Beginning

दाऊद विभिन्न रास्ट्रन क जीत लेत ह

18 पाछे दाऊद पलिस्ती लोगन पइ हमला किहस। उ ओनका हराएस। उ गत नगर अउर ओकरे चाहिहुँ कइँती क नगरन क पलिस्ती लोगन स जीत लिहस।

² तब दाऊद मोआब देस क हराएस। मोआबी लोग दाऊद क गुलाम बन गएन अउर ओकर लगे नज़राना लाएन।

³ दाऊद हददेज़ेर क सेना क बिरुद्ध भी लड़ा। हददेज़ेर सेबा क राजा रहा। दाऊद उ सेना क संग लगातार हमात नगर तलक लड़ा। दाऊद इ एह बरे किहस कि हददेज़ेर अपने राज्ज क परात नदी तलक फइलावाइ क कोसिस किहस। ⁴ दाऊद हददेज़ेर एक हजार रथ, सात हजार सारथी अउर बीस हजार फउजी लिहेस। दाऊद हददेज़ेर क जियादातर घोड़न अंग-अंग कइ दिहस जउन रथ हींचत रहेन। मुला दाऊद सौ रथन क हींचइ बरे काफी घोड़न क बचाइ लिहस।

⁵ दमिस्क नगर स अरामी लोग हददेज़ेर क मदद करइ बरे आएन हददेज़ेर सोबा क राजा रहा। मुला दाऊद बाईस हजार अरामी फउजियन क पराजित किहेस अउ मार डाएस। ⁶ तब दाऊद दमिस्क नगर मँ राज्जपालन क राखेस। अरामी लोग दाऊद क प्रजा बन गएन अउ ओकरे लगे नज़राना लइके आएन। एह बरे यहोवा दाऊद क, जहाँ कहूँ उ गवा, बिजइ दिहस।

⁷ दाऊद हददेज़ेर क सेनापतियन क सोना क ढालन लिहस अउर ओनका यरूसलेम लइ आवा। ⁸ दाऊद तिभत अउ कून नगरन स बहोत जियादा काँसा प्राप्त किहस। उ पचे नगर हददेज़ेर क रहेन। पाछे, सुलैमान इ काँसे क उपयोग काँसे क हौदन, काँसे क खम्भा अउर सबइ दूसर चिजियन बनावइ मँ किहस जउन मन्दिर क बरे काँसे स बनी रहिन।

⁹ तोऊ हमात नगर क राजा रहा। हददेज़ेर सोबा क राजा रहा। तोउ सुनेस कि दाऊद हददेज़ेर क सारी सेना क हराइ दिहस। ¹⁰ एह बरे तोउ अपने पूत हदोराम क राजा दाऊद क लगे सान्ति क याचना करइ अउ जीत क मुबारकबाद देइ बरे पठएस। उ इ किहेस काहेकि दाऊद हददेज़ेर क खिलाफ जुद्ध किहे रहा अउर ओका हराए रहा। पहिले हददेज़ेर तोउ स जुद्ध किहे रहा। हदोराम दाऊद क हर एक तरह क सोना, चाँदी अउर काँसा स बनी चिजियन दिहस। ¹¹ राजा दाऊद ओन चिजियन क पवित्तर बनाएस अउर यहोवा क दिहस। दाऊद अइसा उ सारे चाँदी, सोना क संग किहेस जेका उ एदोमी, मोआबी, अम्मोनी पलिस्ती अउर अमालेकी लोगन स प्राप्त किहे रहा।

¹² सरूयाह क पूत अबीसै नून क घाटी मँ अट्ठारह हजार एदोमी लोगन क मारेस। ¹³ अबीसै एदोमी मँ राज्जपाल क राखेन अउर सबहिं एदोमी लोग दाऊद क गुलाम होइ गएन। दाऊद जहाँ कहूँ भी गवा, यहोवा ओका बिजइ दिहस।

