Beginning

योआस आपन हुकूमत सुरू करत ह

12 योआस इस्राएल मँ येहू क राज्जकाल क सताएँ बरिस मँ हुकूमत करब सुरू किहस। योआस चालीस बरिस तलक यरूसलेम मँ हुकूमत किहस। योआस क महतारी सिब्या बर्सेबा क रही। ² योआस उ सबहिं कार्य किहस जेनका यहोवा नीक कहे रहा। योआस पूरी जिन्नगी यहोवा क आग्या क पालन किहस। उ उ सबइ कार्य किहस जेनकर सिच्छा याजक यहोयादा ओका दिहे रहा। ³ मुला उ उच्च ठउरन क बर्बाद नाहीं किहस। लोग तब तलक भी ओन पूजा क ठउरन पइ बलि भेंट करतेन अउ सुगन्धि बारत रहेन।

योआस मन्दिर क मरम्मत क आदेस दिहस

^4-5 योआस याजकन स कहेस, “यहोवा क मन्दिर मँ बहोत धन अहइ। लोग मन्दिर मँ चिजियन दिहे अहइँ। लोग गणना क समइ मन्दिर क कर दिहेन ह अउर लोगन आपन इच्छा स धन दिहे ह। याजकन, आप लोग उ धन क लइ लेइँ अउर यहोवा क मन्दिर क मरम्मत करवाइ देइँ।”

⁶ मुला याजक लोग मरम्मत नाहीं किहन। योआस क राज्जकाल क तेईसवें बरिस मँ भी याजक लोग तब तलक मन्दिर क मरम्मत नाहीं किहे रहेन। ⁷ एह बरे योआस याजक यहोयादा अउ दूसर याजकन क बोलाएस। योआस यहोयादा अउ दूसर याजकन स पूछेस, “आप मन्दिर क मरम्मत काहे नाहीं किहन? आप ओन लोगन स धन लेब बन्द करइँ जेनकर आप सेवा करत हीं। उ धने क उपयोग मँ लिआउब बंद करइँ। उ धने क उपयोग मन्दिर क मरम्मत मँ होइ चाही।”

⁸ याजक लोग यहोवा स धन न लेब स्वीकार किहन। मुला उ पचे मन्दिर क मरम्मत न करइ क निहचइ किहेन। ⁹ एह बरे याजक यहोयादा स एक ठु सन्दूख लिहस अउ ओकरे ऊपरी हींसा मँ एक छेद कइ दिहस। तब यहोयादा सन्दूख क बेदी क दक्खिन कइँती रख दिहस। इ सन्दूख उ दरवाजे क लगे रहा जेहसे लोग यहोवा क मन्दिर मँ आवत रहेन। कछू याजक मन्दिर क दुआर-पथे क रच्छा करत रहेन। उ सबइ याजक उ धने क जेका लोग यहोवा क देत रहेन, लइ बते रहेन अउर उ सन्दूख मँ डाइ देत रहेन। जब लोग मन्दिर क जात रहेन तब उ पचे उ सन्दूख मँ सिक्कन डावत रहेन।

¹⁰ जब भी राजा क सचिव अउ महायाजक इ जानतेन कि मन्दिर मँ रखे सन्दूख मँ बहोत धन अहइ तउ उ पचे अउतेन अउर सन्दूख स धन क निकार लेतेन। उ पचे धन क थइलन मँ रखतेन् अउर ओका गिन लेत रहेन। ¹¹ तब उ पचे ओन मजदूरन क भुगतान करतेन जउन यहोवा क मन्दिर मँ काम करत रहेन। उ पचे यहोवा क मन्दिर मँ काम करइवालन बढ़इयन अउ दूसर कारीगरन क भुगतान करत रहेन। ¹² उ पचे धन क उपयोग पाथर क कामगारन अउ पाथर तरासन क भुगतान करइ मँ करत रहेन अउर उ पचे उ धने क उपयोग लकड़ी, काटे पाथर, अउर यहोवा क मन्दिर क मरम्मत क बरे दूसर चिजियन क बेसहइ मँ करत रहेन।

