Bible in 90 Days

याजकन क तइनात करइ क संस्कार

29 तब यहोवा मूसा स कहेस, “अब मइँ तोहका बताउब कि इ देखावइ बरे तोहका का करइ चाही कि हारून अउ ओकर बेटवा पवित्तर याजकन क नाई खास तरह स मोर सेवा करत हीं। एक बे दोखे क बछवा अउ दुइ बे दोख क बच्चा भेड़ा लइ आवा। ² जेहमाँ खमीर न होइ उ बारीक गोहूँ क आटा ल्या अउ रोटी बनवा। अउर इ तेले से सनी केकन अउ तेले स लगा हुवा छोटा पातर केकन भी बनावा। ³ इ रोटिन्क अउ केकन क एक डलिया मँ धरा अउ फिन इ डलिया क हारून अउ ओकरे बेटवन क द्या। ओनका बैल अउ दुइनउँ भेड़ा भी द्या।

⁴ “तब हारून अउ ओकर बेटवन क बइठकावाला तम्बू क दुआर क समन्वा लइ आवा। तब ओनका पानी स नहवावा। ⁵ हारून क खास पोसाक: जैसे कि सफेद चोगा, नीला चोगा जउन कि एपोद क संग पहिरावा जात ह पहिरावा। फिन ओह प निआव क थइला अउ एपोद बाँधा। एपोद क सजा भवा अउ बुना भवा पाटी क संग बाँध दया। ⁶ सर प साफा बाँधा अउ साफा क चारिहुँ कइँती मुकुट क धइ द्या। ⁷ अउर जइतून क तेल ल्या अउ हारून क मूँड़ प नाइ के अभिसेक करा। इ बताई कि हारून इ काम बरे चुना ग अहइ।

⁸ “तब हारून क बेटवा क उ ठउरे प लइ आवा। अउर ओका सफेद बुना भवा लबादा पहिरावा। ⁹ तब ओनके करिहाउँ क चारिहुँ कइँती कमरबंद बाँधा। ओनका मूँड़े प धरइ क खास टोपी द्या। उ समइ उ पचे याजकन क रूप मँ बहाल होइहीं। उ पचे उ नेम क माफिक याजक होइहीं जउन हमेसा होइहीं। इहइ ढंग अहइ कि जेहसे तू पचे हारून अउ ओकरे बेटवन क याजक बनउब्या।

¹⁰ “तब बइठकावाली तम्बू क समन्वा ठउरे प बछवा क लावा। हारून अउ ओकरे बेटवन क चाही कि उ पचे बछवा क मूँड़े प हथवा धरइँ। ¹¹ तब उ बछवा क बइठकावाली तम्बू क दुआरे प यहोवा क समन्वा एका मारि डावा। यहोवा एका लखी। ¹² तब बछवा क कछू खून ल्या अउ वेदी ताई जा। आपन अंगुरी स वेदी क सींगे प कछू खून लगावा। बचा भवा सारा खून नीचे वेदी क पेंदी प डावा। ¹³ तब बछवा क करेजा क चर्बी, दुइनउँ गुर्दे क चर्बी अउ ओकरे चारिहुँ कइँती चर्बी निकार ल्या। इ चर्बी क वेदी प जरावा। ¹⁴ तब बछवा क गोस, ओकर खाल अउ ओकर दूसर अंगे क लइके आपन डेरा स बाहेर जा। इ सब चीजन्क डेरा क बाहेर जरावा। इ भेंट अहइ जउन याजकन क पाप दूर करइ बरे चढ़ाई जात ह।

¹⁵ “तब हारून अउ ओकरे बेटवन स भेड़ा क मूँड़ प हाथ धरइ क कहा। ¹⁶ तब उ भेड़ा क मारि डावा अउ ओकर खून ल्या। खूने क वेदी क चारिहुँ कइँती छिरका। ¹⁷ ओकर पाछे भेड़ा क कइउ हींसा मँ काटि डावा। भेड़ा क भितरे क सब अंगे क अउ गोड़ धोवा। इ चीजन्क क दूसर टूका क संग अउ भेड़ा क मूँड़ क संग राखा। ¹⁸ तब वेदी प इ सबन्क बारा। इ यहोवा बरे होम बलि अहइ अउर इ यहोवा बरे सोहाइ गंध, एक भेंट अहइ।

¹⁹ “हारून अउ ओकरे बेटवन क दूसर भेड़ा प हाथ धरइ क कहा। ²⁰ उ भेड़वा क मारि डावा अउ ओकर खून ल्या। उ खून क हारून अउ ओकरे बेटवन क दाहिन काने क सिरा मँ लगवा। ओनकइ दाहिन हाथे क अगूठा पर भी कछू खून लगावा। अउ कछू खून ओनके दाहिन गोड़वा क बड़का अंगूठा प लगावा। तब वेदी क चारिहुँ कइँती खून बहाइ द्या। ²¹ तब वेदी प स कछू खून ल्या। इ खून क अभिसेक क तेले मँ मिलइ द्या अउर हारून अउ ओकरे ओढ़ना प, अउर ओकरे पूतन अउ ओनके ओढ़ना प छिरका्या। इ इ बताई कि हारून अउ ओकर पूत मोर सेवा खास तरह स करइ बरे पवित्तर किए गएन ह। अउर इ भी बताई कि ओनकइ वस्त्र खास समइया प बइपरइ जात बरे पवित्तर कीन्ह गवा ह।

²² “तब उ भेड़ा स चर्बी ल्या। (इ उहइ भेड़ा बा जेका हारून क महा याजक बनवइ बरे मँ पवित्तर करइ क समारोह मँ होइ।) पूँछे क चारिहुँ कइँती क चर्बी अउर उ चर्बी क ल्या जउन बदन क भीतरी हींसा क ढाँकत ह। करेजा क ढकइवाली चर्बी क ल्या। दुइनउँ गुर्दे अउ ओह पइ क चर्बी अउर दाहिन जाँघ क ल्या। ²³ तब उ रोटी क डलिया ल्या जेहमाँ तू बे खमीरे क बनई रोटी धरे रह्या। इहइ डलिया बा जेका तोहका यहोवा क समन्वा राखइ क अहइ। एक रोटी सादी, एक तेले स बनी केक अउर तेले लगा भवा एक छोटा पातर केक क बाहेर निकारा।। ²⁴ तब एनका हारून अउ ओकरे बेटवन क द्या: फुन ओनसे कहा कि यहोवा क समन्वा एनका उठावइँ। इ यहोवा क खास भेंट होइ।

²⁵ “तब इ चीजन क हारून अउ ओकरे बेटवन स ल्या अउ ओनका वेदी प भेड़ा क साथे धरा। तब हर चीजे क वेदि प जरावा। इ होमबलि बा। इ भेंट यहोवा बरे भेंट अहइ। अउर इ यहोवा बरे सोहाइ क गंध अहइ।

²⁶ “तब भेड़ा स छाती क निकारा। (इहइ भेड़ा अहइ जेका हारून क खास महा याजक बनवइ बरे पवित्तर कर क समारोह मँ बइपरा जाइ।) भेड़ा क छाती क लहराइ क भेंट क रूप मँ यहोवा क समन्वा लहराया। जनावरे क इ हींसा तोहार होइ। ²⁷ तब भेड़ा क छाती अउ जाँघ ल्या जउन हारून क महा याजक बनवइ बरे काम म आइ रहन। इ हींसा पवित्तर बनावा अउ एका हारून अउर ओकरे बेटवन क द्या। इ भेंट क खास हींसा होइ। ²⁸ इस्राएल क मनइयन इ अंगन क हारून अउ ओकरे बेटवन क सदा देइहीं। जब कबहुँ इस्राएल क मनइयन यहोवा बरे भेंट चढ़इहीं तउ इ हींसा हमेसा याजक लोगन क होइहीं। ओन लोगन क मेलबलि जउन कि यहोवा बरे अहइ, मँ स इ हींसा याजक लोगन क होई।

²⁹ “ओन खास वस्त्रन क बचाइके राखा जउन हारून बरे सिया रहेन। इ वस्त्रन ओकरे बेटा, पोता बरे होइहीं। उ पचे उ वस्त्रन क तन पहिरहीं जब याजकन चुना जइहीं। ³⁰ हारून क बेटवा ओकरे पाछे अगवा महा याजक होइ। उ सात दिनाँ ताई उ वस्त्रन क पहिरे रही जबहिं उ बइठकावाली तम्बू क पवित्तर ठउरे मँ सेवा करइ आइ।

³¹ “उ भेड़ा क गोस पकावा जउन हारून क महा याजक बहाल करइ बरे प्रयोग मँ आवा रहा। उ गोस क पवित्तर ठउरे मँ पकावा। ³² तब हारून अउ ओकर बेटवा बइठकावाली तम्बू क दुआरे प गोस खइहीं। अउर उ पचे डलिया क रोटी भी खइहीं। ³³ इ भेंट प्रायस्चितिकरण बरे तब भवा रहा जब उ पचन्क याजकन क रूप मँ सेवा करइ बरे पवित्रीकरण कइ जात रहेन। इ भेंट क ओनहीं क खाइ चाही। कउनो बिदेसी क इ पवित्तर भेट क नाहीं खाइ चाही। ³⁴ अगर उ भेड़ा क गोस या रोटी भियान ताई काफी मात्रा मँ बचि जाइ तउ ओका जरइ देइ चाही। तोहका उ बचि भवा रोटी या गोस नाहीं खाइ चाही काहेकि इ पवित्तर अहइ।

³⁵ “वइसा ही करा जइसा मइँ तोहका हारून अउ ओकरे बेटवन बरे करइ क हुकुम दिहउँ ह। ओनका याजकन बहाल करइ बरे इ त्यौहार सात दिना तलक चली। ³⁶ सात दिनाँ तलक हर रोज एक साँड़ मारा। इ हारून अउ ओकरे बेटवन बरे पाप भेंट होइ। इ बलिदान क प्रयोग वेदी क सुद्ध करइ बरे किहा। अउर वेदी क पवित्तर बनावइ बरे जइतूने क तेल स एकर अभिसेक करा। ³⁷ तू सात दिना तलक वेदी क सुद्ध अउर पवित्तर रख्या। उ समइया वेदी सब ते जिआदा पवित्तर होइ। जउन चीज वेदी क छुइ उ पवित्तर होइ जाइ।

³⁸ “हर रोज वेदी प तोहका एक भेंट चढ़ावइ चाही। तोहका एक-एक बरिस क दुइ भेड़ी क बचवन क भेंट चढ़ावइ चाही। ³⁹ एक भेड़ी क बच्चा भिंसारे अउ दूसर सांझ क चढ़ावा। ^40-41 पहिला भेड़ी क साथ हीन क चउथाई दाखरस क पिअइ क भेंट क संग एपा क दसवाँ हींसा गेँहू क महीन आटा जउन कि हीन क चउथाई तेल स मिला भवा अहइ चढ़ावा। अउर गोधरी क समइ मँ दूसर भेड़ी क बिहान क चढ़ावा क नाईं एकर पिअइ क भेंट क संग चढ़ावा। इ यहोवा बरे एक भेंट एक सुहावना सुगंध अहइ।

⁴² “तोहका इ चीजन्क यहोवा क भेंटे मँ रोज जरावइ चाही। इ यहोवा क समन्वा, बइठकावाली तम्बू क दुआरे करा। इ हमेसा करतइ रह्या। जब तू भेंट चढ़उब्या तब मइँ यहोवा, हुवाँ तोहसे मिलब अउ तोहसे बात करब। ⁴³ मइँ इस्राएल क मनइयन स उ ठउरे प मिलब। उ ठउर मोर महिमा स पवित्तर बन जाइ।

⁴⁴ “इ तरह मइँ बइठकावाली तम्बू क पवित्तर बनउव। अउर मइँ वेदी क पवित्तर बनउब। अउर मइँ हारून अउ ओकरे बेटवन क पवित्तर बनउब, जेहसे उ पचे मोर सेवा याजकन क तरह करि सकइँ। ⁴⁵ मइँ इस्राएल क मनइयन क संग रहब। मइँ ओनकइ परमेस्सर होब। ⁴⁶ मनइयन इ जनिहीं कि मइँ ओनकइ परमेस्सर यहोवा हउँ। उ पचे जनिहीं कि मइँ उहइ परमेस्सर अहउँ जउन ओनका मिस्र स बाहेर लाएउँ ह तउ कि मइँ ओनके संग रहि सकत हउँ। मइँ ओनकइ परमेस्सर, यहोवा अहउँ।”

