Chronological

Jun uˈj e xiˈ ttzˈiˈben apóstol Pablo cye ocslal at tuj departamento Galacia

Jun kˈolbebl tuˈn Pablo

1  Inayena Pablo. Jun t‑xel Jesucristo kena. Yaaˈn xjal e scyˈonte weya tuˈn woca te jun t‑xel Jesucristo, bix yaaˈn xjal e smante weya. Scyˈoˈn kena bix smaˈn kena nuk oˈcx tuˈn Jesucristo bix tuˈn Kman Dios e jaw titzˈjsaˈn ja Jesucristo tuj cyamecy. ² Nxiˈ ntzˈiˈbena ja uˈj lu te cykilca cloj ocslal tiˈ Cristo tuj departamento Galacia. Jax juˈx kej ocslal at wuyena ma txiˈ cykˈoˈn jun kˈolbebl te cyey.

³ Tzajxit t‑xtalbil Kman Dios tuya Kaaw Jesucristo cyibaja, bix cyuˈnxit‑xin chi temey tuj ttz̈yal. ⁴ E xiˈ tkˈon tiib Jesucristo tuˈn tbyet tuˈn kil, tuˈntzen kclet tuˈnxin tiˈj kaˈ at jaˈlewe twitz txˈotxˈ. E cyimxin cuma juˈ e tajbe Kman Dios. ⁵ ¡Jawxit nimset Kman Dios te junx maj! Juˈxit ttena.

Mintiiˈ juntl xnakˈtzbil tiˈj ti tten tuˈn kclet

⁶ Key ocslal, ma baj ncˈuˈja tiˈj ma bint cyuˈna. Ma bint nuk cab kˈij ocslankey tiˈj jaxxix yol e xiˈ nkˈumena cyey. Pero jaˈlewe ma tzakˈ cyjel cycyeˈyena Dios. E tzaj tkˈoˈn Dios tuˈn cycleta nuk tuˈnj xtalbil kˈoˈn cyey tuˈn Cristo, pero cyaja tuˈn cyoc lpey tiˈj junxitl xnakˈtzbil. ⁷ Mintiiˈ juntl xnakˈtzbil tiˈj ti tten tuˈn cycleta, pero at juun cyxola nchi chˈixben nxnakˈtzbila te tzpetsal cyey. Cyajxin tuˈn t‑xitj jjaxxix xnakˈtzbil tiˈ Cristo. ⁸ Junx xnakˈtzbil tuˈn cyclet xjal, jaj e xiˈ nkˈumena cyey. Ka at jun xjal ma t‑xnakˈtza juntl xnakˈtzbil tiˈj ti tten tuˈn kclet, tzajxit tsbuˈn Dios ja, amale inayenta bix ka jun tsanjel Dios tuj cyaˈj. ⁹ Juntl maj cxeˈl nkbaˈna jma txiˈ nkbaˈna cyey, ka at jun xjal ma t‑xnakˈtza juntl xnakˈtzbil twitzj xnakˈtzbil ocslankey tiˈj, ¡tzajxit tsbuˈn Dios ja!

¹⁰ Cyiw chˈin nyola, pero jeyˈ, tuˈnj ja cyiw yol lu, ¿yaaˈmpa tzinen tuj cywitza ncyˈiya nuk tuˈn wela baˈn tuj cywitz xjal? ¿Wajpiya tuj cywitza nuk tuˈn cyyolen xjal baˈn wiˈja, tisen cykbaˈn juun cyxola? ¿Yaaˈmpa tzinen waja nuk tuˈn wela baˈn tuj twitz Dios? Nuket oc wipena nuk tuˈn wela baˈn tuj cywitz xjal, yaaˈntzenle jax jun t‑akˈanal Cristo kena.

E yole Pablo tiˈj ti tten tej toc te t‑xel Jesús

¹¹ Key ocslal, ilxsen tiˈj qˈuelel cyniˈya tiˈj jbaˈn xnakˈtzbil tiˈj colbil ke e xiˈ nkˈumena cyey, yaaˈn cyyol xjal. ¹² Yaaˈn kˈoˈn weya cyuˈn xjal, bix min in xnakˈtzana tiˈj. Jax Jesucristo e tzaj tyeecˈan weya.

