Beginning
Dee 32 Psalm
En Psalm fonn Doft - en Nodenkje.
1 Jesäajent es dee, däm siene Äweträdunje jejäft sent, daem siene Sind bedakjt es.
2 Jesäajent es dee Maun to wäm dee Herr Gott daut Beeset nijch tooräakjent, enn wäm sien Jeist doa kjeen Faulscheit es.
3 Aul ekj stel wea, worde miene Knoakes oolt derjch mien Juele dän Dach äwa.
4 Dan bie Dach un bie Nacht wea diene Haunt schwoa opp mie, mien Sauft wea enn dee Somma Dreajet fewaundelt. Selah.
5 Ekj deed miene Sind bekjane to die, un ekj ha miene Gottloosijchkjeit nijch festoakje; ekj säd, ekj woa miene Äweträdunj bekjane, un du fejeefst mie daut Beeset fonn miene Sind. Selah.
6 Fa dee Uasoak lot en jieda dee jetlijch es, to die bäde enn ne jefunjne Tiet; wan dee groote Äweschwamunje kome, woare dee nijch bott am reakje.
7 Du best miene Festäakj Städ, du deist mie oppbewoare fonn Trubbel; du deist mie ommrinje met Radunks Leede. Selah.
8 Ekj woa die unjarejchte un ennleare enn dän Wajch enn woont du waundle saust, ekj woa die Rot jäwe, mien Uag opp die.
9 Siet nijch soo aus en Peat oda en Äsel dee nijch Festaunt ha, dee Met Jebett un Toom motte ennjeholt woare soo daut dee nijch dijcht bie kome.
10 Dee Beese ha fäl Trua, oba dee, dee enn däm Herr Gott fetruehe deit, däm woat Erboarme ommoarme.
11 Siet froo enn däm Herr Gott un freit junt, jie Jerajchte, un doot fa Freid juble, aul jie Opprajchte enn Hoat.
Dee 33 Psalm
1 Freit junt enn däm Herr Gott O jie Jerajchte; Preis es aunjenäm fa dän dee Opprajcht sent.
2 Jäft dank to däm Herr Gott met ne Hoap; sinjt to am met ne Hoap.
3 Sinjt en niehet Leet to am, spält fäijch met jueble un freid.
4 Dan däm Herr Gott sien Wuat es rajcht, un aul siene Woakje sent enn Woarheit.
5 Hee haft Jerajchtijchkjeit un Jerejcht leef. Däm Herr Gott sien Erboarme felt dee Ead.
6 Dee Himels worde erschauft derjch däm Herr Gott sien Wuat; un aul dee Armeehe derjch sien Odem.
7 Dee See Wotasch weare toop jesaumelt soo aus opp en Klommpe, un stalde daut Deepet soo aus en Schatskoma.
8 Lot dee gaunse Welt däm Herr Gott ferjchte; lot aul dän dee enn dise Welt wone erstaunt fer am stone.
9 Dan hee räd, un daut wea jedone; Hee deed aunkommendeare un daut stunnt faust.
10 Dee Herr Gott brinjt dee Natsjoone äa Rot to nuscht. Hee festimmelt dee Felkja äa Plone.
11 Däm Herr Gott sien Rot steit fa emma, siene Hoat Jedanke to aule Jeschlajchte.
12 Jesäajent es dee Natsjoon dee däm Herr Gott aus äa Gott haft, daut Folkj daut hee jewält haft fa sien Oawgoot.
13 Dee Herr Gott kjikjt rauf fomm Himel; Hee sit aul dee Mensche Säns.
14 Fonn siene Wonstäd kjikjt Hee opp aul dee Ead äare Ennwone.
15 Hee deit daut Hoat forme, hee festeit aul äare Oabeit.
16 Dee Kjeenijch es nijch jerat derjch ne groote Armee; en majchtja Maun es nijch jerat derjch siene Krauft.
17 En Peat es nuscht fa Schuts, un hee deit uk nijch rade derjch siene groote Krauft.
18 See, däm Herr Gott sien Uag es opp dän dee am ferjchte, dän dee enn sien Erboarme hope,
19 äare Seel to rade fonn dän Doot, un dän aum Laewe hoole enn dee Hungaschnoot.
20 Onnse Seel wacht fa däm Herr Gott, hee es onns Help en Schilt.
21 Dan onns Hoat freit sikj enn am wiels wie enn sien heilje Nome fetruehe.
22 Lot dien Erboarme opp onns senne, O Herr Gott, soo aus wie enn die fetruehe.
Dee 34 Psalm
En Psalm fonn Doft aus sien Benäme enndad fer Abimilech, un dee am wajch schekjt, en hee jinkj.
