Chronological

Ja Jesús jbe tuya Dios

14  Tuˈn tcywix cycˈuˈj t‑xnakˈatz Jesús, e xiˈ tkbaˈnxin cyexin:

―Nim nchi bisena tiˈj ti pjel, pero miˈn tzaj ttz̈i cyiˈja. Cˈoquel ke cycˈuˈja tiˈ Dios bix jax juˈx wiˈja. ² Tuj tnajbil Nmana at nim lugar te cyey. Nuket mintiiˈ, matle txiˈ nkbaˈna cyey. Pero tneelxix, il tiˈj tuˈn nneja jkolte najbil cywitza. ³ Bix ka ma chin aja jkolte cynajbila, jax chin ul meltzˈaja juntl maj, bix cxeˈl nchmoˈna ejeeˈy, cuma waja tuˈn cytena junx wuyena. ⁴ Yal tzunj be ctzyetel wuˈna, n‑el cyniˈya tiˈj alcyej be―tz̈i Jesús cye t‑xnakˈatzxin.

⁵ E xiˈ tkbaˈn Tomás texin:

―Taat, min ktzkiˈna jaaˈ cxeˈley. ¿Titzen tten qˈuelel kniˈya tiˈj alcyej be ctzyetel tuˈna?―tz̈i Tomás.

⁶ Aj ttzakˈbeˈnxin:

―Inayen weja jbe. Inayen weja jjaxxix. Inayenja kˈol cychunkˈlala te junx maj. Nuk wuˈna at cyoclena tuˈn cypona tuya Nmana. ⁷ Nuket el cyniˈya tiˈj alcye kena bix alcyej il tiˈj tuˈn tbint wuˈna, jaxettzenle ma tzˈel cyniˈya tiˈj Nmana bix ti tajxin. Pero te jaˈlewe qˈuelel cyniˈya tiˈjxin, bix qˈuelel cyniˈya tiˈj ya ma cyila jaxin―tz̈ixin.

⁸ E xiˈ tkbaˈn Felipe texin:

―Taat, yeecˈantz Tmana keya, tuˈn toc kcyeˈyena. Oj toc kcyeˈyena jaxin, mintiiˈtl kaja―tz̈i Felipe.

⁹ E xiˈ tkbaˈn Jesús te Felipe:

―Nim kˈij ma chin tena cyuyey, Felipe. ¿Mimpanaˈx tel tniˈya tiˈj alcye kena? Ka ma tzˈoc cycyeˈyena inayena, jax ma tzˈoc cycyeˈyena Nmana, cuma inayen weja jyecˈbil ti tten Nmana. ¿Tikentzen ntzaj tkanena weya: “Yeecˈantz Tmana keya”? tz̈iy. ¹⁰ ¿Mimpa tocslay ka junx kena tuya Nmana bix junx taˈ Nmana wuyena? Kej yol nxiˈ nkbaˈna te cyey nxnakˈatza, yaaˈn wexwe nyol, sino tyol Nmana at wuyena. Bix jnbint wuˈna, yaaˈn tuˈn wexwe wipemal, sino tuˈn tipemal Nmana―tz̈i Jesús te Felipe.

¹¹ Bix e xiˈ tkbaˈntlxin cye t‑xnakˈatzxin:

―Cyocslama nyola ka junx kena tuya Nmana bix junx taˈ Nmana wuyena. Pero ka cycyˈiy tuˈn cyocslana wiˈja tuˈnj nyola, chi ocslana wiˈja tuˈn wipemala ma txiˈ nyeecˈana cyey. ¹² Jaxxix cxeˈl nkbaˈna cyey, ka ma tzˈoc ke cycˈuˈja wiˈja, j‑akˈuntl ma bint wuˈna tuya tipemal Nmana, jax cbinel cyuˈna. Bix jun akˈuntl mas jawnex minaˈx tbint wuˈna cbinel cyuˈna, cuma weya, chin aala tuya Nmana. ¹³ Bix oj waja, alcyej cxeˈl cykanena te Nmana, ka junx cykanbila tuya wajbila, cbinel wuˈna, cuma waja tuˈn tjaw nimset tbi Nmana tuˈnj nbint wuˈna, inayena Tcwal. ¹⁴ Jax wuˈna. Alcyej cxeˈl cykanena, ka junx cykanbila tuya wajbila, cbinel wuˈna.

