Beginning

Chetenkˈaheb li kˈuneb xchˈo̱l saˈ lix pa̱ba̱leb

14  Checˈulakeb chi sa saˈ e̱chˈo̱l li toj kˈuneb xchˈo̱l saˈ lix pa̱ba̱leb ut me̱cuechˈi rix lix cˈaˈuxeb. ² Cuan nequeˈxcˈoxla nak moco ma̱c ta xtzacanquil chixjunil li cˈaˈak re ru natzacaman. Cuanqueb ajcuiˈ li toj kˈuneb xchˈo̱l saˈ lix pa̱ba̱leb nequeˈxcˈoxla nak ma̱c xtzacanquil li tib. ³ Li ani naxtzaca chixjunil li cˈaˈak re ru natzacaman incˈaˈ naru tixtzˈekta̱na li ani incˈaˈ naxtzaca chixjunil li cˈaˈak re ru. Ut li ani incˈaˈ naxtzaca chixjunil li cˈaˈak re ru incˈaˈ naru naxcuechˈi rix li jun chic li naxtzaca chixjunil xban nak aˈan ac xcˈuleˈ ajcuiˈ xban li Dios. ⁴ La̱at incˈaˈ naru nacatrakoc a̱tin saˈ xbe̱n lix mo̱s la̱ cuas a̱cui̱tzˈin. Aˈ lix patrón ta̱yehok re ma us malaj incˈaˈ us li yo̱ chixba̱nunquil. Joˈcan nak li nimajcual Dios aˈan nataklan re li junju̱nk ut aˈan nayehoc reheb ma us malaj incˈaˈ us li yo̱queb chixba̱nunquil. Ut li Dios ta̱tenkˈa̱nk reheb chixba̱nunquil li us. ⁵ Cuan nequeˈcˈoxlan nak kˈaxal lokˈ junak cutan chiruheb li cutan jun chˈo̱l chic. Ut cuan ajcuiˈ nequeˈcˈoxlan re nak juntakˈe̱t xlokˈal chixjunileb li cutan. Abanan tento nak li junju̱nk tixcˈoxla chi us chanru tixba̱nu. ⁶ Li ani naxqˈue xlokˈal junak li cutan, aˈan naxba̱nu re xlokˈoninquil li Dios. Ut joˈcan ajcuiˈ li natiˈoc tib naxba̱nu aˈan re xlokˈoninquil li Dios ut naxbantioxi ajcuiˈ chiru li Dios. Ut li ani incˈaˈ natiˈoc tib, xlokˈoninquil ajcuiˈ li Dios naxba̱nu nak incˈaˈ natiˈoc tib, ut naxbantioxi ajcuiˈ chiru li Dios. ⁷ Ma̱ ani yoˈyo ta yal xjunes rib. Ut ma̱ ani ajcuiˈ nacam chi yal xjunes rib xban nak ma̱cuaˈ la̱o yal ke saˈ xbe̱n li kayuˈam. ⁸ Nak yoˈyo̱co nakaqˈue xlokˈal li Ka̱cuaˈ Dios riqˈuin li kayuˈam. Ut nak nococam, nakaqˈue ajcuiˈ xlokˈal riqˈuin li kacamic. Joˈcan ut cui yoˈyo̱co ut cui nococam aˈ yal re li Dios saˈ kabe̱n xban nak aˈan chic laj e̱chal ke. ⁹ Joˈcan nak quicam li Jesucristo, ut quicuacli cuiˈchic chi yoˈyo re nak aˈanak li Ka̱cuaˈ reheb li yoˈyo̱queb joˈ eb ajcuiˈ li camenakeb. ¹⁰ ¿Cˈaˈut nak nacatrakoc a̱tin saˈ xbe̱n la̱ cuech aj pa̱banelil? Ut ¿cˈaˈut nak nacatzˈekta̱naheb aj pa̱banel? Incˈaˈ naru ta̱ba̱nu chi joˈcan xban nak saˈ jun cutan li Cristo ta̱rakok a̱tin saˈ kabe̱n chikajunilo. ¹¹ Tzˈi̱banbil saˈ li Santil Hu li quixye li Dios:

¹² Joˈcan nak chikajunilo toxkakˈaxtesi li kayehom kaba̱nuhom chiru li Dios.

