Chronological

Toclen jun akˈanal tuj tyol Dios

9  Key hermano, cyiiˈnx ti tten wuˈna. Inayena jun t‑xel Jesús. Juˈ tzunj at nim woclena. Pero te weya woclen, mintiiˈ cnkaniya tiˈj.

Pero at juun ocslal nkˈumente yaaˈn t‑xel Jesús kena. Pero jaxte inayena jun t‑xel Jesús, cuma o wila Kaaw Jesús, bix o chi ocslana tuˈnj waakˈena. ² Amale atet juntl wik xjal nkˈumente yaaˈn t‑xel Jesús kena te cye, pero te cyey, jaxte inayena t‑xel Jesús, cuma wuˈna o chi oquey tuya Kaaw. ³ Jatzen jun yecˈbil inayena t‑xel Jesús.

⁴ Waj chin yola cyuyey tiˈj jun woclena o cyaj nkˈoˈna. Cuma t‑xel Jesús kena, juˈ tzunj at woclena tiˈ chojbilte weya tuj waakˈena tuj tyol Dios, tuˈntzen miˈn chin akˈanantla tuj juntl akˈuntl tuˈn witzˈja. At woclena tuˈn nweˈya cyjay tuˈn ttzaj cykˈoˈna nwaya bix ncˈaˈya. ⁵ Bix yaaˈn oˈcx, sino at woclena tuˈn nmajeya, bix nuket at nxuˈla ocslal, iletle tiˈj tuˈn toc cycˈojlaˈna, tisen tzunj cabtl t‑xel Jesús cyuya ke titzˈen Jesús bix tuya Pedro at cyxuˈl bix tzin cyiikˈentexin onbilte te cyxuˈlxin. ⁶ At woclena tuˈn cychjontey inayena, pero inayena tuya Bernabé nko akˈanana tuya kkˈaba tiˈ juntl kaakˈena tuˈn kitzˈja joocˈtzen nchi onj cabtl t‑xel Jesús cyuˈna. ⁷ At woclena tuˈn cycˈojlantey inayena tisen jun soldado cˈojlaˈn tuˈn gobierno. Yaaˈn tcwent‑x tiˈ iˈtzen. Bix jun akˈanal tiˈ txˈotxˈ at toclen tuˈn twaaˈn tiˈ tawal. Jax juˈx jun cylel wacẍ at toclen tuˈn tetz tiiˈn tal tin wacẍ te tcˈaˈ. Bix jax juˈx jun t‑xel Jesús at toclen tuˈn titzˈj tiˈ taakˈen tuj tyol Dios, cuma ka nakˈanan jun xjal, at chojbil te. ⁸ Yaaˈn nuk wexa nyol jlu, sino juˈ tzin tkbaˈn tyol Dios. ⁹ Tz̈i tley Moisés cyjulu: “Miˈn tzˈoc cykˈoˈna paaˈ tiˈ ttzi wacẍ, tuˈn twaaˈnjil joocˈtzen nbaj pjunjil triwa,” tz̈i tyol Dios. Pero yaaˈn nuk tiˈ wacẍ ja tumel lu, ¹⁰ sino juˈ japenina tiˈ jun akˈanal tiˈ tyol Dios. Jun akˈanal tiˈ tyol Dios at toclen tuˈn tiikˈente twiˈ tcˈuˈj cyekej najbenxin cye. Ktzkiˈntl jun cjol tuya wacẍ ncjon tiˈ txˈotxˈ, bix xsunj cjtxˈol at cyoclen tuˈn cycaman tiˈ cyjaˈtxˈen. ¹¹ Juˈx weya at woclena tuˈn ncamana tiˈ waakˈena. Inayen tzuna tisen jun awaal tiˈ txˈotxˈ, bix ejeeˈy tzuna tisen txˈotxˈ. Jax txˈotxˈ ckˈolte chojbil te awaal. Ja iyaj o cyaj wawaˈna cyxola, jatzen tyol Dios. Ja jun iyaj mas jawnex twitzj iyaj te kwa. Juˈ tzunj at woclena tuˈn ttzaj cyonena ti chin nitzˈjeleya.