¹³ Cxeˈl nkbaˈna cyey ti tten e wiikˈa jxnakˈtzbila tuˈn Cristo. O cybiy ti e bint wuˈna tej nxiˈ lpeya tiˈ cyley judío. Nimxsen in kˈojla cyiˈj t‑xjal Dios tuˈn cyxiˈxin tuj tzeeˈ bix tuˈn cycubxin, tuˈntzen tcub xitj cyocslablxin tiˈ Cristo. ¹⁴ Bix mas cyiw in tiina tuj cyley judío cywitzj chˈixcˈa yaaˈn cykilcatl ntanema. Nim oc wipena tiˈj tuˈn cyniman cykil ntanema kej costumbre otk cyaj cykˈoˈn ke wiyˈjila.

¹⁵ Pero amale in kˈojleta tiˈ Dios, pero tuˈn t‑xtalbilxin weya e takˈxin weya wajbena texin. Tej mitknaˈx witzˈja, ya scyˈoˈntl kena tuˈnxin. Bix tej tpon tumel tuj twitzxin, ¹⁶ e takˈxin weya tuˈn tel nniˈya tiˈj Tcwalxin, tuˈntzen t‑xiˈ nkˈumena tiˈ Tcwalxin cyej xjal yaaˈn judío. Tejtzen tel nniˈya tiˈ Tcwalxin, min in xiˈya cyuya xjal tuˈn t‑xiˈ nkanena ka iyˈnen cyilbil tiˈj. ¹⁷ Jax min in xiˈya cyuya kej t‑xel Jesús tuj tnom Jerusalén, ejeeˈj oc te t‑xel Jesús nejl nwitza. Nuk oˈcx in xiˈya nakch tuj txˈotxˈ te Arabia tuˈn ntena njunala jaaˈ min‑al xjal. Mas yaj, in ajtz meltzˈaja tuj tnom Damasco. ¹⁸ Min in xiˈya tuj Jerusalén tuˈn nyolena cyuya t‑xel Jesús tejxe tbint oxe jnabkˈi ttzajlen tyeecˈan Dios Tcwal weya. Mancˈbiltzen in xiˈya Jerusalén tuˈn wlontiya twitz Pedro, pero nuk olaaj kˈij in tena tuyaxin. ¹⁹ Bix min‑al juntl t‑xel Jesús e wila. Nuk oˈcx t‑xelxin Jacobo e wila, jxin titzˈen Cawel kxol. ²⁰ Jnxiˈ nkbaˈna cyey, jax wuˈna. Ttzkiˈn Dios min nchin ẍtakˈena.

²¹ Yajxitltzen, bix in xiˈya cyuj ke departamento Siria bix Cilicia. ²² Min in cyaja cyxol niyˈtl t‑xel Jesús cyuj tja Dios tuj departamento Judea. Kej ocslal tiˈ Cristo eteˈ tjakˈ cyxnakˈtzbil t‑xel Jesús, mi nuket cytzkiˈn nwitza. ²³ Pero ejeeˈj ocslal el cyniyˈ tiˈj ka jaxxix xnakˈtzbil e nkˈumena, cuma e cybixin cyyol kej ocslal otk chi nyajlaya nejl. Tz̈i kej ocslal otk chi yajlet wuˈna: “Jxin xjal e tyajla ejooˈya nejl, jaˈlewe ntkˈumentlxin kocslabl, jaj kocslabl oc tipenxin tiˈj nejl tuˈn t‑xitj,” tz̈ikexin. ²⁴ Bix tej cybinte ocslal tuj Judea ja yol lu, nimxsen e jaw cynimsaˈnxin Dios wiˈja.

