Chronological

Jtoclen apóstol Pablo

10  Jaˈlewe inayena, Pablo, cxeˈl ncubsaˈna nwitza cyey tuˈn t‑xiˈ cynimana nyola, bix miˈn tzˈoc cybiˈna cyyol ke ẍtakˈ t‑akˈanal Dios. Cxeˈl ncubsaˈna nwitza cyey tuya jun nnaabla maans, tisenx te Cristo maansxin. Tzin cykbaˈn jẍtakˈ t‑akˈanal Dios oj nchin tena cyxola at cytz̈iy wiˈja tuˈn t‑xiˈ nkbaˈna cyey o chi binchana il, bix tzin cykbaˈn nuk oˈcx oj nchin tena nakch cyiˈja nxiˈ nkˈoˈna nyola tuya ilbil cyiˈja. ² Chin cubsal nwitza cyey tuˈn t‑xiˈ cynimana nyola bix tuˈn tel cyxooˈna cyyol kej ẍtakˈ, tuˈntzen mintiiˈ il tiˈj tuˈn cyoc wilena oj npona cyxola, cuma jax wuˈna at wipemala tuˈn cyoc wilena. Tzin cykbaˈn kej ẍtakˈ nchin akˈanana tuj taakˈen Dios nuk tuya tnaabl te twitz txˈotxˈ, tz̈ike. ³ Jax cyuˈn nuk jun xjal kena, pero min chin kˈojla cyiˈj xjal nchi kˈojl tiˈ Dios tuya wexa wilbela tiˈj, tisen nbint cyuˈn xjal te twitz txˈotxˈ. ⁴ Mlay chin xcyeya cyiˈke aj kˈoj tiˈ Dios tuˈn wexa wipemala, pero tuya tipemal Dios kˈoˈn weya nchin xcyeya cyiˈj, amale nimet cyipemal at. ⁵ Nchin kˈojla tiˈ cynaabl jxjal jawnex cynaabl tuj cywitz bix nchi iyˈ tibaj tyol Dios. N‑oc wipena tiˈ kaˈ cynaabl xjal, tuˈntzen taajtz tiˈ cynaabl, tuˈntzen cyoc tjakˈ tcawbil Cristo. ⁶ Bix ojtzen tel cyxooˈna cyyol kej ẍtakˈ t‑akˈanal Dios min cybi nyola, tisen e xiˈ nkbaˈna cyey tuˈn tel cyxooˈna, inayen tzuna chin kˈolte cycastiwa kej ocslal min e cybi.

⁷ Cˈoquel cycˈuˈja tiˈj tiiˈn cynaabl kej ẍtakˈ t‑akˈanal Dios. Tuj cywitz jawnexke tuj taakˈen Cristo, pero nuket tzˈel cyniyˈ tiˈj yaaˈn ajnintz kena cywitz tuj taakˈen Cristo. ⁸ Bix yaaˈn nuk oˈcx nchin akˈanana tuj taakˈen Cristo, sino tuyax at woclena tuˈn ncawena cyibaja, yaaˈn tuˈn cyxiˈy tuj il, sino tuˈn wonena cyiˈja tuˈn cycywixa tuj cyocslabla. Kane cxeˈl nkˈumena cyey o takˈ Kaaw woclena cyibaja, mintiiˈtzele nchˈixewa tiˈj, cuma yaaˈntetle ẍtakˈbil nyola. ⁹ At juun tzin cykbaˈn ka nuk tuˈn wuˈja nchin ila cyiˈja tuˈn ttzaj ttz̈i cyiˈja. Pero miˈntzen tziyˈ tuj cycˈuˈja nxiˈ nkbaˈna at woclena cyibaja nuk oˈcx ka nakch ntiina cyiˈja. ¹⁰ Kej ẍtakˈ t‑akˈanal Dios cyxola tzin cykbaˈn cyjulu: “Oj ntzaj tsmaˈn Pablo uˈj keya, cyiwxsen tyol bix nimxse tipemal. Pero oj n‑ulxin kxol, mintiiˈxix tzin tyeecˈanxin ka at nim tipemalxin, bix min tzˈajben tyolxin,” tz̈ike juˈwa. ¹¹ Pero il tiˈj qˈuelel cyniˈya tiˈj oj npona cyxola, tuya nim wipemala baˈn nyolena cyiˈja, tisenxj tuya nim wipemala nxiˈ ntzˈiˈbena cyey.