दाऊद क महत्वपूर्ण अधिकारी

¹⁴ दाऊद पूरे इस्राएल क राजा रहा। उ उहइ किहस जउन सब क बरे उचित अउ निआवपूर्ण रहा। ¹⁵ सरूयाह क पूत योआब, दाऊद क सेना क सेनापति रहा। अहीलूद क पूत यहोसापात ओन कामन क बारे मँ लिखेस जउन दाऊद किहेस। ¹⁶ सादोक अउ अबीमेलेक याजक रहेन। सादोक अहीतूब क पूत रहा अउर अबीमेलेक एब्यातार क पूत रहा। सबसा लिपिक रहा। ¹⁷ यहोयदा क पूत बनायाह करेतियन अउ पलेती लोगन क मार्गदर्सन क उत्तरदायी रहा। अउर दाऊद क पूतन बिसेस अधिकारी रहेन। उ पचे राजा दाऊद क संग सेवारत रहेन।

अम्मोनी दाऊद क लोगन क लज्जित करत हीं

19 नाहास अम्मोनी लोगन क राजा रहा। नाहास मरा अउर ओकर पूत नवा राजा बना। ² तब दाऊद कहेस, “नाहास मोरे बरे दयालु रहा, एह बरे मइँ नाहास क पूत हानून बरे दयालु रहब।” एह बरे दाऊद अपने दूतन क ओकरे बाप क मउत पइ सान्त्वना देइ पठाएस। दाऊद क दूत हानून क सान्त्वना देइ अम्मोन देस क गएन।

³ मुला अम्मोनी प्रमुखन हानून स कहेन, “मूरख जिन बना। दाऊद इ मनईयन क तोहका सान्त्वना देइ बरे या तोहरे मरे बाप क सम्मान देइ बरे नाहीं पठएस ह। नाहीं, दाऊद अपने दूतन क तोहार अउर तोहरे देस क जासूसी करइ चाहत ह। असल मँ दाऊद तोहरे देस क नस्ट करइ चाहत ह।” ⁴ एह बरे हानून दाऊद क सेवकन क बन्दी बनाएस अउर ओनकर दाढ़ी मुड़वाइ दिहस। हानून क करिहाउँ तलक ओकरे ओढ़नन क छोर क कटवाइ दिहस। तब उ ओनका बिदा कइ दिहस।

⁵ दाऊद क मनई एतने लज्जित भएन कि उ पचे घर क नाहीं जाइ सकत रहेन। कछू लोग दाऊद क लगे गएन अउर बताएन कि ओकरे मनइयन क संग कइसा बर्त्ताव भवा ह। एह बरे राजा दाऊद अपने लोगन क लगे इ खबर पठएस: “तू लोग यरीहो नगर मँ तब तलक रहा जब तलक फुन डाढ़ी न जम जाइ। तब तू घरे वापस जाइ सकत ह।”

⁶ अम्मोनी लोग पता पाएन कि दाऊद ओनका आपन दुस्मन समुझत ह। तब हानून अउ अम्मोनी लोग पचहत्तर हजार पौण्ड चाँदी, रथन अउर सारथियन क मेसोपोटामियन स बेसाहइ मँ लगाएन। उ पचे अराम मँ अरम्माका अउ सोबी लोगन स भी रथन अउर सारथियन क प्राप्त किहन। ⁷ अम्मोनी लोग बत्तीस हजार रथ बेसहेन। उ पचे माका क राजा क अउर ओकरी फउज क भी आवइ अउ मदद करइ बरे भुगतान किहन। माका क राजा अउर ओकर लोग आएन अउर उ पचे मेदबा नगर क लगे आपन डेरा डाएन। अम्मोनी लोग खुद अपने नगरन स बाहेर अउर आएन जुद्ध बरे तइयार होइ गएन।

⁸ दाऊद सुनेस कि अम्मोनी लोग जुद्ध बरे तइयार होत अहइँ। एह बरे उ योआब अउ इस्राएल क पूरी फउज क अम्मोनी लोगन स जुद्ध करइ बरे पठाएस। ⁹ अम्मोनी लोग बाहेर निकरेन अउर जुद्ध बरे तइयार होइ गएन। उ पचे नगर दुआर क लगे रहेन जउन राजा मदद बरे आए रहेन, उ पचे खुद खुले मइदान मँ खड़े रहेन।

