Beginning
Dee 9 Psalm
To dän haupt Muskaunt opp Mut-labben, en Psalm fonn Doft.
1 Ekj woa die danke, O Herr Gott, met mien gaunset Hoat; ekj woa fonn diene wundafolle Woakje fetale;
2 Ekj woa mie freihe, un enn die Froo senne, ekj woa dien Nome preise, O du Aulahejchsta.
3 Wan miene Fiend trigj jedreit sent, woare dee dol faule un ommkome fer die.
4 Dan du hast mien Rajcht un miene Sach bestädijcht, du sautst opp daen Troon un deetst rajcht rejchte.
5 Du hast dee Natsjoone jedodelt; du hast dee Beese fenijcht, en hast äa Nome utjelascht fa emma un emma.
6 Dee Fiend äa Felotenheit es befoadijcht fa emma, un du hast dee Grootstaede utjewartelt, un äa Jedajchtnis es feschwunje met an.
7 Oba dee Herr Gott es bestädijcht fa emma; Hee haft sien Troon fa Jerejcht fa emma bestädijcht.
8 En hee woat dee Welt enn Jerajchtijchkjeit rejchte, hee woat dee felkja rajcht rejchte.
9 Dee Herr Gott woat uk ne Tooflucht senne fa dän dee bedrekjt sent, ne Tooflucht wan doa Trubbel es.
10 En dee, dee dien Nome bekjane woare äa Toofetruehe enn die habe; dan, du, Herr Gott, hast dän nijch felote dee die seakje.
11 Singt Preis to däm Herr Gott dee enn Zion wont; moakt sien Doone bekaunt mank dee Natsjoone.
12 Dan Hee behelt dän dee no Bloot seakje; un fejat nijch dee Betriebte äa Schriehe.
13 Doo die äwa mie erboarme O Herr Gott; see mien Betriebtet aun, derjch dän dee mie hause, häw mie enopp fonn dee doodes Puate,
14 Soo daut ekj aul diene Preise erkjläare kaun enn dee Zions Dochta äare Puate; ekj woa mie freihe enn diene Radunk.
15 Dee Natsjoone sent enn dee Kul enenn jesunke dän see muake; äa eajna Foot es enn daut Nat jejräpe daut see festuake.
16 Dee Herr Gott haft bekaunt jemoakt, hee haft Jerejcht je-eeft; dee Beesa es jejräpe enn siene eajne Henj äare Oabeit. En Bedenkje. Selah.
17 Dee Beese sele trigj jedreit woare no de Hal, un aul dee Natsjoone dee fonn Gott fejäte.
18 Dan dee Bederftje woare niemols fejäte woare, dee Natsjoone dee Gott fejäte, woare opp emma felote senne.
19 Sto opp, O Herr Gott! Lot däm Mensch nijch dee Äwahaunt kjriehe. Lot dee Natsjoone fer die jerejcht woare.
20 O Herr Gott, doo an enjste; lot dee Natsjoone weete daut see mau Mensche sent. Selah.
Dee 10 Psalm
1 Wuaromm steist du soo wiet auf, O Herr Gott? Woascht du die festäakje enn schwearije Tiede?
2 Dee Beesa woat enn siene Stolltheit dee Oame hinjaraun joage; dee woare jejräpe woare enn äare eajne Plone dee see utjedocht habe.
3 Dan dee Beese puche sikj äwa äa Seele Janke, un kjneet sikj dol fer dee Jietsje; dan hee haft däm Herr Gott fe-acht.
4 Enn siene Stolltheit woat dee Beesa nijch seakje - doa es kjeen Gott enn aul sien Fäanäme.
5 Siene Wäaj sent emma äwareen, diene Jerejchte sent wiet wajch fonn sien Aunseene; waut siene Fiend aunbelangt, hee pust opp daen.
6 Hee haft enn sien Hoat jesajcht: "Ekj woa nijch wieda jerekjt woare!" Fonn eene Jeschlajcht no daut näakjste, niemols enn Onnjlekj.
7 Sien Mul es foll Lastre un Lest un Schwindlarie; unja siene Tunj es Schowanak un Beeset.
8 Hee set enn dee festoakne Städe enn dee Darpe; enn dee Jeheeme Städe deit hee dee onnschuldje ommbrinje, siene Uage sent jäajen dee Oame.
9 Hee luat emm Jeheeme soo aus aus en Leiw enn siene Gruft; hee luat festoake dee Oame to jriepe, dän enn sien Nat enenn.