¹² Weya ncyˈiya bint jaj tisenj nbint cyuˈnj ẍtakˈ t‑akˈanal Dios. Tzin cykbaˈn ka ejeeˈ mas jawnex akˈanal te Cristo, bix nchi mlon nuk cyex cynaabl, bix baˈn n‑eˈla tuj cywitz. Tzin cykbaˈn jcye cynaabl mas jawnex twitz cynaabl juntl wik. Pero oj nchi oc ten mlol cynaabl juˈwa, telniyˈtzen ka min tzˈel cyniyˈ tiˈj. ¹³ Yaltzen weya, min njaw nniman wiiba tuˈn wexa nnaabla tisenj cye nbint cyuˈn. Chin yolelwa nuk tiˈj akˈuntl o tzaj tkˈoˈn Dios weya tuˈn tbint wuˈna. Yal tzunj waakˈena o tzaj tkˈoˈn Dios weya, tuyaxa tuˈn wakˈanana cyxola tuj Corinto. ¹⁴ Mlay chin iˈya tibaj akˈuntl o tzaj tkˈoˈn Dios weya. Nuket min e tzaj tkˈoˈn Dios weya tuˈn wakˈanana cyxola, mintzeletiiˈ woclena tiˈj tuˈn npona te akˈanal cyxola. Inayena tneel t‑akˈanal Dios tuˈn npona maa Corinto te kbalte tpocbal Cristo cyey. ¹⁵ Min in ocxa tuj takˈmal juntl t‑akˈanal Dios. Ncyˈiwa tuˈn npon akˈanal jaaˈ eteˈtl t‑akˈanal Dios, sino nuk oˈcx nchin ayona tuˈn cycywixa tuj cyocslabla, tuˈntzen ntzakpeta cyxola tuˈn nxiˈya cyuj jun wikxitl lugar o takˈ Dios weya ¹⁶ te kbalte jbaˈn tpocbal Jesús cyuj juntl tnom jaaˈ min‑al jun xjal o kˈumen tpocbalxin. Ka nchin akˈanana jaaˈ min‑ala t‑akˈanal Dios, mintzen o chin ocxa tuj takˈmal juntl tuˈn tel wiiˈna toclen. ¹⁷ Cykˈoˈnc cycˈuˈja tiˈj ti toc tuˈn tyol Dios cyiˈj xjal n‑oc cyniman cyiib: “Jun xjal mintiiˈ tuˈn tjaw tnimsan tiib, sino oˈcx kyoˈ oj tkbante Kaaw ka baˈn ma bint kuˈn,” tz̈i tyol Dios. ¹⁸ Baˈnte jun xjal, yaaˈn tuˈnj jax nkbante, sino ka baˈn tuj twitz Kaaw.

11  Key ocslal, waja tziyˈxxit chˈin cyuˈna wiˈja, cuma cjawel nnimsaˈna chˈin nbiˈya. Ka at jun xjal nbint tuˈn juˈwa, jatzen jun xjalja nuk ntxˈujt, pero ntzkiˈna qˈuiyax chˈin cyuˈna wiˈja. ² Tisen jun mambaj cxeˈl tcˈojlaˈn tmeel tuˈn miˈn cub tzˈak naj tuj il te mitknaˈx tmaje, juˈ tzunj weya. Waja tzˈoc ncˈuˈja cyiˈja tuˈn cyela sak twitz Cristo, cuma o takˈ Dios weya tuˈn toc cyakˈa weya. ³ Pero najkelen ncˈuˈja cyiˈja cyuˈnj ẍtakˈ t‑akˈanal Dios o chi pon cyxola te sbulte cyey. Cˈulel tuj cycˈuˈja tuˈn tẍtakˈbil lbaj e cub tiˈ Eva tuˈn tel t‑xooˈn tyol Dios. Tuj nwitza kape cyuyaxloy nchi cub sbuˈn, tuˈn miˈntl cheˈx lpey tiˈ Cristo tuya cykil cycˈuˈja bix tuya jun sakxix cyanema. ⁴ Nipax ncˈuˈja cyiˈja. Kej ẍtakˈ xnakˈtzal nchi pon cyxola, tecˈaxtl cyyol tiˈj Jesús twitzj weya nyol, bix jacˈa tej n‑octltzen cybiˈna mas cyyol twitzj weya nyol. Bix n‑oc cybiˈna kej xjal jun wikxitl cynaabl twitzj t‑xnakˈtzbil Espíritu Santo e cyaj nkˈoˈna cyuyey. Bix n‑oc cybiˈna jun wikxitl xnakˈtzbil twitzj baˈn tpocbal colbil ke e xiˈ nkbaˈna cyey nejl. ⁵ Jaj weya nyol cˈoquelxix cybiˈna, cuma tuj nwitza yaaˈn cubnin kena cywitz kej tzin cykbaˈn jawnex t‑xel Jesúske. ⁶ Kape jax min txiˈ nkˈumena tuya jun jawnex yol, pero o kˈoj te weya tuˈn tel nniˈya tiˈj nim, bix nim maj o txiˈ nyeecˈana jlu te cyey.

