Beginning
Mana alli yuyaicunami juchayujta ruran
15 Chai q'uipami, Jerusalenmanta shamushca fariseocunapish, Mandashcata yachachijcunapish huaquincuna Jesusta cashna tapurcacuna:
2 –¿Ima nishpataj Cambaj yachacujcunaca mana maquitaraj maillashpa micuncuna? Chashna rurashpaca, ñaupa yayacuna yachachishcatamari p'aquincuna– nircacunami.
3 Shina nijpica, Jesusca paicunatapish cashnami tapurca:
–¿Ima nishpataj cancunapish ñaupa yayacuna yachachishcallata catishpa, Taita Dios mandashcataca mana caźunguichij? 4 Taita Diosca: “Cambaj yaya mamata c'uyangui. Yaya mamata p'iñashpa millaita rimajtaca, mana llaquishpami huañuchina” nishcami. 5 Chashna nicujpipish, cancunaca cashnami yachachicunguichij: “Yaya cashpa, mama cashpa imata mañajpica, canta ayudanapaj charicushcataca, ñamari Taita Diosman cuna tucurcani. Canmanca, ña imata mana cui tucunichu” nichijlla. 6 Chashna nishpaca “Yaya mamamanca imata mana cushpa saquirinallami” ninguichijmi. Chashna nishpami yayacuna yachachishcallata catishpa, Taita Dios mandashcataca saquinguichij. 7 ¡Mishqui shimi, jayaj shungu runacuna! Dios ima nishcata huillaj Isaiasca, allimari cancunataca cashna nishca:
8 “Cai runacunaca, shimillahuanmi ñucataca adoraj tucuncuna.
Ashtahuanpish shungupica, shujtajtami yuyacun.
9 Yangallami ñucata yuyarij tucuncuna.
Yachachishpapish runacuna yachachishcallatami ñucamanta yachachij shina yachachincuna” nishcami– nircami.
10 Chashna nishpa Jesusca, chai tucui gentecunata cayashpa cashnami nirca:
–Alli uyashpa yuyaita japichij. 11 Imapish shimita yaicujca, pita mana juchayujta ruranchu. Ashtahuanpish shimimanta llujshij mana alli shimicunami mapayachin– nircami.
12 Chashna nishca q'uipa yachacujcuna paipajman c'uchuyashpaca:
–Can rimashcata uyashpa fariseocuna p'iñarijtaca, ¿ricurcanguichu?– nishpa tapurcacuna.
13 Shina nijpimi, Jesusca cashna nirca:
–Jahua pacha ñuca Yaya mana tarpushca yurataca, ima yura cajpipish sapimanta llujshichishca cangami. 14 Chai runacunataca saquichijlla. Paicunaca, ñahui mana ricujcunallataj, shujtaj mana ricujcunata pushajcunami. Ñahui mana ricuj runa, caishuj mana ricujta pushacushpaca, ishquindijtajmi jutcupi urmanga– nircami.
15 Shina nijpi Pedroca:
–¿Imata yuyachisha nishpataj chashna ch'imbapurangui? Yachachihuaiari– nirca.
16 Chashna nijpi, Jesusca cashnami nirca:
–¿Cancunapish manarajchu caitaca yuyaita japinguichij? 17 Illu tucui imapish shimita yaicushpa huijsaman rijca, mapa tucushpa llujshinllami. 18 Ashtahuanpish ima rimashcapish shimiman llujshijca, shungumantami shamun. Chai mana alli shimicunami mapayachin. 19 Huañuchina, huainayana, pushanacushpalla causana, shuhuana, llullana, c'amina, cai tucui millai yuyaicunaca shungumantami llujshin. 20 Tucui cai yuyaicunami, pitapish juchayujta ruran. Maquita mana maillashpa micujllapica, mana mapayachinchu– nircami.
Canaán llajta huarmimi Jesusta crishca
21 Jesús chai llajtamanta llujshishpaca, Tiro shuti Sidón shuti llajtacunamanmi rirca. 22 Chaiman chayajpica, Canaán llajtamanta shuj huarmimi, callpashpa tupanaman llujshishpa, cashna nirca:
–Davidpaj Churi, Apu, ñucata llaquihuaiari. Ñuca ushushitami, supai japishpa achcata llaquichicun– nishpa caparirca.
23 Chashna caparijpipish, Jesusca imata mana nircachu. Chaimantami, Paipaj yachacujcuna c'uchuyashpaca, cashna nircacuna:
–Riqui, chai huarmica ñucanchijtamari caparishpa catimucun. Imallatapish nishpa cachapaiari– nircacuna.
