Beginning

9 इस्राएल क लोगन क नाउँ ओनके परिवार क इतिहास मँ अंकित रहेन। उ सबइ परिवार इतिहास इस्राएल क राजा लोगन क इतिहास क पुस्तक मँ सम्मिलित भए रहेन।

यरूसलेम क लोग

यहूदा क लोग बन्दी बनाए गए रहेन अउर बाबेल क जाइ क मजबूर कीन्ह गए रहेन। उ पचे उ जगह पइ एह बरे लइ जावा गएन, काहेकि उ पचे परमेस्सर क बरे बिस्सास क जोग्ग नाहीं रहेन। ² सब स पहिले लउटिके आवइबाले अउर अपने नगरन अउ अपने पहँटा मँ रहइवाले लोगन मँ कछू इस्राएली, याजक, लेवीबंसी अउ मन्दिर मँ सेवा करइवाले सेवक रहेन।

³ इ सबइ यरूसलेम मँ रहइवाला यहूदा, बिन्यामीन, एप्रैम अउर मनस्से परिवार समूह क लोग अहइँ।

²² सब मिलाइके दुइ सौ बारह मनई पवित्तर तम्बू क दुआर क रच्छा बरे चुने गए रहेन। ओनकर नाउँ ओनके परिवार इतिहास मँ ओनके नान्ह नगरन मँ लिखे। भए रहेन। दाऊद अउ समूएल नबी ओन लोगन क चुनेन, काहेकि ओन पइ बिस्सास कीन्ह जाइ सकत रहा। ²³ दुआरपालन अउर ओनकर सन्तानन क जिम्मेदारी यहोवा क मन्दिर, पवित्तर तम्बू क रच्छा करब रहा। ²⁴ हुवाँ चारिहुँ कइँति दुआर रहेन: पूरब, पच्छिम, उत्तर अउर दर्खियन। ²⁵ दुआरपालन क सम्बन्धियन क, जउन नान्ह नगर मँ रहत रहेन, समइ-समइ पइ आइके ओनका मदद करइ पड़त रही। उ पचे आवत रहेन अउर हर बार सात दिन तलक दुआरपालन क सहायता करत रहेन।

²⁶ दुआरपालन क चार प्रमुख दुआरपाल हुवाँ रहेन। उ पचे लेवीबंसी मनई रहेन। ओनकर कर्त्तव्य परमेस्सर क मन्दिर क कमरन अउ खजाना क देखभाल करब रहा। ²⁷ उ पचे रातिभर परमेस्सर क मन्दिर क रच्छा मँ खड़े रहत रहेन अउर परमेस्सर क मन्दिर क हर रोज भिंसारे खोलइ क ओनकर काम रहा।

²⁸ कछू दुआरपालन क काम मन्दिर क सेवा मँ काम आवइवाली तश्तरियन क देखभाल करब रहा। उ पचे एन तस्तरियन क तब गनत रहेन जब उ पचे भीतर लाई जात रहिन। उ पचे एन तस्तरियन क तब भी गनत् रहेन जब उ पचे बाहेर जात रहिन। ²⁹ दूसर दुआरपाल रस्मी-सामग्री अउर ओन बिसेस तस्तरियन क देखभाल क बरे चुने जात रहेन। उ पचे आटा, दाखरस, तेल, सुगन्धि अउर बिसेस तेल क भी देखरेख करत रहेन। ³⁰ किन्तु सिरिफ याजक ही बिसेस तेल क मिलावइ क काम करत रहेन।

³¹ एक मतित्याह नाउँ क लेवीबंसी रहा जेकर काम भेंट मँ उपयोग क बरे रोटी पकाउब रहा। मतित्याह सल्लूम क सब स बड़ा पूत रहा। सल्लूम कोरह परिवार क रहा। ³² दुआरपालन मँ स कछू जउन कहात परिवार क रहेन, हर एक सबित क मेज पइ रखी जाइवाली रोटी क तइयार करइ क काम करत रहेन।

³³ उ पचे लेबीवंसी जउन गायक रहेन अउर अपने परिवारन क प्रमुख रहेन, मन्दिर क कमरन मँ ठहरत रहेन। ओनका दूसर काम नाहीं करइ पड़त रहेन। काहेकि उ पचे मन्दिर मँ दिन-रात काम क बरे उत्तरदायी रहेन।