¹² Jayle tzunj lu woclena o cyaj nkˈoˈna. Ntzkiˈntl at juntl akˈanal tiˈ tyol Dios nxiˈ cyonena. Attzen cyexin cyoclen tuˈn cyiikˈentexin onbil cyexin. Yajtzen weya, mas weya woclen at cywitzxin tuˈn wiikˈenteya onbil weya. Pero min o nkaniya tuˈn wiikˈente cyonbila, sino o chin akˈananwe cyiw tuˈn witzˈja. Juˈ tzunj mlay tzaj cykbaˈna nchin kˈumena tpocbal Cristo nuk tuˈn pwak wuˈna.

¹³ Cytzkiˈntla e tkba Dios cye xjal judío kej nchi akˈanan tuj tja Dios at cyoclen tuˈn t‑xiˈ cychyoˈn cychuˈlj alimaj e xiˈ oyet te Dios. ¹⁴ Juˈxse e tkba Kaaw cyiˈj kej nchi akˈanan tiˈ kˈoj tpocbal jyol te coˈpbil, baˈn tuˈn cyitzˈj tiˈ cyaakˈen tuj tyol Dios.

¹⁵ Pero ja nyola lu ma cub ntzˈiˈbena cyey yaaˈn tuˈn cychjontey twiˈ ncˈuˈja tiˈj. ¡Min! Weya, waja tuˈn ncamante jun chojbil weya mas jawnex twitzj twiˈ ncˈuˈja. Ja tzunj chojbil weya waja, jaj tuˈn wakˈanana tiˈ tyol Dios mintiiˈ twiˈ ncˈuˈja tiˈj. Bix ja chojbil te weya ncyˈiya tuˈn tel tiiˈn juntl. Juˈ tzunj mlay txiˈ nkaniya mi nuket jun centavo cyey. Mas baˈn tuˈn ncyima twitzj tuˈn nchjeta tiˈj. ¹⁶ Il tiˈj tuˈn t‑xiˈ nkbaˈna tpocbal coˈpbil ke tiˈ kil. Juˈ tzunj yaaˈn tuˈn tjaw nniman wiiba tiˈj, cuma ka min xbint wuˈna, tzul il wiˈja. ¹⁷ Ja waakˈenja te kbalte tyol Dios yaaˈn tuˈn wexa nganiya, sino ja Dios oc kˈonte weya tiˈj. Nuket inayena e jyontej akˈuntl lu, jacˈatzen t‑xiˈ nkaniya twiˈ ncˈuˈja tiˈj. Pero Dios o kˈumente, bix juˈ tzunj nxiˈ ncuyana. ¹⁸ ¿Titzen jilel t‑xel cncamiya? Jaj tuˈn t‑xiˈ nkbaˈna tpocbal coˈpbil ke cyey min chin kanena twiˈ ncˈuˈja cyey tiˈ waakˈena tiˈ tyol Dios. Juˈ tzunj ncyaj nkˈoˈna tuˈn miˈn chin chjete.

¹⁹ Min‑al jun xjal nchjonte weya. Juˈ tzunj min‑al jun xjal at toclen tuˈn tcawen wibaja. Pero amale yaaˈnt ntiincxa tjakˈ tcawbil mi nuket jun xjal, ma chin oca te ajbel te cykilca xjal, tuˈntzen cyxiˈ lpe nim xjal tiˈ Cristo. ²⁰ Oj ntiina cyxol xjal judío, yaaˈn nuk cˈoquex ntxˈomena cyley. Amale minttiiˈ il tiˈj tuˈn ncuyanteya cyley, pero tzinx n‑oc nkˈon wiiba cyuya judío, tuˈntzen toc cybiˈn nyola bix tuˈn cyocslan tiˈ Cristo. Jax amale atet woclena tuˈn miˈn tzˈoc nbiˈna tley Moisés, pero oj ntiina cyxol kej xjal n‑oc cybiˈn tley Moisés, jax n‑oc nbiˈnwe, tuˈntzen miˈn chin n‑el cyiiqˈuen bix n‑octzen cybiˈn jweya nyol. ²¹ Bix juˈx oj ntiina cyuya kej xjal yaaˈn eteˈcx tjakˈ tley Moisés, jax yaaˈn nuk n‑ocx ntxˈomena cyley, tuˈntzen cyocslante. Pero amale tzint n‑ocx nkˈon wiiba cyxol, ka at jun cycostumbre kaˈ tiˈ tyol Dios, mas il tiˈj tuˈn ntiina tjakˈ tcawbil Dios cywitz, cuma lepch kena tiˈ Cristo. ²² Bix oj ntiina cyxolj ocslal yaaˈn cyiw eteˈ tuj cyocslabl, mlay txiˈ nchyoˈna chiˈpj oˈyen cye sant cywitz, tuˈn miˈn cub nbajsaˈna cycˈuˈj, bix chebe qˈuelel cyniyˈ tiˈj. Alcyexja xjal ntiina cyuya, n‑oc nkˈon wiiba cyuya, tuˈntzen tcub cyiˈj wuˈna tuˈn cyocslante tyol Dios. ²³ Cykil woclena ncyaj nkˈoˈna, tuˈntzen ttz̈ˈiy tpocbal at coˈpbil cye xjal tuˈn Jesús.

