Chronological

4  Cxeˈl nkbaˈna jun techel ti cytena tej mitknaˈx cytzakpeta tiˈ tcawbil ley. Tisen jun maan mlay cawen tuj jun jaaˈ, jaxse juˈx mlay cawen tcwal taaw jaaˈ ka neeˈxkˈa, amale cˈoqueletkˈa te taaw jaaˈ oj tockˈa maˈ xjaltl. ² Jun neeˈ tjakˈ cycawbil cˈojlalte taˈ, bix tkabkˈa tjakˈ cycawbil cˈojlal tekˈa taˈ ojxe tpon jkˈij ctkbaˈ tmankˈa tuˈn tcawenkˈa tuj jaaˈ. ³ Jaxse juˈx ke, tisen neeˈ yaaˈn tzakpiˈn koˈ nejl, cuma etoˈ tjakˈ jcycawbil nim ley bix xnakˈtzbil at twitz txˈotxˈ. ⁴ Pero tej tpon jtumel otk tkba Dios tuˈn tul Tcwal twitz txˈotxˈ, e tzaj tsmaˈnxin Tcwalxin. Itzˈj Tcwalxin tiˈ jun xuuj tuˈn tocxin te jun xjal, bix itzˈjxin tjakˈ tcawbil ley. ⁵ Itzˈjxin tjakˈ tcawbil ley tuˈn kclet tjakˈ tcawbil ley tuˈnxin, tuˈntzen kiikˈente cykilca koclen te tcwal Dios. ⁶ Juˈ tzunj, tcwal Dioskey, bix o tzaj tsmaˈn Dios Espíritu Santo cyuyey, jaj Espíritu e cyaj tkbaˈn Tcwalxin tuˈn ttzaj tsmaˈn cyey, tuˈn tajben te jun tstiwa tuj cyanema tcwal Dioskey. Tuˈnj Espíritu Santo n‑el cyniˈya tiˈj ka Dios Cymana, bix juˈ tzunj tzin cykbaˈna “Kman Dios.” ⁷ Juˈtzen tten yaaˈntl preskey tjakˈ tcawbil ley, sino tcwal Dioskey. Bix tuˈnj tcwal Dioskey, ccyiikˈela jcykaba e cyaj tkbaˈn Dios cyey tuˈn Cristo.

Tej t‑xiˈ tcubsaˈn Pablo twitz cye ocslal tuˈn miˈn chi aj meltzˈaj tuj jxnakˈtzbil te ootxa jaj mintiiˈ tipemal

⁸ Pero amale tcwalet Dioskey jaˈlewe, nejl min cytzkiˈna Dios, bix ajbenkey cyej dios yaaˈn jax. ⁹ Pero jaˈlewe cytzkiˈntla Dios, bix ka ja Dios ma takˈ tuˈn texin ejeeˈy. Juˈ tzunj, ¿titzen tten tuˈn t‑xiˈ cybiˈna juntl maj jxnakˈtzbil te ootxa mintiiˈ tipemal tuˈn cycleta bix mlay tuˈn tkˈon t‑xtalbil Dios cyey? ¿Cyajpey tuˈn cyoca te pres tjakˈ tcawbil juntl maj? ¹⁰ Ma tzakˈ cwel cynimana kej kˈij xjan cye judío, bix kej xjaw xjan, bix kej ninkˈij xjan, bix kej jnabkˈi tuˈn miˈn tzˈakˈanan cytxˈotxˈa, nuk tuˈn cynimana cyley judío. ¹¹ Nbaj ncˈuˈja cyiˈja, cuma ka ma cyaj cycyeˈyena colbil cyey tuˈn Cristo, nuktzen wajxa o chin akˈanana cyxola.

¹² Key ocslal, cxeˈl ncubsaˈna nwitza cyey tuˈn cyxiˈ lpey tiˈj e bint wuˈna. E cyaj ncyeˈyena tuˈn toc ke ncˈuˈja tiˈ ley, bix in oca tisen jun yaaˈn judío tisen cyey.