⁷ ¿Tuˈn tikentzen mintiiˈ baˈn wajbeˈneya cyey jaˈlewe? ¿Kaˈpa tuj cywitza cubninxse in temana cyxola tuˈnj wakˈanana tuya nkˈaba tuˈn witzˈja, tuˈntzen cyxiˈ wonena tiˈj jun cychunkˈlala mas baˈn? ¿Chin elelpa cyiiqˈuena tuˈn min e nkaniya twiˈ ncˈuˈja cyey tej t‑xiˈ nkbaˈna tyol Dios cyey? ⁸ ¿Kaˈpa tuj cywitza e wiikˈa chˈin onbil weya cyuˈn cabtl ocslal te nakch tuj cabtl tnom, amale mint in akˈanana te cye, nuk tuˈn ntena te kbalte tyol Dios te cyey? ⁹ Tej ntena cyxola, cyiw chˈin tuˈn witzˈja, pero mintiiˈ onbil weya oc nkanena te mi jun cyey. Tej cypon ke ocslal te Macedonia te cyeyˈlte weya tej ntena cyxola tuj Corinto, e cyaj cykˈoˈn nim onbil weya tuˈn witzˈja, tuˈntzen mintiiˈ il tiˈj tuˈn t‑xiˈ nkˈoˈna jun iktz cyibaja tuˈn woc cycˈaˈchina. Bix mintiiˈ cnkaniya. ¹⁰ Ttzkiˈn Cristo jax wuˈna miˈn chin kaniya cyey chojbil weya. Tuj cykilca tcwentel Acaya min‑al jun cyey baˈn tjaw tnicˈan wiˈja ka nchin kanena pwak. ¹¹ Pero ojtzen ncyˈiya wiikˈa cypwaka, ¿tzimpa nyeecˈana ka min tzˈoc cyakˈa weya? ¡Min! Ttzkiˈn Dios n‑oc cyakˈa weya.

¹² Pero il tiˈj tuˈn miˈn wiikˈa cypwaka, tuˈntzen cyweˈ jẍtakˈ xnakˈtzal cyyolen ka nchi akˈanana tuj taakˈen Dios tisenj weya. Cyaj tuˈn wiikˈenteya twiˈ ncˈuˈja, tuˈntzen cyel junx tuj taakˈen Dios wuyena tuj cywitz xjal. ¹³ Nxiˈ cykbaˈn ejeeˈ t‑xel Cristo tisen inayena, pero nuk ten cyuˈn. Oj nxiˈ cykbaˈn smaˈnke tuˈn Cristo, ncubtzen cyyaaˈn ejeeˈy. ¹⁴ Miˈn chi jaw kleeˈy tiˈj yaal xjalke, cuma jax juˈx taaw il n‑oc tisen jun t‑ángel Dios tuj cyaˈj te sbulte cye xjal. ¹⁵ Ka taaw il, ja Satanás, nsbun xjal tuya cyeca tyol, jax juˈx pjel cyej kej ncheˈx lpe tiˈj taaw il. Chi chicˈajaxel tisenj jaxxix t‑akˈanal Dios, pero ccyiikˈel cycastiwa, laˈ niyˈ chˈin kaˈ otk bint cyuˈn.