2  Tbajlenxitltzen cyajlaaj jnabkˈi nxiˈlena Jerusalén tneel maj, in xiˈya juntl maj tuj Jerusalén. E xiˈ Bernabé wuyena, bix jax e xiˈ wiiˈna Tito. ² Pero in xiˈya nuk oˈcx tuˈn jun tumel otk tzaj tkˈoˈn Dios weya. Min in xiˈya tuˈn cyajbil xjal. Bix in yolena cyuya nejenel cye ocslal, tuˈn t‑xiˈ ntxˈolbaˈna alcyej xnakˈtzbil nxiˈ nkˈumena cyej xjal yaaˈn judío, tuˈntzen miˈn chi kˈojl tiˈj waakˈena nbint wuˈna bix otk bint wuˈna, tuˈn miˈn txiˈ waakˈena tuj il. ³ Bix e cycuyaxin wuyena mintiiˈ il tiˈj tuˈn tel keset ttzˈumel ttzˈalbil jun xjal tuˈn tclet, tisen tzin cykbaˈn kej xjal judío. Cˈoquel cycˈuˈja tiˈj ti e bint tiˈ Tito, jxjal e xiˈ wiiˈna. Mi nuket jaxin min e cykbaxin tuˈn tel keset‑xin, amale yaaˈnt judíoxin. ⁴ In yolena cyuya nejenel cye ocslal nuk oˈcx tuˈn miˈn tzˈoc cycˈuˈj tiˈj cyyol kej xjal tzin cykbaˈn ocslalke pero ẍtakˈke. Tuya ẍtakˈ cyyol, ocx ke ẍtakˈ ocslal kxola, ejooˈya ocslal tuj Jerusalén. Nuk oˈcx oc cycwent‑xin tiˈj ka nko nimana cycostumbre judío bix ka min. Cycyˈixin tuˈn ktzakpet tiˈ kil nuk tuˈnj kmojbabl kiib tuya Cristo Jesús. Nuk oˈcx cyajxin tuˈn kten tjakˈ tley Moisés, tisen jun xjal ẍpoˈn. ⁵ Pero mi nuket jun minuto in keya tuyaj cyajbilxin, cuma ilxsen tiˈj tuˈn tcyaj jaxxix jxnakˈtzbil tiˈj colbil ke cyxola.

⁶ Yaltzen kej nejenel cye ocslal tuj Jerusalén, tzˈaklxix el nxnakˈtzbila tuj cywitzxin. Tzin cykbaˈn tzpetsal ka mas tzˈaklxix cyxnakˈtzbil t‑xel Jesús twitzj weya nxnakˈtzbil, cuma e ten ke t‑xel Jesús tuyaxin nejl. Pero yaaˈn il tiˈj tuj nwitza ka mas jawnex niyˈtl ke t‑xel Jesús tuj cywitz tzpetsal cyxola, cuma tuj twitz Dios min‑al jun xjal mas jawnex twitz juntl. ⁷ Pero cyej t‑xel Jesús tuj Jerusalén, min e kˈojlke wiˈja, sino e cycuyaxin jweya nxnakˈtzbil. El cyniyˈxin tiˈj otk tzaj tkˈoˈn Dios jjaxxix xnakˈtzbil tiˈj colbil ke weya tuˈn t‑xiˈ nkˈumena cyej xjal yaaˈn judío, jax tisenj otk tzaj tkˈoˈnxin te Pedro tuˈn t‑xiˈ tkˈumen cyej xjal judío. ⁸ El cyniyˈxin tiˈj tisen oc tkˈoˈn Dios tipemal Pedro tuˈn tajben te t‑xel Jesús cyxol xjal judío, jax oc tkˈoˈn Dios wipemala tuˈn wajbena te t‑xel Jesús cyxol xjal yaaˈn judío. ⁹ Ja tzunkej ocslal crinsipal tuj cywitz cykil ocslal, ja Jacobo, Pedro, bix Juan, el cyniyˈxin tiˈj otk tzaj tkˈoˈn Dios t‑xtalbil weya tuˈn wakˈanana tuj taakˈenxin. Juˈ tzunj, e tzaj cykˈoˈnxin cykˈabxin weya bix te Bernabé te yecˈbil baˈn tuj cywitzxin tuˈn t‑xiˈ nkˈumena tyol Dios tuya Bernabé cyxol xjal yaaˈn judío, joocˈtzen ejeeˈxxin tuˈn t‑xiˈ cykˈumen cyxol judío. ¹⁰ Nuk oˈcx oc cyocsaˈnxin ncˈuˈja tuˈn miˈn cyaj ncyeˈyena tuˈn t‑xiˈ wonena kej judío mebe, bix tuˈn ja lu e ncuyana tuya cykil ncˈuˈja.

