Beginning

³ तू ही इ जगत मँ लोगन क लिआवत ह।
    फुन स तू ही ओनका धूरी मँ बदल देत ह।
⁴ तोहरे बरे हजार बरिस बीते भए काल्हि जइसेन
    या राति क एक ठ पहर बीत गवा बाटइ।
⁵ तू मोर जिन्नगी क सपना क झरना क आसीस दिहा।
अउर हम पचे बहोत भिंसार ही चला जात अही।
⁶     जउन भिंसारे उगत ह
    अउर उ साँझ क सूखिके मुरझाइ जात ह।
⁷ हे परमेस्सर, जब तू कोहाइ जात ह हम पचे बर्बाद होइ जात अही।
    हम तोहरे कोप स घबरान अही।
⁸ तू हमरे सब पापन क जानत अहा।
    तू हमार हर छिपा भवा पाप क लखा करत अहा।
⁹ जब तू किरोधित होत ह, हमार सबइ दिनन लुप्त होइ जात हीं
    अउर हमार बरिसन फुसफुसाहट क नाई खतम होइ जात हीं।
¹⁰ हम पचे सत्तर बरिस तलक जिअत रहि सकित ह,
    अगर हम पचे सक्तिसाली अही तउ अस्सी बरिस जी सकी।
हमार जिन्नगी कठिन परिस्रम अउ पीरा स भरी अहइ।
    एकाएक हमार जिन्नगी खतम होइ जात ह अउर हम पचे उड़िके चला जाइत ह।
¹¹ तोहरे किरोध क सक्ति क
    अउर तोहार भय योग्य गुस्सा क कउन जानत ह।
¹² तू हमका सिखाइ द्या कि हम पचे फुरइ इ जानी कि हमार जिन्नगी केतॅनी कम अहइ।
    ताकि हम पचे बुद्धिमान बनि सकी।
¹³ हे यहोवा, तू सदा हमरे लगे लउटि आवा।
    हम केतॅना दिन प्रतीच्छा करी? आपन सेवकन पइ दाया करा।
¹⁴ हर रोज भिंसारे हम पचन क आपन सच्चा पिरेम स भरि दया।
    ताकि हम लोग आपन जिन्नगी क हर एक दिन आनन्दित होइ खुसी मनाइ।
¹⁵ तू हम पचन क वइसा ही आनन्दित होइ द्या
    जइसा तू पहिले हमका पीरा दिहा रहा।
¹⁶ तोहरे दासन क ओन अद्भुत बातन क लखइ द्या जेनका तू ओनके बरे कइ सकत ह,
    अउ आपन सन्तानन क आपन महिमा देखाँवा।
¹⁷ परमेस्सर, हमार सुआमी, हम पचन पइ कृपालु ह्वा।
    हम लोगन क उ कार्य दिखावा जेका हम लोगन क करइ चाही
    अउर हम लोगन क कार्य क कामयाब बनावा।

¹ उ जउन कउनो सर्वोच्च परमेस्सर क सरण मँ रहत ह,
    तउ उ सर्वसक्तिमान परमेस्सर क सुरच्छा मँ रहत ह।
² मइँ यहोवा स कहत हउँ, “तू मोर सुरच्छा स्थल अहा मोर गढ़।
    हे परमेस्सर, मइँ तोहरे भरोसे हउँ।”
³ यहोवा तोहका सबहिं छिपे भए खतरा स बचाइ।
    उ तोहका सब खउफनाक विपत्तियन स बचाइ।
⁴ तू परमेस्सर क सरण मँ संरच्छण पावइ बरे जाइ सकत ह।
    उ तोहार अइसे रच्छा करी जइसे एक ठु पंछी आपन पखना फइलाइके आपन बच्चन क रच्छा करत ह।
    परमेस्सर क बिस्सास एक बिसाल ढाल क नाईं अहइ जउन चारिहुँ कइँती स रच्छा करत ह।
⁵ राति मँ तोहका कउनो क भय नाहीं होइ,
    अउ दुस्मन क बाणन स तू दिन मँ डेराब्या नाहीं।
⁶ तोहका अँधियारे मँ आवइवालन रोगन
    अउ उ खउफनाक रोग स जउन दुपहर मँ आवत हीं डर नाहीं होइ।
⁷ तू हजार दुस्मनन क हराइ देब्या।
    तोहार खुद दाहिना हाथ दस हजार दुस्मनन क हराइ।
    अउर तोहार दुस्मन तोहका छुइ तलक नाहीं पइहीं।
⁸ जरा लखा, अउर तोहका देखाँइ देइ कि
    उ पचे कुटिल मनई सजा पाइ चुका अहइँ।
⁹ काहेकि तू यहोवा क भरोसे अहा।
    तू परम परमेस्सर क आपन सरणस्थल बनाया ह।
¹⁰ तोहरे संग कउनो भी बुरी बात नाहीं घटी।
    कउनो भी रोग तोहरे घर क नजदीक नाहीं आइ।
¹¹ काहेकि परमेस्सर आपन सरगदूतन क तू जहाँ भी जाब्या हुआँ तोहार रच्छा करइ बरे नियुक्त करी।
¹² ओकर सरगदूतन तोहका आपन हाथन पइ ऊपर उठइहीं,
    ताकि तोहार गोड़ चट्टान स न टकराइ।
¹³ तू कोबरा अउर नाग पइ बगैर कउनो नोस्कान क चलब्या;
    तू सेर अउर अजगर क कुचरब्या।
¹⁴ यहोवा कहत ह, “मइँ आपन सेवकन क रच्छा करब जउन मोहसे पिरेम करत ह।
    मइँ ओनॅ व्यक्ति क पालन-पोसन करब जउन मोर उपासना करत ह।”
¹⁵ उ सहारा पावइ बरे मोका गोहरइहीं, मइँ ओनकर जवाब देब।
    उ पचे जब कस्ट मँ होइहीं मइँ ओनके संग रहब।
    मइँ ओनकर बचाव करब अउर ओनका आदर देब।
¹⁶ मइँ आपन व्यक्तियन क एक लम्बी उमिर क आसीस देब।
    अउर मइँ ओका ओकर आपन बचान क सक्ति दिखाउब।

