Chronological

Ejooˈ ocslal, o tzaj tkˈoˈn Espíritu Santo jun kaakˈen

12  Key hermano, ya waja txiˈ nkˈumena cyey jun tumel tiˈj ti tten tuˈn cyakˈanana junx tuj taakˈen Dios tjakˈ tcawbil Espíritu Santo. Il tiˈj tuˈn tel cyniˈya tiˈj.

² Tej mitknaˈx cyocslana, tej eteˈcxa tjakˈ cycawbil biman, cytzkiˈntla tuˈn cyipemal biman e xiˈ kitetkey tuˈn cyoc lpey cyiˈ sant cyimne. ³ Juˈ tzunj nxaˈ nkbaˈna tuˈn toc cycˈuˈja tiˈj, cuma at caˈba wik espíritu tuˈn toc ten cawel cyey. Atte biman, bix atte Espíritu Santo. Cxeˈl nkˈumena cyey ti tten tuˈn tel cyniˈya tiˈj alcyej ncawen cyiˈja oj nchi yolena. Ka at jun xjal nxiˈ sbunte Kaaw Jesús, ktzkiˈntl yaaˈnte Espíritu Santo njaw kˈinte taakˈxin. Pero ka at jun xjal nkbante “Ja Jesús Kaaw,” ka tz̈i juˈwa, ktzkiˈntl Espíritu Santo njaw kˈinte taakˈxin, cuma te biman mlay txiˈ tkbaˈn ja Jesús Kaaw.

⁴ Tujtzen cywitza nuk jun wik akˈuntl cˈajbel tuj taakˈen Dios. Pero cxeˈl nkbaˈna cyey tuj taakˈen Dios, at nim wik kaakˈen, bix kˈoˈn tuˈn Espíritu Santo te teeylex juun taakˈen. Pero amale jacat juun ocslal tecˈax taakˈen, jax Espíritu Santo o tzaj kˈonte cykilca, bix junx Espíritu Santo ncawen tibaj cykilca taakˈen Dios. ⁵ Bix amale chˈimacˈat wik akˈuntl at cyxol ocslal, cykilca koˈ nko ajben te junx Kaaw. ⁶ Bix amale chˈimacˈat tten cyuˈn ocslal tuj taakˈen Dios, pero junx Kman Dios taaw tibaj cykilca. ⁷ Ntzaj tkˈoˈnte Espíritu Santo te jaca juun ocslal alcye baˈn tbint tuˈn, tuˈntzen tajben cye niyˈtl ocslal. ⁸ At juun ntzaj tkˈoˈn Espíritu Santo tuˈn ttzaj mas cynaabl. Bix at juuntl ntzaj tkˈoˈn Espíritu Santo tuˈn cytzket chˈintl tiˈj. ⁹ Bix at juuntl ntzaj tkˈoˈn Espíritu Santo nim n‑oc juch cycˈuˈj tiˈj tuˈn tbint nim cyuˈn, cuma n‑oc ke cycˈuˈj tiˈ Dios cuma jaxin baˈn tbint cykilca tuˈnxin. Bix at juuntl ntzaj tkˈoˈn Espíritu Santo jun cyipemal tuˈn cykˈanen tiˈ cyyabel xjal. ¹⁰ Bix at juuntl nim cyipemal o cyiikˈ tuˈn Espíritu Santo tuˈn tbint jun akˈuntl jawnex cyuˈn. Bix at juuntl baˈn cyuˈn tuˈn t‑xiˈ cykˈumen tyol Dios cye xjal. Bix at juuntl ntzaj kˈoˈn cyipemal tuˈn tel cyniyˈ tiˈj ti niyˈ tuj tcˈuˈj juntl, ka jax bix ka ẍtakˈ, ka te Dios bix ka yaaˈn te Dios. Bix at juuntl ntzaj kˈoˈn tuˈn cyyolen tuj chˈimacˈa wika yol min tzˈel cyniyˈ tiˈj. Bix at juuntl ntzaj kˈoˈn tuˈn tel cyniyˈ tiˈj ti japenina jchˈimacˈa wik yol tzin cyyolen cabtl pero min tzˈel cyniyˈ tiˈj. ¹¹ Ejeeyle tzunj lu baˈn tbint tuˈn juun ocslal, laˈ ti cyaakˈen. Pero jax Espíritu Santo nkˈonte te cye, bix ja nkˈonte te jaca juun laˈ alcye tipemal taj takˈ.

