Beginning

दाऊद अउ योनातान क गहिरी दोस्ती

18 ^1-2 दाऊद जब साऊल स बात पूरी कइ लिहस तब योनातान, दाऊद क बहोत खासमखास मीत बन गवा। योनातान दाऊद स ओतॅना ही पिरेम करइ लाग जेतँना आपन स। साऊल उ दिन क पाछे दाऊद क आपन लगे राखेस। साऊल दाऊद क ओकरे घर पिता क लगे नाहीं जाइ दिहस। ³ योनातान दाऊद स बहोत खासमखास मीत रहा। योनातान दाऊद स एक समझौता किहेस। ⁴ योनातान जउन कोट पहिरे रहा ओका उतारेस अउ दाऊद क दइ दिहस। योनातान आपन सारी वर्दी दाऊद क दइ दिहस। उ आपन धनुस, तरवार अउ कमर बंद भी दाऊद क दइ दिहस।

साऊल क दाऊद क सफलता प धियान देब

⁵ साऊल दाऊद क अलग अलग जुद्ध मँ लड़इ पठएस। दाऊद बहोत कामयाब रहा। तबहिं साऊल ओका फउजियन क ऊपर प्रभारी बनएस। एहसे सब खुस भएन, हिआँ तलक कि साऊल क सब अफसर भी खुस भएन। ⁶ दाऊद पलिस्तियन क खिलाफ लड़इ जात रहा। जुद्ध क पाछे उ घर लउटत रहा। इस्राएल क सबहिं सहरन स मेहररुअन साऊल क समन्वा दाऊद क सुआगत मँ ओसे भेंटइ आवत रहिन। उ सबइ हँसतिन, नाचतिन अउ ढोलक अउ सितार तीन या जियादा धागा वाला क बजावत रहतिन। उ सबइ दाऊद क समन्वा आपन खुसी जाहिर करत रहिन। ⁷ मेहररुअन गावत रहिन,

⁸ मेहररुअन क इ गीत साऊल क दुःखी कइ दिहस। उ बहोत कोहाइ गवा। साऊल सोचेस, “मेहररुअन दाऊद क प्रसंसा करत अहइँ कि उ दसहु हजार मारेस ह। अउर उ पचे कहत अहइँ कि मइँ सिरिफ हजार मारेउँ। ओका कब्जा करइ बरे का बचा सिरफ, बादसाहत हीं?” ⁹ ऍह बरे उ समइ स साऊल दाऊद प निगाह रखइ लाग।

साऊल दाऊद स ससाइ गवा

¹⁰ दूसरे दिन परमेस्सर स पठइ गइ एक दुट्ठ आतिमा साऊल पर जोर स सवारी भरेस। साऊल आपन घर मँ बहसी होइ ग।^[a] दाऊद पहिले क तरह वीणा बजाएस। ¹¹ मुला साऊल क हाथे मँ भाला रहा। साऊल सोचेस, “मइँ दाऊद क देवारे मँ ठोंक देब।” साऊल दुइ बार भाला स हमला किहेस, मुला दाऊद बचि गवा।

¹² यहोवा दाऊद क संग रहा। अउर यहोवा साऊल क तजि दिहेस। ऍह बरे साऊल दाऊद स डेरान रहा। ¹³ साऊल दाऊद क आपन स दूर पठइ दिहस। साऊल दाऊद क दस हजार क सेनापति बनाएस। दाऊद जुद्ध मँ फउजियन क अगुअइ किहेस। ¹⁴ यहोवा दाऊद क संग रहा। ऍह बरे दाऊद हर कहूँ सफल रहत रहा। ¹⁵ साऊल लखेस कि दाऊद क बहोत जिआदा कामयाबी मिलत बाटइ तउ साऊल दाऊद स अउर भी जिआदा ससाइ लाग।

¹⁶ मुला इस्राएल अउ यहूदा क सबहिं मनई दाऊद स पिरेम करत रहेन। उ पचे ओसे पिरेम ऍह बरे करत रहेन काहेकि उ जुद्ध मँ ओनका रस्ता देखाँवत रहा अउ ओनकइ बरे लड़त रहा।