¹⁰ योआब लखेस कि ओकरे खिलाफ लड़इवाली फउज क दुइ मोर्चन रहेन। एक ठु मोर्चा ओकरे समन्ना रहा अउर दूसर ओकरे पाछे रहा। एह बरे योआब इस्राएल क कछू सब स उत्तिम जोधन क चुनेस। उ ओनका अराम क सेना स लड़इ बरे पठएस। ¹¹ योआब इस्राएल क बाकी फउज क अबीसै क सेनापतित्व मँ राखेस। अबीसै योआब क भाइ रहा। उ सबइ फउजी अम्मोनी सेना क खिलाफ लड़इ गएन। ¹² योआब अबीसै स कहेस, “जदि अरामी फउज मोरे बरे बहोत जियादा सक्तीसाली पड़इ तउ तोहका मोर मदद करइ क होइ मुला जदि अम्मोनी फउज तोहारे बरे बहोत जियादा सक्तीसाली साबित होइ तउ मइँ तोहार मदद करब। ¹³ हम अपने लोगन अउ अपने परमेस्सर क नगरन क बरे जुद्ध करत समइ बीर अउ मजबूत बनी यहोवा उ करइ जेका उ उचित मानत ह।”

¹⁴ योआब अउ ओकरे संग क सेना अराम क पइ हमला किहस। अराम क सेना योआब अउर ओकरी फउज क समान्वा स भाग खड़ी भइ। ¹⁵ अम्मोनी सेना लखेस कि अराम क सेना भागत अहइ एह बरे उ पचे भी पराइ गएन। उ पचे अबीसै अउर ओकरी सेना क समन्वा स भाग खड़े भएन। अम्मोनी अपने नगर क चले गएन, अउर योआब यरूसलेम क लउट गवा।

¹⁶ अरमी क प्रमुखन लखेस कि इस्राएल ओनका पराजित कइ दिहस। एह बरे उ पचे परात नदी क पूरब रहइवाले अरामी लोगन स सहायता बरे दूत पठाएस। सोपक हददेज़ेर क अरामी क सेना क सेनापति रहा। सोपक ओन दूसर अरामी फउजिन क भी संचालन किहस जउन मदद बरे आएस।

¹⁷ दाऊद सुनेस कि अराम क लोग जुद्ध बरे एकट्ठा होइ ग अहइ, एह बरे दाऊद इस्राएल क सबहिं फउजियन क बटोरेस। दाऊद ओनका यरदन नदी क पार लइ गवा। उ पचे अरामी लोगन क ठीक आमने-सामने आइ गएन। दाऊद अपनी फउज क हमला करइ बरे तइयार किहेस अउर अरामियन पइ हमला कइ दिहस। ¹⁸ अरामी इस्राएलियन क समन्वा स भाग खड़े भएन। दाऊद अउर ओकर फउज सात हजार सारथी अउर चलीस हजार अरामी फउजियन क मार डाएस। दाऊद अउर ओकर फउज अरामी सेना क सेनापति सोपक क भी मार डाएस।

¹⁹ जब हददेज़ेर क अधिकारियन लखेन कि इस्राएल ओनका हराइ दिहस तउ उ पचे दाऊद स सन्ति कइ लिहन। उ पचे दाऊद क प्रजा बन गएन। इ तरह अरामियन अम्मोनी लोगन क फुन सहायता करइ स इन्कार कइ दिहन।

योआब अम्मोनियन क नस्ट करत ह

20 बसन्त मँ, योआब इस्राएल क फउज क जुद्ध बरे अगवाइ किहेस। इ उहइ समइ रहा जब राजा लोग जुद्ध करइ बरे निकलेस रहेन मुला दाऊद यरूसलेम मँ रहा। तब इस्राएल क फउज अम्मोन देस क गवा अउ एका नस्ट कइ दिहेस। तब उ पचे ओकर राजधानी रब्बा नगर क गएन। सेना लोगन क भीतर आवइ अउर बाहेर जाइ स रोकइ बरे नगर क चारिहुँ कइँती डेरा डाएस। योआब अउ ओकर फउज रब्बा नगर क खिलाफ तब तलक जुद्ध किहस जब तलक ओका नस्ट नाहीं कइ डाएस।