Ctzaal tsmaˈn Dios Espíritu Santo

¹⁵ Ka ma tzˈoc wakˈa cyey, chi nimala nyola. ¹⁶ Bixsen cxeˈl nkanena te Nmana tuˈn ttzaj tsmaˈnxin juntl Onlte cyey. Ctzaal tsmaˈnxin, bix ctemel cyuyey te junx maj. ¹⁷ Ja Espíritu Santo ja tzunja Onlte cyey, bix cxeˈl t‑xnakˈtzaˈn alcyej jaxxix cyey. Pero kej xjal te twitz txˈotxˈ, mlay kˈoj Espíritu Santo cye, cuma cycyˈi jaxin, bix n‑el cyiiqˈuen jaxin. Pero cyey, cytzkiˈna jaxin, cuma at‑xin cyuyey. Bix mas yaj ctemelxin tuj cyanema. ¹⁸ Miˈn chi cyaja cyjunala.

Jax juˈx weya, chin ultla cyuyey. ¹⁹ Nuk chˈintl chin temela twitz txˈotxˈ, bix mlay chin oc cycyeˈyentl xjal te twitz txˈotxˈ. Pero cyey, chin oquel cycyeˈyena juntl maj oj njaw itzˈja tuj cyamecy. Bix cuma chin jawel itzˈja juntl maj, jax juˈx cyey, chi jawel itzˈja juntl maj. ²⁰ Bix oj njaw itzˈja tuj cyamecy, qˈuelel cyniˈya tiˈj ka junx kena tuya Nmana, bix junx kena cyuyey, bix junx eteˈy wuyena.

²¹ Ka ma tzˈoc cybiˈna nyola, n‑octzen wakˈa cyey. Bix ka ma tzˈoc wakˈa cyey, cˈoqueltzen cyakˈa te Nmana. Bix jax juˈx weya, cˈoquel cyakˈa weya, bix chin temela cyuyey tuˈnj Espíritu Santo―tz̈i Jesús.

²² Bix e xiˈ tkanen Judas texin, yaaˈn Judas Iscariote:

―Taat, ¿ti ma baj? Ka at tuˈn tcoˈpana ktanem, ¿tikentzen ctzaal tyeecˈan tiiba nuk kwitza, bix yaaˈn cywitz cykil xjal?―tz̈i Judas.

²³ Aj ttzakˈbeˈn Jesús:

―Mintiiˈ nmojbabla cyuyaj xjal cycyˈi tuˈn toc cybiˈn nyola. Alcye kej xjal ma tzˈoc wakˈa cye, n‑octzen cybiˈn nyola. Bix cˈoquel cyakˈ te Nmana, bix junx tuya Nmana ko temela cyuyaxin. ²⁴ Pero alcye kej xjal min tzˈoc wakˈa cye, jax miˈn tzˈoc cybiˈn nyola, bix miˈn chin tena cyuya. Kej yol lu ma txiˈ nkbaˈna cyey, yaaˈn wexwe nyola, sino tyol Nmana e tzaj tsmaˈn inayena.

²⁵ Tej ntena tzalu cyxola, nim nxnakˈtzbila ma cyaj nkˈoˈna cyuyey. ²⁶ Bix oj tul J‑onlte cyey, cxeˈl ttxˈolbaˈn cykilca te cyey, tuˈntzen tcyaj tuj tzinen jma txiˈ nxnakˈtzaˈna cyey. Ctzaal tsmaˈn Nmana Espíritu Santo te nxela, bix tuˈn tzul cykilca nyola tuj cycˈuˈja.

²⁷ Cxeˈl nkˈoˈna cyey tuˈn tten cyanema tuj ttz̈yal. Cyxol xjal te twitz txˈotxˈ, n‑oc cyipen tiˈj tuˈn cyten tuj txubtx, pero mintiiˈ jaaˈ tuˈn toc ke cycˈuˈj. Pero weya, tuya wipemala nxiˈ nkˈoˈna cyey tuˈn cycyaja tuj txubtx. Juˈ tzunj, miˈn baj cycˈuˈja. Miˈn tzaj ttz̈i ti pjel cyiˈja.

²⁸ Jatxe mayˈ xiˈ nkbaˈna cyey: “Chin xeˈla, bix chin ul meltzˈaja,” ntz̈iya. Nuket oc wakˈa cyey tuya cykil cycˈuˈja, matle chi jaw tzalaja tej xiˈ nkbaˈna chin xeˈla tuya Nmana, cuma te weya, jun nin xtalbil tuˈn ntena tuya Nmana, cuma mas jawnex Nmana nwitza. ²⁹ Ma txiˈ nkbaˈna cyey te mitknaˈx tbaj ti pjel wiˈja, tuˈntzen tcywix cyocslabla wiˈja oj tbaj.

