Chronological

Jun uˈj e xiˈ ttzˈiˈben Santiago

Jun kˈolbebl tuˈn Santiago

1  Inayena Santiago. Jun t‑akˈanal Dios kena, bix jun t‑akˈanal Kaaw Jesucristo. Nxiˈ nkˈoˈna jun nkˈolbebla te cyey judío ma chi el tz̈itja tuj cykilca twitz txˈotxˈ.

Ntzaj tkˈoˈn Dios knaabl

² Key ocslal, ka ma tzaj pena bix qˈuixcˈaj bix jun kaˈ cyiˈja, miˈn chi bisena, sino chi tzalaja, ³ cuma cytzkiˈna ka ma tziyˈx kej qˈuixcˈaj lu cyuˈna, nchi ajbentzen tuˈn tcywix cyocslabla tiˈ Cristo, bix ctemel mas cypasensyey. ⁴ Iltzen tiˈj tuˈn tten cypasensyey, tuˈntzen tzˈakl cynaabla, tuˈn mintiiˈ palt cyey tuj cyocslabla.

⁵ Katzen at jun xjal cyxola ka at‑x taj tnaabl tiˈ, kanenx te Dios, bix ctzaal tkˈoˈn Dios tnaablxin, cuma taj Dios tuˈn ttzaj tkˈoˈn nim baˈn cye xjal. Min tzˈoc ilen Dios kiˈj oj nko kanen texin. ⁶ Pero oj t‑xiˈ kkanen, ilxsen tiˈj cˈoquel ke kcˈuˈj tiˈjxin, bix miˈn baj kcˈuˈj, cuma ka ma baj tcˈuˈj jun xjal tiˈ Dios oj nxiˈ tkanen, juˈtzen tisen mar nyucch jaca maj tuˈn cykˈiˈk. ⁷ Ka ma txiˈ cykanena te Dios pero min tzˈoc ke cycˈuˈja tiˈjxin, mlay tzaj tkˈoˈnxin cyey, ⁸ cuma tuya caˈba twiˈ cycˈuˈja nxiˈ cykanena, bix yaaˈn cyiw cycˈuˈja tuj cyocslabla.

⁹ Yal kej ocslal mebe, tuˈn cytzalaj, cuma ma kˈoj jawnex cyoclen tuˈn tiyˈx qˈuixcˈaj cyuˈn tisen iyˈx tuˈn Cristo. ¹⁰ Jax kej ocslal kˈine, tuˈn cytzalaj, pero yaaˈn tiˈj cykˈinemal, sino tiˈj ma tzaj tkˈoˈn Dios tuˈn cyoc te chˈin, cuma n‑el cyniyˈ tiˈj cykilca kˈine chi pjel, tisen txmaquel cˈul. ¹¹ Oj n‑ul kˈij, nkˈon nim cyak, biˈx ntzkij cˈul, bix n‑el tzˈak txmaquel, bix naj tilbil. Jaxsen juˈx jxjal kˈine. N‑oc tkˈon tiib tiˈ tikˈch at twitz txˈotxˈ, pero cymel, tisen txmaquel cˈul.

Cyˈiwlaˈn taˈ jxjal miˈn cyaj tkˈoˈn tocslabl tiˈ Cristo oj n‑oc qˈuixcˈaj tiˈj

¹² Cyˈiwlaˈn taˈ jxjal min cyaj tkˈoˈn tocslabl tiˈ Cristo oj n‑oc qˈuixcˈaj tiˈj, cuma ka ma tziyˈx qˈuixcˈaj tuˈn, ckˈojeltzen tcotz, jaj tchunkˈlal te junx maj o tkba Dios te cyej xjal n‑oc takˈ cye.

¹³ Katzen at jun xjal n‑oc niyˈbebl tiˈj tuˈn tbint jun kaˈ tuˈn, miˈn txiˈ tkbaˈn ka ja Dios ma tzˈoc cyakwusante tuˈn tbint jyaaˈn baˈn tuˈn, cuma tcyˈi te Dios tuˈn tbinchante jun kaˈ, bix bajx tzaaˈ tkˈoˈnxin jun yol te jun xjal tuˈn tbint jun kaˈ tuˈn. ¹⁴ Tiˈjx tnaabl xjal n‑el itzˈj niyˈbebl te, cuma npon tcˈuˈj xjal tiˈj tajbil tnaabl aj il, bix nsbuj tuˈn. ¹⁵ Bix oj n‑oc tbiˈnxin, bix nxiˈ tzˈakxin tuj il, bix ntz̈ˈiy tilxin. Ctkˈaˈtzen tcyamecyxin te junx maj tuˈn tilxin.

