◀ All Reading Plans / Book of Common Prayer / Ps. 118; Ps. 145; Deut. 16:9–12; Acts 4:18–21 23–33; John 4:19–26 (Awadhi Bible: Easy-to-Read Version)

Prev Day

May 19, 2024

Next Day

Use the calendar to view readings from this devotional.

May 2024
Su	Mo	Tu	We	Th	Fr	Sa
			1	2	3	4
5	6	7	8	9	10	11
12	13	14	15	16	17	18
19	20	21	22	23	24	25
26	27	28	29	30	31

Return to today's reading

Book of Common Prayer

Daily Old and New Testament readings based on the Book of Common Prayer.

Duration: 861 days

भजन संहिता 118

¹मइँ यहोवा क धन्यवाद देत हउँ, काहेकि उ नीक अहइ।
    ओकर पिरेम सदा ही रहत ह।
²इस्राएल इ कहइ द्या,
    “ओकर बिस्ससनीय पिरेम सदा ही रहत ह।”
³याजक अइसा कहत हीं,
    “ओकर बिस्ससनीय पिरेम सदा अटल रहत ह।”
⁴तू लोग जउन यहोवा क उपासना करत अहा, कहा करत अहा,
    “ओकर बिस्ससनीय पिरेम सदा ही अटल रहत ह।”

⁵मइँ परेसानी मँ रहेउँ, एह बरे मइँ मदद बरे यहोवा क पुकारेउँ।
    उ मोका जवाब दिहस अउर यहोवा मोका अजाद किहस।
⁶यहोवा मोरे कइँती अहइ, मइँ कबहुँ नाहीं डेराब।
    लोग मोका कउनो हानि नाहीं पहोंचावइ सकतेन।
⁷यहोवा मोर सहायक अहइ।
    मइँ आपन दुस्मनन क हारा देखब।
⁸मनइयन पइ भरोसा रखइ स
    यहोवा पइ भरोसा राखब उत्तिम अहइ।
⁹इ हमेसा उत्तिम अहइ कि पहिले आपन यहोवा पइ भरोसा करा
    तउ आपन मुखियन पइ।

¹⁰मइँ आपन दुस्मनन दुआरा घेरि लिहे गवा रहेउँ।
    यहोवा क सक्ति स मइँ आपन बैरी लोगन क हराइ दिहेउँ।
¹¹बहोत सारा दुस्मनन मोका चारिहउँ कइँती स घेरि लिहन ह।
    मइँ आपन दुस्मन क यहोवा क सक्ति स हराएउँ।
¹²दुस्मनन मोका मधु माखियन क झुण्ड क नाई घेरि लिहन।
    मुला, उ सबइ हाली बरत भइ झाड़ी क नाई बर्बाद भएन।
    यहोवा क सक्ति स मइँ ओका हराएउँ ह।

¹³मोर दुस्मनन मोह पइ वार किहन अउ मोका लगभग बर्बाद कइ दिहन
    मुला यहोवा मोका सहारा दिहस।
¹⁴यहोवा मोर सक्ति अउर मेार विजय गीत अहइ।
    अउर उ रच्छक बनि गवा ह।
¹⁵सज्जनन क घर मँ जउन विजय पर्व मनत अहइ तू ओका सुन सकत ह।
    देखा, यहोवा आपन महासक्ति फुन देखाएस ह।
¹⁶यहोवा क भुजन विजय मँ उठी भइ अहइँ।
    देखा यहोवा आपन महासक्ति फुन स देखाएस।

¹⁷मइँ जिअत रहब, मइँ मरब नाहीं,
    अउर जउन करम यहोवा किहस ह, मइँ ओन लोगन क गनती फुन स करब।
¹⁸यहोवा मोका दण्ड दिहस,
    मुला उ मोका मरइ नाहीं दिहस।
¹⁹सच्चाई क दुआरन क खोला,
    ताकि मइँ भीतर आइ पाउँ अउर यहोवा क आराधना करउँ।
²⁰यहोवा क मौजूदगी मँ जाइ क दुआर हिआँ अहइ।
    बस सिरिफ धर्मी लोग ही ओन दुआरन स होइके जाइ सकत हीं।
²¹हे यहोवा, मोर पराथना क जवाब देइ बरे
    अउर मोका रच्छा करइ बरे तोहका धन्यवाद देत अहउँ।