साऊल क आपन बिटिया स दाऊद क बियाहे क योजना

¹⁷ साऊल दाऊद क मार डावइ चाहत रहा। साऊल दाऊद क धोख देइ क एक उपाय सोचेस। साऊल दाऊद स कहेस, “इ मोर सबन ते बड़की बिटिया मेरब अहइ। मइँ तोहका एहसे बियाह करइ देब। तबहिं तू सक्तीसाली जोधा होइ जाब्या। तू हमरे पूत क नाई होब्या। तब तू जाया अउ यहोवा क जुद्ध लड़्या।” इ एक चाल रही। साऊल सचमुच अब इ तखड़ा बखड़ा करत रहा, “इ तरह दाऊद क मोका दाऊद क मारइ क न होइ। मइँ पलिस्तियन स ओका आपन खातिर मरवाइ देब।”

¹⁸ मुला दाऊद कहेस, “मइँ कउनो खास परिवारे स नाहीं अहउँ। अउर मोर कउन हस्ती कि मइँ राजा क बिटिया क संग बियाह कइसे कइ सकत हउँ?”

¹⁹ तउ फुन जब साऊल क बिटिया मेरब क दाऊद क संग बियाह टेमॅ आवा तब साऊल मेहोलाई क अद्रीएल स ओकर बियाह कइ दिहस।

²⁰ साऊल दूसर बिटिया मीकल दाऊद स पियार करत रही। मनइयन साऊल स कहेन कि मीकल दाऊद स पियार करत ह। एहसे साऊल क खुसी भइ। ²¹ साऊल सोचेस, “मइँ मीकल क दाउद क झाँसा देइ मँ बइपरब। मइँ मीकल क दाऊद स बियाह करइ देब। तब पलिस्तियन दाऊद क खिलाफ होइ जाब अउ उ पचे ओका मरि देब।” ऍह बरे साऊल दाऊद स दूसर दाई कहेस, “आजु तू मोरी बिटिया स बियाह कइ सकत ह।”

²² साऊल आपन अफसरन क हुकुम दिहेस, “दाउद स छिपके बात करा, उ ओनसे कहा, ‘देखा, राजा तोहका पसन्द करत ह। ओकर अफसर तोहका पसन्द करत हीं। तोहका ओकरी बिटिया स बियाह कइ लेइ चाही।’”

²³ साऊल क अफसरन उ बातन दाऊद स कहेन। मुला दाऊद जवाब दिहस, “का तू पचे समझत ह कि राजा क दमाद बनब सहल बाटइ? मोरे लगे ऍतना धन नाहीं कि राजा क राजकुमारी क दइ सकउँ। मइँ तउ एक साधरण गरीब मनई हउँ।”

²⁴ साऊल क अफसरन साऊल क उ सब बताएन जउन दाऊद कहे रहा। ²⁵ साऊल ओनसे कहेस, “दाऊद स इ कहा, ‘दाऊद, राजा इ नाहीं चाहत कि तू ओकरी बिटिया बरे धन द्या। साऊल आपन दुस्मनन स बदला लेइ चाहत ह। ऍह बरे बियाह करइ बरे कीमत क रुप मँ सिरिफ एक सौ पलिस्तियन क लिंग क खलरी अहइ।’” इ साऊल क छिपी चाल रही। साऊल सोचेस कि पलिस्ती इ तरह दाऊद क मारि डइहीं।

²⁶ साऊल क अफसरन दाऊद स इ सब बातन कहेन। दाऊद राजा क दमाद बनइ चाहत रहा, ऍह बरे उ तुरंतही कछू कइ देंखाएस। ²⁷ दाऊद अउ ओकर मनई पलिस्तियन क खिलाफ लड़इ आएन। उ पचे दुइ सौ पलिस्ती मारि डाएन। दाऊद ऍनकइ लिंग क खलरी लिहेस अउ साऊल क दइ दिहेस। दाऊद इ ऍह बरे किहस काहेकि उ राजा क दमाद बनइ चाहत रहा।

साऊल दाऊद क आपन बिटिया मीकल स बियाह करइ दिहस। ²⁸ साऊल निहारेस कि यहोवा दाऊद क संग रहा। मुला साऊल इ भी धियान मँ राखेस कि ओकर बिटिया मीकल दाऊद स पियार करत रही। ²⁹ ऍह बरे साऊल दाऊद स अउर भी जिआदा ससाइ गवा। साऊल उ पूरा टेमॅ दाऊद क खिलाफ रहा।

