Beginning

Li rakoc a̱tin saˈ xbe̱neb laj coˈbe̱t ut laj yumbe̱t

5  Yalak bar x‑abiman resil nak cuan li joˈ ma̱joˈil naˈleb saˈ e̱ya̱nk xban nak jun li cui̱nk quixmakˈ rixakil lix yucuaˈ. Cˈajoˈ xyibal ru li yo̱queb chixba̱nunquil saˈ e̱ya̱nk. Eb li ma̱cuaˈeb aj pa̱banel incˈaˈ nequeˈxba̱nu chi joˈcan. ¿Ma tojaˈ ta chic la̱ex texba̱nu̱nk re chi joˈcan? ² La̱ex nequekˈetkˈeti e̱rib ut toj cuan li ma̱c saˈ e̱ya̱nk. Narahoˈ raj e̱chˈo̱l ut nayotˈeˈ raj e̱chˈo̱l xban xyibal ru li ma̱c li yo̱ xba̱nunquil saˈ e̱ya̱nk. Li ani xma̱cob chi joˈcan xerisi raj saˈ e̱ya̱nk. ³ Usta najt cuanquin e̱riqˈuin junelic yo̱quin che̱cˈoxlanquil. La̱in ninnau nak li cui̱nk aˈan cuan xma̱c. Usta ma̱ anihin chak e̱riqˈuin, abanan li Cristo quixcˈut chicuu nak li jun aˈan cuan xma̱c ut tento nak tixtoj rix lix ma̱c. ⁴ Kˈaxal us raj nak te̱chˈutub e̱rib saˈ xcˈabaˈ li Jesucristo ut te̱cˈu̱b cˈaˈru te̱ba̱nu chirix aˈan. Chanchan nak cua̱nkin e̱riqˈuin xban nak yo̱quin chi tijoc che̱rix. Ut lix nimal xcuanquil li Jesucristo chicua̱nk e̱riqˈuin ut chextenkˈa. ⁵ Isihomak li cui̱nk aˈan saˈ e̱ya̱nk. Nak cua̱nk chic saˈ rukˈ laj tza tixcˈul li raylal ut riqˈuin li raylal tixcˈul, tixcanab taxak xba̱nunquil li ma̱usilal re nak naru ta̱colekˈ nak tol‑e̱lk cuiˈchic li Jesucristo. ⁶ Me̱nimobresi e̱rib riqˈuin xcˈoxlanquil nak us yo̱quex chixba̱nunquil. La̱ex nequexinjuntakˈe̱ta riqˈuin xkˈemal li caxlan cua. La̱ex nequenau nak usta caˈchˈin ajcuiˈ lix chˈamal naqˈueman, naxchˈamobresi chixjunil li kˈem. Naraj naxye nak incˈaˈ naru nacuan li ma̱c saˈ xya̱nkeb laj pa̱banel re nak incˈaˈ teˈxcˈam xbeheb li jun chˈo̱l chic chi ma̱cobc. ⁷ Canabomak chi junaj cua li najteril naˈleb re nak ma̱cˈaˈak chic li ma̱c e̱riqˈuin. Chanchanakex chic lix kˈemal li caxlan cua ma̱cˈaˈ xchˈamal xban nak li Jesucristo quirisi le̱ ma̱c. Eb laj judío queˈxmayeja li carner re xjulticanquil li pascua ut joˈcan ajcuiˈ li Jesucristo aˈan lix carner li Dios li quixmayeja rib re risinquil li kama̱c. ⁸ Joˈcan nak chikacanabak li najter naˈleb li naqˈuehoc ke chi ma̱cobc. Li najter naˈleb aˈan chanchan lix chˈamal li caxlan cua. Ut la̱o chanchanako li xkˈemal li caxlan cua ma̱cˈaˈ xchˈamal. Naraj naxye nak ti̱cak chic li kachˈo̱l ut tzˈakal re ru li kayuˈam. ⁹ Saˈ li hu li quintzˈi̱ba e̱riqˈuin junxil, la̱in xinye e̱re nak incˈaˈ te̱junaji e̱rib riqˈuineb laj coˈbe̱t ut laj yumbe̱t. ¹⁰ Nak xinye e̱re chi joˈcan moco yo̱quin ta chi a̱tinac chirixeb laj coˈbe̱t ut laj yumbe̱t li toj ma̱jiˈ nequeˈpa̱ban. Yo̱quin ban chi a̱tinac chirixeb li nequeˈxye rib nak aj pa̱baneleb