Cˈoquel cycˈuˈja tiˈj jbaˈn e binchankey wiˈja tej ntena cyxola nejl. ¹³ Cˈulel tuj cycˈuˈja nuket miˈn e tzaj jun yabel wiˈja, minttle in tena cyxola tuˈn t‑xiˈ nkˈumena tpocbal Cristo cyey. ¹⁴ Bix amale atet nyabela, pero min el cyiiqˈuena inayena bix min el cylojoˈna inayena, sino e cykˈolbey inayena. Tej npona cyxola, tsanjel Dios kena tuj cywitza, bix smaˈn kena tuˈn Cristo Jesús tuj cywitza. ¹⁵ Pero jaˈlewe, ¿ti ma baj? Mintl chi tzalaja wiˈja tisen tuj tneel. Nejl, nuket baˈn e bint cyuˈna wiˈja, otle jatz cyiiˈna tbakˈ cywitza tuˈn ttzaj cykˈoˈna weya, tuˈn ncyaja baˈn, nimtzen oc wakˈa cyey. Cytzkiˈna jax wuˈna. ¹⁶ Tzinen taˈ jun tyolel Dios kena tuj cywitza nejl. Juˈ tzunj, ¿tumelpa tuˈn t‑xiˈ cykbaˈna ma chin oca te aj kˈoj cyiˈja nuk tuˈnj e nkbaya jbaˈn tpocbal Cristo cyey? ¹⁷ Yal kej tzpetsal cyxola, nim n‑oc cyipenxin tiˈj tuˈn cyelxin baˈn tuj cywitza. Pero min tzin cybinchaˈnxin juˈwa tuˈn t‑xiˈ cykˈoˈnxin jun baˈn te cyey, sino nuk tuˈn tel cypaˈn cyiiba wiˈja, tuˈntzen cyoc lpey nuk cyiˈjxin. ¹⁸ Baˈnte tuˈn toc cyipenxin tiˈj tuˈn cyelxin baˈn tuj cywitza, pero yaaˈn baˈnj tuˈn toc cyipenxin tiˈj nuk tuˈn t‑xiˈ cynaabla tuj il. Weya, oj nchin yolena cyuyey, nuk oˈcx tuˈn tkˈoj jun baˈn te cyey wuˈna. Oc wipena tiˈj tuˈn cycyaja tuj baˈn tej ntena cyxola, bix tuyaj jax wajbila lu, nchin tzˈibena te cyey jaˈlewe. ¹⁹ Key ncwala min tzˈel cyniˈya tiˈj, tisen niyˈx tchyonel tuˈn jun xuuj ojxe ttzaj tal, juˈxsen niyˈx qˈuixcˈaj wuˈna cyuˈna. Pero niyˈx qˈuixcˈaj wuˈna tcab maj tuˈn cyitzˈja. Pero qˈuiyex qˈuixcˈaj wuˈna ojxe toc cynaabla mas tisen te Cristo. ²⁰ Waja chin tena cyxola jaˈlewe tuˈn nyolena cyuyey, tuˈn tcub cychˈixpuˈna cynaabla, tuˈntzen mintiiˈtl il tiˈj tuˈn cyoc wilena. Min tzˈel nniˈya tiˈj ti tten tcyaj cycyeˈyena nxnakˈtzbila.

Jun techel tiˈj Sara tuya Agar

²¹ Key xjal cyaja tuˈn cytena tjakˈ tcawbil tley Moisés, cxeˈl nkanena cyey, ¿tuˈn tikentzen min tzˈoc cybiˈna j‑e cub ttzˈiˈben Moisés? ²² Cˈoquel cycˈuˈja tiˈj jun yol tzˈiˈben tuj tley Moisés. Ul itzˈj caˈba tcwal Abraham. Jun tcwalxin e tzaj tiˈj tkˈopaj t‑xuˈlxin, Agar, jun xuuj tocx tjakˈ tcawbil juntl xjal, bix juntl tcwalxin e tzaj tiˈj t‑xuˈlxin, Sara, bix yaaˈntzen kˈopaj texuj. ²³ Yal talj xuuj kˈopaj, itzˈjkˈa tisex nbaj cyxol xjal, cuma cwalx ttxukˈa. Pero jtal xuuj yaaˈn kˈopaj, itzˈjkˈa nuk oˈcx tuˈnj tipemal Dios otk cyaj tkbaˈn Dios te ttxukˈa ya tijtlxuj. ²⁴ Ja tzunkej caˈba xuuj lu cyuya cyal tzin cyechlaˈn kej caˈba trat lu. Ja trat e bint twiˈj witz Sinaí, nbint tuˈn nuk tuˈn cyten xjal tjakˈ jcyiw cawbil. Bix ja xuuj Agar tzin techlaˈn ja trat lu, cuma tocxtxin tjakˈ tpatróntxin. ²⁵ Cˈoquel cycˈuˈja tiˈj oc cykˈoˈn kej xjal Arabe tbi jwitz Sinaí te Agar, te yecˈbil junx taˈ Agar cyuyaj naˈl ley te jaˈlewe. Tzin techlaˈntxin Jerusalén, cuma tisenx jatxin yaaˈn tzakpiˈn tuˈnj e tentxin tjakˈ tcawbil juntl xjal, jax juˈx yaaˈn tzakpiˈn kej naˈl ley te Jerusalén tuˈnj eteˈ tjakˈ tcawbil tley Moisés. ²⁶ Pero kej xjal aj Jerusalén te tuj cyaˈj koˈ, tzakpiˈn etoˈ. Tcwal jun tnom te tuj cyaˈj koˈ, bix tzin techlaˈn Sara ja tnom lu. ²⁷ Tuˈn tyeecˈan at juntl wik Jerusalén, tzin tkbaˈn tyol Dios cyjulu: “Tz̈i Dios te Jerusalén, ‘Jay xuuj mlay tzˈalena jaˈlewe, tzalaja. Jay xuuj min ttzkiˈna ti tten tuˈn tiyˈx tchyonel tuˈna, s̈‑ina tuˈn ttzalajebla. Jay xuuj tjunala jaˈlewe, mas chi ul tala twitzj xuuj at tchmil,’ tz̈i Dios te Jerusalén,” tz̈i tyol Dios. Bix te ja Jerusalén lu koˈ jaˈlewe.