²⁴ Entonces, key hermano, juˈx cyey il tiˈj tuˈn toc cyipena tuˈn cyoc lpey tiˈ Cristo tuya cykil cycˈuˈja. Cwel nkˈoˈna jun techel cyey. Tuj jun ajkelbil at nim xjal najkelen. Pero junx ncaman tiˈ ajkelbil bix ncaman jun tcotz. Nukettzen juˈke cyey tisen jun camal ncaman tiˈ tajkelbil. Cyiiˈnxa jun cynaabla baˈn tuˈn baˈn ẍi eˈley twitz Dios oj toc tcyeˈyen Dios cynaabl. ²⁵ Il tiˈj cycˈojlaˈ cyiiba tuˈn cycamana cycotza tuˈn Dios, tisen kej pelotel cycˈojlan cyiib tuˈntzen cycaman cycotz tiˈ cysakech. Pero ke kẍal pelot n‑oc cyipen tuˈn cycaman tiˈ jun cycotz jun rato nbaj twiˈ. Pero ejooˈ ocslal kaj koˈx lpe tiˈj Cristo tuˈn kcaman tiˈ jun kcotz mintiiˈ tbajlel. ²⁶ Juˈ tzunj n‑oc wipena tuˈn ncamana, yaaˈn juˈ tisen jun kˈojlel nbuˈn nuk tuj cykˈiˈk bix min tzˈoc tkˈoˈn tiˈ juntl, bix yaaˈn juˈ tisen jun ajkelel najkelen nuk jakˈch n‑exa txelpaj, sino juˈ tisen jun ajkelel najkelen jiquen. ²⁷ Nxumlala taj nuk tikˈch kaˈ bix taj cawen wibaja. Pero min txiˈ nkˈon wiiba te nxumlala, sino inayena nchin cawena tibaj nxumlala, tuˈntzen ncamana tibaj yaaˈn baˈn. Jun chˈixbajilettzele te weya ka min ma nnimana jnxiˈ nkˈumena cye ocslal biˈx cxeˈl t‑xooˈn Dios inayena tuˈn wila.

Jun naabl tuˈn miˈn chi cub maje ke ocslal cywitz ke dios cyimne

10  Key hermano, cycyeˈyenc kej ootxa xjal wiyˈjila te Israel el xeˈtke tuˈn Dios tuˈn cyil. Ejeeˈtzen xjalja e ten tjakˈ t‑xtalbil Dios. Dios e cub kˈonte jun muj cyibajxin te cˈojlal cyexin bix te kˈilx cyexin tuj cybexin. Bix Dios e cub paˈnte tej Cyak Mar tuˈntzen cyiyˈx kej xjal te Israel jlajxe. ² Bix oc cykˈon cyiibxin tuˈn cyxiˈ lpexin tiˈ Moisés, jxin otk takˈ Dios te nenel. ³ Bix Dios e tzaj kˈonte cywaxin etz tz̈itj twitz cyaˈj, bix cykilcakexin e xiˈ waaˈnte. ⁴ Bix Dios e tzaj kˈonte cycˈaˈxin etz itzˈj tiˈ jun xak, bix cykilcakexin e xiˈ wecˈante. Cxeˈl nkˈumena cyey tej xak etz aˈ tuj, jatzen jun techel te te Cristo, cuma e ten tipemalxin cyuya xjal. ⁵ Pero amale nimet e ten ke aj Israel tjakˈ t‑xtalbil Dios, pero chˈixcˈa yaaˈn cykil xjal min el baˈn twitz Dios, bix juˈ tzunj min e ponkexin tuj txˈotxˈ otk tkba Dios, sino e cyimkexin tuj tzkij txˈotxˈ.