⁹ हे यहोवा, तोहार दुस्मनन बर्बाद कइ दीन्ह जइहीं।
    उ सबहिं मनई जउन बुरा काम करत हीं, तितर-बितर कइ दीन्ह जइहीं।
¹⁰ मुला तू मोका जंगली बर्धा क नाईं मज़बूत बनाया ह।
    हम बरियार भेड़ा स बन जाब जेकर कर्रे सींग होत हीं तू मोह पइ खास तेल उड़ेर्या ह जउन ठंडापन देत ह।
¹¹ मइँ लखेउँ ह कि मोर दुस्मन मोका लखत हीं;
    मइँ सुनेउँ ह कि दुट्ठ लोग मोह पइ हमला करइ बरे तइयार बाटेन।

¹² नीक मनइयन लबानोन क बड़वार देवदार बृच्छ क तरह अहइँ
    जउन यहोवा क मन्दिर मँ रोपा ग अहइँ।
¹³ नीक मनइयन बाढ़त भए ताड़ क बृच्छ क नाई अहइँ,
    जउन हमार परमेस्सर क मन्दिर क आँगन मँ फलदार होत अहइँ।
¹⁴ उ पचे जब तलक बुढ़वा होइहीं तब तलक उ पचे फल देत रइहीं।
    उ पचे हरे भरे मोटा बृच्छ जइसे होइहीं।
¹⁵ उ पचे हर कउनो क इ देखाँवइ बरे हुआँ अहइँ कि यहोवा बिस्सास योग्य अहइ।
    उ मोर चट्टान अहइ।
    ओहमाँ कछू बुराइ नाहीं बाटइ।

¹ यहोवा सासन करत ह!
    उ महिमा अउर सक्ति क पहिर लिहस
ताकि धरती स्थिर रहइ
    अउर गिरे नाहीं।
² हे परमेस्सर, तोहार साम्राज्य अनादि काल स टिका भवा अहइ।
    तू सदा जिअत अहा।
³ हे यहोवा, नदियन क गर्जन बहोत तीव्र बा।
    ओनकर लहरन क
    नस्ट करइया अहइ।
⁴ समुद्र क पछारा खात भइ लहरन गरजत हीं, अउर उ सबइ सक्तिसाली अहइँ।
    मुला ऊपर वाला यहोवा जियादा सक्तिसाली अहइ।
⁵ हे यहोवा, तोहार कानून बहोत स्थिर अहइ।
    तोहार पवित्तर मन्दिर लम्बी समई तलक खड़ा रही।

¹ यहोवा तू परमेस्सर अहा जउन कि निआव लिआवत ह।
    निआव क परमेस्सर आपन क परगट करा।
² उठा, हे धरती क निआउकर्त्ता।
    तू घमण्डी लोगन क उचित सजा देत ह।
³ हे यहोवा, दुट्ठ जन कब तलक मजा मारत रइहीं?
    केतॅना देरी तलक?
⁴ उ सबइ दुट्ठ-जन कब तलक आपन बुरे कामन क बारे मँ
    डीगं हाँकत अउर सेखी बघारत रइहीं?
⁵ हे यहोवा, उ सबइ लोग तोहार लोगन क मुसीबत मँ डालेन ह।
    उ पचे तोहरे आपन लोगन क सतावा करत हीं।
⁶ उ पचे राँड़ अउरतन अउर ओन मेहमानन क जउन ओनके देस मँ ठहरा अहइँ, मारत हीं।
    उ पचे ओन अनाथ गदेलन क कतल करत हीं।
⁷ उ पचे कहत हीं, यहोवा ओनकर बुरा करम करत भए नाहीं लखि सकत।
    अउर कहत हीं, ‘इस्राएल क परमेस्सर ओन बातन क नाहीं समुझत जउन घटति अहइँ।’

