Chronological

Tumel tuˈn Pedro cye ocslal tuj Jerusalén

11  Tpontzen tpocbal tuj Judea ka otk cyiikˈ jxjal yaaˈn judío tyol Dios bix otk cybi xjal Dios, bixsen ke ocslal bixsen ke t‑xel Jesús twitz txˈotxˈ oc ebinte ja lu. ² Pero tej tpon meltzˈaj Pedro tuj Jerusalén, at cab ocslal judío e yolen tiˈ Pedro tiken otk tbinche xinj juˈwa. ³ Al tzun kej xjal oc ebin tej juˈwa, bix e xiˈ cykbaˈn te Pedro:

―¿Tikentzen e cyjaˈ ten tey tuj tja jun xjal yaaˈn judío, jun yaaˈn t‑xjal Dios? Yaaˈn tumel junx maj. Pero tey, e waaˈn tey cyuya xjal. Ttzkiˈn tzuna junxsen maj kaˈ kwaaˈn tuya jun xjal yaaˈn judío―tz̈itzen ke xjal.

⁴ Pero bix akˈ Pedro kbalxte tikˈch jilel bix tikˈch otk baj. Tz̈i tzunxin cyjulu:

⁵ ―Key taat, in tinwe tuj tnom te Jope. Jun kˈij nchin naˈn Dios, bix oc ncyeˈyen tisen tuj nwitziyˈ. E cuˈtz jun xbalen tisen jun sábana ma tij, ẍpoˈn cycyaal ttxˈuˈc, bix e cˈuˈl jaaˈj in tincˈa. ⁶ Tejtzen tcˈuˈl, bix ocxix ncyeˈyen, bix ocx ncyeˈyen tuj. At jil alimaj chˈit, lbaj, bix at juntl wikjil talen cˈul chyoljil, tuya kej jil kaˈ txiˈ cychyoˈn xjal judío. ⁷ Bix e nbi jun yol e tzaj tkbaˈn we: “Pedro, byom tzun kej alimaja, bix chyoˈnxke,” tz̈itzen Dios. ⁸ Pero bix aj ntzakˈbeˈn: “Nuksam xsuna, Taat. Bajxsen t‑xaˈ nwaaˈnwe waabj kaˈ txiˈ waaˈt te cyej xjal judío,” ntz̈i tzuna. ⁹ Pero bix e tzaj tkbaˈn jyol tuj cyaˈj juntl maj: “Waaˈnx, cuma tej o cub tbinchaˈn Dios jsak, yaaˈn kaˈte,” tz̈i tzunj yol we. ¹⁰ Oxe maj e yolen koˈya juˈwa. Yajtltzen bix e jax kˈiˈn xbalen cyuya alimaj juntl maj tuj cyaˈj. ¹¹ Cybintztzen. Te xsunj tpon baj jyol e cub kleeˈ tuj nwitza, bix e pon oxexin xjal jaaˈj taˈ kposadaya. Otktzen cheˈx chkˈet te txcolte weya tuˈntzen waajtz meltzˈaja cyuya tuj tnom te Cesarea. ¹² Bix e tzaj tkbaˈn Espíritu Santo weya tuˈn nxiˈya cyuya, bix tuˈn miˈn baj ncˈuˈja tiˈj yaaˈn judío ke xjal. Bix jax ejeeˈ tzunj wukak ocslal lu e xiˈ wuyena. Tej kpona, bix ocx koˈya tuj tja jxjal otk txconte weya. ¹³ Ja tzunj xin xjal Cornelio tbi. Bix e tzaj tkbaˈnxin keya ti tten tpon jlet jun tsanjel Dios tuj cyaˈj tjaxin. Otk tkba texin cyjulu: “Chkˈonx cabtl xjal tuj tnom te Jope te txcolte Simón, jaxj xin n‑oc te Pedro. ¹⁴ Ja tzunj xin Pedro kbalte tey bix cye te tjay tikˈch pjel cyey tuˈn cycoˈpja tuj cyila,” tz̈itzen tsanjel Dios te Cornelio. ¹⁵ Entonces bix in akˈ yolel cyuyaxin. Maatkxsen nchi yolenwe cyuyaxin, bix ul Espíritu Santo cyuyaxin, tisenx tten tul‑len ke kuya tuj tneel. ¹⁶ Tejtzen toc ncyeˈyen juˈwa, bix ul tuj ncˈuˈj kej tyol Kman Jesús otk tzaj tkbaˈn ke: “Jxin Juan Bautista e bautizaran xjal, pero cyey ccyiikˈey Espíritu Santo,” tz̈i Jesús ke jun maj―tz̈i Pedro.