⁶ Juˈ tzunj, key hermano, nim cykˈoˈnc cycˈuˈja tiˈj e baj nejl. Nim kaˈ e cyajbe ke ootxa xjal wiyˈjila, bix e xiˈ tzpetkexin tuˈn. Juˈ tzunj cycˈojlam cyiiba tuˈn miˈn chi eˈla juˈxa ⁷ Miˈn chi oc majey twitz sant, tisen e baj cye ke ootxa xjal wiyˈjila. Tz̈i tyol Dios cyjulu: “Tneel e cub keke twitz cysant tisen wacẍ bix akˈke waaˈl bix wcˈal, bix lwewa e jaw weˈke bixel twitz cysant tisen wacẍ,” tz̈i tyol Dios. ⁸ Bix miˈn chi achena tuya pajbaj. Cˈulel tuj cycˈuˈja ke ootxa xjal te Israel wiyˈjila oc ipanke cyiˈ kej xuuj te Moab tuj pajlel, bix juˈ tzunj e tzaj tkˈoj Dios bix e cyim winak ox mil aj Israel te junx kˈij. ⁹ Miˈn tzˈoc cycyakwusaˈna Dios tuya nim cyila. Juˈ e bint cyuˈnj ootxa aj Israel, ¿bix ti e baj cye? Tuˈn nimxsen nchi yaan, e tzaj tkˈoj Dios cyiˈj, bix oc tsmaˈn Dios lbaj te txˈaˈleccye, bix nimxse xjal e cyim. ¹⁰ Bix miˈn nuk chi txololona tiˈ Dios. Juˈ e baj cye wiyˈjila, bix e cyimke tuˈn Dios tuˈn t‑ángel. ¹¹ Cykilj castiwa lu e baj cyiˈj wiyˈjila, amale nimet t‑xtalbil Dios at cyibajxin. O cyaj tzˈiˈbet tuj tyol Dios te yecˈbil te ke jaˈlewe tuj mancˈbil tyem, tuˈntzen toc kcwent tiˈj tuˈntzen miˈn ko tzpet. ¹² Juˈ tzunj, alj cyey tuj cywitza mlay chi cub tzˈaka tuj il, ¡kˈoˈnc cycˈuˈja tiˈj! ¹³ Nuk chˈinnchˈe oj cycub tzˈaka tuˈn niyˈbebl cyiˈja. Pero kej niyˈbebl niyˈ cyxola, cyxol cykilca ocslal niˈya, yaaˈn nuk cyxol ejeeˈy ocslal tuj Corinto. Pero oj toc niyˈbebl tiˈ jun xjal, jatzen xjalja baˈn tuˈn toc ke tcˈuˈj tiˈ Dios te onlte tuˈn tweˈ twitz niyˈbebl. N‑el tniyˈ Dios tiˈj, bix mlay takˈ Dios tuˈn toc niyˈbebl tiˈ jun xjal ka mlay tziyˈx tuˈn xjal oj toc niyˈbebl tiˈj. Oj toc niyˈbebl tiˈ jun xjal, Dios cˈonlte, tuˈntzen miˈn cub tzˈak tuj il. ¹⁴ Entonces, key hermano, e xiˈke wiyˈjila tuj castiwa tuˈn oc majeke cywitz sant. Juˈ tzunj cyxomela sant.

¹⁵ Ejeeˈy xjal n‑el cyey cyniyˈ tiˈj. Juˈ tzunj cxeˈl nkˈumena jun tumel cyey. Cybisenx tiˈj ka tumel nyola bix ka min. ¹⁶ Oj t‑xiˈ kcˈaˈn santa cena te nabbil tetzlen ttz̈qˈuel Cristo tuj t‑xumlal, nko yeecˈantzen at kmojbabl kiib tuyaxin. Juˈx oj t‑xiˈ kwaaˈn juun piẍ pan te nabbilte tcyimlen Cristo, nko yeecˈantzen junx elnina koˈ tiˈ t‑xumlalxin. ¹⁷ Juˈcˈa japenina koˈ tisenj pan te santa cena chˈimacˈa n‑eˈla. Amale nbaj piẍet pero junx pan, jax juˈx ke. Amale nimet kbaj ocslal, pero junx elnina koˈ. Jpan nbaj piẍet pero junx, jatzen jun techel junx elnina koˈ tiˈ Cristo.