³⁰ Yaaˈn nimtlxix chin yolela cyuyey, cuma chˈix tpon tumel tuˈn tul taaw il, jxjal ncawen tibaj twitz txˈotxˈ jaˈlewe. Taj tuˈn tpon baj nkˈija, pero mintiiˈ tipemal wibaja. ³¹ Pero amale minttiiˈ tipemal taaw twitz txˈotxˈ wibaja, pero chin oquela tjakˈ jctbincha wiˈja, tuˈn nnimana tyol Nmana, tuˈntzen tel cyniyˈ cykil xjal tiˈj n‑oc takˈ Nmana weya. Chi weˈwetzen cyey. Koˈtzen tzalu―tz̈i Jesús cye t‑xnakˈatzxin.

Ja Jesús tisen jun jaxxix tken loˈpj

15  Tej cyetz Jesús, e xiˈ tkbaˈntlxin cye t‑xnakˈatzxin:

―Cxeˈl nkbaˈna jun techel cyey. Inayena tisen jun jaxxix tken loˈpj te uva. Bix Nmana taaw tken uva. ² Bix ejeeˈy tisen kej tkˈab toc wiˈja. Kej tkˈab uva toc wiˈja, ka min ma cyakˈ twitz, qˈueleltzen ttxˈoman Nmana wiˈja. Pero kej tkˈab at twitz, qˈuelel tiiˈn Nmana ttzkijil cyiˈj, tuˈntzen toc mas twitz. ³ Ejeeˈy tisen kej tkˈab baˈn, cuma ma chi cyaja sak tuˈnj yol ma txiˈ nkbaˈna cyey. ⁴ Cykˈoˈnc cyipena tiˈj tuˈn cytena junx wuyena, tuˈntzen ntena junx cyuyey. Jun tkˈab loˈpj, ka yaaˈn toc tiˈ tken, mlay takˈ twitz. Bix jax juˈx cyey, mintiiˈ baˈn cbinel cyuˈna ka min ma chi cyaja junx wuyena. ⁵ Inayen weja tken uva. Cyey, tkˈab uvakey. Ka junx chi temela wuyena, tuˈntzen junx ntena cyuyey, nim cbinel cyuˈna. Pero ka ma chi eˈlkey wiˈja, mintiiˈ cbinel cyuˈna. ⁶ Alcyej xjal yaaˈn toc wiˈja, juˈtzen ctemela tisen jun tkˈab loˈpj ka min takˈ twitz. Nuk qˈuelex xeˈt tkˈab, bix ctzkiˈl. Bix cˈajbel nuk tuˈn tocx cykˈoˈn xjal tuj kˈakˈ, tuˈntzen tbaj tzˈeyˈ.

⁷ Ka junxkey wuyena, bix ka ma cyaj nyola tuj cyanema, alcyej ma txiˈ cykanena te Nmana, ctzaal tkˈoˈnxin cyey. ⁸ Oj t‑xiˈ cyyeecˈana ka ncheˈx lpey wiˈja tuˈnj nim cbinel cyuˈna, cjaweltzen nimset tbi Nmana. ⁹ Tisen ma tzˈoc wakˈa te Nmana, juˈxse weya, ma tzˈoc cyakˈa weya. Juˈ tzunj, miˈn chi eˈlkey tiˈj tkˈakˈbil ncˈuˈja cyiˈja. ¹⁰ Ka ma cybiy nyola, juˈtzen chi yeecˈala n‑oc wakˈa cyey, tisenx ma txiˈ nyeecˈana n‑oc takˈ Nmana weya tuˈnj e nbiya tyol.

¹¹ Ka ma tzˈoc cybiˈna kej yol lu ma txiˈ nkbaˈna cyey, chi tzalajela tisen weya nchin tzalaj. Waja tuˈn tten jun cytzalajebla jawnex.

¹² Cxeˈl nkˈoˈna juntl yol cyey. Cˈoquel cyakˈ cyuyey cyey, tisen ma tzˈoc cyakˈa weya. ¹³ Mlay txiˈ tyeecˈan jun xjal jun tkˈakˈbil tcˈuˈj mas jawnex twitzj tuˈn t‑xiˈ tkˈon tiib tuˈn tcyim, tuˈn tclet jun tuya tuˈn. ¹⁴ Cyey, wuyakey ka ma cybiy nyola. ¹⁵ Miˈn tzˈoc nkˈoˈntla cybiy nuk akˈanal, cuma min tzˈel tniyˈ jun akˈanal tiˈj ti niyˈ tuj tcˈuˈj tpatrón. Cˈoquel nkˈoˈntla cybiy wuyena, cuma cykilca ma tzaj tkbaˈn Nmana weya, ma txiˈ nkbaˈna cyey, tuˈntzen tel cyniˈya tiˈj ti niyˈ tuj tcˈuˈjxin. ¹⁶ Yaaˈn ejeeˈy e kbante tuˈn cyakˈanana junx wuyena, sino inayena e jaw scyˈonte cyey, bix ma txiˈ nkˈoˈna cyaakˈena, jaj tuˈn cyxiˈy kbalte cye xjal tuˈn cyocslan wiˈja. Jaj akˈuntl lu tisen jun awal mlay cub baj. Bix cuma ma txiˈ nkˈoˈna ja cyaakˈena lu, juˈ tzunj alcyej cxeˈl cykanena te Nmana, ctzaal tkˈoˈnxin cyey.

