Beginning

9  Ángel na jnda̱ ˈom tjo̱o̱ⁿˈo̱ⁿ ntu ˈnaaⁿˈaⁿ. Quia joˈ ntyˈiaya cwii caxjuu na jnaⁿ tsjo̱ˈluee, tiooñê tsjoomnancue. Ndoˈ caxjuuˈñeeⁿ tquiaa Tyˈo̱o̱tsˈom tsˈo̱wˈaa nnoom cwentaaˈ cwii tsueˈ na tjaa yuu ntycwii na njoom. ² Seicanaaⁿñê ˈndyoo tsueˈñeeⁿ. Quia joˈ jluiˈ ndioom joˈ joˈ chaˈcwijom ndioom na cwicaluiˈ ntomˈ tˈmaⁿ. Ndoˈ ncˈe na jeeⁿ ˈaa ndioomˈñeeⁿ, seijaaⁿñenaˈ tsjoomnancue hasta tatquiooˈ na mantyˈiaaˈ ñeˈquioomˈ. ³ Naquiiˈ ndioomˈñeeⁿ jnaⁿˈndye jndye calcaa. Tyˈentyjayoˈ nnom tsjoomnancue. Toˈñoomyoˈ na wjeeyoˈ chaˈna wˈii catsjo̱. ⁴ Ndoˈ Tyˈo̱o̱tsˈom tînquiaaⁿ na wanaaⁿ na nlcwaˈyoˈ jnda̱ na niom nnom tsjoomnancue, meiⁿ tsco jnda̱a̱, meiⁿ tsco nˈoom. Macanda̱ wanaaⁿ na nntaˈwiˈyoˈ joo nnˈaⁿ na tîcañoom sa̱yo ˈnaaⁿˈaⁿ cantaana. ⁵ Toˈñoomyoˈ ñˈoom na chaˈwaa ˈom chiˈ wanaaⁿ na nlˈayoˈ na nlquiinaˈ naⁿˈñeeⁿ chaˈna maquiinaˈ tsˈaⁿ quia na tcoˈ catsjo̱. Sa̱a̱ ticwanaaⁿ na nlaˈcwjeeyoˈ naⁿˈñeeⁿ. ⁶ Ncueeˈñeeⁿ yocheⁿ na wiˈ cwitjoomna nlˈueeˈndye cheⁿnquieena na cwjetona, sa̱a̱ xocaliuna chiuu ya nlˈana. Nncˈomna na queeⁿ nˈomna na ñeˈcwjena, sa̱a̱ xocaliuna chiuu ya na nncwjena.

⁷ Calcaaˈñeeⁿ matseijomnaˈ jooyoˈ chaˈcwijom catso na mˈaⁿcˈeeyoˈ na nncˈooyoˈ ntiaˈ. Nqueⁿyoˈ ñjom chaˈcwijom corona na tuiinaˈ sˈom cajaⁿ ndoˈ nda̱a̱yoˈ matseijomnaˈ chaˈcwijom nnom tsˈaⁿ. ⁸ Ndoˈ soonqueⁿyoˈ chaˈcwijom soonqueⁿ yolcu, ndoˈ ndeiˈnˈomyoˈ chaˈcwijom ndeiˈnˈom liom. ⁹ Tsuaayoˈ chaˈcwijom ñˈeⁿ xjo tuiinaˈ. Jeeⁿ cˈuaa lquiiyoˈ chaˈcwijom cˈuaa ndyuee tornom quia na jndeii ˈoontyjaandye catso na cwiˈooyoˈ tiaˈ. ¹⁰ Ndoˈ nˈaaⁿ calcaaˈñeeⁿ matseijomnaˈ chaˈna nˈaaⁿ caljo̱, ee mati jeeⁿ wjee ndaa xioomyoˈ. Ndoˈ chaˈwaa na ˈom chiˈ wanaaⁿ na nntaˈyoˈ xioomyoˈ nnˈaⁿ. ¹¹ Mˈaaⁿ cwii ángel na matsa̱ˈntjoom calcaaˈñeeⁿ. Jom tseixmaaⁿ na machˈeeⁿ cwenta tsueˈ na tjaa yuu ntycwii na njoom. Jom jñoom Abadón ñequio ñˈoom hebreo ndoˈ ñˈoom griego Apolión. Maˈmo̱ⁿ xueⁿˈeⁿ tsaⁿ na matseicwjee nnˈaⁿ.