Incˈaˈ taxak ta̱chˈina̱nk xchˈo̱l la̱ herma̱n a̱ban la̱at

¹³ Chikacanabak xcuechˈinquil kib chi kibil kib ut chikaba̱nu li us re nak li kech aj pa̱banelil incˈaˈ teˈchˈina̱nk xchˈo̱leb saˈ lix pa̱ba̱leb chi moco teˈoc cuiˈchic chi ma̱cobc kaban. ¹⁴ Xban nak ninpa̱b li Cristo, joˈcan nak ninnau nak ma̱cˈaˈ re̱cˈ xtzacanquil li cˈaˈak re ru. Abanan cui junak narecˈa saˈ xchˈo̱l nak ma̱c xtzacanquil junak tzacae̱mk, us cui incˈaˈ tixba̱nu. ¹⁵ Cui riqˈuin li cˈaˈru nacatzaca nachˈinan xchˈo̱l la̱ cuech aj pa̱banelil, aˈan naraj naxye nak incˈaˈ nacara la̱ cuech aj pa̱banelil. Ma̱poˈ xchˈo̱leb la̱ cuech aj pa̱banelil riqˈuin li cˈaˈru nacatzaca xban nak li Jesucristo quicam ajcuiˈ saˈ xcˈabaˈ eb aˈan. ¹⁶ La̱at nacanau nak us li yo̱cat chixba̱nunquil, abanan chaqˈuehak retal li cˈaˈru ta̱ba̱nu re nak ma̱ ani ta̱yehok nak incˈaˈ us li yo̱cat chixba̱nunquil. ¹⁷ Lix cuanquilal li Dios incˈaˈ nakatau riqˈuin cˈaˈru nakatzaca chi moco riqˈuin li cˈaˈru nakucˈ; natauman ban riqˈuin li ti̱quilal, li tuktu̱quil usilal ut li sahil chˈo̱lejil li naxqˈue ke li Santil Musikˈej. ¹⁸ Joˈcan nak li ani nacˈanjelac chiru li Cristo saˈ ti̱quilal ut chi sa saˈ xchˈo̱l, li Dios nasahoˈ xchˈo̱l riqˈuin. Ut naqˈueheˈ ajcuiˈ xlokˈal xbaneb li ras ri̱tzˈin. ¹⁹ Joˈcan nak chikaqˈuehak kachˈo̱l chi cua̱nc saˈ tuktu̱quil usilal riqˈuineb li kas ki̱tzˈin. Ut chikatenkˈa kib chi kibil kib re nak toqˈui̱k saˈ li kapa̱ba̱l. ²⁰ Ma̱poˈ xcˈanjel li Dios riqˈuin li cˈaˈak re ru nacatzaca. Ya̱l nak chixjunil naru xtzacanquil. Abanan cui la̱ herma̱n nachˈinan xchˈo̱l riqˈuin li nacatzaca, incˈaˈ us li yo̱cat chixba̱nunquil. ²¹ Li us xba̱nunquil, aˈan aˈin: cui nachˈinan xchˈo̱l la̱ herma̱n xban nak nacattiˈoc tib ut nacat‑ucˈac vino, mattiˈoc tib ut mat‑ucˈac vino. Incˈaˈ ta̱ba̱nu li cˈaˈak re ru ta̱chˈina̱nk cuiˈ xchˈo̱l la̱ herma̱n re nak incˈaˈ ta̱ma̱cobk a̱ban. ²² Cui nacanau chi tzˈakal nak us yo̱cat chixba̱nunquil, canab saˈ rukˈ li Dios. Us xak re li ani narecˈa saˈ xchˈo̱l nak moco ma̱c ta li yo̱ chixba̱nunquil. ²³ Cui junak narecˈa saˈ xchˈo̱l nak ma̱c xtzacanquil junak tzacae̱mk, ut cui naxtzaca, aˈan cuan xma̱c chiru li Dios. Cui nakecˈa saˈ li ka̱m nak incˈaˈ us xba̱nunquil li cˈaˈru nakaba̱nu, ut cui nakaba̱nu, yo̱co chi ma̱cobc.