धूप जरावइ क वेदी

30 यहोवा मूसा स कहेस, “बबुरे क लकड़ी क एक वेदी बनावा। तू इ वेदी धूप बारइ बरे करब्या। ² तोहका वेदी क चौकोर एक हाथ लम्बा अउ एक हाथ चौड़ा बनवइ चाही। एकर ऊँचाइ दुइ हाथ होइ चाही। चारिहुँ कोने प सींग होइ चाही। इ सींगन क वेदी क साथ एक टुकड़ा बनइ देइ चाही। ³ वेदी क ऊपर क सिरा अउ ओकर सबहिं कइँती निखालिस सोना मढ़ा। वेदी क चारिहुँ कइँती सोना क पाटी लगावा। ⁴ इ पाटी क तले सोना क दुइ छल्ला होइ चाही। वेदी क दूसर कइँती सोना क दुइ छल्ला भी होइ चाही। इ छल्ला वेदी क ढोवइ मँ खम्भन फँसावइ खातिर होइहीं। छल्लन क वेदी क विपरीत कइँती लगावा। ⁵ खम्भन क भी बबुरे क काठे क बनावा। खम्भन क सोना स मढ़ा। ⁶ वेदी क खास पर्दा क समन्वा धरा। करार क संदूख उ पर्दा क दूसर कइँती अहइ। उ संदूखा क ढकइवाला ढकना क समन्वा वेदी होइ। इ उठइ ठउर अहइ जहाँ मइँ तोहसे मिलब।

⁷ “हारून हर भिंसारे महकउआ धूप बत्ती वेदी प बारी। इ उ तब करी जब दियन क देखइ भालइ आइ। ⁸ ओका संझा क देखइ भालइ आइ तब फुन धूप बत्ती बारइ चाही। जेहसे यहोवा क समन्वा हर रोज भिंसारे अउ साँझ क धूप बत्ती बरत रहइ। ⁹ इ वेदी क प्रयोग कउनो दूसर तरह क धूप या जरी भइ बलि बरे जिन किहा। इ वेदी क प्रयोग अन्न भेंट या पेय भेंट बरे जिन किहा।

¹⁰ “बरिस मँ एक दाई हारून यहोवा क खास भेंट चढ़ाइ। हारून पाप भेंट क खून क प्रयोग मनइयन क पापन्क प्रायस्चित करइ बरे करी। हारून इ वेदी क सीगांन प करी। इ दिन प्रायस्चित क दिन कहा जाइ। इ तोहार पीढ़ी दर पीढ़ी लागू होइ। इ यहोवा बरे बहोत ही खास दिन होइ।”

मंदिर क कर

¹¹ यहोवा मूसा स कहेस, ¹² “इस्राएल क मनइयन क गना करा जेहसे तू जनब्या कि हुवाँ केतवा लोग अहइँ। जब कबहूँ इ कीन्ह जाइ हर एक मनई आपन जिन्नगी बरे यहोवा क धन देइ। जदि हर मनई उ करी तउ मनइयन क संग कउनो भी डराउन घटना न होइ। ¹³ हर मनई जेका गना जाए उ आधा सेकेल चाँदी जरूर देइ। (पवित्तर ठउर क सेकेल क अनुसार आधा सेकेल अहइ।) एक सेकेल क वजन बीस गेरा होत ह। इ आधा सेकेल यहोवा बरे भेट होइ। ¹⁴ बीस बरिस या ओसे जिआदा जउन मनई होइ ओका गना जाइ। हर मनई जउन गना जाइ, यहोवा क भेंट देइ। ¹⁵ धनी मनई आधा सेकेल स जिआदा न देइहीं। अउ गरीब मनई आधा सेकेल स कमती नाहीं देइहीं। सबहिं मनइयन यहोवा क बराबर बराबर भेंट देइहीं। इ तोहरे जिन्नगी क कीमत होइ। ¹⁶ इस्राएल क लोगन स इ धन बटोरा। बइठकावाले तम्बू मँ सेवकाइ करइ बरे इ धन क बइपरा। इ यहोवा क समन्वा आपन मनइयन क याद करइ, तोहार रूहन क प्रास्चित करइ बरे एक यादगार होइ।”

हाथ गोड़ धोवइ क हउद

¹⁷ यहोवा मूसा स कहेस, ¹⁸ “एक ठु काँसा क सिलफची ल्या अउ एका काँसे क गोड़े प धरा। तू पचे एका धोवइ बरे बइपरा। सिलफची क बइठकावाली तम्बू अउ वेदी क बीच धरा। सिलफची मँ पानी भरा। ¹⁹ हारून अउ ओकर बेटवन इ हउद क पानी स आपन गोड़ हाथ धोवइँ। ²⁰ हर दाई जब उ पचे बइठकावाले तम्बू मँ आवइँ तउ पानी स गोड़ हाथ जारूर धोवइँ। जब उ पचे वेदी क निअरे वेदी क नगिचे यहोवा क सेवा करइ अउ धूप बारइ आवइँ। ²¹ उ पचे आपन गोड़ हाथ जरूर धोवइ ताकि उ पचे मरिहीं नाहीं। इ अइसा कनून होइ जउन हारून अउ ओकरे लोगन बरे हमेसा बना रही। इ कनून हारून अउ ओन सबहिं लोगन बरे बना रही जउन भविस्स मँ होइ।”

अभिसेक क तेल

²² तब यहोवा मूसा स कहेस, ²³ “बहोत बढ़िया मसाला लिआवा। बारह पौडं गीला लोहबान लिआवा अउ इ तउल क आधा (छ: पौण्ड) महकउआ दालचीनी अउर बारह पौडं अगर, ²⁴ अउ बारह पौण्ड तेजपत्ता ल्या। एनका नापइ जोखइ बरे दप्तर क नाप क प्रयोग करा। एक गैलन जइतून क तेल भी लिआवा।

²⁵ “गमकइवाला अभिसेक क तेल बनवइ बरे इ सबहिँ चीजन्क जरूर मिलावइ चाही। ²⁶ बइठकावाले तम्बू अउ करार क संदूखे प इ तेल क छिरका। ²⁷ मेज अउ मेजे प धरी सबहिं तस्तरिन प तेल छिरका। इ तेल क सबहिं दिया अउर सब औजारे प छिरका। इ तेले क धूप वेदी प डारि द्या। ²⁸ जरि क भेट क वेदी अउ दूसर सबही बरतन प यहोवा बरे तेल नावा। खोरा अउ ओका आधार प तेल नावा अउ वेदी क पावा प तेल नावा। ²⁹ तू इ सब चीजन्क पवित्तर बनउब्या। उ सबइ चिजियन यहोवा बरे खास होइहीं। कउनो भी चीज जउन एनका छुइ उ भी पवित्तर होइ जइ।

³⁰ “हारून अउ ओनके पूतन प तेल छिरका। मोर खास तरह स सेवा करइ बरे इ ओनकइ पवित्तर करिहीं। तबहिं इ सबइ मोरे सेवा याजकन क तरह करत हीं। ³¹ इस्राएल क मनइयन स कहा कि अभिसेक क तेल मोरे बरे हमेसा बहोत पवित्तर अउ खास होइ। इ हमेसा तोहार सबहीं पीढ़ियन बरे सिरफ मोर सेवा बरे होइ चाही। ³² मामूली सुगन्धि क तरह कउनो भी मनई इ तेल क न बइपरी। उ तरह कउनो सुगन्धि बनावा जउन तरह इ खास तेल बनाऐस ह। इ खास अभिसेक क तेल पवित्तर अहइ अउर इ तोहरे बरे बहोत खास अउ पवित्तर होइ चाही। ³³ जदि कउनो इ पवित्रर तेल क नाई सुगन्धि बनवइ अउर ओका कउनो विदेसी क देइ जउन कि याजक नाहीं ह तउ उ मनई क आपन लोगन स जरूर अलगाइ देइ चाही।”

धूप

³⁴ तब यहोवा मूसा स कहेस, “इ महकउआ हवन सामग्री क ल्या: रसगंधा, कस्तूरी गंधिका, बिरोजा अउ निखालिस लोहबान। धियान राखा कि तोहरे लगे सामग्री क वजन बराबर होइ। ³⁵ सामग्री क महकउआ धूप बनावइ बरे आपुस मँ मिलावा। ऍका उहइ तरह करा जइसा सुगन्धि बनवइया करत ह। इ धूप मँ नोन भी मिलावा। इ एका सुद्ध अउ पवित्तर बनइ। ³⁶ कछू धूप क तब तलक पीसा जब ताई ओकर बुकनी न होइ जाइ। बइठकावाले तम्बू मँ करार क संदूखे क समन्वा इ बुकनी क धरा। इ उहइ ठउर अहइ जहाँ मइँ तोहसे मिलब। ³⁷ तू पचन्क इ धूपे क चूरन क सिरिफ खास अवसर मँ ही बइपरइ चाही। तू पचन्क इ धूपे क चूरन क बइपरइ बरे सिरिफ खास तरह स यहोवा खातिर जराइ चाही। इ खास तरह स धूप बनावइ बरे दूसर धूपे बरे जिन कर्या। ³⁸ कउनो मनई आपन खातिर कछू अइसा धूप बनावा चाहत ह जेहसे उ इ सुगन्धि क मजा लइ सकइ। मुला अगर उ अइसा करत ह तउ ओका अपने मनइयन स अलग कइ दीन्ह जाइ।”

बसलेल अउ ओहोलीआब

31 तबहिं यहोवा मूसा स कहेस, ² “मइँ यहूदा क परिवार समूह स ऊर क बेटवा बसलेल क चुनेउँ ह। उरि हुर क बेटवा रहा। ³ मइँ बसलेल क परमेस्सर क आतिमा स भरि दिहस ह। मइँ ओका हर दस्तकारी क काम मँ माहिर बनावत हउँ अउ गियान देत हउँ। ⁴ बसलेल एक बहोत बढ़िया सिल्पकार बा अउ उ सोना, चाँदी अउ काँसा क चीज बनइ सकत ह। ⁵ बसलेल सुन्नर रतन क काटि अउर जड़ सकत ह। उ लकड़ी क भी काम कइ सकत ह। बसलेल हर किसिम क काम कइ सकत ह। ⁶ मइँ ओहोलीआब क भी ओकरे संग काम करइ क चुनेउँ ह। ओहोलीआब दन कबीले क आहोसामाक क बेटवा अहइ। मइँ दूसर मजूरन क माहिर बनाएउँ ह ताकि उ पचे उ सबहिं चीजन्क बनइ सकिहीं जेका मइँ तोहका करइ क हुकुम दिहेउँ ह।

इ कारीगरन्क इ सब चीजन्क वइसी बनवइ चाही जइसा मइँ तोहका हुकुम-दिहेउँ ह।”

सबित

¹² तबहिं यहोवा मूसा स कहेस, ¹³ “इस्राएल क लोगन स इ कहा: ‘तू पचे मोरे खास अरामे क दिन बरे नेम क मानाई चाही। तू पचन्क इ जरूर करइ क चाही, काहेकि इ सब मोरे अउ तोहरे बीच सबहिं पीढ़ी बरे चीन्हा क रूप मँ रइहीं। एहसे तोहका पता लागी कि मइँ, यहोवा तोहका आपन खास मनई बनए अही।

¹⁴ “‘सबित क दिन क खास दिन बनावा। यदि कउनो एका दुसित करत ह तउ उ व्यक्ति क जरूर मार डावइ चाही। अगर कउनो सबित क दिन काम करत ह, तउ उ व्यक्ति क आपन लोगन मँ स जरूर अलग कइ दीन्ह जाइ। ¹⁵ हफ्ता मँ दूसर छ: दिन काम करइ बरे अहइँ। एकर मतलब खास दिन अराम करइ बरे अउर यहोवा क मान देइ बरे अहइ। अगर कउनो सबित क दिन काम करी उ जरूर ही मार दीन्ह जाइ। ¹⁶ इस्राएल क लोगन सबित क दिना क खास दिन क रूप मँ जरूर याद रखिइ चाही। उ एका हमेसा हमेसा मनावत रइहीं। इ मोरे अउ ओनके बीच करार अहइ जउन सदा बना रही। ¹⁷ सबित क दिन मोरे अउ इस्राएल क बीच सदा चीन्हा क रूप मँ बना रही।’” (यहोवा छ: दिन काम किहेस अउ अकास अउ धरती क बनएस अउ सतएँ दिन उ आपन क अराम दिहेस अउ सुस्तान।)

¹⁸ जउने समइ परमेस्सर मूसा स सीनै पहाड़े प बात करब बंद किहस, उ ओका करार लिखित भवा दुइ समथर पाथर दिहस। परमेस्सर आपन अंगुरियन क काम मँ लगाएस अउ पथरे प लिखेस।

सोने क बछवा

32 लोगन निहारेन कि टेमॅ बीति गवा अहइ जब तलक मूसा पहाड़े प नाहीं गवा अउर हुआँ स वापिस नाहीं भवा। ऍह बरे लोगन हारून क चारिहुँ कइँती एक्टठा भएन। उ पचे ओसे कहेन, “लखा। मूसा हम पचन्क मिस्र देस बाहेर निकारेस। मुला हम पचे इ नाहीं जानित कि ओकरे साथ का होइ गवा अहइ। ऍह बरे कछू देवतन क हमरे अगवा चलइ अउ हमका अगवा लइ चलइवाला बनावा।”

