Beginning

21 तब यहोसापात अउर अपने पुरखन क संग दफनावा गवा। ओका दाऊद नगर मँ दफनावा गवा। यहोराम यहोसापात क जगह पइ नवा राजा भवा। यहोराम यहोसापात क पूत राह। ² यहोराम क भाई अजर्याह, यहीएल, जकर्याह, अजर्याह, मीकाएल अउर सपत्याह रहेन। उ सबइ लोग यहोसापात क पूत रहेन। यहोसापात यहूदा क राजा रहा। ³ यहोसापात अपने पूतन क चाँदी, सोना अउर कीमती चिजियन भेंट मँ दिहस। उ ओनका यहूदा मँ सक्तीसाली किलन भी दिहेस। किन्तु यहोसापात राज्ज यहोराम क दिहस काहेकि यहोराम सब स बड़का पूत रहा।

यहूदा क राजा यहोराम

⁴ यहोराम अपने बाप क राज्ज प्राप्त किहस अउर अपने क सक्तीसाली बनाएस। उ आपन तरवारे स आपन सबहिं भाइयन क मार डाएस। उ इस्राएल क कछू प्रमुखन क मार डाएस। ⁵ जब यहोराम सासन सुरू किहेस तउ उ बत्तीस बरिस क रहा। उ यरूसलेम मँ आठ बरिस तलक हुकूमत किहस। ⁶ उ उहइ तरह रहा जइसे इस्राएल क राजा रहत रहेन। उ उहइ तरह रहा जउने तरह अहाब क परिवार रहत रहा। इ एह बरे भवा कि यहोराम अहाब क बिटिया स बियाह किहस अउर यहोराम यहोवा क निगह मँ बुरा किहस। ⁷ किन्तु यहोवा दाऊद क परिवार क नस्ट नाहीं करइ चाहत रहा, काहेकि उ दाऊद क संग वाचा किहे रहा। यहोवा बचन दिहे रहा कि दाऊद अउर ओकरी सन्तान क एक बंस सदा ही सासन करब।

⁸ यहोराम क समइ मँ, एदोम यहूदा क अधिकार छेत्र स बाहेर निकर गवा। एदोम क लोग अपना राजा चुन लिहन। ⁹ एह बरे यहोराम अपने सबहिं सेनापतियन अउर रथन क संग एदोम गवा। एदोमी सेना यहोराम अउर ओकरे रथ क रथपतियन क घेर लिहस। किन्तु यहोराम रात मँ जुद्ध कइके अपने निकरइ क रस्ता हेर लिहस। ¹⁰ उ सबइ स अब तलक एदोन क देस यहूदा क खिलाफ बिद्रोही रहा ह। लिब्ना नगर क लोग भी यहोराम क बिरुद्ध होइ गएन। इ एह बरे भवा कि यहोराम पुरखन क, यहोवा परमेस्सर क छोड़ दिहस। ¹¹ यहोराम ऊँची जगह भी यहूदा क पहाड़ियन पइ बनाएस। यहोराम यरूसलेम क लोगन क परमेस्सर बरे अबिस्सासी बनइ क कारण बनेस। उ यहूदा क लोगन क यहोवा क खिलाफ भड़काएस।

¹² एलिय्याह नवी स यहोराम क एक सँदेसा मिला। सँदेसा मँ इ कहा गवा रहा:

“इ उ अहइ जउन परमेस्सर यहोवा कहत ह। इहइ उ परमेस्सर अहइ जेकर अनुसरण तोहार पुरखा दाऊद करत रहा। यहोवा कहत ह, ‘यहोराम, तू उ तरह नाहीं रह्या जउने तरह तोहार बाप यहोसापात रहा। तू उ प्रकार नाहीं रह्या जउने तरह यहूदा क राजा आसा रहा। ¹³ मुला तू उ तरह रह्या जउने तरह इस्राएल क राजा रहेन। तू यहूदा अउ यरूसलेम क लोगन क उ काम करइ स रोक्या ह जउन यहोवा चाहत ह। इहइ अहाब अउर ओकर परिवार किहस। उ पचे यहोवा क बरे बिस्सास क जोग्ग न रहेन तू अपने भाइयन क मार डाया। तोहार भाई तोहसे नीक रहेन। ¹⁴ एह बरे अब यहोवा हाली ही तोहरे लोगन क बहोत जियादा सजा देइ। यहोवा तोहरे बच्चन, मेहररुअन अउर तोहार सारी सम्पत्ती क सजा देइ। ¹⁵ तू पचन्क आँतन मँ भयंकर बीमारी होइ। इ हर रोज जियादा बिगड़त जाइ। तब तोहार भयंकर बीमारी क कारण आँतन बाहेर निकरि अइहीं।’”

