Bible in 90 Days

परमेस्सर यहोसू क इस्राएल क अगुअइ करइ बोलावत ह

1 मूसा यहोवा क सेवक रहा। नून क पूत यहोसू मूसा क सहायक रहा। मूसा क मनइ क पाछे यहोवा यहोसू स बातन किहस। यहोवा यहोसू स कहेस, ² “मोर सेवक मूसा मर गवा। अब इ सबइ लोग अउर तू यरदन नदी क पार जा। तू पचन्क उ भुइँया मँ जाइ चाही जेका मइँ इस्राएल क लोगन क यानी तू पचन्क दइ देत अहउँ। ³ मइँ मूसा क इ वचन दिहे रहेउँ कि इ भुइँया मइँ तू पचन्क देब। ऍह बरे मइँ तू पचन्क उ हर एक पहँटा देब, जउन कउने ठउरे पइ भी तू जाब्या। ⁴ इ भुइयाँ अउर रेगिस्तानी भुइँया लोबानोन स लइके फरात नदी तलक, हित्तियन क पूरी भुइँया अउर हिआँ स लइके पच्छिम मँ भूमध्य सागर तलक क भुइँया तोहार इलाके क अन्दर तलक होइ। ⁵ मइँ मूसा क संग रहेउँ अउर मइँ उहइ तरह तोहरे संग रहब। तोहरे पूरी जिन्नगी मँ, तू पचन्क कउनो भी मनई तोस स खिलाफ करइ मँ समरथ नाहीं होइ। मइँ तू पचन्क छोड़ब नाहीं। मइँ कबहु तू पचन्क दूर नाहीं होब।

⁶ “यहोसू, तू पचन्क मजबूत अउ हिम्मती होइ चाही। तोहका, इ मनइयन क अगुआ होइ चाही उ जइसे पचे आपन भुइँया लइ सकइँ। इ उहइ भुइँया बाटइ जेका मइँ ओनका देइ क ओनके पुरखन क वचन दिहे रहेउँ। ⁷ मुला तू पचन्क मजबूत अउ हिम्मती रहइ क होइ। तू पचन्क ओन आदेसन क मानब निहचय क संग करइ चाही, जेनका मोर सेवक मूसा तू पचन्क दिहस ह। दाहिने या बाए कइती मत मुड़ा, तउ तू जउन कछू करब्या ओहमाँ सफल होब्या। ⁸ व्यवस्था क इ किताब हमेसा तोहरे दिमाग मँ होइ चाही। इ किताब क सावधानी स दिन-रात पढ़ब, ताकि तू हर उ कछू जउन एहमाँ लिखा भवा अहइ कइ सकब्या। अगर तू इ करब्या, तउ तू बुदिधमान बनब्या अउर जउन कछू करब्या ओहमाँ सफल होब्या। ⁹ याद राखा, कि मइँ तोहका मजबूत अउ हिम्मती बना रहइ क हुकुम दिहे रहेउँ। ऍह बरे कबहुँ जिन डेराअ, काहेकि तोहार परमेस्सर यहोवा तोहरे संग सबहिं जगह रही, जहाँ कहूँ तू जाब्या।”

यहोसू क कार्य निर्वहण

¹⁰ ऍह बरे यहोसू लोगन क प्रमुखन क आदेस दिहस। उ कहेस, ¹¹ “डेरा स होइके जा अउर लोगन क तइयार होइ क कहा। लोगन स कहा, ‘कछू खइया क तइयार कइ लेइँ। अबहिं स तीन दिना पाछे, हम पचे यरदन नदी पार करब। हम पचे जाब अउ उ भुइँया क आपन कब्जा मँ लेब जेका परमेस्सर यहोवा तोहका दइ देत ह।’”

¹² तब यहोसू रूबेन अउ गाद क परिवार समूहन स, अउ मनस्से क आधे परिवार समूह स बतियान। यहोसू कहेस, ^13-14 “ओका याद राखा, जउन यहोवा क सेवक मूसा तू सबन स कहे रहा। उ कहे रहा कि परमेस्सर, तोहार यहोवा तू पचन्क आराम अउर सांति क ठउर देइ। उ इ भुइँया क तू पचन्क देइ। तोहार पचन्क पत्नियन, तोहार पचन्क गदेलन अउ तोहार पचन्क जनावरन इ भुइँया मँ रहि सकत हीं। मुला तोहार पचन्क जोधा लोग तोहरे पचन्क भइयन क संग यरदन नदी क जरुर पार करिहीं। तू पचन्क जुद्ध बरे तइयार रहइ चाही अउ आपन भुइँया लेइ मँ आपन भइयन क मदद करइ चाही। ¹⁵ यहोवा तू पचन्क आराम देइ क एक जगह दिहेस बाटइ, अउर उ तोहरे पचन्क भइयन बरे वइसा ही करी। मुला तू पचन्क आपन भइयन क मदद बरे तब तलक करइ चाही जब तलक उ पचे उ भुइँया क नाहीं लइ लेतेन जेका यहोवा, तोहार परमेस्सर ओनका दइ देत अहइ। तब तू पचे यरदन नदी क पूरब आपन भुइँया मँ लउटि सकत ह। उहइ उ भुइँया अहइ जेका यहोवा क सेवक मूसा तू पचन्क दिहे रहा।”

¹⁶ तब मनइयन यहोसू क जवाब दिहेन, “जउन भी करइ बरे तू हुँकुम देब्या, हम पचे करब। जउने जगह पइ तू पठउब्या, हम पचे जाब! ¹⁷ हम पचे पूरी तरह मूसा क हुकुम माना ह। उहइ तरह हम पचे सब मानब जउन तू कहब्या। हम पचे यहोवा स सिरिफ एक बात चाहित ह। हम पचे परमेस्सर यहोवा स इहइ माँग करित ह कि उ तोहरे संग वइसा ही रहइ जइसेन ही उ मूसा क संग रहा। ¹⁸ तब, कउनो व्यक्ति तोहार हुकुम मानइ स इन्कार करत ह या कउनो मनई तोहरे खिलाफ खड़ा होत ह, तब उ मारी डावा जाइ। सिरिफ मजबूत अउ हिम्मती रहा!”

यरीहो मँ गुप्तचर

2 नून क पूत यहोसू अउ सब मनइयन सित्तीम मँ डेरा डाए रहेन। यहोसू दुइ ठु गुप्तचरन क पठएस। कउनो दूसर मनई क पता नाहीं लाग कि यहोसू इ मनइयन क पठए रहा। यहोसू इ मनइयन स कहेए, “जा अउ भुइँया क जाँच करा, यरीहो सहर क होसियारी स लखा।”

ऍह बरे उ पचे यरीहो गएन। उ पचे एक ठु रंडी क घर गएन अउर हुआँ ठहरेन। इ मेहरारू क नाउँ राहाब रहा।

² कउनो यरीहो क राजा स कहेस, “इस्राएल क कछू लोग आजु रात हमरी धरती पइ गुप्तचरी करइ आवा अहइँ।”

³ ऍह बरे यरीहो क राजा राहाब क हिआँ इ खबर पठएस: “ओन मनइयन क छिपावा नाही जउन आइके तोहार हिआँ ठहरा अहइँ। ओनका बाहेर लिआवा। उ पचे मेदलेइ आपन देस मँ आवा अहइँ।”

⁴ मेहरारु दुइनउँ मनई क छिपाइ रही। मुला मेहरारु कहेस, “उ पचे दुइनउँ मनई आए तउ रहेन, मुला मइँ नाहीं जानत हउँ कि उ पचे कहाँ स आए रहेन। ⁵ सहर दुआर बन्द होइ क समइ उ पचे मनई साँझ क चला गएन। मइँ नाहीं जानत हउँ कि उ पचे कहाँ गएन। मुला अगर तू हाली जाब्या, तउ साइद तू पचे ओनका धइ लेब्या।” ⁶ (राहाब उ सबइ स कहेस, मुला असिल मँ मेहरारु ओनका छते पइ पहोंचाइ दिहे रही, अउर ओनका उ चारा मँ छिपाइ दिहे रही, जेकर ढेर उ ऊपर लगाए रही।)

⁷ ऍह बरे इस्राएल क दुइ ठु मनइयन क खोज मँ राजा क मनई चला गएन। राजा क मनइयन क जरिये सहर छोड़ देइ क तुरन्त पाछे सहर क दुआर बन्द कइ दीन्ह गएन। उ पचे ओन ठउरन पइ गएन जहाँ स लोग यरदन नदी क पार करत रहेन।

⁸ दुइनउँ मनई रात मँ सोवइ क तइयारी मँ रहेन। मुला मेहरारु छते पइ गइ अउ उ ओनसे बात किहस। ⁹ राहाब कहेस, “मइँ जानत हउँ कि इ भुइँया यहोवा तोहरे लोगन क दिहेस ह। तु पचे हम लोग क डेरावत अहा। इ देस मँ रहइवाले सबहिं लोगन तू स बहोत डेरान अहइँ। ¹⁰ हम पचे डेरान अही काहेकि हम पचे सुनि चुका अही कि यहोवा तू लोगन क मदद कइसे किहस ह। हम सुने अही कि तू पचे मिस्र स बाहेर आवा अहा तउ यहोवा लाल सागर क पानी क सोखाइ दिहस। हम पचे इ भी सुने अही कि तू लोग दुइ ठु एमोरी राजा लोग, सीहोन अउ ओग क संग का किह्या। हम पचे सुने अही कि तू लोग यरदन नदी क पूरब मँ रहइवाले ओन दुइ राजा लोगन क कइसे पूरी तरह स हरा दिहेस। ¹¹ हम पचे ओन सबइ घटना क सुने अही अउर बहोत जियादा डेराइ ग अही अउर अब हम मँ स कउनो मनई ऍतना हिम्मती नाहीं कि तू लोगन स लड़ि सकइ। काहेकि तोहार परमेस्सर यहोवा ऊपर सरग अउ तरखाले भुइँया पइ हुवूमत करत ह। ¹² तउ अब, मइँ चाहत हउँ कि तू पचे मोका वचन द्या। मइँ तोहार पचन्क मदद किहेउँ ह अउ तू पचन्पइ दाया किहेउँ ह। ऍह बरे यहोवा क समन्वा वचन द्या कि तू पचे हमरे परिवारे पइ दाया करब्या। कृपा कइके मोका कछू निसान द्या कि तू पचे अइसा करब्या। ¹³ मोसे तू पचे इ कहा कि तू पचे मोरे परिवार क जिअत रहइ देब्या जेहमाँ मोरे पिता, भाई, बहिनियन अउर ओनके परिवार होइहीं। तू पचे प्रण करा कि तू पचे हमका मउत स बचउब्या।”

¹⁴ ओ मनइयन ओका मान लिहन। उ पचे कहेन, “हम तोहरी जिन्नगी बरे अपनी जिन्नगी क बाजी लगाइ देब। कउनो मनई स न बतावा कि हम पचे का करत अही। तब जब यहोवा हम लोगन क हमार देस देइ, तब हम पचे तोहे पइ दाया करब। तू हम पचन्पइ बिस्सास कइ सकत ह।”

¹⁵ उ मेहरारू क घर सहर क देवारे मँ देवारे क एक ठु हींसा क रूप मँ बना रहा। ऍह बरे उ मेहरारू सहर क देवारे क अन्दर अउर बाहेर क हींसा मँ रहर रहेन। ऍह बरे उ महरारू लसुरी क उपयोग कइ क ओनका आपन खिड़की स नीचे (सहर क बाहेर भुइँया प) उतारहेस। ¹⁶ तब उ मेहरारु ओनसे कहेस, “पच्छिम क पहाड़ियन मँ जा, जेहसे राजा क सिपाही तू पचन्क एकाएक न घर पकड़इँ। हुआँ तीन दिन छुपा रहा। राजा क मनई जब लउटि आवइँ तब तू पचे आपन राहे पइ जाइ सकत ह।”

¹⁷ मनइयन ओसे कहेन, “हम पचे तोहका वचन दिहे अही। मुला तोहका एक ठु काम करइ क होइ, नाहीं तउ हम पचे आपन वचन बरे जिम्मेदार नाहीं होब। ¹⁸ तू इ लाल लसुरी क उपयोग हम पचन्क बचिके पराइ जाइ बरे करति अहा। हम पचे इहइ ठउर मँ लउटब। उ समइ तोहका इ लाल लसुरी क आपन खिड़की स जरुर बाँधइ क होइ। तोहका आपन पिता, आपन महतारी, आपन भाई अउर आपन पूरा परिवार क आपन संग इ घरे मँ रखइ क होइ। ¹⁹ हम पचे हर एक मनई क सुरिच्छत रखब जउन इ घरे मँ होइ। अगर तोहरे घरे क भीतर कउनो क चोट पहोंचत ह, तउ ओकरे बरे हम जिम्मेदार होब। अगर तोहरे घरे स कउनो मनई बाहेर जाइ, तउ उ मार डावा जाइ सकत ह। उ मनई बरे हम जिम्मेदार नाहीं होब। इ ओकर आपन दोख होइ। ²⁰ हम पचे इ वाचा तोहरे संग करत अही। मुला अगर तू कउनो क बतउबिउ कि हम पचे क करत अही, तउ हम पचे आपन इ वचन स अजाद होब।”

²¹ मेहरारु जवाब दिहस, “मइँ ऍका अंगीकार करत हउँ।” मेहरारु नमस्कार किहस अउर मनइयन ओकर घर छोड़ दिहन। मेहरारु खिड़की मँ लाल लसुरी बाँधेस।