Nim qˈuixcˈaj iyˈx tuˈn Pablo nuk tuˈnj t‑xel Jesús

¹⁶ Key hermano, cxeˈl ncubsaˈn nwitz cyey juntl maj. Miˈn cub cybisena wiˈja inayena jun xjal min tzˈel nniˈya tiˈj, amale njawet nnimsan wiiba cywitza. Pero katzen tuj cywitza nuk nchin txˈujta, cykˈoˈnctzen cycˈuˈja tiˈ nyola, tisen o tzˈoc cybiˈna cyyol kej ẍtakˈ t‑akˈanal Dios nuk nchi txˈujt. ¹⁷ Yaaˈn njaw tniman te Kaaw tiib tisen jun xjal nuk ntxˈujt. Pero yal weya, cxeˈl nkbaˈna cyey cykilcaj baˈn o bint wuˈna, tisen jun xjal nuk ntxˈujt. ¹⁸ Kej ẍtakˈ akˈanal tiˈ tyol Dios njaw cyocsabla cyiib tisen nbint cyuˈn xjal te twitz txˈotxˈ. Juˈ tzunj jaxse juˈx weya cxeˈl nkbaˈna ka jun jawnex xjal kena, tuˈntzen jax juˈx chin oquel cybiˈna. ¹⁹ N‑eˈla tuj cywitza nim baˈn cyuˈna, pero tuya cykil cycˈuˈja n‑oc cybiˈna cyyol kej xjal nuk nchi txˈujt. ²⁰ Cyey o cyiikˈa kej ẍtakˈ t‑akˈanal Dios, kej cyaj chi cawel cyibaja, bix n‑el cyiiˈn cypwaka, bix tuˈn ẍtakˈbil cyyol nbint cyuˈn tuˈn chebe chebe tuˈn cyajbeˈna te cye, bix tzin cykbaˈn mintiiˈ cyajbela cywitz, bix n‑oc cylokan yol cywitza. ²¹ Katzen il tiˈj tuˈn jun t‑xel Jesús tuˈn tbint juˈwa tuˈn t‑xiˈ tyeecˈan at nim tipemal, attzele nchˈixewa tiˈj, cuma min o bint wuˈna juˈwa.

Pero amale mint o bint cykilj lu wuˈna, pero jaxsele cjawel wiiˈn chˈin wiiba, cuma amatzele cykbaˈte ejeeˈ jawnex, pero inayena yaaˈn jun t‑akˈanal Dios mas cubnin kena cywitz.

²² Nbaj cyniman cyiibxin cuma aj hebreokexin. Jax juˈx weya aj hebreo kena. Bix nbaj cyniman cyiibxin cuma tiyˈjil Israelkexin. Jax juˈx weya tiyˈjil Israel kena. Bix tzin cykbaˈnxin tiyˈjil Abrahamkexin. Jax juˈx weya tiyˈjil Abraham kena. ²³ Tzin cykbaˈnxin nchi ajbenxin te Cristo, pero weya mas nchin ajbena te Cristo. Amale txˈuˈj xjalet kena tuj cywitza, pero cjawelx wiin wiiba mas. O chin akˈanana bix o tziyˈx qˈuixcˈaj wuˈna tuj taakˈen Cristo mas twitzj cyexin. Mas o chin oca tuj tzeeˈ nuk tiˈ tyol Dios. Mlay bint tajlaj jteˈ maj o chin pjeta cyuˈn xjal. Bix nim maj o tzˈel wiˈja tuˈn ncyima. ²⁴ Jweˈ maj e xiˈ tzˈuˈn wiˈja cyuˈn judío. Winaklaaj tuya beljaj tzˈuˈn e xiˈ wiˈja jaca maj. ²⁵ Bix oxe maj in pjeta tuya tzeeˈ cyuˈn xjal te Roma. Bix jun maj oc tz̈itj ke xjal te xol xak wiˈja tuˈn ncuba. Tuj taakˈen Cristo oxe maj in xiˈya tuj aˈ tej tcub xitj barc tuj mar, bix at jun maj in cyaja jun kˈij tuya jun akˈbil tuj aˈ. Twitz tzlom in beteya tuˈn njawela ttziiˈ aˈ. ²⁶ Bix tej wiˈya cyuj tnom te kbalte tpocbal Jesús, at jaaˈ in iˈya cyuj nimaˈ xobajilxsen tuˈn wiˈya cyuj. Bix chˈima maj el wiˈja cyuˈn alakˈ tuj be. Bix tuj cykilca tnom in yasja cyuˈn xjal judío, bix juˈx cyuˈn ke xjal yaaˈn judío. Nim oc kˈojl ke xjal wiˈja cyuj tnom, bix juˈx tiyˈ tuj cˈul bix tuj mar oc qˈuixcˈaj weya. Bix at maj ejeeˈ ocslal yaaˈn jaxxix n‑el cyiiˈn tipemal waakˈena. ²⁷ Nimxsen in sicta tuj taakˈen Dios. At maj min in wutana. At maj in cyima tuˈn weyaj bix tuˈn takˈ aˈ wiˈja, cuma mintiiˈ nwaya e cnet bix mintiiˈ aˈ. At maj at takˈ cheˈw wiˈja, bix yaaˈn nimxix nxbalena kˈiˈn wuˈna. ²⁸ Bix yaaˈn nuk oˈcx iyˈx qˈuixcˈaj tuˈn nxumlala. Jax juˈx tuˈn tkˈakˈbil ncˈuˈja nipax wanema jaca kˈij cyiˈ ocslal tuj cykilca tnom. ²⁹ Ka at juun ocslal yaaˈn cyiw eteˈ tuj cyocslabl, biˈx nchin bisena tiˈj. Bix ka at jun ocslal ma cub tzˈak tuj il tuˈn t‑xmoxbil juntl ocslal, tzultzen nkˈoja tiˈj.

