Chronological

Jun tcab uˈj e xiˈ ttzˈiˈben apóstol Pedro

Jun kˈolbebl tuˈn apóstol Pedro

1  Inayena Simón Pedro. Jun t‑akˈanal bix jun t‑xel Jesucristo kena. Nxiˈ ntzˈiˈbena ja uˈj lu te cyey xjal ma chi ocslana tiˈ Cristo tisen keya, ejooˈya t‑xel Jesús. Clol ke bix Diosxin, bix cuma jiquenxin, ma kˈoj ke tuˈn koc te ocslal. ² Tzajxit nim xtalbil cyey bix chi tenxita tuj ttz̈yal tuˈnj cytzkiˈna Dios tuya Kaaw Jesús.

Ti tten cychunkˈlal ke ocslal

³ Tuˈnj tipemalxin bix tuˈnj ktzkiˈn jaxin, ma tzaj tkˈoˈnxin ke cykilca najben tuˈn tten kchunkˈlal te junx maj bix tuˈn t‑xiˈ kiiˈn kchunkˈlal tisen taj Dios. Ma ttxocxin ejooˈ tuˈn kten tuyaxin tuj tcawbilxin jawnex bix tuˈn koc te ttanemxin tbanelxix. ⁴ Tuˈnj tipemalxin bix tuˈnj ktzkiˈn jaxin, ma cyaj tkˈoˈnxin jawnex tyolxin te ke tuˈn t‑xiˈ kiiˈn jun knaabl jiquen tisenj texin Dios bix tuˈn ktzakpet tiˈj tikˈch yaaˈn baˈn at twitz txˈotxˈ.

⁵ Cuma ma tzaj tkˈoˈn Dios xtalbil te ke tuˈn koc te ttanem jiquen, juˈ tzunj, yaaˈn nuk chi ocslala tiˈ Cristo, pero jax juˈxa cˈoquel cyipena tiˈj tuˈn cytena jiquenxix. Bix yaaˈn nuk jaj lu, sino jax juˈx cykˈoˈnc cyipena tiˈj tuˈn tel cyniˈya tiˈj. ⁶ Bix yaaˈn nuk tuˈn tel cyniˈya tiˈj. Jax juˈx cykˈoˈnc cyipena tiˈj tuˈn ttzyunte cyiiba twitz il. Bix yaaˈn oˈcx tuˈn ttzyun cyiiba. Jax juˈx tuˈn tten cypasensyey. Bix yaaˈn nuk oˈcx jlu. Jax juˈx tuˈn t‑xiˈ cyiiˈna cynaabla tisen taj Dios. ⁷ Bix yaaˈn nuk oˈcx jlu. Jax juˈx tuˈn toc cyakˈ ke niyˈtl ocslal cyey. Bix yaaˈn nuk oˈcx tuˈn toc cyakˈ ocslal cyey. Jax juˈx tuˈn toc cyakˈ cykilca xjal cyey. ⁸ Katzen ma bint cykilca jlu cyuˈna bix ka tz̈ˈiyne tz̈ˈiy cynaabla juˈwa, nchi ajben tzuna, bix cˈajbel jlu tuˈn cytzkiˈna ja Kaaw Jesucristo. ⁹ Pero ka min nbint cyuˈna tuˈn cytz̈ˈiya tuj cyocslabla juˈwa, tisentzen sjuman tiˈ cywitza min nakˈ, bix ka mos̈key, cuma ma tzˈel tuj cycˈuˈja o chi txjeta tuˈnxin tiˈ cyila te ootxa. ¹⁰ Juˈ tzunj, key ocslal, juntl maj cxeˈl nkbaˈna cyey tuˈn toc cyipena tiˈj tuˈn cytena jiquenxix, tuˈntzen cycyaj tena tuj cyocslabla. E ttxoc Dios ejeeˈy bix e tscyˈoxin ejeeˈy tuˈn cyoca te t‑xjalxin. Ka ma tzˈoc cyipena tiˈj juˈwa, miˈn cheˈxa tuj il. ¹¹ Cykilcaj ma txiˈ nkbaˈna cyey, ka nbint cyuˈna juˈwa, tuya cykil tcˈuˈj Kaaw Jesucristo, Clol ke, ctkˈaˈ tuˈn cyoca tuj lugar jaaˈ ccawel te junx maj.

¹² Ilxsen tiˈj jyol ma txiˈ nkbaˈna cyey, tuˈn cycywixa mas tuj cyocslabla. Juˈ tzunj, miˈn cyaj nkˈoˈna tuˈn t‑xiˈ nkbaˈna ja consejo lu nim maj te cyey, amale elet cyniˈya tiˈj bix ma cub cyiˈja wuˈna jaˈlewe ka jaxxix nyola. ¹³ Tiˈj lux kena iˈtza, baˈn tuj nwitza tuˈn tcyaj nkˈumena cyey tiˈj lu, tuˈntzen tjaw cyitzˈjsaˈna cynaabla bix tuˈn tul tuj cycˈuˈja. ¹⁴ Il tiˈj cyjel nkˈumena cyey, cuma n‑el nniˈya tiˈj chˈixcˈa tuˈn taj wanema cjawetz tuj nxumlala, cuma o tzaj tyeecˈan Kaaw Jesucristo weya. ¹⁵ Loˈj lux kena iˈtza, cˈoquel wipena tiˈj tuˈn tcyaj wokxenena cyey, tuˈntzen tul nyola tuj cycˈuˈja oj ncyima.