²² उ पचे ओकरे घरे क तजिके पहाड़ियन मँ चला गएन जहाँ उ पचे तीन दिन रुकेन। राजा क मनइयन पूरी सड़किया पइ ओनकर खोजबीन किहस। तीन दिन पाछे राजा क मनइयन खोज बन्द कइ दिहन। उ पचे ओनका नाहीं हेर पाएन, सो उ पचे सहर मँ लउटि आएन। ²³ तब दुइनउँ मनइयन यहोसू क लगे लउटि आएन। मनइयन पहाड़ियन क तजेन अउर नदी पार किहन। उ पचे नून क पूत यहोसू क लगे गएन अउर जउन कछू ओनके संग भए रहेन, उ सबइ यहोसू क बताएन। ²⁴ उ पचे यहोसू स कहेन, “यहोवा फुरइ सारा भुइँया हम लोगन क दइ दिहस ह। उ देस क सबहिं लोग हम पचन्स डेरान अहइँ।”

यरदन नदी पइ अचरजे क काम

3 दूसर दिन भिन्सारे यहोसू अउ इस्राएल क सबहिं लोग उठेन अउ उ पचे सित्तीम क छोड़ि दिहेन। उ पचे यरदन नदी तलक जात्रा किहन। उ पचे पार करइ स पहिले यरदन नदी पइ डेरा डाएन। ² तीन दिन पाछे सेनापति डेरा क बीच स होइके निकरेन। ³ उ पचे लोगन क हुकुम दिहेन। उ पचे कहेन, “तू लोग याजक अउ लेवी परिवार समूह क आपन परमेस्सर यहोवा क करार क सन्दूख लइ जात भए लखब्या। उ समइ तू पचे जहाँ ह्वा, ओका तजि देब्या अउ ओनके पाछे चलब्या। ⁴ मुला ओनके बहोत निअरे जिन रहा। लगभग एक हजार गज दूर ओनके पाछे रहा। तू पचे यह रासता क जात्रा कबहुँ नाहीं किह्या ह। ऍह बरे अगर तू पचे ओनके पाछे चलब्या, तउ तू पचे जान लेब्या कि तू पचन्क कहाँ जाइ क अहइ।”

⁵ तब यहोसू लोगन स कहेस, “आपन क पवित्तर करा, काहेकि काल्ह भियान यहोवा तू लोगन क बीच मँ चमत्कार देखाइ।”

⁶ तब यहोसू याजकन स कहेस, “करार क सन्दूख क उठावा अउर लोगन क समन्वा स नदी क पार चला।” ऍह बरे याजक लोग सन्दूख क उठाएन अउर ओका लोगन क समन्वा लइ गएन।

⁷ तब यहोवा यहोसू स कहेस, “आजु मइँ इस्राएल क लोगन क निगाह मँ तू पचन्क महान मनई बनाउब सुरु करब। तब लोग जनिहीं कि मइँ तोहरे सबन क संग वइसेन ही अहउँ जइसेन मँ मूसा क संग रहेउँ। ⁸ याजक लोग करार क सन्दूख लइ चलिहीं। याजक लोगन स इ कहा, ‘यरदन नदी क किनारे तलक जा अउर यरदन नदी मँ रुकि जा।’”

⁹ तब यहोसू इस्राएल क लोगन स कहेस, “आवा अउर आपन परमेस्सर यहोवा क हुकुम सुना। ¹⁰ इ इ बात क प्रमाण अहइ कि यहोवा तू लोगन क संग अहइ अउर उ तोहरे पचन क सत्रु कनान क लोगन हित्तियन, हिव्वियन, परिज्जियन, गिर्गासियन, एमोरी लोगन अउर यबूसी लोगन क हराइ अउर ओनका उ देस तजइ क विवस करी। ¹¹ प्रमाण हिआँ अहइ। सारा संसार क सुआमी क करार क सन्दूख उ समइ तोहरे पचन्क अगवा चली जब तू पचे यरदन नदी पार करब्या। ¹² आपन बीच स बारह मनइयन क चुना। इस्राएल क बारह परिवार समूहन मँ स हर एक स एक मनई चुना। ¹³ याजक लोग समूचे संसार क सुआमी, यहोवा क करार क सन्दूख क लइके चलिहीं। उ पचे उ सन्दूख क तोहरे समन्वा यरदन नदी मँ लइ जइहीं। जब उ पचे पानी मँ घुसिहीं, तउ यरदन क पानी क बहब रुकि जाइ। पानी रुकि जाइ अउर उ जगह क पाछे ढेर मँ ठाड़ होइ जाइ।”

¹⁴ याजक मनइयन क समन्वा करार क सन्दूख लइके चलेन अउर मनइयन यरदन नदी पार करइ बरे डेरा क तजि दिहन। ¹⁵ (फसिल कटइ क समइ यरदन नदी आपन किनारन स ऊपर बहत ह। ऍह बरे नदी पूरी तरह भरी भई रही।) सन्दूख लइ चलइवालन याजक लोग नदी क किनारे पहोंचेन। उ पचे पानी मँ गोड़ धरेन। ¹⁶ अउर फौरन उहइ समइ पानी क बहब बन्द होइ गवा। पानी नदी क ऊपर ढेर मँ खड़ा होइ गवा। पानी नदी क चढ़व कइँती लम्बी दूरी तलक लगातार आदाम तलक (सारतान क निअरे एक ठु सहर) ठाड़ होत चला गवा। मनइयन यरीहो क लगे नदी क पार किहन। ¹⁷ याजक लोग यहोवा क करार क सन्दूखे क नदी क बीच लइ जाइके खड़ा होइ गएन अउर हुवाँ भुइँया झुरान होइ गएन जब तलक इस्राएल क लोग यरदन नदी क झुरान भुइँया स होत भए चलिके पार नाहीं करइ लइ, तब तलक याजक हुआँ ओनका जोहत रहेन।

मनइयन क सुमिरन करावइ बरे सिलन

4 जब सबहिं लोग यरदन नदी क पार कइ लिहन तब यहोवा यहोसू स कहेस। ² “मनइयन मँ स बारह ठु मनई चुना। हर एक ठु परिवार समूह स एक ठु मनई चुना। ³ मनइयन क हुकुम द्या कि उ पचे हुआँ नदी क बीच मँ स सिलन क बटोरा जहाँ याजक लोग खड़ा अहइ। ओन बारह सिलन क आपन संग लइ जा। ओन बारह सिलन क उ जगह पइ धरा जहाँ तू पचे आजु रात ठहरा।”

⁴ ऍह बरे यहोसू हर एक परिवार समूह स एक ठु मनई चुनेस तब उ बारह मनइयन क एक संग बोलाएस। ⁵ यहोसू ओनसे कहेस, “नदी मँ हुआँ तलक जा जहाँ पवित्तर सन्दूख अहइ जेहमाँ तोहार परमेस्सर यहोवा क वाचा अहइ। तू पचन मँ स हर एक क एक सिला क खोज करइ चाही। इस्राएल क बारह परिवार समूहन मँ स हर एक बरे एक ठु सिला होइ। उ सिला क आपन काँधे पर ढोवा। ⁶ इ सबइ सिलन याद रखइ बरे तोहरे पचन्क बीच चीन्हा होइहीं। भविस्स मँ तोहर पचन्क गदेलन इ पुछिहीं, ‘इ सबइ सिलन क का महत्व अहइ?’ ⁷ गदेलन स कहा कि यहोवा यरदन नदी मँ पानी क बहब बन्द कइ दिहे रहा। जब यहोवा क करार क सन्दूख नदी क पार किहस तब पानी क बहब बन्द होइ ग रहा। इ सिलन इस्राएल क लोगन बरे इ घटना सदा ही यादगारी होब्या।”

⁸ ऍह बरे इस्राएल क मनइयन यहोसू क हुकुम मानेन। उ पचे यरदन नदी क बीच स बारह सिलन लइ गएन। इस्राएल क बारह परिवार समूहन मँ स हर एक बरे एक ठु सिला रही। उ पचे उ वइसेन ही किहन जइसा यहोवा यहोसू क आदेस दिहे रहा। उ पचे मनई सिलन क आपन संग लइ गएन। तब उ पचे ओन सिलन क हुआँ रखेन जहाँ उ पचे आपन डेरा डाएन। ⁹ (यहोसू क भी यहोवा क पवित्तर सन्दूखे क ढोवइवाला याजकन जहाँ खड़ा रहेन, हुअँई यरदन नदी क बीच मँ बारह सिलन रखइ क रहेन। उ सबइ सिलन आजु भी उ जगह पइ अहइँ।)

¹⁰ यहोवा यहोसू क आदेस दिहे रहा कि उ लोगन स कहइ कि ओनका का करइ चाही। उ सबइ उहइ बातन रहिन, जेनका जरुर करइ बरे मूसा यहोसू स कहे रहा। ऍह बरे पवित्तर सन्दूख क ढोवइवाला याजकन नदी क बीच मँ तब तलक खड़ा ही रहेन, जब तलक इ सबइ सबहिं काम पूरा नाहीं होइ गएन। मनइयन हाली किहन अउ नदी पार कइ गएन। ¹¹ जब लोग नदी क पार कइ लिहेन, तब याजक यहोवा क सन्दूख लइके मनइयन क समन्वा आएन।

¹² रूबेन अउर गादी क परिवार समूह, अउ मनस्से क आधा परिवार समूह, मूसा ओनका जउन करइ क कहे रहा, किहस। इ मनइयन दूसर लोगन क समन्वा नदी क पार किहेन। इ सबइ लोग जुद्ध बरे तइयार रहेन। इ सबइ लोग इस्राएल क दूसर लोगन क उ देस क लेइ मँ मदद करइ जात रहेन, जेका यहोवा ओनका देइ क वचन दिहे रहा। ¹³ लगभग चालीस हजार फउजी, जउन जुद्ध बरे तइयार रहेन, यहोवा क समन्वा स गुजरेन। उ पचे यरीहो क मइदान कइँती बढ़त रहेन।

¹⁴ उ दिन यहोवा इस्राएल क सबहिं लोगन क निगाह मँ यहोसू क एक महान मनई बनाइ दिहस। उ समइ स अगवा लोग यहोसू क सम्मान करइ लागेन। उ पचे यहोसू क सम्मान जिन्नगी भइ वइसेन ही करइ लागेन जइसेन मूसा क करत रहेन।

¹⁵ जउने समइ सन्दूख लइ ढोवइवाला याजकन अबहिं नदी मँ खड़ा ही रहेन, यहोवा यहोसू स कहेस। ¹⁶ “याजकन क नदी स बाहेर आवइ क हुकुम द्या।”

¹⁷ ऍह बरे यहोसू याजक लोगन क आदेस दिहस। उ कहेस, “यरदन नदी क बाहेर आवा।”

¹⁸ याजक लोग यहोसू क आग्या मानेन। उ पचे सन्दूखे क लइके नदी स बाहेर आएन। जब याजक लोगन क गोड़ नदी क दूसरे कइँती भुइँया क छुएन, तब नदी क पानी फुन बहइ लाग। पानी फुन किनारन क ऊपर स वसाइ बहत लाग जइसे इ सबइ लोगन क नदी पार करइ क पहिले रहा।

¹⁹ मनइयन यरदन नदी क पहिले महीना क दसएँ दिन पार किहन। मनइयन यरीहो क पूरब गीलगाल मँ डेरा डाएन। ²⁰ मनइयन ओन बारह सिलन क आपन संग लइ चलत रहेन जेनका उ पचे यरदन नदी स निकारे रहेन अउर यहोसू ओन सिलन क गीलगाल मँ कायम किहे रहा। ²¹ तब यहोसू लोगन स कहेस, “भविस्स मँ तोहार गदेलन आपन महतारी अउर बाप स पूछिहीं, ‘इ सबइ सिलन क का महत्व अहइ?’ ²² तू पचे गदेलन क बतउब्या, ‘इ सबइ सिलन हम लोगन क इ सुमिरन करावइ मँ मदद करत हीं कि इस्राएल क लोग कउने तरह झुरान भुइँया पइ स यरदन नदी क पार किहन। ²³ तोहार परमेस्सर यहोवा नदी क पानी बहब रोक दिहस। नदी तब तलक झुरान रही जब तल इस्राएल क लोग नदी क पार नाहीं कइ किहन। यहोवा यरदन नदी पइ लोगन बरे उहइ किहस, जउन उ पचे लोगन बरे लाल सागर पइ किहे रहेन। याद करा कि यहोवा लाल सागर पइ पानी क बहब ऍह बरे रोके रहा कि लोग ओका पार कइ सकइँ।’ ²⁴ यहोवा इ ऍह बरे किहस कि इ देस क सबहिं लोग जान लेइँ कि तोहार परमेस्सर यहोवा महान सक्ती धरत ह जेहसे लोग सदा ही यहोवा तोहरे परमेस्सर स डेरात रहइँ।”

5 इ तरह, यहोवा यरदन नदी क तब तलक झुरान राखेस जब तलक इस्राएल क लोग ओका पार नाहीं कइ लिहन। यरदन नदी क पच्छिम मँ बसइयन एमोरी राजा लोग अउर भूमध्य सागर क किनारे पइ बसइयन कनानी राजा लोग एकरे बारे मँ सुनेन अउर उ पचे बहोत जियादा डेराइ ग रहेन। ओकरे पाछे उ पचे मँ इस्राएल क लोगन क विरुदध जुद्ध करइ क हिम्मत नाहीं रहि गएन।

इस्राएलियन क खतना

² उ समइ, यहोवा यहोसू स कहेस, “चकमक पाथर क छूरी बनावा अउर इस्राएल क लोगन क खतना फुन करा।”

³ ऍह बरे यहोसू चकमक पाथर क छुरी बनाएस। तब उ इस्राएल क लोगन क खतना क रीति गिबआत हाअरलोत मँ पूरा किहस।