24 Shina nijpimi Jesusca:
–Chingarishca ovejacuna shina causacuj Israelcunapajllamanmi, Diosca cachahuarca– nircami.
25 Chashna nicujpipish chai huarmica, Jesuspaj ñaupajman c'uchuyashpa, pambacama cumurishpami:
–Apu, ñucata ayudahuaiari– nirca.
26 Shina nijpi, Jesusca:
–Huahuacunapaj micunata quichushpa, allquitucunaman shitanaca mana allichu– nircami.
27 Ashtahuanpish chai huarmica:
–Ari, Apu, amocuna micucushpa, meźamanta urmachishcataca allquitucunatajmari micun– nircami.
28 Shina nijpimi, Jesusca cashna nirca:
–Huarmi, canca shunguhuantajmi crishcangui. Can munashcaca pajtachuntaj– nircami.
Jesús chashna nijpica, chai huarmipaj ushushica ñapish alliyashcallami carca.
Chuscu huarangamanmi carashca
29 Jesús chaimanta llujshishpaca, Galilea cucha patamanmi rirca. Chaimantaca shuj urcuman huichiyashpami, chaipi tiyarirca. 30 Jesús chaipi tiyacujpica, achcacuna shamushpami suchucunatapish, ñahui mana ricujcunatapish, mana rimajcunatapish, chulla chaquiyujlla, chulla maquiyujllacunatapish, shujtaj ima ungüihuan cajcunatapish achcacunata apamushpa, Paipaj ñaupajpi churarcacuna. Jesusca, chai tucui ungushcacunatami alliyachirca. 31 Chashna, mana rimajcunapish rimajpi, chulla chaquiyujlla, chulla maquiyujllacunapish alliyajpi, suchucunapish purijpi, ñahui mana ricujcunapish ricujpica, tucui gentecuna achcata cushicushpami, israelcunapaj Diosta sumajyachircacuna.
32 Jesusca, paipaj yachacujcunata cayashpaca, cashnami nirca:
–Cai tucui gentecunaca ñamari quimsa punllata ñucahuan caipi tiyancuna. Ima micunatapish mana charincunachu, llaquinayanmari. Chashna mana micushcata huasiman cachajpica, yaricaihuan ñahui amsayashpa ñanpi urmangallatajmari– nircami.
33 Jesús chashna nijpimi, yachacujcunaca cashna nircacuna:
–Pi mana causan, cai shitashca pambapica, ¿maipitaj cai tucuicunapaj micunata japishunri?– nircacunami.
34 Shina nijpi, Jesusca:
–¿Mashna tandacunatataj charinguichij?– nircami.
Shina nijpimi, yachacujcunaca:
–Canchis tandata, asha chalhuitacunallatami charinchij– nircacunami.
35 Chashna nijpica, Jesusca tucuicunatami pambapi tiyachirca.
36 Chai huashaca chai canchis tandatapish, chalhuacunatapish japishpami, Diosta mañashpa pagui nirca. Chai q'uipami chaupishpa chaupishpa, paipaj yachacujcunaman curca. Paicunami, chai tucui gentecunaman cararcacuna. 37 Tucuicunami mana nijta micurcacuna. Puchushcataca, yachacujcunaca canchis canasta jundatami tandarcacuna. 38 Chai micujcunaca huarmicunata, huambracunata mana yupashcami, c'aricunalla chuscu huaranga carca. 39 Carashca q'uipami, Jesusca tucui chaipi cajcunataca ‘Cayacamachij’ nishpa cacharca. Chai q'uipaca barcopi yaicushpa, Magdala shuti llajtamanmi rirca.
Fariseocunami señalta ricuchichun mañashcacuna
16 Fariseocunapish, saduceocunapish Jesús ima mana allita nijpica, juchachishun nishpami shamurcacuna. Chaimantami Jahua pachamanta shamushcata ricungapaj, ima señalta ricuchichun mañarcacuna.