Tej toc tile Pablo ja Pedro tuj tnom Antioquía

¹¹ Mas yaj, e yecˈj juntl maj e tzaj nxnakˈtzbila tuˈn Dios, yaaˈn cyuˈn t‑xel Jesús. Tej tpon Pedro tuj tnom te Antioquía, il tiˈj oc wilen xina tibajcˈa twitzxin oca nkbaˈna, cuma min e tnimaxin jaxxix jxnakˈtzbil. ¹² Tuj tneel, baˈn e bint tuˈnxin, cuma e waaˈnxin cyuyaj cykil ocslal, amale atet juun yaaˈn judío. Pero tej cypon cab judío tuj tnom smaˈn tuˈn Jacobo, akˈ elel tpaˈn tiibxin cyiˈ ocslal yaaˈn judío, cuma at cytz̈i judío tiˈjxin, cuma tzin cykbaˈn judío nchucj jun xjal twitz Dios ka ma waaˈn cyuyaj xjal yaaˈn judío. ¹³ Bix cuma yaaˈn junx j‑e bint tuˈnxin tuyaj e xiˈ tkˈumenxin, bix el cypaˈn cyiib niyˈtl ocslal judío tuj Antioquía cyiˈj ocslal yaaˈn judío, amale elet cyniyˈxin tiˈj baˈn tuˈn cywaaˈnxin junx cyuya cykil ocslal. Hasta Bernabé e cub tiˈj cyuˈn judío tuˈn miˈn waaˈnxin cyuyaj ocslal yaaˈn judío. ¹⁴ Pero tej t‑xiˈ ncyeˈyena yaaˈn junx cybinchbenxin tuyaj jaxxix xnakˈtzbil tiˈj colbil ke, e xiˈ nkbaˈna te Pedro twitz cykil ocslal: “Jun judío tey, pero o tzakpeta tiˈj cyley judío, bix nwaaˈna tisenx tten cyuˈn xjal yaaˈn judío. Juˈ tzunj, ¿tikentzen tzin tyeecˈana il tiˈj tuˈn cyniman xjal yaaˈn judío cyley judío tuˈn cyel baˈn twitz Dios? ¹⁵ Amale judíot koˈ cuma judío ke kiyˈjil, bix yaaˈn jun wikxitl xjal koˈ min e kiikˈ ley te Moisés, ¹⁶ pero el kniyˈ tiˈj jun xjal jiquen twitz Dios nuk oˈcx tuˈnj tocslabl tiˈ Jesucristo, yaaˈn tuˈn tbinchan alcyej tzin tkbaˈn tley Moisés. Juˈ tzunj, amale judíot koˈ, pero o ko ocslan tiˈ Cristo Jesús, tuˈntzen jiquen koˈ twitz Dios tuˈn kocslabl tiˈ Cristo. Min o ko clet tuˈnj knimbil tiˈ tley Moisés, cuma min‑al jun xjal n‑el jiquen twitz Dios tuˈnj tnimbil tiˈ tley Moisés.

¹⁷ Pero ka jax cyuˈn judío oc koˈ te aj il tisen kej xjal yaaˈn judío tej kocke jiquen twitz Dios nuk oˈcx tuˈn Cristo, bix yaaˈntl tuˈnj jknimbil tiˈ tley Moisés, tuˈn tzunj Cristo o ko oc aj il. Cxeˈl nkanena tey, ¿tumelpa tuˈn t‑xiˈ kkbaˈn tuˈn Cristo nko oc te aj il? ¡Min!

¹⁸ Katzen ma tzˈoc ke kcˈuˈj tiˈj knimbil tiˈ ley tuˈn koc jiquen twitz Dios, tzin kyeecˈan min tzˈoc kbiˈn ley, ¹⁹ cuma e tkba ley kiˈj mlay ko oc jiquen twitz Dios tuˈnj knimbil tiˈ ley. Juˈ tzunj, ya mintl n‑oc wipena tiˈj tuˈn woca jiquen twitz Dios tuˈn ley, tuˈntzen woca jiquen nuk oˈcx tuˈnxin, tuˈn wajbena nuk oˈcx texin. ²⁰ Te junx maj ma tzˈoc ke ncˈuˈja nuk oˈcx tiˈ Cristo e jaw kˈoˈn twitz cruz te nxela. Ya miˈntl txiˈ njyoˈna nchunkˈlala tuˈnj weya nbinchben, sino at nchunkˈlala tuˈn Cristo najl tuj wanema. Jchunkˈlal nxiˈ wiiˈna jaˈlewe, ma tzaj kˈoˈn weya tuˈnj wocslabla tiˈj Tcwal Dios, jaj xjal oc wakˈa te, bix e cyimxin te nxela. ²¹ Miˈn cyaj ncyeˈyena t‑xtalbil Dios weya. Nuket nko oc jiquen twitz Dios tuˈnj kbinchben tjakˈ ley, nukettzenle ganax e cyim Cristo,” ntz̈iya te Pedro.