ut toj nequeˈxra ru biomal ut nequeˈelkˈac ut toj nequeˈlokˈonin jalanil dios. Cui ta xinye e̱re nak incˈaˈ texcua̱nk saˈ xya̱nkeb li toj ma̱jiˈ nequeˈpa̱ban, incˈaˈ raj naru texcua̱nk saˈ ruchichˈochˈ. ¹¹ Li cˈaˈru xinye, aˈan chirixeb li nequeˈxye rib nak aj pa̱baneleb ut yo̱queb chixba̱nunquil li moco uxc ta naraj. Ma̱re naxye rib nak aj pa̱banel ut aˈan aj yumbe̱t ut aj coˈbe̱t malaj aj rahol ru biomal. Ma̱re nalokˈonin jalanil dios, malaj aj hobonel. Ma̱re aj calajenak malaj aj e̱lkˈ. Incˈaˈ texcua̱nk saˈ xya̱nkeb aˈan chi moco texcuaˈak rochbeneb. ¹² Ma̱cuaˈ la̱in tinrakok a̱tin saˈ xbe̱neb li toj ma̱jiˈ nequeˈpa̱ban. Aˈ li Dios, aˈan li ta̱rakok a̱tin saˈ xbe̱neb. ¹³ Abanan la̱o torakok a̱tin saˈ xbe̱neb li kech aj pa̱banelil li yo̱queb chi ma̱cobc saˈ kaya̱nk. Joˈcan nak tento te̱risi saˈ e̱ya̱nk li cui̱nk aˈan li yo̱ chi ma̱cobc.

Me̱cˈameb le̱ rech aj pa̱banelil saˈ rakleb a̱tin

6  Cui cuan junak saˈ e̱ya̱nk cuan xchˈaˈajquilal riqˈuin junak xherma̱n, ¿ma ta̱ru̱k ta biˈ ta̱xic chiruheb laj rakol a̱tin re li ruchichˈochˈ? ¿Ma incˈaˈ raj us nak riqˈuineb laj pa̱banel ta̱xic? ² ¿Ma incˈaˈ nequenau nak saˈ jun cutan la̱o aj pa̱banel torakok a̱tin saˈ xbe̱neb chixjunileb li cuanqueb saˈ ruchichˈochˈ? Ut cui la̱o torakok a̱tin saˈ xbe̱neb li cuanqueb saˈ ruchichˈochˈ, ¿cˈaˈut nak incˈaˈ ta̱ru̱k takayi̱b ru li kachˈaˈajquilal saˈ xya̱lal chi kibil kib? ³ ¿Ma incˈaˈ nequenau nak saˈ jun cutan torakok a̱tin saˈ xbe̱neb li ángel? Ut cui torakok a̱tin saˈ xbe̱neb li ángel, ¿cˈaˈut nak incˈaˈ ta̱ru̱k torakok a̱tin saˈ xbe̱n li kachˈaˈajquilal arin saˈ ruchichˈochˈ? ⁴ Cui cuan li ple̱t saˈ e̱ya̱nk, ¿cˈaˈut nak nequeqˈue chi rakoc a̱tin saˈ e̱be̱n li ma̱cuaˈeb aj pa̱banel? ⁵ Nequecˈut e̱xuta̱n nak nequeqˈue chi rakoc a̱tin saˈ e̱be̱n li ma̱cuaˈeb aj pa̱banel. ¿Ma ma̱cˈaˈ ta biˈ junak saˈ e̱ya̱nk cuan xnaˈleb re ta̱rakok a̱tin saˈ e̱be̱n la̱ex aj pa̱banel? ⁶ Abanan la̱ex nequecˈam le̱ rech aj pa̱banelil chiru junak aj rakol a̱tin ma̱cuaˈ aj pa̱banel. ⁷ Nak nequecˈam le̱ rech aj pa̱banelil saˈ rakleb a̱tin nacˈutun nak toj ma̱jiˈ nequetau xya̱lal. Kˈaxal us raj nak te̱cuy li rahobtesi̱c ut li elkˈa̱c ut incˈaˈ texxic riqˈuin aj rakol a̱tin. ⁸ Abanan la̱ex incˈaˈ nequecuy. La̱ex ban chic li nequex‑elkˈac ut nequeba̱nu li ma̱usilal reheb le̱ rech aj pa̱banelil. ⁹ ¿Ma incˈaˈ nequenau nak eb li incˈaˈ ti̱queb xchˈo̱l incˈaˈ teˈre̱chani lix nimajcual cuanquilal li Dios? Me̱balakˈi e̱rib. Eb laj coˈbe̱t ut eb laj yumbe̱t incˈaˈ teˈre̱chani lix nimajcual cuanquilal li Dios, chi moco li nequeˈlokˈonin re li jalanil