Kej apóstol o cyil tipemal Jesucristo

¹⁶ Tej t‑xiˈ kkˈumena cyey, ejooˈya t‑xel Kaaw Jesucristo, tiˈj tipemalxin bix tiˈj tuˈn tul meltzˈajxin juntl maj, yaaˈn nko yolena tisenj nicˈbil yol tzin cyxnakˈtzaˈn juuntl xnakˈtzal ẍbiˈlke pero ẍtakˈke, cuma oc kcyeˈyena tej tul jlet‑xin kwitza tuya jawnex tipemalxin. ¹⁷ Oc kcyeˈyena tej ttzaj tkˈoˈn Kman Dios nimbil te Jesús bix e jaw tnimsaˈnxin tbi. Bix e kbiˈya tej ttzaj tkbaˈn Dios jawnex tiˈj Tcwal cyjulu: “Ja weya Ncwal jlu n‑oc takˈ weya. Nimxsen nchin tzalaja tiˈj,” tz̈i Dios. ¹⁸ Ejooˈxa e binte kej yol lu tej ttzaj kbet tuj cyaˈj, tej kjapana twiˈ witz tuya Jesús jaaˈ e cˈuˈla ten Dios. ¹⁹ Bix yaaˈn nuk ejooˈya at kyola tiˈ Cristo. Jax juˈx at cyyol kej tyolel Dios te ootxa jaxxixxsen. Baˈn tuˈn toc cycˈuˈja tiˈj yol jaxxix, tuˈntzen tel cyniˈya tiˈj alcyej jiquen bix alcyej ẍtakˈ. Tej yol jaxxix tisen jun jul tzaj, tuˈn tchicˈajax tikˈch jilel tuj klolj. Cynimanxa jaxxix ojxe tul meltzˈaj Kaaw bix qˈuelel cyniˈya tiˈj te junx maj tuj cyanema, tisen oj n‑el klolj oj n‑ul kˈij. ²⁰ Il tiˈj qˈuelel cyniˈya tiˈj tej tcub cytzˈiˈben ke tyolel Dios tyol Dios twitz t‑xak uˈj, yaaˈn cyexxin cyyol e cub cytzˈiˈben. ²¹ Bajx cwaˈ cytzˈiˈben ke tyolel Dios cyex cyajbil, sino nuk oˈcx ajbenke te Dios. Kˈiˈnkexin tuˈn Espíritu Santo, bix nuk tyol Dios e cub cytzˈiˈbenxin.

Kej nchi xnakˈtzan ẍtakˈ yol kxol

2  Pero cyxol xjal te ootxa, yaaˈn nuk oˈcx e cypocba tyolel Dios jaxxix. Jax juˈx e ten kej xjal e xiˈ cykbaˈn ka tyolel Dioske, pero yaaˈn jax cyuˈn. Bix jax juˈx jaˈlewe, at xnakˈtzal ẍtakˈ cyxola. Chebe chebe tzin chi xnakˈtzan tuya cynaabl ẍbiˈlke pero ẍtakˈke bix te xitelke. Tzin cykbaˈn ka mintiiˈ cˈajbela jchojbil tuˈn Kaaw tuˈn kclet tiˈ kil. Juˈ tzunj, tzin cyjyoˈn tuˈn tcub castiwa cyibaj, bix chˈinnchˈe oj tcub. ² Nim xjal cyxola chi oquel lpe tiˈj cyyecˈbil, tuˈn tbint nuk jaj tajbil cyxumlal cyuˈn, bixsen chi yolel xjal yaaˈn baˈn tiˈj kocslabl jaxxix. ³ Kej xnakˈtzal ẍtakˈ cyaj tuˈn tel cyiiˈn cypwaka, bix juˈ tzunj, tzin cyyajlaˈnkey tuya cyyol ẍtakˈ.