² दाऊद ओनके राजा मुकुट क उतार लिहस। उ सोने क मुकुट तोल मँ लगभग पचहत्तर पौण्ड रहा। मुकुट मँ बहुमुल्य रतन जड़े रहेन। मुकुट दाऊद क मूँड़े पइ धरा गवा। तब दाऊद रब्बा नगर स बहोत स मूल्यवान चिजियन प्राप्त किहस। ³ दाऊद रब्बा क लोगन क संग लिआवा अउर ओनका आरन, लोहे क गैंती अउ वुल्हाड़ियन स काम करइ क मजबूर किहस। दाऊद अम्मोनी लोगन क सबहिं नगरन क संग इहइ बर्त्ताव किहस। तब दाऊद अउर सारी फउज यरूसलेम क वापस लउट गइ।

पलिस्ती क दैत्य मारे जात हीं

⁴ पाछे, इस्राएल क लोगन क जुद्ध गेजेर नगर मँ पलिस्तियन क संग भवा। उ समइ, हूसा क सिब्बकै सिप्पै क मार डाएस। सिप्पै दैत्यन क पूतन मँ स रहा। इ तहर पलिस्ती लोग लोगन क हराइ दीन्ह गवा रहेन।

⁵ दूसर अवसर पइ, इस्राएल क लोगन क जुद्ध फुन पलिस्तियन क खिलाफ भवा। याईर क पूत एल्हानान लहमी क मर डाएस। लहमी गोलियात क भाई रहा। गोल्यह गत नगर क रहा। लहमी क भाला बहोत लम्बी अउर भारी रहा। इ करघे क लम्बे हत्थे क तरह रहा।

⁶ तब इस्राएलियन गत नगर मँ पलिस्तियन क संग दूसर जुद्ध किहन। इ नगर मँ एक बहोत बिसाल मनई रहा। ओकरे हाथ अउ गोड़ क चौबीस उँगलियन रहिन। उ मनई क हरेक हाथ अउ हरेक गोड़ मँ छ: छ: उँगलियन रहिन। उ दैत्य क पूत भी रहा। ⁷ एह बरे जब उ इस्राएल क मज़ाक उड़ाएस तउ योनातान ओका मार डाएस। योनातान सिमा क पूत रहा। सिमा दाऊद क भाई रहा।

⁸ उ पचे पलिस्ती लोग गत नगर क दैत्यन क पूत रहेन। दाऊद अउ ओकर सेवक लोग ओन दैत्यन क मार डाएस।

इस्राएलियन क गनके दाऊद पाप करत ह

21 सइतान इस्राएल क लोगन क खिलाफ रहा। उ दाऊद क इस्राएल क लोगन क गनइ क प्रोत्साहन दिहस। ² एह बरे दाऊद योआब अउर लोगन क प्रमुखन स कहेस, “जा अउर इस्राएल क सबहिं लोगन क गणना करा। बर्सेबा नगर स लइके लगातार दान नगर तलक देस क हर मनई क गना। तब मोका बतान, एहसे मइँ जान सकब कि हिआँ केतेन लोग अहइँ।”

³ एह बरे योआब जवाब दिहेस, “यहोवा अपने लोगन क सौ गुना बिसाल बनावइ! महामाहिम, इस्राएल क सबहिं लोगन तोहार सेवक अहइँ। मोरे सुआमी, अउर राजा, आप इ कार्य काहे करइ चाहत हीं? आप इस्राएल क सबहिं लोगन क पाप करइ क अपराधी बनइहीं।”