O kiikˈ Espíritu Santo tuˈnj kocslabl tiˈj e bint tuˈn Cristo twitz cruz

3  Key ocslal tuj Galacia, mintiiˈ cynaabla. ¿Tikentzen ma cheˈx lpey tiˈ jun yol sbul? Nejl, tzinenxix e xiˈ nkˈumena cyey tiken e cyim Jesucristo twitz cruz. ² Cxeˈl nkanena cyey, ¿e cyiikˈpey Espíritu Santo tuˈnj cynimbila tiˈ tley Moisés, bix ka tuˈnj cyocslabla tiˈ Cristo tej cybintey ti e bint tuˈnxin twitz cruz? ³ ¿Mimpatiiˈ cynaabla? Tej cyocslana tuj tneel, ockey jiquen tuˈnj e bint tuˈn Espíritu Santo. ¿Tikentzen n‑oc cyipena tiˈj jaˈlewe tuˈn cyoca jiquen twitzxin tuˈnj cyexa cybinchbena? ⁴ Bix juntl. Nim qˈuixcˈaj iyˈx cyuˈna tej cyocslana tiˈ Cristo. ¿Nukpa cyajxa iyˈx ja qˈuixcˈaj lu cyuˈna? Cutz̈it ka min.

⁵ Cxeˈl nkanena cyey juntl maj, oj ntzaj tkˈoˈn Dios Espíritu Santo cye xjal, bix nxiˈ tyeecˈanxin jawnex tipemalxin cyxol xjal, ¿tzimpa tkˈoˈnxin juˈwa cuma n‑oc cybiˈn xjal tley Moisés? Min. Tzin tkˈoˈnxin nuk oˈcx tuˈnj ma txiˈ cyocslaˈna jbaˈn pocbal ti tten tuˈn koc jiquen twitzxin.

O tzˈoc ke tcˈuˈj Abraham nuk tiˈj tyol Dios

⁶ Cˈoquel cycˈuˈja tiˈj ti toc tuˈn tyol Dios tiˈ Abraham. Tz̈i cyjulu: “Oc ke tcˈuˈj Abraham tiˈ Dios. Juˈ tzunj e tzaj kˈoˈn te Abraham tuˈn toc jiquen twitz Dios,” tz̈i tyol Dios. ⁷ Juˈ tzunj, il tiˈj qˈuelel cyniˈya tiˈj nuk oˈcx kej xjal n‑oc ke cycˈuˈj tiˈ Dios, ejeeˈ tzunja t‑xjal Dios tisen Abraham. ⁸ Bix cˈoquel cycˈuˈja tiˈj jatxe tuj tneel e cub tnincˈuˈn Dios tuˈn cyoc kej xjal yaaˈn judío jiquen twitzxin ka ma chi ocslan tiˈjxin. Juˈ tzunj, e xiˈ tkbaˈn Dios te Abraham: “Tuˈna chi oquela cykilca wik xjal wunak twitz txˈotxˈ,” tz̈i Dios te Abraham, tz̈i tyol Dios. ⁹ Juˈ tzunj, il tiˈj qˈuelel cyniˈya tiˈj ntkˈoˈn Dios t‑xtalbil cyej xjal n‑oc ke cycˈuˈj tiˈjxin, tisen e takˈxin te Abraham tej toc ke tcˈuˈj Abraham tiˈjxin. ¹⁰ Bix il tiˈj qˈuelel cyniˈya tiˈj kej xjal n‑oc cyipen tiˈj tuˈn cycaman tiˈj t‑xtalbil Dios tuˈnj nchi niman ley, cwel cycastiwa tuˈn Dios, cuma mlay bint cykilca ley cyuˈn. Tzin tkbaˈn tyol Dios cyjulu: “Cwel tkˈoj Dios tibaj cykil kej xjal min chi binchan cykil yol tzˈiˈben tuj ley,” tz̈i tyol Dios. ¹¹ Tzinen taˈ min‑al jun xjal cˈoquel jiquen twitz Dios tuˈnj nniman ley, cuma tzin tkbaˈn tyol Dios cyjulu: “Jiquen taˈ jun xjal twitz Dios nuk oˈcx tuˈnj n‑oc ke tcˈuˈj tiˈ Dios,” tz̈i tyol Dios. ¹² Pero te ley, ka ma tzˈoc ke kcˈuˈj tiˈ ley tuˈn koc jiquen twitz Dios, mlaytltzen tzˈoc ke kcˈuˈj tiˈ Dios. Tzin tkbaˈn tyol Dios cyjulu: “Jxjal taj tuˈn tcnet tchunkˈlal tuˈnj ley, ilxsen tiˈj cbinchal entera ley,” tz̈i tyol Dios.