2 Chaita mañajpica, Jesusca cashnami nirca: «Cancunaca chishiman puca p'uyu tiyajpica: “Cayaca alli punllami canga” ninguichijmi. 3 Cutin tutamantaman yana p'uyu tiyajpica: “Cunan punllaca tamyangami” ninguichijmi. ¡Mishqui shimi, jayaj shungu runacuna! Cancunaca jahuapi p'uyuta ricushpa, ima shina punlla cana cashcataca yachanguichijmi. Ashtahuanpish cunan ima señalcunata ricushpapish, ima punllacunapi cashcataca mana yachanguichijchu. 4 Cai millai, huainayaj runacunamari shuj señalta ricuchichun mañancuna. Paicuna ricushun nishcataca, manataj ricungacunachu. Dios ima nishcata huillaj Jonás shina tucushcallatami ricungacuna» nircami.
Shina nishpaca, Jesusca paicunamanta ch'icanyashpa rircallami.
Fariseocuna yachachishcaca levadura shinami
5 Jesuspaj yachacujcunaca, tandata apamunatami cungashpa cuchata ch'imbashca carca. 6 Chai punllatajmi Jesusca, Paipaj yachacujcunataca:
–Uyaichij, fariseocunapaj, saduceocunapaj levadurataca, pajta chasquinguichijman– nirca.
7 Jesús chashna nijpimi, yachacujcunaca:
–Tandata mana apamujpimari, chashna nij yuyachin– ninacurca.
8 Chashna ninacucujta yachashpami, Jesusca cashna nirca:
–¿‘Tandata mana apamushcanchijca’ nicunguichijraj shiná? Manarajmari ñucataca tucui shunguhuan cringuichijchu. 9 ¿Manarajchu yuyaita japinguichij imatagari? Pichca tandata, pichca huaranga runacunaman ñuca carashcataca, ¿manachu yuyaringuichij? Puchushcata mashna canasta jundata tandashcallatapish yuyarichigari. 10 Shinallataj chuscu huaranga runacunaman canchis tandata ñuca carashcata yuyarichigari. ¿Chaipipish mashna canasta junda puchushcatapish yuyarichigari? 11 ¿Ima nishpataj chaitaca mana entendinguichij? Tandata mana apamushcamantaca mana chashna nircanichu. Fariseocunapaj, saduceocunapaj levadurata ama japinguichij nicunimari– nircami.
12 Jesús chashna nijpimi, yachacujcunaca yuyaita japircacuna. Jesusca, tandata rurana levaduramantaca mana rimashcachu carca. Ashtahuanpish fariseocuna saduceocuna yachachishcata ama catichunmi nicushca carca.
Pedromi Jesustaca ‘Quishpichij Cristomi cangui’ nishca
13 Filipopaj nishca Cesarea pueblo c'uchu llajtacunaman ñanta ricushpami, Jesusca paipaj yachacujcunataca:
–Runa Aichayuj ñucamanta gentecuna parlanacushpaca, ¿pi cashcatataj nincuna?– nishpa tapurca.
14 Yachacujcunaca, cashnami nircacuna:
–Shujcunaca, ‘Bautiźaj Juanmi’ nincunami. Shujtajcunaca, ‘Dios ima nishcata huillaj Eliasmi’ nincunami. Cutin maijancunaca, ‘Dios ima nishcata huillaj Jeremiasmi, mana cashpaca Dios ima nishcata maijan huillajmi canga’ nincunami– nircacunami.
15 Chashna nijpi Jesusca:
–Cutin cancunaca ñucataca, ¿pi cashcatataj yuyanguichigari?– nirca.
16 Chashna nijpi Simón Pedroca:
–Quiquinca causaj Diospaj Churi, Quishpichij Cristomari cangui– nircami.
17 Shina nijpimi, Jesusca cashna nirca:
–Jonaspaj churi Simón, canca cushicunami cangui. Canca, mana pi runa yuyachijpi, chashna nishcanguichu. Ashtahuanpish jahua pachapi caj ñuca Yayami chai yuyaitaca cushca. 18 Ñucapish cantaca, Pedro ninimi. Cai rumipimi ñucata crij tandanacushcacunataca, huasichij shina mirachisha. Paicunataca, Hadespaj pungucunapish mana millpui tucungachu. 19 Canmanca, jahua pacha Dios mandacunman gentecunata yaicuchina llavetami cuni. Can cai pachapi imata huatajpica, jahua pachapipish huatashcami canga. Cai pachapi imatapish can cacharijpica, jahua pachapipish cacharishcami canga– nircami.
20 Shina nishca q'uipami Jesusca, Paipaj yachacujcunataca:
–Ñucataca, Quishpichij Cristo Jesús cashcata, pajta piman huillanguichijman– nirca.