Pero jatxe ootxa e cub tnincˈuˈn Dios tuˈn tcub tkˈoˈn cycastiwa, bix chˈix tpon tumel tuˈn cyxiˈ tuj il. ⁴ Jaxxix cwel tkˈoˈnxin cycastiwa, cuma jaxxix e xiˈ tkˈoˈnxin cycastiwa kej tsanjelxin tuj cyaˈj tej cybinchante il. E cuˈtz t‑xooˈnxin ejeeˈ maa tuj jun lugar klolj Tártaro tbi, te cˈuˈlcye joocˈtzen nchi ayon jkˈij tuˈn cyocx tuj kˈakˈ te junx maj. ⁵ Jax juˈx e tzaj tkˈoˈn Dios cycastiwa kej xjal e ten jatxe ootxa. Tej tcub tmaksiˈnxin entera twitz txˈotxˈ tuya aˈ, e cub baj cykilca xjal aj il. Oˈcx tej xin tyolel Dios jiquen, Noé, tuya wuuktl ke te tjaxin, e clet tuˈn Dios. ⁶ Jax juˈx e tzaj tkˈoˈn Dios cycastiwa kej aj Sodoma bix kej aj Gomorra. E cuˈtz kˈakˈ cyibaj, biˈx e cub tzaˈjex kej caˈba tnom lu, tuˈn cyajben te jun yecˈbil te cyej xjal cycyˈi Dios te mas yaj. ⁷ Pero e clet jxin Lot tuˈn Dios twitz kˈakˈ. Jiquenxix te Lot, bix e tzaj nim tbisxin tuˈn tlaj cybinchben xinak kaˈxsen tej cyoc ipan cyiˈj xinakxtl. ⁸ Najl Lot cyxol xjal lu, bix cykil kˈij, tej toc tcyeˈyenxin cybinchben kaˈ bix tej tbintexin, ocxsen nim bis tuj tanemxin, cuma baˈn xjalxin bix jiquenxsen tnaablxin.

⁹ Katzen o bint tuˈn Dios tuˈn e cub tkˈoˈn cycastiwa aj il te nejl, bix ka o tcoˈpan ttanem tuj cykˈab binchal il, jaxsen juˈx cbinel tuˈnxin jaˈlewe tuˈn miˈn chi cub tzˈaka tuj j‑il cyaj xnakˈtzal ẍtakˈ tuˈn tbint cyuˈna, bix at tipemalxin tuˈn tcub ttzyuˈnxin ejeeˈ ojxe tpon tumel tuˈn cyxiˈ tuj kˈakˈ te junx maj. ¹⁰ Bix mas ctzaal tkˈoj Dios cyiˈ kej xjal ncheˈx lpe nuk tiˈj tajbil cyxumlal bix kej xjal n‑el cyiiqˈuen ley. Kej xnakˈtzal lu, mintiiˈ ttz̈i cyiˈj, bix iyˈnen tibaj cynaabl. Mintiiˈ chˈin ttz̈i cyiˈj tuˈn cyxmucchan cyiˈj ke jawnex cawel. ¹¹ Pero ke tsanjel Dios tuj cyaˈj, amale atet mas cyipemal bix mas cyoclen cywitz xnakˈtzal, pero min chi yolen kaˈ cyiˈj xnakˈtzal ẍtakˈ twitz Dios.

¹² Pero kej xnakˈtzal ẍtakˈ lu, tisen jilke nchi itzˈj nuk tuˈn cytzyet bix tuˈn cycyim. Min chi ximan tiˈj, sino nuk ncheˈx lpe tiˈj alcye tzin tkbaˈn cyxumlal. Nchi yolen xnakˈtzal kaˈ tiˈj jmin tzˈel cyniyˈ tiˈj, pero tisen nchi cub byet ke jil cyuˈn xjal, juˈxsen chi xeˈl xnakˈtzal tuj castiwa tuˈn Dios. ¹³ Tuj cywitz, chi camal tuˈnj cybinchben, pero cxeˈl tzˈak cycotz nchi ayon tiˈj. Yaaˈn nuk te koniyan, sino jax juˈx te kˈij ncheˈx lpe tiˈj nuk tikˈch taj cyxumlal. Ejeeˈ tzunja tisen jun tzˈil tiˈ xbalen sakxix, cuma oj nchi chmet cyuyey te iyˈsalte santa cena, nuk oˈcx cyaj tiˈj tuˈn cynoj. ¹⁴ Oj n‑oc cycyeˈyen ke xuuj, nuk nchi kˈaˈbec tuˈn tbint pajlel cyuˈn. Min tzˈel cygana tuˈn cybinchan il cyuya xuuj. Ncub cyiˈ kej ocslal yaaˈn cyiw tuj cyocslabl cyuˈn tuˈn cybinchante jyaaˈn baˈn cyuya. Ma nakˈet cyanem nuk tuˈn toc cykˈaˈben nuk tikˈch cye cyuyey. Cwel tkˈoˈn castiwa Dios cyibaj. ¹⁵ Ma cyaj cycyeˈyen jbe jiquen, bix ma chi tzpet. Ma chi oc lpe tiˈj tyecˈbil jxin tyolel Dios Balaam, tcwal Beor. Tuˈn tcambilxin pwak, e tajbe Balaam tuˈn tcyaj tsbuˈn ttanem Dios. ¹⁶ Pero cuma e tajbe Balaam tuˈn tbinchan il, at jun oc ilente jaxin. Oc ilet‑xin tuˈn tburxin mixbe yolen. E yolenjil tisen jun xjal, tuˈn miˈn tzˈoc taawjil te jun yuwin xjal.