dios, chi moco eb laj muxul caxa̱r. Ut eb li cui̱nk li nequeˈma̱cob riqˈuineb li rech cui̱nkilal incˈaˈ ajcuiˈ teˈre̱chani lix nimajcual cuanquilal li Dios. Joˈcan nak me̱balakˈi e̱rib chi xcˈoxlanquil nak us yo̱quex cui toj yo̱quex chixba̱nunquil li ma̱usilal aˈin. ¹⁰ Eb laj e̱lkˈ ut eb li nequeˈxrahi ru li biomal incˈaˈ teˈre̱chani lix nimajcual cuanquilal li Dios, chi moco laj calajenak, chi moco laj majecuanel, chi moco laj balakˈ teˈre̱chani lix nimajcual cuanquilal li Dios. ¹¹ Usta cuanqueb junju̱nk saˈ e̱ya̱nk joˈcan queˈxba̱nu chak, abanan anakcuan cuybil sachbil chic lix ma̱queb. Santobresinbileb chic ut ti̱cobresinbileb chic lix chˈo̱l saˈ xcˈabaˈ li Ka̱cuaˈ Jesucristo ut xban li Santil Musikˈej.

Chenima ru li Dios riqˈuin le̱ yehom e̱ba̱nuhom

¹² Cuan li nequeˈyehoc: La̱in naru tinba̱nu chixjunil li cˈaˈru tincuaj xba̱nunquil. Ya̱l nak naru xba̱nunquil chixjunil abanan moco chixjunil ta us xba̱nunquil. La̱in naru ninba̱nu chixjunil li nacuaj, abanan incˈaˈ tinba̱nu cui nacuecˈa nak junes aˈan ta̱xic inchˈo̱l chirix. ¹³ Li Dios quixyi̱b li tzacae̱mk re li kasaˈ ut quixyi̱b li kasaˈ re li tzacae̱mk. Ya̱l ajcuiˈ, aban ta̱cuulak xkˈehil nak li Dios tixsach li tzacae̱mk joˈ ajcuiˈ li katibel. Li Dios incˈaˈ coxyoˈobtesi re li coˈbe̱tac yumbe̱tac. Coxyoˈobtesi ban re nak tocˈanjelak chiru li Ka̱cuaˈ. Ut li Ka̱cuaˈ aˈan li na‑iloc ke. ¹⁴ Li Dios li quicuaclesin re li Ka̱cuaˈ Jesucristo chi yoˈyo saˈ xya̱nkeb li camenak, aˈan ajcuiˈ ta̱cuaclesi̱nk ke chi yoˈyo riqˈuin lix cuanquil. ¹⁵ ¿Ma incˈaˈ nequenau nak la̱o aj pa̱banel joˈ li rok rukˈ li Ka̱cuaˈ Jesucristo? ¿Ma ta̱ru̱k ta biˈ takajunaji kib riqˈuineb li ixk li nequeˈxcˈayi rib? Ma̱ jokˈe naru xban nak la̱o rok rukˈ li Cristo ut junajo chic riqˈuin nak cuanco. ¹⁶ ¿Ma incˈaˈ nequenau nak li ani nama̱cob riqˈuin junak ixk aj ma̱c junajeb chi tzˈejcualej nequeˈcana? Tzˈi̱banbil saˈ li Santil Hu nak junajakeb chi tzˈejcualej chi xcabichaleb. ¹⁷ Ut ani naxjunaji rib riqˈuin li Ka̱cuaˈ, aˈan junaj chic riqˈuin saˈ musikˈej. ¹⁸ Me̱ba̱nu chic li ma̱usilal. Chixjunil li cˈaˈak re ru chi ma̱quil kˈaxal yibru. Abanan li coˈbe̱tac yumbe̱tac kˈaxal cuiˈchic yibru xban nak li ani nama̱cob chi toj ma̱jiˈ sumsu, li jun aˈan naxmux rib xjunes rib. ¹⁹ ¿Ma incˈaˈ nequenau nak la̱ex rochochex li Santil Musikˈej xban nak li Santil Musikˈej li quixqˈue e̱re li Dios cuan e̱riqˈuin? Joˈcan nak moco la̱ex ta nequetakla e̱rib e̱junes. La̱ex rehex chic li Dios. ²⁰ Lokˈbilex chic chi terto e̱tzˈak. Joˈcan nak ti̱cak le̱ yuˈam ut chelokˈoni li Dios xban nak rehex chic.