³⁴ इ सबइ लेवीबंसी अपने परिवारन क प्रमुख रहेन। उ पचे अपने परिवारन क इतिहास मँ प्रमुख क रूप मँ अंकित रहेन। उ पचे यरूसलेम मँ रहत रहेन।

राजा साऊल क परिवार इतिहास

राजा साऊल क मउत

10 पलिस्ती लोग इस्राएल क लोगन क खिलाफ लड़ेन। इस्राएल क लोग पलिस्तियन क समान्वा पराइ गएन। बहोत इस्राएली लोग गिलबो पर्वत पइ मारे गएन। ² पलिस्ती लोग साऊल अउर ओकरे पूतन क पाछा लगातार करत रहेन। उ पचे ओनका धइ लिहेन अउर ओनक मार डाएन। पलिस्तियन साऊल क पूतन योनातान, अबीनादाब अउर मलकीसू क मार डाएन। ³ साऊल क चारिहुँ कइँती जुद्ध घमासान होइ गवा। धनुर्धारियन साऊल पइ आपन बाण छोड़ेन अउर ओका घायल किहन।

⁴ तब साऊल अपने कवच वाहक स कहेस, “अपनी तरवार बाहेर हींचा अउर एकर उपयोग मोका मारइ मँ करा। तब उ पचे खतनारहित जब अइहीं तउ न मोका चोट पहोंचइही न ही मोर हँसी उड़इहीं।”

किन्तु साऊल क कवच वाहक ससान रहा। उ साऊल क मारब अस्वीकार किहस। तब साऊल अपनी तरवार क उपयोग खुद क मारइ बरे किहस। उ अपनी तरवार क नोक पइ गिरा। ⁵ कवचवाहक लखेस कि साऊल मर गवा, तब उ खुद क मार डाएस। उ अपनी तरवार क नोंक पइ गिरा अउर मर गवा। ⁶ इ तरह साऊल अउर ओकर तीनउँ पूतन मर गएन। साऊल क सारा परिवार एक संग मर गवा।

⁷ घाटी मँ रहइवाले इस्राएल क सबहिं लोग लखेन कि ओकर आपन फउज भाग गएन। उ पचे लखेन कि साऊल अउर ओकर पूत मर गएन। एह बरे उ पचे अपने नगरन क तजेन अउ पराइ गएन। तब पलिस्ती ओन नगरन मँ आएन जेनका इस्राएलियन तज दिहे रहेन अउर पलिस्ती ओन नगरन मँ रहइ लागेन।

⁸ अगले दिन, पलिस्ती लोग ल्हासन क बहुमूल्य चिजियन लेइ आएन। उ पचे साऊल क ल्हासन अउर ओकरे पूतन क ल्हासन क गिबोन पर्वत पइ पाएन। ⁹ पलिस्तियन साऊल क ल्हास स चिजियन उतारेन। उ पचे साऊल क मूँड़ अउर कवच लिहेन। उ पचे आपन पूरे देस मँ अपने लबार देवतन अउ लोगन क सूचना देइ बरे दूत पठएन। ¹⁰ पालिस्तियन साऊल क कवच क अपने लबार देवता क मन्दिर मँ धरेन। उ पचे साऊल क मूँड़ि क दागोन क मन्दिर लटकाएन।

¹¹ याबेस गिलाद नगर मँ रहइवाले सब लोग उ हर एक बात सुनेन जउन पलिस्ती लोग साऊल क संग किहे रहेन। ¹² याबेस क सबहिं बीर मनई साऊल अउ ओकरे पूतन क ल्हास लेइ गएन। उ पचे ओनका याबेस मँ लइ आएन। ओन बीर मनसेधुअन साऊल अउ ओकरे पूतन क हाड़न क, याबेस मँ एक बिसाल बृच्छ क खाले दफनाएन। तब उ पचे अपना दुःख परगट किहन अउ सात दिन तलक उपवास रखेन।