³⁰ इस्राएलियन क खिलाफ लड़इ बरे पलिस्ती सेनापति बाहेर निकरत रहेन। मुला हर दाई दाऊद ओनका हराएस। दाऊद साऊल क सबहिं अफसरन मँ सब स जिआदा सफल रहा तउ दाऊद मसहूर होइ गवा।

योनातान दाऊद क मदद करत ह

19 साऊल आपन पूत योनातान अउ आपन अफसरन क दाऊद क मार डावइ बरे कहेस। मुला योनातान दाऊद क बहोतइ चाहत रहा। ^2-3 योनातान दाऊद क चिताउनी दिहेस, “होसियार रहा, साऊल तोहका जान स मारि डावइ क मौका तलासत बाटइ। भिन्सारे खेते मँ जाइके लुकाइ जा। मइँ आपन बाप क संग खेते मँ जाब। जहाँ तू लुकान रहब्या हम पचे हुआँ खेते मँ खड़ा रहब। मइँ तोहरे बारे मँ आपन बाप स बतियाब। जउन मोका जानि पड़ी तउन तोहका बताउब।”

⁴ योनातान आपन बाप साऊल स बतियान। योनातान दाऊद क बारे मँ नीक नीक बात कहेस। योनातान कहेस, “आप राजा अहइँ। दाऊद आपक सेवक बाटइ। दाऊद आप क कउनो नोसकान नाहीं पहुँचाए बाटइ। ऍह बरे ओकरे संग कछू बुरा जिन करा। दाऊद हमेसा आप बरे नीक रहा ह। ⁵ दाऊद आपन जिन्नगी प खेला रहा जब उ पलिस्ती गोलियत क मारे रहा। यहोवा समूचइ इस्राएल बरे एक बड़की जीत पाए रहेन। आप ओका निहारेन अउ आप ओह प बहोत खुस रहेन। आप दाऊद क नोसकान काहे पहुँचावइ चाहत बाटेन? उ बड़ा मासूम अहइ। ओका मारि डावइ क कउनो कारण नाहीं अहइ।”

⁶ साऊल योनातान क सुनेस। साऊल प्रण किहेस। साऊल कहेस, “यहोवा जब ताई जिन्दा रहत ह तब ताई दाऊद मारा न जाई।”

⁷ ऍह बरे योनातान दाऊद क बोलाएस। उ ओसे उहइ कहेस जउन साऊल योनातान स कहेस। तबहिं योनातान दाऊद क साऊल क लगे लइ आवा। इ तरह दाऊद साऊल क हाजिरी मँ पहिले क तरह होइ गवा।

साऊल फुन दाऊद क जान स मारि डावइ क जतन करत ह

⁸ फुन जुद्ध सुरु भवा। अउर दाऊद पलिस्तियन स जुद्ध करइ गवा। उ पलिस्तियन क हराएस अउर उ पचे ओकरे समन्वा पराइ गएन। ⁹ मुला यहोवा क जरिए पठइ गइ दुट्ठ आतिमा साऊल प सवारी भरेस। साऊल आपन घरे मँ बइठा रहा। साऊल क हाथे मँ ओकर भाला रहा। दाऊद वीणा बजावत रहा। ¹⁰ साऊल दाऊद प हमला किहेस अउ आपन भाला स ओका देवारे प ठोंक देइ क जतन किहेस। दाऊद फाँदि क निकरि गवा अउ भाला देवारे स टकराइ क रहि गवा। तउ उहइ राति दाऊद हुआँ स पराइ निकरा।