¹⁷ ―Key taat o cyiikˈ cyexin Jesús te Cyaawxin, bix te Scyˈoˈn tuˈn Dios, tisenxj kewa. Bix juˈ tzunj o txaˈ tkˈoˈn Dios Espíritu Santo cyexin. Katzen ma txiˈ tkˈoˈn Dios cye xjal tisenxj ke, ¿titzen jilel ken weya tuˈn woc meltzˈaja tiˈ Dios?―tz̈i Pedro cyej xjal min e cycuya tuˈn cyocx xjal yaaˈn judío te ocslal.

¹⁸ Tejtzen toc cybiˈn xjal tyol Pedro, bixsen e baj twiˈ cyyol xjal, bixsen akˈ ke xjal tzalajel tiˈ Dios, bix e jaw yolen ke xjal:

―¡Axsen tbanel! Yaaˈn nuk keca, sino tuyaxe te cyej xjal yaaˈn judío ma txiˈ tkˈoˈn Dios xtalbil cyiˈjxin tuˈn cymeltzˈaj tuyaxin, tuˈn cycaman cychunkˈlal te junx maj―tz̈itzen ke xjal.

Kej ocslal tuj Antioquía

¹⁹ Cyuj tzunja tyem lu nimxsen ocslal najl cyuj juntl wik tnom tiˈjxe Jerusalén, cuma eteˈc xjal yajlalec cye ocslal tcyimlenxitl Esteban. Attzen cab ocslal ex ok tuj Jerusalén, bix e xiˈke tuj tnom te Fenicia bix tuj tnom te Antioquía, bix tuj txˈotxˈ te Chipre. Bix e cub ten ke xjal pocbal tyol Dios jaaˈ e ponake, pero nuk cyej xjal judío. ²⁰ Pero tuj tzunj txˈotxˈ te Chipre bix tuj tnom te Cirene attzen cab ocslal, bix e ponkexin tuj tnom te Antioquía. Bix akˈkexin pocbal tbanel tpocbal Jesús cye xjal yaaˈn judío. ²¹ O txiˈ tkˈoˈn Dios nim cyipemalxin, cuma nimxsen xjal yaaˈn judío e cyaj cykˈoˈn cycostumbre nuk tiˈj Jesús. ²² Bix e pon tpocbal cyxol ocslal tuj Jerusalén ti nbaj tuj Chipre bix tuj Cirene, bix at acˈaj ocslal tuj tnom te Antioquía. Bixsen e xiˈ cychkˈoˈn ocslal jxin Bernabé maan Antioquía te cyeyˈlte. ²³ Tejtzen tpon Bernabé Antioquía, tuyatzen cycaˈbel tbakˈ twitzxin toc tcyeˈyenxin txolen tcoˈpante Dios kej xjal yaaˈn judío, yaaˈn nuk ejeeˈcˈacye judío. Juˈ tzunj e jawxsen tzalajxin, bix akˈxin ocsalec cycˈuˈj xjal tuˈn miˈn cyaj cykˈoˈn tbe Jesús. ²⁴ Bix e ke tcˈuˈj Bernabé tiˈj ti nbaj, cuma jun baˈn xjal xsunxin. Ebil tyol Espíritu Santoxin, bix kˈuklecxsen tcˈuˈjxin tiˈ Dios. Bix tuˈn tzunj tpomlen Bernabé cyuya xjal, nimxsen xjal ocslan.