¹⁸ Junxitl techel cxeˈl nkˈumena cyey. Cyxol aj Israel nejl e cub cypaten ke pala alimaj te Dios twiˈ altar, bix e xiˈ cychyoˈntlxin cychuˈl alimaj. Tej t‑xiˈ cychyoˈnxin juˈwa, e xiˈ cyyeecˈanxin at cymojbabl cyiibxin tuya Dios. ¹⁹ ¿Titzen nxaˈ nkbaˈna jlu juˈwa? Min tzin nkbaˈna tecˈaxit jchiˈpj nxiˈ oyet cye sant twitzj chiˈpj min txiˈ oyet, bix min tzin nkbaˈna ejeeˈt sant at cyipemal. Jnxiˈ nkbaˈna ja te il tiˈj jaj jaaˈ nxaˈ kkˈoˈn kanem. ²⁰ Jnxiˈ nkbaˈna kej xjal yaaˈn ocslal oj nxiˈ cyoyen jun cyoybil te jun sant, yaaˈn te Dios nxaˈ cyoyen, sino cye biman nxaˈ cyoyen. Juˈ tzunj cykˈoˈnc cycˈuˈja tiˈj tuˈn miˈn txiˈ cychyoˈna chiˈpj oˈyen cye sant, cuma ncyˈiya tuˈn cymojban cyiiba cyuya biman. ²¹ Mlay tuˈn tbaj cysmoˈna cˈaal cyanema tiˈ Dios bix cˈaal cyanema cyiˈ biman, pero juˈ tzin cyseˈna ka nchi nimana santa cena bix ncheˈxtla te nimal cywitz sant. ²² Oj tcub kpaˈn kanem tiˈ Dios, tzultzen tkˈoj Dios kiˈj, bix mlay weˈ tkˈoj Dios kuˈn, cuma at mas tipemalxin twitz ke kipemal. N‑oc juch tcˈuˈj Dios kiˈj, bix tajxin nuk tiˈjxin cˈoquela juch ke kcˈuˈj.

Cykil baˈn tuˈn tbint kuˈn pero yaaˈn cykilca najben

²³ Jax cyuˈna cykil baˈn tuˈn tbint tuˈn jun ocslal, pero nxiˈ nkbaˈna cyey yaaˈn cykilca najben. Jacˈa bint te alcye kaj, pero yaaˈn cykilca jacˈa tzˈajben tuˈn ktz̈ˈiy tuj tyol Dios, ²⁴ bix yaaˈn entera baˈn te yecˈbil te juntl. Cyxiˈmex alcye jun baˈn te juntl ocslal. Yaaˈn nuk chi ximela tiˈj alcye cyaja.

²⁵ Pero oj cypona te lokˈol chiˈpj tuj qˈueybil chiˈpj, mintiiˈ il tiˈj tuˈn tbaj cykanena alcye chiˈpj otk txˈaj oybaj twitz sant. Ka mintiiˈ tumel cyuyey ka oˈyen chiˈpj cye sant bix ka min, mintiiˈ tuˈn tbaj cycˈuˈja tiˈj, ²⁶ cuma cykilca wikan chiˈpj o tzaj tkˈoˈn Dios ke. Tz̈i tyol Dios cyjulu: “Entera twitz txˈotxˈ tuyax cykilca at twitz txˈotxˈ ntzaj tkˈoˈn Dios,” tz̈i tyol Dios.

²⁷ Katzen ma ttxoc jun xjal yaaˈn ocslal ejeeˈy te waaˈl tuya, ka cyaja cheˈxa, baˈn tuˈn cyxiˈy, bix baˈn tuˈn t‑xiˈ cychyoˈna laˈ alcye chiˈpj ctzaal kˈoˈn cyey. Miˈn chi oca te kanlte ka otk txˈaj oyet chiˈpj twitz sant bix ka min. ²⁸ Pero ka ma tkˈumen jun xjal te cyey, “Oˈyen tej chiˈpj lu cye sant,” ka tz̈i juˈwa, miˈn txiˈ cychyoˈna jchiˈpj, tuˈn miˈn cybinchay jun il tuj twitzj xin nkˈumente. ²⁹ Pero n‑el kniyˈ tiˈj nuk te te texin il tuj twitzxin, yaaˈn te cyey.