¹¹ साऊल मनइयन क दाऊद क घरे पठएस। मनइयन दाऊद क घरे निगरानी करत रहेन। उ पचे राति भइ हुँवई ठहरेन। उ सबइ भिन्सारे दाऊद क मारि डावइ बरे जोहत रहेन। मुला दाऊद क मेहरारु मीकल ओका हुसियार कइ दिहस। उ कहेस, “तोहका आजु क राति पराइ निकरइ चाही। अउ आपन जिन्नगी क रच्छा करइ चाही। जदि तू अइसा न करब्या, तउ भियान मारि दीन्ह जाब्या।” ¹² फुन मीकल दाऊद क खिड़की स खाले उतारि दिहस अउर उ हुआँ स पराइ निकरा। ¹³ मीकल आपन परिवार क देवता क मूरत लिहस अउ ओका बिछउना प ओलार दिहस। मीकल उ मूरत प ओढ़ना डाइ दिहस। उ ओकरे मूँड़े प बोकरी क बार भी लगाइ दिहस।

¹⁴ साऊल दाऊद क बंदी बनावइ बरे दूत पठएस। मुला मीकल कहेस, “दाऊद बेमाँर बा।”

¹⁵ तउ पचे हुवाँ स गएन अउर उ सबइ साऊल स जाइके इ बताइ दिहेन, मुला उ पचे दूतन क दाऊद क लखइ बरे वापस पठइ दिहन। साऊल इ सब मनइयन स कहेस, “दाऊद क मोरे लगे लइ आवा। अगर जरुरत होइ तउ ओका आपन बिछउना प ओलरा भवा उठाइ लिआवा। मइँ ओका मारि डाउब।”

¹⁶ तउ दूत फुन दाऊद क घरे गएन। उ पचे दाऊद क धरइ भीतर गएन, मुला हुवाँ उ पचे लखेन कि बिछउना प सिरिफ एक ठु मूरत रही। उ पचे लखेन कि ओकर बार बस बोकरी क बार रहेन।

¹⁷ साऊल मीकल स कहेस, “तू मोका इ तरह काहे धोखा दिहा? तू मोरे दुस्मन क पराइ जाइ दिहा। दाऊद पराइ गवा अहइ।” मीकल साऊल क जवाब दिहेस, “दाऊद मोसे कहे रहा कि उ मोका मारि डाइ जदि मइँ पराइ जाइ मँ ओकर मदद न करब।”

दाऊद क रामा क डेरा मँ जाब

¹⁸ दाऊद हिफाजत स बचि के निकरि गवा। दाऊद समूएल क लगे रामा पहोंचा। दाऊद समूएल स उ सब बताएस जउन साऊल ओकरे संग किहे रहा। तब दाऊद अउ समूएल ओन डेरन मँ गएन जहाँ नबियन रहत रहेन अउ उ हुवँइ थमा गएन।

¹⁹ साऊल क पता लाग कि दाऊद रामा क नगिचे डेरा मँ रहन। ²⁰ साऊल दाऊद क बंदी बनावइ बरे मनइयन क पठएस। मुला जब उ पचे डेरन मँ पहोंचेन तउ उ टेमॅ नबियन क एक टुकरी भबिस्सबाणी करत रही। समूएल नबियन क अगुअइ करत भवा हुआँ खड़ा रहा। परमेस्सर क आतिमा साऊल क दूतन प ओतरी अउर उ पचे भविस्सबाणी करइ लागेन।

²¹ साऊल इ बारे मँ सुनेस, ऍह बरे उ हुवाँ दूसर दूत पठएस। मुला उ सबइ भविस्सबाणी करइ लागेन। ऍह बरे साऊल तिसरी दाई दूत पठएस। अउर उ पचे भी भविस्सबाणी करइ लागेन। ²² आखिर मँ साऊल खुद रामा पहोंचा। साऊल सेकु मँ खरिहाने क नगिचे एक ठु बड़का कुआँ क लगे आवा। साऊल पूछेस, “समूएल अउ दाऊद कहाँ बाटेन?”

मनइयन जवाब दिहेन, “रामा क नगिचे डेरा मँ।”

²³ तबहिं साऊल रामा क नगिचे डेरा मँ गवा। परमेस्सर क आतिमा साऊल प उतरी अउर साऊल भविस्सबाणी करब सुरु किहेस। साऊल रामा क डेरा तलक लगातार भबिस्सबाणी करत गवा। ²⁴ तब साऊल आपन ओढ़ना उतारेस। इ तरह साऊल भी समूएल क समन्वा भबिस्सबाणी करत रहा। साऊल हुवाँ सारा दिन अउ सारी रात नंगा होइके ओलरा रहा।

इहइ कारण स कहतूत चल गइ कि, “का साऊल नबियन मँ स कउनो एक बाटइ?”