² हारून मनइयन स कहेस, “आपन-आपन मेहररूअन, बेटवन अउ बिटियन्के सोना क बाली मोरे लगे लइ आवा।”

³ ऍह बरे सब मनइयन कनवा क बालिन्क बटोरेन अउ उ सबइ ओनका हारून क लगे लइ आएन। ⁴ हारून मनइयन स सोना लिहेस अउ बछवा क एक मूरति बनवइ बरे बइपरेस। हारून मूरति क तरासइ बरे एक छोनी क बइपरेस। तबहिं इ मूरति क सोना स ढाँक दिहेस।

तब लोगन स कहेस, “इस्राएल, तू पचन्क हिआँ उहइ देवता अहइँ जउन तू सबन्क मिस्र स बाहेर लइ आएन ह।”

⁵ हारून इ चीजन्क लखेस। ऍह बरे उ बछवा क समन्वा एक वेदी बनएस। तब हारून एलान किहेस, “भियान यहोवा क मान देइ बरे एक खास भोज होइ।”

⁶ भियान भिन्सारे मनइयन हाली उठि गएन। उ पचे पसु क मारि डाएन अउ ओकर होमबलि अउ मेलबलि चढ़ाएन। मनइयन खाइ अउ पिअइ बरे बइठेन। तब उ पचे ठाड़ भएन अउ असभ्य भोज किहेन।

⁷ उहइ समइया यहोवा मूसा स कहेस, “इ पहाड़े स पाले उतरा। तोहार लोगन यानी उ पचे, जेका तू मिस्र स लइ आया ह, भयंकर पाप किहे बाटेन। ⁸ उ पचे जल्दी ही उ चीजन क करइ स मुकर गएन जेनका करइ क हुकुम मइँ ओनका दिहउँ ह। उ पचे टेघरा भवा सोना स आपन बरे एक बछवा बनएन। उ सबइ उ बछवा क निहुरत अहइँ अउ ओका बलि चढ़ावत अहइँ। लोगन कहेन ह, ‘इस्राएल, इ सबइ तोहार देवता अहइँ, जउन तोहका मिस्र स बाहेर लइ आएन ह।’”

⁹ यहोवा मूसा स कहेस, “मइँ इ लोगन क लखेउँ ह, मइँ जानत अहउँ कि इ पचे बहोत हठी अहइँ। ¹⁰ ऍह बरे अब मोका ओन लोगन क बरबाद करइ द्या। तब मइँ तोहरे बरे एक बड़का रास्ट्र बनउब।”

¹¹ मुला मूसा यहोवा आपन परमेस्सर स पराथना किहेस अउ ओसे भीख मांगेस। मूसा कहेस, “हे यहोवा, तोहका आपन लोग पइ काहे किरोध करइ चाही। आप आपन अपार सक्ती अउ आपन बल स इ पचन्क मिस्र स बाहेर लइ आया ह। ¹² मुला अगर आप आपन लोगन क नस्ट करब्या तब मिस्र क मनइ कहि सकत हीं ‘यहोवा आपन लोगन क संग बुरा करइ क चाल चलेन ह। इहइ कारण अहइ कि एनका मिस्र स बाहेर निकार्या ह। उ ओनका पहाड़े प मारि डावा चाहत रहा। उ आपन लोगन क धरती स मेटाइ देइ चाहत ह।’ ऍह बरे आपन लोगन किरोध करइ बन्द करा। ओन लोगन क बर्बाद करइ क जोजना छोड़ द्या। ¹³ आप आपन सेवा करइवालन इब्राहीम, इसहाक अउ याकूब क याद राखा। आप आपन नाउँ क उ पचन्क प्रतिग्या करइ बरे बइपर्या तू कहया, ‘मइँ तोहार लोगन क ओतना अनगिनत बनउब जेतना अकासे मँ तारा अहइँ। मइँ तोहरे लोगन क इ समूची भुइँया देब जेका मइँ ओनका बचन दिहउँ ह। इ भुइँया हमेसा ओनकइ होइ।’”

¹⁴ ऍह बरे यहोवा अफसोस किहेन। यहोवा उ नाहीं किहेन जउन उ कहे रहेन। उ लोगन क बरिबाद नाहीं किहेन।

¹⁵ तब मूसा पहाड़े स खाले उतरा। मूसा क लगे अगवा अउ पाछे लिखा भवा करार वाला दुइ समथर पाथर रहेन। ¹⁶ परमेस्सर खुद ओनँ पाथरन क बनएस। परमेस्सर खुद उ आग्यन क पाथरे प खोदेस ह।

¹⁷ पहाड़े स तरखाले उतरत यहोसू मनइयन क हल्लागुल्ला सुनेस। यहोसू मूसा स कहेस, “खाले पड़ाव मँ लड़ाई क अवाज सुनाइ पड़त अहइ।”

¹⁸ मूसा जवाब दिहेस, “इ फउजे क जीत क सोर न बाटइ अउर न ही हार जाए प चिचिआइ क सोर। मइँ जउन अवाज अनकत अहउँ उ गाने का अवाज अहइ।”

¹⁹ जब मूसा डेरा क निअरे आवा तउ उ सोना क बछवा अउ लोगन क गावत अउ नाचत भवा निहारेस। मूसा बहोत कोहाइ गवा अउ उ समथर पथरन क भुइँया प गिराइ दिहस अउ ओनका तोड़ दिहस। पहाड़े क तलहटी मँ उ ओनका रेजा रेजा कइ दिहस। ²⁰ तबहिं मूसा लोगन क बनवा भवा बछवा क तोड़ फोड़ डाएस। उ सोना क आगी मँ टेघराएस। उ सोना क ऍतना पीसेस कि उ चूरन होइ गवा। उ सोना क चूरन क पानी मँ बहाइ दिहस। तबहिं उ इस्राएल क मनइयन क पानी पिअइ बरे मजबूर किहस।

²¹ मूसा हारून स कहेस, “इ मनइयन तोहरे संग का किहेन? कि तू ओनका अइसे बुरा पाप करइ क लिआया?”

²² हारून जवाब दिहस, “महासय! जिन कोहाअ। आप जानत बाटेन कि लोगन हमेसा गलत काम करइ क तइयार रहत हीं। ²³ लोग मोसे कहेस, ‘मूसा हम पचन्क मिस्र स बाहेर लइ आया। मुला हम पचे नाहीं जानित कि ओकरे संग का भवा बाटइ। ऍह बरे हम सब मनइयन क राह देखावइ वाला कउनो देवतन क बनावा।’ ²⁴ ऍह बरे मइँ मनइयन स कहेस, ‘जदि तोहरे लगे सोना क अंगूठियन होइ तउ ओनका मोका दइ द्या।’ मनइयन मोका आपन सोना दिहेन ह। मइ इ सोना क आगी मँ झोंका अउ इ बछवा आगी स बाहेर आएस।”

²⁵ मूसा लखेस कि लोग नियंत्रण स बाहेर होइ गएन, काहेकि हारून ओह पइ नरम होइ गएन ह। मनई मूरख क नाई इ तरह क ब्योहार करत बाटेन। ओनकइ सब दुस्मन लखि सकइँ। ²⁶ ऍह बरे मूसा डेरा क दरवाजे प ठाड़ भवा। मूसा कहेस, “कउने मनई जउन यहोवा क पाछा करइ चाहत ह मोरे लगे आवइ।” तब लेवी क परिवारे क सबइ मनइयन परात परात मूसा क लगे आएन।

²⁷ तबहिं मूसा ओनसे कहेस, “इ तरह इस्राएल क परमेस्सर यहोवा क कहात ह: ‘हर मनई आपन तरवार उठाइ लेइ अउ डेरा क एक निकास स दूसर निकास ताई जाइ। तू पचे उ लोगन क जरूर मारइ चाही चाहे उ तोहार आपन भाई, दोस्त अउ पड़ोसी ही क्यों न हो।’”

²⁸ लेवी क परिवारे क मनई मूसा क हुकुम मानेन। उ दिना इस्राएल क करिब तीन हजार मनई मर गएन। ²⁹ तब मूसा कहेस, “आज यहोवा क सेवा करइ बरे अपने आपक तइयार कर ल्या। काहेकि यहोवा आज तोहका आसीर्बाद देइहीं! अगर चाहे कि कउनो आदमी आपन पूत या रिस्तेदार क खोइ देत ह।”

³⁰ दूसर दिन भिंन्सारे मूसा मनइयन स कहेस, “तू पचे खउफनाक पाप किहा ह। मुला अब मइँ यहोवा क लगे ऊपर जाब। सायद कि मइँ तोहार पाप बरे प्रायस्चित कइ सकत हउँ।” ³¹ तउ मूसा लौटिके यहोवा क लगे गवा अउ कहेस, “कृपा कइके सुना। इ लोग बहोत बुरा पाप किहेन ह अउ सोना क एक देवता बनएन ह। ³² अबहिं ओनका पाप खातिर छिमा कइ द्या। जदि आप छिमा न करब्या तउ मोर नाउँ “जिन्नगी क किताबे^[a] स मेट द्या जेका आप लिखे अहा।”

³³ मुला यहोवा मूसा स कहेस, “जउन मोरे खिलाफ पाप करत हीं, सिरिफ अइसा ही मनई बाटेन जेकर नाउँ मइँ आपन किताबे स मेटत हउँ। ³⁴ ऍह बरे जा अउ मनइयन क हुवाँ लइ जा, जहाँ मइँ कहत हउँ। मोर सरगदूत तोहरे अगवा अगवा चली अउ तोहका राह देखाइ। जब उ मनइयन क सजा देइ क टेमॅ आइ, तउ जउन पाप किहे बाटेन तब ओनका सजा दीन्ह जाइ।” ³⁵ ऍह बरे यहोवा मनइयन मँ एक भयंकर बेरामी पइदा किहेन ह। उ ऍह बरे अइसा किहेन ह कि उ पचे हारून स सोना क बछवा बनवइ क कहे रहेन।

मइँ तोहरे संग न जाब

33 तब यहोवा मूसा स कहेस, “तू अउ तोहार उ लोग जेनका तू मिस्र स हिआँ लइ आया ह इ ठउर क जरूर तजि द्या। अउर उ भुइँया मँ जा जेका मइँ इब्राहीम, इसहाक अउ याकूब क देइ क बचन दिहउँ ह। मइँ ओनका बचन दिहउँ ह। मइँ वाचा किहेउँ, मइँ उ भुइँया क तोहरे सन्तानन क देब। ² मइँ एक सरगदूत तोहरे अगवा अगवा पठउब। अउर मइँ कनानी, हित्ती, एमोरी, परिज्जी, हिब्बी, अउ यबूसी मनइयन क बाहर हाँक देब। मइँ उ लोगन क तोहार पहँटा तजि देइ क मजबूर करब। ³ ऍह बरे उ भुँइया पइ जा जउन दूध अउर सहद स भरपूर होइ। मुला मइँ तोहरे संग न जाब। तू पचे बहोत जिद्दी अहा। जदि मइँ तोहरे संग जाब तउ तोहार नास करब।”

⁴ मनइयन इ बुरी खबर सुनेन अउ बहोत दुःखी भएन। ऍह बरे लोग आपन गहना उतार लिहेन। ⁵ उ काहेकि यहोवा मूसा स कहेन, “इस्राएल क मनइयन स कहा, ‘तू पचे हठी लोग अहा। जदि मइँ तोहरे संग सिरिफ थोड़ी बरे होबउँ, होइ सकत ह मइँ तू पचन्क नास कइ देब। ऍह बरे सबइ आपन गहना उतारि देइँ। तब मइँ इ निहचय करब कि तोहरे संग का करी।’” ⁶ ऍह बरे इस्राएल क लोग होरेब अर्थात् सीनै पहाड़े स अगवा आपन गहना उतारे रहेन।

बइठकावाला तत्कालिक तम्बू

⁷ मूसा बइठकावाला तम्बू क डेरा स कछू दूर लइ गवा। हुवाँ उ ओका लगाएस अउ ओकर नाउँ “बइठकावाला तम्बू” राखेस। कउनो व्यक्ति जउन यहोवा स कछू जानइ चाहत रहा, ओका डेरा क बाहेर बइठकावाला तम्बू ताई जाइ क पड़त रहा। ⁸ जब कबहुँ मूसा बाहेर बइठकावाला तम्बू मँ जात तउ मनइयन ओका निहारत रहतेन। लोगन आपन तम्बू क दुआरे ठाड़ रहतेन अउ मूसा क तबहिं ताई लखत रहतेन जबहिं ताई मूसा बइठका वाला तम्बू मँ न चला जात। ⁹ जब मूसा बइठकावाला तम्बू मँ घुसरत एक लम्बा बादर क खम्भा खाले उतर जात अउ उ बादर बइठकावाला तम्बू क दुआरे ठहरत। इ तरह यहोवा मूसा स बात करत रहत। ¹⁰ जब लोगन बइठकावाला तम्बू क दुआर बादर क लखतेन उ निहुरेस अउ परमेस्सर क आराधना किहेस। हर मनई आपन तम्बू क दुआरे ओकर आराधना करत रहा।

