Book of Common Prayer

¹ यहोवा सासन करत ह, धरती क खुस रहइ द्या;
    दूर क देसन क प्रसन्न होइ द्या।
² यहोवा क करिया गहिर बादर घेरे भए अहइँ।
    नेकी अउ निआउ ओकरे राज्ज क मजबूत किहे अहइँ।
³ यहोवा क समन्वा आगी चला करत ह,
    अउर उ ओकरे आपन दुस्मनन क नास करत ह।
⁴ ओकर बिजुरी संसार क प्रकासित करत ह।
    लोग ओका लखत हीं अउर डेरान रहत हीं।
⁵ यहोवा क समन्वा पहाड़ अइसे पिघल जात हीं, जइसे मोम पिघल जात ह।
    उ समूचइ धरती क सुआमी अहइ।
⁶ अकास ओकरी नेकी क बखान करत हीं।
    हर कउनो परमेस्सर क महिमा लखि लेइ।

⁷ सबइ लोग जउन मूरतियन क पूजा करत हीं
    अउर ओकरे बियर्थ बातन बरे डींग हाँकत हीं,
लजाइ जाइहीं।
    सबइ देवतन ओकरे समन्वा निहुरिहीं।
⁸ हे सिय्योन, सुना अउ खुस ह्वा।
    हे यहूदा क सहरन, खुस ह्वा,
    तोहार निआउ क कारण, हे यहोवा।
⁹ हे सर्वोच्च यहोवा, फुरइ तू ही धरती पइ सासन करत ह।
    तू दूसर “देवतन” स जियादा उत्तिम अहा।
¹⁰ जउन लोग यहोवा स पिरेम रखत हीं, उ पचे पाप स घिना करत हीं।
    एह बरे उ आपन लोगन क रच्छा करत ह।
    उ ओन लोगन क दुट्ठ लोगन स बचावत ह जउन ओकरे बिस्सासी अहइँ।
¹¹ धर्मी लोगन पइ जोति छितराएस ह
    अउ इमानदार-जन बरे आनन्द फइलाएस ह।
¹² हे धर्मी लोगो, परमेस्सर मँ खुस रहा।
    ओकरे पवित्तर नाउँ क धन्यवाद द्‌या।

¹ यहोवा सासन करत ह।
    तउ हे रास्ट्रन, भय स काँप उठा।
उ करूब दूतन ऊँपर आपन सिंहासन पइ विराजमान अहा।
    तउ हे संसार भय स काँपि उठा।
² यहोवा सिय्योन मँ महान अहइ।
    सारे रास्ट्रन क उहइ राजा अहइ।
³ सबहिं लोगन क तोहरे महान
    अउर भय योग्य नाउँ क गुण गावइ द्या।
    परमेस्सर पवित्तर बा।
⁴ सक्तिसाली राजा क निआउ भावत ह।
    तू ही अहा जउन नेकी क स्थापना किहा ह।
    तू ही अहा जउन इस्राएल बरे निआव अउर खरापन क स्थापना किहा ह।
⁵ यहोवा हमरे परमेस्सर क गुणगान करा।
    अउर ओकरे चउकी^[a] चरण निहुरिके दण्डवत करा।
    उ पवित्तर अहइ।
⁶ मूसा अउ हारून यहोवा क याजकन रहेन।
    समूएल ओन मँ स एक रहा जउन ओकरे नाउँ लेइवाला रहा।
उ सबइ ओकर पराथना किहेन।
    अउर उ ओनका जवाब दिहस।
⁷ उ बादर क खम्भा मँ स बातन किहेस।
    उ पचे ओकरे आदेसन क मानेन।
    परमेस्सर ओनका कानूनन क हुकुमन दिहेस।
⁸ हे यहोवा हमार परमेस्सर, तू ओनकर पराथना क जवाब दिहा।
    तू ओनका इ देखाया कि छमा करइवाला परमेस्सर अहा,
    अउर तू लोगन क ओनकर बुरा कर्मन बरे सजा देत अहा।
⁹ हमार परमेस्सर यहोवा बरे एक ठु गीत गावा।
    ओकरे पवित्तर पहाड़े कइँती निहुरिके ओकर उपासना करा।
    फुरइ यहोवा हमार परमेस्सर पवित्तर अहइ।

¹ यहोवा तू परमेस्सर अहा जउन कि निआव लिआवत ह।
    निआव क परमेस्सर आपन क परगट करा।
² उठा, हे धरती क निआउकर्त्ता।
    तू घमण्डी लोगन क उचित सजा देत ह।
³ हे यहोवा, दुट्ठ जन कब तलक मजा मारत रइहीं?
    केतॅना देरी तलक?
⁴ उ सबइ दुट्ठ-जन कब तलक आपन बुरे कामन क बारे मँ
    डीगं हाँकत अउर सेखी बघारत रइहीं?
⁵ हे यहोवा, उ सबइ लोग तोहार लोगन क मुसीबत मँ डालेन ह।
    उ पचे तोहरे आपन लोगन क सतावा करत हीं।
⁶ उ पचे राँड़ अउरतन अउर ओन मेहमानन क जउन ओनके देस मँ ठहरा अहइँ, मारत हीं।
    उ पचे ओन अनाथ गदेलन क कतल करत हीं।
⁷ उ पचे कहत हीं, यहोवा ओनकर बुरा करम करत भए नाहीं लखि सकत।
    अउर कहत हीं, ‘इस्राएल क परमेस्सर ओन बातन क नाहीं समुझत जउन घटति अहइँ।’