10 En wan hee feschmatat haft, beajcht hee sikj dol; dee Oame sent jefolle derjch siene Stoakje.
11 Hee haft enn sien Hoat jesajcht: "Gott haft fejäte, hee haft sien Jesejcht festoake, hee woat niemols seene."
12 O Herr Gott, sto opp! O Gott, doo diene Haunt opphäwe, fejat nijch fonn diene Jerinje.
13 Wuaromm deit dee Beesa Gott fe-achte? Dee haft enn sien Hoat jesajcht daut du an nijch woascht feauntwuatlijch hoole.
14 Du hast jeseene, dan du hast äa Schowanakjet un Fedruss beoobacht, met diene Haunt trigj to tole. Dee Oama äwajeft sikj aun die, du best dee Weisekjinje äa Help.
15 Bräakj dee Beese un Gottloose äa Oarm; doo sien Gottlooset utforsche bott doa nuscht meeha to finje es.
16 Dee Herr Gott es opp emma un emma Kjeenijch, dee Natsjoone sent ut sien Launt feschwunje.
17 O Herr Gott, du hast dee Deemietje äa Janka jeheat, du woascht äa Hoat reed moake, dien Ua woat heare
18 Dee Weisekjinje un Bedrekjte to rejchte, un dee Maun fonne Ead saul sikj nijch meeha enjste.
Dee 11 Psalm
To daen haupt Musikaunt, a Psalm fonn Doft.
1 Ekj socht Tooflucht enn däm Herr Gott - woo kaunst du to miene Seel saje: "Flijcht no dien Boajch soo aus en Foagel."
2 Dan see! dee Beese traumple dän Boage; dee moake äare Fiele reed aum Baunt, doamet no dee Opprajchte to scheete.
3 Wan dee Grunntloag fenijcht woare, waut kjenne dee Jerajchte doone?
4 Dee Herr Gott es enn sien heilja Tempel; dee Herr Gott, sien Troon es enne Himels; siene Uage seene; siene Uagalette woare dee Mensche Säns unjaseakje.
5 Dee Herr Gott prooft dee Jerjachte ut, oba siene Seel haust dee Beese, un däm dee Jewault leef haft.
6 Hee woat Schlenj opp dee Beese räajne; Fia en Schwäweblit un en heeta Wint saul dän äa Deel senne.
7 Dan dee Herr Gott is Jerajcht; hee haft jerajchte Woakje leef, dee Opprajchte seene sien Jesejcht.
Dee 12 Psalm
To daen haupt Musikaunt opp Scheminot, en Psalm fonn Doft.
1 Halp, O Herr Gott, dan dee Heilje sent feschwunje; dan dee Tru sent, sent nijch to finje mank dee Mensche Säns.
2 Dee raede Nutslooset, en jieda met sien Noba, met Leppe dee schmeijchle un räde met en dobbeldet Hoat.
3 Dee Herr Gott woat aule aufschniede dee met schmeijchel Leppe räde, un ne Tunj dee Stolltet räde deit;
4 dee saje: "Wie woare jewenne met onnse Tunje, onnse Leppe jeheare onns, wäa es Herr äwa onns?"
5 "Ekj woa nu oppstone fa dee Oame äa Bedrekje un daut Sefte fa dee Bederftje," sajcht dee Herr Gott. "Ekj woa dän fesejchre, hee stänt doafäa."
6 Däm Herr Gott siene Wead sent ajchte Wead, soo aus Selwa daut jereinijcht es enn en eadna Owe, säwen mol jereinijcht.
7 Du woascht dän behoole, O Herr Gott; du woascht dän behoole fonn dit Jeschlajcht fa emma.
8 Dee Beese wanke romm aun aule Siede wan dee Beese Mensche Säns daut Beeset lowe.
Dee 13 Psalm
To daen Haupt Musikaunt, en Psalm fonn Doft.
1 Woo lang woascht du fonn mie fejäte, O Herr Gott? Fa emma? Woo lang woascht du dien Jesejcht fonn mie festäakje?
2 Woo lang saul ekj Rot näme enn miene Seel, un jieda Dach Trua ha enn mien Hoat? Woo lang saul mien Fient fäajetrocke woare fer mie?