¹⁶ Key ocslal n‑oc cyakˈa weya, miˈn chi tzpeta tiˈ Dios, ¹⁷ cuma nuk jaj cotz baˈn bix nuk jaj tbanelxix tzin tkˈoˈn Kman Dios tuj cyaˈj ke. Jkˈij bix xjaw bix ke cheˈw e tbinchaxin, nchi bet jaca hora, bix nchˈixpet xlequen tzin cykˈoˈn. Pero te Dios, min tchˈixpu tnaabl. ¹⁸ Juˈ e tajbexin tuˈn ttzaj tkˈoˈnxin ke tuˈn koc te tcwalxin tuˈnj jaxxix tyolxin, tuˈntzen koc te tneel ocslal cyxol xjal, tisen tneel twitz awal.

Il tiˈj tuˈn tbint tyol Dios kuˈn yaaˈn nuk oˈcx tuˈn toc kbiˈn

¹⁹ Key ocslal n‑oc cyakˈa weya, cybiˈnc ja yol lu. Mas baˈn tuˈn t‑xiˈ cybiˈna tyol Dios twitzj tuˈn t‑xiˈ cykbaˈna nuk cyexa cyyola. Bix miˈn chi jaw kˈojl naja, ²⁰ cuma mlay chi ajbena te Dios tuya cykˈoja. ²¹ Juˈ tzunj, cykˈoˈncj cykilcaj yaaˈn baˈn bix jkaˈ, bix tuya jun cynaabla maans, chi lpexa tiˈj tyol Dios ma cuˈx awet tuj cyanema, bix at tipemal tuˈn cycleta tuˈn. ²² Il tiˈj tuˈn tbint tyolxin cyuˈna, cuma ka nuk ma tzˈoc cybiˈna tyolxin pero min cybiy, ncubtzen cysbun cyiiba juˈwa. ²³ Alcyej xjal nuk nxiˈ tbiˈn tyol Dios pero min bint tuˈn, juˈtzen tisen jun xjal n‑ocx tcyeˈyen twitz tuj jun respej. ²⁴ Oj tbaj tcyeˈyen twitz, nxiˈtzen, bix n‑el tuj tcˈuˈj tiiˈn tcyeˈnc. ²⁵ Pero alcyej xjal n‑oc tkˈon tiib jaca kˈij tuˈn tel tniyˈ tiˈj ti toc tuˈn tley Dios, bix min n‑el tuj tcˈuˈj ti toc tuˈn ley, sino n‑oc tipen tiˈj tuˈn tbint tuˈn, cweltzen xtalbil tibaj, cuma tbanelxix tley Dios, bix nko tzakpet tiˈ il tuˈn.

²⁶ Ka at jun xjal cyxola najben te Dios tuj twitz, pero min ttzuy tiib tiˈ tyol, nuk nsbun tiib, bix mintiiˈ tajbel tocslabl. ²⁷ Chi elela baˈn tuj twitz Kman Dios ka ma chi onena cyiˈj neeˈ mebe bix cyiˈj xuuj viuda oj n‑oc pena cyiˈj, bix ka ma cytzuy cyiiba twitz il tzalu twitz txˈotxˈ.