^4-7 इहइ कारण अहइ कि यहोसू ओन सबहिं मनइयन क खतना किहस, जउन इस्राएल क लोगन क जरिये मिस्र छोड़ देइ क पाछे फउज मँ रहइ क उम्र क होइ ग रहेन। रेगिस्तान मँ रहइ क समझ ओन फउजियन मँ स कई लोगन यहोवा क बात नाहीं मानेन। ऍह बरे यहोवा ओन मनइयन क अभिसाप दिहे रहा कि उ पचे “दूध अउ सहद क नदियन वाले भुइँया” क नाहीं लखि पाइँही। यहोवा हमरे पुरखन क उ भुइँया देइ क वचन दिहे रहा, मुला इ सबइ मनइयन क कारण लोगन क चालीस बरिस तलक रेगिस्ताने मँ भटकइ क पड़ा अउर इ तरह उ सबइ फउजी मरि गएन अउर ओनकर जगहिया ओनकइ बेटवन लइ लिहन। मुला मिस्र स होइवाली जात्रा मँ जेतने गदेलन रेगिस्ताने मँ पइदा भ रहेन, ओनमाँ स कउनो क खतना नाहीं होइ सका। ऍह बरे यहोसू ओनकइ खतना किहस।

⁸ यहोसू सबहिं मनइयन क खतना पूरा किहस। उ पचे तब तलक डेरा मँ रहेन, जब तलक तन्दुरुस्त नाहीं भएन।

कनान मँ पहला फसह पर्व

⁹ उ समइ यहोवा यहोसू स कहेस, “जब तू मिस्र मँ गुलाम रह्या तब तोहका गुलामी क लज्जा रह्या। मुला आजु मइँ तोहार लज्जा दूर किहेउँ ह।” ऍह बरे यहोसू उ जगह क नाउँ गिलगाल धरेस अउर उ जगह आजु भी गिलगाल कही जात ह।

¹⁰ जउने समइ इस्राएल क लोग यरीहो क मइदान मँ, गिलगाल क जगह डेरा डाए रहेन, उ पचे फसह पर्व मनावत रहेन। इ महीना क चउदहवाँ दिन क साँझ क रहा। ¹¹ फसह पर्व क पाछे, अगला दिन मनइयन अनाज क उ खइया क खाएन जउन भुइँया पइ उगि रहा। उ पचे बेखमीरे क रोटी अउर भूँजा अनाज खाएन। ¹² उ दिना जब मनइयन भोजन कइ लिहन, ओकरे पाछे सरग स खास भोजन क आउब बन्द होइ ग। ओकरे पाछे, इस्राएल क लोग सरग स बिसेख भोजन नाहीं पाएन। ओकरे पाछे उ पचे उहइ भोजन खाएन जउन कनान मँ पइदा होइ रहा।

¹³ जब यहोसू यरीहो क निअरे रहा तब उ ऊपर आँखी उठाएस अउर उ आपन समन्वा एक ठु मनई क लखेस। उ मनई क हाथे मँ एक ठु तरवार रही। यहोसू उ मनई क लगे गवा अउ ओहसे पूछेस, “का तू हमरे मीतन मँ स कउनो एक अहा या हमार दुस्मनन मँ स?”

¹⁴ उ मनई जवाब दिहस, “मइँ दुस्मन नाहीं हउँ। मइँ यहोवा क फउज क सेनापति अहउँ। मइँ अबहुँ-अबहुँ तोहरे लगे आवा हउँ।”

तब यहोसू आपन मूँड़ भुइँया तलक आपन सम्मान परगट करइ बरे निहुराएन। उ पूछेस, “का मोरे सुआमी क मोर बरे कउनो हुकुम अहइ? मइँ तोहार सेवक अहउँ।”

¹⁵ यहोवा क फउज क सेनापति जवाब दिहस, “आपन पनही उतारा। जउन जगह पइ तू खड़ा अहा उ ठउर पवित्तर अहइ।” ऍह बरे यहोसू ओकर हुकुम मानेस।

यरीहो पइ कब्जा 6 ¹ यरीहो सहर क दुआर बन्द रहेन। उ सहर क लोग डेरान रहेन काहेकि इस्राएल क लोग निअरे रहेन। कउनो सहर मँ नाहीं जात रहा अउर कउनो सहर स बाहेर नाहीं आवत रहा।

² तब यहोसू यहोवा स कहा, “लखा, मइँ यरीहो सहर क तोहरे अधिकार मँ दइ दिहेउँ ह। ऍकर राजा अउर एकर सारे सिपाही तोहरे मातहत अहइँ। ³ छ: दिना तलक हर एक दिन आपन फउज क संग सहर क चारिहुँ कइँती गस्त करा। ⁴ भेड़ क सींगन क तुरहियन क लइके सात याजकन क चलइ द्या। याजकन स कहा कि उ पचे पवित्तर सन्दूखन क समन्वा चलइँ। सतएँ दिन सहर क चारिहुँ कइँती सात फेरा करा। सतएँ दिन याजक लोगन स कहा कि उ पचे चलइ क समइ तुरही बजावइँ। ⁵ याजक लोग तुरहियन स खूब जोर क अवाज करिहीं। जब तू उ अवाज सुना तउ तू सब लोगन स चिचियाब सुरु करइ कहा। जब तू अइसा करब्या तउ सहर क देवारन भहराइ जइहीं। तब तोहार लोग सीधा सहर मँ जइहीं।”

⁶ इ तरह नून क पूत यहोसू याजकन क बटोरेस। यहोसू ओनसे कहेस, “यहोवा क पवित्तर सन्दूख क लइ चला। सात याजकन क भी तुरही लइ चलइ बरे ल्या। ओन याजकन क सन्दूखे क समन्वा चलइ चाही।”

⁷ तब यहोसू लोगन क हुकुम दिहस, “जा अउर सहर क चारिहुँ कइँती ताकत क परिक्रमा करा। अस्त्र-सस्त्र वाले फउजी यहोवा क पवित्तर सन्दूखे क अगवा चलइँ।”

⁸ जब यहोसू लोगन स बोलब पूरा किहस तउ यहोवा क समन्वा सात याजक लोग चलब सुरु किहेन। उ पचे तुरहियन लिए भए रहेन। चलत समइ उ पचे तुरहियन बजावत रहेन। यहोवा क सन्दूख क लइके चलइवालन याजक लोग ओनके पाछे चलन रहेन। ⁹ अस्त्र-सस्त्र धारण करइवाले फउजी याजक लोगन क अगवा चलत रहेन। याजक तुरही बजावत रहेन। बचा भवा मनई तुरही बजावत भए पवित्तर सन्दूख क पाछे चलत रहेन। ¹⁰ मुला यहोसू ओनका आवाज न लगइ बरे हुकुम दिहेस। उ कहेस, “जिन बोला अउ नाहीं आवाज करा जब तलक कि मइँ हुकुम न दइ। मोरे कहइ क समइ तू पचे ललकार सकत ह।”

¹¹ ऍह बरे यहोसू याजक लोगन क यहोवा क पवित्तर सन्दूख क संग सहर क चारिहुँ कइँती लइ चलइ क हुकुम दिहस। तब उ पचे आपन डेरा मँ लउटि गएन अउर रात भइ हुवँइ ठहरेन।

¹² दूसर दिन, भिन्सारे यहोसू उठा। याजक फिन यहोवा क पवित्तर सन्दूख क लइके चलेन। ¹³ अउर सातउँ याजक लोग सात तुरही लइके यहोवा क पवित्तर सन्दूख क समन्वा बजावत भएन चलेन। उ पचे कदम स कदम मिलावत रहेन। ओनके समन्वा अस्त्र-सस्त्र धारण करइवालन फउजी चलत रहेन। अस्त्र-सस्त्र धारण करइवालन फउजी जउन याजक लोग तुरहियन बजावत रहेन क संग यहोवा क सन्दूख क पाछे चलत रहेन। ¹⁴ ऍह बरे दूसर दिन, ओन सबइ लोग एक दाई सहर क चारिहुँ कइँती चक्कर लगाएन अउर तब उ पचे आपन डेरन मँ लउटि गएन। उ पचे लगातार छ: दिन तलक इ किहन।

¹⁵ सतएँ दिन उ पचे भोर मँ उठेन अउर उ पचे सहर क चारिहुँ कइँती सात चक्कर लगाएन। उ पचे उहइ तरह सहर क चक्कर लगाएन जउने तरह उ पचे ओकरे पहिले लगाइ चुका रहेन, मुला उ दिन उ पचे सात चक्कर लगाएन। ¹⁶ जब उ पचे सतइँ दाई सहर क चक्कर लगाएन तउ याजक लोग आपन तुरही बजाएन। उ समइ यहोसू आदेस दिहस, “अब तू जोर स आवाज लगा। यहोवा इ नगर तू पचन्क देत अहइ। ¹⁷ सहर अउ एहमाँ क हर एक चीज यहोवा क अहइ।^[a] सिरिफ पतुरिया राहाब अउ ओकरे घरे मँ रहइवाले लोग ही जिअत रइहीं। इ सबइ मारा नाहीं जाइ चाही काहेकि राहाब ओन दुइनउँ गुप्तचरन क मदद किहे रही। ¹⁸ इहउ सुमिरा कि हम क ऍकरे अलावा दूसर चिजियन्क बरबाद करइ क अहइ। ओन चिजियन्क जिन ल्या। अगर तू पचे ओन चिजियन्क लेत अहा अउर आपन डेरन मँ लिआवत अहा तउ तू पचे खुद बरबाद होइजाब्या अउर तू पचे आपन सबहिं इस्राएली लोगन पइ भी मुसीबत लिअउब्या ¹⁹ सबहिं चाँदी, सोना अउर लोहा क बनी चिजियन यहोवा क अहइँ। इ सबइ चिजियन यहोवा क खजाने मँ ही धरी जाइ चाही।”

²⁰ याजक लोग तुरही बजाएन। मनइयन तुरहियन क अवाज सुनेन अउर आवाज लगवत सुरु किहेन। देवारन भहरानिन अउर लोग सीधे सहर मँ धावइ लागेन। इ तरह इस्राएल क लोग सहर क हराएन। ²¹ मनइयन सहर क हर एक चीज बरबाद किहेन। उ पचे हुआँ क हर एक जिअत परानी क बरबाद किहन। उ पचे नउजवान, बु़ढ़वन, जवान मेहररुअन, बुढ़ियन, भेड़िन अउर गदहन क मार डाएन।

²² यहोसू दुइनउँ गुप्तचरन स बतियान। उ कहेस, “पतुरिया क घरे जा। ओका बाहेर लइ आवा। सबइ मनइयन क बाहेर लइ आवा अउर ओन लोगन क भी बाहेर लइ आवा जउन ओकरे संग अहइँ। इ तू पचे ऍह बरे करा कि तू पचे ओका वचन दिहे अहा।”

²³ दुइनउँ मनई घर मँ गएन अउर राहाब क बाहेर लिआएन। उ पचे ओकर पिता, महतारी, भाइयन अउ ओकर समूचइ परिवार अउ ओकरे साथे क दूसर सबहिं क बाहेर निकारेन। उ पचे इस्राएल क डेरा क बाहेर इ सबहिं लोगन क सुरच्छित रखेन।

²⁴ तब इस्राएल क लोग सारा सहर जराए दिहन। उ पचे सोना, चाँदी, काँसा, अउर लोहा स बनी चिजियन क अलावा सबहिं चिजियन क जराए दिहन। इ सबइ चिजियन यहोवा क खजाने बरे बचाइ लीन्ह गइन। ²⁵ यहोसू राहाब, ओकर परिवार अउ ओकरे रिस्तेदारन क बचाइ लिहस। यहोसू ओनका जिअत रहइ दिहस काहेकि राहाब ओन लोगन क मदद किहे रही, जेनका उ यरीहो मँ जासूसी करइ बरे पठए रहा। राहाब आज भी इस्राएल क लोगन मँ आपन सन्ताने क रुप मँ रहति ह।

²⁶ उ समइ, यहोसू किरिया खाएस। उ कहेस:

²⁷ एह बरे यहोवा, यहोसू क संग रहा अउर इ तरह यहोसू पूरे भुइँया मँ प्रसिद्ध होइ गवा।

आकान क पाप

7 मुला इस्राएल क लोग परमेस्सर क आग्या नाहीं मानेन। यहूदा परिवार समूह क एक मनई आकान कर्मी क पूत जउन जब्दी क पूत रहा। आपन संग कछू वर्जित चिजियन धइ लिहेस जेनका बरबाद करइ क रहा। ऍह बरे यहोवा इस्राएल क लोगन पइ कोहाइ गवा।

² जब उ पचे यरीहो क हराइ चुकेन तब यहोसू कछू लोगन क पठएस। ऐ, बेतेल क पूरब बेतावेन क लगे रहा। यहोसू ओनसे कहेस, “ऐ जा अउर उ छेत्र क कमजोरियन क लखा।” ऍह बरे लोग उ देस मँ जासूसी करइ गएन।

³ पाछे उ मनईयन यहोसू क लगे लउटिके आएन। उ पचे कहेन, “ऐ कमजोर छेत्र अहइ। हम लोगन क ओनका हरावइ बरे आपन सबहिं लोगन क जरुरत नाहीं पड़ी। हुआँ लड़इ बरे दुइ हजार या तीन हजार मनइयन क पठवा। आपन सबहिं फउजन क हुआँ उपयोग करइ क जरुरत नाहीं अहइ। हुआँ पइ थोड़ा मनई हम लोगन क खलाफ लड़इवाला अहइँ।”

^4-5 ऍह बरे लगभग तीन हजार मनईयन ऐ क खिलाफ गएन। मुला ऐ क लोग लगभग छत्तीस इस्राएल क मनइयन क जंग मँ मार गिराएन अउ बचा भवा इस्राएल क लोग पराइ गएन। ऐ क लोग सहर-दुआर स लगातार पाथर क खदानन तलक पाछा किहन। इ तरह ऐ क लोग ओनका ढलवान पइ बुरी तरह हराएन।

जब इस्राएल क लोग इ लखेन तउ उ पचे बहोत डेराइ गएन अउर आपन हिम्मत हार गएन। ⁶ जबहिं यहोसू एकरे बारे मँ सुनेस तउ उ आपन ओढ़ना फाड़ि डाएस। उ पवित्तर सन्दूखे क समन्वा भुइँया पइ ओलरा। यहोसू हुआँ साँझ तलक पड़ा रहा। इस्राएल क नेता लोग इहइ किहन। उ पचे आपन मूँड़ि पइ धूरि डाएन।

⁷ तब यहोसू कहेस, “यहोवा, मोर सुआमी। तू हमरे लोगन क यरदन नदी क पार लिआया। मुला तू हमका ऍतनी दूर काहे लिआया, का सिरिफ एमोरी लोगन क जरिये स हम लोगन क बरबाद करइ बरे लिआया? हम लोग यरदन नदी क दूसरे किनारे पइ ठहरा होइत अउर सन्तुट्ठ रहित। ⁸ मोरे मालिक, मइँ आपन जिन्नगी क कसम खाइके कहत हउँ कि मइँ तोहस का कहइ सकत हउँ। इस्राएल आपन दुस्मनन क पास स भाग गहेस ह। ⁹ कनानी अउ इ देस क सबहिं लोग इ सुनिहीं जउन भवा, तब उ पचे हम लोगन क खिलाफ अइहीं अउर हम सबन क मारि डइहीं। तब इ तू आपन महान नाउँ क रच्छा बरे का करब्या?”