3 Kjikj! Jeff mie Auntwuat, O Herr Gott, mien Gott. Doo miene Uage oppdache, daut ekj nijch ennschlop emm Doot;
4 Daut mien Fient nijch meteemol sajcht: "Ekj ha jewonne äwe am," un miene Fiend sikj freihe wan ekj fescheddat sie.
5 Oba ekj ha enn dien Erboarme Toofetruehe jehaut; mien Hoat woat sikj freihe enn diene Radunk.
6 Ekj woa to däm Herr Gott sinje, wiels hee mie beloont haft.
Dee 14 Psalm
To daen haupt Musikaunt, en Psalm fonn Doft.
1 Dee Noa haft enn sien Hoat jesajcht: "Doa es kjeen Gott." Äa Benäme es fe-ädelt, waut see deede, deede see enn Haus, doa es kjeena dee Goots deit.
2 Dee Herr Gott kjikjt rauf fomm Himel opp dee Mensche Säns, tom seene auf doa irjent waut fa Festentnis wea, dee no Gott socht:
3 Dee ha sikj aule auntsied jedreit, dee sent toop schwiensch jeworde, doa es kjeena dee Goots deit, nijch emol eena!
4 Ha aul dee, dee Beeset eewe kjeen Festaunt? Dee Mien Folkj oppjefräte ha soo aus Broot; dee ha däm Herr Gott nijch aunjeroopt.
5 Donn deede see sikj enjste fa dän Schrakj, dan Gott es enn dee Jerajchte äa Jeschlajcht.
6 Du hast dee Oama äa Rot jeschämt, dan dee Herr Gott es siene Tooflucht.
7 Wäa woat dee Radunk ut Zion brinje? Wan dee Herr Gott dee Jefangenschoft fonn sien Folkj trigj brinje woat, dan woat Joakopp sikj freihe, un Iesrael woat froo senne.
Dee 15 Psalm
En Psalm fonn Doft.
1 O Herr Gott, wäa saul enn diene Woninj wone? Wäa saul enn dien Heilja Boajch wone?
2 Soona dee opprajchtijch waundelt un deit Jerajchtijchkjeit eewe, un deit enn sien Hoat dee Woarheit raede.
3 Hee deit nijch hinjarikjsch räde met siene Tunj, un deit sien Frint uk nijch Beeset aun, un deit uk nijch sien Noba waut fäaschmiete.
4 Dee ennjewartelda Sinda es enn siene Uage fe-acht, oba hee deit däm eare dee däm Herr Gott ferjchte deit. Hee haft jeschweat to sien eajnet Schode, un woat daut nijch endre.
5 Hee haft sien Jelt nijch utjeliet fa Entrast, hee haft uk nijch Schmeijchel Jelt jenome jäajen dee Onnschuldje, soona dee soont deit woat emma bestendijcht senne.
Dee 16 Psalm
En Jeheemnet Schats fonn Doft.
1 Doo äwa mie wajchta, O Gott, dan ekj sat mien Toofetruehe enn die.
2 Du hast to däm Herr Gott jesajcht: "Du best mien Herr, ekj ha kjeen Goots buta enn die."
3 Waut dee Heilje enne Ead aunbelanjt, dee sent dee fetraflijche, enn wäm aul mien Fejneaje es.
4 Soone äa Trua saul femeat woare dee en aundra Gott hinjaraun rane. Ekj woa äa Drunk Opfa fonn Bloot nijch utjeete, un äare Nomes woare nijch ut miene Leppe kome.
5 Dee Herr Gott es daut Poat fonn mien Oawgoot un mien Kuffel. Du woascht sejchalijch miene Tookunft bestädje.
6 Dee Lienjes sent mie enn scheene Städe jefolle, jo, ekj ha en straumet Oawgoot.
7 Ekj woa däm Herr Gott säajne dee mie Rot jeft; mien Hoat deit mie uk enne Nacht beleare.
8 Ekj ha däm Herr Gott emma fer mie, dan hee es bie miene rajchte Haunt, ekj woa nijch jescheddat woare.
9 Daut es dee Uaosoak wuaromm mien Hoat froo es, en miene Harlijchkjeit freit sikj, mien Fleesch saul uk en Hopninj ruehe,
10 Dan du woascht miene Seel nijch enn dän Grauf lote, du woascht dien Heilja nijch lote Fewäsunk seene.
11 Du woascht mie dän Laewes Wajch ennleare, enn dien Doasenne es folle Freid; bie diene rajchte Haunt es Fejneaje fa emma en emma.
Copyright © 2001 by Elmer Reimer