Min‑al jun xjal mas nintzaj twitz juntl

2  Key ocslal, tuj cyocslabla tiˈj jawnex Kaaw Jesucristo, miˈn txiˈ cyximana cyiˈj xjal ka at jun mas nintzaj twitz juntl. ² Ka ma tzˈocx jun xjal cyxola tuj tja Dios, bix tcub t‑xmulkˈab te oro, bix toc tbanel t‑xbalen tiˈj, bix jax juˈx ka ma tzˈocx jun xjal mebe bix toc t‑xbalen ttxˈakan, ³ miˈn tzˈoc cykˈoˈna mas tajbel jxjal kˈinawe. Ka ma txiˈ cykbaˈna tej xjal toc t‑xbalen wiˈyel tiˈj: “Kequey tzalu tuj jun kˈukbil tbanelxix,” bix ka ma txiˈ cykbaˈna tej xjal mebe: “Kequey tzalu twitz txˈotxˈ, bix ka weˈqˈuey jatzewe cyiˈjxe xjal,” ka ma bint cyuˈna juˈwa, ⁴ yaaˈntzen junx taˈ cycˈuˈja cyiˈ xjal cyxola. Matzen tzˈoc cykˈon cyiiba tisen ke juez nuk cyaj tuˈn cyajben cyej xjal nintzaj, tuˈn cycaman pwak. Yaaˈntzen tumel cyuˈna. ⁵ Key ocslal n‑oc cyakˈa weya, cˈoquel cycwenta tiˈj nyola. Kej xjal mebe tuj cywitz xjal te twitz txˈotxˈ, ma jaw tscyˈoˈn Dios tuˈn cyoc te kˈina, cuma tuˈnj cyocslabl ckˈojel cye tuˈn cyoc tuj tcawbil Dios, tisen ma cyaj tkbaˈn Dios te cye kej xjal n‑oc takˈ Dios cye. ⁶ Pero cyey, nuk n‑el cyiiqˈuena kej xjal mebe. ¿Pero alcye kej xjal nchi binchan kaˈ cyiˈja? ¿Yaaˈmpatzen ejeeˈx kej xjal kˈina? ¿Yaaˈmpatzen cyuˈn kˈina tuˈn cycambil n‑el cyiiˈn tikˈch cyey tuj juzgado? ⁷ ¿Yaaˈmpatzen jax kej kˈina nchi xmucchan tiˈj jawnex tbi Jesús, jxjal Cyaawa?

⁸ Pero ka ma tzˈoc cyakˈ ke cyuyey cyey tisenj n‑oc cyakˈ cyiiba cyey, baˈntzen tzin cybinchaˈna, cuma nintzaj ja ley lu tuj jawnex tley Dios. ⁹ Pero ka ma txiˈ cyyeecˈana mas nimbil cyej xjal kˈina cywitzj xjal mebe, attzen cyila, bix nchicˈajax min txiˈ cybiˈna tley Dios. ¹⁰ Ka at jun xjal ma txiˈ tbiˈn cykilca tley Dios, pero ma tzpet tuj jun mandamyent te ley, amale nuket jun mandamyent, ya ma cub tzˈak tuj cykilca ley. ¹¹ Ktzkiˈn juˈ tten, cuma e tkba Dios tuˈn miˈn cyaj cycyeˈyena cyxuˈla tuˈn juntl xuuj, bix jax Dios e kbante tuˈn miˈn tzˈoc cybyoˈna xjal. Juˈ tzunj, ka ma tzˈoc cybyoˈna jun xjal, amale mint chi wutana tuya juntl xuuj yaaˈn cyxuˈla, pero ma bint il cyuˈna, cuma min ma cynima cykilca yol kˈoˈn tuˈn Dios.

¹² Chi yolena tuya tkˈakˈbil cycˈuˈja cyiˈ xjal, bix cybinchama baˈn cye xjal, cuma oj toc tcyeˈyen Dios ejeeˈy ka ma bint baˈn cyuˈna bix ka min, cmloltzen ejeeˈy tiiˈnkey tiˈ ley tzin tkbaˈn cˈoquel kkˈoˈn lastim cye xjal. ¹³ Ka mintiiˈ lastim cyuˈna cye xjal, jax mintiiˈ lastim tkˈaˈ Dios cyey oj cyoca tuj xkel twitzxin. Pero ka ma tzaj kˈakˈen cycˈuˈja cyiˈ juntl, tzul kˈakˈan tcˈuˈj Dios cyiˈja oj cypona twitzxin.

Ka at jun xjal tzin tkbaˈn at tocslabl tiˈ Dios, pero ka mintiiˈ n‑oc tonen juntl, mintiiˈ tajbelel tocslabl

¹⁴ Key ocslal, cxeˈl nkanena cyey, ka at jun xjal tzin tkbaˈn at tocslabl tiˈ Dios, pero ka mintiiˈ tonbil nbint tuˈn tiˈ juntl, ¿titzen tajbel tocslabl? ¿Jacˈapa clet ka min tzˈajben tocslabl? ¹⁵ Cxeˈl nkanena cyey, ka at jun ocslal cyxola mintiiˈ t‑xbalen bix mintiiˈ twa, ¹⁶ bix ka ma txiˈ cykbaˈna te: “Tenxita tuj ttz̈yal. Cutz̈it ka ma cnet t‑xbalena bix tway tuˈna,” ka tz̈ikey te, pero mintiiˈ onbil ma txiˈ cykˈoˈna te, ¿ti tajbel cyyola te? ¹⁷ Juˈ tzunj, min tzˈajben kocslabl ka nuk nko yolen at kocslabl pero min ma txiˈ kyeecˈan ka at‑xix kocslabl tuˈnj baˈn tzin kbinchaˈn.

