Beginning
Dee 96 Psalm
1 O sinjt to däm Herr Gott en niehet Leet, sinjt to däm Herr Gott enn dee gaunse Ead.
2 Sinjt to däm Herr Gott; säajent sien Nome, doot fonn siene Radunk räde dach fa dach.
3 Rät fonn siene Harlichkjeit mank dee Natsjoone, siene Wundasch mank aul dee Mensche.
4 Dan dee Herr Gott es groot, un saul em groote jepriest woare; Am es meeha to ferchte aus aule aundre Jetta.
5 Dan aul dee Felkja äare Jetta sent mau Aufjetta; oba dee Herr Gott haft dän Himmel jemoakt.
6 Ea un Madastichkjeit sent fer am; Macht un Straumet sent enn sien Fesaumlunghus.
7 Jäft to däm Herr Gott, O Famieljes fonn Menschheit; jäft Harlichkjeit un Macht to däm Herr Gott.
8 Jäft dee Harlichkjeit to däm Herr Gott dee sient es; brinjt en Opfa un komt no sien Hoff.
9 O doot däm Herr Gott aunbäde enn daut straumet fonn Heilichkjeit; dee gaunse Welt saul fer Am zetre.
10 Sajcht mank de Natsjoone, de Herr Gott rejiat; un, dee Welt saul bestädicht woare, daut saul nich wieda reakje; Hee woat dee Felkja rechte enn Opprejchtijchkjeit.
11 Lot dän Himmel sikj friehe, un lot dee Ead froo senne; lot dän See roare, un aul daut Follet.
12 Lot daut Felt froo senne, un aules waut doa benne es; dan dee Beem emm Woolt selle Froo senne
13 fer däm Herr Gott; dan Hee kjemt; Hee kjemt dee Welt to rejchte; Hee woat dee Welt rejchte met Jerajchtichkjeit, un dee Felkja met siene Woarheit.
Dee 97 Psalm
1 Dee Herr Gott rejiat; lot dee Ead froo senne; lot dee Menj Insel froo senne.
2 Wolkje un Diesta sent romm Am; Jerajchtichkjeit un Jerejcht sent dee Gruntloag fonn sien Troon.
3 En Fia jeit fer am un febrent aul siene Fiend runt om.
4 Sien Blitz deit de gaunse Welt oppdache; dee Ead sach un scheddad.
5 Dee Boaj äwa dee gaunse Welt deede schmelte soo aus Waus fer däm Herr Gott sien Jesejcht.
6 De Himmel deit siene Jerajchtichkjeit bekaunt moake un aul dee Mensche seene siene Harlichkjeit.
7 Aul dee, dee Jetta deene schäme sikj, dee sikj selfst puche met äare Jetta, aule Jetta motte sikj fer Am dol bäaje.
8 Zion head un wia Froo; jo, dee Judah Dajchta freide sikj äwa diene Jerejchte, O Herr Gott.
9 Dan Du, Herr Gott, hast dee Ea enn dee gaunse Welt; du best huach oppjehowe äwa aule Jetta.
10 Jie dee däm Herr Gott leef habe, doot daut Beeset hausse; Hee bewoat siene Heilje äare Seel; Hee deit dän ut de Gottloose äare Henj rade.
11 Lijcht woat jeseit fa dee Jerajchte, un Freid fa dän dee opprajcht sent en Hoat.
12 Sie froo enn däm Herr Gott, O jie Jerajchte; jäft Dank fa daut Behoole fonn siene Heilichkjeit.
Dee 98 Psalm
En Psalm.
1 O sinjt en niehet Leet to däm Herr Gott, dan Hee haft wundaboare Dinje jedone, siene rajchte Haunt un sien Oarm ha dän Siech fa Am jewonne.