³⁰ Key hermano, at il tiˈj tuˈn tjaw nnimsan chˈin wiiba. Pero nuk nchin yolena tiˈj tikˈch qˈuixcˈaj o tziyˈx wuˈna tuj taakˈen Dios, tuˈn tchicˈajax yaaˈn jawnex kena. ³¹ Kman Dios, Tman Kaaw Jesús, niman tbixin kuˈn te junx maj, ttzkiˈnxin alcyej tzin nkbaˈna tiˈj o baj wiˈja yaaˈn nẍtakˈbila. ³² Bix jax juˈx ttzkiˈn Dios tiˈ jun chˈixbajil e baj weya tuj tnom te Damasco. Tej ntena tuj Damasco, at junxin gobernador otk tzˈocx tkˈoˈn jxin rey Aretas. Tcyˈixin tuˈn wakˈanana tuj taakˈen Dios. Juˈ tzunj ja tzunj xin gobernador e cub kˈonte soldado tuj cykilca ttziiˈ tapya toc tiˈ tnom te xmuklte weya, tuˈntzen ntzyeta cyuˈnxin tej wetza tuj Damasco. ³³ Tuˈntzen wetza tuj tnom, tuj ewjel in ex kˈoˈna cyuˈn wuyena tuj jun ventan te tapya nakchxsen tjawen, bixsen e cuˈx cyxtunen inayena tiˈjxe tapya tuj jun chiˈl, bix juˈtzen in eˈleya libre tuj tkˈab gobernador.

Jaj o tzaj tyeecˈan Dios te Pablo

12  Amale yaaˈnt tumel te nimsaljaw nbiˈya, pero cjawel wiin wiiba chˈintl mas, tuˈn t‑xiˈ nyeecˈana jun jaxxix t‑akˈanal Cristo kena. Juˈ tzunj, cxeˈl nkbaˈna cyey tiˈj e tzaj tyeecˈan Dios weya bix j‑e tzaj tkbaˈn Dios weya. ² Ntzkiˈna jun ocslal tiˈ Cristo. Aj tiiˈn Dios jaxin tuj toxen cyaˈj jun rato maa jaaˈ taˈ Dios. Ma bint cyajlaaj jnabkˈi tbajlen jlu. Mintiiˈ tumel wuyena ka tuyax t‑xumlalxin e jax tiiˈn Dios tuj cyaˈj bix ka e cyaj t‑xumlalxin twitz txˈotxˈ. Nuk ja Dios itzkilte. ³ Pero jax wuˈna, kale tuyax t‑xumlalxin, bix kale yaaˈn tuyax, ⁴ pero e jax tiiˈn Dios jaxin tuj cyaˈj. Jatztzen oca tbiˈnxin jyol jawnexsen nunca tzˈel cyniyˈ xjal te twitz txˈotxˈ tiˈj, bix min e kˈoj texin tuˈn tcub tenxin txˈolbalte ti otk tzˈoc tbiˈnxin tuj cyaˈj. ⁵ Tiˈj tzunj nintzaj xtalbil lu e tzaj tkˈoˈn Dios tej ocslal lu, nchin tzalaja tiˈj. Pero te weya, yaaˈn te nnimbil wiiba, sino nuk jaj tiˈj qˈuixcˈaj o tziyˈx wuˈna cxeˈl ntxˈolbaˈna, tuˈntzen tel cyniˈya tiˈj yaaˈn jawnex kena. ⁶ Nuket waja tuˈn t‑xiˈ nkˈumena inayen tzuna in x‑aja tuj cyaˈj, jacˈa baj nkˈumena, cuma jaxte in x‑aja. Pero miˈn txiˈ nkbaˈna mas ti tten, cuma ncyˈiya tuˈn toc cynimana inayena nuk tuˈnj nx‑ajlena tuj cyaˈj jun maj. Waja tzˈoc cynimana inayena nuk tuˈnj baˈn nnaabla nxiˈ nyeecˈana cyxola bix tuˈnj nyola o tzˈoc cybiˈna.