¹⁶ यहोवा इथियोपियन क लगे रहइवाले पलिस्तियन अउ अरबियन क यहोराम स रूठाइ दिहस। ¹⁷ उ पचे यहूदा देस पइ हमला कइ दिहन अउर राजमहल क सारी सम्पत्ति अउ यहोराम क पूतन अउ मेहररुअन क लइ गएन। सिरिफ यहोराम क सब स छोटका पूत छोड़ दीन्ह गवा। यहोराम क सब स नान्ह पूत क नाउँ यहोआहाज रहा।

¹⁸ ओन चिजियन क होइ क पाछे यहोवा यहोराम क आँतन मँ अइसा रोग पइदा किहस जेकर उपचार न होइ सका। ¹⁹ तब यहोराम क आँतन, दुइ बरिस पाछे ओकरी बीमारी क कारण बाहेर आइ गइ। उ बहोत बुरी पीरा मँ मरा। यहोराम क सम्मान मँ लोग आगी क महाज्वाला नाहीं बारेन जइसा उ पचे ओकरे बाप क बरे किहे रहेन। ²⁰ यहोराम उ समइ बत्तीस बरिस क राह जब उ राजा भवा रहा। उ यरूसलेम मँ आठ बरिस हुकूमत किहस। जब यहोराम मरा तउ कउनो मनई दुखी नाहीं भवा। लोग यहोराम क दाऊद क नगर मँ दफनाएन किन्तु ओन कब्रन मँ नाहीं जहाँ राजा दफनाए जात हीं।

यहूदा क राजा अहज्याह

22 यरूसलेम क लोग अहज्याह क यहोराम क जगह पइ नवा राजा होइ क बरे चुनेन। अहज्याह यहोराम क सबस नान्ह पूत रहा। अरब लोगन क संग जउन लोग यहोराम क डेरन पइ हमला करइ आए रहेन उ पचे यहोराम क बड़े पूतन क मार डाए रहेन। एह बरे यहूदा मँ अहज्याह सासन करब सुरु किहस। ² अहज्याह जब हुकूमत करब सुरु किहस तब उ बाईस बरिस क रहा। अहज्याह यरूसलेम मँ एक बरिस हुकूमत किहस। ओकरी महतारी क नाउँ अतल्याह रहा। अतल्याह क बाप क नाउँ ओम्री रहा। ³ उ अहज्याह भी वइसे ही रहा जइसे अहाब क परिवार रहत रहा। उ उ तरह रहा काहेकि ओकर महतारी ओका गलत काम करइ क बरे हुसकाएस। ⁴ अहज्याह यहोवा क दृस्टि मँ बुरे काम किहस, जइसा कि अहाब क परिवार किहे रहा। अहाब क परिवार अहज्याह क ओकरे बाप क मरई क पाछे बुरी सलाह दिहस। उ बुरी सलाह ओकरे मउत क कारण रहा। ⁵ अहज्याह उहइ सलाह क मानेस जउन अहाब क परिवार ओका दिहस। अहज्याह राजा योराम क संग अराम क राजा हजाएल क खिलाफ गिलाद क रामोत नगर मँ गवा। योराम क बाप क नाउँ अहाब रहा जउन इस्राएल क राजा रहा। किन्तु अर्मिया क लोग योराम क जुद्ध मँ घायल कइ दिहन। ⁶ योराम लउटिके यिज्रेल नगर क स्वस्थ होइ क बरे गवा। उ रामोत मँ तब घायल भवा रहा जब उ अराम क राजा हजाएल क खिलाफ जुद्ध करत रहा। तब यहोराम क पूत अहज्याह अहाब क पूत योराम स मिलइ यिज्रेल नगर क गवा। योराम यिज्रेल नगर मँ रहा काहेकि उ घायल रहा।