Pero cxeˈl cykbaˈna yaaˈn tumel tuˈn miˈn txiˈ cychyoˈna chiˈpj nuk tuˈn tyol juntl, ³⁰ bix yaaˈn tumel oj toc ten juntl xjal yolel cyiˈja oj t‑xiˈ cytz̈iybeˈna alcye ntzaj tkˈoˈn Dios cyey bix nxiˈ cykˈoˈna chjonte te Dios tiˈj. ³¹ Jax cyuˈna cykilca chiˈpj baˈn tuˈn t‑xiˈ kchyoˈn. Pero cxeˈl nkbaˈna cyey, amale baˈnt tuˈn t‑xiˈ kchyoˈn cykilca, bix tuˈn t‑xiˈ kcˈaˈn cykilca, bix tuˈn t‑xiˈ kbinchaˈn cykilca, mas il tiˈj tuˈn kajben te Dios twitzj tuˈn tbint cykilca kuˈn. ³² Juˈ tzunj miˈn cub kyeecˈan jun kbinchbil tuˈn tcub tzˈak juntl tuj il kuˈn, mi nuk jun judío bix mi nuk jun yaaˈn judío bix mi nuk jun ocslal. ³³ Juˈ nbint wuˈna. Tiˈj cykilca nbint wuˈna, nchin jyona tuˈntzen wajbena te cykilca xjal. Mintiiˈ nbint wuˈna nuk jaj baˈn te weya, sino jaj baˈn te cykilca, tuˈntzen cyclet.

11  Juˈ tzunj cyiiˈnx jun cynaabla tisen weya kˈiˈn nnaabla wuˈna. Cycnomela wiˈja, tisen weya n‑el ncnoˈna tiˈj tnaabl Cristo.

Jun xnakˈtzbil cye xuuj

² Key hermano, nchin tzalaja cyiˈja, cuma nbint cyuˈna jnxnakˈtzbila e cyaj nyeecˈana cyey. ³ Pero waja tuˈn tel cyniˈya tiˈj juntl tumel. Dios cawel tibaj Cristo, bix Cristo cawel tibaj jaca juun xinak, bix jaca juun xinak cawel tibaj t‑xuˈl. ⁴ N‑eltzen kniyˈ tiˈj ka potzen twiˈ jun xuuj tuya jun xbalen tuj jun culto, tetzen techel attzen tjakˈ tcawbil tchmil. Nukettzen ejeeˈ xinak potzen cywiˈ oj nchi naˈn Dios bix oj nchi kˈumen tyol Dios tuj jun culto, jun chˈixbajilettzele te cycawel Cristo, cuma nchi yeecˈattzele xinak eteˈcx tjakˈ tcawbil cabtl xinak, yaaˈn Cristo. ⁵ Yaltzen cye xuuj, ka min tzˈoc potzet cywiˈxuj oj cynaˈnxuj Dios bix oj cykˈumenxuj tyol Dios tuj jun culto, jun chˈixbajil te cychmilxuj. Ja tzunj lu tzin tyeecˈan mintiiˈ cynimbilxuj, cuma tisentzen juˈxkexuj cyisenj xuj ma tzoˈn ttzmal cywiˈ te yecˈbilte ejeeˈtzen xuja tisen xinak. ⁶ Ke cyey xuuj ocslal tuj Corinto, ka cyaja bint tuˈn miˈn potzet cywiˈy, baˈnttzele tuˈn tcub matzet ttzmal cywiˈy tuˈntzen tcyaj cywiˈy scˈoˈj. Jun chˈixbajilettzele te cyey, bix ka jun cychˈixewa tuˈn tcub matzet ttzmal cywiˈy, jax juˈx jun cychˈixewa oj tel cyiiˈna potzbil cywiˈy tuj culto.

⁷ Entonces, key hermano, te cyey xinak yaaˈn tumel tuˈn toc potzet cywiˈy tuj jun culto, cuma at cycawbil xinak tuˈn Dios tuˈn cycawen. Yaltzen te cyey xuuj, jcawbil kˈiˈn cyuˈna, cychmila kˈolte. ⁸ Tuj tneel min el itzˈj xinak tiˈ xuuj, sino ja xuuj el itzˈj tiˈ xinak. ⁹ Juˈtzen qˈuelela kniyˈ tiˈj min e cub tbinchaˈn Dios ja xinak te te xuuj, sino e cub tbinchaˈn Dios ja xuuj te te xinak. ¹⁰ Juˈ tzunj ja xuuj cˈoquel tpotzen twiˈ tuj culto te yecˈbil at tjakˈ tcawbil tchmil tuˈntzen t‑xiˈ tyeecˈan tnimbil cywitz ke nenel cyxol ocslal.

