Chronological

Tneel uˈj e xiˈ ttzˈiˈben apóstol Pablo, t‑xel Jesucristo, cye ocslal tuj tnom Corinto

Tej t‑xiˈ tkˈoˈn apóstol Pablo jun kˈolbebl cye ocslal tuj tnom Corinto

1  Inayena, Pablo, nxiˈ ntzˈiˈbena j‑uˈj lu te cyey ocslal tuj tnom Corinto. Dios o scyˈonte weya tuˈn wajbena te t‑xel Jesucristo. Tuyax Hermano Sóstenes at wuyena, bix tuyax nxiˈ kˈonte jun kˈolbebl te cyey.

² Ejeeˈ tzuna t‑xjal Dios. At cymojbabl cyiiba tuya Cristo Jesús, bix juˈ tzunj ejeeˈy t‑xjal Dios, tuˈn cyajbena te. J‑uˈj lu cˈajbel te cyey, bix yaaˈn nuk te cyey, sino tuyax te cykil kej xjal nxiˈ cynaˈn tbi Kaaw Jesucristo, cuma jaxin Taaw cykilca ocslal. ³ Waja nuket ma cycˈaman jun cyˈiwlabl cyey tuˈn Kman Dios bix tuˈn Kaaw Jesucristo, bix nuket eteˈy tuj ttz̈yal.

Jun akˈbil chjonte tiˈj t‑xtalbil Dios

⁴ Key hermano, nxiˈ nkˈoˈnxwe chjonte te Dios cyiˈja. Nchin tzalajwe cuma Dios e tzaj kˈonte nim t‑xtalbil cyibaja tuˈn Cristo Jesús tej cyocslana. ⁵ Tuˈnxin at cyipemala tuˈn tbint cykil cyuˈna. At cyipemala tuˈn cykbantey tuj tzinenxix jn‑el cyniˈya tiˈj, bix tuˈn tel cyniˈya tiˈj ti tten jaxxix yol. ⁶ Jaj lu ncyiwsante at tipemal tpocbal Cristo o cyaj nkˈoˈna cyxola. ⁷ O tzaj tkˈoˈn Dios cyipemala tuˈn tbint cykil cyuˈna, bix juˈ tzunj yaaˈn at‑x cyaja tiˈj tuˈn tbint alcyexja cyuˈna. Cykilcaj kˈiˈn cyuˈna te tajbel te Dios joocˈtzen nchi ayona tiˈ Kaaw Jesucristo texe oj tulxin juntl maj. ⁸ Jaxin ncyiwsante cyey tuˈn cyweˈxixa tuj cyocslabla, tuˈntzen sakxixkey oj tul Kaaw Jesucristo te cyeyˈlte cyey ka baˈn xbint cyuˈna bix ka min. ⁹ Dios o txconte cyey tuˈn cykˈonte cyiiba tuya Tcwalxin, ja Kaaw Jesucristo. Bix te Dios njapan bajxixte tiˈ tyol te ke. Juˈ tzunj jaxxix at kmojbabl kiib tuya Kaaw.

Jun pabl cyiib kej ocslal tuj tnom Corinto

¹⁰ Key hermano, amale nxiˈt nkˈoˈna chjonte te Dios cyiˈja, pero il tiˈj tuˈn cyxiˈ ncawena. Ja Kaaw Jesucristo nkbante tuˈn t‑xiˈ nkˈumena cyey chi cwel tena tuya junx cynaabla, tuˈntzen miˈn baj cypaˈn cyiiba tuˈn cykˈoja, tuˈntzen cytena tuj ttz̈yal. ¹¹ Key hermano, nxiˈ nkbaˈna juˈwa cuma o nbiˈya cyuˈn ke te tja Cloé tiˈj cykˈoja. ¹² Ejeeˈtzen nchi kˈumente we at cab cyey nkˈumente: “Te Pablo koˈya”; bix cabtl nkˈumente: “Te Apolos koˈya”; bix cabtl nkˈumente: “Te Pedro koˈya”; bix cabtl nkˈumente: “Te Cristo koˈya.” ¹³ Jeyˈ, ¿titzen nbaj cyey? ¿Chˈimapatzen elnina Cristo cyxola? ¿Inayenpa tzuna Pablo e jaw kˈoˈn twitz cruz cyiˈja tuˈn cycleta? ¿Bix wuyapa tzuna cykˈon cyiiba tej cybautizarja? ¿Titzen tten n‑oc lpe juun cyey wiˈja? ¹⁴ Ka juˈ n‑eˈla tuj cywitza nchin jyona xjal tuˈn cyoc lpe wiˈja tej cybautizarja wuˈna, chjonte Dios min‑al jun cyey o bautizarj wuˈna, nuk ja Crispo bix Gayo. ¹⁵ Bix juˈ tzunj min‑al jun cyey baˈn tkˈumente ka tiˈ nbiˈya e bautizarja. ¹⁶ ¡Aa! ma tzul juntl tuj ncˈuˈja. Tuyax Estéfanas cyuyax ke te tja e bautizarjke wuˈna. Bix oˈcx kej lu n‑ul tuj ncˈuˈj. ¹⁷ Pero qˈuelel cyniˈya tiˈj jweya waakˈen o tzaj tkˈoˈn Cristo we, yaaˈn te kˈiljaw aˈ cywiˈ xjal, sino te kbalte tpocbal jcolbil cye xjal tiˈ cyil tuˈn tcyimlen Cristo twitz cruz. Ka ma chin yolena tuya jawnex yol, chi ulel lpe ke xjal wiˈja. Juˈ tzunj chin yolela tuya chebe yol, tuˈntzen cyxiˈ lpe ke xjal tiˈ Cristo, tuˈntzen miˈn tzˈel tipemal tcyimlen Cristo twitz cruz.

