◀ All Reading Plans / Book of Common Prayer / Ps. 105:1–22; Ps. 105:23–45; Hosea 5:8—6:6; Acts 21:27–36; Luke 6:1–11 (Awadhi Bible: Easy-to-Read Version)

Prev Day

October 3, 2024

Next Day

Use the calendar to view readings from this devotional.

October 2024
Su	Mo	Tu	We	Th	Fr	Sa
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 105

¹यहोवा क धन्यवाद करा, ओकरे नाउँ क पुकारा।
    रास्ट्रन क ओकरे अदभुत कारजन क बारे मँ बतावा।
²यहोवा बरे तू गावा, तू ओकर बड़कई क गीत गावा।
    ओन सबहिं अचरज स भरी बातन कर वर्णन करा जेनका उ करत ह।
³यहोवा क पवित्तर नाउँ पइ गर्व करा।
    ओ सबहिं लोगो जउन यहोवा क उपासक अहा, तू पचे खुस होइ जा।
⁴सामरथ पावइ क तू यहोवा क लगे जा।
    सहारा पावइ क तू ओकरे लगे जा।
⁵ओन अद्भुत बातन क सुमिरा जेनका यहोवा करत ह।
    ओकरे अचरज कर्म अउर ओकर विवेक स भरा फइसला क याद राखा।
⁶तू परमेस्सर क सेवक इब्राहीम क संतान अहा।
    तू याकूब क संतान अहा, उ मनई जेका परमेस्सर चुने रहा।
⁷यहोवा ही हमार परमेस्सर अहइ।
    सारे संसार पइ यहोवा क सासन अहइ।
⁸उ आपन करार क सदा याद रखत ह।
    उ आपन आदेसन क हजार पीढ़ियन तलक याद रखत ह।
⁹इब्राहीम क संग परमेस्सर करार बाँधे रहा।
    परमेस्सर इसहाक क वचन दिहे रहा।
¹⁰उ याकूब क आपन करार क कानून क रूप मँ दिहे रहा।
    परमेस्सर इस्राएल क संग करार किहस।
    इ सदा सदा ही बना रही।
¹¹परमेस्सर कहे रहा, “मइँ कनान क भुइँया क
    तोहका आपन सम्पत्ति क रूप देब।”
¹²जब इब्राहीम क परिवार छोटा रहा,
    अउर उ पचे हुवाँ महज़ ही बिदेसी रहेन।
¹³उ पचे एक रास्ट्र स दूसर रास्ट्र मँ,
    एक राज्ज स दूसर राज्ज मँ घूमत रहेन।
¹⁴मुला परमेस्सर उ घराने क दूसर लोगन स नस्कान नाहीं पहोंचइ दिहस।
    परमेस्सर राजा लोगन क सावधान किहस कि उ पचे ओका हानि न पहोंचावइ।
¹⁵उ ओनका चेताउनी दिहे रहेन, “मोर अभिसिक्त भवा क^[a] तू नस्कान जिन पहोंचावा।
    तू मोर कउनो नबियन क बुरा जिन करा।”
¹⁶परमेस्सर उ देस मँ अकाल पठएस।
    अउर लोगन क लगे खाइ क खूब भोजन नाहीं रहा।
¹⁷मुला यहोवा एक मनई क ओनके लगे जेकर नाउँ यूसुफ रहा, ओनका अगवा मिस्र तलक पठएस।
    यूसुफ क एक ठु दास क नाई बेचा ग रहा।
¹⁸उ पचे यूसुफ क गोड़ मँ जंजीर डालेन, अउर उ ओका विनम्र बनाएस।
    उ पचे ओकरी गटइ मँ एक लोहे क कड़ा डाइ दिहन।
¹⁹यूसुफ क कैद मँ रखा गवा रहा जब तलक उ पचे बातन जउन उ कहे रहा फुरइ घटि नाहीं गइन।