⁴ मुला राजा दाऊद हठ धरे रहा। योआब क उ करइ पड़ा जउन राजा कहेस। एह बरे योआब गवा अउर पूरे इस्राएल देस मँ गणना करत घूमत रहा। तब योआब यरूसलेम लउटा ⁵ अउर दाऊद क बताएस कि केतने मनई रहेन। इस्राएल मँ गियारह लाख मनई रहेन अउर तरवार क उपयोग कइ सकत रहेन अउर तरवार क उपयोग करइवाले चार लाख सत्तर हजार मनई यहूदा मँ रहेन। ⁶ योआब लेवि अउर बिन्यामीन क परिवार समूह क गणना नाहीं किहेस। योआब ओन परिवार समूहन क गणना नाहीं किहेस काहेकि उ राजा दाऊद क आदेसन क पसन्द नाहीं करत रहा। ⁷ इ हुकुम देइ के, परमेस्सर क दृस्टि मँ दाऊद एक बुरा काम किहे रहा, एह बरे परमेस्सर इस्राएल क दण्ड दिहस।

परमेस्सर इस्राएल क दण्ड देत ह

⁸ तब दाऊद परमेस्सर स कहेस, “मइँ एक बहोत बेववूफी क काम किहेउँ ह। मइँ इस्राएल क लोगन क गणना कइके भयंकर पाप किहेउँ ह। अब, मइँ पराथना करत हउँ कि तू इ सेवक क पापन क छिमा कइ द्या।”

^9-10 गाद दाऊद क दर्सी रहा। यहोवा गाद स कहेस, “जा अउर दाऊद क कहा: ‘यहोवा जउन कहत ह उ इ अहइ: मइँ तोहका तीन विकल्प देत हउँ। तोहका ओहमाँ स एक चुनब अहइ अउर तब मइँ तोहका उ तरह दण्डित करब जेका तू चुने लेब्या।’”

^11-12 तब गाद दाऊद क लगे गवा। गाद दाऊद स कहेस, “यहोवा कहत ह, ‘दाऊद, तू जउन दण्ड चाहत अहा ओका चुना: पर्याप्त अन्न क बगैर तीन बरिस, या तोहार पाछा करइवाले तरवार क उपयोग करत भए दुस्मनन स तीन महीने तलक भागब, या परमेस्सर स तीन दिना क दण्ड। पूरे देस मँ भयंकर महामारी फइली अउर यहोवा क दूत लोगन क नस्ट करत भवा पूरे देस मँ आइ।’ परमेस्सर मोका पठएस ह। अब, तोहका निर्णय करब अहइ कि ओका कउन सा जवाब देउँ।”

¹³ दाऊद गाद स कहेस, “मइँ विपत्ति मँ हुउँ। मइँ नाहीं चाहत कि कउनो मनई मोरे दण्ड क निहचइ करइ। यहोवा बहोत दयालु अहइ, एह बरे यहोवा क ही निर्णय करइ द्या कि मोका कइसे दण्ड देइ।”

¹⁴ एह बरे यहोवा इस्राएल मँ भयंकर महामारी पठएस अउर सत्तर हजार लोग मर गएन। ¹⁵ परमेस्सर एक सरगदूत क यरूसलेम क नस्ट करइ क पठएस। किन्तु जब सरगदूत यरूसलेम क नस्ट करब सुरू किहस तउ यहोवा लखेस अउ ओका दुःख भवा। एह बरे यहोवा यरूसलेम क नस्ट न करइ क निर्णय किहस। यहोवा उ सरगदूत स, जउन नस्ट करत रहा कहेस, “रूक जा, इहइ पर्याप्त अहइ।” यहोवा क सरगदूत उ समइ यबूसी ओर्नान क खरिहान क लगे खड़ा रहा।

¹⁶ दाऊद नज़र उठाएस अउर यहोवा क दूत क अकासे मँ लखेस। सरगदूत यरूसलेम पइ आपन तरवार हींच रखे रहा। तब दाऊद अउर प्रमुखन अपने मूँड़ क धरती पइ टेक के प्रणाम किहन। दाऊद अउ प्रमुखन अपने सोक बरे टाट पहिरे रहे। ¹⁷ दाऊद अपने परमेस्सर स कहेस, “मइँ लोगन क गणना करइ क आदेस दिहे रहेउँ। मइँ हुउँ जुन इ बहोत बुरा काम किहेउँ। इस्राएल क लोगन कछू भी गलत नाहीं किहन। यहोवा मोरे परमेस्सर, मोका अउर मोरे परिवार क दण्ड द्या किन्तु उ भयंकर महामारी क रोक द्या जउन तोहार आपन लोगन क मारत अहइ।”