¹⁰ यहोवा यहोसू स कहेस, “खड़ा होइ जा। तू आपन मुँहे क बल काहे गिरा अहा? ¹¹ इस्राएल क लोग मोरे खिलाफ पाप किहन। उ पचे मोरी उ करार क तोड़ेन, जेका मइँ ओनका संग किहेस रहेउँ। उ पचे उ चिजियन मँ स कछू चिजियन लिहन जेनका बरबाद करइ क हुकुम मइँ दिहेउँ ह। उ पचे मोर चोरी किहेन ह। उ पचे लबार बात कहेन ह। उ पचे उ सबइ चिजियन आपन लगे धरेन ह। ¹² इहइ कारण अहइ कि इस्राएल क फउज आपन दुसमनन क नाहीं हराइ सकेस। उ पचे पलटेन अउर आपन दुस्समन स पराइ गएन काहेकि कउनो मनई ओन चिजियन क लिहेन जेका बरबाद करइ चाहत रहा। मइँ तब तलक तोहार मदद नाहीं करब जब तलक तू उ चिजियन क बरबाद नाहीं करब्या जेका मइँ तू पचन्क क बरबाद कइ करइ क हुकुम दिहे रहा।

¹³ “अब तू जा अउर लोगन क पवित्तर करा। लोगन स कहा, ‘उ पचे आपन क पवित्तर करइँ। भियान बरे तइयार होइ जा। इस्राएल क परमेस्सर यहोवा कहत ह कि कछू लोग उ सबइ चिजियन आपन लगे धरे अहइँ, जेनका मइँ बरबाद करइ क हुकुम दिहे रहेउँ। तू तब तलक आपन दुस्मनन क हरावइ क जोग्गा नाहीं होब्या, जब तलक तू ओन चिजियन क खतम नाहीं कइ देब्या।

¹⁴ “‘भियान भिन्सारे तू सबन्क यहोवा क समन्वा खड़ा होइ क होइ। सबहिं परिवार समूह यहोवा क समन्वा पेस होइहीं। दूसर परिवार समूह मँ स यहोवा एक परिवार समूह क चुनी। तब सिरिफ उहइ परिवार समूह यहोवा क समन्वा खड़ा होइ। तब बस उहइ परिवार समूह स यहोव एक कबीला क चुनी। तब सिरिफ उहइ कबीला यहोवा क समन्वा खड़ा होइ। तब यहोवा उ कबीला क प्रत्येक परिवार क परखी अउर उ मँ स एक क चुनी। तब उ परिवार अकेले यहोवा क समन्वा खड़ा होइ जउन कि उ परिवार स एक-एक क चुनी। ¹⁵ उ मनई जउन इ चिजियन क संग पावा जाइ जेनका मइँ बरबाद करइ क हुकुम दिहे रहेउँ, धइ लीन्ह जाइ। तब उ मनई क अउर ओकरे संग ओकर हर एक चीज आगी मँ झोंकिके जरि दीन्ह जाइ। उ मनई यहोवा क करार क तोड़ेस ह। उ इस्राएल क लोगन क बीच मँ बहोत ही सरमनाक काम किहेस ह।’”

¹⁶ दूसरे भिन्सारे यहोसू इस्राएल क सबहिं लोगन क यहोवा क समन्वा लइ गवा। सारा परिवार समूह यहोवा क समन्वा खड़ा होइ गवा। यहोवा यहूदा परिवार-समूह क चुनेस। ¹⁷ तब यहूदा क सारा परिवार समूह यहोवा क समन्वा खड़ा भएन। यहोवा ओन मँ स जेरह कबीला क चुनेस। तब जेरह कबीला क सबहिं परिवार यहोवा क समन्वा खड़ा भएन। ऍनमाँ स जब्दी क परिवार चुना गवा। ¹⁸ तब यहोसू इ परिवार क सबहिं मनसेधुअन क यहोवा क समन्वा आवइ क कहेस। यहोवा कर्मी क पूत आकान क चुनेस। (कर्मी जब्दी क पूत अउर जब्दी जेरह क पूत रहेन।)

¹⁹ तब यहोसू आकान स कहेस, “पूत, तोहका आपन पराथना कहइ चाही। इस्राएल क यहोवा परमेस्सर क सम्मान करइ चाही अउर ओहसे तोहका पापन्क कबूलइ चाही। मोका बतावा कि तू क किह्या? मोहसे कछू छुपावइ क कोसिस जिन करा!”

²⁰ आकान जवाब दिहस, “इ फुरइ अहइ! मइँ इस्राएल क यहोवा परमेस्सर क खिलाफ पाप किहेउँ ह। मइँ जउन किहे हउँ उ इ अहइ: ²¹ हम लोग यरीहो सहर क ऍकर सबहिं चिजियन क संग आपन कब्जे मँ लीन्ह। ओन चिजियन मँ मइँ सिनार क एक सुन्नर आढ़ना अउर लगभग पाँच पौण्ड चाँदी अउर एक पौण्ड सोना लखा। मोर ऍन चिजियन क अपने बरे धरइ क बहोतइ इच्छा रही। ऍह बरे मइँ ओनका लइ लिहेउँ। तू ओन चिजियन क मोरे तम्बू क खाले जमीन मँ गड़ा भवा पउब्या। चाँदी ओढ़ना क खाले अहइ।”

²² ऍह बरे यहोसू कछू मनइयन क तम्बू मँ पठएस। उ पचे धावत धावत पहोंचेन अउर ओन चिजियन क तम्बू मँ छुपा पाएन। चाँदी ओढ़ना क नीचे रही। ²³ उ पचे ओन चिजियन क तम्बू स बाहेर लिआएन। उ पचे ओन चिजियन क यहोसू अउ इस्राएल क सबहिं लोगन क लगे लइ गएन। उ पचे ओका यहोवा क समन्वा जमीने पइ लिआइके पटक दिहेन।

²⁴ तब यहोसू अउर सबहिं लोग जेरह क पूत आकान क घाटी मँ लइ गएन। उ पचे चाँदी, ओढ़ना, सोना, आकान क बिटियन-बेटवन, ओकर गोरुअन, ओकर गदहन, भेड़िन, तम्बू अउर सबहिं चिजियन क भी लिहन। ऍन सबहिं चिजियन क उ पचे आकान क संग आकोर क घाटी मँ लइ गएन। ²⁵ तब यहोसू कहेस, “तू हमरे बरे इ सबइ मुसीबतन काहे किह्या? अब यहोवा तोह पइ मुसीबत लिआइ।” तब सबहिं लोगन आकान अउर ओकर परिवार पइ तब तलक पाथर लोकाएन जब तलक उ पचे मरि नाहीं गएन। उ पचे ओकरे परिवार क मार डाएन। तब मनइयन ओनका अउ ओकर सबहिं चिजियन क बारि दिहेन। ²⁶ आकान क बारि देइ क पाछे ओकरे तने पइ उ पचे कईउ सिलन क धरेन। इ सबइ सिलन आजु भी हुआँ अहइँ। इ तरह यहोवा आकान पइ विपद ढाएस। इहइ कारण अहइ कि ठउर ओकोर घाटी कही जात ह। ऍकरे पाछे, यहोवा लोगन स नाखुस नाहीं रहा।

ऐ बरबाद भवा

8 तब यहोवा यहोसू स कहेस, “डेराअ जिन। हिम्मत न छोड़ा आपन सबहिं सिपाहियन क ऐ लइ जा। मइँ ऐ क राजा क हरावइ मँ तोहार मदद करब। मइँ ओकर नागरिक क, ओकरे सहर क अउर ओकर भुइँया क तोहका दइ देत अहँउ। ² तू ऐ अउर ओकरे राजा क संग उहइ करब्या, जउन तू यरीहो अउ ओकरे राजा क संग किह्या ह। इ दाई तू सिरिफ इ सहर क सारी सम्पत्ति अउ पसु-धन लेब्या अउर आपन लगे धरब्या। फुन तू आपन लोगन क बीच मँ ओकर बँटवारा करब्या। अब तू आपन कछू सिपाहियन क सहर क पाछे छुपइ क हुकुम देब्या।”

³ ऍह बरे यहोसू आपन पूरी फउज ऐ कइँती लइ गवा। तब यहोसू तीस हजार ताकतवर लराकन आपन फउज मँ स चुनेस। उ ऍनका राति क बाहेर पठइ दिहस। ⁴ यहोसू ओनका इ हुकुम दिहस: “मइँ जउन कहत हउँ, ओका होसियारी स सुना। तू पचन्क सहर क पाछे क धेत्र मँ छुपा रहइ चाही। हमला क समइ क बाट जोहा। सहर स बहोत दूर जिन जा। होसियारी स लखत रहा अउ तइयार रहा। ⁵ मइँ फउजियन क आपन संग सहर कइँती हमला बरे लइ जाबउँ। हम लोगन क खिलाफ लड़इ बरे सहर क लोग बाहेर अइहीं। हम लोग मुड़ि जाब अउर पहिले क तरह पराइ जाब। ⁶ उ पचे हम लोगन क तब तलक पाछा करिहीं जब तलक हम लोग ओनका सहर स दूर न लइ जाब। काहेकि उ पचे इ आपन आप मँ सोचिहीं कि उ पचे हम पचन स पहिले क तरह परात अही। ऍह बरे हम लोग ओन लोगन स पराइ जाब। ⁷ तब तू पचे आपन लुकाइ क जगहिया स अउब्या अउ सहर पइ कब्जा कइ लेब्या। तोहार परमेस्सर यहोवा तू पचन्क जीत जाइ क सक्ती देइ।

⁸ “ऍह बरे तू पचे जब सहर पइ कब्जा कइ लया तब ओका बारि द्या। जइसा कि यहोवा तू पचे स कहेस ह। लखा मइँ तू पचन्क इ करइ क हुकुम देत अहउँ।”

⁹ तब यहोसू ओन सिपाहियन क ओनके लुकाइ क जगहिया पइ पठइ दिहेस अउ जोहइ लाग। उ पचे बेतेल अउर ऐ क बीच क जगह गएन। इ जगह ऐ क पच्छिम मँ रही। मुला यहोसू आपन लोगन क संग रात भइ हुअँई रुका रहा।

¹⁰ अगले भिन्सारे यहोसू लोगन क बटोरेस। तब यहोसू अउर इस्राएल क बुजुर्गन सिपाहियन क ऐ लइ गएन। ¹¹ यहोसू क सबहिं सिपाहियन ऐ पइ हमला किहन। उ पचे सहर क दुआर क समन्वा रुकेन। फउज आपन डेरा सहर क उलर दिसा मँ डाएस। फउज अउर ऐ क बीच मँ एक ठु घाटी रही।

¹² यहोसू लगभग पाँच हजार फउजियन क चुनेस। यहोसू ऍनका सहर क पच्छिम मँ छिपइ बरे उ जगह पठएस, जउन बेतेल अउर ऐ क बीच मँ रही। ¹³ मुख्य डेरा सहर क उत्तर दिसा मँ रहा। दूसर सिपाहियन पच्छिम मँ लुकान रहेन। उ रात यहोसू घाटी मँ बिताएस।

¹⁴ पाछे, ऐ क राजा इस्राएल क फउज क लखेस। राजा अउर ओकर लोग लखेन अउ हाली स इस्राएल क फउज स लड़इ बरे अगवा बढ़ेन। ऐ क राजा सहर क पूरब यरदन घाटी कइँती बाहेर गवा। ऍह बरे उ इ न जान सका कि सहर क पाछे फउजी लुकान रहेन।

¹⁵ यहोसू अउ इस्राएल क सबहिं सिपाहियन ऐ क फउज क जरिये आपन क पाछे ढकेलइ दिहन। यहोसू अउ ओकरे फउजियन पूरब मँ रेगिस्तान कइँती धाउब सूरु किहन। ¹⁶ सहर क लोग सोर मचाइ अउर यहोसू क खदेरइ सुरु किहन। अउर ओकरे सिपाहियन सहर तजइ सुरु किहन। ¹⁷ ऐ अउर बेतेल क सबहिं लोग इस्राएल क फउज क पाछा किहन। सहर खुला छोड़ दीन्ह गवा रहा, कउनो भी सहर क रच्छा बरे नाहीं रहा।