¹² Cxeˈl nkˈumena cyey jun techel. Tisencˈa chˈimacˈa iken tuˈn kxumlal najben te junx kxumlal, jaxse juˈx ejooˈ ocslal tuya chˈimacˈa kaakˈen nko ajben te junx Cristo. Ejooˈtzen ocslal tisen t‑xumlal Cristo. Amale chˈimacˈat kbaj, pero junx elnina koˈ, cuma mintiiˈ caˈba t‑xumlalxin. ¹³ Tej kocslan, Espíritu Santo e tzaj tchmoˈn ejooˈ tuˈn at kmojbabl kiib. Judíole, yaaˈnle judío, etoˈcxle tjakˈ tcawbil kpatrón, yaaˈnle etoˈcx tjakˈ tcawbil kpatrón, cykilca koˈ junx cloj elnina koˈ, bix etoˈc tuj tkˈab Kaaw. Bix nuk oˈcx junx Espíritu Santo at, bix o kcˈam.

¹⁴ Ejooˈtzen ocslal tisen jun xumlalbaj. Yaltzen te jun xumlalbaj, nim iken tuˈn. Yaaˈn nuk junx iken tuˈn. ¹⁵ Nuket tz̈i jun kenbaj, “Yaaˈn te xumlalbaj kenwe, cuma yaaˈn inayena jawnex tisen jun kˈabbaj,” nuket tz̈i juˈwa, pero tex xumlalbajx kenbaj. ¹⁶ Juˈx ẍquinbaj, nuket tz̈i jun ẍquinbaj, “Yaaˈn jun nintzaj tbakˈ witzbaj kenwe. Juˈ tzunj yaaˈn te xumlalbaj kenwe,” nuket tz̈i ẍquinbaj juˈwa, pero tex xumlalbajx ẍquinbaj. ¹⁷ Nuket cykil xumlalbaj tbakˈ witzbaj, ¿titzen tten tuˈn nbinte? Bix nuket cykil xumlalbaj ẍquinbaj, ¿titzen tten tuˈn tskun? ¹⁸ Najben ẍquinbaj bix najben tbakˈ witzbaj, bix najben cykilca iken tuˈn xumlalbaj. Bix o baj tnincˈuˈn Dios cykilca jaaˈ toca tajbelel. ¹⁹ Katzen cykilca nuk tbakˈ witzbajcˈa iken tuˈn jun xumlalbaj, ¿titzen tten tuˈn tajben? ²⁰ Mlay tzˈajben juˈwa. Ẍquinbajle, tbakˈ witzbajle, kenbajle, kˈabbajle, taj jun xumlalbaj cykilca tuˈn toc te junx xumlalbaj.

²¹ Tbakˈ kwitz mlay txiˈ tkˈumen te kkˈab, “Tey yaaˈn juˈ tisen inayena. Juˈ tzunj min tzˈajbena we.” Jax juˈx kwiˈ, ka nxiˈ tkˈumen kwiˈ te kken, “Min tzˈajben tey cuma junxitla bix ajnintza,” ka tz̈i juˈwa, yaaˈn jax tyol. ²² Kej iken tuˈn kxumlal yaaˈn cyiw tuj kwitz, ejeeˈtlpeje mas cyajbel. ²³ Bix kej iken tuˈn kxumlal yaaˈn tumel tuˈn toc cyeˈyet, ejeeˈtl mas cˈojlaˈn kuˈn. Oj cyoc kpotzen, nyeecˈatzen jawnexke tuj kwitz, ²⁴ tisenx kej tuˈn tchicˈajax jawnex. Tuj twitz Dios jawnexsen kej iken tuˈn kxumlal potzenke. Jaxin e binchante cykilca iken tuˈn kxumlal, bix o baj tnincˈuˈnxin cykilca jaaˈ toca tajbelel, ²⁵ tuˈntzen tbaj cyonen cyiib tuj ttz̈yal, bix tuˈntzen jaca juun cˈajbel te kxumlal tuˈntzen tel baˈn. ²⁶ Ka at jun at nchyon te, cykilca ntnaˈn tchyonel, bix ka at jun ntnaˈn tzalajebl, cykilca ntzalaj tuya.