    यहोवा सुसन्देस स प्रमाणित कइ दिहस कि यूसुफ नीक रहा।
²⁰    मिस्र क राजा, आग्या दिहन कि यूसुफ क बंधनन स अजाद कइ दीन्ह जाइ।
    उ रास्ट्र क एक नेता ओका कैद स आजाद कइ दिहस।
²¹यूसुफ क आपन घर बार क अधिकारी बनाइ दिहन।
    यूसुफ राज्ज मँ हर बात क धियान रखइ लाग।
²²यूसुफ आपन राजकुमार क वइसा ही निर्देस देत रहा जइसा उ चाहेन।
    यूसुफ राजा क सलाहकारन क सिच्छा दिहे रहा।
²³जब इस्राएल मिस्र गवा,
    याकूब हाम क देस^[b] मँ रहइ लाग।
²⁴याकूब क सन्तानन बहोत स होइ गएन।
    उ पचे मिस्र क लोगन स जियादा बलवान बन गएन।
²⁵एह बरे मिस्री लोग याकूब क घराना स घिना करइ लागेन।
    मिस्र क लोग आपन दासन क खिलाफ कुचक्र रचइ लागेन।
²⁶एह बरे यहोवा निज सेवक मूसा
    अउर हारून जेका उ चुने रहा, पठएस।
²⁷उ हाम क भुइँया मँ अचरज
    अउ अद्भुत करम किहेस।
²⁸परमेस्सर गहिरा अँधियारा पठए रहा,
    मुला मिस्रियन ओकर नाहीं सुनेन।
²⁹तउ फुन परमेस्सर पानी क खून मँ बदल दिहस,
    अउर ओनकर सबइ मछरियन मरि गइन।
³⁰बाद मँ, मिस्री लोगन क भुइँया मेघन स भरि गवा।
    हिआँ तलक कि मेघन राजा क सयन कच्छ तलक भरि गएन।
³¹यहोवा आदेस दिहा,
    अउर माखियन अउ पिस्सू आएन
    अउर उ सबइ हर कतहूँ फइल गएन।
³²परमेस्सर बर्खा क ओलन मँ बदलि दिहस।
    मिस्रियन क देस मँ हर कतहूँ आगी अउ बिजुरी गिरइ लाग।
³³परमेस्सर मिस्रियन क अंगूरे क ब्गिया अउ अंजीर क बृच्छ बर्बाद कइ दिहस।
    परमेस्सर ओनकर देस क हर बृच्छ क तहस नहस कइ दिहस।
³⁴परमेस्सर हुकुम दिहस अउर टिड्डी दल आइ गएन।
    टिड्डी आइ गइन अउर ओनकर गनती अनगिनत रहीं।
³⁵टिड्डी दल अउ टिड्डीयन उ देस क सबहिं पैाधन चट कइ गएन।
    उ सबइ धरती पइ जउन भी फसलन ठाड़ रहिन, सबहिं क खाइ डाएन।
³⁶फिन परमेस्सर मिस्रियन क पहिलउटी सन्तान क मार डाएस।
    परमेस्सर ओनकर सब स बड़कन पूतन क मारेस।
³⁷बाद मँ परमेस्सर निज सेवकन क मिस्र स बाहेर निकारेस।
    उ पचे आपन संग सोना अउ चाँदी लइ आएन।
    परमेस्सर क कउनो भी सेवक नाहीं लड़खड़ान।
³⁸ओन लोगन क जात भए लखिके मिस्र आनन्द मँ रहा,
    काहेकि उ पचे ओनसे डेराइ ग रहेन।
³⁹परमेस्सर ओनके ऊपर कमरी जइसा एक बादर फइलाएस।
    उ राति मँ उजियारा देइ क बरे आगी क खम्भा क काम मँ लिआएस।
⁴⁰लोग खाइ क माँग किहन अउ परमेस्सर ओनके खातिर बटेरन क लइ आवा।
    परमेस्सर अकास स ओनका भरपूर खइया क दिहस।
⁴¹परमेस्सर चट्टान क फाड़ेस अउर जल उछरत भवा बाहेर फूटि पड़ा।
    उ रेगिस्ताने क बीच एक ठु नदी बहइ लाग।