Ja Cristo tipemal Dios bix tnaabl Dios

¹⁸ Key hermano, jyol tiˈj tcyimlen Cristo twitz cruz, tzcaj yol tuj cywitz kej xjal ncheˈx tuj be te xitbil. Pero jatzen ke, ejooˈ o ko clet, ja yol tiˈ tcyimlen Kaaw twitz cruz at nimcˈa tipemal Dios tiˈj, cuma najben tuˈn tcub cyiˈj xjal tuˈn cycoˈpj tuj cyil. ¹⁹ Tzin tkbaˈn tuj tyol Dios mas najben tilbil Dios tibaj cykilca. Tz̈i cyjulu: “Kej mas n‑el cyniyˈ tiˈj tuj cywitz, bix kej baˈn tbint cykilca cyuˈn tuj cywitz, mlay tzˈajben cynaabl. Cwel ntzpetsaˈna cynaabl,” tz̈i Dios. ²⁰ Key hermano, cxeˈl nkanena cyey ¿nintzajpa tuj twitz Dios cynaabl kej xjal te twitz txˈotxˈ nchi yolenx tuya jawnex yol? ¡Min! ¿Bix nintzajpa tuj twitz Dios cynaabl kej xjal xnakˈtzal cyley judío bix mas jawnex cynaabl tuj cywitz? ¡Min! ¿Bix nintzajpa tuj twitz Dios cynaabl kej xjal ncub cyiˈj xjal cyuˈn tuya jawnex cyyol? ¡Min! Tuj twitz Dios tzpetpajnin cynaabl. ²¹ Cykilcaj baˈn cyuˈn xjal te twitz txˈotxˈ, amale cyecat bix jawnex, pero yaaˈnja baˈn tuˈn t‑xiˈ tiiˈn jun xjal tuj be te colbil tuˈn tpon tuya Dios. Pero te Dios, mas baˈn tuˈnxin. Ttzkiˈnxin yaaˈn tuˈnj jawnex baˈn cyuˈn xjal te twitz txˈotxˈ cnetele tbexin cyuˈn xjal, sino cnetelte tuˈn jun yol ajnintz pero tzinen. Tej colbil ke ja tej tuˈn toc ke kcˈuˈj tiˈ Dios, yaaˈn tuˈn mas baˈn kuˈn. Pero ke xjal te twitz txˈotxˈ, ajnintz ja yol lu tuj cywitz. ²² Kej xjal judío, tuˈn cyocslante ka jaxxix, cyajxix tuˈn toc cycyeˈyen jun nintzaj techel te cycyeˈybil ka jaxxix. Yal tzunkej xjal yaaˈn judío, nuk tuˈn jun yol jawnex ncwaˈ cyiˈj. Ka ajnintz jun yol tuj cywitz, min cyocsla. ²³ Juˈ tzunj, kaˈ tuj cywitz xjal judío oj nxiˈ kkˈumen e cyim Cristo twitz cruz te clol xjal, cuma min cyocsla xjal tuˈn tcawen Cristo cyibaj. N‑eˈla tuj cywitz nuk e cub cyim Cristo twitz cruz tisen jun kaˈ xjal. Bix juˈx cyej xjal yaaˈn judío, min cub cyiˈj tuˈnj yol lu, cuma tuj cywitz nuk ajnintz bix tzcaj yol. ²⁴ Yaltzen te cyej xjal e cybi tej ttxquet tuˈn Dios, judíoleke, yaaˈnle judíoke, Dios o jkonte cywitz tuˈntzen tel cyniyˈ tiˈj tuˈn tcyimlen Cristo o tyeecˈa Dios tipemal bix alcyej baˈn tuˈnxin. ²⁵ Ja tzunj yol tiˈj tcyimlen Cristo, mas jawnex tnaabl twitzj cye xjal cynaabl. Bix jtzin cykbaˈn kej xjal mintiiˈ tipemal Dios, pero mas tipemal tibaj cye xjal cyipemal te twitz txˈotxˈ. ²⁶ Key hermano, ejeeˈy jun techel te ja lu. Cybisenx tiˈj ti xjalelkey tej ttxconte Dios ejeeˈy. Tej cyocslana, yaaˈn ejeeˈy nintzaj xjal, sino nuk yalxj xjalkey. Cywitzj xjal te twitz txˈotxˈ yaaˈn nim cybaja baˈn cyuˈna, bix yaaˈn nim tawil xjal at cyxola. ²⁷ Te cye xjal te twitz txˈotxˈ ejeeˈ cyey min tzˈel cyniyˈ tiˈj. Pero ejeeˈxix cyey e tsicyˈ Dios tuˈn cyoca te t‑xjal. Juˈtzen e tzaj tkˈoˈn Dios cychˈixew kej xjal mas baˈn cyuˈn tuj cywitz. Bix o tscyˈo Dios ejeeˈy mintiiˈ cyilbil tiˈj tuˈntzen ttzaj cychˈixew kej at nim cyilbil tiˈj tuj cywitz. ²⁸ E jaw tscyˈoˈn Dios kej xjal tal mebe bix kej xjal icˈbil bix kej mintiiˈ baˈn cyajbeˈna tuj cywitzj nintzaj xjal, tuˈntzen laˈ alcye jun kˈij ctzaal cychˈixew kej mas baˈn cyuˈn tuj cywitz. ²⁹ O bint jlu tuˈn Dios tuˈntzen min‑al jun xjal baˈn tjaw tniman tiib twitz Dios. ³⁰ Cyey, mintiiˈ tuˈn tjaw cyniman cyiiba, cuma cykilca cynaabla bix t‑xtalbil Dios cyibaja bix cychunkˈlala ma tzaj kˈoˈn tuˈn Dios nuk tuˈnj o cymojba cyiiba tuya Cristo Jesús. Dios o tzaj kˈonte Cristo ke, bix nuk tuˈn Cristo n‑el kniyˈ tiˈj, bix nuk tuˈnxin jiquen koˈ twitz Dios, bix nuk tuˈnxin sak koˈ, bix nuk tuˈnxin o ko colpet tuj tkˈab il. ³¹ Juˈ tzunj ko nimanxit Kaaw, tisen toc tuj tyol Dios: “Alj taj tuˈn tjaw tnimsan tiib, mas baˈn jaj te Kaaw cjawel tnimsaˈn,” tz̈i tyol Dios.

