Beginning

15 Donn kjeeme Schreftjeleade en Farisaea dee fonn Jerusalem weare, no am, en saede:

² "Wuaromm aewatraede diene Jinja dee Elteste aeare Faeaschrefte? dan see wausche aeare Henj nich ferem aete."

³ Hee auntwuad en saed to an: "En werkjlich, wuaromm aewatraed jie Gott sien Jeboot waeajen june Faeaschrefte?

⁴ Dan Gott saed: "Doo dien Foda en diene Muuta eare,' en 'waea bees raet fonn sien Foda oda siene Mutta, saul doot jemoakt woare.'

⁵ Oba jie saje: 'Waea to sien Foda oda siene Mutta sajcht: Daut es ne Gow, waut du fonn mie aundasch wusscht kjriehe,

⁶ dee bruckt sien Foda oda siene Mutta nich eare, en jie ha doaderch Gott sien Wuat to nusscht jemoakt waeajen june Faeaschrefte.

⁷ Jie Heichla! Jesaja haft gauns rajcht aewa junt jeprofetseit aus hee saed:

⁸ 'Dit Follkj eat mie met aeare Leppe, oba aea Hoat es wiet auf fonn mie,

⁹ en fejaefs baede see mie aun, en leare Mensche Faeaschrefte'."

¹⁰ En hee roopt daut Follkj no sikj en saed to an: "Horcht, en festot!.

¹¹ Waut en Mensch em Mul enenn nemt deit am nich feonnreinje, oba daut waut utem Mul erut kjemt, daut moakt en Mensch Onnrein."

¹² Donn kjeeme dee Jinja no am en saede to am: "Weetst du daut dee Farisaea beleidicht weare aus dee daut heade?"

¹³ Hee auntwuad en saed: "Aule Plaunte dee mien himlischa Foda nich jeplaunt haft, woare utjeraete woare.

¹⁴ Lot an toch, dee sent blinje Blinjeleidasch; en wan een blinja en aundra blinja leit, woare see beid em Growe faule."

¹⁵ En Peeta saed to am: "Moak onns dit Jlikjnes dietlich."

¹⁶ Donn saed hee: "Se jie uk noch soo onnfestendich?

¹⁷ Festo jie nich daut waut em Mul enenn jeit, jeit dan em Buk enenn, en jeit dan derch, en rut?

¹⁸ Oba waut utem Mul erut kjemt, kjemt fom Hoat, en dit es waut en Mensch feonnreinicht.

¹⁹ Dan fonn utem Hoat kome beese Jedanke, Mort, Eehebruch, Hurarie, Deewerie, faulschet Zeichnes, en Lastre.

²⁰ Dit sent dee Dinje dee en Mensch feonnreinje, oba met oonjewosschne Henj aete moakt en Mensch nich Onnrien."

²¹ Donn jinkj Jesus fonn doa wajch en jinkj no dee Tierus en Siedoon Ommjaeajent.

²² En kjikj - ne kananietesche Fru fonn dee Ommjaeajent kjeem am entjaeajen en schreach: "Herr, du Doft sien Saen! erboarm die aewa mie! miene Dochta es schlem met en beese Jeist besaete."

²³ Oba hee jeef aea kjeene auntwuat, nich een Wuat. Siene Jinje kjeeme no am en prachada am en saede: "Schekj aea wajch, dan see schricht onns lud hinjaraun!"

²⁴ Oba hee auntwuad en saed: "Ekj sie no kjeenem jeschekjt buta dee felorne Schop fonn daut Jeschlajcht Iesrael."

²⁵ Oba see kjeem en baed am aun, en saed: "Herr, halp mie!"

²⁶ Oba hee auntwuad en saed: "Daut es nich goot daut Broot fonn dee Kjinje to naeme, en no de Hung schmiete."

²⁷ En see saed: "Jo, Herr; oba sogoa dee Hung aete dee Kjreemels dee fonn aea Meista sien Desch faule."

²⁸ Donn auntwuad Jesus en saed to aea: "O Fru, dien Gloowe es Groot! Lotet soo sene aus du wensche deist!" En aeare Dochta wea jeheelt fonn dee Stunnd aun.

²⁹ Jesus feleet doa en kjeem bie daen galilaeasche See, en hee jinkj opp en Boajch enopp en sad sikj doa dol.

³⁰ Donn kjeem fael Follkj no am, en brochte aeare Lome, Kjraepels, Blinje, Stomme, en fael aundre, en laede am dee fere Feet; en hee heeld an;

³¹ soo daut daut Follkj sikj fewunndad aus see sage daut dee stomme raede, Kjraepels Jesunt, Lome jinje, en Blinje kunne seene; en see feharlichte Iesrael aea Gott.

³² En Jesus roopt siene Jinja en saed to an: "Mie jaumat daut seehe aewa aul dit Follkj, dan dee sent hia nu aul dree Doag enne Wiltnes, en ha nich waut to aete, en ekj wel an nich oone aete wajch schekje, daut dee nich oppem Wajch feschmachte."

³³ En siene Jinja saede to am: "Wua sel wie enn dise Wiltnes jenuach Broot finje soo fael Mensche saut to moake?"