⁸ ओ बुद्धिहीन लोग,
    तू कब आपन पाठ सिखब्या?
अरे मूरख लोगो,
    जतन करा अउर समुझ्या।
⁹ परमेस्सर हमार कान बनाएस ह,
    तउ निहचय ही उ सुन सकिहीं।
परमेस्सर हमार आँखिन बनाएस ह,
    तउ निहचय ही देख सकत हीं।
¹⁰ उ रास्ट्रन क सम्मान करत हीं, तउ निहचय ही उ तोहार निआव कइ सकत ह।
    उ ओन लोगन क ओन सबहिं बातन क सिच्छा देइ जउन ओनका करइ चाही।
¹¹ तउ जउन बातन क लोग सोचत अहइँ यहोवा जानत अहइ।
    उ इ जानत अहइ कि ओकर जोजनन हवा क झोंका अहइँ।

¹² तू लोग धन्न अहा जेका तू सम्मान देत ह, हे यहोवा।
    तू ओन लोगन क आपन कानून सिखावत ह।
¹³ तू ओनका ओकरे विपत्तियन मँ सांत होइके सहायक करत ह,
    जब तलक दुट्ठ लोग कब्र मँ नाहीं दफनाइ दीन्ह जइहीं।
¹⁴ यहोवा आपन लोगन क कबहुँ नाहीं तजी।
    उ बिना सहारे ओका रहइ नाहीं देइ।
¹⁵ निआउ लउटब अउर इमानदारी लिआइ।
    फुन लोग खरा बनिहीं।

¹⁶ मोका दुट्ठन क खिलाफ जुद्ध करइ मँ कउनो मनई सहारा नाहीं दिहस।
    कुकर्मियन क खिलाफ जुद्ध करइ मँ कउनो मोर संग नाहीं दिहस।
¹⁷ यहोवा मोर सहायक नाहीं होत,
    तउ मोर जिन्नगी मउत क दुआरा सांत होइ जाइतेन।
¹⁸ जब मइँ गिरइ क रहेउँ,
    तोहार पिरेम मोका उठाएस, हे यहोवा।
¹⁹ जब मइँ बहोतइ चिंतित अउ बियाकुल रहेउँ,
    तोहार सुख मोका आनन्दित किहस।

²⁰ हे परमेस्सर, तू कुटिल निआउ क मदद नाहीं करत्या,
    जउन परीसानी पइदा करइ बरे नेमन क घेर लेत ह।
²¹ उ पचे नीक लोगन पइ हमला करत ह
    अउर निर्दोख व्यक्ति क कसूरवार कहत ह।
²² मुला यहोवा मोर सुरच्छा क ठउर बाटइ।
    परमेस्सर मोर चट्टान अउर मोर सरण क ठउर अहइ।
²³ परमेस्सर ओनका ओकरे बुरा करमन बरे सजा देइ।
    उ ओका ओकरे पाप क कारण खतम कइ देइ।
    हमार परमेस्सर यहोवा ओनका नस्ट कइ देइ।

¹ आवा हम यहोवा क गुण गाई।
    आवा हम पचे उ चट्टान क जय जयकार करी जउन हमार रच्छा करत ह।
² आवा हम यहोवा क धन्यवाद बरे गीत गाई।
    आवा हम ओकर बड़कई क गीत आनन्द क संग गाई।
³ काहेकि यहोवा महान परमेस्सर अहइ।
    उ महान राजा सबहिं दूसर “देवतन” पइ सासन करत ह।
⁴ गहिर सबइ गुफा अउ ऊँच पहाड़ यहोवा क अहइँ।
⁵ सागर ओकर बा, उ ओका बनाएस ह।
    परमेस्सर खुद आपन हाथन स झुरान धरती क बनाएस ह।
⁶ आवा, हम ओका पइलगी करी अउर ओकर उपासना करी।
    आवा हम परमेस्सर क गुण गाई जउन हमका बनाएस ह।
⁷ उ हमार परमेस्सर
    अउर हम पचन ओकर बगल मँ भेड़ अही।

कम स कम जदि तू आजु ओकर आवाज़ क पालन करब्या।
⁸     यहोवा कहत ह, “तू मोका सुनई स वइसा इनकार जिन करा जइसा मरीबा मँ तोहार पुरखन किहे रहेन,
    अउ वइसा जिन करा जइसा उ पचे मस्सा मँ रहइ क दिन मँ किहे रहेन।
⁹ तोहार पुरखन मोका परखे रहेन।
    उ पचे मोका परखेन, पर तब उ पचे लखेन कि मइँ का कइ सकत हउँ।
¹⁰ मइँ ओन लोगन क चालीस बरिस तलक सहन किहे रहेउँ।
    मइँ इ अच्छी तरह जानत रहेउँ कि उ पीढ़ी इमान्दार नाहीं अहइ।
    ओन लोगन मोर सिच्छा क नाही सीखेन।
¹¹ तउ मइँ कोहाइ गएउँ अउर मइँ प्रण किहेउँ कि
    उ पचे मोर भुइँया मँ आइववाले समई मँ प्रवेस नाहीं कइ पइहीं।”