O kban apóstol Pablo cye aj Corinto tiˈj tcyimlen Cristo twitz cruz

2  Key hermano, tej npomlena cyxola te kbalte jun jaxxix tyol Dios at‑xe kˈij te tneel maj, min in pona yecˈlte jun wexa nyola mas baˈn wuˈna, bix min in pona kbalte jun jawnex yol cyey nuketle ejeeˈj ke xjal jawnex el cyniyˈ tiˈj. ² Oˈcx jwe waj tej ntena cyxola, jaj tuˈn t‑xiˈ nkˈumena tpocbalj tcyimlenj Jesucristo, jxin Kcawel e cyim twitz cruz tiˈ kil. ³ Tej npona kbaltej tyol Dios cyey, e cub ttz̈i wiˈja tuˈn miˈn paltex tkˈumj cykil tyol Dios wuˈna cyey. ⁴ Jnyola e xiˈ nkbaˈna cyey yaaˈn tisen tyol jun xjal mas baˈn tuˈn, tisenj cye nmak xjal tuya jawnex cyyol. Jweya nyola nuk tuˈn tipemal Dios bix tuˈn Espíritu Santo, ⁵ tuˈntzen e cub cyiˈja tuˈn tke cycˈuˈja tiˈ Kaaw, yaaˈn tuˈn mas baˈn cyuˈn xjal, sino tuˈn tipemal Dios.