¹⁸ Pero kape at jun cyxola nbaj tcˈuˈj tiˈj ja yol luwe, bix nxiˈ tkbaˈn cyjulu: “At caˈba wik ocslal. At juun at nim cyocslabl, bix at juuntl at nim cybinchben baˈn,” tz̈i tzunj xjal yaaˈn jax tuˈn. Pero cxeˈl nkbaˈna te, ka mintiiˈ tbinchben baˈn jun xjal, mintzentiiˈ tyecˈbil ka at tocslabl tiˈ Dios. Pero ka baˈn nbint tuˈn, nyeecˈantzen at tocslabl tiˈ Dios. ¹⁹ Nchi ocslana junx Dios at, bix baˈn ja lu. Pero cˈoquel cycˈuˈja tiˈj jax juˈx ke biman ocslaˈn cyuˈn junx Dios at. Pero min tzˈajben cyocslabl, cuma min nchi binchan baˈn bix juˈ tzunj nuk nchi luˈlen tuˈn ttz̈i cyiˈj.

²⁰ Key xjal min tzˈel cyniˈya tiˈj, min tzˈajben cyocslabla ka mintiiˈ baˈn nbint cyuˈna. ²¹ Cˈoquel cycˈuˈja tiˈ kxeˈchel Abraham. ¿Mimpa e tyeecˈaxin ka jiquenxin twitz Dios tuˈnj tbinchbenxin? E tbixin tajbil Dios. At jun maj e xiˈ toyenxin tcwalxin Isaac te Dios twiˈ altar, tisen e tkba Dios. ²² Tzinenxsen taˈ junx eteˈ tbinchbenxin tuya tocslablxin, bix tuˈnj e bint tuˈnxin, e tyeecˈaxin tocslablxin tzˈaklxix. ²³ Juˈtzen e japan baj Dios tiˈj tyol tzin tkbaˈn cyjulu: “Oc ke tcˈuˈj Abraham tiˈ Dios, bix juˈ tzunj e tzaj kˈoˈn te Abraham tuˈn jiquen taˈ tuj twitz Dios,” tz̈i tyol Dios. Bix cuma e tbincha Abraham j‑e tkba Dios, juˈ tzunj oc tkˈoˈn Dios jaxin te tuya Diosxin.

²⁴ Juˈ tzunj, key hermano, il tiˈj qˈuelel cyniˈya tiˈj ka jiquen eteˈy twitz Dios ka at yecˈbil te cyocslabla tuˈnj cybinchbena, bix yaaˈn nuk tuˈnj cyocslabla bix ka mintiiˈ cyakˈbila ma bint. ²⁵ Juˈ e cyjaˈ jxuj xuuj Rahab aj paj jiquen twitz Dios jatxe ootxa. E tyeecˈaxuj at tocslablxuj tiˈ Dios tej eˈwen ke tsanjel Dios tuˈnxuj tuj tjaxuj, bix e tzaj tonenxuj ejeeˈxin tuˈn cyel okxin, tuˈn tcoˈpantexuj ejeeˈxin twitz cawel tuj tnom te Jericó. ²⁶ Cytzkiˈna cyimne taˈ jun xjal mintiiˈtl t‑xew. Jaxsen juˈx cyocslabla, cyimne taˈ ka mintiiˈ baˈn ma bint cyuˈna.

Kej yol n‑etz tuj ktzi

3  Key ocslal, ka yaaˈn baˈn cytena, miˈn txiˈ cyxnakˈtzaˈna juntl, cuma ka yaaˈn junx taˈ kxnakˈtzbil tuya kbinchben, mastzen ctzaal tkˈoˈn Dios kcastiwa cywitz niyˈtl xjal.