¹⁷ Kej xnakˈtzal ẍtakˈ lu tisen jun twiˈ aˈ mintiiˈ aˈ tzin tkˈoˈn bix tisen jun muj kˈiˈn tuˈn cykˈiˈk pero mintiiˈ jbal tzin tkˈoˈn, cuma mintiiˈ cynaabl n‑etz oj nchi yolen. At jun jawnex klolj nayon cyiˈj. ¹⁸ Nchi yolen tuya jawnex cyyol pero mintiiˈ cynaabl tiˈj, tuˈntzen tcub cyiˈ ocslal cyuˈn tuˈn cyxiˈ lpe tiˈj nuk tikˈch kaˈ taj cyxumlal. Bix mas n‑oc cyipen tiˈj tuˈn tcub cyiˈ kej ocslal cyuˈn, ejeeˈx o chi etz ok cyxol kej tzpetsal xjal pero yaaˈn cyiwke tuj cyocslabl. ¹⁹ Tzin cykbaˈn mintiiˈ il tiˈj tuˈn cyten xjal tjakˈ tley Dios, cuma at tzakpibl tuˈn tbint nuk tikˈch taj kxumlal. Pero tuˈnj lu n‑el cyiiqˈuen tcawbil Dios. Eteˈcxsen tjakˈ tcawbil cyxumlal, cuma ka cykˈon cyiib tuya alcye taj cyxumlal, jatzen cyaawa. ²⁰ Nejl, el tzakpetke tiˈj kaˈ at twitz txˈotxˈ tuˈnj cytzkiˈn Clol ke, Kaaw Jesucristo, pero jaˈlewe ma chi cub tzˈak juntl maj tuˈnj il bix ma chi ocx tjakˈ tcawbil. Juˈ tzunj, masxsen tuj il eteˈ twitz nejl. ²¹ Masxsetle baˈn te cye nuket min e xiˈ cyiiˈn be jiquen twitzj tuˈn tcyaj cycyeˈyen xjan tley Dios tiˈj colbil e tzaj kˈoˈn te cye. ²² Jma bint cyuˈn tisenj nbyan tiˈ jun yol nkbaj cyxol xjal. Tzin tkbaˈn cyjulu: “Ke txyan nchi aj meltzˈaj loˈlte cyxaˈb.” Bix at juntl yol tzin tkbaˈn cyjulu: “Ke boch oj nbaj txjet cyiˈj, ncheˈx juntl maj tuj xookˈl,” tz̈i yol. Juˈtzen e baj cyej xin xnakˈtzal ẍtakˈ aj meltzˈajkexin tjakˈ tcawbil taj cyxumlal.

Oj tul juntl maj Kaaw

3  Key ocslal n‑oc cyakˈa weya, ja tcab uˈj lu nxiˈ ntzˈiˈbena te cyey tuˈn tcyaj nkˈumena te cyey tiˈj xnakˈtzbil jaxxix, tuˈntzen t‑xiˈ cyiiˈna jun cynaabla tzˈaklxix. ² Miˈn tzˈel cyyol jxin xjan tyolel Dios te ootxa tuj cycˈuˈja, bix jyol e tkba jxin Kaaw, Clol ke, bix jkˈiˈn cyuˈnj xin t‑xel Jesús cyey. ³ Ilxix tiˈj qˈuelel cyniˈya tiˈj cyuj mancˈbil kˈij chi ul juntl wik xjal te xmucchalte cyey cuma nchi ayona oj tul meltzˈaj Jesús. Cuma nuk tikˈch cyajbil yaaˈn baˈn cbinel cyuˈn. ⁴ Cykbaˈ cyjulu: “Tzin tkbaˈn tyol Dios tzul meltzˈaj Cristo, pero nuk ten. ¿Ti ma baj tiˈj yol lu? Jatxe tej cycyim t‑xel Jesús, ttenx cykilca tisex tej tbint twitz txˈotxˈ,” tz̈i cybel. ⁵ Pero yaaˈn jax cyyol ka ttenx cykilca jatxe tej tbint twitz txˈotxˈ, cuma el cyiiqˈuen e cub xiten Dios twitz txˈotxˈ jun maj. Tej tbinchante Dios twitz cyaˈj bix twitz txˈotxˈ tuya tyol tuj tneel, e xiˈ tkbaˈn tuˈn tcub pax aˈ, tuˈn tcyaj jun tkiyˈ aˈ te jawne tibajxe cyaˈj, bix tuˈn tcyaj juntl tkiyˈ aˈ te cubne. ⁶ Tuˈnj aˈ e cyaj tibajxe cyaˈj, e cub xiten Dios cykilca twitz txˈotxˈ tej tcyaj twitz txˈotxˈ tjakˈ aˈ. ⁷ Jax juˈx cwel xiten Dios twitz cyaˈj bix twitz txˈotxˈ te jaˈlewe. Tzyuˈnke tuˈnx tyol Dios tuˈn cyocx tuj kˈakˈ oj tpon kˈij tuˈn cypon ke aj il tuj xkel twitz Dios.