Qˈuelel cyiiqˈuen xjal kej ocslal

¹⁷ Juntl maj cxeˈl nkbaˈna cyey, tuˈn cybintey nyola, cˈoquel cyakˈ cyiiba cyey. ¹⁸ Kej xjal eteˈ tjakˈ tcawbil taaw twitz txˈotxˈ, qˈuelel cyiiqˈuen ejeeˈy. Bix oj cyel cyiiqˈuen ejeeˈy, qˈuelel cyniˈya tiˈj o tzˈel cyiiqˈuen inayena nejl cywitza. ¹⁹ Nuket junx cynaabla tuyaj cynaabl xjal te twitz txˈotxˈ, n‑oqueltzele cyakˈa cye, cuma junxseke cyuyey. Pero yaaˈn junx cynaabla tuya cynaabl xjal te twitz txˈotxˈ. Ma jaw nscyˈoˈnkey tuˈn tel cypaˈn cyiiba cyiˈj. Juˈ tzunj, qˈuelel cyiiqˈuen ejeeˈy. ²⁰ Cˈoquel cycˈuˈja tiˈj jun yol xiˈ nkbaˈna cyey nejl. Yaaˈn jun akˈanal mas jawnex twitzj tpatrón. Juˈ tzunj, ka ma chi kˈojl xjal wiˈja, jax chi kˈojlel cyiˈja. Pero jax at juun o cybi nyola. Jax juˈx cyey, at juun cˈoquel cybiˈn cyyola. ²¹ Kej xjal cycyˈi jweya nyol, chi yajlal cyiˈja nuk tuˈn tlaj lepcheckey wiˈja. Bix cycyˈi inayena cuma cycyˈi Dios e tzaj tsmaˈn inayena. ²² Kej xjal te twitz txˈotxˈ, nuket min in tzaja tuˈn t‑xiˈ nxnakˈtzaˈna alcye kena, minttzenle el cyxooˈn inayena. Pero in tzaja, bix juˈ tzunj mlaytl txiˈ cykbaˈn min tzˈel cyniyˈ tiˈj, cuma o tzˈoc cybiˈn nyola, bix cycyˈi. ²³ Alcyej ma tzˈel tiiqˈuen inayena, jax n‑el tiiqˈuen Nmana. ²⁴ Nuket min in tzaja cyxol xjal te twitz txˈotxˈ bix e xiˈ nyeecˈana wipemala, minttzenle e xiˈ cyxooˈn nyecˈbila. Min‑al juntl o binchan jma bint wuˈna cyxol. Pero amale e xiˈt cycyeˈyen nbinchbena, pero cycyˈi inayena. Tejtzen t‑xiˈ cycyeˈyen inayena, jax juˈx e xiˈ cycyeˈyen Nmana. Juˈ tzunj, tej tel cyiiqˈuen inayena, jax el cyiiqˈuen Nmana. ²⁵ Amale e cyilet wipemala, pero el cyxooˈn inayena. Juˈtzen ma tzˈel jax jun yol tzˈiˈben tuj ley te Dios e kˈoj cye. Tz̈i cyjulu: “Amale cˈoquelet cycyeˈyen wipemala, pero qˈuelel cyiiqˈuen inayena,” tz̈i tyol Dios.

²⁶ Cxeˈl nsmaˈna Onlte cyey. At tuya Nmana. Ja Espíritu Santo, bix juˈ ctzaal tuya Nmana. Jtaakˈen tuˈn tchicˈajax alcyej jaxxix. Oj tul, cˈakˈanaltzen tuj cyanem xjal tuˈn tcyaj tuj tzinen alcye kena. ²⁷ Jax juˈx cyey, chi kˈumela cye xjal wiˈja, cuma o chi tena wuyena jatxe tej wakˈa akˈanal―tz̈i Jesús cye t‑xnakˈatzxin.