^13-14 लोग योहवा क मन्दिर क बरे धन दिहन। किन्तु याजक उ धने क उपयोग चाँदी क बर्तन, बत्ती- झाड़नी, चिलमची, तुरही या कउनो भी सोना- चाँदी क तस्तरियन क बनाबइ मँ नाहीं कइ सकेन। उ धन मजदूरून क भुगतान करइ मँ लगा अउर ओन मजदूरन यहोवा क मन्दिर क मरम्मत किहन। ¹⁵ कउनो सारे धन क हिसाब नाहीं किहस या कउनो कार्यकर्त्ता क इ बतावइ बरे मजबूर नाहीं कीन्ह गवा कि धने क का भवा? काहेकि ओन कार्यकर्त्तन पइ बिस्सास कीन्ह जाइ सकत रहा।

¹⁶ लोग उ समइ धन दिहस जब उ पचे दोखबलि या पापबलि चढ़ाएन। किन्तु उ धने क उपयोग मजदूर क भुगतान क बरे नाहीं कीन्ह गवा। उ धन याजकन क रहा।

योआस हजाएल स यरूसलेम क रच्छा करत ह

¹⁷ हजाएल अराम क राजा रहा। हजाएल गत नगर क खिलाफ जुद्ध करइ गवा। हजाएल गत क हराएस। तब उ यरूसलेम क खिलाफ जुद्ध करइ जाइ क जोजना बनाएस।

¹⁸ यहोसापात, यहोराम अउ अहज्याह यहूदा क राजा रह चुके रहेन। उ पचे योआस क पुरखा रहेन। उ पचे यहोवा क बहोत स चिजियन भेंट किहे रहेन। उ सबइ चिजियन मन्दिर मँ रखी रहिन। योआस भी बहोत स चिजियन यहोवा क भेंट किहे रहा। योआस ओन सबहिं बिसेस चिजियन अउ मन्दिर अउ अपने महल मँ रखे भए सारे सोना क लिहस। तब योआस ओन सबहिं कीमती चिजियन क अराम क राजा हजाएल क लगे पठएस। इहइ स हजाएल अपनी फउज क यरूसलेम स हटाइ लिहस।

योआस क मउत

¹⁹ योआस जउन बड़के कारज किहस उ सबइ सबहिं यहूदा क राजा लोगन क इतिहास क किताबे मँ लिखे गए अहइँ।

²⁰ योआस क अधिकारी लोग ओकरे खिलाफ जोजना बनाएस। उ पचे योआस क सिल्ला तलक जाइ वाली सड़किया पर स्थित मिल्लो क घरे पइ मार डाएस। ²¹ सिमात क पूत योजाकर अउ सोमेर क पूत यहोजाबाद योआस क अधिकारी रहेन। ओन मनइयन योआस क मार डाएन।

लोग दाऊद नगर मँ योआस क ओकरे पुरखन क संग दफनाएन। योआस क पूत अमस्याह ओकरे पाछे नवा राजा बना।

यहोआहाज अपनी हुकूमत सुरू करत ह

13 येहू क पूत यहोआहाज सोमरोन मँ इस्राएल क राजा बना। इ अहज्याह क पूत योआस क यहूदा मँ राज्जकाल क तेईसवें बरिस मँ भवा। राजा बनइ क पाछे यहोआहाज सत्रह बरिस सोमरोन मँ राज्ज किहस।

² यहोआहाज उ सबइ कारज किहेस जेनका यहोवा बुरा बताए रहा। यहोआहाज नबात क पूत यारोबाम क पापन क अनुसरण किहस जउन इस्राएल स पाप कराएस। यहोआहाज ओन कामन क करब बंद नाहीं किहेस। ³ तब यहोवा इस्राएल पइ बहोत कोहाइ गवा। यहोवा इस्राएल क अराम क राजा हजाएल अउ ओका पूत बेन्हदद क अधीन कइके लम्बे समइ तलक सज़ा दिहेस।