¹² Jnda̱ teinom na tcoˈnaˈ ntyˈiaya cwii nawiˈ na quia nntjoom nnˈaⁿ. Sa̱a̱ cantyˈiaˈ, ndicwaⁿ waa we nawiˈ na quia nncueˈntyjo̱.

¹³ Ángel na jnda̱ yom tjo̱o̱ⁿˈo̱ⁿ ntu ˈnaaⁿˈaⁿ, quia joˈ quiiˈntaaⁿ ñequiee nqui nomtsˈom na tuiinaˈ ñˈeⁿ sˈom cajaⁿ na meiⁿntyjeeˈnaˈ jo nnom Tyˈo̱o̱tsˈom, jndiiya na teicˈuaa seineiⁿ. ¹⁴ Tso nnom ángel na jnda̱ yom na maleiñˈoom ntu:

—Cjaˈtseicanaⁿˈ joo ñequiee ángeles na chuˈtyeⁿndye na mˈaⁿ joo jndaa tˈmaⁿ Eufrates.

¹⁵ Quia joˈ tjatseicanaaⁿˈaⁿ ángelesˈñeeⁿ na cˈoolaˈcwjeena nnˈaⁿ chaˈwaa tsjoomnancue. Manndyooˈ chaˈna xcwe nnˈaⁿ tsjoomnancue nlaˈcwjeena. Ee ángelesˈñeeⁿ majndaaˈ na mˈaⁿcˈeendyena na nlˈana tsˈiaaⁿˈñeeⁿ chuwaa, ndoˈ chiˈwaa, ndoˈ xueewaa, ndoˈ horawaa. ¹⁶ Ndoˈ jndiiya cantyja ˈnaaⁿ sondaro ˈnaaⁿna, na ntyjondye catso, tueˈntyjo̱ chaˈna ntquiuu meiⁿ ndiiˈ na nqui nqui meiⁿndyena.

¹⁷ Luaaˈ waa na tcoˈnaˈ no̱o̱ⁿ na ntyˈiaya catsoˈñeeⁿ ñequio sondaro na ntyjondye jooyoˈ. Naⁿˈñeeⁿ cweeˈna ncjo candyaana na mawañoomˈnaˈ joona na tilquieeˈndyena. Ndoˈ ncjoˈñeeⁿ chonaˈ colo wee ñequio colo tsa̱, ñequio colo cajaⁿ. Ndoˈ matseijomnaˈ nqueⁿ catsoˈñeeⁿ chaˈna nqueⁿ liom. Ndoˈ naquiiˈ ndyueeyoˈ cwicaluiˈ chom ñequio ndioom ñequio sufra̱. ¹⁸ Ñequio ndyee nnom nawiˈñeeⁿ na jluiˈ quiiˈ ndyueeyoˈ, chom ñequio ndioom ñequio sufra̱, joˈ na tja̱ manndyooˈ xcwe nnˈaⁿ na mˈaⁿ tsjoomnancue. ¹⁹ Catsoˈñeeⁿ we ndiiˈ waa na jnda̱yoˈ na cwitaˈwiˈyoˈ nnˈaⁿ, naquiiˈ ndyueeyoˈ ndoˈ nˈaaⁿyoˈ. Ee yuu na tjacantycwii nˈaaⁿyoˈ joˈ ntyjoo nqueⁿ canduu. Ndoˈ canduuˈñeeⁿ nioom tyotquiiyoˈ nnˈaⁿ.