¹¹ Pero amale jat xinak ncawen tibaj xuuj, pero t‑xol, cycaˈbel il tiˈj. Cyxol t‑xjal Kaaw, junelne koˈ. At tajbel xinak bix at tajbel xuuj. ¹² Jaxte ja tneel xuuj el itzˈj tiˈ xinak, pero yaj cykilca xinak o chi el itzˈj tiˈ xuuj, bix cycaˈbel, xinak tuya xuuj, o tzaj tkˈoˈn Dios. Juˈ tzunj il tiˈj nbaj cyonen cyiib.

¹³ Key hermano, cxeˈl nkanena cyey ¿tumelpa tuj cywitza oj tnaˈn jun xuuj Dios yaaˈn potzen twiˈ? ¹⁴ Tuˈn ttzaj cytzakˈbeˈna, cycyeˈyencˈa ti tten cyxol xjal. ¿Tumelpa oj tcub tz̈ˈiy ttzmal twiˈ jun xinak? Yaaˈn tumel. ¹⁵ Yaltzen te jun xuuj, tumel oj tcub tz̈ˈiy ttzmal twiˈ, cuma juˈ ttena. Ja tzunj ttzmal twiˈxuj nmak najben te t‑xel potzbil twiˈxuj, te techel xuujxuj bix at‑xuj tjakˈ tcawbil tchmilxuj. Jatzen jun techel at jun xuuj tuj tumel oj potzen twiˈ tuj jun culto. ¹⁶ Juˈ nxiˈ nkˈumena cyey, pero ka at jun cyxola yaaˈn tumel nyola tuj twitz, qˈuelel tniyˈ tiˈj juˈ tzin nkˈumena cyxol cykilca ocslal bix juˈ nbint cyuj tja Dios tuj cykilca tnom.

At jun palt tuj santa cena cyxol aj Corinto, tz̈i apóstol Pablo

¹⁷ Jax at jun palt tuj santa cena niyˈ cyiyˈsaˈna tuj cycultey. Oj nchi chmeta tuˈn tiyˈ cyiyˈsaˈna santa cena, mlay txiˈ nkbaˈna baˈn nbint cyuˈna, cuma ma nbiˈya at mas kaˈ n‑eˈla twitzj at baˈn. ¹⁸ Mlay txiˈ nkbaˈna baˈn nbint cyuˈna, cuma ma nbiˈya oj nchi chmeta ejeeˈy ocslal te waaˈl bix te iyˈsalte santa cena, ncub cypaˈn cyiib teeylex juun cloj cytena. Tuj nwitza jax jyol o nbiˈya. ¹⁹ Te cyey il tiˈj tuˈn ncub cypaˈn cyiiba juˈwa, tuˈntzen tchicˈajax alcye cyey mas jawnex cyxola. ²⁰ Juˈ tzunj oj ncub cychmon cyiiba, yaaˈn tej tuˈn ttzaj cynaˈna tcyimlen Kaaw, sino nuk ja tej tuˈn tchicˈajax alcye cyey tneel. ²¹ Il tiˈj cxeˈl cypaˈna waabj t‑xol cykilca oj nchi chmeta te waaˈl te iyˈsalte santa cena, pero yaaˈn juˈ tten cyuˈna. Pero jtzin cyseˈna, nchi waaˈna tecˈax, teeylex juun tuya twa. Min cyyoy oj nchi pon baj ke cyuyey tuˈn cywaaˈna junx. Juˈ tzunj at juun min nchi noj, bix at juuntl nchi nojxsen tuya cywa bix cycˈa vino hasta ojxe nchi oc bola. ²² ¿Titzen tten jun santa cena juˈwa? Cxeˈl nkˈumena cyey mas baˈn biˈx chi waaˈla bix chi wcˈala cyjay twitzj jatzen nchi noja tuj santa cena. Jnbaj cyey jaˈlewe oj nchi chmeta jun chˈixbajil te cykil ocslal, bix ncub cykˈoˈna cychˈixew kej mebe mlay pon cyiiˈn waabj cyxola. ¿Ocpale cxeˈl nkbaˈna baˈnj ma bint cyuˈna? ¡Mlay! Yaaˈn jax cyuˈna nbint cyuˈna cykilj nxnakˈtzbila e cyaj nkbaˈna cyey nejl.