¹⁸ यहोवा यहोसू स कहेस, “आपन भाला क ऐ सहर कइँती किए रहा। मइँ इ सहर तोहका देबउँ।” ऍह बरे यहोसू आपन भाला क ऐ सहर कइँती किहस। ¹⁹ इस्राएल क लुकान फउजियन ऍका लखेन। उ पचे हाली स आपन लुकाइ क जगहियन स निकरेन अउर सहर कइँती तेजी स चल पड़ेन। उ पचे सहर मँ घुस गएन अउर ओह पइ कब्जा कइ लिहन। तब फउजियन सहर क बारइ बरे आगी लगाउब सुरु किहन।

²⁰ ऐ क लोग मुड़िके लखेन अउ आपन सहर क जरत पाएन। उ पचे धुआँ अकासे मँ उठत निहारेन। ऍह बरे उ पचे आपन ताकत अउ हिम्मत खोइ दिहन। उ पचे इस्राएल क लोगन क पाछा करब छोड़ेन। इस्राएल क लोगन पराब बन्द किहन। उ पचे मुड़ि गएन अउ ऐ क लोगन स लड़इ चल पड़ेन। ऐ क लोगन बरे पराइ क कउनो सुरच्छित जगह नाहीं रही। ²¹ यहोसू अउ ओकर फउजियन लखेन कि ओकर फउज सहर पइ कब्जा कइ लिहस। उ पचे सहर स धुआँ भी उठत निहारेन। इ तब उ पचे पराब बन्द किहन अउर ऐ क लोगन स जुद्ध करइ सुरु किहन। ²² तब उ सबइ फउजियन जउन लुकान रहेन, जुद्ध मँ मदद बरे सहर स बाहेर निकरि आएन। ऐ क फउजियन क दुइनउँ कइँती इस्राएल क फउजी रहेन, ऐ क फउजी जाल मँ फँस ग रहेन। इस्राएल ओनका हराइ दिहस। उ पचे तब तलक लड़त रहेन जब तलक ऐ क कउनो भी मनसेधू जिअत न रहा, ओनमाँ स कउनो पराइ नाहीं सका। ²³ मुला ऐ क राजा जिअत छोड़ दीन्ह गवा। यहोसू क फउजी ओका ओकरे लगे लिआएन।

जुद्ध क विवरण

²⁴ जुद्ध क समइ, इस्राएल क फउज ऐ क फउजियन क मइदानन अउर रेगिस्ताने मँ ढकेल दिहन अउर इ तरह इस्राएल क फउज ऐ स सबहिं फउजियन क मारइ क काम मइदानन अउर रेगिस्ताने मँ पूरा किहस। तब इस्राएल क सबहिं फउजी ऐ क लउटेन। तब उ पचे ओन लोगन क जउन सहर मँ जिअत रहेन, मारि डाएन। ²⁵ उ दिन ऐ क सबहिं लोग मारा गएन। हुआँ बारह हजार मनसेधू अउ मेहरारु रहेन। ²⁶ यहोसू आपन भाला क, ऐ कइँती आपन लोगन क सहर बरबाद करइ क संकेत क बनाए राखेस अउर यहोसू संकेत देब तब तलक बन्द नाहीं किहस जब तलक सहर क पुरी आबादी बरबाद नाहीं होइ गएन। ²⁷ इस्राएल लोग गोरुअन अउ सहर क चीजन्क अपने लगे धरेन। इ उहइ बात रही कि जेका करइ क यहोवा यहोसू क हुकुम देत समइ, कहे रहा।

²⁸ तब यहोसू ऐ सहर क बार दिहस। उ सहर सूनी चट्टानन क ढेर बन गवा। इ आजु भी वइसा ही अहइ। ²⁹ यहोसू ऐ क राजा क एक बृच्छ पइ फाँसी दइके टाँग दिहस। उ ओका साँझ तलक बृच्छ पइ टँगा रहइ दिहस। सूरज डूबे पइ यहोसू राजा क ल्हास क बृच्छ स उतारइ क हुकुम दिहस। उ पचे ओका सरीर क सहर क दुआर पइ लोकाइ दिहन अउर इका सिलन स ढाँकि दिहन। सिलन क उ ढेर आजु तलक हुअँइ अहइ।

आसीर्बादन अउ अभिसापन क पढ़ा जाब

³⁰ तब यहोसू इस्राएल क परमेस्सर यहोवा बरे एक वेदी बनाएस। उ इ वेदी एबाल पर्वत पइ बनाएस। ³¹ यहोवा क सेवक मूसा इस्राएल क लोगन क बताए रहा कि वेदियन कइसे बनई जाइँ। ऍह बरे यहोसू वेदी क वइसे ही बनाएस जइसे मूसा क व्यवस्था क किताबे मँ समुझावा ग रहा। वेदी बगैर कटे भए पाथरन स बनी रही। ओन पाथरन पइ कबहुँ कउनो औजारे क उपयोग नाहीं भवा रहा। उ पचे उ वेदी पइ यहोवा क होमबलि अउ मेलबलि चढ़ाएन।

³² उ ठउर पइ यहोसू मूसा क व्यसस्था क एक नकल क पाथरन पइ लिखेस। उ इ इस्राएल क सबहिं लोगन क लखइ बरे किहस। ³³ सबइ अगुआ नेता लोग, अफसरन, निआव क अफसरन अउ इस्राएल क सबहिं लोग पवित्तर सन्दूखे क चारिहुँ कइँती खड़ा रहेन। उ पचे ओन लेवी कबीला क याजकन क समन्वा खड़ा रहेन, जउन यहोवा क करार क पवित्तर सन्दूखे क लइ चलत रहेन। इस्राएली अउर बिदेसी प्रवासियन सबहिं लोग हुआँ खड़ा रहेन। आधा लोग एबाल पर्वत क समन्वा खड़ा रहेन अउर दूसर आधा लोग गिरिज्जीम पर्वत क समन्वा खड़ा रहेन। यहोवा क सेवक मूसा ओनसे अइसा करइ क कहेस रहा। मूसा ओनसे अइसा करइ क इ आसीर्बाद बरे कहे रहा।

³⁴ तब यहोसू व्यवस्था क सब वचनन क बाँचेस। यहोसू आसीर्बाद अउ अभिसाप बँचेस। उ सबहिं कछू उ तरह बाँचेस, जउने तरह उ व्यवस्था क किताबे मँ लिखा रहा। ³⁵ इस्राएल क सबहिं लोग हुआँ बटुरा रहेन। सबहिं मेहररुअन, गदेलन अउ इस्राएल क लोगन क संग रहइवाला सबहिं विदेसियन हुआँ बटुरा रहेन अउ यहोसू मूसा क जरिये दीन्ह गएन हर एक आदेस क बाँचेस।

गिबोनियन क जरिये यहोसू क छला जाब

9 यरदन नदी क पच्छिम क सब राजा लोग इ सबइ घटना क बारे मँ सुनेन। इ सबइ हित्ती, एमोरी, कनानी, परिज्जी, हिव्वी, यबूसी लोगन क राजा लोग रहेन। उ पचे पहाड़ी भुइँयन अउर मइदानन मँ रहत रहेन। उ पचे लबानोन तलक भूमध्य सागर क किनारन क लगे भी रहत रहेन। ² उ पचे सबहिं राजा लोग बटुरेन। उ पचे यहोसू अउ इस्राएल क लोगन क संग जुद्ध क योजना बनाएन।

³ गिबोन क लोग उ तरीका क बारे मँ सुनेन, जेहसे यहोसू यरीहो अउ ऐ क हराए रहा। ⁴ ऍह बरे उ पचे इस्राएल क लोगन क धोखा देइ क ठान लिहन। ओनकर इ योजना रही: उ पचे चाम क पुराना बोरियन क आपन गोरुअन पइ लादेस। उ पचे आपन गोरुअन क ऊपर दाखरस क चाम क पुराना मसक क भी डाएन, जेहसे उ पचे अइसा देखाँइ पड़इँ मान ल्या कि उ पचे बहोतइ दूरी क जात्रा कइके आवा अहइँ।

⁵ मनइयन पुरान पनहियन पहिर लिहन। उ पचे पुरान ओढ़ना भी पहिर लिहेन। उ मनइयन कछू बासी, रुखी, खराब रोटियन भी लइ लिहन। इ तरह उ सबइ मनसेधुअन अइसा लगत रहेन मान ल्या उ पचे बहोतइ दूरी क देस स जात्र किहे होइँ। ⁶ तब इ सबइ मनसेधुअन इस्राएल क लोगन क डेरन क लगे गएन। इ डेरा गिलगाल क लगे रहा।

उ सबइ मनसेधुअन यहोसू क लगे गएन अउर उ पचे ओसे कहेन, “हम लोग एक बहोतइ दूर क देस स आवा अही। हम लोग तोहरे संग सान्ति क सन्धि करइ चाहित ह।”

⁷ इस्राएल क लोग इ हिव्वी लोगन स कहेन, “होइ सकत ह तू लोग हम पचन्क धोखा दइ देत ह्वा। होइ सकत ह तू हमरे निचके क रहइवाला ह्वा। हम तब तलक सान्ति क संधि नाहीं कइ सकित जब तलक हम इ नाहीं जान लेइत कि तू पचे कहाँ स आवा अहा।”

⁸ हिव्वी लोग यहोसू स कहेन, “हम पचे आप क सेवक अही।”

मुला यहोसू पूछेस, “तू पचे कउन अहा? तू पचे कहाँ स आवा अहा?”

⁹ मनसेधुअन जवाब दिहन, “हम लोग आप क सेवक अही। हम पचे एक बहोतइ दूरी क देस स आवा अही। हम ऍह बरे आए कि हम पचे तोहरे परमेस्सर यहोवा क महान सक्ती क बारे मँ सुना ह। हम लोग उ भी सुने अही, जउन उ किहस। हम लोग उ सब कछू सुना ह, जउन उ मिस्र मँ किहस। ¹⁰ अउर हम लोग इ भी सुना कि उ यरदन नदी क पूरब दुइ ठु एमोरी लोगन क राजा लोगन क हराएस। हेस्बोन क राजा सीहोन अउर असतारोत क देस मँ बासान क राजा ओग रहेन। ¹¹ ऍह बरे हमरे अगुआ अउर हमरे लोग हमसे कहेन, ‘आपन जात्रा बरे जियादा भोजन लइ ल्या।’ जा अउ इस्राएल क लोगन स बात करा। ओनसे कहा, ‘हम आप क सेवक अही। हम लोगन क संग सान्ति क सन्धि करा।’”

¹² “हमरी रोटियन क लखा। जब हम लोग घर छोड़ा तब इ सबइ गर्मागरम अउ ताजी रहिन। मुला अब आप लखत हीं कि इ सबइ झुरान अउ बासी अहइँ। ¹³ हम लोगन क दाखरस क मसकन क निहारा। जब हम लोग घर तजा तउ इ सबइ नई अउ दाखरस स भरी रहिन। आप लखि सकत हीं कि इ सबइ फाट अउ पुरान अहइँ। हमार ओढ़नन अउ चप्पलन क लखा। आप लखि सकत हीं कि लम्बी जात्रा हमरी चिजियन क खराब कइ दिहे अहइ।”

¹⁴ इस्राएल क लोग जाना चाहत रहेन कि इ सबइ मनई का फुरइ बोलत अहइँ। ऍह बरे उ पचे रोटियन क चखेन, मुला उ पचे यहोवा स नाहीं पूछेन कि ओनका क करइ चाही।

¹⁵ यहोसू ओनके संग सान्ति-सन्धि करइ बरे तइयार होइ गवा। उ ओनका जिअत छोड़इ बरे तइयार होइ गवा। इस्राएल क प्रमुखन यहोसू क वचन क समर्थन कइ दिहन।

¹⁶ तीन दिना पाछे, इस्राएल क लोगन क पता चला कि उ सबइ लोग ओनके डेरा क बहोत निचके रहत हीं। ¹⁷ ऍह बरे इस्राएल क लोग हुआँ गएन, जहाँ उ सबइ लोग रहत रहेन। तीसरे दिन, इस्राएल क लोग गिबोन, कपीरा, बेरोत अउर किर्यत्यारीम सहरन क आएन। ¹⁸ मुला इस्राएल क फउज इ सहरन क खिलाफ लड़इ क जतन नाहीं किहस। उ पचे ओन लोगन क संग सान्ति संधि कइ चुका रहेन। उ पचे ओन लोगन क संग इस्राएल क परमेस्सर यहोवा क समन्वा प्रण किहे रहेन।

सबहिं लोग ओन प्रमुखन क खिलाफ सिकाइत करत रहेन, जउन सन्धि किहे रहेन। ¹⁹ मुला प्रमुख लोगन जवाब दिहन, “हम पचे प्रण किहे अही। हम लोग इस्राएल क परमेस्सर यहोवा क समन्वा प्रण किहे अही। हम ओनके खिलाफ अब लड़ नाहीं सकित। ²⁰ हम लोगन क सिरिफ ऍतना ही करइ चाही। हम ओनका जरुर जिअत रहइ देब। हम ओनका चोट नाहीं पहोंचाइ सकित काहेकि ओनके संग कीन्ह गवा प्रण क तोड़ देइ पइ यहोवा क किरोध हम लोगन क खिलाफ होइ। ²¹ ऍह बरे ऍनका जिअत रहइ द्या। इ सबइ हमार सेवक होइहीं। उ पचे हमरे बरे लकड़ी कटिहीं अउर हमरे मनइयन बरे पानी ढोइहीं।” इ तरह प्रमुखन इ सबइ लोगन क संग कीन्ह गइ आपन सान्ति-सन्धि क नाहीं तोड़ेन।