¹³ Key ocslal, tuˈnj min e kbincha jtzin tkbaˈn ley, juˈ tzunj at tcublel kcastiwa kibaj. Pero tuˈn ktzakpet tiˈj kcastiwa, e xiˈ tchjoˈn Cristo chojbil kil. E xiˈ tiken texin kcastiwa tej tcyaj sbuˈnxin twitz cruz. Sbuˈn taˈxin, cuma tzin tkbaˈn tyol Dios cyjulu: “Jawnexsen tchˈixew jun xjal njaw cˈlet tkˈab jun tzeeˈ oj n‑oc tuj castiwa,” tz̈i tyol Dios. ¹⁴ El ttzakpiˈn Cristo ejooˈ tuj tcwent ley tuˈn tpon baj twiˈ jtyol Dios e cyaj tkˈoˈn te Abraham, jaj tuˈn ttzaj tkˈoˈn Dios t‑xtalbil te cykil wik xjal tuˈnj tiyˈjil Abraham. El ttzakpiˈn Cristo ejooˈ tuˈn kiikˈente Espíritu Santo tuˈnj kocslabl tiˈ Cristo, J‑espíritu Santo e cyaj tkˈoˈn Dios tyol ke tuˈn kiikˈente.

¹⁵ Key hermano, cxeˈl nkbaˈna jun techel cyey ti nbaj cyxol xjal. N‑el kniyˈ tiˈj mlay bint tuˈn tcub xitj jun trat cyxol xjal. Amale binnet trat nuk cyuˈn xjal, pero oj tcywix tuj juzgado, mlay bint tuˈn tel xeˈt bix mlay bint tuˈn tchˈixpet tuˈn juntl xjal. ¹⁶ Juˈtzen tten tuyaj yol e cyaj tkˈoˈn Dios te Abraham bix te t‑xeˈchel. Bix tej tcyaj tkˈoˈn Dios tyol te Abraham bix te t‑xeˈchel, cˈoquel cycˈuˈja tiˈj min tzin tkbaˈn tyol Dios “cye t‑xeˈchel.” Nuk oˈcx tzin tkbaˈn “te t‑xeˈchel.” Tzin tkbaˈn juˈwa cuma nyolen tiˈj jt‑xeˈchel Abraham, ja Cristo. ¹⁷ Cxeˈl ntxˈolbaˈna jtechel cyey. Tisen mlay bint tuˈn tcub xitj jun trat cyxol xjal, jax mlay cub t‑xiten Dios jyol e cyaj tkˈoˈn te Abraham, jyol e cywix tuya cyiwsabl yol. Jley e cyaj tkˈoˈnxin te Moisés cyaja syent tuya winaklaaj jnabkˈi mas yaj, mlay tzˈel tiiˈn tipemal jyol e cyaj tkˈoˈnxin te Abraham. ¹⁸ Juˈ tzunj, nuket e kiikˈ t‑xtalbil Dios nuk tuˈnj knimbil tiˈ ley, mintetzele e kiikˈ t‑xtalbilxin tuˈnj yol e cyaj tkˈoˈnxin. Pero tzin tyeecˈan Abraham yaaˈn juˈwa. E tzaj tkˈoˈn Dios xtalbil te Abraham nuk oˈcx tuˈnj otk cyaj tkˈoˈnxin tyolxin.