²⁰ Sa̱a̱ nnˈaⁿ na ˈndiinaˈ na tîcwje ñequio nawiˈmeiⁿˈ, tîcalcweˈ nˈomna. Tîcaˈndyena natia na cwilˈana, meiⁿ tîcˈoomeintyjeeˈna na cwilaˈtˈmaaⁿˈndyena naⁿjndii ñequio ˈnaⁿ na cweˈ nnˈaⁿ nlˈa na tuii ñˈeⁿ sˈom cajaⁿ, ñˈeⁿ sˈom xuee, ñˈeⁿ sˈom wee, ñˈeⁿ ljo̱ˈ, ndoˈ ñˈeⁿ nˈoom. ˈNaⁿmeiⁿˈ tileiˈcantyˈiaanaˈ, meiⁿ na nndyenaˈ, nmeiⁿ na nncˈoocaˈnaˈ. ²¹ Ndoˈ tîcalcweˈ nˈomna na cwilaˈcwjeena ncˈiaana. Meiⁿ tîcaˈndyena cantyja na cwilaˈcaluaˈndyena, meiⁿ cantyja na cweˈ cwimˈaⁿyana ñˈeⁿ ncˈiaana, meiⁿ cantyja na cwintyˈueena ˈnaⁿ.

Ángel na maleiñˈoom cwii libro chjoo

10  Quia joˈ ntyˈiaya cwiicheⁿ ángel na waa najndeii na tseixmaⁿ. Jndyocueeⁿ na jnaaⁿ cañoomˈluee. Chaˈwaañê wandiˈ nchquiu ndoˈ ntyjatyˈio catsuu tsoomˈnaⁿˈ jo tsˈom xqueeⁿ. Caxuee nnoom chaˈcwijom ñeˈquioomˈ, ndoˈ ncˈeeⁿ chaˈcwijom ntsaachom na teincoo. ² Cwii tsˈo̱o̱ⁿ ndiiˈ libro chjoo na jnda̱ nˈmeiiⁿˈ. Tcoomˈm xˈeeⁿ ntyjaya nnom ndaaluee, ndoˈ xˈeeⁿ ntyjatymaaⁿˈ nnom tyuaatcwii. ³ Jndeii seixuaⁿ chaˈna matseixuaa liom. Quia na jnda̱ seixuaⁿ, quia joˈ teicˈuaa ndyuee ntquieeˈ ntsuee. ⁴ Quia na jnda̱ teicheⁿ ndyuee ntquieeˈ ntsueeˈñeeⁿ, quia joˈ seijndaaˈndyo̱ na nntseiljeiya ñˈoom na jluena, sa̱a̱ jndiiya cwii jndyee na teicˈuaa cañoomˈluee. Matso:

—Ñˈoom na jndiˈ na jlue ntquieeˈ ntsueeˈñeeⁿ cwantyˈiuuˈndyuˈ joonaˈ, tintseiljeiˈ.

⁵ Ndoˈ juu ángel na ntyˈiaya na meintyjeeˈ nnom ndaaluee ndoˈ nnom tyuaatcwii, seiweeⁿ tsˈo̱o̱ⁿ ntyjaya jo cañoomˈluee. ⁶ Tyeⁿ ñˈoom tjoomˈm na cjoomˈm na malcweeⁿˈeⁿ xueeˈ Tyˈo̱o̱tsˈom na tjaa yuu ntycwii na wandoˈ, nqueⁿ na sˈaaⁿ cañoomˈluee ñequio tsjoomnancue ñequio ndaaluee ñequio chaˈtso nnom na niom joˈ joˈ. Luaa ñˈoomtyeⁿ na seineiiⁿ, tsoom:

—Taxocwindooˈti Tyˈo̱o̱tsˈom. ⁷ Ee jnda̱ tueˈntyjo̱ xjeⁿ na juu ángel na jnda̱ ntquieeˈ nncjo̱o̱ⁿˈo̱ⁿ ntu ˈnaaⁿˈaⁿ. Xjeⁿˈñeeⁿ matseicanda̱a̱ˈñenaˈ ñˈoom na ntyjii nquii Tyˈo̱o̱tsˈom. Majuu ñˈoomˈñeeⁿ na jnda̱ tqueⁿtyeeⁿ nda̱a̱ nquiee profetas na cwindyeˈntjomtyeⁿ nnoom.