Chikatenkˈaheb li kas ki̱tzˈin

15  La̱o, li ac cau kachˈo̱l saˈ li kapa̱ba̱l, chikacuyeb xma̱c li toj kˈuneb xchˈo̱l saˈ xpa̱ba̱leb ut takatenkˈaheb saˈ li chˈaˈajquilal. Incˈaˈ chikasicˈ li us caˈaj cuiˈ chokˈ ke la̱o. ² Tento takaba̱nu li us reheb li kech aj pa̱banelil re nak teˈqˈui̱k saˈ lix pa̱ba̱l ut re nak sahak saˈ xchˈo̱leb. ³ Li Cristo incˈaˈ quixba̱nu li quiraj xjunes rib. Quixba̱nu ban li naraj li Dios. Quixtenkˈaheb chixjunileb. Joˈcan nak quixcˈul joˈ tzˈi̱banbil saˈ li Santil Hu: Saˈ inbe̱n quinak la̱ majecuanquil li queˈxba̱nu eb li queˈhoboc a̱cue. ⁴ Chixjunil li cˈaˈak re ru quitzˈi̱ba̱c chak najter saˈ li Santil Hu, re katzolbal nak quitzˈi̱ba̱c chak. Nocoxtenkˈa re nak incˈaˈ ta̱chˈina̱nk li kachˈo̱l ut naxcˈojob li kachˈo̱l re nak takacuy roybeninquil nak ta̱tzˈaklok ru li kacolbal. ⁵ Li Dios chitenkˈa̱nk e̱re re nak incˈaˈ ta̱chˈina̱nk e̱chˈo̱l ut aˈan chiqˈuehok xcacuil le̱ chˈo̱l. Aˈan chitenkˈa̱nk e̱re chi cua̱nc saˈ usilal chi ribil e̱rib ut junajak le̱ chˈo̱l joˈ naraj li Jesucristo. ⁶ Li Dios chitenkˈa̱nk e̱re re nak junajak le̱ chˈo̱l nak te̱lokˈoni li Acuabej Dios, lix Yucuaˈ li Jesucristo.

Li colba‑ib reheb ajcuiˈ li ma̱cuaˈeb aj judío

⁷ Checˈulak saˈ e̱ya̱nk chi sa saˈ e̱chˈo̱l le̱ rech aj pa̱banelil joˈ nak li Cristo coxcˈul la̱o. Joˈcan cheba̱nuhak re xqˈuebal xlokˈal li Dios. ⁸ La̱in ninye e̱re nak li Cristo quicˈulun chi cˈanjelac chiku la̱o aj judío. Riqˈuin aˈin naxcˈutbesi chiku nak li Dios xqˈue li quixyechiˈi chak reheb li kaxeˈto̱nil yucuaˈ. ⁹ Quicˈulun ajcuiˈ chixtenkˈanquileb li ma̱cuaˈeb aj judío re nak teˈxlokˈoni li Dios xban nak kˈaxal nim li ruxta̱n. Tzˈi̱banbil chi joˈcaˈin saˈ li Santil Hu:

¹³ Li Dios aˈan li kayoˈon. Aˈan taxak chiqˈuehok xsahil e̱chˈo̱l chi nabal ut tixqˈue ajcuiˈ e̱re li tuktu̱quil usilal xban nak nequexpa̱ban. Xban nak cuan xcuanquil li Santil Musikˈej e̱riqˈuin, cauhak taxak e̱chˈo̱l chi oybeni̱nc. ¹⁴ Ex herma̱n, la̱in ninnau nak cha̱bilex ut nequenau li xya̱lal ut nequeqˈue ajcuiˈ e̱naˈleb chi ribil e̱rib. ¹⁵ Abanan saˈ li hu aˈin cau caˈchˈin li a̱tin xintzˈi̱ba e̱riqˈuin re nak incˈaˈ ta̱sachk saˈ e̱chˈo̱l li xinye. Ninba̱nu aˈin saˈ xcˈabaˈ lin cˈanjel li quixqˈue cue li Dios. ¹⁶ La̱in nincˈanjelac chiru li Jesucristo saˈ xya̱nkeb li ma̱cuaˈeb aj judío. Lin cˈanjel aˈan xchˈolobanquil xya̱lal li colba‑ib re nak eb li ma̱cuaˈeb aj judío teˈxkˈaxtesi rib chiru li Dios. Ut li Dios ta̱sahokˈ saˈ xchˈo̱l riqˈuineb, ut teˈsantobresi̱k xban li Santil Musikˈej. ¹⁷ Ninqˈue xlokˈal lin cˈanjel xban nak aˈan xcˈanjel li Dios. Moco injunes ta nincˈanjelac. Aˈ li Cristo natenkˈan cue. ¹⁸ Ma̱cˈaˈ inxiu chixyebal resil li cˈanjel xinba̱nu saˈ xcˈabaˈ li Cristo nak xincˈanjelac saˈ xya̱nkeb li ma̱cuaˈeb aj judío xban nak ma̱cuaˈ injunes xincˈanjelac. Li Jesucristo xtenkˈan cue nak xincˈameb xbe re nak teˈxpa̱b li Dios riqˈuin lin yehom inba̱nuhom. ¹⁹ Xinjultica resil li Jesucristo chiruheb riqˈuin li milagros ut li sachba chˈo̱lej ut riqˈuin xcuanquil li Santil Musikˈej. Yalak bar quinbeni xyebal resil li colba‑ib. Quintiquib Jerusalén, ut quinsuti chixjunileb li naˈajej toj retal quincuulac Ilírico. ²⁰ Joˈcan nak quinqˈue inchˈo̱l chixyebal resil li Jesucristo bar toj ma̱jiˈ rabiomeb resil xban nak incˈaˈ nacuaj cˈanjelac saˈ li naˈajej ac tiquibanbil cuiˈ cˈanjelac junxil. ²¹ Joˈcaˈin tzˈi̱banbil saˈ li Santil Hu: Li ma̱ jun sut yebil resilal li Cristo reheb, teˈrabi. Ut nak teˈrabi resil, teˈxtau xya̱lal.