16  Bix e xiˈ tkbaˈntl Jesús cye t‑xnakˈatzxin:

―Ma txiˈ nkbaˈna cyey qˈuelel cyiiqˈuen xjal ejeeˈy bix ma txiˈ nkbaˈna cyey tzul Espíritu Santo te onlte cyey, tuˈntzen miˈn cyaj cykˈoˈna cyocslabla wiˈja. ² Qˈueletz cylojoˈn xjal ejeeˈy cyuj camon jaaˈ te xnakˈtzbil tiˈ tyol Dios. Jax wuˈna, tzul jun kˈij cwel cybyoˈn xjal ejeeˈy cuma tuj cywitz nchi onen tiˈ Dios. ³ Cbinel cyuˈn juˈwa cuma cycyˈi tzˈel cyniyˈ tiˈj Nmana bix wiˈja. ⁴ Ma txiˈ nkbaˈna cykilcaj lu cyey, tuˈntzen tul nyola tuj cycˈuˈja oj tpon kˈij tuˈn cykˈojl xjal cyiˈja.

Taakˈen Espíritu Santo

Min e xiˈ nkbaˈna jtumel lu cyey nejl, cuma mitknaˈx tpon kˈij tuˈn waja. ⁵ Pero jaˈle chin xeˈla tuya Dios e tzaj tsmaˈn inayena. Pero jeyˈ, min‑al jun cyey ma tzaj tkanena weya: “¿Jaaˈ ma txaˈy?” ⁶ Min nchi bisena wiˈja, sino nuk nchi bisena ma noj tuj cyanema tuya bisbajil tuˈnj nyola cyey. ⁷ Pero jaxxix cxeˈl nkbaˈna cyey, mas baˈn te cyey tuˈn nxiˈya. Ka min ma chin aja, mlaytzen tzul Onel cyuyey. Pero ka ma chixa, ctzaaltzen nsmaˈna cyuyey. ⁸ Bix oj tul, cxeˈl tyeecˈan cye xjal te twitz txˈotxˈ at cyil, bix ti tten tuˈn t‑xiˈ cyiiˈn cychunkˈlal jiquen twitz Dios, bix cwel cycastiwa ka min ma chi oc jiquen twitz Dios. ⁹ At cyil, cuma min ma chi ocslan wiˈja. ¹⁰ Bix cuma chin pomela tuya Nmana, ya miˈn cyitla inayena. Pero cˈakˈanaltzen Onlte cyey te nxela tuˈn t‑xiˈ tyeecˈan cye xjal ti tten tuˈn t‑xiˈ cyiiˈn cychunkˈlal jiquen twitz Dios. ¹¹ Bix cuma o tkba Dios at tuˈn tcub tcastiwa taaw twitz txˈotxˈ, juˈ tzunj cxeˈl tyeecˈan Espíritu Santo cye xjal jax cwel cycastiwa cykilca aj il.

¹² At nimtl waja tuˈn t‑xiˈ nkbaˈna cyey, pero mlay chi camana tuˈn tel cyniˈya tiˈj jaˈlewe. ¹³ Pero n‑el tniyˈ Espíritu Santo tiˈj cykilca jaxxix, bix oj tul, cxeˈltzen tonen ejeeˈy, tuˈntzen tel cyniˈya tiˈj jaxxix yol. Yaaˈn tex tyol cxeˈl tkbaˈn, sino cxeˈl tkˈoˈn jyol ma tzaj tkbaˈn Nmana te. Bix cxeˈl tyeecˈan cyey ti pjel mas yaj. ¹⁴ Cjawel tnimsaˈn nbiˈya, cuma weya nyol cxeˈl ttxˈolbaˈn cyey, tuˈn tcyaj tuj tzinen cykilcaj ma txiˈ nkbaˈna cyey. ¹⁵ Junx nnaabla tuya tnaabl Nmana. Juˈ tzunj, tumel tuˈn t‑xiˈ nkbaˈna cyey cxeˈl ttxˈolbaˈn Espíritu Santo ti elpenina jma txiˈ nkbaˈna cyey, cuma junx taˈ nyola tuya tyol Nmana.

Jaj cybisa cˈoquel te tzalajebl

¹⁶ Nuk chˈintl chin temela cyuyey, bix mlay cyitla inayena. Pero tuj juntl rato cˈoquel cycyeˈyena inayena juntl maj―tz̈i Jesús cye t‑xnakˈatzxin.

¹⁷ Yal kej t‑xnakˈatzxin, cuma min el cyniyˈxin tiˈj tyolxin, juˈ tzunj at juun e xiˈ cykanenxin cyxolxxin:

―Yaaˈn telniyˈ kej yol lu ma tzaj tkbaˈn taat ke. ¿Tikentzen tzin tkbaˈnaxin juˈwa: “Nuk chˈintl chin temela cyuyey, bix mlay cyitla inayena. Pero tuj juntl rato cˈoquel cycyeˈyena inayena juntl maj,” tz̈ixin? ¿Bix tiken tzin tkbaˈnaxin juˈwa: “Chin pomela tuya Nmana,” tz̈ixin? ¹⁸ ¿Ti japenina ja yol “nuk chˈintl chin temela cyuyey”? ¿Ti tten tuˈn tel kniyˈ tiˈj tyolxin?―tz̈ikexin.