⁸ Quia joˈ juu na jndiiya na seineiⁿ cañoomˈluee, seineiⁿnndaˈ no̱o̱ⁿ. Matso:

—Cjaˈcoˈñomˈ libro chjoo na meinˈmeiiⁿˈ na ndiiˈnaˈ tsˈo̱ ángel na meintyjeeˈ nnom ndaaluee ñequio nnom tyuaa.

⁹ Joˈ chii tjo̱ntyjaaˈa ángelˈñeeⁿ, tsjo̱o̱ nnoom na nñequiaaⁿ libro chjooˈñeeⁿ no̱o̱ⁿ. Tsoom no̱o̱ⁿ:

—Luaa libro. Quiˈñomˈ, cwaˈ juunaˈ. Nntsˈaanaˈ na jeeⁿ chi quiiˈ ˈndyoˈ chaˈcwijom tsiomˈ cantyˈi sa̱a̱ tsˈom tsiaˈ nntsˈaanaˈ na jeeⁿ ja.

¹⁰ Quia joˈ toˈño̱ⁿ libro chjooˈñeeⁿ na ndiiˈ tsˈo̱ ángel, ndoˈ tcwaaˈa juunaˈ. Ndoˈ quiiˈ ˈndyo̱ sˈaanaˈ na chi ntyjii chaˈcwijom tsiomˈ cantyˈi sa̱a̱ tsˈom tsia jeeⁿ ja sˈaanaˈ. ¹¹ Quia joˈ tso ángelˈñeeⁿ no̱o̱ⁿ:

—Maxjeⁿ macaⁿnaˈ na cwiicheⁿ cwii ndiiˈ nntseineiⁿˈ ñˈoom na maˈmo̱ⁿ Tyˈo̱o̱tsˈom njomˈ. Nñequiaaˈ ñˈoom chiuu nntjoom nnˈaⁿ jndye ndyuaa, ndoˈ ñequio jndye nnom ñˈoom na cwilaˈneiⁿna ndoˈ nda̱a̱ nnˈaⁿ na cwiluitquiendye nda̱a̱na.

We nnˈaⁿ na cwitjeiˈyuuˈndye

11  Quia joˈ toˈño̱ⁿ cwii tsmaaⁿ, chaˈcwijom tsˈoomxjeⁿ juunaˈ. Ndoˈ tso ángel no̱o̱ⁿ:

—Quicantyjaˈ, cwjiˈ xjeⁿ watsˈom cwentaaˈ Tyˈo̱o̱tsˈom ñequio nomtsˈom. Ndoˈ quinchoˈ chaˈtsondye nnˈaⁿ na cwilaˈtˈmaaⁿˈndye jom joˈ joˈ. ² Quia macwjiˈ xjeⁿ watsˈom, tincwjiˈ xjeⁿ tachˈeeⁿˈnaˈ. Ee jnda̱ tquiaya na chaˈwaa wenˈaaⁿ nchooˈ we chiˈ na joo nnˈaⁿ na nchii judíos wanaaⁿ na ñequioquieˈna joˈ joˈ. Ndoˈ nlqueⁿna xjeⁿ ˈnaaⁿna tsjoom cwentaya na ljuˈ cwiluiiñenaˈ yuu na meintyjeeˈ watsˈomˈñeeⁿ. ³ Mˈaⁿ we nnˈaⁿ ˈnaⁿya na cwitjeiˈyuuˈndye cantyja ˈnaⁿya. Joona nlqua̱a̱ⁿya na nñeˈquiana ñˈoom nda̱a̱ nnˈaⁿ cwii meiⁿ xuee waljooˈ we siaⁿnto waljooˈ ndyeenˈaaⁿ xuee. Ndoˈ nlcweeˈna liaa ntom na cwantindyo.