Tuˈn Espíritu Santo n‑el kniyˈ tiˈ Dios

⁶ Oj nyolena cyxolj ocslal ya n‑el cyniyˈ tiˈj, nchin yolena tiˈ jun yol yaaˈn te twitz txˈotxˈ. Jyol lu min tzˈel baˈn tuj cywitz kej nenel te twitz txˈotxˈ. Ejeeˈ nenel ocslaˈnke cyuˈn xjal jaˈlewe, pero chi xeˈl tuj il. ⁷ Ja tumel lu te Dios. Pero nimxe tyem mintiiˈ tumel kuya, cuma jun tumel tuj ewjel taˈ tuˈn Dios. Pero ya chicˈajte te ke. Tej tumel lu tuˈn Dios atte jatxe tuj tneel, jaj tuˈntzen kclet te junx maj. ⁸ Chˈixcˈa yaaˈn entera cawel te twitz txˈotxˈ min el cyniyˈ tiˈj ja lu. Tisen tzunkej cawel tuj Jerusalén, nuket el cyniyˈ tiˈj, mintetle e cub cybyoˈn nintzaj Kaaw Jesús twitz cruz. ⁹ Juˈ tzunj at tumel tuj tyol Dios tej ttz̈i cyjulu: “Bajx cylaˈ xjal bix bajx cybiˈ xjal bix bajx tzula tuj cycˈuˈj xjal jun chunkˈlal o tbincha Dios cye kej xjal n‑oc takˈ Dios tiˈ cyanem,” tz̈i tyol Dios.

¹⁰ Yaltzen ke ejooˈ ocslal, qˈuelel kniyˈ tiˈj ti o baj tnincˈuˈn Dios, cuma at Espíritu Santo te Dios kuya, bix ttzkiˈn Tspirit Dios ti niyˈ tuj tcˈuˈj Dios. ¹¹ Yaltzen cye xjal, nuk ja xjal n‑el tniyˈ tiˈj ti niyˈ tuj tcˈuˈj. Ya tuˈn tel tniyˈ tiˈj ti niyˈ tuj tcˈuˈj juntl xjal, mlay. Jax juˈx te Dios. Ja Tspirit Dios itzkilte ti niyˈ tuj tcˈuˈj Dios bix nuk ja itzkilte. ¹² Bix ja tzunj Espíritu Santo o kiikˈ te Dios. Yaaˈn etoˈ tjakˈ jcawbil cynaabl xjal te twitz txˈotxˈ, sino etoˈ tjakˈ tcawbil Espíritu Santo o kiikˈ. Bix tuˈn Espíritu Santo qˈuelela kniyˈ tiˈj ti niyˈ tuj tcˈuˈj Dios, tuˈn tel kniyˈ tiˈj alcyej tumel at tuˈn Dios kiˈj bix alcyej t‑xtalbil Dios tzul te ke. ¹³ Oj t‑xiˈ nkˈumena jun jaxxix yol cye kej ncheˈx lpe tiˈ Espíritu Santo, yaaˈn cynaabl xjal te twitz txˈotxˈ tuya nintzaj yol, sino tnaabl Espíritu Santo tzin nkˈumena.

¹⁴ Pero ja tzunkej xjal te twitz txˈotxˈ, min cyocsla t‑xnakˈtzbil Tspirit Dios, cuma te cye nuk jun tzcaj yol tuj cywitz. Bix mlayx tzˈel cyniyˈ tiˈj, cuma mintiiˈ Espíritu Santo at cyuya te onlte cye. ¹⁵ Pero ke nkoˈx lpe tiˈj Espíritu Santo, n‑el kniyˈ tiˈj alcyej jaxxix. Pero kej xjal te twitz txˈotxˈ, min cheˈx lpe tiˈj Espíritu Santo, bix min tzˈel cyniyˈ tiˈj alcyej jaxxix. Juˈ tzunj mlay chi oc ten tuˈn tbaj cycyeˈyen knaabl, cuma min tzˈel cyniyˈ kiˈj. ¹⁶ Tz̈i tyol Dios cyjulu: “¿Alj yaaˈn ocslal twitz txˈotxˈ qˈuelel tniyˈ tiˈj tnaabl Kaaw? ¿Bix alj cˈoquel xnakˈtzante? Min‑alx jun,” tz̈i tyol Dios. Perotzen ke, n‑el kniyˈ tiˈj tnaabl Cristo. Juˈ tzunj kej te twitz txˈotxˈ mlay tzˈel cyniyˈ kiˈj.