³⁴ Jesus saed to an: "Wu fael Broot ha jie" See saede: "Saewen, en en poa Fesch."

³⁵ En aus hee Befael jejaeft haud daut dee Mensche sikj sulle dol sate,

³⁶ neem hee dee saewen Brood en dee Fesch en dankt doafaea, bruak dee twei en jeef dee Jinja daut, en dee jeewe daut to de Mensche.

³⁷ Dee aute aula, en worde saut, en see hoowe opp waut aewa jeblaewe wea, saewen Kjarw foll.

³⁸ En bie feeha dusent Maun haude je-ate, onne Fruehes en Kjinja.

³⁹ Aus hee daut Follkj haud gone lote, steach hee enn daut Schepp enenn, en kjeem no dee Ommjaeajent bie Magdala.

16 Dee Farisaea en Sadutsaea kjeeme no am, omm am to feseakje, en fruage am no en Teakjen fomm Himel.

² Oba hee auntwuad en saed to an: "Wan Owent kjemt, saj jie: 'scheenet Wada! dan de Himel es root.'

³ En tsmorjenst saj jie: 'Fonndoag woat stormjet Wada senne, dan de Himel es root en dunkel.' Jie kjene weete waut daut Wada doone woat biem nom Himel kjikje, oba kje jie nich dee Teakjens fonn dise Tiet kjane?

⁴ En beeset en eehebraeakjarischet Jeschlajcht seakjt no en Teakjen, oba an woat kjeen Teakjen jejaeft woare buta daut Teakjen fonn daem Profeet Joona." En hee feleet an en jinkj wajch.

⁵ Aus dee Jinja no dee aundre Sied kjeeme, haude see fejaete Broot met to naeme.

⁶ En Jesus saed to an: "Pausst opp, en heet junt fonn dee Farisaea en Sadutsaea aeare Haew."

⁷ See unjahilde sikj doaewa en saede: "Wie ha nich Broot met jenome"

⁸ Oba Jesus wist waut see dochte, en saed: "Wuaromm unjahool jie junt wiel jie nich Broot met jenome ha, jie Kjleenjleefsche!

⁹ Festo jie nich, en behoole nich dee fief Brood mank dee fief dusent, en woo fael Kjarw jie toop saumelde?

¹⁰ Uk nich dee saewen Brood mank dee feeha dusent, en woo fael Kjarw jie doa toop saumelde?

¹¹ Woo kjemt daut, daut jie nich festone daut ekj nich to junt raed waeajen Broot? Oba heet junt fonn dee Farisaea en Sadutsaea aeare Haew."

¹² Donn festunnde see daut hee nich raed daut see sikj heede sulle fonn Haew em Broot, oba fonn dee Farisaea en Sadutsaea aeare Lea.

¹³ Aus Jesus no dee Siseraea Filipe Ommjaeajent kjeem, fruach hee siene Jinja, en saed: "Waea saje dee Mensche daut dee Menschesaen es?"

¹⁴ En see saede: "Walkje saje, Werkjlich Jehaun dee Taufa, aundre Elia, en aundre Jeremia, oda eena fonn dee Profeete."

¹⁵ Hee saed to an: "Oba waea saj jie daut ekj sie?"

¹⁶ Peeta auntwuad en saed:

¹⁷ "Du best dee Christus, daem laewendja Gott sien Saen." En Jesus auntwuad am en saed: "Jesaeajent best du, Siemoon, Joonas Saen, dan Fleesch en Bloot ha die daut nich jeoppenboat, oba mien Foda em Himel.

¹⁸ En ekj saj uk to die, Du best Peeta, en opp dis Steen woa ekj miene Jemeent buhe, en dee Puate fonne Hal woare nich de Aewahaunt ha doajaeajen.

¹⁹ Ekj woa die de Schlaetels jaewe fa daut Himelsrikj, en wautemma du oppe Ead binje woascht, woat enne Himels jebunje senne, en wautemma du oppe Ead leese woascht, woat enne Himels jeleest senne."

²⁰ Donn woarnd hee siene Jinja daut see kjeenem saje sulle daut hee dee Christus wea.

²¹ Fonn donn aun funk Jesus aun siene Jinja to wiese daut hee no Jerusalem gone musst, en doa fael liede derch dee Elteste, en Huagapriesta, en Schreftjeleade, en musst doot jemoakt woare, en dan aum dredde Dach opptostone.

²² Donn neem Peeta am auntsied, en beschwicht am en saed: "Mucht Gott die halpe, Herr! soont saul die nich paseare!"

²³ Oba hee dreid sikj omm, en saed to Peeta: "Go hinja mie, Soton; du best mie en Aunstoos! du denkst nich soo aus Gott, oba soo aus Mensche!"

²⁴ Donn saed Jesus to siene Jinja: "Wan irjentewaea mie wel nofolje, dan lot am sikj selfst aufsaje, en sien Kjriets opp sikj naeme, en dan mie nofolje.

²⁵ Dan waeaemma sien Laewe rade wel, woat daut feleare; en waeaemma sien Laewe feleare woat omm mienet haulwe, woat daut finje.