दाऊद अउ योनातान एक समझौता करत हीं

20 दाऊद रामा क नगिचे डेरा स पराइ गवा। दाऊद योनातान क लगे पहोंचा अउ ओसे पूछेस, “मइँ कउन सा गलती किहेउँ ह? मोर अपराध का अहइ? तोहार बाप मोका मारइ क काहे चाल चपेट करत बाटइ?”

² योनातान जवाब दिहेस, “इ फुरे नाहीं बाटइ। मोर बाप तोहका मारइ क जतन नाहीं करत अहइ। मोर बाप मोका पहिले बगैर बताए कछू नाहीं करत। इ खास बात नाहीं कि इ बात खास होइ या तुच्छ, मोर बाप हमेसा मोका बतावत हीं। मोर बाप मोका इ बतावइ स काहे इन्कार करिहीं कि उ पचे तोहका मारि डावइ चाहत हीं? नाहीं, का इ फुर नाहीं बा।”

³ मुला दाऊद जवाब दिहेस, “तोहार बाप ठीक तरह जानत बाटेन कि मइँ तोहार मीत अहउँ। तोहार बाप आपन मने मँ इ विचारे अहइँ, ‘योनातान, क इ बारे मँ जानकारी नाहीं होइ चाही। जदि उ जानी तउ दाऊद स कहि देइ।’ मुला जइसे यहोवा क होब फुरे बाटइ अउर तू जिअत बाट्या, उहइ तरह इ भी फुर अहइ कि मइँ मउत क जिआदा नगिचे अहउँ।”

⁴ योनातान दाऊद स कहेस, “मइँ उ सब कछू करब जउन तू मोसे करवावइ चाहत बाट्या।”

⁵ तबहिं दाऊद कहेस, “लखा भियान नवा चन्द्रिमा क जलसा अहइ। मोका राजा क संग भोजन करइ क अहइ। मुला मोका तीसरे साँझ ताई खेत मँ लुकाइ रहइ द्या। ⁶ अगर तोहरे बाप क इ जान ‘पड़इ कि मइँ टरि गवा हउँ तउ ओनसे कहया कि दाऊद आपन घरे बेतलेहेम जाइ चाहत रहा। ओकर परिवार इ महीना क बलि खातिर खुद न्यौता देत बाटइ। दाऊद मोसे पूछेस कि मइँ ओका बेतलेहेम जाइ अउ ओकरे परिवारे स ओका भेंटइ देउँ।’ ⁷ अगर तोहार पिता कहत बाटेन, ‘बहोतइ नीक भवा,’ तउ मइँ अच्छी तरह बचा हउँ। मुला अगर तोहार बाप कोहाइ जात हीं तउ बूझा कि मोर अनभल करइ चाहत हीं। ⁸ योनातान मोहे प दाया करा। मइँ तोहार चाकर अहउँ। तू यहोवा क समन्वा समझौता किहे अहा। अगर मइँ अपराधी अहउँ तउ तू खुद मोका मारि सकत ह। मुला मोका आपन बाप क लगे जिन लइ जा।”

⁹ योनाताना जवाब दिहेस, “नाहीं, कबहुँ नाहीं। अगर मइँ जान जाब कि मोर पिता तोहार अनभल करइ चाहत हीं तउ तोहका होसियार कइ देब।”

¹⁰ दाऊद कहेस, “अगर तोहार पिता करी होइके जवाब देत हीं तउ ओकरे बारे मँ मोका कउन बताई?”