Junx nko akˈanan cykilca koˈ tuj taakˈen Dios

3  Pero cyey, hermano, tej npona cyxola te kbalte tyol Dios cyey tuj tneel, bix maatk acˈaj ocslalkey. Mitknaˈx cytzketa tuj cyocslabla. Cynaabla nuk tisex cynaabl xjal te twitz txˈotxˈ. Juˈ ke cyey tisen jun neeˈ mix n‑eˈla tniyˈ tiˈj. Juˈ tzunj mlay chin yolena cyuyey tisen tuya jun xjal ma xjaltl. ² Tej npona tuj tneel, min el cyniˈya tiˈj. Juˈ tzunj e xiˈ nkˈoˈna xnakˈtzbil cyey yaaˈn nim t‑xiˈlen, tisen jun xuuj nuk tchˈuˈ tal nxiˈ tkˈoˈn cuma minaˈn takˈ waaˈl. Nuket e xiˈ nkˈoˈna xnakˈtzbil cyiw cyey nejl, tisentzele nxiˈ nkˈoˈna waabj te jun ẍlak. Bix juˈx jaˈlewe minaˈx tel cyniˈya tiˈj tuˈn cyiikˈentey xnakˈtzbil mas tzˈaklxix, ³ cuma nxiˈ cynimanxa nuk oˈcx tajbil cyxumlala. Cyxola at kˈoj, at icˈbil, at chiˈlen, bix pabl cyiiba. Juˈ tzunj yaaˈn cyiwkey tuj cyocslabla. ⁴ Cybisenx tiˈj ti nbaj cyey oj nxiˈ cykbaˈna, “Keya te Pablo koˈya,” bix cabtl nxiˈ cykbaˈna, “Te Apolos koˈya.” Tej kˈoj lu tzin tkbaˈn yaaˈn cyiw eteˈy tuj tyol Dios. ⁵ Cxeˈl nkanena cyey, ¿inayenpa tzuna jun xjal jawnex? ¿Bix japatzen Apolos juntl xjal jawnex? ¿Altzen koˈya tuˈntzen at kˈoj nbaj kiˈja cyuˈna? Oˈcx tuˈn kajben keya te Kaaw tuˈn kkˈumena tyol Dios cyey, tuˈntzen cyocslana. Teeylex juun keya oˈcx e bint kuˈna cyxola jkaakˈena e tkba Dios. ⁶ Ejeeˈy tisen jun awal. Tej npona cyxola te kbalte tyol Dios, tisen e cyaj wawaˈna iyaj. Tejtzen tpon Apolos te kˈolte mas xnakˈtzbil cyey, tisen e xiˈ aˈ tibaj iyaj, tuˈn ttz̈ˈiy awal. Pero ja te Dios nojsal awal tuj cyanema. ⁷ Juˈ tzunj jxjal awaal yaaˈnxix nim t‑xiˈlen, bix xsunj kˈol aˈ tibaj awal, jax yaaˈn nim t‑xiˈlen. Ja te nim t‑xiˈlenj ja te Dios, cuma jaxin tzpetsalcye awal. ⁸ Ja tzunj jxjal awaal bix xsunj kˈol aˈ, junx japenina cyaakˈen. Dios cchjolcye, teeylex juun tuya taakˈen laˈ tiiˈn taakˈen, ka baˈn bix ka min. ⁹ Juˈ tzunj nko akˈanana Apolos bix inayena kuya kiiba tuj tawal Dios. Yaltzen cyey, tisen tawal Dioskey.