⁷ Tuˈnj tikˈch e tzaj tyeecˈan Dios weya tuj cyaˈj, kape njaw nnimsan wiiba tiˈj. Juˈ tzunj jun nimxsen pena oc weya, tisen jun chˈiˈx n‑oc ẍuyˈj tuj nchuˈla, tuˈntzen taajtz tiˈ nnaabla. Jpena niyˈx wuˈna tisen jun tsanjel taaw il toc yajlal te weya. ⁸ Oxe maj e xiˈ ncubsaˈna nwitza te Kaaw tuˈn tel tiiˈnxin jpena toc wiˈja. ⁹ Pero min e tcuyaxin, sino e tzaj tkbaˈnxin weya: “Cxeˈl nkˈoˈna wipemala tey te onl tey. Ka yaaˈn jawnexa, mas cchicˈajaxel weya wipemal oj woniya tiˈja,” tz̈i Kaaw weya. Juˈ tzunj mas nchin tzalaja tiˈj yaaˈn jawnex kena, twitzj nbaj nniman wiiba tiˈj oc ncyeˈyena tuj cyaˈj, cuma ka yaaˈn jawnex kena, mas nchicˈajax tipemal Cristo weya oj tbint taakˈen Dios wuˈna. ¹⁰ Juˈ tzunj baˈn tuj nwitza yaaˈn jawnex xjal kena. Nchin tzalaja oj nchi jaw cyakbitl xjal wiˈja tuˈnj nchin akˈanana tuj taakˈen Cristo. Bix nchin tzalaja oj at pena wiˈja, bix oj nchi jaw ilen xjal wiˈja, bix oj nim kaˈ toc wiˈja, cuma oj tchicˈajax yaaˈn jawnex kena, qˈueleltzen cyniyˈ xjal tiˈj nuk tuˈnj tipemalxin nbint taakˈenxin wuˈna.

¹¹ Key hermano, junxsen nchˈixewa xjaw nnimsan wiiba, pero nuket e yolenkey baˈn wiˈja cywitz kej ẍtakˈ xnakˈtzal, mintetletiiˈ il tiˈj tuˈn tjaw nnimsan wiiba. Amale jawnexit t‑akˈanal Cristo ejeeˈ tuj cywitz, pero yaaˈn mas ajnintz kena cywitz, amale yaaˈnt jawnex kena. ¹² Tej ntena cyxola, tuˈnj jawnex akˈuntl e bint wuˈna, bix tuˈnj jawnex techlal e bint wuˈna, e xiˈ nyeecˈana cyey jun jaxxix t‑xel Jesús kena, bix e bint tuya nim iyˈx wuˈna. ¹³ O txiˈ nyeecˈana tuj cykilca tnom t‑xel Cristo kena. Oˈcx min e bint wuˈna cyxola min e nkaniya twiˈ ncˈuˈja cyey. Juˈ tzunj, ¿tzimpa cykbaˈna yaaˈn il cyiˈja wuˈna cywitzj ocslal cyuj juntl tnom? Katzen tuj cywitza yaaˈn il cyiˈja wuˈna, cynajsam chˈin wiˈja min e nkaniya twiˈ ncˈuˈja cyey.

Tej t‑xiˈ tile Pablo ke ocslal tuj tnom Corinto

¹⁴ Key hermano, caˈba maj o chin pona cyxola, bix waja tuˈn npona te toxen maj. Bix oj npona, miˈn chin kanewa pwak cyey. Yaaˈn cypwaka tzin njyoˈna. Nuk jun baˈn te cyey waja. Yaaˈn tumel oj cycˈojlan neeˈ tiˈ cyman, sino ejeeˈ cyman neeˈ chi cˈojlalcye neeˈ. Tujtzen tyol Dios inayena tisen cymana. ¹⁵ Juˈ tzunj nimxsen nchin akˈanana nuk tuˈn jun baˈn te cyey. Nimxsen n‑oc cyakˈa weya. Yajtzen cyey, ¿tikentzen nuk chˈin wakˈa n‑oc cyey?