²⁷ Jaxse juˈx ke ocslal. Ejooˈtzen tisen t‑xumlal Cristo. Jaca juun ke tisen jun iken tuˈn t‑xumlalxin. ²⁸ O baj tnincˈuˈn Dios nim wik ocslal te cyajbel cye cabtl. Bix o tzˈoc tkˈoˈn Dios jaca juun ocslal jaaˈ toca tajbelel cye niyˈtl ocslal. At juun at cyipemal tuˈn cyajben te apóstol tuˈn t‑xiˈ cykˈumen tpocbalj coˈpbil tuˈn Jesús cyxol xjal yaaˈn ocslal. Bix at juuntl at cyipemal tuˈn cyajben te profeta tuˈn toc cycyiwsaˈn cycˈuˈj ocslal tuj tyol Dios. Bix at juuntl at cyipemal tuˈn cyajben te maystro te txˈolbalte cye xjal ti japenina tyol Dios. Bix at juuntl o tzaj cyipemal tuˈn tbint jun nintzaj akˈuntl cyuˈn. Bix at juuntl o tzaj cyipemal tuˈn cykˈanen cyyabel xjal. Bix at juuntl at cyipemal te onlcye xjal. Bix at juuntl at cyipemal te nicˈulte bix cawel tiˈ jun akˈuntl. Bix at juuntl at cyipemal tuˈn cyyolen tuj juntl wik yol min tzˈel cyniyˈ tiˈj. ²⁹ Cxeˈl nkanena cyey, ¿atpa cyipemal tiˈj cykilca ocslal tuˈn t‑xiˈ cykˈumen tyol Dios cye xjal? ¿Atpa cyipemal tiˈj cykilca tuˈn toc cycyiwsaˈn cycˈuˈj niyˈtl ocslal? ¿Atpa cyipemal tiˈj cykilca ocslal tuˈn t‑xiˈ cyxnakˈtzaˈn cye xjal ti toc tuˈn tyol Dios? ¿Atpa cyipemal tiˈj cykilca ocslal tuˈn tbint jun nintzaj akˈuntl cyuˈn? ³⁰ ¿Bix atpa cyipemal tiˈj cykilca tuˈn cykˈanen cyyabel xjal? ¿Bix atpa cyipemal tiˈ cykilca tuˈn cyyolen tuj juntl wik yol min‑al n‑el tniyˈ tiˈj? ¿Bix atpa cyipemal tiˈ cykilca tuˈn tcub cychˈixbeˈn ja juntl wik yol tuˈn tel cyniyˈ xjal tiˈj? ¡Min! Yaaˈn juˈwa. Teeylex juun tuya taakˈen kˈoˈn tuˈn Dios. ³¹ Yaltzen cyey, jaca juun cyey cyaja tuˈn cyoca tuj cyaakˈena mas jawnex tuj cywitza. Baˈnte tuˈn cyjyona jun akˈuntl jawnex, pero cxeˈl nkˈumena cyey ti tten tuˈn tbint jun mas baˈnxix cyuˈna.