Laj Pablo naxcˈoxla xic saˈ li tenamit Roma

²² Qˈuila sut xcuaj raj xic e̱riqˈuin abanan xban nak nabal incˈanjel toj ma̱jiˈ naxqˈue rib chicuu. ²³ Ac cuan nabal chihab cuoquic chixcˈoxlanquil xic e̱riqˈuin. Ut anakcuan xinchoy lin cˈanjel arin saˈ li naˈajej cuanquin cuiˈ. ²⁴ Nincˈoxla nak toxinnumekˈ che̱rilbal nak tinxic España. Nacuaj rilbal e̱ru re nak ta̱sahokˈ inchˈo̱l ut nacuaj ajcuiˈ nak tine̱tenkˈa re nak ta̱ru̱k tinxic España. ²⁵ Ut anakcuan xic cue chi rilbaleb laj pa̱banel li cuanqueb aran Jerusalén. Ut tincˈam jun ma̱tan re xtenkˈanquileb. ²⁶ Eb laj pa̱banel li cuanqueb aran Macedonia ut Acaya x‑ala saˈ xchˈo̱leb xtaklanquil jun li ma̱tan chokˈ reheb li nebaˈ li cuanqueb saˈ xya̱nkeb li herma̱n aran Jerusalén. ²⁷ Qui‑ala saˈ xchˈo̱leb xtenkˈanquileb ut us ajcuiˈ nak teˈxba̱nu xban nak eb aˈan ma̱cuaˈeb aj judío ut saˈ xcˈabaˈeb laj judío nak queˈxcˈul li colba‑ib. Joˈcan nak us nak teˈxtenkˈaheb laj pa̱banel aj judío riqˈuin xqˈuebal reheb li cˈaˈak re ru nacˈanjelac chiruheb. ²⁸ Ut caˈaj cuiˈ toxinkˈaxtesi li tumin aˈin, toxinnumekˈ e̱riqˈuin ut tinxic España. ²⁹ Nak tincuulak e̱riqˈuin, ninnau nak numtajenak li kosobtesinquil takacˈul xban li Cristo. ³⁰ Ex herma̱n, nintzˈa̱ma che̱ru nak tine̱tenkˈa saˈ le̱ tij saˈ xcˈabaˈ li Jesucristo ut saˈ xcˈabaˈ ajcuiˈ li rahoc ib li qˈuebil ke xban li Santil Musikˈej. ³¹ Chextijok chicuix re nak li Dios ta̱colok cue chiruheb li incˈaˈ nequeˈraj pa̱ba̱nc aran Judea. Ut chextijok ajcuiˈ re nak eb laj pa̱banel aran Jerusalén teˈxcˈul lix tenkˈanquileb chi saheb saˈ xchˈo̱l. ³² Cui li Dios naraj, chincuulak ta e̱riqˈuin chi sa saˈ inchˈo̱l. Ut chisahokˈ taxak kachˈo̱l saˈ comonil riqˈuin xjulticanquil li Cristo nak toxincua̱nk e̱riqˈuin. ³³ Aˈ taxak li Dios, li naqˈuehoc tuktu̱quil usilal, chicua̱nk e̱riqˈuin che̱junilex. Joˈcan taxak.