¹⁶ Amale mint e xiˈ nkanena pwak cyey, pero at juun cyxola tzin cykbaˈn tuˈn xtzˈimj yol o tzˈel wiiˈna cypwaka, cuma n‑el nniˈya tiˈj ti tten tuˈn tcub yaaˈna ke xjal, tz̈ike. ¹⁷ Pero cxeˈl nkanena cyey, ¿ti tten tej cycub yaaˈnkey tuˈn tel wiiˈna cypwaka? Kej e xiˈ nsmaˈna cyuyey nejl, ¿tzimpa cub cybisena e cykanen cyonbila otk chmet te cye mebe tuˈn ttzaj te weya? ¹⁸ Tej t‑xiˈ nsmaˈna Tito tuya juntl tuyaxin cyxola nejl te cyiwsalte cycˈuˈja tuˈn tchmet cypwaka te cye mebe, ¿elpa tiiˈn Tito cypwaka tuˈn ttzaj tkˈoˈn weya? ¡Min! Ejeeˈxa itzkilte e xiˈ texin tuya jun tnaablxin baˈnxix cyxola, tisenxj weya, bix junelne taˈ kyola cyuyaxin.

¹⁹ Key hermano n‑oc cyakˈa weya, oj t‑xiˈ cycyeˈyena wuˈja, kape tuj cywitza nchin clon wiiba cywitza tuˈntzen wela baˈn tuj cywitza. Pero yaaˈn juˈwa. Ttzkiˈn Dios inayena, jun ocslal tiˈ Cristo, ma chin yolena yaaˈn tuˈn wela baˈn tuj cywitza, sino tuˈntzen cycywixa tuj cyocslabla. ²⁰ Ma txiˈ nkbaˈna cykilcaj lu cyey, cuma najkel ncˈuˈja cyiˈja. Kape oj npona cyxola, mintzen otk cyaj cykˈoˈna cyila, bix juˈ tzunj iltzen tiˈj chi oquel wilena, amale cyajata tuˈn nyolena cyuyey tujxix ttz̈yal. Oj npona, kape at kˈoj cyxola. Kape min tzˈoc cycˈuˈja tiˈ cykˈoja, bix kape nchiˈlec cycˈuˈja tiˈ juntl, bix kape nbaj cypaˈn cyiiba, bix kape at ẍtakˈ cyxola, bix kape nchi yolena kaˈ tiˈ juntl, bix kape nchi jaw tz̈ˈiya, bix kape yaaˈn tuj tumel eteˈy. ²¹ Najkel ncˈuˈja, cuma kape oj npona cyxola juntl maj, at nchˈixewa twitz Dios tuˈnj kaˈ nbint cyuˈna. Kape at tuˈn wookˈa cyiˈj ocslal minaˈn tcyaj cykˈoˈn pajbaj bix yaaˈn baˈn bix il.

13  Ojtzen npona cyxola, te toxen maj te cyeyˈlte cyey. Tzin tkbaˈn tyol Dios: “Oj ncub tkˈoˈn cawel jun xjal tuj castiwa, il tiˈj at caˈba oxe tstiwa tiˈ til xjal,” tz̈i tyol Dios. Juˈxsen weya. Kej oxe maj nkena cyxola chi ajbel tisen oxe tstiwa cyiˈja. ² Tejtzen nx‑aja cyxola tcab maj, e xiˈ nkbaˈna cyey, “Ojtzen wula juntl maj cyxola, jatzen chi ex nkˈoˈnja cykilcakej min cyaj cykˈoˈn cyil,” ntz̈iya. Amatzele mintn‑al kena cyxola, cxeˈl nkbaˈna cyey juntl maj oj npona cyxola juntl maj, iltzen tiˈj cxeˈl nkˈoˈna cycastiwey te cykilcakej nchi binchan kaˈ. ³ O tzaj cykbaˈna il tiˈj tuˈn t‑xiˈ nyeecˈana cyey o tzaj tkˈoˈn Cristo wipemala tuˈn wajbena te tyolelxin. Baˈn tbint wuˈna, bix qˈuelel cyniˈya tiˈj Cristo yaaˈn tuˈn mintiiˈ tipemalxin tuˈn t‑xiˈ tkˈoˈnxin castiwa cyey wuˈna, sino at nim tipemal. ⁴ Jaxte tej tcyim Cristo twitz cruz, min chicˈaj tipemalxin tuˈn tcamanxin cyibaj kej nchi kˈojl tiˈjxin. Pero iˈtzxin jaˈlewe, bix nimxsen tzin tyeecˈanxin tipemal Dios. Juˈx xsunj weya. Jwipemala e tzaj tkˈoˈn Cristo weya yaaˈn nim e chicˈajax nejl, pero tisen te Cristo e tyeecˈan tipemal Dios mas yaj, juˈxse weya. Yajtzen cxeˈl nyeecˈana tipemal Dios cyey wuˈna tuˈn ncamana cyibaj kej nchi kˈojl wiˈja.