Mlay ko ajben te Dios ka min n‑oc takˈ juntl kuya ke

13  Kane baˈn ko yolen cyuya xjal, bix kane baˈn tuˈn kjaw yolen tuj jun wikxitl yol mintiiˈ tumel, hasta baˈntetnele kyola cyuya ke ángel tuj cyaˈj, pero ka mintiiˈ tkˈakˈbil kcˈuˈj cyiˈ xjal, mintzen nko ajben twitz Dios. Ka min tzˈoc cyakˈ kuya ke, nuk kyol nkˈajt, tisen jun xcbil nuk ntzininin mintiiˈ najbeˈna. ² Bix ka at nim kajbel tuˈn t‑xiˈ kkˈumen tyol Dios, bix kane ma tzˈel kniyˈ tiˈj cykilca, hasta cykilcaj e cyaj tkˈoˈn Dios ti pjel yaj, pero ka min tzˈoc cyakˈ kuya ke, mintiiˈ tajbelel. Bix ka nim kocslabl tiˈ Dios at, hasta jacˈanele tsiyˈ yucch witz kuˈn tuˈn kocslabl, pero ka mintiiˈ tkˈakˈbil kcˈuˈj cyiˈ kuya, mintiiˈ kajbel. ³ Bix ka ma txiˈ kkˈoˈn cykilca at kuya cye mebe xjal, pero nuk te nimbil kiib, bix mintiiˈ tkˈakˈbil kcˈuˈj cyuya mebe, mintiiˈ tajbelel jnbint kuˈn twitz Dios. Bix ka ma cub tzeyˈ kxumlal nuk tuˈn nko kˈumen tyol Dios, pero ka mintiiˈ tkˈakˈbil kcˈuˈj cyuya xjal, mintiiˈ tajbel kcyamecy.

⁴ Katzen at tkˈakˈbil kcˈuˈj, attzen kpasensya, bix jun xtalbil cxeˈl kkˈoˈn cye cabtl, bix miˈn nuk chiˈlec kcˈuˈj ka at jun tiiˈ at tuya juntl, bix yaaˈn cjawel kniman kiib, bix miˈn ko iyˈ tibaj mas knaabl tibaj cabtl. ⁵ Tuˈn toc cyakˈ xjal ke, iltzen tiˈj ko yeecˈan baˈn knaabl cye xjal, yaaˈn nuk cˈoquex kcuˈtzen kiib, bix yaaˈn nuk te ke jun baˈn cxeˈl kbisen, bix min ko jaw kˈoj naj, bix ka at jun kaˈ n‑oc tbinchaˈn juntl kiˈj, miˈn tzaj knaˈntl. ⁶ Oj at tkˈakˈbil kcˈuˈj, miˈn ko tzalaj ka ma txiˈ jun xjal tuj il tuˈn til, sino oˈcx ko tzalajel tiˈj ka ma txiˈ tiiˈn jun xjal tchunkˈlal jiquen. ⁷ Ka n‑oc cyakˈ xjal ke, cweltzen knajsaˈn cyil, bix nuk cxeˈl kbisen baˈn tiˈ jun xjal, bix kaj nuket cykilca baˈn te jun xjal, bix qˈuiyax kuˈn cykilca kaˈ n‑oc xeˈt kiˈj.

⁸ Tkˈakˈbil kcˈuˈj mintiiˈ tbajlel, cuma cˈoquel kˈakˈen kcˈuˈj tuj cyaˈj te junx maj. Pero yaltzen tkˈumj tyol Dios, bix jyol tuj jun wikxitl yol min‑al n‑el tniyˈ tiˈj, bix tkˈumj jcykilca baˈn kuˈn, cykilca pjel twiˈ laˈ alcye jun kˈij oj kpon tuya Dios, cuma mintiiˈ chi ajbeletl. Nuk oˈcx cyjel tkˈakˈbil kcˈuˈj kuya kxol. ⁹ Jn‑el kniyˈ tiˈj jaˈlewe, yaaˈn enterax. At mastl. Bix cykilcaj nbyan tiˈ Dios jaˈlewe yaaˈn juˈ tisej oj toccˈa kcyeˈyen. ¹⁰ Juˈ tzunj ojtzen kpon tuya Dios, bixsen pjel tilel tpocbal Dios, cuma ya mintiiˈtl il tiˈj. Mintiiˈtltzen nuk tpocbal, cuma tcubtltzen Dios ya kuya.