Cxeˈl nkˈumena tuya juntl tumel. Cyey tisen jun jaaˈkey njaw tbinchaˈn Dios. ¹⁰ Weya tisen jun nintzaj binchal jaaˈ kena. Ntzkiˈna ti tten tuˈn tcuˈx tkˈukˈlel jaaˈ. Dios o tzaj kˈonte waakˈena tuˈn tcub cyiˈja wuˈna tuˈn cyocslana tiˈ colbil ke. Ja tzunj waakˈena lu tisentzen ncuˈx tkˈukˈlel t‑xeeˈ jaaˈ wuˈna. Bix juntl t‑akˈanal Dios at taakˈen te xnakˈtzal cyey tiˈ tyol Dios. Jlu tisen nxiˈ tkˈoˈn lookˈ twiˈ tkˈukˈlel jaaˈ. Bix jaca juun binchal jaaˈ njaw tkˈoˈn lookˈ twiˈ tkˈukˈlel jaaˈ cˈoquel tcˈuˈj tiˈj tuˈn tcyaj taakˈen baˈn. ¹¹ Ja tzunj tkˈukˈlel o cyaj wuˈna cyxola, jatzen Jesucristo. Mintiiˈ juntl tkˈukˈlel cyocslabla at. ¹² Tibaj tzunja tkˈukˈlel cyocslabla, jun t‑akˈanal Dios ya baˈntltzen tuˈn t‑xiˈ tkˈoˈn t‑xnakˈtzbil, tisen njaw tbinchaˈn jun jaaˈ tibaj tkˈukˈlel jaaˈ. Katzen nxnakˈtzan baˈn, juˈtzen taakˈen tisen oro bix plata bix tisen xak cyecaxsen bix cyiw te junx maj. Pero ka min xnakˈtzan baˈn, juˈtzen taakˈen tisen tzeeˈ bix tz̈ˈim bix ptzˈunt. ¹³ Tzul jun kˈij te niyˈbelte tipemal taakˈen jaca juun xjal, ka jaxxix taakˈen, bix ka min. Tuj tzunj kˈij tzul tuˈn Dios cwel tzˈak alcyej xnakˈtzbil yaaˈn jaxxix, tisen jun jaaˈ nuk ptzˈunt t‑xeeˈ jun rato cwel tzˈeyˈ oj toc kˈakˈ tiˈj. ¹⁴ Ka ma xnakˈtzan baˈn cye xjal, bix jtaakˈen min txiˈ tuj il oj toc tcyeˈyen Dios, tcotzentzen jun tcotz tiˈj tuˈn Dios. ¹⁵ Pero ka min xnakˈtzan baˈn cye xjal, mintiiˈ tcotz tkˈaˈ Dios, amale ccletelet tuj kˈakˈ. Cˈoquele tisen jun xjal n‑etz ok tuj tken kˈakˈ pero mintiiˈ qˈueletz tiiˈn tuj tken kˈakˈ.

¹⁶ Yaltzen cyey, hermano, ¿mimpatzen tzˈel cyniˈya tiˈj ejeeˈy tisen jun tja Dios? Tisen najben cyjay te cynajbila, juˈtzen nchi ajbena te tnajbil Espíritu Santo. ¹⁷ Katzen at jun xjal ma cub xitente jtja Dios tuya t‑xnakˈtzbil yaaˈn tumel, jax cwel t‑xiten Dios ja xjal, cuma sakxix tnajbil Dios, bix tnajbil Dios tzunkey.

¹⁸ Cycˈojlanx cyiiba tuˈn miˈn chi jaw tz̈ˈiya. Kej xjal te twitz txˈotxˈ baˈn n‑el tuj cywitz oj taj jun xjal tzˈoc te tneel. Pero tuj twitz Dios, yaaˈn baˈn. Ka cyaja chi oca te mas baˈn cyuˈna tuj twitz Dios, ya iltzen tiˈj otk chi oca tisen mintiiˈ baˈn cyuˈna tuj cywitz xjal te twitz txˈotxˈ. ¹⁹ Kej mas baˈn cyuˈn tuj cye cywitz, tzcaj n‑eˈla tuj twitz Dios. Juˈ toc tuj tyol Dios cyjulu: “Dios cwel xitente kej xjal jawnex baˈn cyuˈn tuj cywitz. Ejeeˈx chi xeˈl tzˈak tuj jnbaj bint cyuˈn tisen tuj jun cˈoˈbil,” tz̈i tyol Dios. ²⁰ Bix tz̈i juntl tyol Dios cyjulu: “Ttzkiˈn Dios mintiiˈ cˈabela jawnex cynaabl kej xjal te twitz txˈotxˈ,” tz̈i tyol Dios.

²¹ Juˈ tzunj miˈn tzˈoc cykˈon cyiiba mas baˈn cyuˈna oj cyxiˈ lpey tiˈj jun xnakˈtzal mas baˈn tuˈn tuj cywitza. Miˈn txiˈ cykˈumena nuk te Pedro key bix ka te Apolos key, cuma cykilcakexin cˈajbel te cyey. ²² Yaaˈn nuk Apolos cˈajbel te cyey, bix yaaˈn nuk inayena cˈajbel te cyey, sino kcaˈbela ko ajbela te cyey, bix tuyax Pedro cˈajbel te cyey, bix cykil tikˈch at twitz txˈotxˈ cˈajbel te cyey, bix hasta chunkˈlal bix cyamecy cˈajbel te cyey, bix ja tyem te jaˈlewe, bix cykil tyem te yaj, cykilca cˈajbel te cyey. ²³ Yaaˈn cykilcaj lu tuˈn tajben te cawlte cyey, sino cykilca te ajbel te cyey, pero mas il tiˈj ejeeˈy tuˈn cyajbena te Cristo, bix ja Cristo te ajbel te Dios.