²⁵ Bix etz Bernabé tuj tnom te Antioquía, bix e xiˈxin tiˈjxe tnom te Tarso te jyolte Saulo, cuma jatza najla xina. ²⁶ Tejtzen tcnet‑xin, bix e xiˈ tiiˈn Bernabé jaxin tuj Antioquía. Jun jnabkˈi e tenkexin cyuya ke acˈaj ocslal tuj Antioquía bix nim e yeecˈankexin tyol Dios te nim xjal. Tujtzen Antioquía oca cybiˈn xjal tneel maj te “Cristiano,” jatzen elpeninaj ke lepch tiˈ t‑xnakˈatz Scyˈoˈn tuˈn Dios.

²⁷ Maatkxsen at Bernabé tuya Saulo tuj tnom te Antioquía, cypon cabxin tyolel Dios otk tzajxe Jerusalén. Nchi yolen tzunxin ke yol Espíritu Santo otk takˈ cyexin. ²⁸ Jun tzunxin baˈn yolen tuˈn Espíritu Santo Agabo tbixin. Bix e cub weˈ Agabo cyxol ocslal, bix e cub tenxin kbalte ka tul‑lel jun tij weyaj tuj txˈotxˈ, bixsen qˈuiyel aˈ cycˈuˈj xjal ocslal tuj txˈotxˈ te Judea. Bix e bajx ja weyaja tej tocx Claudio te nin cawel tibaj cykil twitz txˈotxˈ.

Juˈtzen tten tyol Agabo.

²⁹ Tejtzen toc ebin tyol Agabo, bixsen e cub cyniqˈuen ocslal tiˈj tuˈn t‑xiˈ cysmaˈnxin chˈin onbil cye xjal ocslal tuj txˈotxˈ te Judea, laˈ jniyˈ chˈin baˈn tkˈonte xjal. ³⁰ Tejtzen tbaj cychmoˈnxin cykil onbil, bixsen aj cyokxenanxin tiˈ Bernabé tuya Saulo, tuˈn t‑xiˈ cykˈoˈnxin cye ke tij cyxol ocslal tuj Jerusalén tuj Judea.

Tej tcub byet Jacobo; yaˈtzete Pedro ocx kˈoˈn tuj tzeeˈ

12  Te tzun kej kˈij lu jatzen Herodes cawel cyibaj xjal judío. Ja tzunj xin Herodes, titzen tajaxin tuˈn toc onet‑xin cyuˈn niyˈtl cawel judío. Juˈ tzunj akˈxin yajlalecte cab xjal ocslal. ² Bix e ttzuyxin jxin Jacobo, ttzicy Juan, bix el txˈomet twiˈxin tuya espada.

³ Tejtzen toc tcyeˈyen Herodes axsen eˈla tuj cywitz judío, bix e ttzuyxin jxin t‑xel Jesús Pedro, bix ocxxin tuj tzeeˈ. Jatzen tocx xinj tuj tzeeˈ tej ninkˈij tej t‑xiˈ cywaaˈn xjal judío jun wik pan jawnex mintiiˈ tkˈanel ocx tuj tuˈn tjaw tz̈ˈiy. ⁴ Tujtzen tzeeˈ e cˈojleta Pedro tuˈn waklaaj soldado. Te cyaja paˈ elninakexin tuj tkiˈyen e cwaˈ tenkexin. Jatzen ttxolaj otk bint tuˈn Herodesj, tuˈn tetz Pedro tuj tzeeˈ tbajlenxitl jninkˈij, tuˈntzen tbyet‑xin.

⁵ Juˈtzen tten tocxlen Pedro tuj tzeeˈ. Maatkxsen tocxxin tuj tzeeˈ, nchi naˈntzen ocslal Dios tuˈn cykil cycˈuˈjxin tiˈ Pedro.

Tej ttzokpaj Pedro tuj tzeeˈ

⁶ Ex cabtl kˈij. Ya otktzen pon jmancˈbil koniyan tuˈn tetz tiiˈn Herodes jaxin tuˈn tocx keset tkulxin. Nwutantzen Pedro t‑xol caˈba soldado, cyẍpon cyiib tuya Pedro tuya cadena. Peˈnxitltzen tcwaˈ caˈbatl soldado te cˈojlal.