¹³ साऊल एह बरे मरा कि उ यहोवा क बरे बिस्सास पात्र नाहीं रहा। साऊल यहोवा क आदेसन क पालन नाहीं किहस। साऊल एक माध्यम क लगे गवा अउर ¹⁴ यहोवा क तजिके ओहसे सलाह माँगेस। इहइ कराण अहइ कि यहोवा ओका मार डाएस अउर यिसै क पूत दाऊद क राज्ज दिहस।

दाऊद इस्राएल क राजा होत ह

11 इस्राएल क सबहिं लोग हेब्रोन नगर मँ दाऊद क लगे गएन। उ पचे दाऊद स कहेन, “हम तोहार ही रक्त-माँस अही। ² बीते दिन मँ, जब साऊल राजा रहा तब भी हमार तू जुद्ध मँ सन्चालन किहा। हे दाऊद, यहोवा तोहसे केहस, ‘तू मोरे लोगन क गड़रिया रहब्या। तू मोरे लोगन क ऊपर सासक होब्या।’”

³ इस्राएल क सबहिं प्रमुखन दाऊद क लगे हेब्रोन नगर मँ आएन। दाऊद हेब्रोन मँ ओन प्रमुखन क संग यहोवा क सामने एक समझौता किहस। प्रमुखन दाऊद क अभिसेक किहन। इ तरह उ इस्राएल क राजा बन गवा। यहोवा समूएल दुआरा इ बचन दिहे रहा कि इ होइ।

दाऊद यरूसलेम क कब्जा किहस

⁴ दाऊद अउ इस्राएल क सबहिं लोग यरूसलेम नगर क गएन। यरूसलेम ओन दिनन यबूस कहा जात रहा। उ नगर मँ रहइवाले यबूसी कहे जात रहेन। ⁵ उ नगर क निवासी लोग दाऊद स कहेन, “तू हमारे नगर क प्रवेस नाहीं कइ सकत्या।” किन्तु दाऊद ओन लोगन क पराजित किहस। दाऊद सिय्योन क किले पइ कब्जा कइ लिहस। इ जगह “दाऊद नगर” बना।

⁶ दाऊद कहेस, “उ मनई जउन यबूसी लोगन पइ आक्रमण क संचालन करी, मोर पूरी फउज क सेनापति होइ।” एह बरे योआब आक्रमण क संचालन किहस। योआब सरूयाह क पूत रहा। योआब सेना क सेनापित होइ गवा।

⁷ तब दाऊद किला मँ आपन महल बनाएस। इहइ कारण अहइ ओकर नाउँ दाऊद नगर पड़ा। ⁸ दाऊद किले क चारिहुँ कइँती नगर बसाएस। उ एकॉ मिल्लो स नगर क चारिहुँ कइँती की दीवार तलक बसाएस। योआब नगर क दूसर भागन क मरम्मत किहेस। ⁹ दाऊद लगातार महान बनता गवा। सर्वसक्तीमान यहोवा ओकरे संग रहा।

दाऊद क विसिस्ठ बीर

¹⁰ दाऊद क बिसिस्ठ बीरन क ऊपर क प्रमुखन क इ सूची अहइ: इ सबइ बीर दाऊद क संग ओकरे राज्ज मँ बहोत सक्तीसाली बन गएन। उ पचे अउ इस्राएल क सबहिं लोग दाऊद क सहायता किहन अउर ओका राजा बनाएन। इ ठीक वइसा भवा जइसा परमेस्सर बचन दिहे रहा।

¹¹ इ दाऊद क बीर मनइयन क सूची अहइ:

यासोबाम हक्मोनी लोगन मँ स रहा। यसोबाम राजा क बिसिस्ठ फउज क प्रमुख रहा। यसोबाम अपने भाले क उपयोग तीन सौ मनइयन स जुद्ध करइ बरे किहस। उ एक ही दाईं ओन तीन सौ मनइयन क मार डाएस।

¹² एलीआज़ार दोदो क पूत, अदोही स रहा। एलीआज़ार तीन बीरन मँ स एक रहा। ¹³ एलीआज़ार पसदम्मीम मँ दाऊद क संग रहा। पलिस्ती लोग उ जगह पइ जुद्ध करइ आएन। उ जगह पइ एक जौ स भरा खेत रहा। उहइ जगह, जहाँ इस्राएली लोग पलिस्ती लोगन स भागे रहेन। ¹⁴ किन्तु उ सबइ तीन बीर उ खेत क बीच रुक गएन अउर पलिस्तियन स लड़ेन अउ ओनका हराइ डाएन अउर इ तरह यहोवा इस्राएलियन क बड़ी जीत दइ दिहस।