²² यहोसू गिबोनी लोगन क बोलाएस। उ कहेस, “तू लोग हम स झूठ काहे बोल्या? तोहार भुइँया हम लोगन क डेरा क लगे रहा। मुला तू लोग कहया कि हम लोग बहोत दूरी क देस क अही। ²³ अब तोहरे लोगन क बहोत कस्ट होइ। तोहार सबहिं लोग दास होइहीं। ओनका परमेस्सर क निवास^[b] बरे लकड़ी काटब अउर पानी भरइ क पड़ी।”

²⁴ गिबोनी लोग जवाब दिहन, “हम लोग तोहसे स झूठ बोले काहेकि हम लोगन क डर रहा कि तोहसे कहूँ हम लोगन क मारि न डावइँ। हम लोग सुना ह कि परमेस्सर आपन सेवक मूसा क इ आदेस दिहे रहा कि उ पचे तोहका इ सारा भुइँया दइ देइँ अउर परमेस्सर तोहसे उ भुइँया मँ रहइवालन सबहिं लोगन क मारि डावइ बरे कहेस। इहइ कारण अहइ कि हम लोग तोहसे स झूठ बोले। ²⁵ अब हम आप क सेवक अही। आप हमार उपयोग जइसा ठीक समुझइँ, कइ सकत हीं।”

²⁶ इ तरह गिबोन क लोग दास होइ गएन। मुला यहोसू ओनकर जिन्नगी बचाएस। यहोसू इस्राएल क लोगन क ओनका मारइ नाहीं दिहस। ²⁷ यहोसू गिबोन क लोगन क इस्राएल क लोगन क दास बनइ दिहस। उ पचे इस्राएल क लोगन अउ यहोवा क चुने भए जउनो भी ठउर क वेदी बरे लकड़ी काटत अउ पानी भरत रहेन। उ सबइ लोग अब तलक दास अहइँ।

उ दिन जब सूरज स्थिर रहा

10 इ समइ अदोनीसेदेक यरूसलेम क राजा रहा। इ राजा सुनेस कि यहोसू ऐ क जीतेस ह अउर एका पूरी तरह बरबाद कइ दिहस ह। राजा क इ पता लाग कि यहोसू यरीहो अउ ओकरे राजा क संग भी इहइ किहस ह। राजा क इ भी जानकारी मिली कि गिबोनी लोग इस्राएल क संग सान्ति-सन्धि कइ लिहस ह अउर उ सबइ लोग यरूसलेम क बहोत निचके रहत रहेन। ² ऍह बरे अदोनीसेदेक अउ ओकर लोग इ सबइ घटना क कारण बहोत डेरान रहेन। गिबोन ऐ क तरह नान्ह सहर नाहीं रहा। गिबोन एक ठु बहोत बड़ा सहर^[c] रहा जेहमाँ राजा रहे रहा। अउर सहर क सबहिं मनसेधू अच्छा जोधा रहेन। ³ यरूसलेम क राजा अदोनीसेदेक हेब्रोन क राजा होहाम स बातन किहेस। उ यर्मूत क राजा पिराम, लाकीस क राजा यापी, एगलोन क राजा दबीर स भी बातचीत किहस। यरूसलेम क राजा इ मनइयन स पराथना किहस, ⁴ “मोरे संग आवइँ अउर गिबोन प हमला करइ मँ मोर मदद करइँ। गिबोन यहोसू अउ इस्राएल क लोगन क संग सान्ति-सन्धि कइ लिहस ह।”

⁵ इ तरह पाँच एमोरी राजा लोग फउजन क मिलाएन। (इ सबइ पाँचउ यरूसलेम क राजा, हेब्रोन क राजा, यमूर्त क राजा, लाकीस क राजा, अउर एग्लोन क राजा रहेन।) उ सबइ फउजन गिबोन गइन। फउजन सहर क घेरि लिहन अउ एकरे खिलाफ जुद्ध करब सुरु किहन।

⁶ गिबोन सहर मँ बसइयन मनइयन गिलगाल क डेरा मँ यहोसू क खबर भेजेन: “हम पचे तोहर सेवक अही। हम लोगन क अकेल्ले मँ जिन तजा। आवा अउर हमार रच्छा करा। हाली करा। हम पचन्क बचावा। पहाड़ी देसन क सबहिं एमोरी राजा आपन आपन फउजन क एकउट कइ चुका बाटेन अउर हम पचन पइ हमला किहेस।”

⁷ ऍह बरे यहोसू गिलगाल स आपन पूरी फउज क संग जुद्ध बरे चला। यहोसू क उत्तिम जोधा ओकरे संग रहेन। ⁸ यहोवा यहोसू स कहेस, “ओन फउजन स जिन डेराअ। मइँ तू पचन क ओनका हरावइ देब। ओन फउजन मँ स कउनो भी तू पचन क हरावइ मँ समर्थ नाहीं होइ।”

⁹ यहोसू अउ ओकर फउज रात भइ गिबोन कइँती बढ़त रही। दुस्मन क पता नाहीं रहा कि यहोसू आवत अहइ। ऍह बरे जब उ हमला किहस तउ उ पचे चौंक पड़ेन।

¹⁰ यहोवा ओन फउजन क इस्राएल क फउजन क जरिये हमाला क समइ का करइ या न करइ चाही सोच मँ डाइ दिहस। यह बरे इस्राएलियन ओनका हराइके बहोत बड़ी जीत पाइ लिहन। इस्राएलियन पाछा कइके ओनका गिबोन स खदेर दिहन। उ पचे बेथोरोन तलक जाइवाली सड़क तलक ओनकर खदेर दिहन। इस्राएल क फउज अजेका अउ मक्केदा तलक क समूचइ राहे मँ मनसेधुअन क मारेस। ¹¹ इस्राएल क फउज बेथ-हरोन क जाइवाली सड़क तलक दुस्मनन क खदेर दिहस। जबहिं उ पचे दुस्मनन क खदेरत रहेन तउ यहोवा भारी ओला क बर्खा अजेका तलक अकासे स किहस। बहोत स दुस्मन ऍन भारी ओला क बर्खा स मरि गएन। इ सबइ ओला स ओहसे जियादा दुस्मन मारा गएन जेतना इस्रलियन क तरवारन स मरि ग रहेन।

¹² उ दिना यहोवा इस्राएलियन क जरिये एमोरी लोगन हार जाइ दिहन अउ उ दिन यहोसू इस्राएल क सबहिं क समन्वा खड़ा भवा अउ उ यहोवा स कहेस:

¹³ सूरज स्थिर होइ गवा अउ चन्दा भी तबहिं तलक चलब तजि दिहस जब तलक मनइयन आपन दुस्मनन क हराइ नाहीं दिहन। इ फूरे भवा, इ कथा यासार क किताबे मँ लिखी अहइ। सूरज असमान क बीच रुका। इ पूरा दिन हुआँ स नाहीं हटा। ¹⁴ अइसा उ दिन क पहिले कउनो भी समइ कबहुँ नाहीं भवा रहा अउर तब स अब तलक कबहुँ नाहीं भवा बाटइ। उहर दिन रहा, जब यहोवा मनई क बिनती सुनेस। असल मँ यहोवा इस्राएलियन बरे जुद्ध करत रहा।

¹⁵ एकरे पाछे, यहोवा अउ ओकर फउज गिलगाल क डेरा मँ वापस भइ। ¹⁶ जुद्ध क समइ पाँचहु राजा पराइ गएन। उ पचे मक्केदा क निअरे गुफा मँ लुकाइ गएन। ¹⁷ मुला कछु मनइयन ओनका गुफा मँ लुका भवा पाएस। यहोसू क एकरे बारे मँ पता चला। ¹⁸ ऍह बरे उ कहेस, “गुफा क जाइवाला दुआरे क बड़वार सिलन स ढाँपि द्या। कछू मनसेधुअन क गुफा क रखवारी बरे हुआँ रखा। ¹⁹ मुला हुआँ खुद न रहा। दुस्मन क पाछा करत रहा। ओन पइ पाछे स हमला करत रहा। दुस्मनन क आपन सहर तलक सुरच्छित जिन पहोंचइ द्या काहेकि तोहार परमेस्सर यहोवा तू पचन्क ओन पइ विजय दिहेस ह।”

²⁰ इ तरह यहोसू अउ इस्राएल क मनइयन दुस्मनन क मर डाएन। मुला दुस्मनन मँ स कछू आपन सहरन मँ जाइ सकेन अउ लुकाइ गएन। उ सबइ मनइयन नाहीं मारा गएन। ²¹ जुद्ध क पाछे, यहोसू क फउजी मक्केदा मँ ओनके लगे आएन। उ प्रदेस मँ कउनो मँ कउनो भी जाति क लोगन मँ स कउनो भी ऍतना हिम्मती नाहीं रहा कि उ लोगन क खिलाफ कछू कहि सकइ।

²² यहोसू कहेस, “गुफा क दुआर क रोकइवाली सिलन क हटावा। ओन पाँचउ राजा लोगन क मोरे लगे लिआवा।” ²³ ऍह बरे यहोसू क लोग पाँचउ राजा लोगन क गुफा स बाहेर लिआएन। इ सबइ पाँचउ यरूसलेम, हेब्रोन, यमूर्त, लाकीस अउ एग्लोन क राजा लोग रहेन। ²⁴ ऍह बरे उ सबइ ओन पाँचउ राजा लोगन क यहोसू क लगे लिआएन। यहोसू आपन सबहिं लोगन क हुआँ आवइ बरे कहेस। यहोसू फउज क अफसरन स कहेस, “हिआँ आवा। ऍन राजा लोगन क गले पइ आपन गोड़ धरा।” ऍह बरे यहोसू क फउज क अफसर लोग निचके आएन। उ पचे राजा लोगन क गले पइ आपन गोड़ धरेन।

²⁵ तब यहोसू आपन फउजियन स कहेस, “मजबूत अउ हिम्मती बना। डेराअ जिन। मइँ देखाउब कि यहोवा ओन दुस्मनन क संग का करी, जेनसे तू पचे भविस्स मँ जुद्ध करब्या।”

²⁶ तब यहोसू पाँचउ राजा लोगन क मार डाएस। उ ओनकर ल्हास पाँच ठु बृच्छन पइ लटकाइ दिहस। यहोसू ओनका सूरज बूड़इ तलक हुअँइ लटकत छोड़े रखा। ²⁷ सूरज बूड़े पइ यहोसू आपन लोगन स ल्हासन क बृच्छन स उतारइ क कहेस। तब उ पचे ओन ल्हासन क उ गुफा मँ बहाइ दिहस, जेहमाँ उ पचे लुकान रहेन। उ पचे गुफा क दुआर क बड़वार पाथर क सिलन स ढाँकि दिहन, जउन आजु तलक हुअँइ अहइँ।

²⁸ उ दिन यहोसू मक्केदा क हराएस। यहोसू राजा अउ उ सहर क लोगन क मार डाएस। हुआँ कउनो मनई जिअत नाहीं छोड़ा गवा। यहोसू मक्केदा क राजा क संग उहइ किहस जउन उ यरीहो क राजा क संग किहे रहा।

दक्खिनी सहरन क लीन्ह जाब

²⁹ तब यहोसू ऊउ इस्राएल क सबहिं लोग मक्केदा स जात्रा किहन। उ पचे लिब्ना गएन अउर उ सहर पइ हमला किहन। ³⁰ यहोवा इस्राएल क लोगन क उ सहर अउ ओकरे राजा क हार जाइ दिहस। इस्राएल क लोग उ सहर क हर मनई क मार डाएन। कउनो मनई जिअत नाहीं छोड़ा गवा। यहोसू लिब्नाह क राजा क संग उहइ किहेस जइसा उ पचे यरीहो क राजा क संग किहे रहेन।

³¹ तब यहोसू अउ इस्राएल क सबहिं लोग लिब्ना क तजि दिहन अउर उ पचे लाकीस तलक क जात्रा किहन। यहोसू अउ ओकर फउज लिब्ना क चारिहुँ कइँती डेरा डाएस अउर तब उ पचे सहर पइ हमला किहन। ³² यहोवा इस्राएल क मनइयन क जरीये लाकीस सहर क हार जाइ दिहस। दुसरे दिना उ पचे सहर क हराएन। इस्राएल क मनइयन इ सहर क हर एक मनई क मार डाएन। इ वइस ही रहा जइसा उ लिब्ना मँ किहे रहा। ³³ इहइ समइ गेजेर क राजा होरोम लाकीस क मदद करइ आवा। मुला यहोसू ओका अउ ओकरी फउज क भी हराएस। कउनो मनई जिअत नाहीं छोड़ा गवा।

³⁴ तब यहोसू अउर इस्राएल क सबहिं लोग लाकीस स एग्लोन गएन। उ पचे एग्लोन क चारिहुँ कइँती डेरा डाएन अउर ओह पइ हमला किहन। ³⁵ उहइ दिन उ पचे सहर पइ कब्जा किहन अउर सहर क सबहिं लोगन क मार डाएन। इ वइसा ही किहन जइसा उ पचे लाकीस मँ किहे रहेन। उ पचे सहर क बरबाद किहन अउ ओकरे सबहिं मनइयन क मार डाएन।

³⁶ तब यहोसू अउ इस्राएल क सबहिं लोग एग्लोन स हेब्रोन क जात्रा किहन। उ पचे हेब्रोन पइ हमला किहन। ³⁷ उ पचे सहर अउ हेब्रोन क निअरे क सबहिं नान्ह कस्बन पइ कब्जा कइ लिहन। इस्राएल क लोग सहर क हर एक मनई क मार डाएन। हुआँ कउनो भी जिअत नाहीं छोड़ा गवा। इ वइसा ही रहा जइसा उ पचे एग्लोन मँ किहे रहेन। उ पचे सहर क बरबाद किहन अउ ओकर सबहिं मनइयन क मार डाएन।