²²जउन पाथार क राज मिस्त्रियन नकार दिहे रहेन
    उहइ पाथर क प्रयोग कोना क पाथर क रूप मँ कीन्ह गवा।
²³यहोवा इ घटना क होइ दिहस।
    अउर हम सबइ एहमाँ अद्भूत महसूस कीन्ह।
²⁴इ उहइ दिना अहइ जेका यहोवा बनाएस ह।
    आवा हम खुसी क अनुभव करी अउर आजु आनन्दित होइ जाइ।

²⁵लोग कहेन, “हे यहोवा, हम पचन क बचाव करा,
    हे यहोवा हमार रच्छा करा।
²⁶उ मनई धन्न होइ जउन यहोवा क नाउँ मँ आवत अहइ।”
    “मइँ यहोवा क घर मँ तोहार स्तुति करित हउँ।
²⁷यहोवा परमेस्सर अहइ।
    उ आपन प्रकास स हम पचन क छाया दिहेस ह।
    वेदी क कोनन पइ भेंट क मेमना क बाँधा।”

²⁸हे यहोवा, तू हमार परमेस्सर अहा, अउर मइँ तोहार धन्यवाद करत हउँ।
मइँ तोहार गुण गावत हउँ, हे मोर परमेस्सर।
²⁹यहोवा क बड़कई करा काहेकि उ उत्तिम अहइ।
ओकर सच्ची करुणा सदा-सदा बनी रहत ह।

भजन संहिता 145

दाऊद क एक ठु स्तुति गीत।

¹हे मोरे परमेस्सर, हे मोरे राजा, मइँ तोहार गुण गावत हउँ।
    मइँ सदा-सदा तोहरे नाउँ क धन्य कहत हउँ।
²मइँ हर दिन तोहका सराहत हउँ।
    मइँ तोहरे नाउँ क सदा-सदा बड़कई करत हउँ।
³यहोवा महान अहइ।
    ओकर बहोत स्तुति होइ चाही।
    मइँ उ सबइ चिजियन क पता नाहीं लगाइ सकब जउन उ करत ह।
⁴पीढ़ी दर पीढ़ क ओन बातन क गरिमा क बखानइ द्या जेनका तू सदा-सर्वदा करत ह।
    अउर ओनका तोहार सक्तिसाली करमन क घोसणा करइ द्या।
⁵तोहरे महिमामय प्रताप सुन्नर अहइ।
    मइँ तोहरे अचरज भरे करमन क बखानब।
⁶लोगन क ओन अचरज भरा सक्ती क बारे मँ कहइ द्या जेनका तू करत ह।
    मइँ ओन महान करमन क बखानब जेनका तू करत ह।
⁷लोगन क उ बहोत सारी नीक बातन क बारे मँ कहइ द्या जउन तू किहा ह।
    उ पचे तोहार सच्चाई क बारे मँ कहिहीं।

⁸यहोवा दयालु अहइ अउर करुणा स पूर्ण अहइ,
    उ धीरज अउ पिरेम स पूर्ण अहइ।
⁹यहोवा सब क बरे भला अहइ।
    उ जउन सबइ कछू रचेस ह ओकरे प्रति करुणा प्रगट करत ह।
¹⁰हे यहोवा, ओनका जेका तू रच्या ह तोहार बड़कई करइ द्या।
    तोहका तोहार भगत धन्य कहत हीं।
¹¹उ सबइ लोग तोहरे महिमा स भरा राज्ज क बखान करत रहत हीं।
    ओनका तोहरी सक्ति क बारे मँ कहइ द्या।
¹²ताकि सबइ मानव जाति ओकरे सक्तिसाली करमन बारे मँ
    अउर ओकरे राज्ज क महिमामय प्रताप क बारे मँ जानइँ।
¹³हे यहोवा, तोहार राज्ज सदा सदा बना रही।
    तू सर्वदा राज्ज करब्या।