⁴ Wendye joona meintyjeeˈtyeⁿna jo nnom nquii Ta Tyˈo̱o̱tsˈom na matsa̱ˈntjom chaˈwaa tsjoomnancue. Cwiluiindyena we nˈoom olivos ñequio we ˈnaⁿ na cwicañjoomˈ nlca. ⁵ Ndoˈ xeⁿ mˈaaⁿ ˈñeeⁿ juu na ñecatsˈaa nata̱ˈ wendye naⁿˈñeeⁿ, quia joˈ nluiˈ chom ndyueena na nlcoñe tsaⁿˈñeeⁿ. Meiⁿcwiˈñeeⁿcheⁿ tsˈaⁿ na ñeˈcatsˈaa nata̱ˈ joona, majndaaˈ na laaˈtiˈ nncueˈ. ⁶ Wendye joona nñequiaa Tyˈo̱o̱tsˈom na nlaˈxmaⁿna najnda̱na na nlaˈcata̱ˈna tsjo̱ˈluee cha tincuaˈ chaˈtsoti xuee na cwiñequiana ñˈoom ˈnaaⁿˈaⁿ. Ndoˈ mati nñequiaaⁿ najndeii na nlaˈxmaⁿna na nlaˈcwaqueⁿna ndaatioo na nntsˈaanaˈ niomˈ. Ndoˈ cwanti ndiiˈ na lˈue nˈomna nnda̱a̱ nlaˈquioona meiⁿnquia nnom nawiˈ nacjoo nnˈaⁿ tsjoomnancue. ⁷ Quia na jnda̱ jnda̱a̱ˈ na cwitjeiˈyuuˈndyena, quia joˈ juu quiooˈ jndii na mˈaaⁿyoˈ tsˈom tsueˈ na tjaa yuu ntycwii na njoom, nluiˈyoˈ nntsˈaayoˈ tiaˈ nacjoo wendye naⁿˈñeeⁿ. Nnaⁿñeyoˈ ñˈeⁿndyena ndoˈ nntseicwjeeyoˈ joona. ⁸ Ndoˈ seiˈtsˈo ˈnaaⁿna nncwindyuaanaˈ tsˈom nataa naquiiˈ tsjoom tˈmaⁿ yuu na tyˈioom nnˈaⁿ nquii Ta Jesucristo cwentaaya nacjooˈ tsˈoomˈnaaⁿ. Ndoˈ ñequio ñˈoom na cweˈ tjañoomˈ matseicajndyuyanaˈ tsjoom tˈmaⁿˈñeeⁿ Sodoma ñequio Egipto. ⁹ Ndyee xuee waljooˈ xcwe nncwindyuaa seiˈtsˈo ˈnaaⁿna joˈ joˈ. Ndoˈ nnˈaⁿ na ticwii cwii nnom na tjachuiiˈndye, ñequio nnˈaⁿ na laˈxmaⁿ cwii cwii tmaaⁿˈndye, ñequio nnˈaⁿ na cwichuiiˈ ñˈoom na cwilaˈneiⁿ, ñequio nnˈaⁿ na nnaⁿ ticwii cwii tsjoomnancue, nntyˈiaana seiˈtsˈo ˈnaaⁿ naⁿˈñeeⁿ, sa̱a̱ tixonquiana na nncjaacantˈiuuˈndye naⁿˈñeeⁿ. ¹⁰ Nnˈaⁿ tsjoomnancue nlaˈneiiⁿˈndyena quia na jnda̱ tja̱ wendye naⁿˈñeeⁿ. Nntsˈaanaˈ na jeeⁿ ya nquiuna hasta nlˈana naya ncˈiaana. Ee jeeⁿ tyocoˈwiˈnaˈ joona nquiuna cantyja ˈnaaⁿˈ ñˈoom na ñetjeiˈyuuˈndye wendye naⁿˈñeeⁿ na jnda̱ tja̱. ¹¹ Sa̱a̱ quia jnda̱ jnda̱a̱ˈ ndyee xuee waljooˈ xcwe na nncwindyuaa seiˈtsˈo ˈnaaⁿ naⁿˈñeeⁿ, quia joˈ nñequiaa Tyˈo̱o̱tsˈom na nnquioonndaˈ jndyeena, nntaˈndoˈnndaˈna. Mantyja nncwintyjeeˈyuna ndoˈ jeeⁿ ndyaˈ nntyue nnˈaⁿ na nntyˈiaa na ljoˈ nluii. ¹² Quia joˈ wendyena nndyena na nleicˈuaa jndeii cañoomˈluee. Nntsoom:

