Book of Common Prayer

यहोवा क प्रतिग्यन

10 बसन्त ऋतु मँ यहोवा स बरखा बरे पराथना करा। यहोवा बिजुरी पठइ अउ बरखा होइ। उ हर एक मनई क खेते मँ अनाजन उगाइ।

² मूर्तियन स प्राप्त कीन्ह गवा सँदेस बेकार अहइ जादूगर लबार दर्सन रखत हीं; सपन दर्सी व्यर्थ बात करत हीं; उ पचे कउनो एक क भी आराम नाहीं पहोंचाइ सकत। एह बरे परमेस्सर क लोग भेड़िन क तरह एहर-ओहर भटकत अहइँ अउर ओनका राह देखावइवाला कउनो गड़रिया नाहीं।

³ यहोवा कहत ह, “मइँ गड़रियन (प्रमुखन) पइ बहोत कोहान अहउँ। मइँ ओन प्रमुखन क आपन भेड़िन क (लोगन) देखरेख क जिम्मेदारी सौंपे रहेउँ।” (यहूदा क लोग परमेस्सर क खरका अहइँ अउर सर्वसक्तीमान यहोवा, फुरइ, आपन खरका क देखरेख करत ह। उ ओनकर अइसी देखरेख करत ह, जइसे कउनो फउजी आपन घोड़ा क राखत ह।)

⁴ “कोने क पाथर, डेरा क खूँटी, युद्ध क धनुस अउ अगवा बाढ़त फउजी सबहिं यहूदा स एक संग अइहीं। ⁵ जुद्ध मँ उ पचे जोद्धन क समान होइ जउन दुस्मनन क गलियन क कींच मँ रौंद देत हीं। उ पचे युद्ध करिहीं, अउर यहोवा ओनके संग अहइ। एह बरे उ पचे घोड़सवारन क भी हरइहीं। ⁶ मइँ यहूदा क लोगन क सक्तीसाली बनाउब अउ मइँ यूसुफ क लोगन क रच्छा करब। मइँ ओनका वापिस लइ आउब काहेकि मइँ ओह पइ दाया महसूस करत हउँ। मइँ ओकर संग अइसा बेउहार करब जइसा कि मइँ कभी ओका नाहीं तजेउँ ह। काहेकि मइँ यहोवा, ओनकर परमेस्सर हउँ अउर मइँ ओनकर पराथना क जवाब देब। ⁷ एप्रैम क लोग जोद्धन क नाईं होइ। उ पचे आपन हिरदइ मँ अइसा खुसी महसूस करब जइसा कि उ दाखरस स भरा गवा अहइ। ओनकर सन्तानन एका लखेहीं अउर उ पचे आनंद मनइहीं अउर ओनकर हिरदइ यहोवा मँ खुस होइ।

⁸ “मइँ ओनका सीटी दइके सबन क एक संग बोलाउब। काहेकि मइँ ओनकर रिहाई बरे धन देइ चुका अहउँ, उ सबइ लोग अनगिनत होइ जइहीं जइसा उ पहिले रहेन। ⁹ मइँ सबहिं रास्ट्रन क बीच मँ स ओका छिरताइ देब, मुला मोका दूर क देसन मँ याद करिहीं। उ पचे अउर ओनकर सन्तानन बची रइहीं। अउर उ पचे वापस अइहीं। ¹⁰ मइँ ओनका मिस्र वापस लिआउब अउर मइँ ओनका अस्सूर मँ एकट्ठा करब। मइँ ओनका गिलाद अउ लबानोन क भूइँया मँ लिआउब अउर हुआँ ओन लोगन बरे काफी जगहिया नाहीं होइ।” ¹¹ उ गुर्रात भवा समुद्दर क पार करब अउ लहरन पइ चोट करब। तब नील नदी क सबइ घहरा भाग सूख जाई, अस्सूर क घमण्ड नीचा होइ जाई, अउ मिस्र सक्ति छीन लीन्ह जाई। ¹² यहोवा आपन लोगन क सक्तीसाली बनाइ अउर उ पचे ओनके अउ ओनके नाउँ बरे जिअत रइहीं। यहोवा इ सब कहेस।

एक दुसरे क सहायता करा

6 भाइयो तथा बहिनियो, तोहरे मँ स अगर कउनउ मनई गलत काम करत पकड़ा जाय तउ आत्मिक लोगन क चाही कि नम्रता क साथे ठीक कइ देइ, धरम क मार्ग पर आवइ मँ सहायता करइँ। अउर खुद अपने बरे सावधानी बरता कि कहीं तू पचे खुदउ कउनो परीच्छा मँ न पड़ि जा। ² परस्पर एक दूसरे क भार उठावा। इही तरह तू मसीह क व्यवस्था क पालन करब्या। ³ अगर केउ मनई महत्वपूर्ण न होत भवा तबउ अपने क महत्वपूर्ण समझत ह, तउ अपने क धोखा देत थ। ⁴ अपने करम क आंकलन हर कउनो क खुद करत रहइ चाही। अइसेन करइ पर ही ओका अपने पापे पर कउनो दुसरे क साथे तुलना किहे बिना, गरब करइ क अवसर मिली। ⁵ काहेकि आपन दायित्यव हर कउनो क खुदइ उठावइ क बा।