Xchˈolobanquil xya̱lal chirix li sumla̱c ut li cua̱nc chokˈ aj pa̱banel

7  Xetakla chak xpatzˈbal cue chirix li sumla̱c ut anakcuan tinsume le̱ hu. Us raj chokˈ re li cui̱nk nak ma̱cˈaˈak rixakil. ² Abanan us cui ta̱sumla̱k re nak incˈaˈ ta̱ma̱cobk. Teˈsumla̱k re nak li cui̱nk teˈcua̱nk rixakil chi xju̱nkaleb ut li ixk teˈcua̱nk xbe̱lom chi xju̱nkaleb. ³ Tento nak li cui̱nk ta̱cua̱nk riqˈuin li rixakil ut li ixk ta̱cua̱nk riqˈuin lix be̱lom joˈ nequeˈraj chi ribileb rib. ⁴ Li ixakilbej moco aˈan ta yal re saˈ xbe̱n xjunes rib; aban chic lix be̱lom yal re saˈ xbe̱n. Joˈcan ajcuiˈ li be̱lomej. Moco aˈan ta yal re saˈ xbe̱n xjunes rib; aˈ ban chic li rixakil yal re saˈ xbe̱n. ⁵ Cui li be̱lomej naraj cua̱nc riqˈuin li rixakil, li ixakilbej incˈaˈ naru tixye incˈaˈ. Ut cui li ixakilbej naraj cua̱nc riqˈuin lix be̱lom, li be̱lomej incˈaˈ naru tixye incˈaˈ. Naru teˈxcˈu̱b chi ribileb rib nak teˈx‑oxlokˈi rib chi ribileb rib jarubak cutan re nak teˈxqˈue xchˈo̱leb chi tijoc. Abanan teˈcua̱nk cuiˈchic mokon chi ribileb rib re nak incˈaˈ teˈa̱le̱k xban laj tza xban nak incˈaˈ teˈxcuy cua̱nc xjuneseb. ⁶ La̱in yal e̱naˈleb yo̱quin chixqˈuebal. Moco yo̱quin ta chixyebal e̱re nak tento te̱ba̱nu. La̱ex yal e̱re chanru te̱raj te̱ba̱nu. ⁷ La̱in nacuaj raj nak ma̱cˈaˈak e̱rixakil joˈ la̱in ma̱cˈaˈ cuixakil. Abanan moco juntakˈe̱to ta chikajunilo. Li junju̱nk cuan xma̱tan qˈuebil re xban li Dios. Joˈcan nak cuan li nequeˈsumla xban nak joˈcan naraj li Dios ut cuan li incˈaˈ nequeˈsumla ut saheb saˈ xchˈo̱l xjuneseb xban nak joˈcan naraj li Dios. ⁸ Ut ninye reheb li incˈaˈ sumsu̱queb ut reheb li xma̱lcaˈan nak us raj chokˈ reheb nak teˈcana̱k xjuneseb joˈ la̱in. ⁹ Ut cui incˈaˈ naru nequeˈxcuy rib, sumla̱keb. Kˈaxal us nak ta̱sumla̱k junak chiru nak yo̱k chixrabal ru junak re nak ta̱cua̱nk riqˈuin chi incˈaˈ sumsu̱queb. ¹⁰ Anakcuan tinye reheb li ac sumsu̱queb nak li ixakilbej incˈaˈ naru tixjach rib riqˈuin lix be̱lom. Li chakˈrab aˈin ma̱cuaˈ la̱in xinyehoc re injunes. Qˈuebil ban xban li Ka̱cuaˈ. ¹¹ Ut cui li ixakilbej tixjach rib riqˈuin lix