²⁸ Key ocslal, tisenx ul itzˈj Isaac nuk tuˈnj e cyaj tkˈoˈn Dios tyol te Abraham, jax juˈx cyey o chi oca tcwal Dios nuk tuˈnj t‑xtalbil e cyaj tkˈoˈnxin cyey. ²⁹ Bix jkˈoj e baj nejl, jax nbaj jaˈlewe. Nejl, jtcwal Abraham ul itzˈj nuk tuˈn tipen tocslabl e kˈoj tiˈj tcwalxin ul itzˈj tuˈn tipemal Dios. Jax juˈx jaˈlewe, kej xjal n‑oc ke cycˈuˈj tiˈj cyex cybinchben tuˈn cyclet nchi kˈoj cyiˈj xjal n‑oc ke cycˈuˈj tiˈ Dios tuˈn cyclet. ³⁰ Pero mlay chi caman. Cˈoquel cycˈuˈja tiˈj ti toc tuˈn tyol Dios. “Xomax jxuuj akˈanal lu tuyax tal, cuma yaaˈn tumel tuˈn tkˈoj jun kab tal jxuuj kˈopaj. Nuk oˈcx tal jxuuj yaaˈn kˈopaj at toclen tuˈn tiikˈente tkab,” tz̈i tyol Dios.

³¹ Juˈ tzunj, key ocslal, ejooˈ ocslal yaaˈn tisen tal jun xuuj kˈopaj, sino tisen tal jxuuj yaaˈn kˈopaj.

Chi weˈxixa cuma ma chi tzakpeta tjakˈ ootxa ley

5  Key hermano, cuma ma tzˈel ttzakpiˈn Cristo ejooˈ tiˈ ley tuˈn kten tzakpiˈntl, juˈ tzunj cykˈoˈnc cyipena tiˈj tuˈn cyweˈxixa cywitzj xjal cyaj tuˈn cyocxa juntl maj tjakˈ ley tuˈn cycleta, tisen oj toc yugo tiˈ twiˈ wacẍ. ² Inayena, Pablo, cxeˈl nkbaˈna cyey, ka ma chi cuyana tuˈn tel keset ttzˈumel cytzˈalbila tuˈn cycleta, miˈntltzen tzˈajben Cristo cyey tuˈn cycleta. ³ Bix jax cxeˈl nkbaˈna cyey, jaca juun xinak cyxola, ka cyaja tuˈn tel keset ttzˈumel cytzˈalbila tuˈn cycleta, jax ilxsen tiˈj tuˈn tbint cykilcaxsen tley Moisés cyuˈna tuˈn cycleta. ⁴ Key xjal ma tzˈoc cykˈon cyiiba tiˈj cynimbila tiˈ ley tuˈn cyoca jiquen twitz Dios, matzen chi el txˈometey tiˈ colbil cyey tuˈn Cristo. Ma cyaj cycyeˈyena t‑xtalbil Dios ⁵ ntzaj kˈoˈn tuˈn Espíritu Santo. Ko oquel jiquen twitz Dios nuk oˈcx tuˈnj kocslabl tiˈ Dios tuj kanem, bix nuk oˈcx tuˈn tzunj kocslabl baˈn kayon tiˈj kchunkˈlal te junx maj tuya Dios. ⁶ Kxol ocslal tiˈ Jesucristo, mintiiˈ il tiˈj ka ma tzˈel keset kchuˈl bix ka min, cuma junx taˈ cykilca koˈ. Nuk kocslabl at tajbel, bix tuˈn kocslabl n‑oc cyakˈ kuya ke.