Nuk ajbelel koˈya te Cristo

4  Juˈ tzunj, key hermano, keya nuk te kajbelela te Cristo tuˈn t‑xiˈ kxnakˈtzaˈna cyey alcye tumelj eˈwen taˈ tuˈn Dios ootxa pero ya chicˈaj jaˈlewe. ² Apolos bix inayena nuk t‑akˈanal Cristo, bix cytzkiˈna te jun akˈanal il tiˈj tuˈn tbint taakˈen kˈoˈn tuˈn taaw, tuˈntzen baˈn toc ke tcˈuˈj tpatrón tiˈj.

³ Yaltzen weya, yaaˈn il tiˈj tuj nwitza ti niyˈ tuj cycˈuˈja tiˈ waakˈena. Bix jax mintiiˈ il tiˈj tuj nwitza tuˈn toc tcˈuˈj juntl xjal tiˈ waakˈena, ka baˈn bix ka min. Mi nuket inayena mlay tzˈoc nwitza tiˈ waakˈena. ⁴ Tuj nwitza baˈn nbint waakˈena wuˈna, pero mintiiˈ il tiˈj tuˈn t‑xiˈ nkbaˈna ka baˈn waakˈena, cuma nuk ja te Kaaw kbalte ka baˈn. ⁵ Juˈ tzunj yaaˈn tumel tuˈn cyoc tena te cyeyˈlte ti tten waakˈena. Tzul tej kˈij oj tul Kaaw te cyeyˈlte cykil akˈuntl, tuˈn tchicˈajax tiiˈn taakˈen jaca juun xjal. Bix oj tulxin, te cyeyˈlte ti niyˈ tuj tcˈuˈj jaca juun xjal. Bix kej xjal e binchan baˈn cycˈmaˈn jun baˈn yol cyibaj tuˈn Dios.

⁶ Key hermano, cykil t‑akˈanal Dios at tuˈn cyajben cyey, yaaˈn nuk inayena tuya Apolos. Pero najben jkbiˈya tuj j‑uˈj lu te cyey, cuma ejooˈya te jun yecˈbil ti tten tuˈn tajben jun xjal te Dios. Nxiˈ ntzˈiˈbena nuk oˈcx kajbelela te Cristo tuˈn kajbena te cyey, tuˈntzen tbint cyuˈna tuˈn taajtz tiˈ cynaabla, tisentzen tkbaˈn tyol Dios, bix tuˈntzen miˈn chi jaw tz̈ˈiya oj cyxiˈ lpey tiˈ jun xnakˈtzal mas baˈn tuˈn tuj cywitza. ⁷ Cxeˈl nkanena cyey, ¿tikentzen nchi jaw tz̈ˈiya twitz cabtl? ¿Titzen mastl at cyuyey tecˈaxtlpa tzunj e tzaj tkˈoˈn Dios te cyey? Pero katzen o cyiikˈa cykilca te Dios, jeyˈ, ¿tikentzen nchi jaw tz̈ˈiya jaacˈaca tej ejeeˈxa o chi jyonte cyuˈnxa?