¹⁴यहोवा गिरे भए लोगन क उठावत ह।
    यहोवा ओन लोगन क उठावत ह जउन बोझन क ढोवत ह।
¹⁵सबहिं प्राणी तोहरी कइँती खाना पावइ बरे लखत हीं।
    तू ओनका ठीक समइ पइ खइया क देत रहत ह।
¹⁶तू आपन मूठी खोलत ह,
    अउर तू सबहिं प्राणियन क ओकरे जरूरत क चिजियन स संतुट्ठ करत अहा।
¹⁷जउन कछू यहोवा करत ह उ नीक बाटइ।
    यहोवा जउन भी करत ओहमाँ निज बिस्ससनीय पिरेम प्रकट करत ह।
¹⁸यहोवा हमेसा ओन लोगन क निचके रहत ह
    जउन इमानदारी क संग यहोवा स मदद क बिनती करत ह।
¹⁹यहोवा क भगत जउन ओहसे चाहत हीं, उ ओन बातन क करत ह।
    यहोवा आपन भगतन क सुनत ह।
    उ ओनकर पराथनन क जवाब देत ह अउर ओनकर रच्छा करत ह।
²⁰यहोवा ओन सबइ क जउन ओह स पिरेम करत ह, क रच्छा करत ह।
    किन्तु उ हर टुट्ठ क नस्ट करत ह।
²¹मइँ यहोवा क गुण गाउब।
    हर कउनो ओकर पवित्तर नाउँ क सदा अउ सर्वदा स्तुति करइ द्या।

व्यवस्था विवरण 16:9-12

हफ्तन क त्यौहार (पिन्तेकुस्त)

⁹“जब तू पचे दोबारा फसल काटब सुरु करा तबहिं स तू पचन्क सात हफ्ता गनइ चाही। ¹⁰तब यहोवा आपन परमेस्सर बरे हफ्तन क त्यौहार करा। ऍका एक स्वच्छ बलि ओका लिआइके करा। तू पचन्क केतॅना देब अहइ, एकर निहचय इ बिचारिके करा कि यहोवा तोहार परमेस्सर केतॅना तू पचन्क आसीर्बाद दिहे अहइ। ¹¹उ ठउरे पइ जा जेका यहोवा आपन नाउँ स हुवाँ बसइ बरे चुनी। हुआँ तू पचे अउर तोहार लोग, यहोवा आपन परमेस्सर क मौजूदगी मँ आनन्द क समइ बितइहीं। आपन सबहिं लोगन, आपन पूतन, आपन बिटियन अउर आपन सबहिं मनसेधू अउ मेहरारु दासन क हुआँ लइ जा अउर आपन सहर मँ बसइयन लेवी लेवीबंसियन, प्रवासियन, अनाथन अउर राँड़ मेहररुअन क भी संग लइ जा। ¹²सुमिरा कि तू पचे मिस्र मँ दास रह्या। तू पचन्क निहचय करइ चाही कि तू पचे इ नेमन क मनब्या।

प्रेरितन क काम 4:18-22

¹⁸तउ पचे ओनका भीतर बोलाएन अउर हुकुम दिहेन कि उ पचे ईसू क नाउँ पन तउ कउनो स कछू बात करइँ अउर न ही उपदेस देइँ। ¹⁹मुला पतरस अउर यूहन्ना ओनका जवाब दिहेन, “तू पचे ही फरियावा, क परमेस्सर क समन्वा हमरे बरे इ नीक होइ कि परमेस्सर न सुनिके हम तोहार सुनी? ²⁰हम, जउन कछू हम पचे लखा ह अउर सुना ह, ओका कहे क आलावा अउर कछू नाहिं कर सकित।”

^21-22फिन उ पचे ओनका धमकाए क पाछे छोड़ दिहन। ओनका सजा देइ क कउनो रस्ता नाहीं मिलि सका काहेकि जउन कछू भवा रहा, ओकरे बरे सबहिं मनइयन परमेस्सर क स्तुति करत रहेन। जउने मनई क नीक करइ क इ काम कीन्ह गवा रहा, ओकर उमिर चालीस बरिस स जिआदा रही।

प्रेरितन क काम 4:23-33

पतरस अउर यूहन्ना क लउटब

²³जब ओनका छोड़ दीन्ह गवा तउ आपन ही मनइयन क लगे आइ गएन अउर ओनसे जउन कछू मुख्ययाजक अउर बुजुर्ग यहूदी नेतन कहेन, उ सब ओनका कहिके सुनावा गवा। ²⁴जब उ पचे इ सुनेन तउ मिलिके उँची आवाज मँ परमेस्सर क गोहरावत भवा बोलेन, “स्वामी, तू ही अकास, धरती, समुद्दर अउर ओकरे अंदर जउन कछू अहइ, ओका बनाया ह। ²⁵तू ही पवित्तर आतिमा क जरिये आपन सेवक, हमरे पूर्वज दाऊद क मुँहना स कहे रहा:

‘देखाएन इ जानित आपन अहंकार काहे?
मनइयन वृथा ही कुचाल काहे किहेन?