यहोवा इस्राएल क लोगन पइ कृपा किहेस

⁴ तब यहोआहाज यहोवा स मदद बरे पराथना किहेस अउर यहोवा ओकर पराथना सुनेस। यहोवा इस्राएल क लोगन क कस्ट अउ अराम क राजा क उत्पीड़न लखे रहा।

⁵ एह बरे यहोवा एक मनई क इस्राएल क रच्छा बरे पठएस। इस्राएली अरामियन स अजाद होइ गएन। एह बरे, इस्राएली, पहले क तरह अपने घरे लउट गएन।

⁶ मुला इस्राएलियन फुन भी, ओन यारोबाम क परिवार क पापन क करब बंद नाहीं किहस। यारोबाम इस्राएल स पाप करवाएस, अउर इस्राएली निरंतर पाप करम करत रहेन। उ पचे असेरा क खंभन क भी सोमरोन मँ धरेन।

⁷ अराम क राजा यहोआहाज क फउज क हराइ दिहस। अराम क राजा जियादा हींसा क लोगन क नस्ट कइ दिहस। उ सिरिफ पचास घुड़सवार, दस रथ, अउर दस हजार पैदल फउजी छोड़ेस। यहोआहाज क फउजी दायं चलावत समइ हवा स उड़ाए गए भूसे क तरह रहेन।

⁸ सबहिं बड़े कारज जउन यहोआहाज कहेस, इस्राएल क राजा लोगन क इतिहास क किताबे मँ लिखे अहइँ। ⁹ यहोआहाज मरा अउर अपने पुरखन क संग दफनावा गवा। लोग यहोआहाज क सोमरोन मँ दफनाएन। यहोआहाज क पूत यहोआस ओकरे पाछे नवा राजा भवा।

इस्राएल पइ यहोआस क हुकूमत

¹⁰ यहोआहाज क पूत यहोआस सोमरोन मँ इस्राएल क राजा भवा। इ योआस क यहूदा मँ राज्जकाल क सैतीस्वें बरिस मँ भवा। यहोआस इस्राएल पइ सोलह बरिस तलक राज्ज किहस। ¹¹ इस्राएल क राजा यहोआस उ सबइ कारज किहेस जेनका यहोवा बुरा बताए रहा। उ नबात क पूत यारोबाम क पापन क बंद नाहीं किहस जउन इस्राएल स पाप कराएस। यहोआस ओन पापन क करत रहा। ¹² सबहिं बड़के कारज जउन यहोआस किहस अउर यहूदा क राजा अहज्याह क खिलाफ उ जउन जुद्ध किहस उ सबइ इस्राएल क राजा लोगन क इतिहास क किताबे मँ लिखे अहइँ। ¹³ यहोआस मरा अउ अपने पुरखन क संग दफनावा गवा। यारोबाम नवा राजा बना अउर यहोआस क राजा सिहांसने पइ बइठा। यहोआस सोमरोन मँ इस्राएल क राजा लोगन क संग दफनावा गवा।

यहोआस एलीसा स भेंट करत ह

¹⁴ एलीसा बीमार पड़ा। पाछे एलीसा बेरामी स मर गवा। इस्राएल क राजा यहोआस एलीसा भेंटइ गवा। यहोआस एलीसा बरे रोएस। यहोआस कहेस, “मोर बाप। मोर बाप! का इ इस्राएल क रथन अउ घोड़न क बरे समइ अहइ?”

¹⁵ एलीसा यहोआस स कहेस, “एक ठु धनुस अउ कछू बाण ल्या।”

अत: बह धनुस-बाण ले आया। ¹⁶ तब एलीसा इस्राएल क राजा स कहेस, “आपन हाथ धनुस पइ धरा।” तब एलीसा आपन हाथ राजा क हाथे पइ रखेस। ¹⁷ एलीसा कहेस, “पूरब क खिड़की खोला।” यहोआस खिड़की खोलेस। तब एलीसा कहेस, “बाण चलावा।”

यहोआस बाण चलाइ दिहस। तब एलीसा कहेस, “इ यहोवा क बिजय क बाण अहइ। इ अराम पइ बिजय क बाण अहइ। तू अरामियन क अपेक मँ हरउब्या अउर तू ओनका नस्ट कइ देब्या।”

¹⁸ एलीसा कहेस, “बाण ल्या।” योआस बाण लिहस। तब एलीसा इस्राएल क राजा स कहेस, “भुइँया पइ प्रहार करा।”

योआस भुइँया पइ दीन दाईं प्रहार किहस। तब उ रूक गवा। ¹⁹ परमेस्सर क जन योआस पइ कोहाइ गवा। एलीसा कहेस, “तोहका पाँच या छ: दाईं धरती पइ प्रहार करइ चाही रहा। तब तू अराम क ओका नस्ट करइ तलक हरउब्या। किन्तु अब तू अराम क सिरिफ तीन दाईं हरउब्या।”

एलीसा क कब्र पइ एक अद्भुत बात होत ह

²⁰ एलीसा मरा अउ लोग ओका दफनाएन।

एक दाईं बसन्त मँ मोआबी फउजियन क एक दल इस्राएल पई छापा मारेस। उ पचे जुद्ध मँ सामग्री लेइ आएन। ²¹ कछू इस्राएली एक मरे मनई क दफनावत रहेन अउर उ पचे फउजियन क उ दल क लखेन। इस्राएलियन हाली मँ ल्हास क एलीसा क कब्र मँ फेंक दिहेन अउर उ पचे भाग खड़े भएन। जइसेन ही उ मरा मनई एलीसा क हाड़न क छुएस, मरा मनई जी उठा अउर अपने गोड़न पइ खड़ा होइ गवा।

यहोआस एलीसा स भेंट करत ह

²² यहोआहाज पूरे सासन काल मँ अराम क राजा हजाएल इस्राएल क परेसान किहस। ²³ किन्तु यहोवा इस्राएलियन पइ दयालु रहा। यहोवा क दया आइ अउर उ इस्राएलियन कइँती भवा। काहे? काहेकि इब्राहीम, इसहाक अउर याकूब क संग अपनी वाचा क कारण, यहोवा इस्राएलियन क अबहिं नस्ट करइ बरे तइयार नाहीं रहा। उ अबहिं तलक ओनका अपने स दूर नाहीं फेंके रहा।

²⁴ अराम क राजा हजाएल मरा अउर ओकरे पाछे बेन्हदद नवा राजा बना। ²⁵ मरइ क पहले हजाएल योआस क पिता यहोआहाज क जुद्ध मँ कछू नगर लिहे रहा। किन्तु अब यहोआहाज हजाएल क पूत बेन्हदद स उ सबइ नगर वापस लइ लिहस। योआस बेन्हदद क तीन दाईं हराएस अउर इस्राएल क नगरन क वापस लिहस।

अमस्याह यहूदा मँ आपन हुकूमत सुरू करत ह

14 योआस क पूत अमस्याह, इस्राएल क राजा यहोआहाज क पूत योआस क हुकूमत काल क दूसरे बरिस मँ यहूदा क राजा भवा। ² अमस्याह जब हुकूमत करब सूरू किहस, उ पचीस बरिस क रहा। अमस्याह उनतीस बरिस तलक यरूसलेम मँ राज्ज किहस। अमस्याह क महतारी यहोअद्दान यरूसलेम क निवासी रही। ³ अमस्याह उ सबइ कारज किहेस जेनका यहोवा नीक बताए रहा। किन्तु उ आपन पुरखा दाऊद क तरह परमेस्सर क अनुसरण पूरी तरह स नाहीं किहस। अमस्याह उ सबइ सारे काम किहस जउन ओकर बाप योआस किहे रहेन। ⁴ उ उच्च ठउरन क नस्ट नाहीं किहस। लोग ओन पूजा क ठउरन पइ बलि देतेन अउर सुगन्धि बारत रहेन।

⁵ राज्ज पइ पूरा अधिकार करइ क पाछे अमस्याह ओन अधिकारियन क मार डाएस जउन ओकरे बाप क मारे रहेन। ⁶ मुला उ हत्तियारन क बच्चन क, मूसा क व्यवस्था क किताबे मँ लिखे नेमन क कारण नाहीं मारेस। यहोवा आपन इ आदेस मूसा क व्यवस्था मँ दिहे रहा: “महतारी- बाप बच्चन क जरिये कछू कीन्ह जाइ क कारण मारे नाहीं जाइ सकतेन अउर बच्चन अपने महतारी बाप क जरिये कछू कीन्ह जाइ क कारण मारे नाहीं जाइ सकतेन। कउनो मनई सिरिफ अपने ही बुरे कारज बरे मारा जाइ सकत ह।”

⁷ अमस्याह नून घाटी मँ दस हजार एदोमियन क मार डाएस। जुद्ध मँ अमस्याह सेला क जीतेस अउर ओकर नाउँ “योक्तेल” धरेस। उ ठउर आजु भी योक्तेल कहा जात ह।

अमस्याह योआस क खिलाफ जुद्ध छेड़इ चाहत ह

⁸ अमस्याह इस्राएल क राजा येहू क पूत यहोआहाज अउर यहाआहाज क पूत योआस क लगे संदेसवाहक पठएस। अमस्याह क संदेस मँ कहा, “आवा, हम आपुस मँ जुद्ध करी। आमने सामने होइके एक दूसरे क मुकाबला करी।”

⁹ इस्राएल क राजा योआस यहूदा क राजा अमस्याह क उत्तर पठएस। योआस कहेस, “लबानोन क एक ठु कँटेहरी झाड़ी देवदारू बृच्छ क लगे एक संदेसा पठएस। सँदेसा इ रहा, ‘अपनी बिटिया, मोरे पूत क संग बियाहे बरे द्या।’ मुला लबानोन क एक जंगली जनावर ओहर स निकरा अउर कँटेहरी झाड़ी क कुचर गवा। ¹⁰ इ फुर अहइ कि तू एदोम क हराया ह। किन्तु तू एदोम पइ जीत क कारण घमण्डी होइ गवा अहा। आपन प्रसिद्धि क आनंद उठावा अउर घरे पइ रहा। आपन बरे परेसानियन मत खड़ी करा। जदि तू अइसा करब्या तउ तू हार जाब्या अउर तू आपन संग यहूदा क भी हराउब्या।”

¹¹ मुला अमस्याह योआस क चितवनी क नाहीं सुनेन। एह बरे इस्राएल क राजा योआस यहूदा क राजा अमस्याह क खिलाफ यहूदा क बेतसेमेस मँ लड़इ बरे गवा। ¹² इस्राएल यहूदा क हराइ दिहस। यहूदा क हर एक मनई घरे पराइ गवा। ¹³ बेतसेमेस मँ इस्राएल क राजा योआस यहूदा क राजा अमस्याह क बन्दी बनाइ लिहस। अमस्याह योआस क पूत रहा। योआस अहज्या क पूत रहा। योआस अमस्याह क यरूसलेम लइ गवा। योआस एप्रैम दुआर स कोने क फाटक तलक लगभग छ: सौ फुट यरूसलेम क देवार क गिरवाएस। ¹⁴ तब योआस सारा सोना- चाँदी अउर जउन भी बर्तन यहोवा क मन्दिर अउर राजमहल क खजाने मँ रहेन। ओन सब क लूट लिहस। योआस कछू लोगन क बन्दी बनाइ लिहस। तब उ सोमरोन क वापस लउट गवा।

¹⁵ जउन सबहिं बड़के कारज योआस किहस, साथ ही साथ यहूदा क राजा अमस्याह क संग उ कइसे लड़ा, इस्राएल क राजा लोगन क इतिहास क किताबे मँ लिखे गए अहइँ। ¹⁶ योआस मरा अउर अपने पुरखन क संग दफनावा गवा। योआस सोमरोन मँ इस्राएल क राजा लोगन क संग दफनावा गवा। योआस क पूत यारोबाम ओकरे पाछे नवा राजा भवा।

अमस्याह क मउत

¹⁷ यहूदा क राजा योआस क पूत अमस्याह इस्राएल क राजा यहोआहाज क पूत योआस क मउत क पाछे पन्द्रह बरिस तलक जिआ। ¹⁸ अमस्याह जउन कारज किहस उ सबइ यहूदा क राजा लोगन क इतिहास क किताबे मँ लिखे गएन अहइँ। ¹⁹ लोग यरूसलेम मँ अमस्याह क खिलाफ एक ठु जोजना बनाएन। अमस्याह लाकीस क पराइ निकरा। मुला लोग अमस्याह क खिलाफ लाकीस क अपने मनई पठएस अउर ओन लोग लाकीस मँ अमस्याह क मार डाएस। ²⁰ लोग घोड़न पइ अमस्याह क ल्हास क वापस लइ आएन। अमस्याह दाऊद नगर मँ अपने पुरखन क संग यरूसलेम मँ दफनावा गवा।

अजर्याह यहूदा पइ आपनी हुकूमत सुरू करत ह

²¹ तब यहूदा क सबहिं लोग अजर्याह क ओकरे बाप अमस्याह क जगह पइ नवा राजा बनाएन। अजर्याह सोलह बरिस क रहा। ²² इ तरह अमस्याह मरा अउर अपने पुरखन क संग दफनावा गवा। तब अजर्याह एलत क यहूदा बरे फुन पाएस अउर ओका फुन बनाएस।

यारोबाम दूसरा इस्राएल पइ हुकूमत सुरू करत ह

²³ इस्राएल क राजा योआस क पूत यारोबाम सोमरोन मँ यहूदा क राजा योआस क पूत अमस्याह क राज्जकाल क पन्द्रहवें बरिस मँ हुकूमत करब सुरू किहस। ²⁴ यारोबाम उ सबइ कारज किहेस जेनका यहोवा बुरा बताएस। यारोबाम उ नबात क पूत यारोबाम क पापन क करब बंद नाहीं किहस, जउन इस्राएल क पाप करइ बरे मजबूर किहस। ²⁵ यारोबाम उ भुइँया क, जउन लेवी हमात स अराबा क सागर तलक जात रही, वापस लिहस। इ वइसा ही भवा जइसा इस्राएल क यहोवा परमेस्सर अपने सेवक, अमित्तै क पूत योना स कहे रहा। जउन कि गथेपेर क नबी रहा। ²⁶ यहोवा लखेस कि सबहिं इस्राएली, चाहे उ पचे अजाद होइँ या दास, बहोत स परेसानियन मँ अहइँ। कउनो मनई अइसा नाहीं बचा जउन इस्राएल क मदद कइ सकत रहा। ²⁷ यहोवा इ नाहीं काहे रहा कि उ संसार स इस्राएल क नाउँ उठाइ लेइ। एह बरे यहोवा योआस क पूत यारोबाम क उपयोग इस्राएल क लोगन क रच्छा बरे किहेस।

²⁸ यारोबाम जउन बड़के कारज किहस उ सबइ इस्राएल क राजा लोगन क इतिहास क किताबे मँ लिखे अहइँ। ओहमाँ इस्राएल क बरे दमिस्क अउर हमात क यारोबाम जरिये वापस जीत लेइ क कथा सामिल अहइ। (पहिले इ सबइ नगर यहूदा क आधिपत्य मँ रहेन।) ²⁹ यारोबाम मरा अउर इस्राएल क राजा लोगन, अपने पुरखन क संग दफनावा गवा। यारोबाम क पूत जकर्याह ओकरे पाछे नवा राजा भवा।