⁸ Key ocslal tuj Corinto, tuj cywitza cykilca baˈn cyuˈna bix ya mintiiˈ juntl il tiˈj te cyey. Tuj cywitza cawelkey. Tuj cywitza mintiiˈ baˈn wuˈna bix yaaˈn il wiˈja. Lastim ken weya yaaˈn cawelkey. Nukettzen juˈ otk pon kˈij te cawel, tuˈntzen in cawenttzen loya cyuyey. ⁹ Pero yaaˈn juˈwa, sino tisencˈa ja Dios o cub yeecˈante keya t‑xel Jesús cywitz xjal tuˈntzen nuk chi tzeˈl xjal kiˈja. Ejooˈya tisen jun pres tuˈn tcub byet bix nim nbaj xmucchet. O ko oca te cycyeˈybil cywitz cykilca ke ángel cyuyax ke xjal, tuˈntzen cyxmucchan kiˈja. ¹⁰ Oj kakˈanana tuj taakˈen Cristo, tuj cywitz xjal tisen otk jaw tuj kwiˈya. Yaltzen cyey, oj cyakˈanana tuj taakˈen Cristo, jawnex ejeeˈy tuj cywitz xjal. Keya, mintiiˈ kipemala tuj cywitz xjal. Cyey, nim cyipemala at tuj cywitz xjal. Keya t‑xel Jesús, nuk jun chˈixbajil koˈya. Cyey, nintzajkey tuj cywitza bix tuj cywitz xjal. ¹¹ Cykil tyem hasta jaˈlewe keya o tziyˈx weyaj bix takˈ aˈ kuˈna tuj kaakˈena, bix at maj mintiiˈxix chˈin kxbalena. Bix nim xjal o tzˈoc pjunte keya, bix at maj mintiiˈ kwetbila ncnet. ¹² Bix tuj kaakˈena tiˈ tyol Dios mintiiˈ twiˈ kcˈuˈja. Tuˈn kitzˈja, at maj sictnin koˈya tuj cyiw akˈuntl tuˈn kkˈaba. Bix tej tiyˈx cykilj lu kuˈna ¿ti kseˈya? Tejtzen cyoc yasen xjal kiˈja, nuk e kkaniya t‑xtalbil Dios cyibaj. Bix tejtzen toc cypjuˈn xjal ejooˈya, nuk e cub kpaˈna. Mintiiˈ oc kbincheya cyiˈ xjal. ¹³ Bix tejtzen tjaw jlet ẍtakˈbil yol kiˈja tuˈn cabtl, aj ktzakˈbeˈna tuj tumel. Nejl, bix juˈx jaˈlewe, cywitz xjal nuk tisen txˈajbil twitz lak koˈya.

¹⁴ Cykilj lu niyˈx kuˈna. Nxiˈ ntzˈiˈbena jlu te cyey, yaaˈn tuˈn tcub cychˈixewa, sino nuk te nimsabl cycˈuˈja tuˈn cytena mas tuj tumel. Nxiˈ nkbaˈna juˈwa cuma n‑oc cyakˈa weya tisen ncwalkey. ¹⁵ Ejeeˈy tisen ncwalkey, cuma inayena tisen cymana tuj tyol Dios. Amale atet hasta laaj mil cyxnakˈtzala tiˈ tyol Cristo cyxola, nuk junx cymana at tuj tyol Dios. Inayena. Inayena tneel xjal in pona cyxola tuyaj yol tiˈj colbil cyey tuˈn Cristo Jesús. Bix tuˈnj nyola itzˈja cyocslabla. Juˈ tzunj inayena tisen cymana tuj cyocslabla. ¹⁶ Juˈ tzunj ncub nwitza cywitza tuˈn t‑xiˈ cyiiˈna ti tten wuˈna. ¹⁷ Tuˈntzen tel cyniˈya tiˈj ti tten wuˈna, o txiˈ nchkˈoˈn Timoteo tuˈn tpon cyxola, cuma ya ttzkiˈntlxin ti tten nnaabla. Tisen cyey, ja Timoteo jun xjal ocslan tiˈ Kaaw tuˈn nyola. Juˈ tzunj tisen ncwalxin tuj kocslabl, bix ja jun ocslal jiquenxix tuj tyol Dios. Oj tponxin cyxola, jatzen ctzaal tnaˈnxin cyey ti ntena tuj wocslabla tiˈ Cristo bix ti tten nnaabla, bix junx taˈ nyola cyxol cykil ocslal.

¹⁸ Attzen juun cyey tuj cywitza at cytz̈iy wiˈja tuˈn npona cyxola tuˈn woc ilena cyiˈja, tuˈn cycyaja tuj tumel, bix juˈ tzunj nchi jaw tz̈ˈiya. ¹⁹ Pero ka ma takˈ Kaaw weya, chin pomel naj cyxola. Bix oj npona, cˈoquel ncyeˈyena bix cˈoquel nniyˈbeˈna cynaabl jxjal nchi jaw tz̈ˈiy, ka nuk tuya nintzaj yol nchi yolen, bix ka at tipemal cyyol. ²⁰ Yaaˈn nuk tuˈnj nxiˈ kkˈumen baˈn koˈ, sino tuˈnj baˈn tzin kbinchaˈn, ejooˈ ocslal nko yeecˈan ncawen Dios tuj kanem. ²¹ ¿Entonces alcye cyaja? ¿Cyajpey tuˈn npona tuya iˈlbil yol, tisen jun mambaj cyiw oj tpon cyxol ke tcwal ka min cybi? ¿Bix ka cyajpey tuˈn toc kˈakˈen ncˈuˈja cyiˈja oj npona cyuyey?