Jun xnakˈtzbil tiˈj santa cena

²³ Cxeˈl nnaˈna cyey jaj e tzaj tkˈumen Dios weya bix e cyaj nxnakˈtzaˈna cyey nejl tiˈj tixix tten jsanta cena. Texj koniyan tej t‑xiˈ qˈueyet Kaaw Jesús tuˈn tcub byet, e jaw tiiˈnxin jun pan, ²⁴ bix e xiˈ tkˈoˈnxin chjonte te Dios tiˈ pan, bix e cub tpiẍenxin, bix e xiˈ tkbaˈnxin cye tuyaxin cyjulu: “Cyiiˈnx bix cywaaˈnx ja lu. Jatzen techel nxumlalja. Tisenj pan lu ma baj piẍen, jaxse juˈx nxumlala pjel toket te colbil cyey. Cywaaˈnx ja lu te nabl weya,” tz̈i Jesús cye tuyaxin. ²⁵ Tbajlenxitl waaˈn, e jaw tiiˈnxin jun vaso vino, bix e xiˈ tkbaˈnxin: “Jvino lu techel ntz̈qˈuela qˈuelel wiˈja te kˈol tipemal jun acˈaj trat tuya Dios cyiˈ xjal. Jaca maj oj cycˈana tiˈj, cybinchama te nabl weya,” tz̈i Jesús.

²⁶ Entonces, key hermano, jaca maj nchi waaˈna bix nchi cˈana santa cena, ntzaj cynaˈna tcyimlen Kaaw kiˈj, hasta ojxe tul meltzˈajxin juntl maj twitz txˈotxˈ. ²⁷ Juˈ tzunj, oj ncub bint santa cena cyuˈna bix min tzˈoc cycˈuˈja tiˈj ti japenina tcyimlen Kaaw, n‑eltzen cyiiqˈuena tcyimlen Kaaw. ²⁸ Juˈ tzunj teeylex juun il tiˈj qˈuelel cyniˈya tiˈj ti niyˈ tuj cycˈuˈja oj cypona te nimlte santa cena, ka cyaja txiˈ cynaˈna tcyimlen Jesús cyiˈja, bix ka junxitl niyˈ tuj cycˈuˈja. Katzen jaxxix cyaja tuˈn t‑xiˈ cynaˈna tcyimlen Jesús, baˈn tuˈn t‑xiˈ cywaaˈna santa cena. ²⁹ Pero ka min tzˈoc cycˈuˈja tiˈj tcyimlen Kaaw oj cywaaˈna santa cena, sino ka junxitl niyˈ tuj cycˈuˈja, at cyila tocsan tiˈj twitz Dios, bix tzultzen jun cycastiwey tuˈn Dios. ³⁰ Juˈ tzunj at nim ocslal yaab cyxola bix at juuntl bajnen cyipen, bix at juuntl o chi cyim.

³¹ Entonces, key hermano, ka ma cyaj cykˈoˈna jkaˈ nbint cyuˈna oj nchi binchana tiˈ santa cena, mintiiˈ il tiˈj tuˈn cyoca tuj castiwa tuˈn Dios tiˈj. ³² Pero ka ma tzaj tkˈoˈn Dios jun cycastiwey, yaaˈn tuˈn cyxiˈy tuj castiwa te junx maj tisen oj cyxiˈ xjal yaaˈn ocslal tuj castiwa tuˈn Dios, sino tuˈn cyxiˈy tuj tumel.

³³ Entonces, tuˈntzen tjapan baj twiˈ nyola tiˈj santa cena, cxeˈl nkbaˈna cyey oj nchi chmeta waaˈl te nablte tcyimlen Jesús, cyyoˈy ojxe cypon baja cykil ocslal, tuˈntzen cywaaˈna junx tuj tumel. ³⁴ Jsanta cena yaaˈn tuˈn cynoja. Ka at juun cyey takˈ weyaj cye, mas baˈn tuˈn cywaaˈna nejl cyjay, tuˈntzen cynimantey tcyimlen Jesús tuj tumel, tuˈntzen miˈn tzˈoc jun cycastiwey tuˈn Dios.

Bueno, at juntl cykanbila o tzaj cykanena weya. Laˈ alcye jun kˈij, oj npona cyxola, cxeˈltzen nkˈumena cyey.