‘Ñucataca huañuchingacunami’ nishcami
21 Chashna nishca pachamantami Jesusca, Paipaj yachacujcunaman cashna nishpa huillai callarirca:
–Ñucaca, Jerusalenmanca rinamari cani. Chaipimi ñucataca, cunaj yuyajcunapish, curacunata mandajcunapish, Mandashcata yachachijcunapish jatunta llaquichishpa huañuchingacuna. Huañuchijpipish, quimsa punllapica causarishami– nircami.
22 Jesús chashna nijpimi, Pedroca Paillata ch'icanchishpa:
–Apunchij Jesús, chaitatajca Dios ama munachun. ¿Ima nishpataj chashna tucunataca ninguiari?– nishpa jarcarca.
23 Chashna nijpica Jesusca, tigrarishcahuanmi Pedrotaca cashna nirca:
–¡Anchui caimanta, Satanás! Ñucataca pandachisha nicunguimari. Taita Dios imata rurasha nishcataca mana yachanguichu. Runacuna yuyashcallatami yuyacungui– nircami.
24 Chai q'uipaca Jesusca, Paipaj yachacujcunataca, cashnami nirca:
–Maijanpish ñucata catisha nishpaca, chacatashca huañunata yachashpapish, ama quiquinta llaquichijchu. Cruzta japishpa ñucata catichijlla. 25 Yuyarichij, maijanpish quiquin causaita llaquijca chingaringami. Maijanpish ñucata catingaraicu, quiquin causaita mana llaquijca, quishpiringami. 26 Maijanpish cai pachapi tucui imalla tiyajcunata charij tucushpapish, quiquin almata chingachishpaca, ¿ima allitaj cangari? Chingachishca huashaca, quiquin almata quishpichingapaj, imata mana cui tucungachu. 27 Runa Aichayuj ñucaca, ñuca angelcunahuan, ñuca Yayapaj sumaj cashcahuan shamushpaca, tucuicunamanmi, quiquin imata rurashca shina cusha. 28 Maijan caipi cajcunaca, Runa Aichayuj ñuca mandangapaj shamungacama manaraj huañungacunachu. Paicunami quiquin ñahuihuan ricungacuna, chashnatajmi canga– nircami.
Jesusca achijllami ricurishca
17 Chashna nishcamanta sujta punlla q'uipami Jesusca Pedrota, Jacobota, Jacobopaj huauqui Juantapish, paicunallata shuj jatun urcuman pusharca. 2 Jesusca chai urcupimi, paicunapaj ñaupajpi shujtajyarishpa ricurirca. Paipaj ñahuica inti shina lamyacujmi tucurca. Pai churarishcapish luz shina yurajllami ricurirca. 3 Chaita ricucujpica ñapish Moisespish, Eliaspish Jesushuan parlanacucuj ricurircallami. 4 Chaita ricushpami Pedroca, Jesustaca:
–Apunchij Jesús, caipi saquirinaca allimari canga. Can ‘Rurai’ nijpica, cambaj shuj, Moisespaj shuj, Eliaspaj shuj, quimsa chugllacunata caipi rurashun– nircami.
5 Pedro chashna nicujpirajmi, paicunapaj jahuataca shuj achij nicuj p'uyu shamurca. Chai p'uyumantaca: “Paica, ñuca c'uyashca Churimi. Paillami ñucataca cushichin. Pai yachachishcata uyaichij” nishpa rimashcami uyarirca.
6 Yachacujcuna chaita uyashpaca, achcata mancharishpami, cungurishpa, pambaman tupajta cumurircacuna. 7 Chashna siricujpi Jesusca, paicunapajman shamushpa maquihuan tuparishpaca:
–Jatarichij, ama mancharichijchu– nircami.
8 Chashna nijpi yachacujcuna huichilla ricushpaca, Jesusllatami chaipi ricurcacuna, caishujcunaca mana ricurircachu.
9 Chai urcumanta tigramushpami, Jesusca Paihuan rij yachacujcunataca:
–Runa Aichayuj ñucaca, huañushcacunapaj chaupimanta causarishami. Chaicamaca, cancuna cunan ricushcataca, pajta piman huillanguichijman– nircami.
10 Shina nijpi Jesuspaj yachacujcunaca:
–Mandashcata yachachijcunaca, ¿ima nishpataj ‘Eliasrajmi shamunga’ nincunari?– nishpami tapurcacuna.