¹¹ Cxeˈl nkbaˈna jun tumel. Tej neeˈ kena, in yolena tisen jun neeˈ, bix at jun nnaabla tisen jun neeˈ. Yaltzen jaˈlewe ma xjaltltzen kena, bix ya yaaˈntltzen juˈtl nnaabla tisen neeˈ. Juˈtzen kten jaˈlewe. Tisen neeˈ etoˈ jaˈlewe, hasta ojxe toc kcyeˈyen jmera jaxxix. Pero oj toc kcyeˈyen jmera jaxxix alcye jun kˈij, ya tisentzen jun xjal ya ma xjaltl, bix qˈueleltzen kniyˈ tiˈj.

¹² At juntl tumel. Oj kaj kil kwitz, mlay kil. Nuk tuj jun respej klaˈtzen chˈin. Juˈtzen tten n‑el chˈin kniyˈ tiˈ Dios jaˈlewe. Nuk tisen n‑oc kcyeˈyen chˈin kwitz tuj respej jaˈlewe, pero at jun kˈij cˈoqueltzen kcyeˈyen twitz Dios tisen te Dios n‑oc tcyeˈyen kwitz jaˈlewe.

¹³ Entonces, key hermano, tuˈn tpon baj twiˈ nyola tiˈj tkˈakˈbil kcˈuˈj, cxeˈl nkbaˈna cyey at kˈukl kcˈuˈj tiˈ Dios, bix at nko ayon tiˈjxin, bix at tkˈakˈbil kcˈuˈj kxol. Bix cyxol tzunj oxe tumel lu ja te mas il tiˈj, jaj tkˈakˈbil kcˈuˈj kxol.

Tej tyole Pablo tiˈj oj nyole jun ocslal tuj jun wikxitl yol

14  Juˈ tzunj, key hermano, cˈoquel cykˈoˈna tilel tuˈn at tkˈakˈbil cycˈuˈja cyxola. Pero jax juˈx baˈn tuˈn tbint cyuˈna tuˈn Espíritu Santo jun cyaakˈena tuj taakˈen Dios. Bix tibaj cykilca, cyjyonxa tuˈn t‑xiˈ cykˈumena tyol Dios. ² Ojtzen tyolen jun ocslal tuj jun wikxitl yol min‑al n‑el tniyˈ tiˈj, nuk oˈcx nyolen te Dios, yaaˈn cyuya xjal. Amale nyolet tuˈn tipemal Espíritu Santo, min‑al qˈuelel cyniyˈ tiˈj tyolxin, cuma yaaˈn telniyˈ. ³ Pero oj t‑xiˈ tkˈumen jun ocslal tyol Dios tuˈn tipemal Espíritu Santo, qˈueleltzen tniyˈ cabtl ocslal tiˈj, bix cbinel tuˈn tuˈntzen cytz̈ˈiy ocslal tuj tyol Dios, bix tuˈn cyxiˈ onet tuj cyocslabl tiˈ Dios, bix tuˈn n‑oc nimset cycˈuˈj. ⁴ Jun ocslal nyolen tuj jun wikxitl yol min‑al n‑el tniyˈ tiˈj, nuk te te najbeˈna. Pero jun ocslal nkˈumen tyol Dios, tetzen cykilca ocslal najbeˈna.

⁵ Katzen cyaja cykilca key chi cyyolela tuj jun wikxitl yol min‑al n‑el tniyˈ tiˈj, baˈn. Pero jawe waj mas ka cykilcakey nchi kˈumena tyol Dios. Ja tej tkbaj tyol Dios mas il tiˈj twitzj yol minteyˈ telniyˈ. Pero katzen at jun te txˈolbalte ti elpenina jun wikxitl yol min‑al n‑el tniyˈ tiˈj, baˈntzen, cuma cˈajbeltzen cye ocslal tuˈn cytz̈ˈiy tuj tyol Dios. ⁶ Ka oj npona cyxola bix chin yolela tuj jun wikxitl yol min‑al n‑el tniyˈ tiˈj, ¿ti cˈajbele nyola cyey? ¡Mintiiˈ! Pero ka ma txiˈ nkˈumena cyey alcye o tkba Dios weya, bix alcye n‑el nniˈya tiˈj tyol Dios, bix ka tzinen n‑oc wuˈna alcye toc tuˈn tyol Dios, bix ka nxiˈ nkbaˈna cyey alcye o nxnakˈtzaya tuj tyol Dios, cˈajbeltzen nyola cyey.