⁸ Key ocslal n‑oc cyakˈa weya, kape tuj cywitza nimxsen tyem nayon Kaaw tiˈj tuˈn tul meltzˈaj. Pero tzˈel cyniˈya tiˈj lu: Tuj twitz Kaaw, jun kˈij junx taˈ tisen jun mil jnabkˈi, bix jun mil jnabkˈi junx taˈ tisen jun kˈij. ⁹ Miˈn yajtl Cristo tuˈn tjapan baj tuya jun yol tuˈn tul meltzˈaj, tisen tzin cykbaˈn juun xjal, sino nayon cyiˈja tuya pasensya. Tcyˈixin tuˈn t‑xiˈ jun xjal tuj il. Nuk oˈcx tajxin tuˈn cyajtz meltzˈaj cykilca xjal tuya Dios. ¹⁰ Jaxxixxsen tzul meltzˈaj Kaaw, bix tzulxin jun kˈij mintiiˈ tumel, tisen jun alakˈ chˈinnchˈe oj ntzaj te koniyan. Bix tuj tzunj kˈij lu oj tul meltzˈajxin, pjel twitz cyaˈj tuya jun tkˈajkˈajel tisen oj najkelen tken kˈakˈ tuj cˈul. Cwel patet ke cheˈw tuyax xjaw tuyax kˈij, bix pjel tzˈeyˈ twitz txˈotxˈ tuya cykilca at twitz txˈotxˈ.

¹¹ Key ocslal, il tiˈj pjel cykilca juˈwa. Juˈ tzunj, mas baˈn tuˈn t‑xiˈ cynimana Dios bix tuˈn tel cypaˈn cyiiba tiˈj yaaˈn baˈn. ¹² Cuma cwel tzˈeyˈ twitz cyaˈj tuˈn kˈakˈ bix cwel ulj cykilca cheˈw bix xjaw bix kˈij bix twitz txˈotxˈ tuˈn kˈakˈ oj tul meltzˈaj Kaaw, juˈ tzunj, bincham cytena, bix tuya cykil cycˈuˈja chi ayona tiˈj kˈij oj tul meltzˈaj. ¹³ Pjel twitz cyaˈj bix twitx txˈotxˈ te jaˈlewe, pero ma cyaj tkbaˈn Dios cbinel jun acˈaj twitz cyaˈj bix jun acˈaj twitz txˈotxˈ, jaaˈ tumel chi temel nuk oˈcx kej baˈn. Bix nko ayon tiˈj lu.

¹⁴ Key ocslal n‑oc cyakˈa weya, cuma nchi ayona cyiˈj acˈaj twitz cyaˈj bix twitz txˈotxˈ, juˈ tzunj cˈoquel cycˈuˈja tiˈj tuˈn cytena tuj ttz̈yal oj tul meltzˈaj Kaaw, bix tuˈn sakxix taˈ cyanema, tuˈntzen mintiiˈ chˈin tzˈil cyiˈja bix mintiiˈ cypaltela. ¹⁵ Bix qˈuelel cyniˈya tiˈj nayon Kaaw tuˈn tul meltzˈaj, tuˈn t‑xiˈ tkˈoˈn amleˈn cye kej xjal kxol minaˈx tclet, tuˈn cycyajtz meltzˈaj tuya Dios.

Jax juˈx Pablo n‑oc takˈ ke, o txiˈ ttzˈiˈben cyey tiˈj ti pjel, bix jyol e cub ttzˈiˈben, e kˈoj te tuˈn Dios. ¹⁶ Tuj cykilca uˈj nxiˈ tsmaˈn Pablo, nyolen tiˈj ti tten oj tul meltzˈaj Kaaw bix tuˈn binne cytena oj tul. At juun tyol Pablo cyiw tuˈn tel kniyˈ tiˈj, bix juˈ tzunj, kej ocslal min tzˈel cyniyˈ tiˈj bix yaaˈn cyiwke tuj cyocslabl, nuk nbaj cymeltzˈuˈn kej yol lu, tisen nuk nbaj cymeltzˈuˈn yol tzˈiˈben tuj tyol Dios. Ka ma cheˈx lpe tiˈj ẍtakˈ yol juˈwa, chi xeˈltzen tuj il.