⁷ परमेस्सर अहज्याह क मउत तब करवाइ दिहस जब उ योराम स भेटइ गवा। अहज्याह पहोंचा अउर योराम क संग येहू स भेटइ गवा। येहू क बाप क नाउँ निमसी रहा। यहोवा येहू क अहाब क परिवार क नस्ट करइ बरे चुनेस। ⁸ येहू अहाब क परिवार क सजा देत रहा। येहू यहूदा क प्रमुखन अउर अहज्याह क ओन सम्बन्धियन क पता लगाएस जउन अहज्याह क सेवा करत रहेन। येहू यहूदा क ओन प्रमुखन अउर अहज्याह क सम्बन्धियन क मार डाएस। ⁹ तब येहू अहज्याह क खोज मँ रहा। येहू क लोग ओका उ समइ पकरि लिहन जब उ सोमरोन नगर मँ छुपइ क जतन करत रहा। उ पचे अहज्याह क येहू क लगे लिआएन। उ पचे अहज्याह क मार दिहन अउर ओका दफनाइ दिहन। उ पचे कहेन, “अहज्याह यहोसापात क संतान अहइ। यहोसापात पूरे हिरदइ स यहोवा क अनुसरण किहे रहे।” अहज्याह क परिवार मँ उ सक्ती नाहीं रही कि यहूदा क राज्ज क अखण्ड रखि सकइ।

रानी अतल्याह

¹⁰ अतल्याह अहज्याह क महतारी रही। जब उ लखेस कि ओकर पूत मर गवा तउ उ यहूदा मँ राजा क सबहिं पूतन क मार डाएस। ¹¹ एहॅ बरे राजा यहोराम क बिटिया यहोसावत अहज्याह क पूत योआस क लिहस अउर ओका छुपाइ दिहस। जब राजा क दूसर पूतन क मार दीन्ह ग रहेन। यहोसापात योआस अउर ओकरी धाई क अपने सयनकच्छ क भीतर रखेस। यहोसावत याजक यहोयादा क मेहरारु रही अउर उ अहज्याह क बहिन रही। यहोसावत योआस क छुपाइ दिहे रहा। ऍह बरे रानी अतल्याह ओका नाहीं मार सकेस। ¹² योआस याजकन क संग परमेस्सर क मन्दिर मँ छ: बरिस तलक छुपा रहा। उ जमाने मँ अतल्याह रानी क रुप मँ देस पइ हुकूमत किहस।

याजक यहोयादा अउर राजा योआस

23 सताएँ बरिस मँ यहोयादा आपन सक्ती देखाएस। उ सेनापितयन क संग सन्धि किहस। उ सबइ नायक: यरोहाम क पूत अजर्याह यहोहानान क पूत इस्माएल, ओबेद क पूत अजर्याह, अदायाह क पूत मासेयाह अउर जिक्री क पूत एलीसापात रहेन। ² उ पचे यहूदा क चारिहुँ कइँती गएन अउर यहूदा क सबहिं नगरन स उ पचे लेवीबंसियन क बटोरेन। उ पचे इस्राएल क परिवारन क प्रमुखन क भी बटोरेन। तब उ पचे यरूसलेम गएन। ³ सबहिं लोग एक संग मिलिके राजा क संग परमेस्सर क मन्दिर मँ एक ठु सन्धि किहन।