11 Chashna tapujpimi Jesusca, cashna nirca:
–Ari, Eliasrajmi shamunga. Pai shamushpaca, tucuitami allichinga. 12 Shina cajpipish, cancunamanca huillanimi. Eliasca ñamari shamurca. Paitaca mana chasquircacunachu, ashtahuanpish paicunapaj shungu munashca shinami llaquichircacuna. Chashnallatajmi Runa Aichayuj ñucatapish llaquichingacuna– nircami.
13 Jesús chashna nijpimi yachacujcunaca, Bautiźaj Juanmanta chashna nicushcata yuyarcacuna.
Jesusca supai japishca shuj huambratami alliyachishca
14 Jesusca tandanacushca gentecunapajmanca, Paipaj yachacujcunandijmi chayamurca. Pai chayamujpimi ñapish shuj runaca c'uchuyamushpa, Paipaj ñaupajpi cungurishpa, cashna nirca:
15 –Apu, ñuca churita llaquipaiari. Uraticu tucushpamari, yallitaj llaquita apan. Tauca cutinmari ninapi yaicurin, yacupipish huashicun. 16 Cambaj yachacujcunamanca, ñamari ñuca huahuataca ricuchircani. Paicunaca, manamari alliyachi tucurcacunachu– nircami.
17 Shina nijpimi Jesusca cashna nirca:
–¡Mana crij, millai runacuna! ¿Maicamataj cancunahuan puricuchunlla ninguichij? ¿Maicamataj chashnalla catishpa, ñucata llaquichigringuichij? Chai huambrata caiman pushamuichij– nircami.
18 Huambrata pushamujpi, supaita Jesús sinchita rimajpica, huambramanta llujshircallami. Chai ña llujshijpica, huambraca alliyarcallami.
19 Chaita ricushpami yachacujcunaca Jesusllata:
–¿Ima nishpataj ñucanchijca chai supaitaca mana llujshichi tucurcanchij?– nishpa tapurcacuna.
20 Chashna tapujpi Jesusca, cashnami nirca:
–Ñucata mana tucui shunguhuan crishcamantami, mana llujshichi tucurcanguichij. Cancunapaj shungupi ñucata crinaca uchilla mostaza muyu shinallapish tiyajpica, allimari canman. Shina cajpica, cai urcupish cancuna: “Caimanta anchushpa chaiman ri” nijpica, rinmanllami. Ima ruranatapish mana atichinguichijmanchu. Chaica chashnatajmi. 21 Cai shina supaicunataca, ayunashpa Diosta mañashpallami llujshichina– nircami.
Cutintajmi Jesusca ‘Ñucata huañuchingacunami’ nishca
22 Jesusca paipaj yachacujcunandij, Galilea llajtapi puricushpami, cashna nirca:
–Runa Aichayuj ñucataca japishpa, runacunaman cungacunami. 23 Huañuchingacunami. Huañuchijpipish quimsa punllapica causarishallami– nircami.
Chashna nijta uyashpami, yachacujcunaca achcata llaquirircacuna.
Diospaj huasimanta impuestotami cushca
24 Capernaumman Paipaj yachacujcunandij Jesús chayajpica, Diospaj huasipaj impuestota japijcuna Pedropajman shamushpami:
–Cancunapaj yachachijca, ¿ishqui dracma cullquita cunataca yachanchu?– nishpa tapurcacuna.
25 Chashna tapujpi Pedroca:
–Ari, cunatajmari– nishpami, Jesús tiyacun huasiman yaicurca. Pedro yaicucujpica, Jesusrajmi cashna nirca:
–Simón, canca, ¿imatataj yuyangui? Cai pachapi jatun mandajcunaca, ¿quiquin llajtapi causajcunatachu, mana cashpaca shujtaj llajtamanta shamushcacunatachu impuestotaca mañan?– nircami.
26 Shina nijpi Pedroca:
–Shujtaj llajtamanta shamushcacunatamari, impuestotaca mañan– nircami.
Chashna nijpimi Jesusca, cashna nirca:
–Shinashpaca, quiquin llajtapuracunaca impuestota mana cunachu. 27 Shina cajpipish chai impuestota japijcuna ama p'iñarichunca, cucha yacuman rishpa, chalhua japina ipita yacupi shitangui. Punta japishca chalhuapaj shimipimi, shuj estatero cullquita japingui. Chai cullquitaca, impuestota japijcunamanca ñucamantapish, canmantapish cugringuilla– nircami.
Mushuj Testamento Diospaj Shimi (Quichua‐Chimborazo New Testament) Copyright © 2010 by Biblica, Inc.™ Used by permission. All rights reserved worldwide.