajbey tuˈn tcub tuj castiwa. Pero ma tzul til tuj tcˈuˈj tcublen tuj castiwa, bix nim tken tcastiwa e cub. ⁷ Matzen pon tumel tuˈntzen tbaj tilel jtil ocslal cyuˈna, tuˈntzen t‑xiˈ cycyiwsaˈna tcˈuˈj. Katzen tzinx n‑oc cykˈoˈna tuj castiwa, cweltzen tbisenxin tiˈj ka min cub cynajsaˈna tilxin tej tcyaj tkˈoˈnxin tilxin, bix jacˈa tuˈn tbisxin miˈn tzˈajbentlxin tuj taakˈen Dios. ⁸ Juˈ tzunj nchin cubsana nwitza cyey tuˈn tcub cynajsaˈna tilxin, tuˈntzen t‑xiˈ cyyeecˈana tkˈakˈbil cycˈuˈja texin. ⁹ Nejl e xiˈ nsmaˈna wuˈja cyey, tuˈn tcub cykˈoˈna j‑ocslal aj il tuj castiwa. Pero e xiˈ nkˈumena juˈwa nuk tuˈn tel nniˈya tiˈj ka nbint cyuˈna cykilcaj ti nxiˈ nkbaˈna cyey. ¹⁰ O tzˈel nniˈya tiˈj o cybiy nyola. Pero jaˈlewe, katzen cwel cynajsaˈna j‑ocslal aj il, jax juˈx weya. Amale yaaˈnt wiˈja oca tbinchaˈn il, ttzkiˈn Cristo o cub nnajsaˈna. O bint wuˈna juˈwa te jun yecˈbil te cyey. ¹¹ Ka min knajsa j‑ocslal aj il, taaw iltzen ke ccamal kiˈj. N‑el kniyˈ tiˈj taj taaw il tuˈn tcub tyaaˈn ejooˈ, tuˈntzen kcub xitj.

Tej tpon Pablo tuj tnom te Troas

¹² Tejtzen npona tuj tnom te Troas te kˈumlte tpocbal Cristo, at nim amleˈn wiˈja tuˈn wajbeˈna tuj taakˈen Kaaw. ¹³ Pero mix e binne wakˈanana baˈn jatzewe, cuma min otk pon Hermano Tito tuj Troas tuya cypocbala tiiˈn eteˈy. Juˈ tzunj ajkelen ncˈuˈja, bix e cyaj nkˈoˈna ke ocslal te Troas tuˈn wula tuj Macedonia te jyolte.

Ncub tiˈ il kuˈn nuk tuˈn Cristo

¹⁴ Pero amale ajkelet ncˈuˈja, bix nxiˈ nkˈoˈna chjonte te Dios. Tuˈnj nmojbabl wiiba tuya Cristo, at woclena tuya Dios oj tcamanxin tiˈj cykilca nkˈoj tiˈjxin. Bix tisen n‑el pax tcˈoˈcjel jun tiiˈ tuj cykˈiˈk, juˈtzen o takˈ Dios weya tuˈn t‑xiˈ nkˈumena tpocbal Cristo jaaˈ nchin poniya, ¹⁵ bix baˈnxsen tuj twitz Dios oj t‑xiˈ nkˈumena juˈwa. Tisen jun cˈocˈsbil n‑el pax tcˈoˈcjel tzin cynaˈn xjal, juˈtzen japenina oj nxiˈ nkˈumena ja yol lu tiˈj Cristo cyekej chi ocslalte nyola bix chi cletel tuj cyil, bix ja tzunkej qˈuelel cyiiqˈuen chi xeˈl tuj il. ¹⁶ Kej n‑el cyiiqˈuen nyola, tzin cynaˈn tisen t‑xewel anem, cuma tzin techlaˈn te cyamecyke. Pero kej nchi ocslan tiˈ nyola, tisentzen cˈoˈcj tuj cywitz.

¿Altzen baˈn tbint jun nintzaj akˈuntl tuˈn juˈwa? Tuj twitz juun cyey mlay bint wuˈna. Pero yaaˈn jax cyuˈn, ¹⁷ cuma yaaˈn juˈ kena tisen juntl wik xjal nchi akˈanan tiˈ tyol Dios nuk tuˈn pwak cyuˈn. Jwaakˈena nbint wuˈna o tzaj tkˈoˈn Dios weya, bix nbint wuˈna, yaaˈn nuk tuˈn pwak wuˈna, sino jaxxix nchin kˈumena tyol Dios bix tuya tipemal Cristo, cuma Dios cyeyˈlte weya laˈ ka baˈn nbint taakˈenxin wuˈna bix ka min.