⁷ Tujxsen tej tul jlet jun tsanjel Dios tuj cyaˈj tuj tzeeˈ, bixsen e noj tunwen tuya tken luz. Bix ocx tcˈasen sanjel ja Pedro tiˈ t‑xuucˈxin tuˈn ttzaj cyˈisjxin, bix e xiˈ tkbaˈn:

―Weˈwey, Pedro. Nix tuˈna―tz̈i sanjel. Bix el tzˈak kej cadena ẍipbel tkˈabxin.

⁸ Bix e xiˈ tkbaˈn sanjel te Pedro:

―Ẍpoˈnc tcyˈitza, bix kˈoˈnc t‑xaaba―tz̈i sanjel.

Bix e tcuya Pedro, bix e xiˈ tkbaˈn Pedro mayˈtzen.

Bix e xiˈ tkbaˈn sanjel:

―Jaˈle tzuna kˈoˈnctzen tcapey. Lpetztzen wiˈj―tz̈itzen sanjel.

⁹ Entonces bix etz Pedro tuj tzeeˈ, bix oc lpexxin tiˈj sanjel. Pero min el tniyˈ Pedro tiˈj ka jaxj txolen tbint tuˈn Pedro. Eˈla tuj twitzxin nuk twitziyˈxin. ¹⁰ Tbajlenxitl tzunj juˈwa, ejeeˈ tzunj xin soldado cˈojlal jaaˈj tocxe Pedro tuj tzeeˈ, bix e ponkexin tiˈj tlemel jaaˈ junx maj xcbil toc te tuj be. Pero bix ocx jakpaj tjunalx, bix etzkexin, bix e xiˈ betkexin junx tuj jun be. Entonces bix e cyaj tkˈoˈn sanjel ja Pedro tjunalx. ¹¹ Te tzunj juˈwa, tel tniyˈ Pedro tiˈj ka jaxj, yaaˈn nuk witziyˈ, bix e xiˈ tbisenxin tiˈj:

―Ma tzˈel nniyˈ tiˈj jale Dios s‑aj smante jun tsanjel wiˈj tuˈn ntzokpaj tuj tkˈab Herodes bix tuj tikˈch jilelj tzin cyyoˈn xjal judío tuˈn toc cycyeˈyen―tz̈i Pedro.

¹² Tejtzen tel tniyˈ Pedro tiˈj ti nbaj, bix e xiˈxin tja junxuj xuuj María tbixuj. Ja tzunj xuj María ttxu junxin xjal Juan tbi, juntl tbixin Marcos. Tjatzen María nimxsen xjal ocslal cychmon cyiib te naˈl Dios tiˈ Pedro. ¹³ Tejtzen tponxin tja María, bix oc tcoˈnxin tlemel jaaˈ te twitz peˈn, bix eˈlal juntxin kˈopaj Rode tbitxin te cyeyˈlte al. ¹⁴ Pero tej tocx yolen Pedro, bix el tniyˈ Rode tiˈj tuj twiˈxin, pero tuˈn tzunj tjaw tzalajebltxin bix el tuj tcˈuˈjtxin tuˈn tocx tjkoˈntxin tlemel jaaˈ, bix ocx ajkelentxin te kbalte cye cabtl xjal ka otk pon Pedro ttziˈyen. ¹⁵ Pero bix aj cytzakˈbeˈn jcabtl xjal te Rode:

―Male jaw tuj twiˈy―tz̈i tzunkexin.

Pero bix e xiˈ tkbaˈn Rode ka jax, pero yalx tej cabtl xjal min el jax tuj cywitz, bix juˈ toc cyuˈn cyjulu:

―Yaaˈnle Pedro. Ka yaaˈn ja tsanjel Dios cˈojlalte Pedro. Matzele tzul tisencˈax Pedro―tz̈itzen ke xjal.