यहोयादा एन लोगन स कहेस, “राजा क पूत हुकूमत करी। इहइ उ बचन अहइ जउन यहोवा दाऊद क संतानन क सम्बंधित दिहे रहा। ⁴ अब, तोहका इ जरूर करइ चाही: याजकन अउ लेवीयन सबित क दिन तू पचन्मँ स जउन सेवा पइ जात हीं ओनकर एक तिहाई दुआरे क रच्छा करी। ⁵ तोहार एक तिहाई राजमहल पइ रही अउर तोहार एक तिहाई पहिले फाटक पइ रही। मुला दूसर सबहिं लोग यहोवा क मन्दिर क अँगना मँ रहिहीं। ⁶ कउनो भी मनई क यहोवा क मन्दिर मँ न आवइ द्या। सिरिफ सेवा करइवाले याजकन अउ लेवीबंसियन क पवित्तर होइ क कारण, यहोवा क मन्दिर मँ आवइ क आग्या अहइ। मुला दूसर लोग उ कारज करिहीं जउन यहोवा दइ रखेस ह। ⁷ लेवीबंसियन जरूर राजा क नजिक रहइ चाही। हर एक मनई अपनी तरवार अपने संग रखी। जदि कउनो मनई मन्दिर मँ प्रवेस करइ क कोसिस करत ह तउ उ मनई क मार डावा। तू पचन्क राजा क संग रहब बाटइ उ जहाँ।”

⁸ लेवीबंसी अउ यहूदा क सबहिं लोग याजक यहोयादा जउन आदेस दिहस, ओकर पालन किहस। याजक यहोयादा याजकन क समूह मँ स कउनो क छूट नाहीं दिहस। इ तरह हरेक सेनापित आपन सबहिं लोगन क जउन सबित क दिन सेवा मँ जात रहेन, अउर जउन सेवा मँ नाहीं जात रहेन लइ लिहेन। ⁹ याजक यहोयादा अधिकारियन क उ सबइ भालन अउर बड़ा अउ नान्ह ढारन क दिहन जउन राजा दाऊद क रहिन। उ सबइ हथियार परमेस्सर क मन्दिर मँ धरे रहेन। ¹⁰ तब यहोयादा लोगन क बताएस कि ओनका कहाँ खड़ा होब अहइ। हर एक मनई अपने हथियार अपने हाथ मँ लिहे रहा। उ पचे मन्दिर क दाई अउ बाई सबइ रासतन मँ खड़ा भएन। उ पचे वेदी, मन्दिर अउर राजा क निचके खड़े रहेन। ¹¹ उ पचे राजा क पूत क बाहेर लिआएन अउर ओका मुकुट पहिराइ दिहन। उ पचे ओका व्यवस्था क किताब क एक प्रति दिहन। तब उ पचे योआस क राजा बनाएसन यहोयादा अउर ओकरे पूतन योआस क अभिसेक किहन। उ पचे कहेन, “राजा दीर्घायु होइ।”

¹² अतल्याह मन्दिर कइँती दउड़त भए अउर राजा क बड़कइ करत भए लोगन क सोर सुनेस। उ यहोवा क मन्दिर पइ लोगन क लगे आइ। ¹³ उ नजर दउड़ाएस अउर राजा क लखेस। राजा राज स्तम्भ क संग सामनेवाले दुआर पइ खड़ा रहा। अधिकारी अउ लोग जउन तुरही बजावत रहेन, राजा क लगे रहेन। देस क लोग खुस रहेन अउर तुरही बजावत रहेन। गायक संगीत क बाजन क बजावत रहेन। गायक बड़कई क गायन मँ लोगन क अगुवाई करत रहेन। तब अतल्याह अपने ओढ़नन क फारि डाएस, अउर उ कहेस, “सड्यन्त्र, सड्यन्त्र।”

¹⁴ याजक यहोयादा फउजे क नायकन क बाहेर लिआवा। उ ओनसे कहेस, “अतल्याह क, सेना स, बाहेर लइ आवा। अपनी तरवार क उपयोग उ मनई क मार डावइ बरे करा जउन ओकरे संग जात ह।” तब याजक फउजियन क चितउनी दिहस, “अतल्याह क यहोवा क मन्दिर मँ जिन मारा।” ¹⁵ तब ओन लोग अतल्याह क पकड़ लिहन जब उ राजमहल क घोड़ दुआर पइ आइ। तब उ पचे उहइ जगह पइ ओका मार डाएन।