¹⁹ Eltzen tniyˈ Jesús tiˈj e cyajbe t‑xnakˈatzxin tuˈn t‑xiˈ cykanenxin texin tuˈn tcyaj tyolxin mas tuj tzinen. Juˈ tzunj, e xiˈ tkbaˈnxin cyexin:

―¿Tikentzen nchi kanena cyxola ti japenina nyola tej xiˈ nkbaˈna cyey: “Nuk chˈintl chin temela cyuyey, bix mlay cyitla inayena. Pero tuj juntl rato cˈoquel cycyeˈyena inayena juntl maj”? ²⁰ Jaxxix cxeˈl nkbaˈna cyey, tuj jun rato chi jawel ookˈa tuˈn ncyamecya, bix chi tzalajel kej xjal te twitz txˈotxˈ. Cnool cyanema tuya nim bisbajil, pero cˈoquel cybisa te tzalajebl. ²¹ Jbisbajil tzul cyiˈja tisen tchyonel tal jun xuuj. Oj tpon tumel tuˈn talenxuj, nbisenxuj, cuma nim qˈuixcˈaj qˈuiyel tuˈnxuj. Pero oj titzˈj talxuj, miˈntl tzul tuj tcˈuˈjxuj iyˈx qˈuixcˈaj tuˈnxuj, cuma ctzalajelxuj tiˈj ma tzˈitzˈj talxuj twitz txˈotxˈ. ²² Jax juˈx cyey, il tiˈj tuˈn tiyˈx qˈuixcˈaj cyuˈna jaˈlewe. Pero chi wilaˈya juntl maj, bix cnool cyanema tuya tzalajebl, bix min‑al qˈuelel tiiˈn cytzalajebla tuj cyanema. ²³ Tuj tzunj kˈij te cytzalajebla, qˈuelel cyniˈya tiˈj, bix mlay cykanetla weya ti japenina nyola.

Jaxxix cxeˈl nkbaˈna cyey, alcyej cxeˈl cykanena te Nmana, ctzaal tkˈoˈnxin cyey, ka junx taˈ cykanbila tuyaj wajbila. ²⁴ Nejl, min ma txiˈ cykanena texin tuya jun cynaabla junx taˈ tuya wajbila. Cykanenx, tuˈntzen tkˈontexin cykanbila, tuˈn tnoj cyanema tuya tzalajebl.

Jun yaaˈn baˈn at twitz txˈotxˈ ma cub tiˈj tuˈn Jesús

²⁵ Kej yol ma txiˈ nkbaˈna cyey, eˈwen chˈin taˈ. Pero tzul jun kˈij oj t‑xiˈ nkbaˈna cyey tujxix tzinen ti tten Nmana, bix qˈuelel cyniˈya tiˈjxin. ²⁶ Tuj tzunj kˈij oj tel cyniˈya tiˈj Nmana, cxeˈl cykanena wajbila te Nmana. Bix ctkˈaˈxin cykanbila, yaaˈn nuk cuma cxeˈl nkanena texin te cyxela, ²⁷ sino cuma jax texin at tkˈakˈbil tcˈuˈj cyiˈja. N‑oc cyakˈa texin cuma ma tzˈoc wakˈa cyey, bix ma chi ocslana tiˈj nyola ka tuya Dios in tzaja. ²⁸ In tzaja tuya Nmana, bix in ula twitz txˈotxˈ. Pero ya cyjel nkˈoˈna twitz txˈotxˈ, bix chin aala tuˈn npona tuya Nmana juntl maj―tz̈i Jesús cyexin.

²⁹ E xiˈ cykbaˈn t‑xnakˈatzxin texin:

―Jeyˈ, jaˈlewe nyolena tuj tzinen bix yaaˈn tuj ewjel. ³⁰ Bix ktzkiˈna at cykil tumel tuyey. N‑el tniˈya tiˈj ti niyˈ tuj cycˈuˈj xjal, tuˈntzen mintiiˈ il tiˈj tuˈn t‑xiˈ tkanena ti cyaj tuˈn tel cyniyˈ tiˈj. Juˈ tzunj, nxiˈ kocslaˈna ma tzaja tuya Dios―tz̈ikexin.