E tkba Pablo tpocbal acˈaj ttrat Dios tuˈn cyclet xjal

3  Key hermano, ma txiˈ nkbaˈna inayena jun t‑akˈanal Dios jaxxix, pero miˈn cub cybisena tiˈj ka te nimbil wiiba. Mintiiˈ il tiˈj tuˈn tcub ttzˈiˈben jun xjal uˈj te okxenbal weya cyuyey ka jiquen kena. At juun il tiˈj kˈiˈn jun cyuˈj tuˈn t‑xiˈ cyyeecˈan ka akˈanalke tuj taakˈen Dios, pero weya yaaˈn il tiˈj kˈiˈn wuˈja. ² Ntzkiˈna tuˈnj e bint wuˈna cyxola, o chi oca t‑xjal Cristo. Juˈ tzunj ejeeˈ tzuna jun yecˈbil cywitz cykil xjal ka jaxxix t‑akˈanal Dios kena. ³ Tzinen taˈ ejeeˈy t‑xjal Cristo. Yal weya, nchin ajbena cyey tuj taakˈen Cristo, tisen najben jun xjal tzˈiˈbel tuj taakˈen tpatrón oj tcub tbinchaˈn uˈj cye cabtl xjal. Yal te uˈj, tzˈiˈben tuya tint qˈuelel baj tikˈbil. Bix juˈxse ootxa e cyaj tzˈiˈbet ley twitz xak yaaˈn iˈtz. Pero te cyey jaˈlewe, o takˈ Dios Espíritu Santo iˈtz te junx maj, tuˈntzen tel cyniˈya tiˈj tuj cyanema ti taj Dios.

⁴ Juˈ tzunj, ntzkiˈna nxiˈ nkˈumena tyol Dios jiquenxix, bix nbint wuˈna tuˈnj n‑oc ke ncˈuˈja tiˈ Dios tuˈn Cristo. ⁵ Yaaˈn tuˈn wexa wipemala nchin akˈanana baˈn, sino tuˈn tipemal Dios. ⁶ Dios o tzaj tkˈoˈn weya wipemal tuˈn t‑xiˈ nkˈumena tpocbalj acˈaj ttrat Dios tuˈn cyclet xjal tuj cyil. Jkˈanak ttrat Dios cyiˈ xjal nuk tzˈiˈben taˈ, bix e tkba alj min e tbi tley Dios biˈx e cub byet. Pero j‑acˈaj trat yaaˈn juˈwa, cuma tzin tkbaˈn ctkˈaˈ Espíritu Santo te xjal tuˈn tbint jti taj Dios tuya cykil tcˈuˈj, bix tkˈaˈ tchunkˈlal te junx maj.

⁷ Ja tzunj ley kˈanak, twitz xak e cyjaˈ tzˈiˈbet. E tkba jley nejl kej xjal min e cynima cykil ley, il tiˈj tuˈn cycub byet. Jawnexsen jun ley e cyaj tkˈoˈn Dios. Juˈ tzunj tej t‑xiˈ tkˈoˈn Moisés cye xjal, tzinxsen nkoptzˈaj twitz Moisés bix min e bint toc cycyeˈyen xjal twitzxin, amale cubnentl e cub bajtl nkoptzˈaj twitzxin. ⁸ Katzen nintzaj jley te ootxa, ¿mimpatzen tzˈel kniyˈ tiˈj acˈaj ttrat Dios cyiˈ xjal kˈoˈn tuˈn Espíritu Santo mas jawnex twitzj ley te ootxa? ⁹ Katzen jawnex jtrat te ootxa, amale e tyeecˈat min el baˈn ke xjal twitz Dios, mas jawnex j‑acˈaj trat te jaˈlewe, cuma nbint tuˈn tuˈn cycyaj xjal jiquen twitz Dios. ¹⁰ J‑ootxa trat yaaˈn jawnex twitzj te jaˈlewe. Acˈaj trat masxsen jawnex. ¹¹ J‑acˈaj trat mas jawnex twitzj trat te ootxa, cuma katzen jawnex j‑o baj tilel, mas jawnex jmiˈn baj tilel.