⁴²उ आपन पवित्तर वचन सुमिरेस
    जउन उ आपन दास इब्राहीम क संग किहे रहा।
⁴³परमेस्सर आपन खास क मिस्र स बाहेर निकारि लिआवा।
    लोग खुसी क गीत गावत भए अउर खुसियन मनावत भए बाहेर आइ गएन।
⁴⁴फिन परमेस्सर निज भगतन क उ देस दिहस जहाँ अउर लोग रहत रहेन।
    परमेस्सर क भगतन उ सबइ चिजियन क पाइ लिहन जेनके बरे अउर लोग मेहनत किहे रहेन।
⁴⁵परमेस्सर अइसा एह बरे किहस ताकि लोग ओकर व्यवस्था मानइँ।
    परमेस्सर अइसा एह बरे किहस ताकि उ पचे ओकरी सिच्छा पइ चलइँ।

यहोवा क गुण गावा।

होसे 5:8-6:6

इस्राएल क बिनास क भविस्सबाणी

⁸“गिबाह मँ नरसिंगहा बजावा;
    रामा मँ तू तुरही बजावा।
बेतावेन मँ जोरदार आवाज़ करा।
    हे बिन्यामीन, लखा!
⁹जब सज़ा क समइ आइ,
    एप्रैम पूरी तरह स बर्बाद कीन्ह जाब्या।
तू निहचय होइ सकत ह कि मइँ इस्राएल क कबीला क बीच स
    जउन बोलत हउँ इ फुरइ अहइ।
¹⁰यहूदा क मुखिया उ मनई क तरह होइ जउन दूसर लोगन क भइँया क लेइ बरे चउहद्दी क निसान क पाथरन खिसकावत ह।
    तउ मइँ ओह पइ आपन किरोध पानी क तरह उण्डेलब।
¹¹एप्रैम क सजा दीन्ह जाइ,
    ओका कुचरि दीन्ह अउ मसरि दीन्ह जाइ जइसे अंगूरे क पीस दीन्ह जात ह।
    काहेकि उ निकम्मा क अनुसरण करइ क निहचइ किहेस ह।
¹²मइँ एप्रैम क अइसे नस्ट करब जइसे कउनो घुन कउनो काठे क नस्ट करत ह।
    अउर मइँ यहूदा क वइसे नस्ट करब जइसे जंग कउनो धातू क नस्ट करत ह।
¹³एप्रैम जान लिहेस कि उ रोगग्रस्त अहइ; यहूदा आपन घाव लखेस।
    एप्रैम अउर यहूदा अस्सूर क ‘महान राजा’ क लगे मदद बरे गएन।
किन्तु महान राजा तोहार रोग क नीक करइ मँ
    या तोहार घाव भरि मँ असमर्थ रहेन।
¹⁴मइँ एप्रैम बरे एक सेर क नाईं होब।
    मइँ यहूदा क संग एक जवान सेर क नाईं हरकत करब।
मइँ ओनका टुका मँ चीड़ देब
अउर ओनका दूर लइ जाब।
    कउनो भी ओनका मोसा बचाइ नाहीं पाइ।
¹⁵फुन मइँ आपन जगह रहइ बरे लउट जाब
    जब तलक कि उ पचे आपन कसूर स्वीकार न करइ लेइ
    अउर मोका हेरत भए न आ जाइ।
जब उ पचे विपदन मँ होइ, उ पचे मोका, मोह स मदद लेइ बरे हेरइहीं।”