Tej tyole Pablo tiˈj ti tajbelel tley Moisés

¹⁹ Pero ka juˈwa, ¿titzen tajbel tley Moisés? E tzaj tkˈoˈn Dios ley te Moisés mas yaj tuˈn tel kniyˈ tiˈ kil. Pero tej ttzaj cykˈoˈn tsanjel Dios tuj cyaˈj ley te ke tuj tkˈab Moisés, yaaˈn tuˈn tten ley te junx maj. E tajbe Dios tuˈn tcawen ley kibaj, pero nuk oˈcx mitkx n‑uˈla jt‑xeˈchel Abraham e cyaj tkˈoˈnxin tyolxin tuˈn tul. ²⁰ Bix cˈoquel cycˈuˈja tiˈj il tiˈj ajben jun tyolel Dios tuˈn t‑xiˈ tkˈoˈn ley cye xjal. Pero tej ttzaj tkbaˈn Dios tyol te Abraham, jax Dios e yolen tuyaxin. Ja lu tzin tyeecˈan mas baˈn t‑xtalbil Dios e cyaj tkˈoˈn te Abraham twitzj ley e xiˈ tkˈoˈnxin te Moisés.

²¹ Katzen ma ko oc jiquen twitz Dios nuk oˈcx tuˈn t‑xtalbil Dios, bix yaaˈn tuˈn ley, ¿qˈuelelpatzen kniyˈ tiˈj nkˈojl ley e tzaj tkˈoˈn Dios te Moisés tiˈj jyol e cyaj tkˈoˈn Dios te Abraham? ¡Min! Min kˈojl, sino at juntl taakˈen. Nuket at kipemal tuˈn ley tuˈn knimante, ajbentzenle ley tuˈn koc jiquen twitz Dios. Pero min. ²² O cyaj tkˈoˈn Dios ley nuk oˈcx tuˈn tel kniyˈ tiˈj o ten cykil xjal tuj tkˈab il tisen ke pres, tuˈntzen nuk tuˈnj cyocslabl tiˈ Jesucristo ctzaal tkˈoˈn Dios t‑xtalbil te cyej xjal n‑oc ke cycˈuˈj tiˈ Jesucristo. ²³ Tej mitknaˈx tpon tumel tuˈn tyeecˈante Dios ti tten tuˈn ktzakpet tuˈnj kocslabl tiˈ Jesucristo, tisencˈa tuj tzeeˈ etoˈcxe, bix ajben ley tisen jun cˈojlal cars, tuˈntzen kajbente jbaˈn tpocbal tuˈn ktzakpet tuˈn Cristo tej tul ja pocbablte lu mas yaj. ²⁴ Juˈ tzunj, il tiˈj qˈuelel kniyˈ tiˈj ajben ley nuk tuˈn t‑xiˈ tiiˈn ejooˈ tuya Cristo, tuˈntzen koc jiquen twitz Dios tuˈnj kocslabl tiˈ Cristo. ²⁵ Pero jaˈlewe, cuma o ko ocslan tiˈ Cristo, juˈ tzunj mintiiˈtl il tiˈj tuˈn tajben ley tuˈn t‑xiˈ tiiˈn ejooˈ tuya Cristo.

²⁶ Key ocslal, tcwal Dioskey tuˈnj cyocslabla tiˈ Cristo Jesús. ²⁷ Junx eteˈy tuya Cristo, ejeeˈxa at cymojbabl cyiiba tuyaxin, cuma o tzˈoc cykˈon cyiiba tuyaxin. ²⁸ Tuj twitz Dios, min‑al jun wik xjal cyxola mas jawnex twitz juntl wik. Judío lokey, yaaˈnle judíokey, ajnintz lokey, nmak lokey, xinak lokey, xuuj lokey, junx taˈ cykilcakey twitz Dios, cuma junx eteˈy tuya Cristo Jesús. ²⁹ Bix tuˈnj junx eteˈy tuya Cristo, bix t‑xeˈchel Abraham ja Cristo, juˈ tzunj tcwal Abrahamkey, bix at cyoclena tuˈn cyiikˈa jcykaba e cyaj tkbaˈn Dios te Abraham.