¹¹ तबहिं योनातान कहेस, “आवा, हम पचे खेते मँ चली।” तउ योनातान अउ दाऊद एक संग खेते मँ चला गएन।

¹² योनातान दाऊद स कहेस, “मइँ इस्राएल क यहोवा परमेस्सर क समन्वा इ प्रण किहेउँ ह। मइँ प्रण करत हउँ कि मइँ तखराउब बखराउब कि मोर पिता तोहरे बरे कइसा बिचार धरत हीं। मइँ पता लगाउब कि उ तोहरे बारे मँ नीक बिचार रखत हीं कि नाहीं। तउ तीन दिना मँ मइँ तोहरे खेते मँ खबर पठउब। ¹³ अगर मोर पिता तोह पइ वार करइ चाहत हीं, तउ मइँ तोहका जानकारी देब। मइँ तोहका हिआँ स सुरच्छित जाइ प्रबंध कइ देब। यहोवा तोहका हिआँ स सुरच्छित होइके जाइ देइहीं। यहोवा मोका सजा देइँ, जदि मइँ अइसा न करउँ। यहोवा तोहरे संग रहइँ, जइसा उ मोरे पिता क संग रहेन ह। ¹⁴ जब तलक मइँ जिअत रहउँ मोरे प दाया राख्या। अउ जब मइँ मरि जाउँ तउ ¹⁵ मोरे परिवारे प दाया करब बन्द जिन कर्या। यहोवा दाऊद क सबहिं दुस्मनन क धरती स नास कइ देइहीं। ¹⁶ अगर उ समइ योनातान क परिवार दाऊद क परिवारे स अलगाइ दीन्ह जाइ क होइ, तउ ओका होइ जाइ द्या। दाऊद क दुस्मनन क यहोवा सजा देइहीं।”

¹⁷ तब योनातान दाऊद स कहेस कि उ ओकरे बरे पिरेम क प्रण क दोहराइ देइ। योनातान इ ऍह बरे किहेस काहेकि उ दाऊद स ओतना ही पिरेम करत रहा जेतना उ अपने स।

¹⁸ योनातान दाऊद स कहेस, “भियान नवा चन्द्रिमा क जलसा अहइ। तोहार आसन खाली रही। ऍह बरे मोर बाप समुझ जइहीं कि तू चला ग अहा। ¹⁹ तीसरे दिना उहइ जगह प जा जहाँ तू इ परेसानी सुरु होइ क पहिले लुकान रह्या। उ पहाड़ी क बगल मँ प्रतीच्छा करा। ²⁰ अउर मइँ इ पहाड़ी क बगल स तीन अइसा बाण छोड़ब, जइसे मइँ कउनो निसान प बाण मारत हउँ। ²¹ तब मइँ बाण क हेरइ बरे, आपन अउजार क ढोवइया लरिका स जाइ बरे कहब। जदि सब कछू नीक होइ तउ मइँ लरिका स कहब, ‘तू बहोतउ दूर निकरि गवा अहा बाण तउ मोरे लगे बाटइ। लउटा अउ ओका उठाइ लइ आवा।’ जदि मइँ अइसा कहेउँ तउ तू लुकाइ क जगह स बाहेर आइ सकत ह। मइँ बचन देत अही कि तू जइसे यहोवा हमेसा बना रहत ह वइसे तू बचा रहब्या। कउनो भी खतरा नाहीं बा। ²² मुला जदि खतरा होइ तउ मइँ लरिका स कहब। ‘बाण बहोतइ दूर बाटइ, जा अउ ओका लइ आवा।’ अगर मइँ अइसा कहेउँ तउ तोहका चला जाइ चाही। ²³ हमरे अउ आपन बीच क समझौता क सुमिरिके राखा। यहोवा हमेसा बरे गवाह बा।”

²⁴ तउ दाऊद खेते मँ लुकाइ गवा।

जेउनार मँ साऊल क इरादा

नवा चन्द्रिमा क जलसा क टेम आवा अउ राजा खइया बरे बइठा। ²⁵ राजा देवार क निचके हुवइँ बइठा जहाँ अक्सर उ बइठत रहा। योनातान साऊल क दूसरी कइँती बइठा। अब्नेर साउल क पाछे बइठा। मुला दाऊद क जगह खाली रही। ²⁶ उ दिना साऊल कछू नाहीं कहेस। उ सोचेस, “होइ सकत ह दाऊद क कछू भवा होइ अउर उ सुद्ध^[b] न होइ।”

²⁷ भियान भए, महीना क दूसर दिन, दाऊद क जगइ फुन खाली रही। तबहिं साऊल आपन पूत योनातान स पूछेस, “यिसै क पूत नवा चन्द्रिमा क जलसा मँ काल्ह या आजु काहे नाहीं आवा?”