¹⁸ तब यहोवा क दूत गाद स बात किहस। उ कहेस, “दाऊद स कहा कि उ यहोवा क उपासना बरे एक ठु वेदी बनाएस। दाऊद क एका यबूसी ओर्नान क खरिहान क लगे बनावइ चाही।” ¹⁹ गाद इ सबइ बातन दाऊद क बताएस अउर दाऊद ओर्नान क खरिहान क लगे गवा।

²⁰ ओर्नान गोहुँ दाँवत रहा। ओर्नान मुड़ा अउर उ सरगदूत क लखेस। ओर्नान क चारिहुँ पूत छुपइ बरे पराइ गएन। ²¹ दाऊद ओर्नान क लगे पहोंचा। ओर्नान ओका लखेस अउर उ खरिहान क छोड़ि दिहस। उ दाऊद तलक पहोंचा अउर ओकरे समन्वा आपन माथा भुईयाँ पइ टेकिके प्रणाम किहेस।

²² दाऊद ओर्नान स कहेस, “तू आपन खारिहान मोका बेच द्या। मइँ तोहका पूरी कीमत देबउँ। तब मइँ यहोवा क उपासना बरे एक वेदी बनावइ बरे एकर उपयोग कइ सकत हुउँ। तब लोगन प स भयंकर महामारी रूक जाई।”

²³ ओर्नान दाऊद स कहेस, “इ खारिहाने क लइ ल्या। तू मोरे सुआमी अउर राजा अहइँ। उहइ करा जउन आप उपयुक्त समुझत हीं। लखा, मइँ भी होमबलि बरे जनावरन देब। मइँ आप क काहे क तख्तन देब जेका आप वेदी पइ आगी बरे बार सकत हीं अउर मइँ अन्नबलि बरे गोहूँ देब। मइँ इ सबइ आप क देब।”

²⁴ किन्तु राजा दाऊद ओर्नान क जवाब दिहस, “नाहीं, मइँ तोहका पूरी कीमत देब। मइँ कउनो तोहार उ चीज नाहीं लेब जेका मइँ यहोवा क देब। मइँ उ कउनो भेंट नाहीं चढ़ाउब जेकर मोका कउनो मूल्य न देइ पड़इ।”

²⁵ एह बरे दाऊद उ जगह क बरे ओर्नान क पन्द्रह पौण्ड सोना दिहस। ²⁶ दाऊद हुँवा यहोवा क उपासना बरे एक वेदी बनाएस। दाऊद होमबलि अउर मेलबलि चढ़ाएस। दाऊद यहोवा स पराथना किहस। यहोवा सरग स आगी पठइके दाऊद क जवाब दिहस। आगी होमबलि क वेदी पइ उतरी। ²⁷ तब यहोवा सरगदूत क आदेस दिहस कि उ अपनी तरवार क वापस म्यान मँ धइ लेइ।

²⁸ दाऊद लखेस कि यहोवा ओका ओर्नान क खरिहान पइ उत्तर दइ दिहस ह, एह बरे यहोवा क बलि भेंट किहस। ²⁹ (पवित्तर तम्बू अउ होमबलि क वेदी ऊँच जगह पइ गिबोन नगर मँ रही। मूसा पवित्तर तम्बू क तब बनाए रहा जब इस्राएल क लोग रेगिस्ताने मँ रहेन। ³⁰ दाऊद पवित्तर तम्बू मँ परमेस्सर स बातन करइ नाहीं जाइ सकत रहा, काहेकि उ भयभीत रहा। दाऊद यहोवा क दूत अउ ओकरी तरवार स भयभीत रहा।)