¹¹ इ तरह यहोवा मूसा स आमने-सामने बात करत रहा। यहोवा मूसा स इ तरह बात करत रहा जइसे कउनो मनई आपन मीत स बतियात होइ। यहोवा स बात करइ क पाछे मूसा हमेसा डेरा मँ वापस लौटत रहा। नून क पूत यहोसू मूसा क सहायक रहा। यहोसू हमेसा तम्बू मँ रहत रहा। जब मूसा ओका छोड़त रहा।

मूसा यहोवा क महिमा लखत ह

¹² मूसा यहोवा स कहेस, “आप मोका इ पचन्क क अगुवाइ करइ क कहया ह। मुला आप इ नाहीं बताएन कि आप मोरे संग केका पठइहीं। आप मोसे कहेन, ‘मइँ तोहका अच्छी तरह जानत हउँ अउ मइँ तोहसे खुस अहउँ।’ ¹³ जदि मइँ तोहका फुरे फुरे खुस किहेउँ ह, मोका तोहार निर्णय क बारे मँ जानइ द्या अउर तू मोका आपन तरह सिखावा। तब मइँ आपक लगातार खुस राखि सकत हउँ। याद राखा कि इ आप क लोग अहइँ।”

¹⁴ यहोवा कहेस, “मइँ खुद तोहरे संग चलब। मइँ तोहका राह देखाउब।”

¹⁵ तबहिं मूसा यहोवा स कहेस, “जदि तू हम पचन्क संग न चलब्या तउ तू इ ठउर स हम पचन्क जिन दूर पठवा। ¹⁶ हम पचे इ भी कइसे जान लेब कि तू मोसे अउर इ लोगन स खुस अहा? जदि तू संग चलब्या तउ हम पचे निहचय इ जानब। तोहका हमरे संग होइ क पाछे इ देखाउब कि मइँ अउर तोहार लोगन इ धरती क दूसर लोगन स कइसे अलग होइ जाब।”

¹⁷ तब यहोवा मूसा स कहेस, “मइँ उहइ करब जउन तू कहत बाट्या। मइँ इ करब काहेकि मइँ तोहसे खुस अहउँ। मइँ तोहका अच्छी तरह स जानत हउँ।”

¹⁸ तब मूसा कहेस, “अब किरपा कइके मोका महिमा देखावा।”

¹⁹ परमेस्सर कहेस, “मइँ आपन उचित भलाई क तोहार आगे स गुजारउब। मइँ यहोवा अहउँ अउर मइँ आपन नाउँ क घोषणा करब जेसे तू ओका सुनि सका। मइँ कउनो भी व्यक्ति प कृपा अउ पिरेम देखाउब जेनका मइँ चाहउब। ²⁰ मुला तू मोर मुँह नाहीं निहार सकत्या। कउनो भी मनई मोका लख नाहीं सकत अउर जदि लखि लेत ह तउ उ जिन्दा नाहीं रहि सकत।”

²¹ “मोरे लगे नगिचे एक ठु चट्टान बाटइ। तू उ चट्टाने प ठाड़ होइ सकत ह। ²² मोर महिमा उ ठउर स होइके जाइ। मइँ तोहका उ चट्टाने क बड़की दरार मँ राखब अउ तोहका आपन हथवा स ढाँकब जे समइ मइँ गुजरब। ²³ तबहिं मइँ आपन हाथ हटाइ लेब अउर तू मोर पीठ भइ देखब्या। मुला तू मोर मुँह नाहीं देख पउब्या।”

पाथर क नई पाटी

34 तब यहोवा मूसा स कहेस, “दुइ अउर समथर पाथरन ठीक वइसे ही बनावा जइसे पहिले दुइ रहीं जेका तू तोग दिहे रहा। मइँ एह प ओनही सब्दन क लिखब जउन पहिले दुइनउँ पाथर क पाटी प लिखा रहेन। ² भियान भिन्सारे तइयार रह्या अउ सीनै पहाड़े प आवा। हुवाँ मोरे समन्वा पहाड़े क चोटी प ठाड़ रह्या। ³ कउनो मनई क तोहरे संग नाहीं आवइ दीन्ह जाइ। हिआँ तलक कि तोहरे गोरू अउ भेड़ी क झुण्ड क भी पहाड़े क उ पार घास नाहीं चरइ चाही।”

⁴ ऍह बरे मूसा पहिले पाथर क तरह पाथर क दुइ समथर पाटी बनएस। तब दूसर दिन भिन्सारे उ सीनै पहाड़े प गवा। मूसा उहइ किहेस जइसा यहोवा ओका हुकुम दिहे रहेन। मूसा आपन संग पाथर क दुइ पाटी लइ गवा। ⁵ मूसा क पहाड़े प पहोंच जाइ क पाछे यहोवा ओकरे लगे बादर मँ खाले पहाड़े प आवा। यहोवा हुवाँ मूसा क लगे ठाड़ रहा। उ यहोवा क नाउँ लिहेस।

⁶ यहोवा मूसा क समन्वा स गवा अउ उ कहेस, “यहोवा, दयालु यहोवा, अउ कृपालु परमेस्सर अहइ। यहोवा कोहाइ मँ धीरे करत ह। यहोवा महान पिरेम स सराबोर बा। यहोवा बिस्सास क जोग्ग बा। ⁷ यहोवा हजारन पीढ़िन प कृपा करत ह। यहोवा लोगन क जउन उ पचे पापन्क करत हीं, छिमा करत ह। मुला यहोवा अपराधी क सजा देइ मँ चूकत नाहीं। यहोवा सिरिफ अपराधी क सजा नाहीं देइ मुला ओनके बेटवन, नाती, पंती अउ संती क भी बुरी बात क सजा देइ जउन उ पचे किहे रहेन।”

⁸ तब तुरन्तइ मूसा धरती प निहुरा अउ यहोवा क पूजेस। मूसा कहेस, ⁹ “सुआमी। जदि आप मोसे खुस अहइँ तउ हमार साथे चलइँ। मइँ जानत हउँ कि उ पचे हठी लोग अहइँ। मुला हम पचन्क ओन पापन्क अउ अपराधन्क छिमा कइ द्या, जउन हम पचे किहेन ह।”

¹⁰ तब यहोवा कहेस, “मइँ तोहरे सबहिं लोगन क संग इ करार करत हउँ। मइँ अइसा अचरज कार्य करब जइसे इ धरती प कउनो भी दूसर रास्ट्र क खातिर पहिले कबहुँ नाहीं कीन्ह गवा रहा। तोहरे संग सबहिं लोगन उ अचभ्बा क निहरिहीं जउन मइँ तोहरे बरे करब। ¹¹ आज मइँ जउन हुकुम देत हउँ ओका माना। मइँ कनानी, हित्ती, एमोरी, परिज्जी, हिब्बी, अउ यबूसी क बाहेर निकरि जाइ क मजबूर करब। ¹² होसियार रहा। उ लोगन क संग कउनो समझौता जिन करा जउन उ पहँटा मँ रहत अहइँ जहाँ तू जात अहा। जदि तू ओनकइ संग समझौता करब्या तउ तू ओहमाँ फँस जाब्या। ¹³ ओनके वेदी क नास कइ डावा उ पाथरन क तोड़ि डावा जेका उ पचे पूजत बाटेन। ओनकइ मूरत^[b] क काटिके बहाइ द्या। ¹⁴ कउनो दूसर देवता क आराधना जिन करा। मइँ ‘यहोवा-कना ईर्स्यालु यहोवा’ अहउँ। इ मोर नाउँ अहइ। मइँ ‘एल-कना’ ईर्स्यालु परमेस्सर हउँ।

¹⁵ “जउन लोग उ पहँटा मँ रहत हीं ओनसे कउनो समझौता जिन करा। जदि तू इ करब्या तउ जब उ सबइ आपन देवतन क पूजिहीं तब तू ओनके साथे होइ सकब्या। उ पचे तोहका सामिल होइ बरे न्यौतिहीं अउर तू ओनकइ भेंट क खाब्या। ¹⁶ तू आपन बेटवन क पत्नी बनवइ बरे ओनकइ कछू बिटियन क चुन सकत ह। उ पचे बिटियन झूठ देवतन क पूजा करत रहत हीं। उ पचे तोहरे बेटवन स उहइ करवाइ सकत हीं।

¹⁷ “मूरत जिन बनाया।

¹⁸ “बे खमीरे क रोटी क दावत क त्यौहार मनावा। मोरे हुकुम बरे सात दिना तलक बेखमीरे क रोटी खाया। एका उहइ महीना मँ करा जेका मइ चुनेउँ ह जउन कि अबीब क महीना अहइ। काहेकि उहइ महीना अहइ जब तू मिस्र स बाहेर आए रह्या।

¹⁹ “कउनो भी मेहरारू क पहिलौटी बेटवा मोर बा। पहिला जनावर भी जउन तोहार गाय-बोकरी अउ भेड़ी स पइदा होइ, मोर अहइ। ²⁰ जदि तू पहिले पइदा भए गदहा क आपन बरे राखइ चाहत बाट्या तउ तू एका भेड़ी क बच्चा स बेसहि सकत ह। मुला अगर तू उ गदहा क भेड़ी क बच्चा स नाहीं वेसहत्या तउ तोहका उ गदधा क गरदन जरूर तोड़ दइ चाही। तोहका आपन पहिलौटी सब पूतन बरे मोसे बेसहइ क होइ। कउनो व्यक्ति बे भेंटे क मोरे समन्वा न आइ।

²¹ “तू छ: दिन काम करा। मुला सातँवा दिन अराम करा।। पौध रोपइ अउ फसिल काटइ क समइया भी तोहका सबित क दिन क धियान रखइ चाही।

²² “हफ्तन क त्यौहार मनावा। फसल कटाइ क त्यौहार क मनावा। आखीर मँ फसल काटइ क दावत करा।

²³ “हर साल तोहार सब मनई तीन दाई आपन सुआमी, यहोवा इस्राएल क परमेस्सर क लगे जइहीं।

²⁴ “जबहिं तू आपन भुइँया मँ पहुँचब्या मइँ तोहरे दुस्मनन क उ भुइँया स बाहेर जाइके मजबूर करब। मइँ तोहरे चौहद्दी क बढ़ाउब अउर तू जिआदा स जिआदा धरती पउब्या। तोहका आपन परमेस्सर यहोवा क समन्वा बरिस मँ तीन दाई जाइ चाही। अउर तोहसे उ टेमॅ तोहर देस लेइ क कउनो जतन न करी।

²⁵ “जब तू बलि स खून भेंट करा तउ उहइ समइया खमीर जिन भेंट करा।

“अउर फसह त्यौहार क कछू भी गोस दूसर भिन्सारे तलक नाहीं राखइ चाही।

²⁶ “यहोवा क आपन पहली काटी भइ फसल द्या। उ चीजन्क यहोवा आपन परमेस्सर क घरे लइ आवा।

“बोकरी क बच्चा क ओकर महतारी क दूध मँ जिन पकावा।”

²⁷ तब यहोवा मूसा स कहेस, “जउन बातन क मइँ बतायउँ ह ओनका लिखि ल्या। इ आदेस क अनुसार मइँ तोहार अउर आपन बीच करार किहउँ ह।”

²⁸ मूसा हुवाँ यहोवा क संग चालीस दिना अउ चालीस रात रहा। उ पूरे टेम तलक न खइया क खाएस अउर न पानी पिएस। अउर मूसा क करार क सब्दन क दस-आग्यन क दुइ समथर पाथरन प लिखेस।

मूसा क चमचमात मुँह

²⁹ तब मूसा सीनै पहाड़े स तरखाले उतरा। इ यहोवा क दुइनउँ पाथरे क समथर पाटी क संग लइ आवा। मूसा क मुँह चमकत रहा। काहेकि उ यहोवा स बात किहेस। मुला मूसा इ बरे नाहीं जानत रहा। ³⁰ हारून अउ इस्राएल क सब लोगन लखेन कि मूसा क मुँह चमकत रहा। ऍह बरे उ पचे ओकरे पास जाइ स डेरानेन। ³¹ मुला मूसा ओनका बोलाएस। ऍह बरे हारून अउ सबहिं अगुवा लोग मूसा क लगे गएन। मूसा ओनसे बतियान। ³² ओनके पाछे इस्राएल क सबहिं लोग मूसा क लगे आएन। अउर मूसा ओनका उ आदेस दिहेस जउन यहोवा सीनै पहाड़े प दिहे रहा।