¹⁶ तब यहोयादा राजा अउर सबहिं लोगन क संग एक ठु सन्धि किहस। सबहिं स्वीकार किहन कि उ पचे यहोवा क लोग रहिहीं। ¹⁷ सबहिं लोग बाल क मूर्ति क मन्दिर मँ गएन अउर ओका उखाड़ डाएन। उ पचे बाल क मन्दिर क वेदियन अउर मूरतियन क तोड़ डाएन। उ पचे बाल क वेदी क समन्वा बाल क याजक मत्तान क मार डाएस।

¹⁸ तब यहोयादा याजकन क चुनेस अउर ओनका यहोवा क मन्दिर बरे उत्तरदायी बनाएस। उ पचे याजक लेवीबंसी रहेन अउर दाऊद ओनका यहोवा क मन्दिर क बरे उत्तरदायी होइ क कार्य सौपे रहा। ओन याजकन क होमबलि मूसा क आदेस क अनुसार यहोवा क चढ़ाउब रही। उ पचे बहोत खुसी स दाऊद क निर्देस क अनुसार गावत भए बलि चढ़ावत रहेन। ¹⁹ यहोयादा यहोवा क मन्दिर क दुआरे पइ दुआरपाल रखेस जेहसे कउनो मनई जउन कउनो दृस्टि स सुद्ध नाहीं रहा मन्दिर मँ नाहीं जाइ सकत रहा।

²⁰ यहोयादा फउज क नायकन, प्रमुखन लोगन क प्रसासकन अउ देस क सबहिं लोगन क अपने संग लिहस। तब यहोयादा राजा क यहोवा क मन्दिर स बाहेर निकारेस अउर उ पचे ऊपरी दुआरे स राजमहल मँ गएन। उ जगह पइ उ पचे राजा क गद्दी पइ बइठाएन। ²¹ यहूदा क सबहिं लोग बहोत खुस रहेन अउर यरूसलेम नगर मँ सान्ति रही काहेकि अतल्याह तरकारे स मार दीन्ह गइ रही।

योआस फुन मन्दिर बनावत ह

24 योआस जब राजा बना सात बरिस क राहा। उ यरूसलेम मँ चालिस बरिस तलक सासन किहस। ओकरी महतारी क नाउँ सिब्या रहा। सिब्या बेर्सेबा नगर क रही। ² योआस उ काम जउन यहोवा क नज़र मँ नीक अहा तब तलक करत रहेन जब तलक याजक यहोयादा जिअत रहा। ³ यहोयादा योआस क बरे दुइ मेहररुअन चुनेस। योआस क पूत अउर बिटियन रहिन।

⁴ तब कछू समइ पाछे, योआस यहोवा क मन्दिर दुबारा बनावइ क निहचइ किहस। ⁵ योआस याजकन अउ लेवीबंसियन क एक संग बोलाएस। उ ओनसे कहेस, “यहूदा क नगरन मँ जा अउर उ धने क बटोरा जेकर भुगतान इस्राएल क लोग हर बरिस करत हीं। उ धने क उपयोग परमेस्सर क मन्दिर दुबारा बनावइ मँ करो। हाली करा अउर एका पूरा कइ ल्या।” मुला लेवीबंसियन हाली नाहीं किहन।

⁶ एह बरे राजा योआस मुख्य याजक, यहोयादा क बोलाएस। राजा कहेस, “यहोयादा, तू यहूदा अउ यरूसलेम स यहोवा क सेवक मोसा दुआरा कर क धन वसूलइ बरे लेवीबंसियन क नाहीं लिहा? मूसा अउर इस्राएल क लोग पवित्तर तम्बू बरे इ कर क धन क उपयोग किहे रहेन।”

⁷ पुराने जमाने मँ अतल्याह क पूत, परमेस्सर क मन्दिर मँ जबरदस्ती घुस गए रहेन। उ पचे यहोवा क मन्दिर क पवित्तर चिजियन क उपयोग अपने बाल देवतन क पूजा क बरे किहस। अतल्याह एक ठु दुट्ठ मेहरारु रही।