⁷ Cxeˈl nkˈoˈna juntl tumel cyey. Kej nchi oc kˈonte jun quitar bix ka jun xux, ka min bint chinbelte cyuˈn, nuk nlililin. Mintiiˈ tumel ti toc tuˈn. Ja tej ka ttxolante chinbelte, attzen tumel ti toc tuˈn. ⁸ Juˈxsen oj cyxiˈ soldado tuj kˈoj. Jxjal cxeˈl kˈonte tumel cye soldado tuya trompeta laˈ alcye otk tkba cycawel, ka min s‑oc tkˈoˈn tuj tzinen, mlay tzˈel cyniyˈ soldado tiˈj ti cbinel cyuˈn. ⁹ Juˈx oj nchi yolena. Ka min chi yolena tuj tzinen, ¿ti tten tuˈn tel cyniyˈ xjal tiˈj? Nuk tuj cykˈiˈk nchi yolena.

¹⁰ Cxeˈl nkˈumena juntl tumel. At nim wik yol twitz txˈotxˈ, bix tecˈalex juun tuya tyol bix n‑el tniyˈ tiˈj. ¹¹ Pero ka at jun xjal ma tzaj yolen wiˈja bix min tzˈel nniˈya tiˈj tyol, te nakch xjal kena te texin, bix te nakch xjalxin te weya. ¹² Juˈ tzunj ka cyaja chi akˈanana tuˈn Espíritu Santo, il tiˈj cyaja cyipemala tuˈn cyonena cyiˈj ocslal tuˈn tel cyniyˈ tiˈj.

¹³ Juˈ tzunj, key hermano, katzen at jun ocslal nyolen tuj jun wikxitl yol min‑al n‑el tniyˈ tiˈj, e t‑xiˈ tkanen te Dios tuˈntzen jax qˈuelel tniyˈ tiˈj titzen tyola, tuˈntzen t‑xiˈ ttxˈolbaˈn tyol cye cabtl. ¹⁴ Oj knaˈn Dios tuj jun wikxitl yol min‑al n‑el tniyˈ tiˈj, ja te kanem nyolen te Dios, yaaˈn knaabl. Juˈ tzunj min tzˈel kniyˈ tiˈj titzen tkbaˈn kanem. ¹⁵ Key hermano, ¿alcye baˈn tuˈn tbint? Baˈn tuˈn knaˈn Dios tuj kanem tuj jun wikxitl yol min tzˈel kniyˈ tiˈj, bix baˈn tuˈn knaˈn Dios tuya kyol n‑el kniyˈ tiˈj. Bix ko bitzel yaaˈn nuk tuya jun wikxitl yol min‑al n‑el tniyˈ tiˈj, sino juˈxa ko bitzel bix qˈuelelxix kniyˈ tiˈj kbitz. ¹⁶ Ka njaw knimsaˈn Dios tuj jun wikxitl yol min tzˈel cyniyˈ niyˈtl ocslal tiˈj, yaj tzunkej xjal min tzˈel cyniyˈ tiˈj knabl Dios, mlay cykba “Amen” te yecˈbilte baˈn tuj cywitz oj t‑xiˈ kkˈoˈn chjonte te Dios, cuma min tzˈel cyniyˈ tiˈj knabl Dios. ¹⁷ Amaloj baˈnxsen knaˈj Dios tuj jun wikxitl yol, pero ejeeˈ tzunj ocslal min tzˈel cyniyˈ tiˈj, mlay tzˈajben cye.