³⁸ तब यहोसू अउ इस्राएल क सबहिं लोग दबीर क गएन अउर उ सहर पइ हमला किहन। ³⁹ उ पचे उ सहर, ओकर राजा अउ दबीर क निअरे क सबहिं कस्बन क जीत लिहन। उ पचे उ सहर क सबहिं लोगन क मार डाएन। हुआँ कउनो जिअत नाहीं छोड़ा गवा। इस्राएल का मनइयन दबीर अउ ओकरे राजा क संग उहइ किहन जउन उ पचे हेब्रोन अउ ओकरे राजा क संग किहे रहेन। इ वइसा ही रहा जइसा उ पचे लिब्ना अउ ओकरे राजा क संग किहे रहेन।

⁴⁰ इ तरह यहोसू पहाड़ी देस नेगेव पच्छिमी अउ पूर्वी पहाड़ियन क तराई क सहरन क राजा लोगन क हराएन। इस्राएल क परमेस्सर यहोवा यहोसू स सबहिं लोगन क मारि डावइ क हुकुम दिहे रहा। ऍह बरे यहोसू ओन जगहियन पइ कउनो क जिअत नाहीं छोड़ेस।

⁴¹ यहोसू कादेसबर्ने स अज्जा तलक क सबहिं सहरन पइ कब्जा कइ लिहस। उ गोसेन क भुइँया स लइके गिबोन तलक क सबहिं सहरन पइ कब्जा कइ लिहस। ⁴² यहोसू एक अभियान मँ ओन सहरन अउ ओनके राजा लोगन क जीत लिहस। यहोसू इ ऍह बरे किहस कि इस्राएल क परमेस्सर यहोवा इस्राएल बरे लड़त रहा। ⁴³ तब यहोसू अउ इस्राएल क सबहिं लोग गिलगाल क आपन डेरा मँ लउटि आएन।

उत्तरी सहरन क हराउब

11 हासेर क राजा, याबीन जउन कछू भवा ओकरे बारे मँ सुनेस। ऍह बरे उ कइउ राजा लोगन क फउजन क एक संग बोलावइ क निर्णय लिहस। याबीन मादोन क राजा योबाब, सिम्रोन क राजा, अच्छाप क राजा अउर ² उत्तर क पहाड़ी देस क अउ रेगिस्ताने क सबहिं सासकन लोगन क लगे संदेसा पठएस। याबीन किन्नेरेत क दक्खिन क राजा लोगन, नेगेव अउ पच्छिम निची पहाड़ियन क राजा लोगन क आपन सँदेसा पठएस। उ पच्छिम मँ नफोथ दारे क राजा क भी सँदेसा पठएस। ³ याबीन पूरब अउ पच्छिम क कनानी लोगन क राजा लोगन क लगे सँदेसा पठएस। उ पहाड़ी प्रदेसन मँ बसइयन एमोरी, हित्तियन, परिज्जयन अउ यबूसियन क लगे सँदेसा पठएस। उ मिस्पा पहँटा क हेमोर्न पहाड़ क नीचे बसइयन हिव्वी लोगन क भी सँदेसा पठएस। ⁴ ऍह बरे ऍन सबहिं राजा लोगन क फउजन एक संग आइन। हुआँ अनेक जोधा, घोड़न अउ रथ रहेन। उ बहोत बड़वार फउज रही, उ अइसी देखाइ पड़त रही, मान ल्या ओहमाँ ऍतना फउजी रहेन जेतना समुद्दर क किनारे बालू क कण।

⁵ इ सबइ राजा छोटकी नदी मेरोम क निअरे बदुर गएन। उ पचे आपन फउजन क एक डेरा मँ बटोरेन। उ पचे इस्राएल क खिलाफ जुद्ध करइ क योजना बनाएन।

⁶ तब यहोवा यहोसू स कहेस, “उ फउज स जिन डेराअ। भियान इहइ समइ, मइँ तू पचन्क ओनका हरावइ देब। तू पचे ओन सबहिं क मार डउब्या। तू पचे ओनकइ घोड़न क लगड़ा लूला करइ देब्या। अउ ओनकर सबहिं रथन क बार डउब्या।”

⁷ यहोसू अउ ओकर पूरी फउज एकाएक हमला कइके ओनका चौंकाइ दिहस। उ पचे मेरोम नदी पइ दुस्मनन पइ हमला किहन। ⁸ यहोवा इस्राएलियन क ओनका हरावइ दिहस। इस्राएल क फउज ओनका हराएस अउर ओनकर पूरब मँ वृहत्तर सीदोन, मिस्रपोत-मैम अउ मिस्पा क घाटी तलक पाछा किहस। इस्राएल क फउज ओनसे तब तलक जुद्ध करत रही जब तलक दुस्मनन मँ स कउनो भी मनई जिअत न बचा। ⁹ यहोसू उहइ किहस जउन यहोवा कहे रहा कि उ करी यानी यहोसू ओनकइ घोड़न क टँगियन काटेस अउ ओनकर रयन क बारेस।

¹⁰ तब यहोसू लउटा अउ हासोर सहर पइ कब्जा किहस। यहोसू हासोर क राजा क मार डाएस। (हासोर ओन सबहिं राज्यन मँ प्रमुख रहा जउन इस्राएल क खिलाफ लड़ा रहेन।) ¹¹ इस्राएल क फउज उ सहर क हर एक क मार डाएस। उ पचे सब लोगन क पूरी तरह बरबाद कइ दिहन। हुआँ कछू भी जिअत नाहीं रहइ दीन्ह गवा। तब उ पचे सहर क जराइ दिहन।

¹² यहोसू इ सबइ सहरन पइ कब्जा किहस। उ ओनके सबहिं राजा लोगन क मार डाएस। यहोसू इ सबइ सहरन क हर एक चीज क पूरी तरह बरबाद कइ दिहस। उ इ यहोवा क सेवक मूसा जइसा हुकुम दिहे रहा वइसा ही किहस। ¹³ मुला इस्राएल क फउज कउने भी अइसे सहर क नाहीं जराएस जउन पहाड़ी पइ बना रहा। उ पचे पहाड़ी पइ बने सिरिफ एक ठु हासोर सहर क जराएस। इ उ सहर रहा, जेका यहोसू बारेस। ¹⁴ इस्राएल क मनइयन उ सबइ चिजियन क आपन लगे धरेन, जउन ओनका उ सहरन मँ स मिलिन। उ पचे ओन जनावरन क अपन लगे धरेन, जउन ओनका सहर मँ मिलेन। मुला उ पचे हुआँ क सबहिं मनइयन क मार डाएन। उ पचे कउनो मनई क जिअत नाहीं छोड़ेन। ¹⁵ यहोवा बहोत पहिले आपन सेवक मूसा क इ करइ क हुकुम दिहे रहा। तब मूसा यहोवा क इ करइ क हुकुम दिहे रहा। इ तरह यहोसू यहोवा क आग्या पूरा किहस।

¹⁶ काहेकि उ ओन चिजियन मँ स कछु भी नाहीं लिहस जउन का यहोवा लइ क हुकुम नाहीं दिहे रहा। इ तरह यहोसू इ पूरे देस क सबहिं लोगन क हराइ दिहस। पहाड़ी प्रदेस, नेगेव-छेत्र, सारा गोसोन-छेत्र, पच्छिमी निची पहाड़ियन क प्रदेस, यरदन घाटी, इस्राएल क पहाड़ अउ ओनकर निचके क पहाड़ियन पइ ओकर अधिकार होइ गवा रहा। ¹⁷ यहोसू क अधिकार सेईर क निअरे हालाक पहाड़े स लइके हेर्मोन पहाड़े क खाले लबानोन क घाटी मँ बालगाद तलक क प्रवेस पइ होइ ग रहा। उ राजा लोगन क गिरफतार कइ क मरि दिहे रहा। ¹⁸ यहोसू ओन राजा लोगन स कइउ बरिस लड़ा। ¹⁹ उ पूरा देस मँ सिरिफ एक सहर इस्राएल क संग सान्ति-संधि किहेस। उ हिब्बी लोगन क सहर गिबोन रहा। दूसर सबहीं सहर जुद्ध मँ हार गएन। ²⁰ यहोवा चाहत रहा कि उ सबइ लोग सोचइँ कि उ पचे सक्तीसाली रहेन। तब उ पचे इस्राएल क खिलाफ लड़िहीं। इ तरह उ पचे बगैर दाया क ओनका बरबाद कइ सकत रहेन, जउने तरह यहोवा मूसा क करइ क हुकुम दिहे रहा।

²¹ अनाकी लोग हेब्रोन, दबीर, अनाब अउ यहूदा अउर इस्राएल क छेत्रन क पहाड़ी प्रदेस मँ रहत रहेन। यहोसू इ सबइ अनाकी लोगन क खिलाफ लड़ा। यहोसू इ लोगन अउ इ सबन्क सहरन क पूरी तरह बरबाद कइ दिहस। ²² हुआँ कउनो भी अनाकी मनई इस्राएल मँ जिअत न छोड़ा गवा। जउन अनाकी लोग छोड़ दीन्ह ग रहेन, उ सबइ अज्जा, गत अउर असदोद मँ रहेन। ²³ यहोसू पूरा इस्राएल प्रदेस पइ कब्जा कइ लिहस। इ बात क यहोवा मूसा स बहोत पहिले ही कहि दिहस। यहोवा उ इ देस इस्राएल क ऍह बरे देहस काहेकि उ ऍनकइ बरे वचन दिहे रहा। तब यहोसू इस्राएल क परिवार समूहन मँ उ प्रदेस क बाँट दिहस तब जुद्ध बन्द भवा अउ अखिरी रुप मँ सान्ति कायम होइ गइ।

इस्राएल क जरिये राजा लोग हरावा गएन

12 इस्राएल क लोग यरदन नदी क पूरब क भुइँया पइ कब्जा कइ लिहन। ओनकइ अधिकार मँ अब अर्नोन क संकरी घाटी स हेर्मोन पहाड़े तलक क भुइँया अउ यरदन घाटी क पूरब क सारा प्रदेस रहा। इ देस क लेइ बरे इस्राएल क लोग जउन राजा लोग क हराएन ओनकइ इ सूची अहइ:

² हेसबोन सहर मँ बसइयन एमोरी लोगन क राजा सीहोन अर्नोन क सँकरी घाटी पइ अरोएर स लइके यब्बोक नदी तलक क प्रदेस पइ सासन करत रहा। ओकर प्रदेस उ दर्रा क बीच स सुरु होत रहा। अम्मोनी लोगन क संग इ ओनकर चउहद्दी रही। सीहोन गिलाद क आधा प्रदेस पइ हुकूमत करत रहा। ³ उ गिलगाल स मृत सागर (खारा सागर) तलक यरदन क पूरब क प्रदेस पइ भी सासन करत रहा अउ बेत्यसीमोत स दक्खिन पिसगा क पहाड़ियन तलक सासन करत रहा।

⁴ बासान क राजा ओग रपाई लोगन संतान रहा। ओग असतारेात अउ एद्रेई मँ सासन करत रहा। ⁵ ओग हेर्मोन पहाड़, सलका सहर, अउ बासान क समूचइ छेत्र पइ सासन करत रहा। ओकरे प्रदेस क चउहद्दी हुआँ तलक जात रही जहाँ गसूर अउ माका लोग रहत रहेन। ओग गिलाद क आधा भाग पइ सासन करत रहा। इ प्रदेस क सीमा क आखीर हेसबोन क राजा सीहोन क प्रदेस पइ होत रहा।

⁶ यहोवा क सेवक मूसा अउ इस्राएल क लोग इ सबहिं राजा लोगन क हराएन अउ मूसा उ प्रदेस क रूबेन क परिवार समूह, गाद क परिवार समूह अउ मनस्से क परिवार समूह क आधा लोगन क दिहस। मूसा इ प्रदेस ओनका आपन कब्जा मँ रखइ बरे दिहस।

⁷ इस्राएल क लोग उ प्रदेस क राजा लोगन क भी हराएन, जउन यरदन नदी क पच्छिम मँ रहा। यहोसू लोगन क इ प्रदेस मँ लइ गवा। यहोसू लोगन क इ पहँटा दिहस अउर एका साढ़े नौ परिवार समूहन मँ बाटेस। इ उ देस रहा जेका ओनका देइ बरे यहोवा वचन दिहे रहा। इ प्रदेस लबानोन क घाटी मँ बालगात अउ सेईर क निअरे हालाक पहाड़े क बीच रहा। ⁸ एहमाँ पहाड़ी देस, पच्छिम क तराई क प्रदेस, यरदन घाटी, पूर्बी पहा़डियन, रेगिस्तन अउ नेगेव सामिल रहेन। इ उ प्रदेस रहा जेहमाँ हित्ती, एमोरी, परिज्जी, कनानी, अब्बी अउर यबूसी लोग रहत रहेन। जउन लोगन क इस्राएल क लोग हराएन ओनकर सूची इ बाटइ:

सब मिलाइके राजा लोगन क संख्याँ रहेन 31

प्रदेस जउन अबहिं तलक नाहीं लीन्ह गएन

13 जब यहोसू बहोतइ बुढ़वा होइ गवा तउ यहोवा ओहसे कहेस, “यहोसू तू बुढ़वा होइ ग अहा, मुला अबहिं तोहका बहोत स भुइँया पइ कब्जा करइ क बाटइ। ² तू अबहिं तलक गसूर लोगन क भुइँया अउर पलिस्तियन क भुइँया नाहीं लिह्या ह। ³ तू मिस्र क चउहद्दी पइ सिहोर नदी स लइके उत्तर मँ एकोन चउहद्दी तलक क छेत्र नहीं लिह्या ह। उ उबहिं तलक कनानी लोगन क अहइ। तू पचन्क अज्जा, असदोद, असकलोन, गत अउ एकोन पाँचहूँ पलिस्ती क प्रमुख्य सहरन क हराउब अहइ। तू पचन्क ओन अब्बी लोगन्क हरावइ चाही, ⁴ जउन कनान क सारे भुइँया क दक्खिन मँ अउर मिराह मँ जउन कि सिदोनी लोगन, अफेक क अधिकार मँ अहइ अउर अमोरी लोगन सरहद तलक क भुइँया मँ रहत हीं। ⁵ तू अभी तलक गबाली लोगन्क छेत्र क नाहीं हराया ह अउर बालगाद क पूरब अउ हेर्मोन पहाड़े क घाटी हमाथ क प्रवेस दुआर तलक क बीच क अलबानोन क छेत्र भी अभी तलक हराइ क बचा भवा अहइ।