²⁶इ धरती क राजा लोग आपन क तइयार किहेन ओनके खिलाफ जुद्ध बरे।
अउर राजा बटुर गएन पर्भू अउर ओकरे मसीह क खिलाफत मँ।’ ^(A)

²⁷हाँ, हेरोदेस अउर पुन्तियूस पिलातुस भी इ सहर मँ गैर यहूदियन अउर इस्त्राएलियन क संग मिलिके तोहरे पवित्तर सेवक ईसू क खिलाफ, जेकर तू मसीह रूप मँ अभिसेक किहे ह, सचमुच उ पचे एक अउट ग रहेन। ²⁸उ पचे बटुर गएन काहेकि तोहार सक्ती अउर इच्छा क अनुसार जउन कछू पहिले ही तय होइ चुका रहा उ पूरा होइ। ²⁹अउर अबहिं हे पर्भू, ओनकइ धमकिन प धियान द्या अउर आपन सेवक लोगन क निडर होइके ‘तोहार बचन’ सुनावइ क सक्ती द्या। ³⁰जब कि चंगा किहे क पाछे आपन हाथ बढ़ाया अउर अद्भुत चीन्हन अउर अद्भुत कारजन तोहरे पवित्तर सेवकन क जरिये ईसू क नाउँ प कीन्ह जात रहत हीं।”

³¹जब उ पचे पराथना कइ चुकेन तउ जउने ठउरे प उ सबइ बटुरा रहेन, उ हल गवा अउर ओन सब मँ “पवित्तर आतिमा” समाइ गवा। अउर उ पचे निडर होइके परमेस्सर क बचन बोलइ लागेन।

बिसवासी क मेल जोल क जिन्नगी

³²बिसवासियन क इ समूचा दल एक मन अउर एक आतिमा स साथ रहा। कउनो भी इ नाहीं कहत रहा कि ओकर कउनो भी चीज ओकर आपन अहइ। ओनकइ लगे जउन कछू होत, उ पचे सब कछू क आपुस मँ बाँट लेतेन। ³³अउर प्रेरितन पूरी सक्ती क संग पर्भू ईसू क पुनरूत्थान क बारे मँ साच्छी देत रहेन। परमेस्सर क महान बरदान ओन पइ बना रहत।

यूहन्ना 4:19-26

¹⁹इ सुनिके उ स्त्री ओसे कहेस, “महासय, मोका तउ लागत अहइ कि तू कउनो नबी अहा। ²⁰हमरे पूर्वजन इ पर्वत प आराधना किए रहेन्ह मुला तू कहत अहा कि यरूरलेम आराधना क स्थान अहइ।”

²¹ईसू ओसे कहेस, “हे स्त्री मोरी बात माँ बिसवास करा। उ समइ आवइवाला अहइ जब तू परमपिता क आराधना न तउ एहि पर्वत प करइ पउबू अउर न तउ यरूसलेम मँ। ²²तू सामरी लोगन्ह ओका नाहीं जानत अहइँ जेकर आराधना करति अह। मुला हम यहूदी ओका जानित ह जेकर आराधना करति अहा। सबन क उद्धार यहूदियन स मिली। ²³मुला उहइ समइ आवत अहइ, ‘अउर आइ ग’ बाटइ जब सच्चे आराधकन परमपिता क आराधना, आतिमा अउर सच्चाई मँ करिहीं। परमपिता अइसे आराधक चाहत ह। ²⁴परमपिता आतिमा अहइ अउर एह बरे जउन ओकर आराधना करी ओका आतिमा अउर सच्चाइन मँ आराधना करइ क पड़ी।”

²⁵फिन स्त्री ओसे कहेस, “मइँ जानत अहउँ कि मसीह आवइवाला अहइ।” (यानी “ख्रीष्ट”) “जब उ आई तउ हम पचन क सब कछू बताई।”

²⁶ईसू ओसे कहेस, “मइँ जउन तोहसे बतियात अहउँ मइँ उहइ अहउँ।”

Awadhi Bible: Easy-to-Read Version (ERV-AWA)