³³ जब मूसा बात करब खतम किहेस तउ उ आपन मुँह क एक ओढ़ना स ढाँकि लिहस। ³⁴ जब कबहुँ मूसा यहोवा क समन्वा बात करइ जात तउ ओढ़ना क हटाइ लेत। तब मूसा बाहेर आवत अउ इस्राएल क लोगन क इ बतावत जउन यहोवा क हुकुम होत रहा। ³⁵ इस्राएल क मनइयन देखत रहेन कि मूसा क मुँह तेज स चमकत रहा। ऍह बरे मूसा आपन मुँह फुन ढाँकि लेत। मूसा आपन मुँहना क तब तलक ढाँके रखत रहा जब तलक उ यहोवा क संग बात करइ अगली दाई नाहीं जात रहा।

सबित क नेम

35 मूसा इस्राएल क सबहिं मनइयन क बटोरेस। मूसा ओनसे कहेस, “मइँ उ सब आदेसन क बताउब जउन यहोवा तू पचन्क करइ क आदेस दिहस ह।

² “काम करइ क छ: दिन अहइँ। मुला सातवाँ दिन तू पचन्क अराम क दिन खास दिन होइ। उ खास दिन अराम कइके तू पचे यहोवा क स्रद्धा देब्या। जदि कउनो सातवाँ दिन काम करी तउ ओका जरूर मारि डावा जाइ। ³ सबित क दिना तू सबन्क कउने ठउर प आगी तलक नाहीं बारइ चाही जहाँ कहूँ तू पचे रहत बाट्या।”

पवित्तर तम्बू क सामान

⁴ मूसा इस्राएल क सबहिं मनइयन स कहेस, “इहइ बा जउन यहोवा हुकुम दिहे अहइ। ⁵ यहोवा बरे खास भेंट बटोरा। तोहका आपन मन मँ ठान लेइ चाही कि तू पचे का भेंट मँ देब्या। अउर तब तू उ भेंट यहोवा क लगे लइ आवा। सोना, चाँदी, काँसा, ⁶ नीला बैगनी अउ लाल कपड़ा, उत्तिम सन अउ बोकरी क बार, ⁷ भेड़ी क लाल रंगी खाल, उत्तिम चाम, बबुरे क लकड़ी, ⁸ दिया बरे जइतूने क तेल, अभिसेक क तेल बरे मसाले सुगन्धि धूप बरे मसाला, ⁹ गोमेद रतन अउ दूसर रतन एपोद अउर निआव क थइला प लगावा जइहीं।

¹⁰ “आप सबहिं कुसल कारीगर क चाही कि यहोवा जउन चीजन्क हुकुम दिहे अहइँ ओनका बनावा। इ सबइ उ चीज अहइँ जेनके बरे यहोवा हुकुम दिहे अहइँ। ¹¹ पवित्तर तम्बू, ऍकरे बाहेर क तम्बू, अउ एकर ढकना, हुक, तखता, पाटी, खम्भा अउ आधार। ¹² पवित्तर संदूख, अउ एकर खम्भन अउ संदूखे क ढकना, अउ दरवाजे क रास्ता क ढाँपइ बरे पर्दा। ¹³ मेज अउ एकर खम्भन, मेजे प धरी जाइवाली सब चीज, अउ मेजे प धरी जाइवाली खास रोटी, ¹⁴ रोसनी क बइपरइ बरे डीबट, अउर ऍकर सबइ बासन, ऍकर दिया, अउ रोसनी बरे तेल, ¹⁵ धूप बारइ बरे वेदी अउ ऍकर खम्भन, अभिसेक क तेल अउ महकउआ धूप, बइठकावाला तम्बू क प्रवेस दुआर क ढाकइ वाली कनात, ¹⁶ होमबलि क बारइ बरे वेदी, एकर काँसा क झंझरी, खम्भन अउ वेदी प बइपरइ बरे सबहिं चिजियन, काँसा क खोरा अउ आधार, ¹⁷ आँगन क चारिहुँ कइँती पर्दा, अउर खम्भा अउ एकर आधार, अउर आँगन क प्रवेस दुआर क ढकइवाला कनात, ¹⁸ तम्बू क थामइ बरे बइपरइ खातिर खूँटी अउर आँगन क घेरइवाला पर्दा क दिवार, खूँटी स बाँधइवाली लसुरी। ¹⁹ अउ खास बुना भवा ओढ़ना जेका याजक पवित्तर ठउरे प पहिरहीं। इ खास ओढ़ना हारून अउ ओकरे बेटवन क पहिरइ बरे अहइँ। उ पचे इ ओढ़ना क तब पहिरहीं जब उ पचे याजक क रूप मँ सेवा करिहीं।”

लोगन क बड़का भेंट

²⁰ तब इस्राएल क सबहिं मनई मूसा क लगे स चलेन। ²¹ सबहिं मनइयन जउन भेंट चढ़ावइ चाहत रहेन आएन अउर यहोवा बरे भेंट लिआएन। इ भेंट बइठकावाला तम्बू क बनावइ, तम्बू क सब चीजन अउ खास ओढ़ना बनावइ क काम मँ लाइ गइन। ²² सबहिं मेहरारू-मनसेधू, जउन चढ़ावा देइ चाहत रहेन, किसिम किसिम क आपन-आपन सोना क गहना लइ आएन। उ सबइ पिन, कान क बाली, मुंदरी, दूसर गहना लइ आएन। उ पचे आपन सबहिं गहना क चढ़ाएन। इ यहोवा क खास भेंट रही।

²³ हर मनई जेकरे लगे नीला, बैगंनी अउ लाल कपड़ा अउर सन क उत्तिम रेसा रहा, उ इ सबन्क यहोवा क लगे लइ आवा। उ मनई जेकरे लगे बोकरी क बार, लाल रंग क भेड़ी क खाल, उत्तिम चमड़ा रहा, ओका उ यहोवा क लगे लइ आवा। ²⁴ हर मनई जउन चाँदी, काँसा चढ़ावइ चाहत रहा यहोवा क भेंट क रूप मँ ओका लियाएस। हर मनई जेकरे लगे बबुरे क लकड़ी रही, आवा अउ ओका यहोवा क चढ़ाएस। ²⁵ हर माहिर मेहरारू सन क उत्तिम रेसावाला नीला, बैगनी अउ लाल ओढ़ना बनाएस। ²⁶ उ सबहिं मेहरारू जउन माहिर रहीं अउ इ काम बरे ओकर मदद करइ सकत हीं उ पचे बोकरी क बारे स ओढ़ना बनाएन।

²⁷ नेतन सुलेमानी पाथर तथा दूसर रतन लइ आएन। इ सब नग अउ रतन याजक क एपोद अउ निआउ क थइली मँ लगाए रहेन। ²⁸ लोग मसाला अउ जइतून क तेल भी लइ आएन। इ चीजन महकउआ धूप, अभिसेक क तेल अउ दिया क तेल बरे बइपरी गइन।

²⁹ इस्राएल क सबहिं मनइयन जउन मदद करइ चाहत रहेन यहोवा बरे भेंट लइ आएन। मनइयन इ सबहीं भेंट दिल खोलिके जेतन उ पचे चाहेस दिहेन। इ भेंट उ सबइ चीजन्क बनवइ बरे काम मँ आइन जेका यहोवा मूसा अउ लोगन क बनाइ क हुकुम दिहे रहेन।

बसलेल अउ ओहोलीअब

³⁰ तब मूसा इस्राएल क मनइयन स कहेस, “लखा यहोवा बसलेल, उरि क बेटवा (उरि हूर क बेटवा रहा) जउन यहूदा क परिवार गोत्र स रहा क चुनेस। ³¹ अउर उ बसलेल क परमेस्सर क आतिमा स भरि दिहस। इसलिए उ बुद्धि स परिपूर्ण अहइ अउर उ हर प्रकार क सिल्पकारी कार्य क करइ मँ होसियार अउ माहिर अहइ। ³² उ सोना, चाँदी अउ काँसा क चीजन्क नमूना बनाइ सकत ह। ³³ उ नग अउर रतन क काट अउ जड़ सकत ह। बसलेल लकड़ी क काम कइ सकत ह अउर सबहिं तरह की चीजन क बनइ सकत ह। ³⁴ यहोवा बसलेल अउ ओहोलीआब क दूसर लोगन क सिखवइ क जोग्यता दइ दिहस ह। (ओहोलीआब दन क परिवार गोत्र स अहीसामाक क पूत रहा।) ³⁵ यहोवा इ दुइनउँ मनइयन क सब तरह क काम कइ क कुसलता दइ दिहस। ह। उ पचे बढ़ई अउ लोहार क काम करइ क जोग्यता रखत हीं। उ सबइ नीला, बैगनी अउ लाल ओढ़ना अउ सन क उत्तिम रेसा वाला कपड़ा स तस्बीर क काढ़िके ओनका बुन सकत हीं। अउर उ पचे ऊन स भी चीजन्क बुन सकत हीं। उ सबइ प्रकार क काम करइ सकत ह अउर सबइ प्रकार क कलाकारी बनाइ सकत ह।

36 “ऍह बरे बसलेल, ओहोलीआब अउ सब चतुर मनई उ काम करिहीं जेनका यहोवा हुकुम दिहे अहइ। यहोवा इ मनइयन क ओन सबहिं काम करइ क बुद्धि अउ समझ दइ दिहे अहइ जेकर जरूरत इ पवित्तर ठउर क सेवा करइ बरे अहइ।”

² तब मूसा बसलेल, ओहोलीआब अउ सबहिं दूसर मनइयन क बोलाएस जेनका यहोवा खास चतुराई दिहे रहा। अउर इ पचे आएन काहेकि इ काम मँ मदद करइ चाहत रहेन। ³ मूसा इस्राएल क उ कुसल मनइयन क उ सबहिं चीजन्क दिहेन जेनका इस्राएल क लोग उपहार क रूप मँ लइ आए रहेन। अउर उ पचे पवित्तर ठउर क बनवइ मँ उ चीजन्क बइपरेन। मनइयन रोज भिन्सारे भेंट लइ आवत रहेन। ⁴ तब सबहिं कुसल मनइयन पवित्तर ठउर क काम क अनजाम देइ बरे क जगह जमा भएन। अउर उ पचे मूसा स बात करइ गएन। उ पचे कहेन, ⁵ “लोग बहोत सारे चिजन लाए अहइँ, अउर हम पचन्क लगे ओसे बहोत जिआदा सामान अहइ जेतना कि उ काम क पूरा करइ बरे चाही जेका करइ क हूकुम यहोवा दिहस ह।”

⁶ तबहिं मूसा सिबिर मँ खबर क प्रचार कराएस: “कउनो मनसेधू या मेहरारू क अब कउनो भेंट पवित्तर तम्बू मँ न चढ़ाई चाही।” ⁷ इ तरह लोगन जेतना चाही ओसे जियादा देइ क बन्द कइ दिहेन।

पवित्तर तम्बू

⁸ तब कुसल कारीगरन तम्बू बनउब सुरू किहेन। उ पचे नीला, बैगनी अउ लाल ओढ़ना अउ सन क उत्तिम रेसा स दस पर्दा बनाएन। अउर उ पचे करूब सरगदूतन क तस्वीरन क पर्दन प काढ़ेन। ⁹ हर एक पर्दा बराकर नाप क रही। इ अट्ठाइस हाथ लम्बी अउर चार हाथ चौड़ी रही। ¹⁰ कारीगरन पर्दन क दुइ भाग मँ बाँटि दिहेन। उ पचे पाँच ठु पर्दन क एक हींसा मँ जोड़ के पहिला समूह बनाएन। दूसर समूह क भी उ पचे पाँच ठू पर्दन क एक हींसा मँ जोड़के बनाएन। ¹¹ पहली समूह क आखरी पर्दा क सिरा क संग फंदा बनइ बरे नीला कपड़ा प्रयोग भवा रहा। उ पचे दूसर समूह क आखरी पर्दा क संग भी उहइ काम करइ रहेन। ¹² पहिले समूह क आखरी पर्दा क सिरा मँ पचास फंदा रहेन अउ दूसरे समूह क आखरी पर्दा क सिरा मँ भी पचास फंदा रहेन। फंदा एक दूसर क आमने सामने रहेन। ¹³ तब उ पचे पचास सोने क छल्ला बनाएन। उ पचे इ फलियन क दुइनउँ कनात क जोड़इ बरे लगाएन। इ तरह पवित्तर तम्बू क जोड़के एक हींसा बनाइ गएन।