यहोवा कइँती लउटि आवइ क प्रतिफल

6 “आवा, हम यहोवा कइँती लउटि आइ।
    जदपि उ हमका टुका मँ चीड़ दिहेस ह, किन्तु उ हमका चंगा करी।
    जिस तरह उ हमका चोट किहेस, उहइ तरह उ हमार घावन पइ मरहम भी लगाई।
²दुइ दिना मँ उ हमार जिन्नगी वापिस देइ सकत ह।
    तीसरे दिन उ हमका आपन गोड़ मँ खड़ा करी,
    तउ हम ओकर मोजूदगी मँ रहब।
³आवा, ओका परमेस्सर क रूप मँ स्वीकार करा;
    आवा, उ सबइ करी जेसे हम यहोवा स्वीकार कइ सकत हीं।
ओकर आवइ ओतॅना ही निहचइ ह जेतॅना कि भोर क आवइ।
    ओकर आवइ ओतना ही निहचय अहा जेतॅना क जाड़ा क बोछार।
अवस्य ही उ वइसे ही आई जइसे कि
    बसंत क बर्खा आवति अहइ जउन धरती क सींच देत ह।”

लोग सच्चा नाहीं अहइँ

⁴“हे एप्रैम, तोहार संग मोका का करइ चाही?
    हे यहूदा, तोहरे संग मोका का करइ चाही?
तोहार पिरेम ऍतना तेजी स गुजर गएन जइसा भिंसारे क कोहरा
    अउर भिंसारे क ओस तेजी स खत्म होइ जात ह।
⁵मइँ नबियन क प्रयोग किहेउँ
    अउर मनइयन बरे नेम बनाइ दिहेउँ।
मोरे आदेस पइ मनइयन क कतल कीन्ह गवा
    मुला इ सबइ फइसलन स भली बातन पइदा होइहीं।
⁶मोका विस्सासी पिरेम खुस करइ सकत ह,
    बलियन नाहीं
जब लोग मोका परमेस्सर क रूप मँ जानत ह
    तउ इ मोका होमबलि स जियादा आनन्दित करत ह।

प्रेरितन क काम 21:27-36

²⁷जब उ सात दिना पूर होइवाला रहा, एसिया स आए कछू यहूदी लोग ओका मंदिर मँ लखेन। उ पचे भीड़ मँ सबहिं मनइयन क हुस्काइ दिहेन अउर पौलुस क धइ लिहन। ²⁸फिन उ पचे नरियाइके बोलेन, “इस्राएल क मनइयो मदद करा। इ उहइ मनई अहइ जउन हर कहूँ हमार जनता क, मूसा क व्यवस्था क खिलाफ मनइयन क सिखावत बहकावत बा। अउर अब तउ इ गैर यहूदियन क मंदिर मँ लइ आवा अहइ। अउर इ इ तरह इ पवित्तर स्थान क भरभण्ड कइ दिहे अहइ।” ²⁹(उ पचे अइसा यह बरे कहे रहेन कि त्रुफिमुस नाउँ क एक इफिसी क सहर मँ उ पचे ओकर संग लखिके अइसा सोचेन कि पौलुस ओका मँदिर मँ लइ गवा अहइ।)

³⁰तउ सारा सहर खिलाफ उठि खड़ा भवा। मनई भागि भागिके चढ़ बइठेन अउर पौलुस क धइ लिहेन। फिन उ पचे ओका घिसीटते भए मंदिर स बाहेर लइ गएऩ अउर फउरन फाटक बन्द कइ दिहेन। ³¹उ पचे ओका मारइ क जतन करत ही रहेन कि रोमी फऊज क टुकड़ी क नायक क लगे इ सूचना पहोंची कि समूचइ यरुसलेम मँ खलबली मची बा। ³²उ सेनानायक कछू सिपाहियन अउर फउज क अधिकारी क आपन संग लिहेस अउर पौलुस प हमला करइवाले यहूदियन कइँती बढ़ा। यहूदियन जब सेना नायक अउर सिपाही लोगन क लखेन तउ उ पचे पौलुस क पीटब बंद किहेन।