—Quioˈwaˈyoˈ ñjaaⁿ.

Quia joˈ nncˈoowana cañoomˈluee ñˈeⁿ cwii nchquiu ñequio na jndooˈ joo nnˈaⁿ na ñelˈawiˈ ñˈeⁿndye joona. ¹³ Ndoˈ majoˈto xjeⁿˈñeeⁿ jndeii nntsˈeii. Quiiˈntaaⁿ qui wario na tseixmaⁿ tsjoom tˈmaⁿˈñeeⁿ, nntseityuiiˈnaˈ cwiinaˈ. Ndoˈ ntquieeˈ meiⁿ nnˈaⁿ nncwje cantyja na nntsˈeii. Ndoˈ nnˈaⁿ na cwinˈndiinaˈ, nlaˈcatyuendyena, nnto̱ˈna na nlcwiiˈna Tyˈo̱o̱tsˈom na mˈaaⁿ cañoomˈluee.

¹⁴ Juu nawiˈ na jnda̱ we, jnda̱ teinomnaˈ. Cantyˈiaˈ, manncueˈntyjo̱ nawiˈ na jnda̱ ndyee.

Ntu na jnda̱ ntquieeˈ

¹⁶ Ndoˈ joo ntquiuu nchooˈ ñequiee nnˈaⁿ na cwiluiitquiendye na meindyuaandye ntio ndiocheⁿ nacañoomˈ Tyˈo̱o̱tsˈom, tyˈetaˈnquiona, tyeⁿnquiuuna nomtyuaa na tyolaˈtˈmaaⁿˈndyena jom. ¹⁷ Tyoluena:

¹⁹ Jnda̱ joˈ juu watsˈom cwentaaˈ Tyˈo̱o̱tsˈom na waanaˈ cañoomˈluee, jnaaⁿnaˈ. Ndoˈ joˈ joˈ ntyˈiaya juu castom na ñjom ñˈoom na seityeⁿtyeeⁿ nda̱a̱ nnˈaⁿ Israel. Quia joˈ jnaaⁿ chomntsuee ndoˈ teicˈuaa na tyolaˈxuaanaˈ, tyotsˈeii, ndoˈ jndeii tuaˈtsaaⁿ.