⁷ Nejl, baˈn ncheˈx lpey tiˈ jaxxix yol. Pero jaˈlewe, ¿ti ma baj? Ma txiˈ ttzpetsaˈn jun xjal ejeeˈy, tuˈn tcyaj cycyeˈyena jaxxix yol. ⁸ Pero jxjal ma cub cyiˈja tuˈn, tuˈn cyoca tjakˈ ley, yaaˈn te Dios, cuma ma tzaj ttxcoˈn Dios ejeeˈy tuˈn cytzakpeta tiˈ tcawbil ley. ⁹ Cycˈojlanx cyiiba cywitzj cabtl tzpetsal cyxola, cuma cxeˈl tz̈ˈiy cyxnakˈtzabl cyxola, tisen jun cluj kˈotj te ttxˈotxˈel pan njaw punntzˈaj oj n‑ocx levadura te tkˈanel. ¹⁰ Cuma ma tcyiwsa Kaaw ncˈuˈja, juˈ tzunj cˈoquel ke ncˈuˈja tiˈj miˈn tzˈel cypaˈn cyiiba tiˈj ma txiˈ nkbaˈna cyey. Pero jxjal tzpetsal cyxola, amale jawnexet, pero ctzaal tkˈoˈn Dios tcastiwa.

¹¹ Yajtzen weya, yaaˈn jax cyuˈn xjal ka lux kena nchin kˈumen il tiˈj qˈuelel keset kchuˈl tuˈn kclet. Nuket txiˈ nkˈumena juˈwa, tisen tzin cykbaˈn juun xjal, minttzenle ntzaj cykˈoj xjal judío wiˈja. Nuket e cyaj ncyeˈyena jyol ma chi clet xjal nuk tuˈnj e cyim Cristo twitz cruz, jaxettzele ncyaj cykˈoˈn judío tuˈn cykˈojl wiˈja. ¹² Kej xjal cyaj tuˈn cycpeta, jaxitle baˈn tuˈn tel kesettzen cye cyjos.

¹³ Key ocslal, o tzaj ttxcoˈn Dios ejeeˈy tuˈn cytena tzakpiˈn tiˈj tcawbil ley. Pero min e tzaj tkˈoˈnxin cycolbila tiˈ ley tuˈn cybinchana nuk tikˈch taj cyxumlala, sino tzˈajbenxit cycolbila tuˈn cyonen cyiiba tuya nim tkˈakˈbil cycˈuˈja. ¹⁴ Chi ajbena cyxolxa juˈwa, cuma cykilca yol tuj ley njapan baj twiˈ tuˈn ja yol lu: “Cˈoquel cyakˈ ke cyuyey cyey tisenj n‑oc cyakˈa cyey,” tz̈i tyol Dios. ¹⁵ Pero ka nuk nchi jaw kˈojla cyxolxa, tisen oj n‑oc cytxˈan cyiib txyan, cykˈoˈnc cwent cyiˈja, cuma jacˈa chi naja cykilca cyuˈnx cyiiba.

¿Alcye tuˈn tbint kuˈn? ¿Jun tajbil Espíritu Santo bix ka alcyej jun tajbil kxumlal?

¹⁶ Cxeˈl nkbaˈna cyey, cyiiˈnx cynaabla tuˈn junx qˈuelela tuya tajbil Espíritu Santo, tuˈntzen miˈntl txiˈ cynimana nuk tajbil cyxumlala. ¹⁷ Tcyˈi knaabl aj il jtaj Espíritu Santo, bix jax tcyˈi Espíritu Santo jtaj knaabl aj il. Kej caˈba lu cyajkˈoj cyiib. Juˈ tzunj, miˈn chi binchana nuk alcyej taj cyxumlala. ¹⁸ Pero qˈuelel cyniˈya tiˈj, oj ncheˈx lpey tiˈj Espíritu Santo, yaaˈn eteˈtla tjakˈ tcawbil ley, sino tjakˈ tcawbil Espíritu Santo.