¹⁴ तब कारीगरन दूसर तम्बू पवित्तर तम्बू क ढाँकइ बरे बनाएन। उ ग्यारह पर्दने बनावइ बरे बोकरी क बारन क प्रयोग किहेन। ¹⁵ सबहिं ग्यारह पर्दन एक ही नाप जोख क रहिन। उ सबइ तीस हाथ लम्बी अउ चार हाथ चैड़ी रहिन। ¹⁶ कारीगरन पाँच पर्दन क एक मँ सिएस अउ छ पर्दनन क दूसर मँ सिएस। ¹⁷ उ पचे पहिली समूह क आखिरी पर्दा क सिरा स जोड़इ बरे पचास फंदा बनाएन। अउ दूसर कनाते क समूह क आखरी कनाते क सिरा मँ भी पचास फली बनाएन। ¹⁸ कारीगरन पर्दन क दुई समूह क जोड़इ बरे पचास काँसा क छल्ला बनाएन अउर एक तम्बू बनाएस। ¹⁹ तबहिं उ पचे पवित्तर तम्बू क दुइ अउर ढकना बनाएन। एक ढकना भेड़ा क लाल रंग क खाल स बनाएन। दूसर ढकना उत्तिम खाले क बनाएन।

²⁰ तब उ बबूर क लकड़ी क तखता पवित्तर तम्बू क सहारा देइ बरे लिहेस। ²¹ हर एक तखता दस हाथ लम्बा अउ डेढ़ हाथ चौड़ा बनाएन। ²² हर एक तखता क बगल मँ दुइ खूँटी एक दुसर स जुरइ रहिन। पवित्तर तम्बू क सबहिं तखता एक ही तरह क बना रहेन। ²³ बेसलेल पवित्तर तम्बू क दक्खिनी हींसा बरे बीस ढाँचा बनाएस। ²⁴ तब उ ढाँचा बरे चालीस चाँदी क आधार बनाएस। हर ढाँचा बरे दुइ आधार रहिन। एक आधार एक बगल क खम्भा बरे रहेन। ²⁵ उ बीस तखता पवित्तर तम्बू क उत्तर कइँती भी बनाएस। उ चालीस चाँदी क आधार बनाएस अउ हर तखतन बरे दुइ ठु बनाएस। ²⁶ उ हर ढाँचा क तले दुइ लगइवाला चाँदी क चालीस कुर्सी बनाएस। ²⁷ उ पवित्तर तम्बू क पिछला हींसा (तम्बू क पस्चिमी भाग) कइँती छ: ठु तखता ल्या। ²⁸ उ पवित्तर तम्बू क पिछला भाग क कोना बरे दुइ तखता ल्या। ²⁹ इ सबइ तखता तरखाले एक दूसर स जोड़ा गवा रहेन। ऊपर मँ छल्ला तखता क कोना को साथ मँ जोड़त रहेन। दुइनउँ कोना बरे भी अइसा ही कीन्ह ग रहेन। ³⁰ इ तरह हुवाँ पवित्तर तम्बू क पस्चिम भाग क बरे आठ तखता रहेन। हर एक ढाँचा क बरे दुइ आधार क हिसाब स सोलह चाँदी क आधार रहेन।

³¹ तब कारीगरन बबुरे क लकड़ी स ढाँचा क छड़ बनाएन। पवित्तर तम्बू क पहली कइँती बरे पाँच छड़ बनाएन। ³² अउर पाँच छड़ दूसर कइँती, पाँच छड़ पिछली भाग (पस्चिमी कइँती) बरे बनाएन। ³³ उ पचे ओहमाँ बीच क छड़ अइसी तरह स बनाएन जउन ढाँचा मँ स एक छोर स दूसर छोर तलक गुजरत रहिन। ³⁴ उ पचे इ तखतन क सोना स मढ़ेन। उ पचे छड़ क धरइ बरे सोना क छल्ला बनएन उ पचे कड़ियन क भी सोना स मढ़ेन।

³⁵ उ सबइ सब ते जिआदा पवित्तर ठउर क दुआर बरे पर्दा बनाएन। उ पचे सन क उत्तिम रेस अउ नीला लाल अउ बैगनी कपड़ा बइपरेन। उ पर्दा मँ करूब सरगदूत क तस्वीर काढ़ेन। ³⁶ उ पचे बबुरे क लकड़ी क चार खम्भा बनाएन अउ ओनका सोना स मढेन। उ पचे खम्भा बरे सोना क हुक बनाएन अउर खम्भा बरे चार चाँदी क आधार बनाएन। ³⁷ तब उ पवित्तर तम्बू क दुआर बरे पर्दा बनाएन। उ पचे नीला, बैगनी अउ लाल कपड़ा अउर सन क उत्तिम रेसा बइपरेन। पर्दा कढ़ाइ क सामग्री स बनाए गए रहेन। ³⁸ तब उ सबइ इ पर्दा बरे पाँच खम्भा अउ ओकर बरे हुक बनाएन। उ सबइ खम्भन क चोटी अउ पर्दन क छड़न क सोना स मढ़ेन। अउर उ पचे काँसा क पाँच आधार खम्भा बरे बनाएन।

करार क सन्दूख

37 बसलेल बबुरे क लकड़ी स पवित्तर सन्दूख बनाएस। सन्द्रख ढाई हाथ लम्बा, डेढ़ हाथ चौड़ा अउ डेढ़ हाथ ऊँचा रहा। ² उ सन्दूखे क भितरे अउ बाहेर दिवार क निखालिस सोना स मढ़ि दिहस। तब उ सोना क झालर सन्दूखे क चारिहुँ कइँती लगाएस। ³ फुन उ सोना क चार छल्ला बनाएस अउ ओनका चारिहुँ कोने प लगाएस। इ छल्लन क संदूख ढोवइ बरे बइपरा जात रहा। दुइनउँ कइँती दुइ दुइ छल्ला रहेन। ⁴ तब उ सन्दूखे क ढोवइ बरे लकरी क खम्भन क लगाएस। खम्भा बरे उ बबुरे क लकड़ी लगाएस, अउ खम्भन क सोना स मढ़ि दिहस। ⁵ उ संदूखे क हर सिरन प बना भवा छल्लन मँ खम्भन क डाइ दिहस। ⁶ तब उ निखालिस सोना स ढकना बनाएस इ ढाई हाथ लम्बा अउ डेढ़ हाथ चौड़ा रहा। ⁷ तब बसलेल सोना क पीट पीटके दुइ करूब बनाएस। उ ढकना क दुइनउँ छोर प करूब लगाएस। ⁸ उ एक करूब क एक अउ दूसर क दूसर कइँती लगाएस। करूब सरगदूतन क ढकना स एक बनावइ बरे जोड़ दीन्ह गवा। ⁹ सरगदूतन क पखना अकासे कइँती ऊपर उठाइ दीन्ह गएन। सरगदूतन आपन पखना स सन्दूखे क ढाँकि लिहन। सरगदूतन एक दूसर क समन्वा ढकना क लखत रहेन।

खास मेज

¹⁰ तब बसलेल बबुर क लकड़ी क मेज बनाएस। मेज दुइ हाथ लम्बी, एक हाथ चौड़ी अउ डेढ़ हाथ ऊँची रही। ¹¹ उ मेज क निखालिस सोना स मढ़ेस। उ सोना क झालर मेज क चारिहुँ कइँती किहस। ¹² तब उ मेज क चारिहुँ कइँती एक पट्टी बनाएस। इ पट्टी करीब चार अंगुल चौड़ा रहा। उ पट्टी प सोना क झालर बनाएस। ¹³ तब उ मेज बरे चार सोना क छल्ला बनाएस। उ मेज क चारिहुँ कोना प सोना क छल्ला लगाएस जहाँ चार ठु पाया रहेन। ¹⁴ छल्ला पट्टी क नगिचे लगा रहेन। छल्ला खम्भा मँ लगा रहेन जउन मेज क लइ जाइ मँ काम करत रहीं। ¹⁵ तब उ मेजे क ढोवइ बरे खम्भा बनाएस। इ खम्भा बबुरे क लकड़ी क रहिन। अउर ओन प निखालिस सोना मेढ़ भवा रहेन। ¹⁶ तब उ ओन चीजन्क बनाएस जउन मेज प काम आवत रहीं। उ थारी, चम्मच, परात, अउ घड़ा बनाएस। इ सब निखालिस सोना स बनवा भवा रहेन। खोरा अउ घड़ा क पेयबलि क देइ बरे बइपरा जात रहेन।

डीबट

¹⁷ तब उ डीबट बनाएस। एकरे बरे उ सुद्ध सोना बइपरेस उ सोना क पीट पीट के आधार अउ डण्डा बनाएस। तब उ फूल, कली अउ पंखड़ी बनाएस। उ इ सब चीजन्क एक टुकड़ा मँ जोरि दिहस। ¹⁸ डीबट मँ छ: डारन रहिन। एक कइँती तीन डार अउ दूसर कइँती तीन डार रहेन। ¹⁹ हर डारे प तीन फूल रहेन। इ फूल बदाम क फूल क सकल क बना रहेन। अउर ओहमाँ कली अउ पंखुड़ी रहिन। ²⁰ डीबट क डंडा प चार फूल रहेन। इ सबइ कली अउ पंखुड़ी क संग बदाम पूल क सकल क बनवा रहेन। ²¹ हुवाँ छ: डार रहेन-डण्डा क दुइनउँ किनारा स तीन-तीन डार निकलत रहेन। हुआँ एक फूल कली अउ पंखड़ी क संग उ तीनउँ जगह क नीचे जहाँ डार जुड़त रहा, रहेन। ²² इ सबहिं कली अउ डार अउ डीबट निखालिस सोना क बनी रहिन। इ समूचइ सोना क पटिके एक ही मँ जोड़ दीन्ह ग रहा। ²³ उ इ डीबट क बरे सात दिया बनाएस तब उ तस्तरी अउ चिमटा बनाएस। हर चीजन्क क निखालिस सोना स बनाएस। ²⁴ उ लगभग पचहत्तर पौण्ड निखालिस सोना डीबट अउ ओकर संग प्रयोग मँ आवइवाली चीजन क बनावइ बरे प्रयोग किहेस।

धूप बारइ क वेदी

²⁵ तब उ धूप क जलाइ बरे वेदी बनाएस। उ एका बबुरे क काठे क बनाएस। इ वेदी चउकोर रही। इ एक हाथ लम्बी, एक हाथ चौड़ी अउर दुइ हाथ ऊँची रही। वेदी प चार सीगं रहेन। हर एक कोना प एक ठु सीगं लगा भवा रहेन। इ सीगंन्क वेदी क संग एक इकाई बनवइ बरे जोड़ दीन्ह ग रहा। ²⁶ चोटी, सबहिं बगल अउ सींगन्क निखालिस सोना स मढ़ेस। तब उ वेदी क चारिहुँ कइँती सोना क झालर बनाएस। ²⁷ उ सोना क दुइ छल्ला वेदी बरे बनाएस। उ सोना क छल्लन वेदी क हर कइँती झालर क तरे राखेस। इ छल्लन मँ वेदी ढोवइ बरे डण्डा डाई जात रहीं। ²⁸ तब उ बबुरे क काठे क खम्भन बनाएस अउ ओनकइ सोना स मढ़ेस।

²⁹ तब उ अभिसेक क पवित्तर तेल बनाएस। उ निखालिस महकउआ धूप भी बनाएस। इ चीजन्क उहइ तरह बनावा गवा जउने तरह कउनो कुसल महकाउआ बनवइया बनावत ह।

भेंट बारइ क वेदी

38 तब बसलेल बबुरे क काठ वेदी बनवई बरे बइपरेस। इ वेदी भेंट क बारइ बरे काम मँ आवत रही। इ चउकोर रही। इ पाँच हाथ लम्बी, पाँच हाथ चौड़ी अउ तीन हाथ ऊँच रही। ² उ हर एक कोना प एक सींग बनाएस। उ सींगन क वेदी क संग जोड़ दिहस। तब उ हर चीज क काँसा स ढाँकि दिहस। ³ तब उ वेदी प बइपरइ वाला सबहिं अउजार बनाएस। उ बर्तनन, बेलचन, खोरन, माँस खाइ बरे काँटन अउ कड़ाहियन बनाएस। उ इ चीजन्क क काँसा स बनाएस। ⁴ तब उ वेदी बरे एक ठू काँसा क जाली बनएस। इ जाली जाल क तरह रही। इ ओका वेदी क पायदाने क नीचे लगाएस। इ वेदी क पेंदी स वेदी क आधा ऊँचाइ तक रहा। ⁵ तब उ काँसे क छल्ला बनाएस अउर ऍका जाली क चारिहुँ कोना मँ लगाइ दिहस। इ छल्ला वेदी क ढोवइ बरे खम्भन क फँसावइ क काम आवत रहेन। ⁶ तब उ बबुरे क काठे क खम्भन बनाएस अउ ओनका काँसा स मढ़ेस। ⁷ खम्भन वेदी क बगल मँ लाग भवा छल्लन मँ स लगइके वेदी क ढोवइ क काम बरे लगाएस। उ वेदी क किनारा बनावइ बरे तखता बइपरेस। वेदी भीतर स खोखल खाली संदूखे क तरह रही।