Yuscu ñequio catsoomjndii wee

12  Quia joˈ teitquiooˈ cwii ˈnaaⁿ tˈmaⁿ tsjo̱ˈluee na maˈmo̱ⁿnaˈ chiuu cwinluii. Ntyˈiaya cwii yuscu cweⁿ ñeˈquioomˈ chaˈcwijom liaⁿˈaⁿ. Meintyjeeⁿˈeⁿ nacjooˈ chiˈ ndoˈ ñjom cwii corona xqueeⁿ na chuuˈ canchooˈwe cancjuu. ² Ndoˈ jndeiiñê. Tyotseixuaⁿ na maquiinaˈ jom, ee manntseincueⁿ. ³ Jnda̱ chii teitquiooˈti cwiicheⁿ ˈnaaⁿ tsjo̱ˈluee. Ntyˈiaya cwii catsoomjndii na tˈmaaⁿñe ndoˈ weeñe chaˈna chom. Juuyoˈ niom ntquieeˈ xqueⁿyoˈ, ndoˈ nqui ndeiˈjndyeeˈyoˈ. Ndoˈ chaˈtso na ntquieeˈ xqueⁿyoˈ, joˈ ñjom cwii cwii corona. ⁴ Quia tmeiiⁿˈñeyoˈ tsˈaaⁿyoˈ manndyooˈ chaˈna xcwe cancjuu na ntyja tsjo̱ˈluee teiˈcaljoonaˈ, tquiaandye cancjuuˈñeeⁿ nomtyuaa. Ndoˈ juu catsoomjndiiˈñeeⁿ tjameintyjeeˈyoˈ jo nnom yuscuˈñeeⁿ na mawaa xjeⁿ na nntseincuii cha mantyjacheⁿ nlquiiyoˈ jnda xeⁿ jnda̱ tuiiñe. ⁵ Quia joˈ seincuii yuscuˈñeeⁿ yuˈndaa na tsaⁿsˈa. Jnda̱ tqueⁿ Tyˈo̱o̱tsˈom yuˈndaaˈñeeⁿ na nluiitˈmaⁿñe, ndoˈ jndeii ñˈoom na nntsa̱ˈntjom chaˈtso nnˈaⁿ njoomnancue. Ndoˈ tjeiˈnaˈ juu quiiˈlˈo̱ yuscuˈñeeⁿ. Tjañˈoom Tyˈo̱o̱tsˈom juu yuu waa tio ˈnaaⁿˈaⁿ. ⁶ Ndoˈ juu yuscuˈñeeⁿ tjaleinoom cwii joo yuu na nncwañoomˈnaˈ juu yuu na jnda̱ seijndaaˈñe Tyˈo̱o̱tsˈom na nljooˈñê. Joˈ joˈ mˈaⁿ nnˈaⁿ na nnteixˈeena jom cwii meiⁿ waljooˈ we siaⁿnto waljooˈ ndyeenˈaaⁿ xuee.

⁷ Quia joˈ jnaⁿ tiaˈ cañoomˈluee. Juu Miguel ñequio ángeles ˈnaaⁿˈaⁿ tyolˈana tiaˈ nacjooˈ catsoomjndii. Ndoˈ catsoomjndiiˈñeeⁿ ñequio naⁿjndii ˈnaaⁿˈaⁿ tyolaˈjnda̱na, tyolˈana tiaˈ ñˈeⁿ joo ángelesˈñeeⁿ. ⁸ Sa̱a̱ tîcanajnda̱na ndoˈ tacwanaaⁿ na nljooˈndyena cañoomˈluee. ⁹ Joˈ chii tjeiiˈna jom. Jlaˈcwatyuˈna jom cañoomˈluee, tiooñê tsjoomnancuecheⁿ. Mati jlaˈquiaana ángeles tia ñˈeⁿñê. Ee cantyjati na jnaⁿjndyeenaˈ matseicajndyunaˈ jom catsuu tquiee, tsaⁿjndii ndoˈ Satanás. Majom na manquiuˈnnˈaaⁿ chaˈtso nnˈaⁿ tsjoomnancue.