¹⁹ Tzinente ti nbint cyuˈnj xjal ncheˈx lpe tiˈj cynaabl aj il. Nchi oc ipan cyiˈj xuuj yaaˈn cyxuˈl bix cyiˈj xinak yaaˈn cychmil. Nuk nchi jyon cyiˈj pajbaj bix tikˈch taj cyxumlal. ²⁰ Nchi ocx sukel t‑xeeˈ cyken sant. Bix n‑oc ke cycˈuˈj cyiˈ chmambaj. Bix n‑oc cyipen tuˈn tbint kaˈ cyiˈ juntl xjal. At kˈoj cyxol bix at chiˈl cycˈuˈj cyiˈ juntl xjal. Nuk ntzaj cykˈoj tiˈj cykilca nbaj. Bix n‑oc cyipen tiˈj nuk tuˈn cycaman cyibaj niyˈtl xjal. Ncub ten pabl cyiib cyxol. N‑el cyiiqˈuen cyej xjal nchi oc lpe tiˈ juntl xnakˈtzbil. ²¹ Nchi achen jte cyuya at. Byol xjalke. Bix nuk jaj taj cyxumlal nbint cyuˈn. Bix nimtl kaˈ ncybincha kej xjal nchi niman cynaabl aj il. Cxeˈl nkbaˈna cyey, tisenx e xiˈ nkbaˈna cyey tej ntena cyxola nejl, kej xjal nchi binchan jkaˈ lu, mlay chi ocx tuj tcawbil Dios.

²² Pero cyekej xjal ncheˈx lpe tiˈj Espíritu Santo, tzin tkˈoˈn Espíritu Santo cye cyjulu: N‑octzen cyakˈ xjal cye, bix at cytzalajebl, bix at tuj ttz̈yal, bix at cypasensya. Min chi kˈojl cyiˈ xjal, sino n‑oc cyipen tiˈj tuˈn tbint jun baˈn cye juntl. Nchi japan baj tiˈ cyyol cyuya xjal. ²³ Maansxseke oj nchi yolen cyuya xjal. Bix nchi tzyun cyiib twitz tkaˈyel. Kej xjal lepchec tiˈ Espíritu Santo juˈwa, mintiiˈ il tiˈj tuˈn t‑xiˈ tkbaˈn jun ley alcyej tuˈn tbint cyuˈn. ²⁴ Kej t‑xjal Cristo, ma cyaj cycyeˈyen tachbil cyxumlal bix ti taj cynaabl aj il.

²⁵ Key ocslal, o kiikˈ kchunkˈlal tuˈn Espíritu Santo. Juˈ tzunj, ko kbinchaˈcˈa ti taj Espíritu Santo. ²⁶ Miˈn cub kbisen mas jawnex koˈ cywitz juntl. Miˈn ko jyon tuˈn ttzaj cykˈoj juntl. Miˈn ko achen jte kuya at bix tiˈ cyaakˈen.

6  Key ocslal, ka at tumel cyuyey at jun cyxola ma cub tzˈak tuj jun til, cywaˈbajawtzen juntl maj, bix tuya mansbajil cycˈuˈja oj cyyolena tuya, key nchi nima Espíritu Santo. Pero cycˈojlanx cyiiba, tuˈntzen miˈn chi cub tzˈaka tuj til. ² Cyonenx cyiiba oj toc pena cyiˈja. Oj nchi onena tiˈj cyiketz mastl juˈwa, njapan baj tajbil Cristo cyuˈna.

³ Yaaˈn tumel tuˈn tjaw kniman kiib, cuma ka mintiiˈ kpaltel tuj kwitz, nko tzpet, cuma at kpaltel. ⁴ Yaaˈn tumel tuˈn ktzalaj tiˈj ka mas ma bint kuˈn cywitz juntl. Mas baˈn tuˈn kmlonte kex knaabl, bix ka baˈn ma bint kuˈn, tuˈn ktzalaj tiˈj. ⁵ Ma kˈoj te jaca juun xjal taakˈen tuˈn tbint tuˈn. Juˈ tzunj, il tiˈj tuˈn toc kcˈuˈj tiˈj kex kaakˈen.

⁶ Ejeeˈy o cyiikˈa jxnakˈtzbil tiˈ tyol Dios, baˈn tuˈn t‑xiˈ cykˈoˈna chˈin waabj cye kej cyxnakˈtzala bix tiˈj alcyej baˈn at cyuyey.