⁸ ओ बुद्धिहीन लोग,
    तू कब आपन पाठ सिखब्या?
अरे मूरख लोगो,
    जतन करा अउर समुझ्या।
⁹ परमेस्सर हमार कान बनाएस ह,
    तउ निहचय ही उ सुन सकिहीं।
परमेस्सर हमार आँखिन बनाएस ह,
    तउ निहचय ही देख सकत हीं।
¹⁰ उ रास्ट्रन क सम्मान करत हीं, तउ निहचय ही उ तोहार निआव कइ सकत ह।
    उ ओन लोगन क ओन सबहिं बातन क सिच्छा देइ जउन ओनका करइ चाही।
¹¹ तउ जउन बातन क लोग सोचत अहइँ यहोवा जानत अहइ।
    उ इ जानत अहइ कि ओकर जोजनन हवा क झोंका अहइँ।

¹² तू लोग धन्न अहा जेका तू सम्मान देत ह, हे यहोवा।
    तू ओन लोगन क आपन कानून सिखावत ह।
¹³ तू ओनका ओकरे विपत्तियन मँ सांत होइके सहायक करत ह,
    जब तलक दुट्ठ लोग कब्र मँ नाहीं दफनाइ दीन्ह जइहीं।
¹⁴ यहोवा आपन लोगन क कबहुँ नाहीं तजी।
    उ बिना सहारे ओका रहइ नाहीं देइ।
¹⁵ निआउ लउटब अउर इमानदारी लिआइ।
    फुन लोग खरा बनिहीं।

¹⁶ मोका दुट्ठन क खिलाफ जुद्ध करइ मँ कउनो मनई सहारा नाहीं दिहस।
    कुकर्मियन क खिलाफ जुद्ध करइ मँ कउनो मोर संग नाहीं दिहस।
¹⁷ यहोवा मोर सहायक नाहीं होत,
    तउ मोर जिन्नगी मउत क दुआरा सांत होइ जाइतेन।
¹⁸ जब मइँ गिरइ क रहेउँ,
    तोहार पिरेम मोका उठाएस, हे यहोवा।
¹⁹ जब मइँ बहोतइ चिंतित अउ बियाकुल रहेउँ,
    तोहार सुख मोका आनन्दित किहस।

²⁰ हे परमेस्सर, तू कुटिल निआउ क मदद नाहीं करत्या,
    जउन परीसानी पइदा करइ बरे नेमन क घेर लेत ह।
²¹ उ पचे नीक लोगन पइ हमला करत ह
    अउर निर्दोख व्यक्ति क कसूरवार कहत ह।
²² मुला यहोवा मोर सुरच्छा क ठउर बाटइ।
    परमेस्सर मोर चट्टान अउर मोर सरण क ठउर अहइ।
²³ परमेस्सर ओनका ओकरे बुरा करमन बरे सजा देइ।
    उ ओका ओकरे पाप क कारण खतम कइ देइ।
    हमार परमेस्सर यहोवा ओनका नस्ट कइ देइ।

¹ आवा हम यहोवा क गुण गाई।
    आवा हम पचे उ चट्टान क जय जयकार करी जउन हमार रच्छा करत ह।
² आवा हम यहोवा क धन्यवाद बरे गीत गाई।
    आवा हम ओकर बड़कई क गीत आनन्द क संग गाई।
³ काहेकि यहोवा महान परमेस्सर अहइ।
    उ महान राजा सबहिं दूसर “देवतन” पइ सासन करत ह।
⁴ गहिर सबइ गुफा अउ ऊँच पहाड़ यहोवा क अहइँ।
⁵ सागर ओकर बा, उ ओका बनाएस ह।
    परमेस्सर खुद आपन हाथन स झुरान धरती क बनाएस ह।
⁶ आवा, हम ओका पइलगी करी अउर ओकर उपासना करी।
    आवा हम परमेस्सर क गुण गाई जउन हमका बनाएस ह।
⁷ उ हमार परमेस्सर
    अउर हम पचन ओकर बगल मँ भेड़ अही।