² Tzinen taˈ cykilca koˈ at kil. Bix mas nko binchan il tuˈn kyol twitzj tuˈnj kˈiˈn tuˈn cykilcatl kxumlal. Ka at jun xjal min tzpet tiˈ tyol n‑etz tuj ttzi, jatzen xjalja tzˈaklxix, bix yaaˈn cyiw tuˈn t‑xcye tibaj cykil t‑xumlal, tuˈn miˈn bint kaˈ tuˈn. ³ Cycyeyenc kej tz̈ej. Oj njax jun xjal tibajjil, nxcyexin tiˈjjil nuk tuˈnj xcbil tocx tuj ttzijil. Tuˈnj xcbil tocx tuj ttzi tz̈ej, ncawentzen tiˈ cykil t‑xumlaljil. ⁴ Jax juˈx jun barc. Amale ma tijet, bix amale cyiwet jcykˈiˈk n‑oc tiˈj, pero nxcye jun xjal tiˈ barc tuˈn jun niyˈ nuˈẍ timón. Il tiˈj cxeˈl barc jaaˈ taj xjal tuˈn t‑xiˈ tiiˈn. ⁵ Juˈtzen tten ktzi. Tal nuˈẍ twitz kxumlal, pero nim nbint tuˈn, tisen jun kˈakˈ nuk chˈin njaw itzˈj nbaj tzˈeyˈ cykilca tzeeˈ twiˈ jun witz tuˈn. ⁶ Nim kaˈ nbint tuˈn chˈin kˈakˈ, bix jax juˈx ktzi. Nim kaˈ nbint tuˈn. Biˈxsen nxiˈ kxumlal tuj il tuˈnj nbint tuˈn ktzi, cuma tuˈn kyol ntzpet cykilca kxumlal. Jkaˈ nbint tuˈn, tuya taaw il ntzaaˈ. ⁷ Cykilca wik alimaj, cykilca wik chˈit, cykilca wik lbaj, bix cykilca wik quis̈, tjakˈtzen cycawbil xjal eteˈ. ⁸ Pero kej yol nchi etz tuj cytzi xjal, mintzen‑al baˈn tcawen tibaj. Tcyˈi ktzi tniman ejooˈ. Tisen n‑ocx veneno tuj kchuˈl tuˈn kxiˈ tuj il tuˈn, jax najben kyol tuˈn t‑xiˈ cytzalajebl cabtl tuj il tuˈn. ⁹ Amale najbent ktzi tuˈn tjaw knimsaˈn tbi Kman Dios, pero tuˈnx ktzi nko sbun xjal o cub bint tisenx te Dios. ¹⁰ Tujx ktzi n‑etza yol kaˈ. Key ocslal, yaaˈn tumel jlu. ¹¹ Nxiˈ nkanena cyey, ¿njatzpa aˈ tz̈iˈ bix aˈ yaaˈn tz̈iˈ tuj junx twiˈ aˈ? ¹² Key ocslal, ¿jacˈapa bint tuˈn tel twitz olivo tiˈj jun tzeeˈ higo? ¿Bix jacˈapa bint tuˈn tel twitz higo tiˈj jun wiˈ uva? Mlay. Bix jax juˈx tuj junx twiˈ aˈ mlay jatz aˈ cˈa bix aˈ tz̈iˈ. Juˈ tzunj, miˈn tzˈajben cytziy tuˈn tyolen kaˈ tuya baˈn.

Jun knaabl ntzaj tkˈoˈn Dios

¹³ ¿Atpa ocslal cyxola at cynaabl bix n‑el cyniyˈ tiˈj? Tuˈn tel cyniˈya tiˈj ka at cynaabl, cycyeˈyenxa ka nxiˈ cyiiˈn jun cychunkˈlal baˈn. Ka nchi yeecˈan tuˈnj cybinchben ka maanske, attzen cynaabl. ¹⁴ Pero ka nchiˈlec cycˈuˈja cyiˈ juntl bix ka nuk nchi jyona cyexa cyajbila bix njaw cyniman cyiiba, miˈn txiˈ cykbaˈna at cynaabla, cuma nuk nchi ẍtakˈena. ¹⁵ Oj nbint tuˈn jun xjal juˈwa, ja tnaabl lu yaaˈn te Dios, sino te twitz txˈotxˈ. Nuk n‑oc lpe ja xjal lu tiˈj tajbil t‑xumlal. Tisen cynaabl biman tnaabl, ¹⁶ cuma jaaˈj nchiˈlec cycˈuˈj xjal cyiˈ juntl bix jaaˈj nuk nchi jyon cyex cyajbil, yaaˈntzen eteˈ xjal tuj tumel, bix nuk nchi binchan cykilca kaˈ. ¹⁷ Pero jxjal at tnaabl ntzaj tkˈoˈn Dios, jatzen xjalja sak taˈ tanem, bix n‑oc tipen tiˈj tuˈn tten tuj ttz̈yal cyuya xjal, bix nyeecˈan jun tanem baˈn cywitz xjal, bix nxiˈ tbiˈn cyyol juntl, bix n‑oc tkˈoˈn lastim cye xjal. At baˈn tbinchben, bix yaaˈn caˈba twiˈ tanem, bix yaaˈn xmeletzˈ. ¹⁸ Kej xjal at cynaabl, tuj ttz̈yal bix tuj tumelxix n‑oc cyipen tiˈj tuˈn t‑xiˈ cyiiˈn cychunkˈlal juntl xjal jiquen.

