Book of Common Prayer

² सबइ मनइयन मँ, तू अति सुन्नर अहइ।
    तोहार मुँहे स कृपालु सब्द निकलत अहा।
    एह बरे परमेस्सर तोहका सदा-सर्वदा आसीस देइ।
³ तू आपन तरवार क जोद्धन क कमर पइ बाँधा।
    तू महिमा वाला वस्त्र धारण करा।
⁴ तू अद्भुत देखाँत अहा।
जा, धरम अउ निआउ क जुद्ध जीत ल्या।
    अद्भुत करम क करइ बरे सक्ती स भरी दाहिनी भुजा क प्रयोग करा।
⁵ तोहार तीर तइयार अहइँ।
    तू बहुतेरन क हराइ देब्या।
    तू आपन दुस्मनन पइ हुकूमत करब्या।
⁶ हे परमेस्सर,^[a] तोहार सिंहासन हमेसा रहब।
    तोहार साही राजदण्ड अच्छाई तोहार राज्ज क मज़बूत बनावत ह।
⁷ तू नेकी स पिआर अउ बुराई स घिना करत अहा।
    एह बरे सक्तीमान निआवाधीस,
    तोहार परमेस्सर तोहका तोहार साथियन क ऊपर राजा चुनेस ह।
⁸ तोहार ओढ़ना महकत अहइँ जइसे गंध रस, अगर अउ तेज पात स मधुर गंध आवति होइ।
    हाथी दाँत स जड़ा भवा राजमहलन स तोहका आनन्द मँ भरि देइ क मधुर संगीत क झंकार फइलति अहइँ।
⁹ राजा लोगन क बिटियन अइसा सेवा किहेन जइसा कि उ राजा क बिवाह मँ दुल्हन क सेविकन अहइँ।
    तोहार महरानी ओपीर क सोना स बना मुकुट पहिरे तोहरे दाहिन कइँती विराजति अहइँ।

¹⁰ हे राजपुत्री, मोरी बात क सुना।
    धियानदइके सुना, तबहिं तू मोरी बात क समझबू।
तू आपन निज लोगन अउर बाप क घराने क बिसरि जा।
¹¹     राजा तोहरे सुन्दरता पइ मोहित अहइ।
इ तोहार नवा सुआमी होइ।
    तोहका एकर सम्मान करब अहइ।
¹² सूर सहर क लोग तोहरे बरे उपहार^[b] लइ अइहीं।
    अउर धनी मानी तोहसे मिलइ चइहीं।

¹³ उ राजकन्या उ मूल्यवान रत्न क नाई अहइ
    जेका सुन्नर मूल्यवान सुवर्ण मँ जड़ा गवा होइ।
¹⁴ ओका रमणीक वस्त्र पहिराइके लिआवा गवा बाटइ।
    ओकरी सखियन क भी जउन ओकरे पाछे अहइँ राजा क समन्वा लावा गवा।
¹⁵ उ पचे हिआँ उल्लास मँ आई अहइँ।
    उ पचे आनन्द मँ मगन होइके राजमहल मँ प्रवेस करिहीं।

¹⁶ राजा, तोहरे पाछे तोहार पूत सासक होइहीं।
    तू ओनका समूचे धरती क राजा बनउब्या।
¹⁷ मइँ तोहरे नाउँ क प्रचार जुग जुग तलक करब।
    तू प्रसिद्ध होब्या, तोहरे जसे क गीतन क लोग सदा सदा ही गावत रइहीं।

⁵ यहोवा परमेस्सर तुरही क ध्वनि
    अउर जुद्ध क नरसिंहे क स्वर क संग ऊपर उठत ह।
⁶ परमेस्सर क गुणगान करत भए गुण गावा।
    हमरे राजा क बड़कई क गीत गावा।
    अउर ओकर जस क गीत गावा।
⁷ परमेस्सर सारी भुइँया क राजा अहइ।
    ओकर बड़कई क गीत गावा।
⁸ परमेस्सर आपन पवित्तर सिंहासन पइ बिराजत ह।
    परमेस्सर सबहिं रास्ट्रन पइ हुकूमत करत ह।
⁹ रास्ट्रन क नेता, इबाहीम क परमेस्सर क लोगन क संग मिलत हीं।
    सबहिं रास्ट्रन क नेता,
परमेस्सर क अहइँ।
    परमेस्सर ओन सबन क ऊपर अहइ।

⁹ हे परमेस्सर, हम तोहरे मन्दिर मँ तोहरी पिरेम स भरी करुणा पइ विचार करित ह।
¹⁰ हे परमेस्सर, तू मसहूर अहा,
    लोग धरती पइ हर कहूँ तोहार स्तुति करत हीं।
    हर मनई जानत ह कि तू केतॅना भला अहा।
¹¹ हे परमेस्सर, तोहरे उचित निआउ क कारण सिय्योन पर्वत खुस अहइ।
    अउर यहूदा क नगरियन आनन्द मनावत अहइँ।
¹² सिय्योन क परिक्रमा करा।
    नगरी क दर्सन करा।
    तू मीनारन क लखा।
¹³ ऊँच चहरदीवारन क लखा।
    सिय्योन क महलन क सराहा,
    तबहिं तू आवइवाली पीढ़ी स ऍकर बखान कइ सकब्या।
¹⁴ सचमुच हमार परमेस्सर सदा सदा ही परमेस्सर रही।
    उ हमका सदा ही राह देखाई।
    ओकर कबहुँ भी अंत नाहीं होई।