³¹ E xiˈ tkbaˈn Jesús cyexin:

―¿Jaxpa cyuˈna nchi ocslana wiˈja? ³² Jeyˈ, chˈixcˈa tpon hora tuˈn tcyaj cycyeˈyena inayena. Chi elel tz̈itja. Teeylex juun cyey cxeˈl tiiˈn tbe. Pero yaaˈn njunala chin cyjela, cuma at Nmana wuyena.

³³ Kej yol lu ma txiˈ nkbaˈna cyey tuˈn cyocslana wiˈja, tuˈntzen cytena tuj ttz̈yal. Twitz txˈotxˈ cˈoquel nim pena cyiˈja, pero miˈn baj cycˈuˈja, cuma inayena chin camal tibaj twitz txˈotxˈ―tz̈i Jesús cye t‑xnakˈatzxin.

Tej tnaˈn Jesús Dios cyiˈj t‑xnakˈatzxin

17  Tejtzen tbaj tkbaˈn Jesús cye t‑xnakˈatzxin, e jaw tcyeˈyen twitz cyaˈj, bix e xiˈ tkbaˈnxin te Tmanxin:

―Taat, ma pon hora tuˈn ncyima, inayena, Tcwala. Kˈontz weya tuˈn tbint ncyamecya wuˈna, tuˈntzen tjaw nimset tbiy tuˈnj ncyamecya. ² Chin tonentza tuˈn ncyima, cuma tuj ncwenta ma tzaj tkˈoˈna cykil xjal. Te weya ma tzaj tkˈoˈna j‑akˈuntl tuˈn t‑xiˈ nkˈoˈna cye xjal cychunkˈlal te junx maj, bix nuk wuˈna chi cletel kej xjal ma tzaj tkˈoˈna weya tuˈn t‑xiˈ nkˈoˈna cychunkˈlal. ³ At cychunkˈlal xjal te junx maj nuk tuˈnj cyocslabl tiˈj oˈcx jay jaxxix Dios bix wiˈja, inayena Jesucristo, jxjal ma tzaj tsmaˈna cyxol xjal. ⁴ Ma bint wuˈna j‑akˈuntl e tzaj tkˈoˈna weya tuˈn tbint twitz txˈotxˈ, bix tuˈnj jlu, ma jaw nnimsaˈna tbiy. ⁵ Bix cuma ma bint waakˈena twitz txˈotxˈ, juˈ tzunj kˈontz weya tuˈn woca te jawnex juntl maj, tisenx tej ntena tuj tneel tuyey tej mitknaˈx tbint twitz txˈotxˈ.

⁶ Yal kej xin nxnakˈatza etz tscyˈoˈna cyxol xjal tuj twitz txˈotxˈ, ma txiˈ nyeecˈana cyexin ti tten tnaabla. T‑xjalke xina, bix e tzaj tkˈoˈna ejeeˈ weya, bix ma chi ocslan tiˈ tyola. ⁷ Ma tzˈel cyniyˈxin tiˈj kej yol ma txiˈ nkbaˈna bix jwipemala ma txiˈ nyeecˈana tuyey e tzaaˈ. ⁸ Ma txiˈ nkbaˈna cyexin nuk jyol e tzaj tkˈoˈna weya, bix ma txiˈ cyocslaˈnxin, bix ma tzˈel cyniyˈxin tiˈj tuyey in tzaaˈya, bix jax tey e tzaj tsmaˈna inayena.

⁹ Chin cubsal nwitza tey nuk cyiˈj nxnakˈatza ma chi jaw tscyˈoˈna, cuma tey t‑xjalke xina. Yaaˈn cyiˈj xjal te twitz txˈotxˈ chin cubsal nwitza tey jaˈlewe. ¹⁰ Tey t‑xjalke xina, cuma cykilcaj xjal at te weya, jax at te tey. Jax cykilcaj xjal at te tey, attzen te weya. Bix cyuˈnj nchi ocslan wiˈja, ma jaw nimset nbiˈya.

¹¹ Taat, ma pon tumel tuˈn tcyaj nkˈoˈna twitz txˈotxˈ, tuˈn npona tuyey. Pero kej nxnakˈatza, chi cyjel tzalu twitz txˈotxˈ. O chi tzaj tkˈoˈn xina weya. Kˈontz tcˈojlabla cyexin, tuˈntzen junx ctemel cynaablxin, tisenx junx koˈ. ¹² Tej nbeta tzalu twitz txˈotxˈ cyuyaj nxnakˈatza e tzaj tkˈoˈna weya, e xiˈ nxnakˈtzaˈna cyexin tuˈn cyoc lpexin tiˈ tyola. Min‑al cyexin ma txiˈ tuj il. Nuk jaj xjal at tuˈn t‑xiˈ tuj castiwa ma tzˈoc tuj tkˈab il, tuˈntzen tel jax tyol Dios te ootxa.