Yaaˈn baˈn tuˈn kxiˈ lpe tiˈj tikˈch at twitz txˈotxˈ

4  ¿Tikentzen n‑el cyiiqˈuen cyiiba bix nchi kˈojla? At kˈoj cyxola tuˈn tlaj cyexa cyajbila. Jtaj cynaabla aj il nkˈojl tiˈj cynaabla ma tzaj tkˈoˈn Dios. ² N‑oc cykˈaˈbena tikˈch cye cyuyey, pero min ncnet cyuˈna. Ncub cybyoˈna xjal, bix nuk nchi jyona cyexa cyajbila, pero min ncnet cyuˈna. Nchiˈlec cycˈuˈja cyiˈ juntl, bix at nim kˈoj cyxola. N‑oc cyipena tiˈj tuˈn tcnet cyuˈnxa, pero min txiˈ cykanena te Dios. Juˈ tzunj, mintiiˈ ma kˈoj cyey tuˈn. ³ Oj nchi naˈna Dios, min txiˈ cykanena texin ti tten tuˈn cyajbena texin. Nuk nchi kˈumena texin ti cyaja. Juˈ tzunj, mintiiˈ ma kˈoj cyey. ⁴ Oj cyaja nuk cyexa cyajbila bix yaaˈnj te Dios, juˈ key tisen jun xuuj at tchmil pero nxiˈ ttziyan juntl xinak. ¿Mimpa tzˈel cyniˈya tiˈj ka ma pon cycˈuˈja nuk tiˈj tikˈch at twitz txˈotxˈ, nchi kˈojl tzuna tiˈ Dios? Juˈ tzunj, alcyej xjal taj tuˈn t‑xiˈ lpe tiˈj tikˈch at twitz txˈotxˈ, n‑oc tkˈon tiib te aj kˈoj tiˈ Dios. ⁵ ¿Ti toc cyuˈna? ¿Nukpa tajx nbyan tuj tyol Dios nim taj Dios tuˈn kten nuk te texin? Min. E bint koˈ tuˈnxin te texin. ⁶ Bix at mas tipemal Dios twitzj tipemal knaabl aj il, bix taj Dios ko tzaj tonen. Juˈ tzunj, tzin tkbaˈn tyol Dios cyjulu: “At tkˈoj Dios cyiˈj ke xjal nuk nbaj cyniman cyiib, pero kej xjal n‑oc cykˈon cyiib te chˈin, tzin tkˈoˈn Dios t‑xtalbil cye,” tz̈i tyol Dios.

⁷ Juˈ tzunj, miˈn chi nimana tajbil taaw il, sino cykˈonx cyiiba tjakˈ tcawbil Dios. Ka ma chi weˈxixa twitz taaw il, qˈueleltzen lkˈe cyiˈja. ⁸ Ka ma chi tzaj lkˈey tiˈ Dios, jax ctzaal lkˈe cyuyey. Key ma chi binchan il, miˈn tzˈajbentl cykˈaba tuˈn tbint mas kaˈ tuˈn. Bix key at caˈba twiˈ cyanem, miˈn cheˈx lpey tiˈj tikˈch at twitz txˈotxˈ. Cytxjoma cyanema. ⁹ Tuˈn t‑xiˈ cyyeecˈana ka ma cyaj cykˈoˈna kaˈ, chi bisena bix chi okˈa. Tzˈocxit cytzebla te cyookˈbila bix cytzalajebla te bisbajil. ¹⁰ Ka ma tzˈoc cykˈon cyiiba te chˈin twitz Dios, ctzaaltzen tkˈoˈnxin cyey tuˈn cyoca te nim.

Yaaˈn baˈn tuˈn kyole kaˈ tiˈ juntl ocslal

¹¹ Key ocslal, miˈn chi yolena kaˈ tiˈ juntl ocslal cyxola. Ka ma chi yolena kaˈ tiˈj juntl ocslal, nchi kˈojl tzuna tiˈj jtzin tkbaˈn ley, bix juˈ tzunj tzin cykbaˈna at mas cynaabla twitz ley. Ka ma chi iˈya tibaj ley juˈwa, yaaˈntzen eteˈy tjakˈ tley Dios, sino ma chi oca kˈolte ley tisen Dios. ¹² Pero junx Kˈolte ley at, bix jaxin kbalte ka baˈn bix ka kaˈ ma bint tuˈn jun xjal. Yaaˈn ejeeˈy chi kbalte alcye kej xjal chi cletel bix alcye kej xjal chi xeˈl tuj kˈakˈ, sino jaxin.