कम स कम जदि तू आजु ओकर आवाज़ क पालन करब्या।
⁸     यहोवा कहत ह, “तू मोका सुनई स वइसा इनकार जिन करा जइसा मरीबा मँ तोहार पुरखन किहे रहेन,
    अउ वइसा जिन करा जइसा उ पचे मस्सा मँ रहइ क दिन मँ किहे रहेन।
⁹ तोहार पुरखन मोका परखे रहेन।
    उ पचे मोका परखेन, पर तब उ पचे लखेन कि मइँ का कइ सकत हउँ।
¹⁰ मइँ ओन लोगन क चालीस बरिस तलक सहन किहे रहेउँ।
    मइँ इ अच्छी तरह जानत रहेउँ कि उ पीढ़ी इमान्दार नाहीं अहइ।
    ओन लोगन मोर सिच्छा क नाही सीखेन।
¹¹ तउ मइँ कोहाइ गएउँ अउर मइँ प्रण किहेउँ कि
    उ पचे मोर भुइँया मँ आइववाले समई मँ प्रवेस नाहीं कइ पइहीं।”

³ परमेस्सर तेमान कइँती स आवत अहइ।
    उ पवित्तर परान क पहाड़े स आवत अहइ।

ओकर महिमा आकासे क छाइ लेई।
    ओकर स्तुति धरती क भरि देइ।
⁴ उ महिमा अइसी अहइ जइसे कउनो उज्जर जोति होइ।
    ओकरे हाथे स जोति क किरणन फूटति अहइँ अउर ओकरे हाथे मँ ओकर सक्ति लुकान अहइ।
⁵ ओकरे समन्वा सबइ महामारी चलत हीं
    अउर ओकरे पाछे बिध्वंसक नास चला करत ह।
⁶ यहोवा खड़ा भवा अउर धरती क निआव किहस।
    उ दूसर जातिन क लखेन
    अउर उ पचे काँपि उठेन।
अतीत कालीन पहाड़न ढही गएन
    अउर चकनाचूर होइ गएन।
पुरान बहोतइ पुरान पहाड़ ढहि गएन।
    परमेस्सर सदा अइसा ही करत ह।

⁷ मइँ कुसान क तम्बुअन क दुःख मँ लखत ह।
    मिद्यान क तम्बुअन क पर्दन काँपत रहेन।
⁸ हे यहोवा, का तू नदियन पइ कोहान अहइ?
    का जलधारन पइ तोहका किरोध आवा ह का समुद्दर तोहार किरोध क पात्र बन गवा?
जब तू आपन बिजय क घोड़न पइ आवत रहा
    अउर विजय क रथन पइ चढ़ा रहा, का तू किरोध स भरा रह्या?

⁹ तू आपन धनुस तान लिहा
    अउर तीरन आपन लच्छ क भेध दिहन।

जल क धारन क चीरइ बरे फूट पड़िन।
¹⁰     पहाड़न तोहका निहारेन अउर उ सबइ काँपि उठेन।
जल धरती क फोरिके बहइ लाग।
    धरती स ऊँचा फव्वारा
    जोर स गर्जत भए फूटइ लागेन।
¹¹ सूरज अउ चाँद आपन प्रकास तजि दिहन।
    उ पचे जब तोहार भालन बिजुरी क तरह चमकत लखेन, तउ चमकब तजि दिहन।
    बिजुरियन क उ सबइ चमकन बिजुरियन अइसी रहिन जइसे भालन अउ तीरन हवा मँ लटकत अहइँ।
¹² तू धरती पइ किरोध मँ चलेन
    अउर तू आपन किरोध मँ जातियन क रौंद दिहेन।
¹³ तू ही एक अहइ जउन आपन लोगन क बचावइ रह्या।
    तू ही आपन चुना भए राजा क मार्गदर्सक रह्या।
तू प्रदेस क हर बुरा परिवारे क मुखिया लोगन क,
    सबन्त कम महत्व वाले मनई स लइके
    बहोत महत्व स भरा मनई तलक मार डाया।

¹⁴ दुस्मन क सिपाहियन हम लोगन क खिलाफ लड़इ बरे
    सक्तीसाली आँधी क तरह आएन।
उ पचे खुसी मँ सोचत रहेन क उ पचे एक बेसहारा मनई पइ हमला करइ क जइसा
    जब न कउनो एका लखत ह अउर न ही कउनो ओकरे मदद बरे आवत ह,
क नाईं हम लोगन क आसानी स हरा सकत ह।
    मुला तू ओनका मूँड़े क आपन भाला स छेद कइ दिहेन।
¹⁵ मुला तू सागरे प आपन घोड़न पइ सवार होइके चलत रह्या,
    सक्तीसाली जल क उत्तेजित कइ दिह्या।
¹⁶ मइँ इ सबइ बातन सुनेउँ अउर मोर पेट डर स काँपि उठी।
    जब मइँ इ आवाज़ क सुनेउँ, मोर होंठ काँपइ लागेन।
मोर हड्डियन दुर्बल होइ गइन।
    मोर टाँगियन काँपइ लागिन।
एह बरे मइँ बिनासे क दिन क बाट जोहब जउन ओन लोगन पइ आई जउन हम पई हमला किहेस।