¹³ Pero ya ma pon tumel tuˈn npona tuyey. Pero joocˈtzen nchin tena twitz txˈotxˈ, nchin cubsana nwitza tey cyiˈjxin. Kˈontz cyexin tuˈn tnoj cyanemxin tuya jun jawnex cytzalajeblxin, tisen at ntzalajebla. ¹⁴ Ma txiˈ nkˈoˈna tyola cyexin. Juˈ tzunj qˈuelel cyiiqˈuen kej xjal te twitz txˈotxˈ ejeeˈxin, cuma yaaˈn junx cynaablxin tuyaj cynaabl xjal te twitz txˈotxˈ, tisen weya yaaˈn junx nnaabla tuyaj cynaabl xjal te twitz txˈotxˈ. ¹⁵ Min chin cubsana nwitza tey tuˈn tetz tiiˈna ejeeˈxin cyxol kej xjal qˈuelel cyiiqˈuen ejeeˈxin, sino tuˈn tcˈojlana ejeeˈxin tuˈn miˈn chi cub tzˈakxin tuj tkˈab taaw il. ¹⁶ Yaaˈn junx cynaablxin tuyaj cynaabl xjal te twitz txˈotxˈ, tisenx weya yaaˈn junx nnaabla tuyaj cynaabl xjal te twitz txˈotxˈ. ¹⁷ Paˈmelkexin te tey, tuˈn cyajbenxin tuˈn cykˈumenxin jaxxix tyola, cuma nuk tey tyola jaxxix. ¹⁸ Tisenj tej ttzaj tsmaˈna inayena twitz txˈotxˈ tuˈn nkˈumena tyola, juˈx xsunj cxeˈl nsmaˈna ejeeˈxin cyxol cykilca xjal tuˈn cykˈumen jyol jaxxix. ¹⁹ Ma txiˈ nkˈon wiiba tuˈn tbint tajbila wuˈna, te jun techel cyexin ti tten tuˈn cyajbenxin tuya cykil cycˈuˈjxin tuj taakˈena.

²⁰ Taat, yaaˈn nuk cyiˈj nxnakˈatza cxeˈl ncubsaˈna nwitza tey, sino cyuyaj cykilca kej xjal chi ocslal wiˈja oj t‑xiˈ cykˈumenxin npocbala. ²¹ Nxiˈ ncubsaˈna nwitza tey tuˈn cyoc te junx cykilca kej xjal chi ocslal wiˈja. Taat Nmana, tisenx junx taˈy wuyena bix junx kena tuyey, chi ocxit junx cykilca ocslal tuˈnj chi oc junx kuya, cuma oj toc cycyeˈyen kej xjal yaaˈn ocslal ka junxke, qˈueleltzen jax tuj cywitz ma tzaj tsmaˈna inayena. ²² Tisenx ma tzaj tkˈoˈna tnaabla weya, jax ma txiˈ nkˈoˈna tnaabla cye, tuˈntzen junx ten cynaabl, tisenx junx koˈ. ²³ Ma txiˈ nkˈoˈna cye tuˈn junx ctemel nnaabla cyuya, tisenx junx koˈ, tuˈntzen junx ten cynaabl tuya jun cymojbabl cyiib tzˈaklxix, tuˈntzen tel cyniyˈ xjal yaaˈn ocslal tiˈj e tzaj tsmaˈna inayena, bix tiˈj ma tzˈoc cyakˈ tey tisenx n‑oc wakˈa tey.

²⁴ Taat, kej ocslal wiˈja ctzaal tkˈoˈna weya, waja tuˈn cyten wuyena jaaˈ chin pomela, tuˈntzen t‑xiˈ cycyeˈyen jjawnex wipemala ma tzaj tkˈoˈna. Cxeˈl ncubsaˈna nwitza tey juˈwa, cuma ma tzˈoc wakˈa tey jatxe tej mitknaˈx tbint twitz txˈotxˈ.

²⁵ Taat, jiquentey te junx maj. Min cytzkiˈn kej xjal te twitz txˈotxˈ ti tten tnaabla. Pero weya, n‑el nniˈya tiˈja. Bix kej xjal lepchecke wiˈja ma tzˈel cyniyˈ tiˈj e tzaj tsmaˈna inayena. ²⁶ Ma txiˈ nyeecˈana cyexin ti tten tnaabla, bix cxeˈl nyeecˈantla, cuma waja tuˈn toc cyakˈ cyuya cye tisenj n‑oc wakˈa tey. Bix waja tuˈn woca junx cyuya―tz̈i Jesús te Tmanxin.