Miˈn ko bisen tiˈj ti pjel nchiˈj

¹³ Jaˈlewe at jun tumel cxeˈl nkbaˈna cyej xjal cyxola min nchi ximan tiˈ Dios. Tzin cykbaˈn cyjulu: “Jaˈlewe bix ka nchiˈj ko xeˈl tuj jun tnom. Ko temel jun jnabkˈi tuˈn kqˈueyen bix tuˈn kcaman nim pwak,” tz̈ike. ¹⁴ Pero mintiiˈ tumel cyuyey ti pjel tuj cychunkˈlala nchiˈj. Jkchunkˈlal tisen chˈin muj tuj nuk jun rato n‑el naj. ¹⁵ Mas baˈn tuˈn cykbantiya cyjulu: “Ka ma tzaj tkˈoˈntl Dios kchunkˈlal, ckbinchaˈtzen jlu bix ka jaj lu,” tz̈i cybela. ¹⁶ Pero jaˈlewe, min txiˈ cykbaˈna juˈwa, sino ncub cynicˈuˈna cychunkˈlala bix min txiˈ cyxiˈmana tiˈj ka ma tzaj tkˈoˈn Dios cykˈija. Pero yaaˈn baˈn njaw cyniman cyiiba. ¹⁷ Juˈ tzunj, n‑el cyniˈya tiˈj alcyej baˈn tuˈn tbint cyuˈna, bix ka min ma bint cyuˈna, attzen cyila tiˈj.

Jaj jun tkˈoj Dios cwel cyibaj xjal kˈine ka miˈn nxiˈ cybiˈn tyol Dios

5  Jaˈlewe at jun nyola te cyej xjal nuk ma tzˈoc cykˈon cyiib tuˈn tchmet cykˈinemal. Chi ookˈela bix chi s̈‑ila, cuma cwel tkˈoj Dios cyibaja. ² Pjel cykˈinemala bix cyxbalena tbanel, tisen tzunj oj nkˈey at cyey bix oj nbaj twaaˈn pocˈ cyxbalena. ³ Pjel cypwaka, tisen oj nbaj acumax jun xcbil. Bix oj tbaj cypwaka, cˈajbeltzen jlu te jun yecˈbil jax juˈx cyey chi pjela, cuma chi xeˈla tuj kˈakˈ. Cyuj kˈij jaˈlewe te ja mitknaˈx tul meltzˈaj Kaaw, nuk oˈcx n‑oc tilel cyuˈna tuˈn tchmet cykˈinemala. ⁴ Jeyˈ, ¿ti min e xiˈ cykˈoˈna twiˈ cycˈuˈj kej akˈanal e jaw chmonte twitz cyawala? Nchi s̈‑in, bix tkˈajkˈajel cywiˈ ma canan tuj tẍquin Dios, ja Taaw cykilca. ⁵ Ma tzˈoc cykˈon cyiiba nuk tiˈj tuˈn tiyˈ cyninkˈija twitz txˈotxˈ bix tiˈj jawnexsen tbel cyway. Pero tisen jun wacẍ nwaaˈn bix ncub laaˈnexjil nuk tuˈn tcub byetjil tuˈn qˈuey chiˈpj, jax juˈx cyey, chˈixcˈa tul canan jkˈij tuˈn Dios tuˈn tcub tkˈoj cyibaja. ⁶ Kej xjal mintiiˈ cyil bix mlay bint tuˈn cycoˈpante cyiib cywitza, ma cheˈx cyiiˈna cywitz juez tuˈn cycub byet.