1 Ekj woa däm Herr Gott säajne to aule Tiede. Sien Preis saul emma enn mien Mul senne.
2 Miene Seel woat sikj puche enn däm Herr Gott; dee Deemietje sele daut heare un sikj freihe.
3 O feharlijcht däm Herr Gott met mie, un wel wie toop sien Nome opphäwe.
4 Ekj socht däm Herr Gott, un hee deed mie auntwuate, un rad mie fonn aul miene Forjcht.
5 See kjikjte no am, un weare jefelt met Lijcht; un äare Jesejchte bruckte sikj nijch schäme.
6 Dis Oama Mensch roopt, un dee Herr Gott head, un rad am ut aul siene Trubbels.
7 Daem Herr Gott sien Enjel loagat runnt omm dän dee am ferjchte, un Hee deit an rade.
8 Schmack un see daut dee Herr Gott goot es; jesäajent es dee Maun dee enn am fetruet.
9 O ferjcht däm Herr Gott, jie Heilje, dan dee, dee am ferjchte fältet aun nuscht.
10 Dee junje Leiw ha Noot jeläde un sent hunjrijch, oba dee däm Herr Gott seakje fältet aun nuscht Goodet.
11 Komt, horjcht no mie, miene Säns, un ekj woa junt däm Herr Gott siene Forjcht ennleare.
12 Wäa es dee Maun dee Laewe wel ha, dee goode Doag leef haft soo daut hee Goodet seene kaun?
13 Hool diene Tunj fonn Beeset, un diene Leppe fonn Faulscheit;
14 Drei die wajch fonn Beeset; seakj Fräd un joag daut hinjaraun.
15 Däm Herr Gott siene Uage sent opp dee Jerajchte, un siene Uare sent op to äa schriehe.
16 Däm Herr Gott sien Jesejcht es jäajen soone dee Beeset eewe, dän aea Jedachtnes fonne Ead wajch to näme.
17 Dee Jerajchte roope, un dee Herr Gott heat, un deit dän rade fonn aul äa Älend.
18 Dee Herr Gott nodat sikj no soone dee en jebroaknet Hoat ha, un deit soone rade dee en Busfoadja Jeist ha.
19 Dee Jerajchte erfoare fäl Beeset, oba dee Herr Gott deit an rade ut daut aules,
20 un bewoat aul sien Knoakes, nijch eent es jebroake.
21 Daut Beeset woat dee Gottlose fenijchte, un soone dee dee Jerajchte hause woare schuldijch senne.
22 Dee Herr Gott deit siene Deena äare Seel rade; un kjeene fonn dee dee enn am fetruehe woare schuldijch senne.
Dee 35 Psalm
En Psalm fonn Doft
1 O Herr Gott, sträw met dän dee met mie sträwe, kjriej met dän, dee jäajen mie kjrieje.
2 Nem Schilt un Gort, un komm toop miene Jäajne to trafe.
3 Un nem daut Spies, un komm toop jäajen daen dee mie hinjaraun sent. Saj to miene Seel: "Ekj sie diene Radunk."
4 Lot dän dee miene Seel seakje, to schaund woare un sikj schäme, dee Beeset jäajen mie plone.
5 Lot dän soo senne aus Sprie fer dän Wint, dän däm Herr Gott sien Enjel wajch peesat.
6 Lot äa Wajch Dunkel un Jlepprijch senne, dän däm Herr Gott sien Enjel hinjaraun jajcht.
7 Dan dee ha ne Kul fa äa Nat festoake fa mie oone Uasoak; see ha oone Uasoak fa miene Seel jegroft.
8 Lot Fenijchte opp am kome, hee woat nijch weete; un lot sien Nat daut hee festoake haft, am selfst fange, lot am doa enenn faule un fenijchte.
9 Un miene Seel saul sikj freihe enn däm Herr Gott, dee woat sikj enn siene Radunk freihe.
10 Miene Knoakes woare aule saje: "O Herr Gott, wäa es soo aus du best, dee de Oame rade deit fonn dän dee stoakja sent aus hee, jo, dee Oame un dee Derftje fonn däm Plindra?"
11 Zeij brucke Jewault un stone opp; see fruage mie no soont fonn woont ekj nuscht wist;
12 See beloonde mie met Beeset fa Goodet, un muake miene Seel Truarijch.
13 Oba aus see krank weare, wea mien Auntsuch Saktseijch; ekj deed miene Seel deemietje met Fauste, un mien Jebäd kjeem trigj no mien Bossem.
14 Ekj beneem mie soo aus en Frint, soo aus to en Brooda, soo aus eena dee fa siene Mutta truare deit, ekj wea dol jeboage met mien Truare.
15 Oba see freide sikj enn mien Trubbel, un kjeeme toop; soone dee en aundrem sien Nome schwoat moake fesaumelde sikj jäajen mie, un ekj wist nijch; dee fereete un weare nijch stel
16 met dee Gottloose Spata fonn en Jebacktet gnorschte see äare Täne jäajen mie.
17 O Herr, woo lang woascht du daut tookjikje? Rad miene Seel fonn aea Felotenheit, mien Eenjsa fonn dee Leiw.
18 Ekj woa die Dank jäwe enn dee groote Fesaumlunj, un ekj woa die preise mank dee majchtje Felkja.
19 Lot daut nijch too daut dee leajende Fiende sikj äwa mie freihe sulle, lot dän nijch met dee Uage winkje dee mie oone Uasoak hause.
20 Dan dee räde nijch Fräd, oba dee plone Lest jäajen dee Stelle oppe Ead.
21 Un see moake äa Mul groot op jäajen mie; see saje: "Aha! aha! Onnse Uage ha jeseene."
22 Du hast jeseene, O Herr Gott; sie nijch stel, O Herr Gott, sie nijch wiet auf fonn mie.
23 Rooj die opp, un sie wacka fa mien Jerejcht, un to miene Sach, mien Gott un mien Herr.
24 Rejcht mie, O Herr Gott mien Gott no diene Jerajchtijchkjeit; un lot dän sikj nijch freihe äwa mie.
25 Lot an nijch enn äare Hoate saje: "Aha! onnse Seel!" Lot an nijch saje: "Wie ha am oppjeschluckt."
26 Lot dän aule toop to schaunde woare un festimmelt senne, dee sikj freihe äwa mien Onnjlekj; lot dän met Schaund un Onnea bedakjt senne dee sikj jäajen mie opphäwe.
27 Lot dän dee sikj enn mien Jerajchtfoadjet freihe, juble; un dee sele oone oppheare saje: "Dee Herr Gott saul Groot jemoakt woare, dee enn siene Deena äa Fräd en Fejneaje haft.
28 En miene Tunj woat fonn diene Jerajchtijchkjeit räde, un woat die dän Dach aewa preise.
Copyright © 2001 by Elmer Reimer