Laj Pablo naxtakla xsahileb xchˈo̱l

16  Nacuaj tinye e̱re nak li kaherma̱n lix Febe, aˈan tzˈakal aj pa̱banel ut aˈan aj tenkˈanel saˈ li iglesia li cuan aran Cencrea. ² Ut nak ta̱cuulak aran e̱riqˈuin, checˈulak aˈan saˈ xcˈabaˈ li Ka̱cuaˈ joˈ xcˈulubeb laj pa̱banel. Ut chetenkˈahak riqˈuin cˈaˈak re ru ta̱raj cuiˈ tenkˈa̱c xban nak ac xtenkˈaheb ajcuiˈ nabal li herma̱n ut xinixtenkˈa ajcuiˈ la̱in. ³ Cheqˈuehak xsahil xchˈo̱l laj Aquila ut lix Priscila, eb li cuech aj cˈanjelil saˈ xcˈabaˈ li Jesucristo. ⁴ Usta xiu xiu chokˈ reheb xcolbal rix lin yuˈam, aban queˈxqˈue xchˈo̱leb chintenkˈanquil. Ninbantioxi chiruheb. Ma̱cuaˈ caˈaj cuiˈ la̱in ninbantioxin chiruheb. Nequeˈbantioxin aj ban cuiˈ laj pa̱banel li ma̱cuaˈeb aj judío. ⁵ Cheqˈue ajcuiˈ xsahil xchˈo̱leb li herma̱n li nequeˈxchˈutub rib saˈ li rochoch laj Aquila ut lix Priscila. Cheqˈue xsahil xchˈo̱l laj Epeneto, li raro inban. Aˈan li xbe̱n li quixpa̱b li Jesucristo aran Acaya. ⁶ Cheqˈue xsahil xchˈo̱l lix María. Aˈan kˈaxal nacˈanjelac saˈ e̱ya̱nk la̱ex. ⁷ Cheqˈue xsahil xchˈo̱leb laj Andrónico ut laj Junias. Aˈaneb aj judío joˈ la̱in. Cuochbeneb nak cocuan chi pre̱xil. Naˈno ruheb xbaneb li apóstol. Eb aˈan queˈxpa̱b chak li Cristo nak toj ma̱jiˈ ninpa̱ban la̱in. ⁸ Cheqˈue xsahil xchˈo̱l laj Amplias. Aˈan ninra ajcuiˈ saˈ xcˈabaˈ li Ka̱cuaˈ. ⁹ Ut cheqˈue xsahil xchˈo̱l laj Urbano li kech aj cˈanjelil saˈ xcˈabaˈ li Cristo, ut laj Estaquis li ninra. ¹⁰ Cheqˈue xsahil xchˈo̱l laj Apeles. Aˈan incˈaˈ quichˈinan xchˈo̱l saˈ lix pa̱ba̱l nak quiyaleˈ ra̱lenquil. Ut cheqˈue xsahil xchˈo̱leb li cuanqueb saˈ rochoch laj Aristóbulo. ¹¹ Cheqˈue xsahil xchˈo̱l laj Herodión. Aˈan cuech tenamitil xban nak aˈan aj judío ajcuiˈ. Ut cheqˈue ajcuiˈ xsahil xchˈo̱leb li cuanqueb saˈ rochoch laj Narciso li ac xeˈpa̱ban. ¹² Cheqˈue xsahil xchˈo̱leb lix Trifena ut lix Trifosa li yo̱queb chi cˈanjelac saˈ xcˈabaˈ li Ka̱cuaˈ. Ut cheqˈue xsahil xchˈo̱l lix Pérsida, li nakara saˈ xcˈabaˈ li Cristo xban nak aˈan naxqˈue xchˈo̱l chi cˈanjelac chiru li Dios. ¹³ Cheqˈue xsahil xchˈo̱l laj Rufo, li sicˈbil ru chi cˈanjelac chiru li Ka̱cuaˈ, ut cheqˈue xsahil xchˈo̱l lix naˈ. Aˈan chanchan ajcuiˈ innaˈ chicuu la̱in. ¹⁴ Cheqˈue xsahil xchˈo̱l laj Asíncrito, laj Flegonte, laj Hermas, laj Patrobas, laj Hermes, joˈqueb ajcuiˈ chixjunileb laj pa̱banel, li nequeˈxchˈutub rib riqˈuineb chi xlokˈoninquil li Dios. ¹⁵ Cheqˈue xsahil xchˈo̱l laj Filólogo ut lix Julia, laj Nereo ut li ranab. Ut cheqˈue xsahil xchˈo̱l laj Olimpas joˈ eb ajcuiˈ chixjunileb laj pa̱banel li nequeˈxchˈutub rib riqˈuineb chixlokˈoninquil li Dios. ¹⁶ Qˈuehomak xsahil e̱chˈo̱l chi ribil e̱rib riqˈuin santil utzˈuc u. Chixjunileb laj pa̱banel nequeˈxtakla xsahil e̱chˈo̱l saˈ xcˈabaˈ li Jesucristo. ¹⁷ Ut nintzˈa̱ma che̱ru, ex herma̱n, nak cheqˈuehak retal li nequeˈyoˈoban jachoc ib saˈ e̱ya̱nk ut nequeˈraj xpoˈbal ru le̱ pa̱ba̱l, li tzolbilex cuiˈ. Me̱junaji e̱rib riqˈuineb aˈan. ¹⁸ Eb aˈan incˈaˈ nequeˈxba̱nu li cˈaˈru naraj li Ka̱cuaˈ Jesucristo. Caˈaj cuiˈ li cˈaˈru nequeˈxrahi ru lix chˈo̱leb, aˈan li nequeˈxba̱nu. Ut riqˈuin kˈunil a̱tin nequeˈkˈunbesin ut nequeˈxbalakˈi li incˈaˈ cauheb xchˈo̱l saˈ xpa̱ba̱leb. ¹⁹ Chixjunileb nequeˈnaˈoc re nak la̱ex cau e̱chˈo̱l saˈ le̱ pa̱ba̱l. Joˈcan nak nasahoˈ inchˈo̱l e̱riqˈuin. Aban nacuaj nak te̱qˈue e̱chˈo̱l chixba̱nunquil li us ut me̱ba̱nu li incˈaˈ us. ²⁰ Ut li Ka̱cuaˈ Dios, li naqˈuehoc li tuktu̱quil usilal, aˈan tixsach xcuanquil laj tza ut textenkˈa re nak la̱ex chic texnumta̱k saˈ xbe̱n. Li rusilal li Ka̱cuaˈ Jesucristo chicua̱nk e̱riqˈuin. ²¹ Naxtakla xsahil e̱chˈo̱l laj Timoteo, li cuech aj cˈanjelil. Ut nequeˈxtakla xsahil e̱chˈo̱l laj Lucio, laj Jasón ut laj Sosípater. Eb aˈan cuech tenamitil. ²² La̱in laj Tercio. Yo̱quin chixtzˈi̱banquil li hu aˈin li tixtakla e̱re laj Pablo. Ut nintakla ajcuiˈ xsahil e̱chˈo̱l saˈ xcˈabaˈ li Cristo. ²³ Naxtakla ajcuiˈ xsahil e̱chˈo̱l laj Gayo, li naqˈuehoc cuochochnal. Ut saˈ ajcuiˈ li rochoch aˈan nequeˈxchˈutub rib laj pa̱banel. Laj Erasto, laj cˈulul tumin saˈ li tenamit, naxtakla xsahil e̱chˈo̱l. Ut naxtakla ajcuiˈ xsahil e̱chˈo̱l laj Cuarto. ²⁴ Aˈ taxak li rusilal li Ka̱cuaˈ Jesucristo chicua̱nk e̱riqˈuin che̱junilex la̱ex. Joˈcan taxak.