⁸ राजा योआस एक ठु सन्दूख बनावइ क आदेस दिहेस अउर ओका यहोवा क मन्दिर क दुआरे क बाहेर रखइ क आदेस दिहस। ⁹ तब लेविबंसियन यहूदा अउ यरूसलेम मँ इ घोसणा किहन। उ पचे लोगन स कर क धन यहोवा क बरे लिआवइ क कहेन। यहोवा क सेवक मूसा इस्राएल क लोगन स रेगिस्ताने मँ रहत समइ जउन कर क रुप मँ धन मँगे रहा ओतना ही इ धन अहइ। ¹⁰ सबहिं प्रमुख अउर सबहिं लोग खुस रहेन। उ पचे धन लइके आएन अउर उ पचे ओका सन्दूखे मँ डाएन। उ पचे तब तलक देत रहेन जब तलक सन्दूख नाहीं भरि गवा। ¹¹ तब लेवीबंसियन क राजा क अधिकारियन क समन्वा सन्दूख लइ जाइ क पड़ी। उ पचे लखेन कि सन्दूख धन स भरि गवा ह। राजा क सचिव अउर प्रमुख याजक क अधिकारी आएन अउर उ पचे धने क सन्दूख स निकारेन। तब उ पचे सन्दूख क अपनी जगहिया पइ फुन वापस लइ गएन। उ पचे बार-बार किहन अउर धन बटोरेन। ¹² तब राजा योआस अउर यहोयादा उ धन ओन लोगन क दिहस जउन यहोवा क मन्दिर क बनावइ क कार्य करत रहेन अउर यहोवा क मन्दिर बनावइ मँ कार्य करइवालन यहोवा क मन्दिर क दुबारा बनावइ बरे कुसल बढ़ई अउर काठे पइ खुदाई क कार्य करइवालन क मजदूरी पइ धरेन। उ पचे यहोवा क मन्दिर क दुबारा बनावइ बरे कँसे अउर लोहा क काम करइ क जानकरी रखइवालन क भी मजूरी पइ रखेन।

¹³ काम क निगरानी रखइवाले मनई बहोत बिस्सास क जोग्ग रहेन। यहोवा क मन्दिर क दुबारा बनावइ गवा। उ पचे परमेस्सर क मन्दिर क पहिले क तरह ही बनाएन अउर इ पहिले स जियादा मजबूत बनाएन। ¹⁴ जब कारीगरन कार्य पूरा कइ लिहन तउ उ पचे उ धने क जउन बचा रहा राजा योआस अउर यहोयादा क लगे लइ आएन। उ पचे धन क उपयोग यहोवा क मन्दिर बरे चिजियन बनावइ बरे किहन। उ सबइ चिजियन मन्दिर क सेवाकार्य मँ अउर होमबलि चढ़ावइ मँ काम आवति रहिन। उ पचे खोरन अउर दूसर चिजियन क सोना अउ चाँदी स बनाएन। याजकन यहोवा क मन्दिर मँ हर एक दिन क होमबलि तब तलक चढ़ाएन जब तलक यहोयादा जिअत रहा।

¹⁵ यहोयादा बूढ़ा भवा। उ बहोत लम्बी उमिर बिताएस तब उ मरा। यहोयादा जब मरा, उ एक सौ तीस बरिस क रहा। ¹⁶ लोगन यहोयादा क दाऊद क नगर मँ हुवाँ दफनाएन जहाँ राजा दफनाए जात हीं। लोगन यहोयादा क हुवाँ दफनाएन काहेकि अपनी जिन्नगी मँ उ परमेस्सर अउ परमेस्सर क मन्दिर बरे बहोत अच्छे कार्य किहस।

