Book of Common Prayer

¹ मइँ संकटे मँ पड़ा रहेउँ,
    सहारा पावइ बरे मइँ यहोवा क गोहराएउँ
    अउर उ मोका बचाइ लिहस।
² हे यहोवा, मोका तू अइसे लोगन स बचावा
    जउन मोर खिलाफ झूठ बोलेन ह।

¹ मइँ ऊपर ऊँच पहाड़न क कइँती लखत हउँ।
    मुला फुरइ मइँ कहाँ स पावइँ?
² मोका तउ सहारा यहोवा स मिली
    जउन सरग अउ धरती क बनावइवाला अहइ।
³ परमेस्सर तोहका गिरइ नाहीं देइ।
    तोहर बचवइया कबहुँ भी नाहीं सोइ।
⁴ इस्राएल क उद्धारकर्त्ता कबहुँ न ही ओंघात ही
    अउर न ही सोवत अहइँ।
⁵ यहोवा तोहार रच्छक अहइ।
    उ तोहका आस्रय देइ बरे तोहार बगल मँ अहइ।
⁶ दिन क समइ सूरज तोहका हानि नाहीं पहोंचाइ सकत।
    राति मँ चाँद तोहार नोस्कान नाहीं कइ सकत।
⁷ यहोवा तोहार रच्छा हर संकट स करी।
    यहोवा तोहरी आतिमा क रच्छा करी।
⁸ यहोवा उ सबइ पइ धियान रखी जउन कछू तू करब्या।
    जहाँ कहुँ भी तू जाब्या अउ आउब्या, अबहुँ अउ सदा सर्वदा उ तोहार रच्छा करी।

¹ जब लोग मोसे कहेन,
    “आवा, यहोवा क मन्दिर मँ चली तब मइँ बहोत खुस भएउँ।”
² हिआँ हम यरूसलेम क दुआरन पइ खड़ा अही।
³ यरूसलेम नगर एक ठु
    संगठित नगर नाईं बनि गवा ह।
⁴ उ उ जगहिया बा जहाँ उ परिवार समूह जात रहेन, जउन यहोवा क परिवार समूह अहइ,
    काहेकि इ इस्राएल क लोग दुआरा यहोवा क धन्यवाद देइ क नेम अहइ।
⁵ इ उहइ जगहिया बा जहाँ दाऊद क परिवार क राजा लोगन आपन सिंहासन कायम किहेन।
    उ पचे आपन सिंहासन लोगन क निआउ करइ बरे कायम किहन।

¹ हे परमेस्सर, मइँ आँखी उठाइके तोहार पराथना करत हउँ।
    तू सरग मँ राजा क रूप मँ बिराजत अहा।
² दास लोग आपन सुआमियन क ऊपर ओन चिजियन बरे आसरे पइ रहा करत हीं, जेकर ओनका जरूरत अहइ।
    दासियन आपन सुआमिनियन क ऊपर आसरे पइ रहा करत हीं।
इहइ तरह हमका यहोवा हमरे परमेस्सर तब तलक लखत हउँ
    जब तलक उ हम पइ दाया देखाँवइ।
³ हे यहोवा, हम लोगन पइ कृपालु ह्वा।
    हम लोगन पइ दयालु ह्वा काहेकि बहोत लम्बी समइ स हम लोगन क अपमान होत अहइ।
⁴ घमण्डी लोग बहोत दिनन स
    हम लोगन क अपमानित कइ चुका अहइँ।

¹ अगर यहोवा हमरे संग नाहीं होतेन
    तउ इस्राएल क कहइ द्या,
² अगर यहोवा हमरे संग नाहीं होत,
    जब हमार बिरोधी हम लोगन पइ हमला किहे रहेन?
³ तब हमार दुस्मन हमका जिअत ही निगल गए होतेन
    जब उ पचे गुस्सा भए रहेन।
⁴ तब हमार सत्रुअन क फउजन
    बाढ़ क तरह हमका बहावत भइ
    उ नदी क जइसी होइ जातिन जउन हमका बोरत रही होइँ।
⁵ तब उ सबइ घमण्डी लोग उ पानी जइसे होइ जातेन
    जउन हमका बोरत भवा हमरे मुँहना तलक बाढ़त आवति होइ।