⁸ जउन मेहररूअन पवित्तर बइठकावाला तम्बू क प्रवेस दुआर प जमा भवा रहिन आपन काँसा क दरपन दइ दिहन। बसलेल इ दरपन क काँसा स हाथ धावइ क पात्र अउ एकर आधार बनाएस।

पवित्तर तम्बू क चारिहुँ ओर क आँगन

⁹ तब उ आँगन क चारिहुँ कइँती पर्दा क दीवार बनएस। दक्खिन कइँती पर्दा क दीवार एक सौ हाथ लम्बी रही। इ पर्दा सन क उत्तिम रेसा क बना रहा। ¹⁰ दक्खिनी कइँती क पर्दन बीस खम्भन क सहारे प टिका रहेन। इ खम्भन काँसा क बीस आधारन प टिका रहेन। खम्भन अउ पर्दा क छड़ा बरे हुक चाँदी क बनी रहेन। ¹¹ आँगन क उत्तर कइँती पर्दा क दीवार एक सौ हाथ लम्बी रही। बीस खम्भन अउ काँसा क बीस आधारन भी बनई गइन। खम्भन अउ पर्दा क छड़ा बरे हुक चाँदी क रहिन।

¹² आँगन क पस्चिमी कइँती पर्दा क दीवार पचास हाथ लम्बी रही। हुवाँ दस खम्भन अउ दस आधारन रहिन। खम्भन बरे हुक अउ पर्दा क छड़ा चाँदी क बनावा ग रहेन।

¹³ अँगने क पूर्वी किनारा पचास हाथ चौड़ी रही। अँगने क प्रवेस दुआर इहइ तरफ रहा। ¹⁴ प्रवेस दुआर क एक कइँती पर्दा क दीवार पन्द्रह हाथ लम्बी रही। इस तरफ तीन खम्भन अउ तीन आधार रहीं। ¹⁵ प्रवेस दुआर क दूसर कइँती क पर्दा पन्द्रह हाथ लम्बी रहेन। उस तरक भी तीन खम्भन अउ तीन आधारन रहेन। ¹⁶ आँगन क चारिहुँ कइँती क पर्दा सन क उत्तिम रेसा क बनी रहीं। ¹⁷ खम्भन क आधार काँसा क बनी रही। हुक अउ कनात क छड़ा चाँदी क बना रहा। खम्भन क चोटी भी चाँदी स मढ़ा रहा। आँगन क सबहिं खम्भन चाँदी स बना भवा छड़ा क संग रहेन।

¹⁸ आँगन क प्रवेस दुआर क पर्दा सन क उत्तिम रेसा अउ नीला लाल अउ बैगनी कपड़ा क बना रहा। एह प कढ़ाई कीन्ह गइ रही। कनात बीस हाथ लम्बा अउ पाँच हाथ ऊँच रही। इ उहइ उँचाई क रही जउने उँचाई क आँगन क चारिहुँ कइँती क कनात रहीं। ¹⁹ कनात चार खम्भन अउ चार काँसा क आधारन प खड़ी रही। खम्भा क हुक चाँदी क बनी रही। खम्भा क सिरा चाँदी स मढ़ा रहा अउ पर्दा क छड़ भी चाँदी स मढ़ा रहा। ²⁰ पवित्तर तम्बू अउ आँगन क चारिहुँ कइँती क खूँटी काँसा क बनी रहीं।

²¹ मूसा सबहिं लेवी मनइयन क हुकुम दिहेस कि उ पचे पवित्तर तम्बू करार क तम्बू क बनवइ मँ काम आवइ वाली चीजन्क क लिखि ल्या। हारून क पूत ईतामार इ सूची रखइ क अधिकारी रहा।

²² यहूदा क परिवार समूह स हुर क बेटवा उरी क बेटवा बसलेल सबहिं चीजन्क बनाएस जेनके बरे यहोवा मूसा क हुकुम दिहे रहेन। ²³ दान क परिवार समूह स अहीसामाक क पूत ओहोलीआब भी ओकर सहायता किहेस। ओहोलीआब एक कुसल सिल्पकार अउ डिजाइनर रहेन। उ सन क उत्तिम रेसा अउ नीला, बैगंती अउ लाल कपड़ा बुनइ मँ बहोत कुसल रहा।

²⁴ दुइ टन स जिआदा सोना पवित्तर ठउर बनवइ बरे यहोवा क भेंट कीन्ह ग रहा। (इ मंदिर क मान्नता स तौला ग रहा।)

^25-26 कुल मनई जउन गना ग रहेन, पौने चार टन स जिआदा चाँदी दिहन। (इ मन्दिर क मान्नता स तौला ग रहा) सबइ मनइयन जउन बीस बरिस या ओसे जिआदा उमिर क रहेन, उ पचे गना गएन। एनकइ संख्या 6,03,550 रहेन। अउ हर एक मनई क एक बेका चाँदी कर क रूप देइ क भवा। (पवित्तर क अनुसार एक बेका आधा सेकेल क बराबर रहा।) ²⁷ उ सबइ पौने चार टन चाँदी क प्रयोग पवित्तर तम्बू क एक सौ आधार बनवइ बरे अउ कनात बनवइ बरे किहन। उ पचे पचहत्तर पौण्ड चाँदी हर एक आधार मँ लगाएन। ²⁸ दूसर पचास पौण्ड चाँदी क प्रयोग हुक कनाते क छड़ा अउ खम्भन क सिरा क ढाँकइ बनवइ बरे किहेन।

²⁹ साढ़े छब्बीस टन स जिआदा काँसा यहोवा क भेंट चढ़ावइ बरे भवा। ³⁰ उ काँसा क प्रयोग बइठकावाला तम्बू क प्रवेस दुआर क आधार बनवइ मँ भवा। उ पचे काँसा क प्रयोग वेदी अउ काँसा क जाली बनवइ मँ भी किहेन। अउर उ काँसा सब अउजार अउ वेदी क बतर्नन क बनवइ क काम मँ आवा। ³¹ एकर प्रयोग चारिहुँ कइँती कनाते क आधार अउ आँगन क चारिहुँ कइँती प्रवेस दुआर क आधारन क पर्दन बनवइ बरे भवा। अउर बचा भवा काँसा क प्रयोग पवित्तर तम्बू क खँटियन अउर आँगन क चारिहुँ कइँती क पर्दन क बनवइ बरे भवा।

याजक क खास ओढ़ना

39 कारीगरन नीला, लाल अउ बैगनी ओढ़ना क खास बस्त्र याजक बरे बनाएन जेनका उ पचे पवित्तर ठउर मँ सेवा क समइ पहिरहीं। उ पचे हारून बरे वइसा ही खास बस्त्र बनाएन जइसा यहोवा मूसा क हुकुम दिहेन।

एपोद

² उ पचे याजक क एपोद सोना क तार, सन क उत्तिम रेसा अउ नीला, लाल अउर बैगनी कपड़ा स बनाएस। ³ (उ पचे सोना क पातर पत्तर क तरह पीटेन अउर तब उ पचे ओका लम्बा धागा क रूप मँ काटेन। उ पचे सोना क नीला, बैगनी, लाल कपड़ा अउ सन क उत्तिम रेसा मँ बुनेन। इ काम क कुसल कारीगरन क तरह किहेन।) ⁴ उ पचे एपोद बरे काँधे क पट्टी बनएन। उ पचे एपोद क काँधे क कपड़ा क दुइनउँ कोना स मिलाइके सिएन। ⁵ उ पचे कमर क पेटी बुनेन अउ एकॉ एपोद स जोड़ेन। एकॉ एपोद क बनावट क तरह बनाएन। उ सोनहरा धागा, बढ़िया सन क रेसा अउ नीला, बैगंनी अउर लाल धागा जइसा यहोवा मूसा क हुकुम दिहे रहेन वइसा ही कपड़ा बनाएन।

⁶ कारीगरन सोने क पत्तर मँ गोमेद मणि एपोद बरे जोड़ेन। उ पचे इ रत्न प इस्राएल क बेटवन क नाउँ लिखेन। ⁷ तब उ पचे रत्नन क एपोद क काँधे प लगाएन। इ रत्न इस्राएल क लोगन बरे यादगारी क रत्न रहेन। इ उहइ कीन्ह ग रहेन जइसा यहोवा मूसा क हुकुम दिहे रहेन।

निआव क थइला

⁸ तब उ पचे निआव क थइला उहइ कुसल कारीगर क दुआर बनावा ग रहा जउन एपोद बनाएस रहा। इ सोना क तार, सन क उत्तिम रेसा अउ नीला, लाल अउ बैगनी कपड़ा क बनावा ग रहा। ⁹ निआव क थइला चउकोर दोहराइके तह कीन्ह भवा रहा। एक बित्ता लम्बा अउ एक बित्ता चौड़ा रहा। ¹⁰ कारीगरन एह प सुन्नर रत्नन क चार लाइन जड़ेन। पहली लाइन मँ एक लाल, एक पुखराज अउ एक मकर्तमणि रही। ¹¹ दूसर लाइन मँ एक फिरोज, एक नीलम अउ एक पन्ना रहा। ¹² तीसरी लाइन मँ एक गोमेद, एक अकीक अउ एक आकूत रहा। ¹³ चौथी लाइन मँ एक लहसुनिया, एक सेसमणि अउ एक कपिस मणि रही। इ सबहिं रत्न सोना मँ जड़ा रहेन। ¹⁴ निआव क थइला मँ बारह रत्न रहेन। इ बारह रत्न प इस्राएल क बेटवन क नाउँ उहइ तरह लिखा ग रहेन जइसा एक कारीगर मोहर प खोदत ह। हर एक रत्न प इस्राएल क बारहु बेटवन मँ स एक क नाउँ रहेन।

¹⁵ निआव क थइला बरे निखालिस सोना क जंजीर बनावइ गएन। इ लसुरी क नाई बटी गइ रहिन। ¹⁶ कारीगरन सोना क दुइ छल्ला बनाएस अउ उ पचे दुइनउँ छल्ला क निआउ क थइला क दुइनउँ कोना प लगाएन। उ पचे काँधा क पट्टा बरे दुइ दू सोना क सेट भी बनाएस। ¹⁷ तब उ पचे दुइ सोना क जंजीरन क निआव क थइला क कोना क दुइनउँ छल्लन मँ बाँधेस। ¹⁸ उ पचे सोना क जंजीरन क दूसर सिरन क काँधा क दुइनउँ पट्टियन स बाँधने। तब उ पचे ऍका एपोद क समन्वा जोड़ेस। ¹⁹ तब उ पचे दुइ अउर सोना क छल्ला बनाएन अउर निआउ क थइला क दूसर कोने प ओनका लगाएस। इ एपोद क निअरे निआव क थइला क अन्दरोनी किनारा मँ रहेन। ²⁰ उ पचे एपोद क समन्वा कइँती काँधे क पट्टी क तले दुइ छल्ला लगाएन। इ छल्लन क जोड़न क नगिचे ठीक कमर पेटी क ऊपर रहेन। ²¹ तब उ पचे एक ठु नीली पट्टी बइपरेन अउ निआउ क थाइला स छल्लन क एपोद क छल्लन स बाँधेन। इ तरह निआव क थइला पेटी क नगिचे लाग रहा अउ इ गिर नाहीं सकत। उ पचे इ सब चीजन्क यहोवा क हुकुम क मुताबिक किहेन।

याजकन क दूसर बस्त्रन

²² तब उ पचे एपोद बरे नीला कपड़ा स चोगा बनाएन। इ एक कुसल व्यक्ति दुआरा बुना गएन। ²³ चोगा क बीचउ बीच एक छेद रहा। इ छेद क चारिहुँ कइँती कपड़ा क टुकड़ा लाग रही। इ कपड़ा छेद क फाटइ स बचावत रही।

²⁴ तब उ पचे सन क उत्तिम रेसा, नीला, लाल अउ बैगंनी कपड़ा स अनार बनाएन। उ पचे ओनका क चोगा क खाले कोना प चारिहुँ कइँती लटकाएन। ²⁵ तब उ पचे निखालिस सोना क घण्टी बनाएन। उ पचे अनारन क बीच मँ चोगा क खाले सिरा क चारिहुँ कइँती घण्टी क बाँधेन। ²⁶ चोगा क सिरा क चारिहुँ कइँती घण्टी अउ अनार रहेन। हर दुइ अनारे क बीच एक घण्टी रही। याजक उ चोगा क तब पहिरत रहा जब उ यहोवा क सेवा करत रहा, जइसा यहोवा मूसा क हुकुम दिहे रहेन।