जीवन खेत-बोवइ जइसा बा

⁶ जेका परमेस्सर क बचन सुनावा गवा बा, ओका चाही कि जउन अच्छी चीज ओकरे पास बा, ओहमाँ अपने उपदेस क साच्छी बनवइ।

⁷ अपने आपके जिन्न छला। परमेस्सर क केऊ बुद्धू नाहीं बनाइ सकत, काहेकि जउन जइसेन बोई वइसे ही काटी। ⁸ जे अपने भौतिक मनई क सुभाऊ बरे बोई, उ अपने काया क बिनास क फसल काटी। मुला जउन आतिमा क खेते मँ बीया बोई उ आतिमा स अनन्त जीवन क फसल काटी। ⁹ इही बरे आवा हम भलाई करत कभऊँ न थकी। काहेकि अगर हम भलाई करत ही रहब तउ अच्छा समइ आए प हमका ओकर फल मिली। ¹⁰ जइसेन ही कउन अवसर मिलई, हमका सब क साथ भलाई करइ चाहीं, विसेस कर अपने बिसवासी भाइयन क साथे।

गदेलन परमेस्सर क सच्चा हकदार अहइँ

(मत्ती 19:13-15; मरकुस 10:13-16)

¹⁵ मनई आपन गदेलन तलक ईसू क लगे लइ आवत रहेन कि उ ओनका छू भरि देइ। मुला जब ओकर चेलन इ लखेन तउ ओनका झड़पेन। ¹⁶ मुला ईसू गदेलन क लगे बोलाएस अउर चेलन स कहेस, “इ नान्ह गदेलन क मोरे लगे आवइ द्या, ऍनका जिन रोका, काहेकि परमेस्सर क राज्य अइसन क अहइ। ¹⁷ मइँ सच कहत हउँ कि जउन परमेस्सर क राज्य इ गदेलन क नाई ग्रहण नाहीं करत ह, ओहमाँ कबहुँ घुसि न पाई।”

एक धनी मनई क ईसू स सवाल

(मत्ती 19:16-30; मरकुस 10:17-31)

¹⁸ फिन कउनो यहूदी नेता ईसू स पूछेस, “उत्तिम गुरु, अनन्त जीवन क हक पावइ बरे मोका का करइ चाही?”

¹⁹ ईसू ओसे कहेस, “तू मोका उत्तिम काहे कहत अहा? सिरिफ परमेस्सर क तजिके अउर कउनो भी उत्तिम नाहीं अहइ। ²⁰ तू परमेस्सर क हुकुम क तो जानत अहा: ‘व्यभिचार जिन करा, कतल जिन करा, चोरी जिन करा, झूठी साच्छी जिन द्या, आपन बाप अउर महतारी क आदर करा।’”^(A)

²¹ उ यहूदी नेता बोला, “मइँ इन बातन क आपन लरिकाई स मानत आवा हउँ!”

²² ईसू जब इ सुनेस तउ उ ओसे बोला, “अबहीं एक बात अहइ जेकर तोहमाँ कमी अहइ। तोहरे लगे जउन कछू अहइ, सब कछू क बेंचि डावा अउर फिन जउन मिलइ, ओका गरीबन मँ बाँटा। ऍहसे तोहका सरगे मँ भण्डारा मिली। फिन आवा अउर मोरे पाछे होइ जा।” ²³ तउ जब यहूदी नेता सुनेस तउ उ बहोत दुःखी भवा, काहेकि उ बहुत अमीर रहा।

²⁴ ईसू जब ई देखेस कि उ बहोत दुःखी अहइ तउ उ कहेस, “ओन मनइयन बरे जेनके लगे धन बा, परमेस्सर क राज्य मँ घुसि पाउब केतना मुस्किल अहइ। ²⁵ हाँ, कउनो ऊँट बरे सुई क नोंक स निकरि जाब तउ सहज बा मुला कउनो धनी मनई क परमेस्सर क राज्य मँ घुस पाउब सहल नाहीं अहइ!”

केकर उद्धार होइ?

²⁶ उ मनइयन जउन इ सुनेन, बोलेन, “फिन भला उद्धार केकर होइ?”

²⁷ ईसू कहेस, “उ बातन जउन मनइयन बरे नाहीं होइ सकतीं, परमेस्सर बरे होइ सकत हीं!”

²⁸ फिन पतरस कहेस, “देखा, तोहरे पाछे चलइ बरे हम उ सब कछू तजि दीन्ह ह जउन हमरे पास रहा!”

²⁹ तब ईसू ओनसे बोला, “मइँ तोहसे सच कहत हउँ, अइसा कउनो नाहीं जउन परमेस्सर क राज्य बरे घर-बार, पत्नी या भाइयन या महतारी बाप या संतान क तजि दिहे होइ, ³⁰ अउर ओका इहइ जुग मँ कइउ कइउ गुना जिआदा न मिलइ अउर आवइवाला समइ मँ उ अनन्त जीवन क न पाइ जाइ।”