be̱lom, li ixk aˈan ta̱cua̱nk xjunes ut incˈaˈ chic tixsicˈ jalan cui̱nk. Abanan us raj cui tixcˈam cuiˈchic rib saˈ usilal riqˈuin lix be̱lom. Ut joˈcan ajcuiˈ li be̱lomej, incˈaˈ ajcuiˈ naru tixjach rib riqˈuin li rixakil. ¹² La̱in nacuaj xqˈuebal caˈchˈinak chic le̱ naˈleb. Aˈin ma̱cuaˈ xyehom li Ka̱cuaˈ, aban la̱in ninnau nak us xba̱nunquil. Cui junak cui̱nk naxpa̱b li Dios ut li rixakil toj ma̱jiˈ napa̱ban ut naxcˈul xchˈo̱l li ixk cua̱nc riqˈuin, li cui̱nk aˈan incˈaˈ naru tixcanab chi moco tixjach rib riqˈuin li rixakil. ¹³ Ut cui junak ixk naxpa̱b li Dios ut lix be̱lom toj ma̱jiˈ napa̱ban, ut naxcˈul xchˈo̱l li cui̱nk cua̱nc riqˈuin, li ixk aˈan incˈaˈ naru tixcanab chi moco tixjach rib riqˈuin lix be̱lom. ¹⁴ Us cui incˈaˈ teˈxjach rib. Li be̱lomej li toj ma̱jiˈ napa̱ban, aˈan lokˈ chiru li Dios saˈ xcˈabaˈ li rixakil. Ut li ixakilbej li toj ma̱jiˈ napa̱ban, aˈan lokˈ chiru li Dios saˈ xcˈabaˈ lix be̱lom li napa̱ban. Cui ta incˈaˈ joˈcan, lix cocˈal eb aˈan chanchaneb raj lix cocˈaleb li ma̱cuaˈeb ralal xcˈajol li Dios. Abanan cui incˈaˈ teˈxjach rib, lix cocˈaleb lokˈ chiru li Dios saˈ xcˈabaˈ li jun li napa̱ban. ¹⁵ Cui li be̱lomej ma̱cuaˈ aj pa̱banel ut incˈaˈ chic naraj cua̱nc riqˈuin li rixakil xban nak aj pa̱banel chic li ixk, naru teˈxjach rib. Ut cui li ixakilbej ma̱cuaˈ aj pa̱banel ut incˈaˈ chic naraj cua̱nc riqˈuin lix be̱lom xban nak li cui̱nk aj pa̱banel chic, naru ajcuiˈ teˈxjach rib. Chi joˈcan ta̱cana̱k laj pa̱banel chi ma̱cˈaˈ chic ta̱chˈiˈchˈiˈi̱nk re xban nak li Dios naraj nak tocua̱nk saˈ xya̱lal. ¹⁶ At ixakilbej, la̱at incˈaˈ nacanau ma ta̱pa̱ba̱nk la̱ be̱lom a̱ban. Joˈcan ajcuiˈ la̱at, be̱lomej, incˈaˈ nacanau ma ta̱pa̱ba̱nk la̱ cuixakil a̱ban. ¹⁷ Li junju̱nk chicua̱nk joˈ naraj li Dios. Us cui cuan a̱cuixakil nak xapa̱b li Cristo. Cui ma̱cˈaˈ a̱cuixakil, us ajcuiˈ. Tatcana̱k joˈ nak cuancat nak xatpa̱ban. Aˈan aˈin li nequebinchakˈrabi cuiˈ chixjunileb laj pa̱banel yalak bar. ¹⁸ Cui junak ac xcˈul li circuncisión nak ta̱pa̱ba̱nk, li jun aˈan incˈaˈ tixcˈoxla xjalbal li retalil li circuncisión. Ut