2 Dee Herr Gott haft siene Radunk bekaunt jemoakt; Hee haft siene Jerajchtichkjeit opjedakjt to dee Nazione äare Uage.
3 Hee haft sien Erboarme un Woarheit behoole to Israel; derjch dee gaunse Welt es onns Gott siene Radunk to seene.
4 Moakt en froohet Jelud to däm Herr Gott derjch dee gaunse Ead; bräakj rut un siet froo un sinjt Preis.
5 Sinjt Preis to däm Herr Gott met dee Jittoa; met dee Jittoa un dee Stem fonn en Leet.
6 Met Trompeete un daut Jelud fonn en Huarn, moakt en froohet Jelud fer däm Kjeenich Herr Gott.
7 Lot dän See roare, un daut Follet; dee Welt un dee, dee doabenne wone.
8 Lot dee Riefasch äare Henj klautsche; lot daut Hejchste toop juble
9 fer däm Herr Gott; dan Hee kjemt dee Ead to rechte; met Jerajchtichkjeit saul Hee dee Welt rechte, un daut Folkj Opprajcht rechte.
Dee 99 Psalm
1 Dee Herr Gott rejiat; lot dee Mensche zetre; Hee set opp dee Cherubim; lot dee Ead schedre.
2 Dee Herr Gott es groot enn Zion; un Hee es huach äwa aul dee Mensche.
3 Dee selle dien groota un furchtboara Nome danke; dee es Heilijch.
4 Däm Kjeenich siene Macht haft uk Jerejcht leef: Du hast Opprajcht jejrint; du deist Jerecht oabeide, un Jerajchtichkjeit enn Joakopp.
5 Doot däm Herr Gott onns Gott eare, un doot bie siene Footbenkj aunbäde, dan Hee es Heilijch.
6 Mooses un Oant weare mank dee Priesta; un Samuel wia mank dän dee sien Nome aunroope deede; dee roopte däm Herr Gott aun, un Hee deed an auntwuate.
7 Hee räd met an enn dee Wolkj; dee hilde siene Zeichnise un daut Jesats daut Du to an jeefst.
8 Du deetst an auntwuate, O Herr Gott onns Gott: du weascht en Gott dee an fejäwe deed, oba deetst Rach eewe opp äare Woakje.
9 Doo däm Herr Gott ons Gott eare, un aunbäde bie sien heilja Boajch; dan dee Herr Gott onns Gott es Heilijch.
Dee 100 Psalm
En Psalm von Dank
1 Jubelt met Freid to däm Herr Gott, aul jie Lenda.
2 Doot däm Herr Gott aunbäde met Freid; komt fer am met froohet Jesank.
3 Jie selle weete daut dee Herr Gott, Gott es; Hee haft onns jemoakt un nich wie onns selfst – sien Folkj un dee Shop fon siene Weid.
4 Komt enn siene Puate enenn met Dankjebäd; un sien Hoff met Preis; siet dankboa to am, säajent sien Nome.
5 Dan dee Herr Gott es goot, siene Erboarme es eewijch, un siene Truhoatje Leew fon eene Jennerazion to dee näakjste Jennerazion.
Dee 101 Psalm
En Psalm von Doft
1 Ekj woa sinje fonn Erboarme un Jerejcht; to die, O Herr Gott, woa ekj Preis sinje.
2 Ekj woa mie Weis benäme enn en follkomna Wajch; O waneeha woascht du no mie kome? Ekj woa enn daut opprechtjet fonn mien Hoat waundle enne med fonn mien Hus.
3 Ekj woa kjeen Beeset fer miene Uage stale; ekj ha dee Beese äare Oabeit jehausst dee auntsied dreihe, daut saul sikj nich faust moake aun mie.
4 En fekjeaded Hoat saul fonn mie wajch gone; ekj woa nich Beeset weete.
5 Wäaemma schlacht rät fonn sien Noba hinjarijsch, däm woa ekj aufschniede; ekj woa däm nich toch lote dee sikj huach acht un en stoltet Hoat haft.
6 Miene Uage woare opp dän senne dee opprejchtich sent em Launt, soo daut dee kjenne met mie senne; dee enn en follkomna wajch waundle selle mie deene.
7 Wäa Faulschheit wirkjt saul nich enn mien Hus Läwe; dee Läajes rät saul nich bestädijcht woare fer miene Uage.
8 Ekj woa aul dee Beese enn daut Launt aufschniede, soo daut ekj aul dän, dee Beeset oabeide aufschniede woat ut däm Herr Gott siene Staut.