¹² Juˈ tzunj, key hermano, oj nxiˈ nkˈumena tpocbal j‑acˈaj trat, cyequey cˈoquela nkbaˈna tixix tten, cuma ntzkiˈna cˈajbel ke te junx maj. ¹³ Min txiˈ nkˈumena jun trat pjel tilel tisenj e tkˈumen Moisés. Tej t‑xiˈ tkˈoˈn Moisés tley Dios cye aj Israel, bix oc tkˈoˈnxin potzbil twitzxin, tuˈntzen miˈn cyil xjal cubne tcub baj jnkoptzˈaj twitzxin. ¹⁴ Pero ke aj Israel te ootxa min el cyniyˈ tiˈj at tuˈn tbaj tilel jtrat te ootxa, tisen e cub baj tkoptzˈaj twitz Moisés. Jax juˈx ke aj Israel te jaˈlewe, oj nxiˈ cycyeˈyen xjal kˈanak ttrat Dios te cye, min tzˈel cyniyˈ tiˈj min tzˈajbentl. Min tzˈel cyniyˈ tiˈj ja tbaj tilelj tej tul Cristo. ¹⁵ Jaˈlewe oj n‑oc cybiˈn jttrat Dios te ootxa tzˈiˈben tuˈn Moisés, mlayx tzˈel cyniyˈ tiˈj ti japenina. Tisentzen tcub jun potzbil tibaj cynaabl. ¹⁶ Pero ojtzen tocslan jun xjal tiˈ Kaaw, qˈueleltzen potzbil tibaj tnaabl, tuˈntzen tel tniyˈ tiˈj. ¹⁷ Jatzen xinj Kaaw nkˈonte tuˈn kaj tzˈoc kbiˈn ti taj Dios. Ejeeˈ tzunkeje ncheˈx kˈinte ja lu, tzakpiˈntltzenke tjakˈ trat te ootxa. ¹⁸ Bix otktzen tzˈel potzbil tibaj knaabl, tuˈntzen tel kniyˈ tiˈj. At koclen tuˈn koc twitz Kaaw. Pero min kil twitzxin. Jkocslabl tiˈjxin jaˈlewe tisen n‑ocx kcyeˈyen tuj jun respej. Pero amale mint kil twitzxin, tuˈnj kocslabl tiˈjxin, tz̈ˈiynen tz̈ˈiy knaabl tuˈn toc tisenj tbanel tnaablxin, cuma ja tzunxin nkˈonte acˈaj knaabl.

4  Juˈ tzunj, key hermano, tuˈn t‑xtalbil Dios wibaja, o wiikˈa waakˈena te kˈumlte tpocbal j‑acˈaj ttrat Dios, bix juˈ tzunj miˈn chin xyutˈena tuj waakˈena. ² Min tzaj nchˈixewa oj nchin kˈumena tiˈj acˈaj trat, cuma min cub nsbuˈna ke xjal, bix min nchin kˈumena tyol Dios tuˈn tel wiiˈna cypwak xjal, tisen nbint cyuˈn kej xjal nchi yolen nuk ten cyuˈn. Twitz Dios bix twitz cykilca xjal nxiˈ nkˈumena nuk alcyej jaxxix, tuˈntzen tchicˈajax jiquenxix kena. ³ Yal kej xjal min tzˈel cyniyˈ tiˈj nxiˈ nkˈumena, ejeeˈ tzunja ncheˈx tuj kˈakˈ. At jun potzbil tcub tibaj cynaabl. ⁴ Jaj taaw il ncawen twitz txˈotxˈ jaˈlewe ncub tmos̈en cynaabl kej xjal yaaˈn ocslal, tuˈntzen miˈn tzˈel cyniyˈ tiˈj tpocbal jxin Cristo jawnex, jxin nyeecˈan ke tiiˈn Dios, cuma jaxin juniyˈ tuya Dios. ⁵ Yaaˈn wiˈja jnxiˈ nkˈumena, sino tiˈj Kaaw Cristo Jesús. Ntiina tzalu nuk tuˈn wajbeˈna cyey tuˈn wajbeˈna te Jesús. ⁶ Tuj tneel, tej nuk klolj taˈ twitz txˈotxˈ, e xiˈ tkbaˈn Dios, “Tuˈnxit ttxakan spiˈyen,” tz̈i Dios. Tisen e cub naj klolj tej tul txakpaj spiˈyen jatxe ootxa, juˈxsen qˈuelelj klolj twitz knaabl jaˈlewe oj ttzaj tonen Dios ejooˈ tuˈn tel kniyˈ tiˈj. Bix oj tel kniyˈ tiˈj jawnexte Cristo, otktzen tzˈel kniyˈ tiˈj jaxse jawnex Kman Dios, cuma ja Cristo yecˈbil te ke ti tten Dios. Tuˈn tzunja nchin kˈumen weya tiˈ Cristo.