cui junak ta̱pa̱ba̱nk ut toj ma̱jiˈ naxcˈul li circuncisión, li jun aˈan incˈaˈ ajcuiˈ tento nak tixcˈul li circuncisión. ¹⁹ Li ani naxcˈul li circuncisión juntakˈe̱t riqˈuin li ani incˈaˈ naxcˈul xban nak li circuncisión ma̱cˈaˈ xcuanquil. Li kˈaxal us xba̱nunquil, aˈan xpa̱banquil lix chakˈrab li Dios. ²⁰ Joˈ nak cuan junak nak quisiqˈueˈ ru xban li Dios, joˈcan ajcuiˈ ta̱cana̱k. ²¹ Cui cuancat rubel xcuanquil la̱ patrón nak li Dios quixsicˈ a̱cuu, matcˈoxlac chirix aˈan. Abanan cui naxqˈue rib nak tat‑e̱lk rubel xcuanquil la̱ patrón, naru nacat‑el saˈ xya̱lal. ²² Li ani cuan rubel xcuanquil lix patrón nak quisiqˈueˈ ru xban li Ka̱cuaˈ, li jun aˈan libre chic cuan chiru li Dios. Ut li jun li incˈaˈ cuan rubel xcuanquil lix patrón nak quisiqˈueˈ ru, lokˈbil chic xban li Cristo chi cˈanjelac chiru. ²³ Joˈcan ajcuiˈ la̱ex. Lokˈbilex chic xban li Cristo chi terto e̱tzˈak. Joˈcan nak me̱qˈue chic e̱rib rubel xcuanquil li incˈaˈ useb xnaˈleb. Me̱qˈue e̱rib chi takla̱c re xba̱nunquil li incˈaˈ naraj li Dios. ²⁴ Ex herma̱n, joˈ nak cuanquex nak quisiqˈueˈ e̱ru xban li Dios, joˈcan ajcuiˈ texcana̱k. ²⁵ La̱in tinye e̱re li nincˈoxla chirixeb li sa̱j ixk ut li sa̱j cui̱nk. Usta ma̱cuaˈ ra̱tin li Ka̱cuaˈ, us cui tex‑abi̱nk chicuu xban nak riqˈuin xnimal ruxta̱n li Ka̱cuaˈ naxqˈue innaˈleb chixyebal e̱re lix ya̱lal. ²⁶ Xban li rahobtesi̱c cuan saˈ kabe̱n, nincˈoxla nak us cui incˈaˈ teˈsumla̱k li toj ma̱jiˈ sumsu̱queb. ²⁷ Abanan cui sumsu̱quex, me̱canab le̱ rixakil. Ut cui incˈaˈ sumsu̱quex, us ajcuiˈ cui incˈaˈ te̱sicˈ e̱rixakil. ²⁸ Abanan cui texsumla̱k moco ma̱c ta aˈan. Ut joˈcaneb ajcuiˈ li sa̱j ixk. Moco ma̱c ta cui teˈsumla̱k. Abanan kˈaxal cuiˈchic nabal li raylal saˈ xbe̱neb li sumsu̱queb. La̱in incˈaˈ raj nacuaj nak te̱cˈul li raylal. ²⁹ Ex inherma̱n, li bar cuan nacuaj xyebal, aˈan aˈin: Yo̱queb chi numecˈ li cutan saˈ junpa̱t. Joˈcan nak la̱ex li cuan e̱rixakil ma̱cuaˈ caˈaj cuiˈ le̱ rixakil te̱cˈoxla. Cheqˈuehak ban e̱chˈo̱l chi cˈanjelac chiru li Ka̱cuaˈ. ³⁰ Usta sa saˈ kachˈo̱l, usta ra saˈ kachˈo̱l, usta cuan kabiomal usta