¹⁷ Key ocslal n‑oc cyakˈa weya, cuma ya n‑el cyniˈya tiˈj cyaj xnakˈtzal ẍtakˈ tuˈn cytzpeta tuj cyocslabla, juˈ tzunj cycˈojlanxix cyiiba, tuˈntzen miˈn baj cycˈuˈja tiˈj jaxxix yol oj nchi ẍtakˈen, tuˈn miˈn cyaj cycyeˈyena cyocslabla. ¹⁸ Mas baˈn tuˈn cytz̈ˈiynen cytz̈ˈiya tuj cyocslabla tuˈnj tel cyniˈya tiˈj xtalbil o kˈoj te cyey tuˈn Clol ke, bix tuˈnj tel cyniˈya tiˈ Kaaw Jesucristo. ¡Chi nimanxita tbi jaˈlewe bix te junx maj! Juˈxit ttena.

Jun uˈj e cub ttzˈiˈben Judas, jun t‑akˈanal Jesucristo

Cˈojlaˈn koˈ tuˈn Dios

¹ Key Hermano,

Inayena Judas. Jun t‑akˈanal Jesucristo kena, bix titzˈen Santiago kena. Bix nxiˈ ntzˈiˈbena j‑uˈj lu te cyey ocslal, ejeeˈy t‑xjal Kman Dios, ejeeˈy n‑oc cyakˈa te Dios, bix ejeeˈy cˈojlaˈn tuˈn Cristo twitz il. ² Jaxit Kman Dios tzaj kˈonte cyey jun tkˈakˈbil tcˈuˈjxin cyibaja, bix tuˈnxit‑xin chi temeley tuj ttz̈yal, bix tuˈnxit‑xin at jun tkˈakˈbil cycˈuˈja cyxola.

Il tiˈj tuˈn toc kipen tuˈn miˈn chˈixpet kocslabl cuma at nim xjal kxol nocx cytzˈilsaˈn jun jaxxix yol

³ Key hermano, at tcublel ntzˈiˈbena jun uˈj cyey tiˈj coˈpbil ke tiˈ kil, tuˈntzen tel mas cyniˈya tiˈj tzunj kocslabl. Nimcˈa waja e xiˈ ntzˈiˈbena cyey tiˈj coˈpbil ke, bix otk tzyet ttzˈibj wuˈna, pero mlay chin xcyeya tiˈj cuma at juntl mas il tiˈj. Bix ja tzunj mas il tiˈj, juˈtzen cyjulu. O cyaj tkˈoˈn Dios tyol tuj tzinen te ke ocslal, bix tajxin tuˈn t‑xiˈ kniman tyolxin. Juˈ tzunj cxeˈl ncubsaˈn nwitz cyey tuˈn cykˈoˈnc cyipena tuˈn miˈn chˈixpet cyocslabla tuya ẍtakˈ xnakˈtzbil. ⁴ Nxiˈ nkbaˈna juˈwa cuma cyxola chebe chebe o chi ocx juun xjal n‑ocx cytzˈilsaˈn tuˈn ẍtakˈ cyyol kxnakˈtzbil o kiikˈen tuˈn Kaaw Jesús. Nchi yolenxin tisen ocslalkexin, pero yaaˈn jax. Tzin cykbaˈn baˈn tuˈn kbinchan cykil il cuma cwel tnajsaˈnte Dios, tz̈i cybel. Bix tzin cykbaˈn mintiiˈ il tiˈj tuˈn toc kocslaˈn tyol Jesucristo, bix yaaˈn oˈcx jaxin Kaaw. Pero mintzen tkbaˈn kxnakˈtzbil juˈwa. Kej nxiˈ cyiiˈn jun cynaabl juˈwa chi pon tuj castiwa, jaj castiwa o byan tuj tyol Dios kaape ootxa.

⁵ Cxeˈl nkˈoˈna cyey oxe tumel tiˈ kej kiyˈjil min e cybi Kaaw bix e xiˈke tuj castiwa. Tneel tumel, amale cytzkiˈnta ti tten cypocbal kej kiyˈjil, ctzaal nnaˈna cyey ti e baj cyej kiyˈjil tej tetz tcolpan Kaaw ejeeˈxin tuj txˈotxˈ te Egipto. Tej cytenxin tuj tzkij txˈotxˈ, min oc ke cycˈuˈjxin tiˈ Kaaw, bix juˈ tzunj Kaaw e cyaj kˈonte cyexin tuj cyamecy tuj ja lugar, bix e cub bajkexin cykilcakej min e cybi. ⁶ Tcab tumel, at cab cyxol ke tsanjel Dios tuj cyaˈj jatxe ootxa min e cybi tcawbil Dios bix juˈ tzunj o txiˈ cyxooˈn cyaakˈen tuj cyaˈj, bix yaaˈn eteˈtl tuj cyaˈj. Mlay chi pon tuj cyaˈj juntl maj, sino tiˈjxe cyaˈj tuj klolj eteˈ, bix Dios cˈuˈlcye joocˈtzen npon jawnex kˈij tuˈn cyxiˈ tuj cycastiwa te junx maj. ⁷ Toxen tumel, naˈn kuˈn ti e baj cye tnom te Sodoma bix Gomorra bix cye cabtl tnom cyiˈj. Ke xjal cyuj ja tnoma e cybincha nim kaˈ. Nim e yas̈enke, hasta xinak tuya xinakx. Kaˈxsen el tuj twitz Dios. Juˈtzen e tzaaˈ tkˈoˈn Dios kˈakˈ cyibaj, biˈx e cub bajke te junx maj. Ejeeˈ tzunj lu te jun tumel te ke jaˈlewe at jun kˈakˈ te junx maj jaaˈ chi pomela kej xjal min cybi Dios.