Il tiˈj tuˈn toc ke kcˈuˈj tiˈ Dios

⁷ Yal weya, juˈ kena nuk tisen jun wicyˈil ajnintz bix yaaˈn cyiw bix ncub pax. Pero tuj wicyˈil at kˈinemal, bix juˈxsen weya kˈiˈn jun nintzaj wuˈna. Jaj tpocbalj Cristo. Jwipemal tuˈn tbint taakˈen Dios yaaˈn weya, sino te Dios, tuˈntzen tchicˈajax yaaˈn inayena at wipemala tuˈn tbint taakˈen Dios, sino ja te Dios at nimxsen tipemal tuˈn tbint taakˈen wuˈna. ⁸ Jaxte at nim wik qˈuixcˈaj n‑oc weya, pero Dios n‑onen wiˈja tuˈn miˈn xcye wibaja. Bix juˈx min tzˈel nniˈya tiˈj tiken nuk tikˈch nbaj wiˈja, pero min nbaj ncˈuˈja tuj waakˈena. ⁹ Bix juˈx nim nchi oc lpe xjal wiˈja te yasl te weya, pero Dios min o cyaj tcyeˈyen inayena. Bix juˈx ma chin iyˈ tzˈaka cyuˈn kˈojlel wiˈja, pero lux kena iˈtza. ¹⁰ Jaca kˈij niyˈx qˈuixcˈaj tuˈn nxumlala tuj taakˈen Jesús, tuˈntzen toc cycyeˈyen xjal yaaˈn jawnex kena, tuˈntzen yaaˈn jweya nbi cjawel cyniman, sino tuˈntzen cyjyon cychunkˈlal tzin tkˈoˈn Jesús. ¹¹ Loˈj tzunj iˈtzx kena, jaca kˈij at xjal cyaj tuˈn ncub byeta tuˈnj taakˈen Jesús. Niyˈx wuˈna juˈwa tuˈntzen tcnet cyuˈn xjal jcychunkˈlal tzin tkˈoˈn Jesús. ¹² Tuˈnj o tziyˈx qˈuixcˈaj wuˈna juˈwa tuj waakˈena, o cnet cyuˈna cychunkˈlala te junx maj.

¹³ Pero n‑octzen ke ncˈuˈja tiˈ Dios. Inayena tisenj xjal e tkba cyjulu tuj tyol Dios jatxe ootxa: “‘E xiˈ wocslaˈna, bix juˈ tzunj e xiˈ nkˈumena jaj tpocbal j‑e wocslaya,’ tz̈i jun xjal,” tz̈i tyol Dios. Jax juˈx weya o txiˈ wocslaˈna. Juˈ tzunj jax nxiˈ nkˈumena jaj e wocslaya. ¹⁴ Ntzkiˈna Dios cjawel itzˈjsante ke ocslal tuj cyamecy, cuma ntzkiˈna o jatz titzˈjsaˈn Dios ja Kaaw Jesús tuj cyamecy. Cjawel tiiˈn Dios inayena cyuyey tuˈn kpon jaaˈ taˈxin. ¹⁵ Juˈ tzunj cykilca qˈuixcˈaj n‑oc wiˈja tzin npaˈna. Bix tzin npaˈna te cyey, tuˈntzen at t‑xtalbil Dios cyibaja. Ka at nim xjal ccyiikˈel t‑xtalbil Dios, jax nim xjal cxeˈl kˈonte chjonte te Dios, tuˈntzen tjaw nimset tbi Dios mas.

¹⁶ O tzˈel nniˈya tiˈj ko jawel itzˈj tuj cyamecy. Juˈ tzunj min chin xyutˈena tuj waakˈena. Amale bajnent baj tipen nxumlala tuˈnj cykilca n‑oc wiˈja, pero jax jaca kˈij ncywix ncˈuˈja. ¹⁷ Tej niyˈx tuˈn nxumlala jaˈlewe yaaˈn nimxix te ja twitzj ncotza cncamela laˈ alcye jun kˈij tuˈnj qˈuixcˈaj niyˈx wuˈna tuj taakˈen Cristo. Jqˈuixcˈaj niyˈx tuˈn nxumlala jaˈlewe pjel tilel, pero tbaneyil j‑acˈaj nchunkˈlal mintiiˈ tbajlel. ¹⁸ Juˈ tzunj min tzˈoc nkˈon wiiba tiˈj chicˈaj, cuma pjel laˈ alcye jun kˈij, sino juˈ n‑oc nkˈon wiiba tiˈj minaˈx tchicˈajax, cuma ctemel te junx maj.