ma̱cˈaˈ, chikaqˈuehak ban kachˈo̱l chi cˈanjelac chiru li Ka̱cuaˈ Dios. ³¹ Me̱qˈue e̱chˈo̱l chirix li cˈaˈru cuan e̱re saˈ li ruchichˈochˈ aˈin, xban nak chixjunil li cˈaˈru cuan saˈ ruchichˈochˈ ta̱osokˈ. ³² Nacuaj raj nak ma̱cˈaˈ cˈaˈru ta̱xic cuiˈ e̱chˈo̱l. Li cui̱nk li ma̱cˈaˈ rixakil naxqˈue xchˈo̱l chi cˈanjelac chiru li Ka̱cuaˈ Dios ut chixba̱nunquil li bar cuan naraj li Ka̱cuaˈ Dios. ³³ Ut li cui̱nk cuan rixakil tento nak tixqˈue xchˈo̱l chi cˈanjelac re nak ta̱cua̱nk cˈaˈru reheb ut tixqˈue xchˈo̱l chixba̱nunquil li naraj li rixakil re nak sahak saˈ xchˈo̱l. Joˈcan nak cuib ru lix cˈaˈux xban nak naxcˈoxla li Ka̱cuaˈ Dios ut naxcˈoxla li rixakil. ³⁴ Joˈcan ajcuiˈ li ixk li cuan xbe̱lom. Cuib ru lix cˈaˈux xban nak naxcˈoxla li Ka̱cuaˈ Dios ut tento ajcuiˈ nak tixcˈoxla lix cˈanjel saˈ rochoch ut naxba̱nu cˈaˈru naraj lix be̱lom. Ut li ixk li ma̱cˈaˈ xbe̱lom naxqˈue xchˈo̱l chi cˈanjelac chiru li Ka̱cuaˈ Dios ut naxba̱nu joˈ naraj li Dios. ³⁵ Moco re ta nak incˈaˈ texsumla̱k nak ninye e̱re chi joˈcaˈin. Re ban e̱tenkˈanquil. La̱in nacuaj nak te̱ba̱nu li us. Nacuaj nak te̱kˈaxtesi e̱rib chi cˈanjelac chiru li Ka̱cuaˈ chi anchal e̱chˈo̱l. ³⁶ Cui junak yucuaˈbej naxcˈoxla nak us ta̱sumla̱k lix rabin xban nak ac cuan xchihab, us nak tixba̱nu li naxcˈoxla xba̱nunquil. Tixsumub lix rabin. Moco ma̱c ta cui ta̱sumla̱k. ³⁷ Li yucuaˈbej ma̱ ani naminoc ru. Naru tixba̱nu li naxcˈoxla nak us xba̱nunquil. Ut cui na‑ala saˈ xchˈo̱l nak incˈaˈ tixsumub lix rabin, cha̱bil ajcuiˈ naxba̱nu nak incˈaˈ tixsumub. ³⁸ Joˈcan nak li ani naxsumub lix rabin, cha̱bil naxba̱nu. Ut li incˈaˈ naxsumub lix rabin, kˈaxal cuiˈchic us naxba̱nu. ³⁹ Li ixk li sumsu tento nak ta̱cua̱nk riqˈuin lix be̱lom aˈ yal joˈ najtil yoˈyo̱k lix be̱lom. Ut cui nacam lix be̱lom aˈan chic yal re ani aj iqˈuin ta̱sumla̱k. Abanan cui naraj sumla̱c, tento nak riqˈuin junak aj pa̱banel ta̱sumla̱k. ⁴⁰ Abanan nincˈoxla la̱in nak kˈaxal us raj nak li xma̱lcaˈan ta̱cana̱k xjunes ut incˈaˈ chic ta̱sumla̱k. Li naˈleb aˈin li xinye e̱re, aˈan qˈuebil cue xban li Santil Musikˈej.