⁵ Cykˈoˈnc cycˈuˈja tiˈj ti niyˈ tuj cyanema, tuˈntzen tel cyniˈya tiˈj ka o tzˈoc ke cycˈuˈja tiˈ Cristo. Ejeeˈx cyey qˈuelel cyniˈya tiˈj at Jesucristo tuj cyanema. Ntzkiˈna cykbaˈy ocslalkey. ⁶ Tzˈelxit cyniˈya tiˈj ocslalkey, cuma ka ocslalkey, qˈuelel cyniˈya tiˈj jun jaxxix t‑xel Cristo ken weya, cuma tuˈnj tkbaj tyol Dios wuˈna ockey te ocslal. ⁷ Pero mas waja tuˈn t‑xiˈ cyiiˈna cynaabla tuj tumel twitzj tuˈn t‑xiˈ nyeecˈana wipemala te kˈolte cycastiwey tuˈnj kaˈ nbint cyuˈna. Mas baˈn ka jiquenxix eteˈy twitzj tuˈn tchicˈajax at tipemal Dios wuyena. ⁸ Yaaˈn baˈn tuˈn t‑xiˈ nyeecˈana wipemala te cawlte cyey ka tzin cynimana jaxxix tyol Dios. Ka baˈn tzin cybinchaˈna, jax cxeˈl nkˈoˈna baˈn nyola te cyey. ⁹ Nchin tzalaja ka mintiiˈ kaˈ nbint cyuˈna, tuˈntzen mintiiˈ il tiˈj tuˈn t‑xiˈ nyeecˈana wipemala te cawlte cyey. Oj nchin naˈna Dios cyiˈja, yaaˈn nxiˈ nkanena tuˈn t‑xiˈ nyeecˈana wipemala cyey, sino nxiˈ nkanena tuˈn cycywixa tuj cyocslabla.

¹⁰ Juˈ tzunj nxiˈ nsmaˈna wuˈja cyey joocˈtzen minaˈx npona cyxola. Waja tuˈn tcyaj cykˈoˈna cyila, tuˈntzen oj npona cyxola, mintiiˈ il tiˈj tuˈn t‑xiˈ nyeecˈana cyey tipemal Dios. Waja tuˈn tajben tipemal Dios weya, yaaˈn te kˈolte cyey tuj il, sino te cyiwsablte cyey tuj cyocslabla.

Jun kˈolbebl tuˈn Pablo cye ocslal tuj tnom Corinto

¹¹ Key hermano, oˈcxsen nyol jlu. Aleyrexitkey. Cykˈoˈnc cyipena tuˈn cytzketa. Bix cycyiwsanx ke cyuyey. Tzˈelxittzen cywiˈy junx. Tujxittzen ttz̈yal chi temana. Ka nbint cyuˈna juˈwa, Diostzen at cyuyey. N‑octzen cyakˈa te bix ja tzunxin cwel kˈonte cyey tuˈn cytena tuj ttz̈yal. ¹² Cykˈolbem ke cyuyey tuya jun ttz̈yalxix tiˈ cyanema. ¹³ Kej ocslal at wuyena tzalu nxiˈ cykˈoˈn jun kˈolbebl cyey. ¹⁴ Tenxittzen t‑xtalbil Kaaw Jesucristo cyxola, bix juchxit cycˈuˈja tiˈ Kman Dios, bix junxit chi eˈley tuya Espíritu Santo. Oˈcx nyolja.