¹ जउन लोग यहोवा क भरोसे रहत हीं, उ पचे सिय्योन क पहाड़ जइसे होइहीं।
    ओनका कबहुँ कउनो डुगाइ नाहीं पाई।
    उ पचे सदा ही अटल रइहीं।
² यहोवा आपन लोगन क वइसे ही आपन आस्रय मँ लिहस ह, जइसे यरूसलेम चारिहुँ कइँती पहाड़न स घिरा बाटइ।
    यहोवा सदा-सर्वदा आपन लोगन क रच्छा करी।
³ बुरे लोग भले लोगन क धरती क ऊपर राज्ज नाहीं कइ सकिहीं,
    अगर बुरे लोग अइसा करइ लग जाइँ तउ होइ सकत ह सज्जन लोग भी बुरा काम करइ लागइँ।

¹ जब यहोवा सिय्योन क लोगन क कैद स वापिस लिआइ
    तउ इ कउनो सपना क नाईं होइ।
² तब हम पचे हँसत रहत होब अउ खुसी क गीत गावत रहत होब।
    तब दूसर रास्ट्र क लोग कहत रहत रहब, “यहोवा ओकरे बरे महान कार्य किहस ह।”
³ यहोवा हम लोगन बरे एक अद्भुत करम किहे होतेन,
    तउ हम पचे बहोत खुस होतेन।

¹ अगर घर क निर्माता खुद यहोवा नाहीं अहइ,
    तउ घरे क बनावइ वाला बेकार समइ गँवावत ह।
अगर सहर क रखवाला खुद यहोवा नाहीं अहइ,
    तउ रखवारे बेकार समइ गँवावत हीं।

² हे लोगो, तू पचे सबहिं सुन ल्या!
    हे धरती अउर जउन कछू धरती पइ अहइ, सुना।
मोर सुआमी यहोवा इ पवित्तर मन्दिर स आइ।
    मोर सुआमी तोहरे विरोध मँ एक साच्छी क रूप मँ आइ।
³ लखा, यहोवा आपन जगह स बाहेर जात अहइ।
    उ धरती क ऊँच जगहियन पइ चलइ बरे उतरिके तरखाले आवत अहइ।
⁴ परमेस्सर यहोवा क गोड़े क नीचे पहाड़ टेघर जइहीं,
    घाटियन चरमराइ जइहीं।
जइसे आगी क समन्वा मोम टेघर जात ह,
    जइसे ढालू जगह स पानी उतरत भवा बहत ह।
⁵ अइसा काहे होई? इ एह बरे होई कि याकूब अपराध किहेस ह।
    काहेकि इस्राएल क लोग पाप किहेस ह।

कउन याकूब स पाप कराए रहेन?
    इ सोमरोन अहइ!
यहूदा मँ कउन ऊँच ठउरन अहइ?
    उ सबइ यरूसलेम मँ अहइ।
⁶ एह बरे मइँ सोमरोन क खाली मइदान अउर खंडहरन क ढेर बनाउब।
    इ अइसी जगह क नाईं होइ जब जेहमाँ अंगूर क बाग लगावा जात हीं।
मइँ सोमरोन क पाथरन क घाटी मँ फेंकि देब।
    मइँ ओकरी सबहिं नेंव क प्रदर्सित कइ देब।
⁷ ओकर सबइ मूरतियन टूकन मँ तोरि दीन्ह जइहीं।
    सारा धन जेका इ रण्डीबाज़ी दुआर कमाएस ह,
आगी स भसम होइ
    अउर मइँ एकर लबार देवतन क मूरतियन क नस्ट कइ देब।
काहेकि उ सबइ लाभ रण्डीबाज़ी दुआरा हासिल किहेन ह,
    अउर ठीक वइसा ही रण्डी क मजूरी मँ खर्च कीन्ह जाब।

⁸ मइँ इ हाली आवइवाला बिनास क कारण बियाकूल होबउँ अउर हाय-हाय करिहउँ।
    मइँ पनही न पहिरब अउर न ओढ़ना धारण करब।
सियारन क जइसे मइँ जोर स चिल्लाब।
    मइँ विलाप करब जइसे सुतुर्मुर्ग करत हीं।
⁹ सोमरोन क घाव नाहीं भर सकत ह।
    ओकर बियाधि यहूदा तलक फइलि गवा अहइ।
इ मोर लोगन्क नगर-दुआर तलक पहोंच गवा
    बल्कि इ तउ यरूसलेम तलक आइ गवा ह।