Xqˈuebal xnaˈlebeb chirix li tzacae̱mk mayejanbil chiruheb li yi̱banbil Dios

8  Cuan cuib oxib cua̱tin tinye e̱re chirix li tzacae̱mk mayejanbil chiruheb li yi̱banbil dios. Nakanau nak chikajunilo ac xkatzol kib chirix aˈin. Abanan toj cuan saˈ e̱ya̱nk nequeˈxcˈoxla nak nequeˈxnau chixjunil ut riqˈuin aˈan nequeˈxkˈetkˈeti rib. Aban li ani narahoc, aˈan naxtenkˈa li rech aj pa̱banelil chi qˈui̱c saˈ lix pa̱ba̱l. ² Li ani narecˈa nak cuan xnaˈleb, li jun aˈan toj ma̱jiˈ naxtau li xya̱lal chi tzˈakal. ³ Abanan li ani narahoc re li Dios, li Dios naxnau nak aˈan li ralal xcˈajol. ⁴ Anakcuan tina̱tinak chirix li tzacae̱mk mayejanbil chiruheb li yi̱banbil dios. La̱o nakanau nak li yi̱banbil dios ma̱cˈaˈ nequeˈoc cuiˈ xban nak moco dioseb ta. Nakanau nak jun ajcuiˈ li Dios cuan. ⁵ Cuan nequeˈyehoc re nak cuan nabal li dios joˈ saˈ choxa joˈ saˈ ruchichˈochˈ. Dios ut Ka̱cuaˈ nequeˈxye reheb. Ut ya̱l nak cuan nabaleb li yi̱banbil dios. ⁶ Abanan la̱o aj pa̱banel nakanau nak jun ajcuiˈ li Dios cuan. Ut li Dios Acuabej aˈan li quiyi̱ban re chixjunil li cˈaˈru cuan. Coxyoˈobtesi la̱o re nak takalokˈoni aˈan. Ut jun ajcuiˈ li Ka̱cuaˈ cuan, aˈ li Jesucristo. Ut saˈ xcˈabaˈ aˈan cuan chixjunil ut saˈ xcˈabaˈ aˈan nak cuan li colba‑ib. ⁷ Abanan moco chixjunileb ta nequeˈxtau ru li xya̱lal aˈin chirix li mayejanbil tzacae̱mk. Cˈaynakeb chalen chak najter chixpa̱banquil li yi̱banbil dios, ut anakcuan nak nequeˈxtzaca li tzacae̱mk mayejanbil chiru li yi̱banbil dios nequeˈxcˈoxla nak yo̱queb chixqˈuebal xlokˈal li yi̱banbil dios. Ut xban nak toj kˈuneb xchˈo̱l saˈ lix pa̱ba̱l, nequeˈxcˈoxla nak nequeˈxmux ru lix pa̱ba̱leb. ⁸ Moco xban ta li katzacae̱mk nak tocua̱nk chi sum a̱tin riqˈuin li Dios. Li tzacae̱mk incˈaˈ naxnimobresi xcuanquil li kapa̱ba̱l chi moco naxpoˈ li kapa̱ba̱l. ⁹ Naru te̱tzaca li mayejanbil tzacae̱mk. Abanan cheqˈuehak retal nak incˈaˈ te̱luctasi xchˈo̱l li toj kˈuneb xchˈo̱l saˈ lix pa̱ba̱leb xban nak nequetzaca aˈan. Cheqˈuehak retal nak incˈaˈ ta̱oc cuiˈchic chi ma̱cobc e̱ban la̱ex. ¹⁰ La̱ex nequenau li xya̱lal aˈin. Nequenau nak moco ma̱c ta xtzacanquil li tzacae̱mk mayejanbil. Abanan cui junak aj pa̱banel toj kˈun xchˈo̱l saˈ xpa̱ba̱l ta̱ilok e̱re nak cˈojcˈo̱quex saˈ me̱x chi cuaˈac cuan cuiˈ li yi̱banbil dios, ma̱re aˈan tixtzaca li mayejanbil chiruheb li yi̱banbil dios ut tixcˈoxla nak xmux ru lix pa̱ba̱l. ¹¹ La̱ex nequenau nak naru te̱tzaca li mayejanbil tzacae̱mk. Abanan, ma̱re yal e̱ma̱c la̱ex nak ta̱oc cuiˈchic chi ma̱cobc li toj ma̱jiˈ nacacuu saˈ xpa̱ba̱l. La̱ex nequenau nak li Cristo quicam ajcuiˈ saˈ xcˈabaˈ eb aˈan. ¹² Cui e̱ban la̱ex nak yo̱queb chi lucta̱c xchˈo̱leb le̱ rech aj pa̱banelil li toj kˈuneb xchˈo̱l saˈ lix pa̱ba̱l, yo̱quex chi ma̱cobc chiruheb aˈan. Ut yo̱quex ajcuiˈ chi ma̱cobc chiru li Cristo. ¹³ Joˈcan nak cui li nintzaca naxqˈue chi ma̱cobc li cuech aj pa̱banelil, ma̱ jokˈe chic tintiu li mayejanbil tib xban nak incˈaˈ nacuaj nak teˈma̱cobk inban la̱in.