Laj Pablo naxlokˈoni li Ka̱cuaˈ Dios

²⁵ Chikalokˈonihak taxak li Ka̱cuaˈ Dios, li cuan xcuanquil re xqˈuebal xcacuilal kachˈo̱l saˈ li kapa̱ba̱l. Ninchˈolob xya̱lal che̱ru chirix li colba‑ib saˈ xcˈabaˈ li Jesucristo. Najter kˈe cutan mukmu chak li xya̱lal chiku; aban anakcuan cˈutbesinbil chic lix ya̱lal chiku. ²⁶ Anakcuan xcutanoˈ xya̱lal chiku xban li Santil Hu li tzˈi̱banbil chak junxil xbaneb li profeta. Queˈxtzˈi̱ba chak li a̱tin joˈ quiyeheˈ reheb xban li Dios, li ma̱cˈaˈ rosoˈjic. Ut aˈin yo̱ xchˈolobanquil xya̱lal yalak bar saˈ chixjunil li ruchichˈochˈ re nak chixjunileb li tenamit teˈrabi ut teˈpa̱ba̱nk. ²⁷ Li jun chi Dios, li naxnau chixjunil, chicua̱nk xlokˈal saˈ xcˈabaˈ li Ka̱cuaˈ Jesucristo anakcuan ut chi junelic kˈe cutan. Joˈcan taxak.