²⁸ योनातान जवाब दिहेस, “दाऊद मोका स बेतलेहेम जाइ बरे अनुमती मांगत रहा। ²⁹ उ कहे रहा, ‘मोका जाइ द्या। मोर परिवार बेतलेहेम मँ एक बलि भेंट करत अहइ। मोर भइया हुवाँ रहइ बरे हुकुम दिहे अहइ। अब मइँ तोहार मीत अहउँ तउ मोका जाइ द्या अउ भाइयन स मिलइ द्या।’ इहइ कारण अहइ कि दाऊद राजा क मेज प नाहीं आवा अहइ।”

³⁰ साऊल योनातान प बहोतइ कोहाइ गवा। उ योनातान स कहेस, “तू एक दास अउरत क पूत अहा! मइँ जानत हउँ कि तू दाऊद क पच्छ मँ अहा। तू आपन महतारी अउ आपन बरे लज्जा क कारण अहा। ³¹ जब तलक यिसै क पूत जिअत रही तब तलक तू कबहुँ राजा नाहीं बनब्या अउर न तोहार राज्ज होइ। अब दाऊद क हमरे लगे लइ आवा। उ एक मरा मनई अहइ।”

³² योनातान आपन बाप स पूछेस, “दाऊद क काहे मारि डावा जाइ चाही? उ कउन अपराध किहे अहइ?”

³³ मुला साऊल आपन भाला योनातान प चलाएस अउर ओका मारि डावइ क जतन किहेस। ऍह बरे योनातान समुझ गवा कि मोर बाप दाऊद फुरइ मार डावइ चाहत ह। ³⁴ योनातान कोहाइ गवा अउ उ मेजिया तजि दिहेस। योनातान ऍतना घबराइ गवा अउ आपन बाप प कोहान कि जेउनार क दूसर दिन कछू भी खाइ स मना कइ दिहस। योनातान ऍह बरे कोहान काहेकी साऊल ओका बेज्जत किहे रहा अउ साऊल दाऊद क मारि डावइ चाहत रहा।

दाऊद अउ योनातान क बिदा होब

³⁵ दूसर दिन भिन्सारे योनातान खेते मँ गवा। उ दाऊद स भेंटइ गवा, जइसा उ पचे राजी भ रहेन। योनातान एक अउजार क ढोवइया लरिका क आपन साथ लइ आवा। ³⁶ योनातान लरिका स कहेस, “धावा अउर जउन बाण मइँ चलावत अहउँ, ओनका लइ आवा।” लरिका धाउब सुरु किहेस अउ योनातान ओकरे मूँड़े क ऊपर स बाण चलाएस। ³⁷ लरिका उ ठउरे क धावत जहाँ बाण गिरत रहा। मुला योनातान गोहराएस, “बाण तोहसे बहोतइ दूर बाटइ।” ³⁸ तब योनातान बोलाइ, “हाली करा। ओनका लइ आवा, हुआँ खड़ा जिन रहा!” लरिका बाणन क उठाएस अउ आपन मालिक क लगे वापस लइ आवा। ³⁹ लरिका क कछू पता नाहीं लाग कि का भवा। सिरिफ योनातान अउ दाऊद जान लिहन। ⁴⁰ योनातान आपन धनुस बाण लरिका क दिहस। तबहिं योनातान लरिका स कहेस, “सहर मँ लउटि आवा।”

⁴¹ लरिका वपिस चला गवा। दाऊद आपन उ लुकाइ क ठउर स बाहेर आवा जउन पहाड़ी क दूसर कइँती रहा। दाऊद आपन मूँड़ि क भुइँया तलक निहुराई कइ प्रणाम किहस। दाऊद तीन दाई निहुरा। तब दाऊद अउ योनातान एक दूसरे क चूमेन। उ दुइनउँ एक संग रोएन, मुला दाऊद योनातान स जिआदा रोएस।

⁴² योनातान दाऊद स कहेस, “सान्ति स जा। हम पचे यहोवा क नाउँ लइके मीत होइके प्रण किहे रहे। हम पचे कहे रहे कि यहोवा हम पचन अउ हमरे सन्तानन क बीच हमेसा गवाह रइहीं।”