¹⁸ Yaltzen weya, chjonte te Dios baˈn wuˈna tuˈn nyolena tuj jun wikxitl yol min‑al n‑el tniyˈ tiˈj. Bix mas nchin yolena tuj jun wikxitl yol twitz cykilcaj ke cyey. ¹⁹ Pero cyxol ocslal mas waja nuk jweˈ yol cxeˈl nkbaˈna pero telniyˈ, twitzj oj t‑xiˈ nkˈumena laaj mil yol tuj jun wikxitl yol min‑al n‑el tniyˈ tiˈj.

²⁰ Key hermano, oj t‑xiˈ kbisen tiˈj tuˈn tbint jun akˈuntl kuˈn, miˈntzen ko oc tisen jun neeˈ tuya knaabl, sino tisen jun xjal ma xjaltl nxiˈ tbisen tiˈj. Pero tuˈn t‑xiˈ kbinchaˈn jun kaˈ, baˈntzen tuˈn koc tisen jun neeˈ mlay bint tuˈn. ²¹ Cxeˈlxix cybisena tiˈj ti toc tuˈn ootxa tyol Dios tiˈj jun wikxitl yol at tuˈn tul cyxol xjal te Israel nejl. Tz̈i Kaaw cyjulu: “Ja nyola cycyˈi xjal te Israel. Juˈ tzunj cˈoquel nchkˈoˈn juntl tnom tuya jun wikxitl yol te cawlcye. Pero amale cwelet nkˈoˈna cycastiwa juˈwa, pero cycyˈi t‑xiˈ cybiˈn nyola,” tz̈i Kaaw tuj tyol Dios. ²² N‑oc kcyeˈyen tuj tyol Dios tej tpon juntl wik xjal tuya juntl wik yol cyxolj xjal min e cybi tyol Dios, minxtiiˈ oca tuˈn cyiikˈente tcawbil Dios. Yaltzen cyey tuj cywitz, jax juˈx oj kyolen tuj jun wikxitl yol min‑al n‑el tniyˈ tiˈj, qˈueleltzen baˈn tuj twitzj xjal yaaˈn ocslal, tz̈ikey. Bix tuj cywitza oj kkˈumen tyol Dios tuj tzinen, cˈajbel te jun xjal ocslal pero yaaˈn te jun xjal yaaˈn ocslal. ²³ Pero yaaˈn juˈwa. Ka cykilca key ocslal nchi chmeta tuj jun lugar, bix cykilca key nchi akˈa yolel tuj jun wikxitl yol yaaˈn telniyˈ, ¿ti pjel oj tocx jun xjal yaaˈn ocslal cyxola? Qˈuelela tuj twitz njaw tuj cywiˈy. ²⁴ Pero katzen nchi kˈumena tyol Dios tzinenxix, ojtzen tocx jun xjal yaaˈn ocslal cyxola, cˈoqueltzen tbiˈn, bix jketel tnaabl, bix qˈuelel tniyˈ tiˈj at til. ²⁵ Cykil tzunj ewen tuˈn tanem cˈuleltzen tuj tcˈuˈj, bix cyjeltzen tkˈoˈn til, bix cwel maje naˈl Dios, bix qˈuelel tniyˈ tiˈj Diostzen at cyuyey.

²⁶ Entonces, key hermano, jnxiˈ nkbaˈna cyey jaj oj cychmeta tuj jun culto, cab cyey bitzel, bix cabtl cyey kˈumlte tyol Dios, bix cabtl cyey kbalte ti o tyeecˈa Dios cye, bix cabtl cyey yolel tuj jun wikxitl yol min‑al n‑el tniyˈ tiˈj, bix cabtl cyey kbal ti japeninaj jun wikxitl yol. Pero cybinchama cykilca tuˈn ttzket cynaabl ocslal tuj tyol Dios. ²⁷ Ka ma yolen juun tuj jun wikxitl yol min‑al n‑el tniyˈ tiˈj, caˈbax baˈn tyolen juˈwa, bix ka ma yolen oxe, pero oˈcx xsunj. Bix juntl, oj cyyolen xjal tuj jun wikxitl yol, miˈn chi yolen junx, sino nuk juuncˈa c‑yolel. Bix iltzen tiˈj at juntl te kbalte ti japenina cyyol. ²⁸ Pero katzen min‑al jun baˈn ttxˈolbante ti elpenina cyyol tuj culto, miˈn chi yolen tuj wikxitl yol min‑al n‑el tniyˈ tiˈj. Mejor e cyyole cyjunalx bix tuya Dios.