⁸ Cykilke tzunkej lu e cybincha il bix e xiˈke tuj castiwa. Juˈxsen chi xeˈl tuj castiwa kej eteˈcx cyxola min cybi Kaaw Jesús. Tisen kej aj il te ootxa baˈn eˈla tuj cywitzj e cub cybinchaˈn pero yaaˈn baˈn, juˈx jaˈlewe. Kej ẍtakˈ eteˈcx cyxola tuj cywitz baˈn tuˈn cybinchan il bix mintiiˈ cycastiwa tiˈj tuj cywitz. Nim kaˈ nbint cyuˈn. N‑el cyxooˈn tcawbil Cristo, bix juˈx n‑oc cyilen ke tsanjelxin.

⁹ Jatxe ootxa mi nuk ja mas nintzaj tsanjel Dios tuj cyaˈj, Miguel tbi, e ttzuy tcawbil Dios jun maj tej tkˈojxin tuya taaw il. E xiˈ tkbaˈn taaw il te Miguel t‑xumlal ktzan Moisés te texxin, yaaˈn te Dios. Pero Miguel mintiiˈxix e tkba te taaw il, sino nuk e xiˈ tkbaˈnxin: “Jaxit Dios cˈoquel ila tey,” tz̈ixin te taaw il. Min oc tile Miguel ja taaw il, cuma tcyˈixin tziyˈ nejlxin twitz toclen Dios. ¹⁰ Pero ejeeˈtzen ẍtakˈ cyxola min ncub cybisen tiˈj toclen Dios juˈwa. Nuk nchi yolenxin xmucchbil tiˈ alcyej min tzˈel cyniyˈ tiˈj. Oˈcx n‑el cyniyˈxin tiˈj laˈ alcye taj cychuˈlxin, bix nxiˈ cynimanxin alcye taj cychuˈlxin, tisen ke alimaj nxiˈ cyniman alcye taj cychuˈljil. Pero ja tachbil cychuˈlxin lu chi xeˈl tiiˈn ejeeˈxin tuj castiwa. ¹¹ Juˈ tzunkexin tisen Caín jatxe ootxa. Tcyˈixin e bint tisenj taj Dios. Bix juˈ tzunkexin tisen Balaam. Nuk pwak e tajbexin. Bix juˈ tzunkexin tisen Coré. Oˈcx e tajbexin tuˈn tocxin cyiw tiˈ tley Dios. ¡Ax lo kej xina cyxola tzin cybinchaˈnxin tisen kej xin nchi byan ootxa! cuma nbint cyuˈn tisen Caín bix Balaam bix Coré jatxe ootxa, bix chi xeˈl tuj castiwa tisen tzunkej xin te ootxa o cheˈx tuj castiwa.

¹² Oj nchi chmeta te waaˈl bix te iyˈsalte santa cena, eteˈcxxin ẍtakˈel cyxola. Min ncub cybisenxin tiˈj ti elpenina santa cena, sino nuk ncub cybisenxin nuk jaj cyexin tuˈn cynojxin. Mintiiˈ tzin cyyeecˈaxin jun cynimbilxin tiˈj. Juˈ tzunj jun chˈixbajil n‑ocx cykˈoˈnxin cyiˈja oj nchi chmeta tuˈn cynimantey santa cena. Bix mintiiˈ baˈn cyajbeˈna, tisen jun muj min najben oj tiyˈ kibaj tuˈn cykˈiˈk pero mintiiˈ jbal tzin tkˈoˈn. Bix jun tzeeˈ tken loˈpj oj min takˈ twitz min najben, bix il tiˈj cjawetz lequet tlocˈ tuˈnx tcyim junx maj, juˈtzen chi pomel tuj castiwa jxjal cyxola min cybi tyol Dios. ¹³ Bix tisen tswaqueyil mar ncyaj t‑xooˈn tzˈis twitz txˈotxˈ, juˈx xsunkej xjal lu nuk n‑ul cykˈaˈtz jun tkaˈyel oj cyocxin cyxola. Bix tisen kej cheˈw iken tjeeˈ nchi el tzˈak twitz cyaˈj mintiiˈ cylugar tuˈn cyweˈ bix jun rato chi ocx baj tuj jun nintzaj klolj, juˈxsen ejeeˈj ẍtakˈ yaaˈn tuj tumel eteˈxin bix chi pomel baj tuj castiwa.