¹⁷ यहोयादा क मरई क पाछे यहूदा क प्रमुख आएन अउर उ पचे राजा योआस क समन्वा निहुरेन। राजा एन प्रमुखन क सुनेस। ¹⁸ राजा अउ प्रमुखन उ यहोवा, परमेस्सर क मन्दिर क छोड़ दिहेस जेकर अनुसरण ओनकर पुरखन करत रहेन। उ पचे असेरा स्तम्भ अउर दूसर मूरतियन क पूजा सुरू किहस। परमेस्सर यहूदा अउ यरूसलेम क लोगन पइ कोहाइ गवा काहेकि राजा अउ उ प्रमुखन अपराधी रहेन। ¹⁹ परमेस्सर लोगन क लगे नबियन क ओनका यहोवा कइँती लउटाइ क बरे पठएस। नबियन लोगन क चितउनी दिहन। किन्तु लोग सुनइ स इन्कार कइ दिहन।

²⁰ तब परमेस्सर क आतिमा याजक यहोयादा क पूत जकर्याह पइ उतरी। जकर्याह लोगन क समन्वा खड़ा भवा अउर उ कहेस, “जउन यहोवा कहत ह उ इ अहइ: ‘तू लोग यहोवा क आदेस पालन करइ स काहे इन्कार करत अहा? तू कामयाब नाहीं होब्या। तू यहोवा क तजा ह। एह बरे यहोवा भी तोहका छोड़ दिहस ह।’”

²¹ लेकिन लोग जकर्याह क खिलाफ जोजना बनाएस। राजा जकर्याह क मार डावइ क आदेस दिहस, एह बरे उ पचे ओह पइ तब तलक पाथर मारेन जब तलक उ मर नाहीं गवा। लोगन इ मन्दिर क आँगन मँ किहन। ²² राजा योआस अपने ऊपर यहोयादा क दयालुता क भी याद नाहीं रखेन। यहोयादा जकर्याह क बाप रहा। मुला योआस यहोयादा क पूत जकर्याह क मार डाएस। मरइ क पहिले जकर्याह कहेस, “यहोवा ओह क लखि जउन तू करत अहा अउर तोहका दण्ड देइ।”

²³ बरिस क आखीर मँ अराम क फउज योआस क खिलाफ आइ। उ पचे यहूदा अउ यरूसलेम पइ हमला किहन अउर लोगन क सबहिं प्रमुखन क मार डाएन। उ पचे सारी कीमती चिजियन दमिस्क क राजा क लगे पठइ दिहन। ²⁴ अराम क फउज बहोत कम सैनिकन क संग आइ रही किन्तु यहोवा ओका यहूदा क बहोत बड़ी फउज क हरावइ दिहस। यहोवा इ एह बरे किहस कि यहूदा क लोग यहोवा परमेस्सर क तजि दिहन जेकर अनुसरण ओनकर पुरखन करत रहेन। इ तरह योआस क सजा मिली। ²⁵ जब अराम क लोग योआस क छोड़ेन, उ बुरी तरह घायल रहा। योआस क अपने सेवकन ओकरे खिलाफ जोजना बनाएन। उ पचे अइसा एह बरे किहन कि योआस याजक यहोयादा क पूत जकर्याह क मार डाए रहा। सेवकन योआस क ओकरी अपनी चारपाई पइ मार डाएन। योआस क मरइ क पाछे लोग ओका दाऊद क नगर मँ दफनाएन। किन्तु लोग ओका उ जगहिया पइ नाहीं दफनाएन जहाँ राजा दफनाए जात हीं।

²⁶ जउन सेवकन योआस क खिलाफ जोजना बनाएन, उ पचे इ सबइ अहइँ जाबाद अउ यहोजाबाद जाबाद क महतारी क नाउँ सिमात रहा। सिमात अम्मोन क रही। यहोजाबाद क महतारी क नाउँ सिम्रित रहा। सिम्रित मोआब क रही। ²⁷ योआस क पूतन क कथा, ओकर खिलाफ बहोत सारी भविस्सबाणियन अउर उ फुन परमेस्सर क मन्दिर कइसे बनाएस, राजा लोगन क व्याख्या नाउँ क किताबे मँ लिखा अहइ। ओकरे पाछे योआस क पूत अमस्याह नवा राजा भवा।