²⁹ Ja tzunkej kˈuml tyol Dios, oˈcx caˈba oxe baˈn tyolen tuj jun culto. Jatzen cabtl nuk chi ebil ti toc cyuˈn kej nchi kˈon tyol Dios, laˈ ka tumel bix ka min. ³⁰ Bix oj nkˈon jun ocslal tyol Dios, bix nebinj juntl ocslal kˈuklecx, bix at chˈintl tumel tuya ti tten tyol Dios, iltzen tiˈj tkˈaˈj ocslal nkˈon tyol Dios ttyem tej juntl ocslal tuˈn tyolen jun rato. ³¹ Mas baˈn juuncˈa c‑yolel tiˈ tyol Dios tuj tumel twitzj oj tjaw nilj entera ocslal te kˈolte tyol Dios. Juˈtzen qˈuelel cyniyˈ ocslal tiˈj tyol Dios bix chi cycywixeltzen tuj cyocslabl. ³² Jnxiˈ nkˈumena jaj oj at nim cybaja cyaja chi kˈona tyol Dios tuj jun culto, ilxsen tiˈj ttxolan cyseˈ cyiiba joocˈtzen ncana cyiˈja tuˈn cyyolena, ³³ cuma te Dios taj tuˈn cykilca ten tuj ttz̈yal, yaaˈn tuˈn cykil ten tuj tzpetpajlenel. Juˈ tten cyxol ocslal tuj cykilca tja Dios.

³⁴ Bix at juntl nbaj cyxola. Ke xuuj oj min tzˈel cyniyˈ tiˈ cyyol kˈuml tyol Dios, bixsen nchi ocx te kanlte te ke cychmil ti tten, bix kaˈca jun tbiˈnc tuj culto. Ke xuuj mixbe cyyolen juˈwa tuj culto. Il tiˈj tuˈn cybinte jley ti tten tuˈn cycub ten tuj tumel tuj culto. ³⁵ Ka cyaj xuuj tuˈn tel cyniyˈ tiˈj ti toc cyuˈn kˈuml tyol Dios, baˈn tuˈn t‑xiˈ cykanen te cychmil cyja, cuma yaaˈn baˈn tuˈn cyocx ten labtel tuj culto.

³⁶ Yaltzen key, ¿tzimpa niyˈ tuj cycˈuˈja tiˈj ejeeˈpa tzuna e jaw itzˈjsante tyol Dios? ¿Bix tzimpa niyˈ tuj cycˈuˈja tiˈj nuk ejeeˈy n‑el cyniyˈ tiˈ tyol Dios? Ka juˈ niyˈ tuj cycˈuˈja, juˈtzen loj njaw cyniman cyiiba. ³⁷ Ka jaxxix cyuˈna n‑el cyniˈya tiˈj alcyej jaxxix, bix ka jaxxix cyuˈna at cyipemala tuˈn t‑xiˈ cykˈumena jaxxix, qˈuelel cyniˈya tiˈj jnxiˈ ntzˈiˈbena cyey jaj tcawbil Dios. ³⁸ Ka at jun kˈuml tyol Dios cyxola min tzˈel tniyˈ tiˈj jaxxix jnxiˈ ntzˈiˈbena cyey, miˈn tzˈoc tajlal te kbalte tyol Dios.

³⁹ Key hermano, cykˈoˈnc cyipena tiˈj cykˈumena tyol Dios tuj tzinen, pero miˈn txiˈ cykbaˈna cye kej ocslal nchi yolen tuj jun wikxitl yol min‑al n‑el tniyˈ tiˈj tuˈn miˈn chi yolen. ⁴⁰ Ja mas il tiˈj jaj tuˈn cytena tuj tumel tuj jun culto, yaaˈn tuj tzpetpajlenel.