Dee 102 Psalm
En Jebäd fonn dee Betriepte wan dee schwak es un siene Kloag fer däm Herr Gott brinjt.
1 Hia mien Jebäd, O Herr Gott, un lot mien Jeschrejcht fer däm Herr Gott kome.
2 Doo dien Jesecht nich fonn mie festäakje enn miene Trubbel Tiet; bäaj dien Ua dol no mie wan ekj roop; doo mie schwind auntwuate.
3 Dan miene Doag sent foadijch jebrocht enn Ruak, un miene Knoakes sent febrent soo aus en Klotz.
4 Mien Hoat es jeschloage un jedreacht soo aus Graus, soo daut ekj fejät mien Broot to äte.
5 Wäajen dee Stem fonn daut sefte, doone miene Knoakes sikj faust moake aun mien Fleesch.
6 Ekj sie soo aus en Stap Ul enne Wiltnis, ekj sie soo aus ne Ul enn daut Dreajet.
7 Ekj doo woake un sie soo aus en Spoalinkj auleen oppem Husdak.
8 Miene Fiend doone mie dän Dachäwa fluche; dee jäajen mie oajalich sent ha jäajen mie jeschwuare.
9 Dan ekj ha Ausch jejäte soo aus Broot, un ha mien Drinkj jemischt met hiele:
10 wäajen dien Oaja un diene Wutt; dan du hast mie oppjehäft un dol jeschmäte.
11 Miene Doag sent soo aus en Schaute utjestrakjt, un ekj doo fewalkje soo aus daut Graus.
12 Oba du, O Herr Gott, woascht enn Eewichkjeit duare, un dien Behoole fonn eene Jennerazion no de näakjste Jennerazion.
13 Du woascht opstone; ha Erboarme fa Zion; fa dee Tiet Metleet to habe fa ar, jo, de Tiet aunjeteakjent es jekome.
14 Dan diene Deena näme Fejneaje enn dee Steena, en ha Metleet enn äa Stoff.
15 Soo selle Natsjoone däm Herr Gott sien Nome ferchte, un aul dee Kjeenije oppe Ead diene Harlichkjeit.
16 Wan dee Herr Gott Zion oppbuhe woat, dan saul siene Harlichkjeit ferendach kome.
17 Hee woat sikj dreihe no daut Jebäd fonn dee Felotne, un woat äa Jebäd nich feachte.
18 Dit saul jeschräwe woare fa dee näakjste Jennerazion; un Felkja dee noch selle jemoakt woare selle däm Herr Gott preise.
19 Dan Hee haft rauf jekjikjt fonn daut Huaget fonn siene Wonstäd; dee Herr Gott kjikjt rauf fonn dän Himmel no de Ead;
20 omm dee Jefangne äa Stäne to heare, dee Doodes Kjinja frie to moake;
21 däm Herr Gott sien Nome bekaunt to moake enn Zion, un sien Preis enn Jerusalem;
22 wan daut Folkj enn dee Kjennichrikje sikj toop fesaumelt habe däm Herr Gott aun to bäde.
23 Hee neem miene Krauft wajch enn dän Wajch; hee muak miene Doag kjarta.
24 Ekj säd: "O mien Gott, nemm mie nich wajch enn haulf fonn miene Doag; diene Joare sent derjch eene Jennerazion derch dee näakjste Jennerazion.
25 Du hast fonn jee häa dee Ead Grunt jelajcht; un dee Himmels sent daut Woakj fonn diene Henj.
26 Dee selle feschwinje, oba du woascht bliewe; Jo, dee woare aula soo senne aus en Aunzuch, du woascht dän soo endre aus Kjleeda, un dee selle jeendat woare.
27 Oba du best Dee, un diene Joare selle nich jeendat woare.
28 Diene Deena äare Säns selle wone; un äa Some saul fer die bestädicht woare.
Copyright © 2001 by Elmer Reimer