¹⁴ Juˈ e tkba Enoc jatxe ootxa. Enoc te twuukan xeˈch elnin itzˈj tiˈ Adán. E tkba Enoc cyjulu: “Tzul Kaaw cyuya nim tajlal tsanjel Dios tuj cyaˈj, miles y miles cybaj, ¹⁵ te cyeyˈlte cykil xjal kej baˈn bix kej min, bix te kˈolte castiwa cyibaj kej xjal kaˈ tuˈn kaˈ e cybincha bix tuˈn cyiw nchi juben yol tiˈ Dios,” tz̈i Enoc tuj uˈj. Cyiˈjtzen xjal tisen kej ẍtakˈ cyxola e yolena Enoc.

¹⁶ Juˈ tzunj, kej o chi ocx cyxola yaaˈn kˈiˈnxix tyol Dios cyuˈn. Ejeeˈ tzunja tisen kej cyiw cynaabl ootxa. Min n‑oc ke cycˈuˈj tiˈ Dios, sino nuk nchi txololonx tuˈn. Oˈcx at cygane tiˈj cyex cyajbil. Nim nchi yolen te nimbil cyiib. Tzin cyyeecˈan cywitz baˈn cye xjal, pero tuj cyanem, min, cuma nuk tuˈn cycaman cyiˈ cabtl te cye.

Cjawel jlet jun wik xjal kxol te xmucchalte tyol Dios

¹⁷ Pero yaltzen key, hermano, tzulcˈa chˈin tuj cycˈuˈja cyyol ke t‑xel Kaaw Jesucristo cyey. ¹⁸ Chˈima maj e cykba cyey cyjulu: “Tzul jun kˈij chi ul cyxola jun wik xjal te xmucchatlte tyol Dios. Oˈcx nuk tikˈch jun cyajbil yaaˈn baˈn cbinel cyuˈn,” tz̈i ke t‑xel Jesús ke nejl. ¹⁹ Otzen chi ul jlet cyxolj jun wik xjal. Ejeeˈ tzunja nchin kˈonte kˈoj cyxola tuˈn cypaxa. Nuk jaj kaˈ te twitz txˈotxˈ lepchke tiˈj, cuma mintiiˈ Espíritu Santo cyuya.

²⁰ Jatzen cyey, hermano, miˈntzen chi oca tisen kej lu, sino cykˈoˈnc cycˈuˈja tiˈj tuˈn tbint tajbil Dios, tuˈntzen cycywixa tuj kocslabl, cuma ja jun kocslabl sakxix twitz Dios. At Espíritu Santo cyuyey, bix jatzen kˈilte cyey oj cynaˈna Dios. ²¹ Miˈn cyaj cycyeˈyena Dios, cuma n‑oc kakˈ te Dios. Qˈuiyax cyuˈna tuˈn t‑xiˈ cyiiˈna kocslabl hasta mancˈbil kˈij, cuma at tkˈakˈbil tcˈuˈj Kaaw Jesucristo kiˈj, bix tzulxin juntl maj kˈolte jun kchunkˈlal te junx maj.

²² Pero cyxola at juun ocslal n‑oc cybiˈn cyyol ẍtakˈ xjal tzin cykbaˈn baˈn tuˈn kbinchan cykil il. Chˈixcˈa tcub cyiˈj tuˈn cyxiˈ lpe cyiˈj. Cxeˈltzen cyonen cyey ejeeˈj yaaˈn cyiw tuj cyocslabl tuˈntzen miˈn cheˈx lpe cyiˈj ẍtakˈ. ²³ Bix at juuntl ocslal cyxola ya ma cheˈx lpe cyiˈj ẍtakˈ xjal. Cˈoquel cyipena cyiˈj tuˈn cyaj meltzˈaj tuj jiquen be, tisen n‑etz cykiten key tuj kˈakˈ. Pero at juun mayˈx cheˈx tzˈak tuj il. Cˈoquel cykˈoˈna lastim cye, pero qˈuelel cyxooˈnja tzin cybinchaˈn, tisen n‑el cyxooˈna jun xbalen mintiiˈtl tajbel bix tzˈilxsen. Cycˈojlaˈtl cyey cyiib tuˈn miˈn chi cub tzˈaka tuj cyila tisenj cye.

Njaw tnimsaˈn Judas tbi Dios

²⁴ Pero Kman Dios at tipemal te cˈojlalte cyey tuˈn miˈn chi cub tzˈaka tuj il, bix at tipemalxin tuˈn t‑xiˈ tiiˈnxin ejeeˈy sakxixkey bix aleyrekey twitzxin, jawnex Diosxin, laˈ alcye jun kˈij. ²⁵ Jaxin oˈcx jun Dios. Min‑al juntl at. Bix jaxin coˈpbil te ke tuˈn Kaaw Jesucristo. Tbanelxix Dios, bix nimxsen tipemal at, bix tibaj cykil tcawbil. Nimjxit tbi te cykil tyem. Juˈxit tzuna. Oˈcx nyolja.