¹⁵ एक दाई, दाऊद, अदुल्लाम गुफा क लगे रहा अउर पलिस्ती फउज खाले रपाईम क घाटी मँ रही। तीस बीरन मँ स तीन बीरन उ गुफा तलक, लगातार रेंगत भए दाऊद क लगे पहोंचेन।

¹⁶ दूसर अवसर पइ, दाऊद किले मँ रहा, अउर पलिस्ती सेना क एक समूह बेतलेहेम मँ रही। ¹⁷ एक बार दाऊद कहेस, “कास कउनो मोका बेतलेहेम नगर क दुआर क लगे क कुआँ स थोड़ा पानी लाइके पिलातेन!” ¹⁸ तब तीन बीरन पलिस्ती सेना क बीच जुद्ध करत भए अपना रास्ता बनाएन अउर नगर-दुआर क निचके बेतलेहेम क कुएँ स पानी लिहन। तीनहुँ बीरन दाऊद क लगे पानी लइ गएन। दाऊद पानी पिअइ स इन्कार कइ दिहस। उ उ पानी क यहोवा बरे भेंट क रूप मँ बाहेर उड़ेर दिहस। ¹⁹ दाऊद कहेस, “परमेस्सर, मइँ इ पानी क नाहीं पी सकत। एन मनइयन मोरे बरे इ पानी क लिआवइ मँ अपनी जिन्नगी क खतरे मँ डाएन। एह बरे जदि मइँ इ पानी क पिअत हउँ तउ इ ओनकर खून पिअइ क समान होइ।” एह बरे दाऊद उ जल क पिअइ स इन्कार किहस। तीनहुँ बीर उ तरह क बहोत स बहादुरी क काम किहन।

दूसर बीर जोधा

²⁰ योआब क भाई, अबीसै, तीन बीरन क प्रमुख रहा। उ अपने भाले स तीन सौ मनईयन स लड़ा अउर ओनका मार डाएस। अबीसै तीन बीरन क तरह मसहूर होइ गवा। ²¹ अबीसै उ तीनहुँ बीरन स दुइगुना जियादा प्रसिद्ध रहा। उ ओनकर प्रमुख होइ गवा, जदपि उ तीनहुँ बीरन मँ स नाहीं रहा।

²² यहोयादा क पूत बनायाह, कबजेल क एक बीर जोधा रहा। उ एक सक्तीसाली मनइ क पूत रहा। बनायाह अनेक बीरता क काम किहेस। उ मोआब देस क दुइ सर्वोत्तम सिपाहियन क मार डाएस। एक दिन जब बर्फ गिरत रही, उ जमीन क अन्दर एक ठु माँदे मँ घुसा अउर हुवाँ एक सेर क मार डाएस। ²³ बनायाह मिस्र क एक मनई क मार डाएस। उ मनई लगभग साढ़े सात फिट ऊँचा रहा। उ मिस्र क मनई क लगे एक बहोत बड़का अउ भारी भाला रहा। इ बुनकर क करघे क बिसाल खम्भे क नाईं रहा अउर बनायाह क लगे सिरिफ एक ठु लाठी रही। किन्तु बनायाह मिस्री स भाला छोर लिहस। मुला बनायाह मिस्री स भाले क छीन लिहेस। बनायाह मिस्री मनई क भाले क उपयोग किहेस अउर ओका मार डाएस। ²⁴ इ सबइ कार्य रहेन जेनका योहयादा क पूत बनायाह किहस। बनायाह तीन बीरन क तरह प्रसिद्ध भवा। ²⁵ बनायाह तीस बीरन मँ सब स जियादा मसहूर रहा, मुला उ तीनहुँ बीरन मँ स नाहीं रहा। दाऊद बनायाह क अपने अंगरच्छकन क प्रमुख चुनेस।

तीस बीरन

²⁶ इ सबइ राजा क बिसिस्ठ फउज मँ स रहेन: