Beginning

¹ Dee Eltesta aun dee uterwaelde Fru en aeare Kjinja, daen ekj leef ha enne Woarheit, en nich bloos ekj, oba uk aul dee, dee de Woarheit jekjant ha,

² omm dee Woarheit haulwe dee mank onns blift, en met onns senne woat bott enne Eewichkjeit.

³ Jnod, Erboarme, en Fraed fonn Gott daem Foda, en Jesus Christus, daem Foda sien Saen, woare met onns senne enne Woarheit en Leew.

⁴ Ekj ha mie seeha jefreit wiel ekj walkje fonn diene Kjinje funk dee enne Woarheit waundle, soo aus wie fom Foda en Jeboot jekjraeaje haude.

⁵ En nu bed ekj die, Fru, nich soo aus wan ekj die en niehet Jeboot schriew, oba daut waut wie fonn Aunfank jehaut ha, daut wie onns selle unjarenaunda leef ha.

⁶ En dit es Leew, daut wie no siene Jeboote waundle. Dit es daut Jeboot, soo aus jie fom Aunfank heade, daut jie doarenn waundle sulle.

⁷ Dan doa sent fael Fefeara enne Welt enenn jekome, dee nich bekjanne daut Jesus Christus enn Fleesch jekome es; dit es en Fefeare en en Antikjrist.

⁸ Seet junt faea, daut jie daut nich feleare fa waut wie je-oabeit ha, oba daut jie en follet Loon kjriehe.

⁹ Waeaemma wajch jeit en nich enn Christus siene Lea blift, haft Gott nich; waea enn siene Lea blift, haft beides daem Foda uk daem Saen.

¹⁰ Wan waea no junt kjemt en dise Lea nich brinjt, naemt daem nich enn jun Hus enenn, en bejreest am uk nich;

¹¹ dan waea soone bejreest, nemt Aundeel aun siene beese Woakje.

¹² Ekj ha noch fael die to schriewe, oba ekj woa daut nich met Papia en Tint, oba ekj hop boolt met junt toop to kome, en dan woa wie direkjt toop raede, daut onnse Freid kaun Foll senne. Diene uterwaelde Sesta aeare Kjine jreese die

¹ De Eltesta aun daen leefsta Gajus, daem ekj enne Woarheit leef ha.

² Leefsta Frint, ekj baed daut die daut enn aulem mucht Goot gone, en daut du Jesunt best, en dautet met diene Seel uk Goot es.

³ Ekj freid mie seeha aus walkje Breeda kjeeme en Zeichnes jeewe fonn die en dee Woarheit dee enn die es, en daut du enn Woarheit waundle deist.

⁴ Ekj ha kjeene jratre Freid aus wan ekj hea daut miene Kjinje enne Woarheit waundle.

⁵ Leefsta Frint, du best Tru enn wautemma fa Oabeit du fa dee Breeda en Framde deist,

⁶ dee enn Leew Zeichnes jejaeft ha fere Jemeent. En du deist uk Goot wan du daen oppem Wajch halpst, soo aus Gott daut jefelt..

⁷ Dan see jinje rut omm Gott sien Nome haulwe, en neeme nusscht fonn dee Heide.

⁸ Doaromm sull wie soone oppnaeme, soo daut wie kjenne Metoabeide senne enne Woarheit.

⁹ Ekj schreef waut no dee Jemeent, oba Diotrefes dee jearen wel daut Easchte senne, nemt onns nich opp.

¹⁰ Doaromm, wan ekj kom, woa ekj siene Woakje behoole dee hee jedone haft, en dee beese Wead dee hee jaeajen onns jeraet haft. En nich daut hee doamet tofraed es, hee nemt selfst dee Breeda nich opp, en daen dee daut muchte, lat hee nich, en stat daen ut de Jemeent erut.

¹¹ Leefsta Brooda, doo daut Schlajchtet nich metmoake, leewa daut Goodet. Waeaemma Goodet deit, es fonn Gott, en waeaemma Schlajchtet deit, haft Gott nich jeseene.

¹² Aule jaewe goodet Zeichnes fonn Demeetrius, en uk dee Woarheit selfst. En wie jaewe uk Zeichnes, en du weetst daut onns Zeichness Woa es.

¹³ Ekj ha fael die to schriewe, oba ekj wel daut nich met Tint en Fada doone.

¹⁴ Ekj hop die em Korte to seene, en dan woa wie onns aunkjikje en toop raede.

¹⁵ Jnod met die! Jrees diene Frind. Jrees de Frind bie Nome

¹ Judas, Jesus Christus sien Sklow, en Jakoobas sien Brooda, aun daen, daen Gott de Foda leef haft jehaut, en dee enn Jesus Christ beroope sent.

² Mucht Jnod, Fraed en Leew aun junt femeat woare.

³ Leefste Frind, aus ekj flietijch wea junt to schriewe waeajen onnse aulejemeena Seelichkjeit, feeld ekj daut needich daut ekj junt schriewe sull daut jie opp earenst kjamfe sulle fa daen Gloowe dee een fa aulamol dee Heilje aunfetrut es.

⁴ Dan jewesse Mana ha sikj enenn jeschlikjt, daen aea Uadeel fa daut Jerecht ferhaea aul beschraewe wea, gottloose Mana, dee Gott siene Jnod fedreihe en brucke daut aus en Grunt fa looset laewe, en feleaje daen eensje Meista en onns Herr Jesus Christus.

⁵ Ekj wel junt doaromm denkje halpe, wan jie daut uk to eene Tiet wiste, daut de Herr daut Follkj ut Ejipte jerat haud, doch nohaea daen ommbrocht dee nich jleewde.

⁶ En dee Enjel dee aea Harschoffts Rikj nich bewoade, en aeare eajne Woninj feleete, haft hee bewoat enn eewje Kjaede tom Jerecht aun jan groota Dach.

⁷ Soo aus uk Soodom en Gomora en dee Staede runt omm, dee Huararie dreewe en no framdet Fleesch hinjaraun weare, en sent en Biespel jemoakt enn daem daut see eewje Strof liede.

⁸ Jrod soo schende dise Dreema werklijch aea eajna Lief, en lastre hechre Harlichkjeit.

⁹ Aus Miechael dee hechsta Enjel sikj met daem Diewel street aewa Mooses sien Lief, woagd hee sikj nich en lastalijet Uadeel jaeajen am to brinje, oba saed: "De Herr woat die strofe".

¹⁰ Oba aun eene Haunt weete dise Mana nich jaeajen waut see lastre, oba aune aundre waut see festone emm Natierleiche aus onnfeninftje Teare, sent see doaderch ommjekome.

¹¹ Wee an! dan see sent enn Kain sien Wajch jegone, en aewajeewe sikj enn Bieliam sien Erwajch enenn fa Jewenst, en kjeeme omm enn Kora siene Opprua.

¹² Dise Mana sent dee Placke enn june Leew Moltiede dee met junt aete oone Forcht, dee bloos fa sikj selfst sorje, Wolkje oone Raeajen dee metem Wint wajch jeblost woare, Hoafstbeem oone Frucht, dobbelt Doot, utjeraete,

¹³ wile Wale oppem Maea dee aea eajne Schaund utschume, errende Stearns, fa daen de dunkelste Diestanes enn Eewichkjeit bestemt es.

¹⁴ Fonn soone haft uk Heenoch, de saewende fonn Adam, jeprofitseit en jesajcht: "Kjikj! de Herr es jekome met tean dusende fonn siene Heilje,

¹⁵ Jerecht to eewe aewa aule Mensche, en aule Gottloose to strofe waeajen aeare Gotloosichkjeit enn aea Gottlooset Laewe, en aul dee shoape Wead dee de Sinda jaeajen am jesajcht ha."

¹⁶ Daut sent Merda, dee sent onntofraed, dee no aeare eajne Losst waundle; en aeare Miela raede stollte Dinje, en achte aundre huach bloos fa aea eajnet Jenotte.

¹⁷ Jie oba, miene leefste, denkt aun dee Wead dee onns Herr Jesus Christus siene Apostel ferhaea jeraet haude.

¹⁸ Dan see saede to junt: "Enne latste Tiet woare fael Spetta senne, dee no aeare eajne gottloose Losst waundle woare.

¹⁹ Dit sent dee, dee Spoolunje aunstale, sent irdish jesonne, dee daen Jeist nich ha.

²⁰ Oba jie, miene Leefste, but junt opp enn jun aulaheilichste Gloowe, en baet enn daem Heilje Jeist.

²¹ Hoolt junt enn Gott siene Leew, en luat no onns Herr Jesus Christus sien Erboarme to daut eewjet Laewe.

²² Erboarmt junt aewe soone dee twiewle,

²³ en doot daen rade soo aus utem Fia rut riete; en erboarmt junt aewe aundre en Forcht, en haust sogoa daut Kjleet daut metem Fleesch besudelt es.

²⁴ Daem oba, dee junt oone stolpre bewoare kaun, en junt onnschuldich en met groote Freid kaun fer siene Harlijchkjeit hanstale,

²⁵ onns eensja Gott en Heilaunt, jeheat aule Harlichkjeit, Majestaet, Macht, en Jewault, nu, en enn aule Eewijchkjeit. Amen.