Il tiˈj tuˈn tten kpasensya bix tuˈn knaˈn Dios

⁷ Juˈ tzunj, key ocslal, ten cypasensyey. Tzul meltzˈaj Kaaw. Juˈ tzunj, cykˈoˈnc cyipena tiˈj tuˈn tiyˈx qˈuixcˈaj cyuˈna ojxe tulxin. Cˈoquel cycˈuˈja tiˈj jun awaal. At tpasensya tuˈn nayon alcye kˈij tuˈn tul canan ttzi jbalel, bix oj ttzaj jbal, nayontzen tiˈj jaatxˈen cˈajbel te te. ⁸ Jax juˈx cyey, ten cypasensyey, bix tuˈn tke cycˈuˈja, cuma cpomel kˈij tuˈn tul meltzˈaj Kaaw. ⁹ Ejeeˈy ocslal, miˈn chi yolena yaaˈn baˈn cyiˈ juntl cyxola, tuˈntzen miˈn cub castiwa cyibaja tuˈn Kaaw. Yaaˈn ja cyey cyaakˈena tuˈn cyoc xjal tuj xkelbil cywitza. Cpomel tej kˈij tuˈn tul Kaaw, bix oj tulxin, jaxin kbalte ka baˈn bix ka yaaˈn baˈn tbinchben cykilca juun ocslal. ¹⁰ Ejeeˈy ocslal, chi lpecˈa tiˈj yecˈbil e cyaj cykˈoˈn kej tyolel Dios te ootxa. Nim pena oc cyiˈjxin tuj cyaakˈenxin te t‑xel Dios, pero iyˈx cykilca cyuˈnxin tuya cypasensyaxin. ¹¹ Jeyˈ, cyˈiwlaˈn tuj kwitz kej xjal ma chi xcye oj n‑oc pena cyiˈj. N‑ul tuj cycˈuˈja jyecˈbil te ktzan kiyˈjil Job. Nimxsen qˈuixcˈaj iyˈ twitzxin, pero o cybiy ti e baj texin te mancˈbil. Nimxsen xtalbil e tzaj tkˈoˈn Kaaw texin, cuma n‑oc cyˈixbe tcˈuˈj Kaaw kiˈj, bix ntzaj tkˈoˈnxin lastim ke.

¹² Ejeeˈy ocslal, ilxsen tiˈj tuˈn cyyolena tuya jun cyyola jaxxix. Miˈn txiˈ cykbaˈna “tzkinn Dios” tuˈn tcywix cyyola. Miˈn txiˈ cykbaˈna “jax tuˈn Dios tuj cyaˈj” bix ka jax tuˈn juntl biybaj twitz txˈotxˈ, tuˈn tcywix cyyola. Ka oc, nuk oˈcx cykbay ka oc. Pero ka min, nuk oˈcx cykbay ka min. Cybinchama juˈwa, tuˈntzen miˈn cub castiwa cyibaja. ¹³ Pero ka ma tzˈoc qˈuixcˈaj cyiˈja, baˈntzen tuˈn ttzaj cynaˈna tbi Dios. Bix ka at cytzalajebla, baˈntzen tuˈn cybitzena.

¹⁴ Ka at jun yaab cyxola, baˈn tuˈn ttzaj ttxcoˈn kej nejenel cyxol ocslal, tuˈn tcub cykˈoˈn aseyt te olivo tibaj, bix tuˈn cynaˈn Dios tiˈj yaab, tuˈntzen tkˈanj tuˈn Kaaw. ¹⁵ Bix oj cynaˈn Dios tiˈ yaab, ka ma tzˈoc ke cycˈuˈj tiˈ Dios, ckˈanjeltzen tuˈn Kaaw, bix ka otk binchan il, cnajsetel til.

¹⁶ Cykbanx cyila cyxolxa, bix chi naˈna Dios cyiˈja cyxolxa, tuˈntzen cycyaja baˈn. Nimxsen nbaj oj nnaˈn jun xjal jiquen twitz Dios tuya cykil tcˈuˈj. ¹⁷ Cˈoquel cycˈuˈja tiˈj Elías, ja tyolel Dios te ootxa. Nuk xjalxin tisen ke. Pero e naˈn Dios tuya cykil tcˈuˈj tuˈn miˈn tzaj jbal tuj ttanem, bix mintiiˈ jbal e tzaj tuj oxe jnabkˈi tuya wukak xjaw. ¹⁸ Bix lwewa juntl maj e naˈn Dios, tuˈn ttzaj jbal. Bix e tzajtzen jbal, bix e takˈ txˈotxˈ twitz tawal.

¹⁹ Key ocslal, ka at jun cyxola ma cyaj tcyeˈyen jyol jaxxix, bix ka ma tzajtz meltzˈaj tuˈn tonbil juntl ocslal, ²⁰ tzˈelxix cyniˈya tiˈj jlu, oj ntzaj tonen jun ocslal juntl ocslal tuˈn tcyaj tkˈoˈn jbe yaaˈn baˈn, ccleteltzen ja ocslal binchal il lu twitz cyamecy te junx maj, bix cnajsetel cykilca til.

Oˈcx nyolja.