²⁷ कुसल कारीगर हारून अउ ओकरे बेटवन बरे कमीज बनाएन। इ कमीज सन क उत्तिम रेसा स बना रहेन। ²⁸ कारीगर लोग उत्तिम सन क रेसन स पगड़ी बनएन। उ पचे सिर क पगड़ी अउ भीतर पहिरइवाला कपड़ा भी सन क उत्तिम रेसा स बनाएस। ²⁹ तब उ पचे कमरबन्द क सन क उत्तिम रेसा, नीला, बैगंनी अउ लाल कपड़ा स बनाएन। कपड़ा मँ कढ़ाई कीन्ह ग रहेन। इ चीजन क वइसे ही बनाइ गइन जइसे यहोवा मूसा क हुकुम दिहे रहेन।

³⁰ तब उ पचे पवित्तर मुकुट बरे सोना क पत्तर बनाएन। उ पचे सोना प इ सब्द लिखेन: यहोवा बरे पवित्तर। ³¹ तब उ पचे पतरा स एक नीली पट्टी बाँधेन अउ पट्टी क पगड़ी चारिहूँ कइँती इ तरह बाँधेन जइसा यहोवा मूसा हुकुम दिहे रहेन।

मूसा पवित्तर तम्बू क निरिच्छन किहेस

³² इ तरह “बइठकावाला पवित्तर तम्बू” क सारा काम पूरा होइ गवा। इस्राएल क मनइयन हर चीज ठीक वइसे ही बनाएन जइसा यहोवा मूसा क हुकुम दिहे रहेन। ³³ तब उ पचे “बइठकावाला तम्बू” मूसा क देखाएन। उ पचे ओका तम्बू अउर ओहमाँ क सब चीजन्क देखाएन। उ पचे ओका तखता, ढाँचन, छड़न, खम्भन अउर आधारन क देखाएन। ³⁴ उ पचे ओका बइठकावाला तम्बू क ढकना देखाएन जउन लाल रंगी भइ भेड़ा क खाल क बना रहा। अउर उ पचे उ ढकना देखॉएन जउन नरम खाल क बना रहा। अउर उ पचे उ कनात देखॉएन जउन सब स जिआदा पवित्तर ठउर क प्रवेस दुआर क ढकत रही।

³⁵ उ पचे मूसा क करार क सन्दूख देखाएन। उ पचे सन्दूखे क ढोवइवाली खम्भन अउ सन्दूखे क ढकइवाला ढकना क देखाएन। ³⁶ उ पचे खास रोटी क अउ मेज प रखइवाली सबहिं चीजन्क देखाएन। ³⁷ उ सबइ निखालिस सोना क डीबट अउ ओहँ प धरा भवा सब दिया क देखाएन। उ पचे तेल अउ दूसर सब चीजन्क देखाऍन, अउ दूसर सबहिं चीजन्क जउन दिया क संग बइपरी जात रहीं। ³⁸ उ पचे मूसा क सोना क वेदी, अभिसेक क तेल महकउआ धूप, अउ बइठकावाला तम्बू क प्रेवस दुआर क ढकइवाली कनात क देखाऍन। ³⁹ उ पचे काँसा क वेदी अउर काँसा क जाली क देखाएन। उ पचे वेदी क ढोवइ बरे बनी भइ खम्भन क मूसा क देखाएन। अउर उ सबइ ओका उ सबहिं चीजन्क देखाएन जउन वेदी प काम मँ आवत रहीं। उ पचे ओका हाथ धोवइवाला पात्र अउ एकर आधार क देखाएन।

⁴⁰ उ पचे मूसा क आँगने क चारिहुँ कइँती क कनाते क खम्भा अउर आधार क देखाएन। उ पचे ओका उ कनात क देखाएन जउन आँगन क प्रवेस दुआर क ढाँके रही। उ पचे ओका लसुरी अउ बइठकावाला तम्बू क खूँटी देखाएन। उ पचे पवित्तर तम्बू मँ ओका सबहिं चीजन्क देखाएन।

⁴¹ तबहिं उ पचे मूसा क पवित्तर ठउर मँ सेवा करइवालन याजकन बरे बना ओढ़ना क देखाएन। उ पचे ओका हारून अउ ओकर पूतन बरे बना भवा खास बस्त्र देखाएन। उ पचे उ वस्त्र क तब पहिरत रहेन जब उ पचे याजकन क रूप मँ सेवा करत रहेन।

⁴² यहोवा मूसा क जइसा हुकुम दिहेस, इस्राएल क मनइयन ठीक सब काम उहइ तरह किहेन। ⁴³ मूसा सब कामे क धियान स लेखस। मूसा लखेस कि सब काम ठीक उहइ तरह भवा जइसा यहोवा हुकुम दिहे रहेन। ऍह बरे मूसा ओनका आसीर्बाद दिहेस।

मूसा पवित्तर तम्बू क नींव धरत ह

40 तब यहोवा मूसा स कहेस, ² “पहिले महीना क पहिला दिन बइठकावाला पवित्तर तम्बू क खड़ा करा। ³ करार क सन्दूख क पवित्तर तम्बू मँ धरा। सन्दूख क समन्वा पर्दा क रखा ⁴ तब खास मेज क भीतर लइ आवा। जउन सामान मेज प होइ चाही ओनकइ ओह प धरा। तब डीबट क बइठकावाला तम्बू मँ धरा। दिया क डीबट मँ रख एका कइ उचित जगहन पइ धरा। ⁵ सोना क वेदी क धूप क भेंट बरे बइठकावाला तम्बू मँ धरा। वेदी क करार क सन्दूखे क समन्वा धरा। तब कनात क पवित्तर बइठकावाला तम्बू क प्रवेस दुआर प लगावा।

⁶ “बरी भई भेंट क वेदी क पवित्तर तम्बू क प्रवेस दुआर प धरा। ⁷ काँसा क हउदा क बइठकावाला तम्बू अउ वेदी क बीच धरा। हउदा क पानी स भरि द्या। ⁸ अंगना क चारिहुँ कइँती कनात लगावा। तबहि आंगन क प्रवेस दुआर प कनात लगावा।

⁹ “अभिसेक क तेल स पवित्तर तम्बू अउ ऍकर हर एक चीज क अभिसेक करा। जबहिं तू इ चीजन प तेल नउब्या इ पवित्तर होइ जाब। ¹⁰ होमबलि बरे वेदी क अभिसेक करा। वेदी क हर एक चीज क अभिसेक करा। तू वेदी क पवित्तर करब्या। इ सबन त जियादा पवित्तर होइ जाब। ¹¹ तब खोरा अउ ऍकर आधार क अभिसेक करा। अइसा उ चीजन्क पवित्तर करइ बरे करा।

¹² “हारून अउ ओकरे पूतन क बइठकावाला तम्बू क प्रवेस दुआर प लावा। ओनका पानी स नहवावा। ¹³ तब हारून क खास पोसाक पहिरावा। तेल स ओकर अभिसेक करा अउर ओका पवित्तर करा। तबहिं उ याजक क रूप मँ मोर सेवा कइ सकत ह। ¹⁴ तउ ओकर पूतन क पोसाक पहिरावा। ¹⁵ पूतन क अभिसेक वइसा ही करा जइसे ओकरे बाप क अभिसेक किहा ह। तबहिं उ पचे याजकन क रूप मँ मोर सेवा कइ सकत हीं। जब तू ओनका अभिसेक करिब्या, उ पचे याजकन होइ जइहीं। उ परिवार भविस्स मँ हमेसा याजकन रहइ हीं।” ¹⁶ मूसा यहोवा क हुकुम मानेस। उ इ सब किहस जेका यहोवा हुकुम दिहे रहेन।

¹⁷ इ तरह पवित्तर तम्बू दूसर बरिस क पहिले महीना क पहिले दिन बनइ दीन्ह गवा जउन टेमॅ उ पचे मिस्र क तजि दिहे रहेन। ¹⁸ मूसा पवित्तर तम्बू क यहोवा क हुकुम क मुताबिक खड़ा किहेस। पहिले उ आधारन क नीचे धरेस। तउ उ तखता क आधारन प धरेस। उ छड़न क लगएस अउर खम्भन क खड़ा किहेस। ¹⁹ ओकरे पाछे मूसा बाहरी तम्बू क पवित्तर तम्बू क ऊपर फइलाएस। एकरे पाछे उ बाहरी तम्बू प दूसर ढकना धरेस। उ इ यहोवा क हुकुम क मुताबिक किहेस।

²⁰ मूसा करार लिखा भवा उ दुइ पाथरन क पाटी क लिहेस अउ ओनका सन्दूखे मँ धरेस। मूसा खम्भन क सन्दूखे मँ लगाएस। तबहिं उ सन्दूखे प ढकना धरेस। ²¹ तब्बइ मूसा सन्दूखे क पवित्तर तम्बू मँ धरेस। उ पर्दा क नीक ठउरे प आड़ करइ बरे लगाएस। इसी प्रकार यहोवा क हुकुम क मुताबिक उ करार क सन्दूख क पर्दा क पीछे कइके आड़ मँ कइ दिहेस। ²² तब मूसा खास रोटी क मेज क बइठकावाला तम्बू मँ धरेस। उ ऍका पवित्तर तम्बू क उत्तर कइँती रखेस। उ इ पर्दा क समन्वा रखेस। ²³ तबहिं उ यहोवा क समन्वा रोटी मेज प धरेस। इ उ वइसा ही किहेस जइसा यहोवा हुकुम दिहे रहेन। ²⁴ तब मूसा डीबट क बइठकावाला तम्बू मँ धरेस। उ डीबट क तम्बू क दक्खिन मँ मेज क पार धरेस। ²⁵ तब मूसा यहोवा क समन्वा डीबटे प दिया रखेस। उ इ यहोवा क हुकुम क मुताबिक किहेस।

²⁶ तबहिं मूसा सोना क वेदी क बइठकावाला तम्बू मँ धरेस। उ सोना क वेदी क पर्दा क समन्वा धरेस। ²⁷ तब उ सोना क वेदी प महकउआ धूप बारेस। उ वइसा ही किहेस जइसा यहोवा ओका हुकुम दिए रहेन। ²⁸ तब मूसा पवित्तर तम्बू क दुआरे कनात लगाएस।

²⁹ मूसा बची भइ भेंट क वेदी क पवित्तर तम्बू क प्रवेस दुआर प धरेस। तबहिं मूसा एक होमबलि भेंट उ वेदी प चढ़ाएस। उ अन्नबलि भी यहोवा क चढ़ाएस। उ इ सब चीजन्क यहोवा क हुकुम क मुताबिक किहेस।

³⁰ तब मूसा बइठकावाला तम्बू अउ वेदी क बीच काँसा क खोरा धरेस। उ खोरा मँ पानी धोबइ बरे धरेस। ³¹ मूसा, हारून अउ हारून क बेटवन आपन हाथ पैर धोवइ बरे इ खोरा क बइपरेन। ³² उ पचे हर दाई जब बइठकावाला तम्बू मँ प्रवेस करतेन तउ आपन हाथ पैर धोवतेन। जब उ पचे वेदी क नगिचे जातेन तब भी हाथ पैर धोवतेन। उ पचे ऍका वइसा ही करतेन जइसा यहोवा मूसा क हुकुम दिहे रहेन।

³³ तब मूसा पवित्तर बइठकावाला तम्बू क आँगन क चारिहुं कइँती कनात खड़ी किहेस। मूसा वेदी क आँगन मँ धरेस। तब उ अँगने क प्रवेस दुआर प कनात लगाएस। इ तरह मूसा उ सबहिं काम क पूरा किहेस जेका करइ क यहोवा हुकुम दिहे रहेन।

यहोवा क महिमा

³⁴ तब बादर बइठकावाला तम्बू क ढाँकि लिहस। अउर यहोवा क महिमा पवित्तर तम्बू क भरि द्या। ³⁵ मूसा बइठकावाला तम्बू मँ ऍह बरे नाहीं घुसि सका काहेकि बादर ऍह पइ उतरि आए रहेन अउ यहोवा क महिमा स पवित्तर तम्बू भरि ग रहेस।

³⁶ इ उहइ बादर रहा जउन मनइयन क इसारा किहेस कि कब चलइ क अहइ। जब बादर पवित्तर तम्बू स उठत तब इस्राएल क मनइयन चलब सुरू कइ देतेन। ³⁷ मुला जब बादर पवित्तर तम्बू प ठहर जात तउ मनइयन चलइ क कोसिस नाहीं करत रहेन। लोगन उहइ जगह पइ तब तलक रहतेन जब तलक बादर तम्बू मँ रहतेन। ³⁸ ऍह बरे दिन भइ बादर पवित्तर तम्बू मँ रहतेन। अउर राति मँ बादर आगी क नाई परगट होतेन। ऍह बरे इस्राएल क सबहिं मनइयन आपन पूरा जात्रा मँ बादर क लखि सकतेन।