³³तब उ सेनानायक पौलुस क लगे गवा अउर ओका बंदी बनाइ लिहेस। उ ओका दुइ जंजीरे मँ बाँध लेइ क आदेस दिहेस। फिन उ पूछेस, “उ कउन अहइ अउर उ का किहेस ह?” ³⁴भिड़िया मँ स कछू मनइयन एक बात कहेन तउ दूसर लोग दूसर बात। इ हो-हल्लड़ मँ काहेकि उ इ नाहीं जान पाएस कु सच्चाई का अहइ, यह बरे उ हुकुम दिहेस कि ओका छावनी मँ लइ चला जाइ। ^35-36पौलुस जब सीढ़िन क लगे पहोंचा तउ भिड़िया मँ फइली हिंसा स सिपाहियन क ओका आपन सुरच्छा मँ लइ जाइ पड़ा। काहेकि ओकरे पाछे मनइयन क एक भारी भीड़ इ चिचियात भइ चलत रही, “ऍका मारि डावा!”

लूका 6:1-11

सबित क पर्भू ईसू

(मत्ती 12:1-8; मरकुस 2:23-28)

6 अब अइसा भवा कि सबित क एक दिन ईसू जब अनाजे क खेतन्स जात रहा तउ ओनकर चेलन अनाजे क बलिया तोड़तेन, हथेली प रगड़ितेन अउर ओनका चबात जात रहेन। ²तबहीं कछू फरीसियन कहेन, “जेका सबित क दिन कीन्ह जाब नीक नाहीं बा, ओका तू पचे काहे करत अहा?”

³जवाब देत भवा ईसू ओनसे पूछेस, “का तू पचे नाहीं पढ़्या जब दाऊद अउर ओकर साथी भुखान रहेन, तब दाऊद का किहेस? ⁴का तू नाहीं बाँच्या कि उ परमेस्सर क घरे मँ घुसिके, परमेस्सर क चढ़ाई गइ रोटिन क उठाइके खाइ लिहस अउर ओनका भी दिहेस जउन ओकरे संग रहेन? जब कि याजकन क तजिके ओकर खाब कउनो बरे नीक नाहीं।” ⁵उ अगवा फिन कहेस, “मनई क पूत सबित क दिन क भी पर्भू अहइ।”

ईसू सबित क दिन रोगी क चंगा किहेस

(मत्ती 12:9-14; मरकुस 3:1-6)

⁶दूसर सबित क दिना अइसा भवा कि उ आराधनालय मँ जाइके उपदेस देइ लाग। हुवँई एक अइसा मनई रहा जेकर दाहिन हाथ सुखंडी होइ गवा रहा। ⁷हुवँई धरम सास्तिरियन अउर फरीसियन इ ताक मँ रहेन कि उ सबित क दिन कउनो चंगा किहे होइ तो ओह प दोख लगावइ क कउनो कारण पाइ जाइँ। ⁸उ ओनके बिचारन क जानत रहा। यह बरे उ सुखंडी हथवावाले मनई स कहेस, “उठा अउर सबन क समन्वा खड़ा होइ जा।” उ उठि गवा अउर हुवाँ खड़ा होइ गवा। ⁹तब ईसू मनइयन स कहेस, “मइँ तोहसे पूछत हउँ-सबित क दिन कउनो क भला करब चंगा अहइ या कउनो क नोसकान करब, कउनो क जिन्नगी बचाउब नीक बा या कउनो क जिन्नगी क नास करब।”

¹⁰ईसू चारिहुँ कइँती ओन सबन क निहारेस अउर फिन ओसे कहेस, “आपन हथवा सोझ फइलावा।” उ वइसा ही किहेस अउर ओकर हाथ फिन स चंगा होइ ग। ¹¹मुला ऍह पइ उ पचे आपुस मँ तहत्तुक करत कोहाइ गएन अउर बिचारइ लागेन, “ईसू क का कीन्ह जाइ?”

Awadhi Bible: Easy-to-Read Version (ERV-AWA)