⁶ “सिदोन क लोग लबानोन स मिस्रपोतमैम तलक पहाड़ी प्रदेस मँ रहत अहइँ। मुला मइँ इस्राएल क लोगन बरे इ सबहिं क दबाइके निकारि बाहेर करब। जब तू इस्राएल क लोगन मँ भुइँया बाँट्या, तु इ प्रदेस क निहचय ही सुमिर लिह्या। ऍका वइसेन ही करा जइसेन मइँ कहेउँ ह। ⁷ अब, तू भुइँया क नौ परिवार समूह अउ मनस्से क आधा परिवार समूह क मँ बाटा।”

प्रदेसन क बँटवारा

⁸ मइँ मनस्से क आधा परिवार समूह क लोगन क पहिले ही भुइँया दइ दीन्ह ह। मइँ रूबेन क परिवार समूह अउ गाद क परिवार समूह क भी पहिले ही भुइँया दइ दीन्ह ह। यहोवा क सेवक मूसा यरदन नदी क पूरब क प्रदेस ओनका दिहस। ⁹ मूसा जउन भुइँया यरदन नदी क पूरब मँ ओनका दिहे रहा, उ इ अहइ: इ भुइँया क भीतर दीबोन स मेदबा तलक क पूरा मइदान आवत ह। इ भुइँया अर्नान सँकरी घाटी स सुरु होत ह। इ भुइँया घाटी क बीच सहर तलक लगातार फइली अहइ। ¹⁰ एमोरी लोगन क राजा सीहोन जउने सहरन पइ सासन करत रहा, उ पचे इ भुइँया मँ रहेन। उ राजा हेसबोन सहर मँ सासन करत रहा। उ भुइँया लगातार उ छेत्र तलक रही जेहमाँ एमोरी लोग रहत रहेन। ¹¹ गिलाद सहर भी अहइ भुइँया मँ रहा। गसूर अउ माका लोग जउनो छेत्र मँ रहत रहेन उ उहइ भुइँया मँ रहा। सारा हेर्मोन पहाड़ अउर सल्का तलक सारा बासान उ भुइँया मँ रहा। ¹² राजा ओग क सारा राज्ज उहइ भुइँया मँ रहा। राजा ओग बासान मँ सासन करत रहा। पहिले उ आसतरोत अउ एदेई मँ सासन करत रहा। ओग रपाइ लोगन मँ स रहा। मूसा ओन लोगन क हराए रहा अउर ओनका प्रदेस लइ लिहे रहा। ¹³ इस्राएल क लोग गसूर अउर माका लोगन क जबरदस्ती निकारिके बाहेर नाहीं कइ सकेन। उ सबइ लोग अब तलक आजु भी इस्राएल क लोगन क संग रहत रहेन।

¹⁴ सिरिफ लेवी क परिवार समूह ही अइसा रहा जेका कउनो भुइँया नाहीं मिली। ओकरे बदले ओनका उ सबइ भेंटन मिलिन जेका इस्राएल क परमेस्सर यहोवा क चढ़ाई जात रहिन। यहोवा लेवी परिवार समूह क सन्तानन क इ वचन दिहे रहा।

¹⁵ मूसा रूबेन क परिवार समूह स हर एक परिवार समूह क कछू भूइँया दिहस। इ भुइँया अहइ जेका उ पचे पाएन ¹⁶ अर्नोन क सँकरी घाटी क निअरे अरोएर स लइके मेदबा सहर तलक क भुइँया। एहमाँ सारा मइदान अउ दर्राक बीचक सहर सामिल रहा। ¹⁷ इ भुइँया हेसबोन तलक लगातर फइली रही। इ भुइँया मँ मइदान क सबहिं सहर रहेन। इ सबइ सहर दीबोन, बोमोतबाल, बेतबालमोन, ¹⁸ यहसा, कदेमोत, मेपात, ¹⁹ किर्यातैम, सिबमा, इ मँ घाटी क सहरन सेरेध-साहार, ²⁰ बेतपोर, पिसगा क पहाड़ियन अउ बेत्यसीमोत सामिल रहेन। ²¹ इ भुइँया मँ मइदान क सबहिं सहर अउ एमोरी लोगन क राजा सीहोन जउने छेत्रन पइ सासन किहे रहा उ सबइ छेत्र रहा। उ राजा हेसबोन पइ सासन किहे रहा। मुला मूसा ओका अउर मिद्यानी लोगन क हराए रहा। उ सबइ लोग एवी, रेकेम, सूर, हूर अउर रेबा रहेन। (इ सबइ नेतन जउन उ देस मँ रहत रहेन सीहोन क संग जुद्ध करत रहेन।) ²² इस्राएल क लोग बारे क पूत बिलाम क मारेन। (बिलाम भविस्सबाणी बरे जादू क उपयोग करइ क जतन किहस।) इस्राएल क लोग जुद्ध मँ अनेक लोगन क मारेन। ²³ जउन पहँटा रूबेन क दीन्ह ग रहा, ओकर अन्त यरदन नदी क किनारे पइ होत रहा। ऍह बरे इ भुइँया रूबेन क परिवार समूहन क दइ दीन्ह गइ, एहमाँ इ सबइ सहर अउ सूची मँ लिखे भए सबहिं खेत सामिल रहेन।

²⁴ मूसा गाद क परिवार समूह क भुइँया क गाद कबिलन क बीच मँ बाँटे दिहस।

²⁵ गाद क प्रदेस याजेर क पहाँटा अउ गिलाद क सबहिं नगर मँ रहेन। मूसा ओनका अम्मोनी लोगन क भुइँया का आधा हींसा रब्बा क निअरे अरोएर तलक भी दिहे रहा। ²⁶ इ प्रदेस मँ हेसबोन रामतमिस्पे अउ बेतोनीम क छेत्र सामिल रहेन। इ प्रदेस मँ महनैम स दबीर तलक क छेत्र सामिल रहेन। ²⁷ एहमाँ बेथारम क घाटी, बेत्रिम्रा, सुक्कोत अउर सापोन सामिल रहेन। बाकी क उ समूचा हींसा जेह पइ हेसबोन क राजा सीहोन सासन किहे रहा, एहमाँ सामिल रहा। इ भुइँया यरदन नदी क पूरब कइँती अहइ। इ भुइँया लगातार गलील झिलिया क आखीर तलक फइली अहइ। ²⁸ इ सारा पहँटा उ अहइ जेका मूसा गाद क परिवार समूह क दिहे रहा। इ भुइँया मँ इ सबइ देस रहेन जउन सूची मँ अहइँ। मूसा उ भुइँया हर एक कबिलन क बांटे दिहस।

²⁹ मूसा मनस्से क आधा परिवार समूह क कबिलन क बीच मँ भी भुइँया बांटे रहा। मनस्से क परिवार समूह क कबिलना इ भुइँया पाएन:

³⁰ भुइँया महनैम स सुरु भइ। एहमाँ उ पूरा बासान यानी जउन सारा प्रदेस पइ बासान क राजा ओग सासन करत रहा अउर बासान मँ याइर क सबहिं सहर सामिल रहेन। (सब मिलाइके साठ सहर रहेन।) ³¹ इ भुइँया मँ आधा गिलाद, अस्तारोत अउ एदेई सामिल रहेन। (गिलाद, अस्तारोत अउ एदेई उ सबइ सहर रहेन जेहमाँ ओग रहत रहा।) इ सारा प्रदेस मनस्से क पूत माकीर क परिवार क दीन्ह गएन। ऍन आधा पूतन इ पहँटा क पाएन।

³² मूसा मोआब क मइदान मँ इ सबइ परिवार समूह क इ पूरी भुइँया दिहस। इ यरीहो क पूरब मँ यरदन नदी क पार रही। ³³ मुला मूसा लेवी परिवार समूह क कउनो भुइँया नाहीं दिहस। इस्राएल क परमेस्सर यहोवा इ वचन दिहस कि उ खुद लेवी क परिवार समूह क भेंट क रुप मँ होइ।

14 याजक एलीआज़ार, नून क पूत यहोसू अउ इस्राएल क परिवार समूह क प्रमुख लोग निहचय किहन कि उ पचे कउने भुइँया क कउन लोगन क दिहन। इ सारी भुइँया यरदन नदी क पच्छिम कइँती कनान मँ रहेन। ² यहोवा उ ढंग मूसा क बहोत पहिले बताइ दिहे, जउने ढंग स उ चाहत रहा कि लोग आपन भुइँया चुनइँ। साढ़े नौ परिवार समूह क लोग कउन स भुइँया उ पचे पइहीं ऍकर निहचय करइ बरे गोट डाएन। ³ मूसा अढ़ाई परिवार समूहन क ओनकर भुइँया ओनका यरदन नदी क पूरब मँ दइ दिहे रहा। मुला लेवी क परिवार समूह क दूसर लोगन क तरह कउनो भी भुइँया नाहीं मिली। ⁴ बारह परिवार समूहन क आपन खुद क भुइँया दइ दीन्ह गइ। यूसुफ क पूत दुइ परिवार-समूहन-मनस्से अउ एप्रैम मँ बँट ग रहेन अउर हर एक परिवार समूह कछु भुइँया पाइ लिहस। मुला लेवी क परिवार समूह क कबिलन क कउनो भुइँया नाहीं दीन्ह गइ। ओनका रहइ बरे कछू सहर दीन्ह ग रहेन अउर इ सबइ सहर हर एक परिवार-समूह क भुइँया मँ रहेन। ओनका जनावरन बरे खेत भी दीन्ह ग रहेन। ⁵ यहोवा मूसा क बताइ दिहे रहा कि उ कउने ढंग स इस्राएल क परिवार समूहन क भुइँया देइ। इस्राएल क लोग उहइ ढंग स भुइँया क बाँटेन, जउने ढंग स बाँटइ बरे यहोवा क हुकुम रहा।

कालेब क ओकर प्रदेस मिलत ह

⁶ एक दिन यहूदा परिवार समूह क लोग गिलगाल मँ यहोसू क लगे गएन। ओन लोगन मँ कनजी यपुन्ने क पूत कालेब रहा। कालेब यहोसू स कहेस, “कादेसबर्ने मँ यहोवा जउन बातन कहे रहा। तोहका याद अहइ। यहोवा आपन सेवक^[d] बातन करत रहा। यहोवा तोहरे अउ मोरे बारे मँ बात करता रहा। ⁷ यहोवा क सेवक मूसा मोका उ भुइँया क जासूसी करइ बरे पठएस जहाँ हम पचे जात रहे। उ समइया मइँ चालीस बरिस क रहेउँ। जब मइँ लउटेउँ तउ मूसा क मइँ उ बताएउँ, जउन मइँ उ भुइँया क बारे मँ अनुभव राखत रहेउँ। ⁸ मुला जउन दूसर मनई मोरे संग गए रहेन उ पचे ओनसे अइसी बातन किहन जेहसे लोग डेराइ गएन। मुला मइँ यहोवा क हुकुमन क वफादारी स पालन किहस। ⁹ ऍह बरे मूसा वचन दिहस, ‘जउने देस मँ तू गए रह्या उ तोहार होइ। उ देस सदा तोहरे गदेलन क होइ। मइँ उ छेत्र तोहका देब, काहेकि तू यहोवा मोरे परमेस्सर पइ पूरा भरोसा किह्या ह।’

¹⁰ “अब, सोचा कि उ समइ स यहोवा जइसा कहे रहा उहइ तरह मोका पैंतालीस बरिस तलक जिअत रखेस ह। उ समइ हम सब रेगिस्तान मँ भटकत रहेन। अब, मइँ पचासी बरिस क होइ गवा हउँ। ¹¹ मइँ अबहुँ भी ओतना ही सकतीसाली हउँ जेतना सक्तीसाली मइँ उ समइ रहेउँ, जब मूसा मोका पठए रहा। मइँ ओन दिनन क तरह अब भी जुद्ध करइ क तइयार अहउँ। ¹² ऍह बरे उ पहाड़ी देस मोका दइ द्या जेका यहोवा बहोत पहिले उ दिन मोका देइ क वचन दिहे रहा। उ समइ तोहका पता लाग रहा कि सहर बहोत बड़ा अउर किलेदार रहेन अउ ओन दिनन सक्तीसाली अनाकी लोग ओन सहरन पइ सासन करत रहेन। मुला अब यहोवा मोरे संग अहइ अउर मइँ उ प्रदेस क वइसेन ही लइ लेब जइसा यहोवा कहेस ह।”

¹³ यहोसू यपुन्ने क पूत कालेब क आसीर्बाद दिहस। यहोसू हेब्रोन सहर क ओकरे अधिकार मँ दइ दिहस। ¹⁴ अउर उ सहर अब भी कनजी यपुन्ने क पूत कालेब क परिवार क अहइ। उ प्रदेस अब तलक ओकरे लोगन क अहइ काहेकि, उ इस्राएल क परमेस्सर यहोवा क आग्या मानेस अउर ओह पइ पूरा बिस्सास किहस। ¹⁵ पहिले इ सहर क नाउँ किर्यतर्बा रहा। सहर क नाउँ अनाकी लोगन क सब त महान अर्बा नाउँ क मनई क नाउँ पइ रखा गवा रहा।

एकरे पाछे, उ देस मँ सान्ति रही।