¹⁶ Joocˈtzen, tocxte Pedro tcol ttziˈyen. Cwaxsen tocx jket ttziˈyen. Tejtzen toc cycyeˈyen jax Pedro, e jawxsen tzalajkexin, bix nimxsen e jaw kleeˈ ke xjal. ¹⁷ Pero bix e xiˈ tkˈoˈn Pedro jun techlal tuˈn miˈn chi kˈajt xjal, bix e xiˈ tkbaˈnxin ti tten tetz tiiˈn tsanjel Dios jaxin tuj tzeeˈ, bix e xiˈ tkbaˈnxin:

―Tiyla tzunj ma txiˈ nkbaˈn cyey, cykbanxsen te Jacobo, titzˈen Jesús, bix cye niyˈtl ocslal―tz̈i Pedro, bix iyˈxin tuj juntl lugar.

¹⁸ Tejtzen kskix, bixsen ul juntl cloj soldado te cˈojlalte Pedro. Nimxsen jun tzpetpajlenel e baj cyxol soldado, cuma mintiiˈ tumel cyuya ti e baj te Pedro. ¹⁹ Tejtzen tbintte rey Herodes, bix ex tchkˈoˈnxin xjal te jyolte Pedro. Tejtzen minx e cneta Pedro, bixsen e tzaj ttxcoˈnxin kej soldado e cub ten te cˈojlal Pedro. Tbajlen tkanenxitl tzunxin cab yol cye, bix e xiˈ tsmaˈnxin ejeeˈ tuj biybil. Tbajlen tzunj juˈwa, bix etz Herodes tuj ttxˈotxˈ Judea, bix e xiˈxin najal tuj tnom Cesarea tuj mlaj txˈotxˈ.

Tej tcyim Herodes

²⁰ Otkxsen tzaj kˈojl Herodes cyiˈj xjal najl tuj tnom te Tiro bixsen Sidón nchi cyaj tibajxe tnom te Cesarea. Juˈ tzunj, ya min e tcuyatlxin tuˈn t‑xiˈ cykˈoˈn t‑xjalxin triwa tuj Tiro bixsen tuj Sidón, amale nimet xjal najbente triwa. Entonces bix e xiˈ tsmaˈn Tiro bix Sidón cab xjal te tyolel tuj tnom te Cesarea, tuˈntzen cycaman xjal t‑xtalbil Herodes juntl maj. Cwa cycamanxin t‑xtalbil Blasto, junxin nintzaj t‑akˈanal cawel Herodes. Te tzunj xin oca cykanen xjal tuˈn tcub tuj ttz̈yal, cuma nchi ajben xjal waabj. ²¹ Bixsen e ttxoc Herodes ke cyyolel xjal te Tiro bix Sidón. Te tzunj kˈij tuˈn cypon xjal, bix oc nintzaj t‑xbalen Herodes, bixsen e cub kexin tuj tkˈaˈjxin te cawbil, bix e yolenxin cywitz xjal. ²² Tejtzen tpon baj tyolxin, bix akˈke xjal s̈‑il:

―Jaxxixsen te ja tyol Dios. Yaaˈn nuk jun xjal―tz̈i cys̈itz̈ˈbil xjal.

²³ Pero bix e tzaj tcˈuˈj Herodes cyibaj xjal tuˈn toclen cykbaˈn xjal texin ka Diosxin. Min e xiˈ tkˈoˈnxin chjonte te Dios. Juˈ tzunj, tujx naj tpon jun tsanjel Dios kˈolec jun tij tyabelxin. Lwewa e jaw jletkil ẍukˈ chyol texin, bix e cyimxin.

²⁴ Otkxsen baj ttzyuˈnxin ke ocslal, bix otkxsen chi baj tsiyˈpuˈnxin. Pero te Dios tyol, xiˈnax e xiˈ tz̈ˈiy, bix nimx xjal oc te ocslal.

²⁵ Yaltzen te Bernabé bix Saulo, e bint‑x cyexin cyaakˈen cyuˈn tej t‑xiˈ cyiiˈnxin cyonbil ocslal te Antioquía cye ocslal tuj Jerusalén, bix aj meltzˈajkexin tuj Jerusalén tuˈn cyponxin Antioquía juntl maj. E xiˈ cyiiˈnxin Juan cyuyaxin, juntl tbixin Marcos.