⁷ Miˈn chi el tzpeta tiˈj te Dios baˈn tuˈn. Mlay cub cyyajlaˈna jaxin. Jnbint cyuˈna tisen jun awal twitzxin. Alcyej ncuˈx cyawaˈna, jax cjawel cychmoˈna. ⁸ Katzen ma cuˈx cyawaˈna tajbil cynaabla kaˈ, cjaweltzen cychmoˈna cycyamecya te junx maj. Pero ka ma cuˈx cyawaˈna tajbil Espíritu Santo, cjaweltzen cychmoˈna cychunkˈlala te junx maj kˈoˈn tuˈn Espíritu Santo. ⁹ Juˈ tzunj, miˈn ko sict tuˈn kbinchante jbaˈn, cuma oj tpon tumel, cjawel kchmoˈn jun baˈn tuˈn Dios, ka min ma cyaj kkˈoˈn tuˈn tbint baˈn kuˈn. ¹⁰ Jatzen tyem jaˈlewe tuˈn tcuˈx kawaˈn. Juˈ tzunj, kkˈaˈc kipen tiˈj tuˈn kbinchante jbaˈn te cykilca xjal, bix tneelxix cyekej ocslal tiˈ Cristo.

Njaw tnimsaˈn Pablo tiˈj o bint twitz cruz tuˈn Kaaw Jesucristo

¹¹ Cycyeˈyenx ke nmak letra nxiˈ ntzˈiˈbena jaˈlewe tuˈnx nkˈaba, tuˈntzen tbaj twiˈ nyola. Cˈoquel cycˈuˈja tiˈj mancˈbil nyola cyey.

¹² Kej xjal cyxola tzin cykbaˈn il tiˈj tuˈn tel keset ttzˈumel cytzˈalbila, nchi yolenxin juˈwa nuk tuˈn cyelxin baˈn tuj cywitz xjal, bix yaaˈn tuj twitz Dios. Cycyˈixin tuˈn ttzaj cykˈoj kej jawnex judío cyiˈjxin tuˈnj tzin cykˈumenxin ka nchi clet ke xjal nuk tuˈnj tcyimlen Cristo twitz cruz. ¹³ Jax wuˈna nuk cyajxin tuˈn miˈn chi oc iˈlenxin cyuˈn jawnex judío, cuma amale tzint cykbaˈnxin il tiˈj tuˈn tel keset ttzˈumel cytzˈalbila tuˈn cycuyatey tley Moisés, pero ejeeˈxxin min chi nimanxin cykil tley Moisés. Cyajxin tuˈn cycpeta nuk oˈcx tuˈn t‑xiˈ cykbaˈnxin cyej jawnex judío aj Galacia ma cub cyiˈj cyuˈnxin. ¹⁴ Yal weya, min jaw nnimsan wiiba tuˈnj nbint wuˈna. Nuk oˈcx cxeˈl nkˈumena tiˈj o bint twitz cruz tuˈn Kaaw Jesucristo. Tuˈnj tcyimlenxin twitz cruz, ma naj nmojbabl wiiba tuya cynaabl xjal te twitx txˈotxˈ. Mintiiˈtl wajbila tuˈn wela baˈn tuj cywitz xjal te twitz txˈotxˈ, bix jax mintiiˈtl wajbela tuj cywitzxin. ¹⁵ Mintiiˈ il tiˈj ka ma tzˈoc jun techel tiˈ kxumlal bix ka min. J‑il tiˈj, jaj ka ma ko oc acˈaj xjal. ¹⁶ Cykilca kej xjal ma chi oc acˈaj tuj cyanem, chi temeltzen tuj ttz̈yal tuya Dios, bix ctzaal kˈaˈben tcˈuˈj Dios cyiˈjxin, bix jaxxix t‑xjal Dioskexin.

¹⁷ Tetzen jaˈlewe miˈntltzen tzˈoc cybiˈna cyyol ẍtakˈ xnakˈtzal, cuma nimxsen ma tzˈoc pjet nxumlala tuj taakˈen Jesús, te yecˈbil inayenja kbalte jaxxix yol.

Jun kˈolbebl tuˈn Pablo cye ocslal aj Galacia

¹⁸ Cyiikˈxita t‑xtalbil Cawel kxol, Jesucristo, tuj cyanema, key hermano.

Oˈcx nyolja.