²⁶ Dan waut woat en Mensch daut nutse wan hee de gaunse Welt sull jewenne, oba siene eajne Seel feleare? oda waut kaun en Mensch enn tusch jaewe fa siene Seel?

²⁷ Dan de Mensche saen es dicht biem kome met siene Enjel enn sien Foda siene Harlichkjeit, en dan woat hee en jieda eenem doano beloone aus sien Waundel es jewast.

²⁸ Enn Woarheit saj ekj junt: Doa sent soone dee hia stone, dee daen Doot nich schmakje woare, bott see daen Menschesaen woare kome seene enn sien Kjeenichrikj."

17 Sas Doag lota neem Jesus Peeta, en Jakoobus en sien Brooda Jehaun, en leid an opp en huaga Boajch auleen.

² En hee wort fer an fe-endat, en sien Jesecht shiend soo aus de Sonn, en siene Kjleeda worde soo wit aus hallet Licht.

³ En Kjikj! see sage Mooses en Elia met am raede.

⁴ En Peeta saed to Jesus: "Herr, dit es goot fa onns hia to senne; wan du west, dan moak wie hia dree Tselte, eena fa die, eena fa Mooses, en eena fa Elia."

⁵ Waearent hee noch raed, kjikj, ne kloare Wollkj kjeem aewa an, en kjikj, ne Stem kjeem ut dee Wollkj, dee saed: "Dit es mien Leefsta Saen, aun daem ekj grootet Jefaule ha; horcht no am!"

⁶ Aus dee Jinja daut heade, folle see opp aeare Jesechta, enn groote Angst.

⁷ Oba Jesus kjeem no an, read an aun, en saed: "Stot opp, en aengst junt nich."

⁸ See kjikjte opp, en sage sest kjeenem aus Jesus auleen.

⁹ Aus see fom Boajch rauf kjeeme, befool Jesus an en saed: "Sajcht kjeenem fonn daut waut jie jeseene ha bott de Menschesaen fom Doot oppjestone es."

¹⁰ En dee Jinja fruage am doawaeajen, en saede: "Wuaromm saje dee Schreftjeleade dan daut Elia eascht kome mott?"

¹¹ He auntwuad en saed: "Elia woat werkjlich kome en stale aules trajcht;

¹² oba ekj saj junt daut Elia es aul jekome, oba see kjande am nich, en deede met am wautemma see wulle; en soo woat de Menschesaen uk em korte derch an liede."

¹³ Donn festunnde dee Jinja daut hee to an raed fonn Jehaun dee Taufa.

¹⁴ Aus see nom Follkj kjeeme, kjeem en Maun no am, en foll opp siene Kjneehe fer am han,

¹⁵ en saed: "Herr, erboarm die aewa mien Saen, dan hee es Wonsennich, en es Krank; foaken felt hee em Fia enenn, en foaken em Wota.

¹⁶ En ekj brocht am no diene Jinja, oba dee kunne am nich heele.

¹⁷ Donn auntwuad Jesus en saed: "O Jeschlajcht daut nich jleeft, en fedreit es, woo lang saul ekj noch bie ju sene? woo lang saul ekj junt noch fedroage? brinjt am no mie!"

¹⁸ En Jesus beschwicht am, en dee beese Jeist kjeem rut, en dee Jung wea jeheelt fonn dee Stunnd aun.

¹⁹ Donn kjeeme dee Jinja no Jesus apoat, en saede: "Wuaromm ku wie daem nich rut driewe?"

²⁰ Hee saed to an: "Waeajen jun kjleena Gloowe; dan enn Woarheit saj ekj junt, wan jie Gloowe ha soo aus en Sampkuarn, woa jie to dis Boajch saje: Haew die fonn hia wajch doahan, dan wudd dee sikj wajch haewe, en nusscht wudd junt ommaeajlich senne.

²¹ [Oba dise sort gone nich rut buta derch baede en fauste.]

²² Aus see enn Galilaea eromm jinje, saed Jesus to an: "De Menschesaen woat boolt enn Mensche aeare Henj jejaeft woare,

²³ en dee woare am doot moake, oba aum drede Dach woat hee fomm Doot oppstone." En siene Jinja weare seeha truarich doaewa.

²⁴ Aus see no Kapernaum kjeeme, kjeem eena fonn daen dee daen Tempeltaks kollajkta deede no Peeta en saed: "Deit jun Leara daen Tempeltaks betole?" He saed: "Yo."

²⁵ Aus hee enn daut Hus enenn kjeem, kjeem Jesus am feropp, en saed: "Waut meenst du, Siemoon? Fonn waem doone dee Kjeenichs oppe Ead Taks oda Tsoll kollakjte? fonn aeare Birja oda fonn Framde?"

²⁶ En aus hee saed: 'Fonn Framde," saed Jesus to am: "Dan sent dee Birja frie.

²⁷ Oba daut wie an nich sulle en Aunstoos senne, go nom See en schmiet doa en Hoake enenn, en nem daen easchta Fesch dee enopp kjemt, moak sien Mul op, en doa woascht du en biet Jelt finje. Nem daut en jef an daut fa die en fa mie."