¹⁰ Quia joˈ jndiiya na teicˈuaa cwii jndyee jndeii cañoomˈluee. Matsonaˈ:

—Jeˈ jeˈ yuuˈ, juu na macwjiˈnˈmaaⁿñe Tyˈo̱o̱tsˈom nnˈaⁿ, jnda̱ mamatseicanda̱a̱ˈñenaˈ, ndoˈ maˈmo̱o̱ⁿ juu najndeii na matseixmaaⁿ. Jnda̱ tueˈntyjo̱ na macanda̱ jom matsa̱ˈntjoom ndoˈ mati cwiluiitquieñe Jnaaⁿ Cristo. Ee juu naxuee ndoˈ natsjom mañequiaa jnaaⁿ nnˈaaⁿya jo nnom Tyˈo̱o̱ˈtsˈoomya, jnda̱ jlaˈcwatyuˈna juu. Manquiiti na tyoñequiaa jnaaⁿ nnˈaaⁿya. ¹¹ Sa̱a̱ joona jnda̱ jnaⁿndyena ñˈeⁿ tsaⁿjndiiˈñeeⁿ ncˈe nioomˈ Catsmaⁿ ndoˈ ncˈe ñˈoom na tjeiˈyuuˈndyena cantyja ˈnaaⁿˈaⁿ nda̱a̱ nnˈaⁿ. Ee joona tyomˈaⁿna na ticajnda nquiuna meiiⁿ cwjena cantyja na cwitjeiˈyuuˈndyena. ¹² Ncˈe na luaaˈ waa, cˈomˈyoˈ na neiⁿˈyoˈ chaˈtsondyoˈ na mˈaⁿˈyoˈ cañoomˈluee. Sa̱a̱ jeeⁿ ntyˈiaaˈndyoˈ ˈo nnˈaⁿ na mˈaⁿˈyoˈ tsjoomnancue ñequio ˈo na mˈaⁿˈyoˈ ndaaluee, ee juu tsaⁿjndii jnda̱ tiooñê na mˈaⁿˈyoˈ na jeeⁿcheⁿ ndyaˈ wˈeeⁿ. Ee ntyjeeⁿ na jnda̱ teitsio̱o̱ˈ mˈaaⁿnaˈ cantyja ˈnaaⁿˈaⁿ.

¹³ Ndoˈ quia na ljeii catsoomjndiiˈñeeⁿ na jnda̱ tueeˈna jom nnom tsjoomnancue quia joˈ tyontyjo̱o̱ⁿ yuscu na seincuii tyochjoo na tsaⁿsˈa. ¹⁴ Sa̱a̱ tquiaa Tyˈo̱o̱tsˈom we ntsquii cachi tˈmaaⁿ nnom yuscuˈñeeⁿ cha nnda̱a̱ nncuaaⁿ na nleinoom catsuujndiiˈñeeⁿ. Joˈ chii tjaaⁿ yuu na nncwañoomˈnaˈ jom yuu na taxonda̱a̱ nntsˈaa catsuu tquieeˈñeeⁿ nata̱ˈ jom. Joˈ joˈ nnteiˈxˈee Tyˈo̱o̱tsˈom jom ndyee chu waljooˈ xcwe. ¹⁵ Ndoˈ juu catsuu tquieeˈñeeⁿ ñequio ˈñom tyojoomˈm ndaa jo naxeⁿˈ yuscuˈñeeⁿ. Sˈaanaˈ chaˈjom cwii jndaa, cha nncjaawjaañe yuscuˈñeeⁿ. ¹⁶ Sa̱a̱ teijndeii tyuaa yuscuˈñeeⁿ ee seintquiooñenaˈ ˈndyoonaˈ ndoˈ tˈuunaˈ jndaaˈñeeⁿ na tjuˈ catsoomjndii ñequio ˈñom. ¹⁷ Joˈ chii jeeⁿ tˈmaⁿ seiwˈii catsoomjndii yuscuˈñeeⁿ. Tjaaⁿ, tjacatsˈaaⁿ tiaˈ nacjoo chaˈtso nnˈaⁿ tsjaaⁿ yuscuˈñeeⁿ na cwilaˈcanda̱ ñˈoom na matsa̱ˈntjom Tyˈo̱o̱tsˈom ndoˈ na ticaˈndye na cwitjeiˈyuuˈndye cantyja ˈnaaⁿˈ Jesucristo.