Book of Common Prayer

³ हे यहोवा, कोहाइ जाब क तजि द्या।
    अउर तू आपन गुस्सा क लइ लिहा।
⁴ परमेस्सर, हमार मुक्तिदाता, कृपा कइके हम पचन पइ कोहाइ जाब तजि द्या
    अउर हम लोगन क फुन हमार भुइयाँ पइ वापिस लइ आवा।
⁵ का तू हमेसा हमेसा कोहान रहब्या?
    का तू सदा आपन कोहान जारी रखब्या?
⁶ कृपा कइके हमका फुन जिआइ द्या
    ताकि तोहार लोग तोहसे फुन स खुस होइ सकइँ।
⁷ हे यहोवा, तू हमका आपन बिस्सासनीय पिरेम देखावा।
    हमार रच्छा करा।

⁸ जउन परमेस्सर कहत ह, मइँ ओह पइ कान दिहेउँ।
    उ अपने लोगन अउर अपने बिस्सासी चेलों से सान्ति क वाचा करत ह
    उ नाहीं चाहत ह कि उ पचे बेवकूफी क राहे पइ लउटि जाइँ।
⁹ फुरइ, ओकर उद्धार ओन लोगन क निचके बाटइ जउन ओहसे डेरात ह,
    एह बरे ओकर महिमा तोहार देस मँ निवास करी।
¹⁰ पिरेम अउर सच्चाई एक साथ मिलब।
    धर्मता अउ सान्ति एक दूसर क चुम्मा क संग स्वागत करिहीं।
¹¹ सच्चाई धरती स अंकुरित होइहीं,
    अउर धार्मिकता अकासे स बसिर्हीं।
¹² यहोवा बहोत स उत्तिम वस्तुअन क देइहीं।
    अउर हमार धरती प्रचुर मात्रा मँ फसल उपजिहीं।
¹³ परमेस्सर क अगवा अगवा नेकी चली,
    अउर उ ओकरे बरे राह बनाई।

¹ उ जउन कउनो सर्वोच्च परमेस्सर क सरण मँ रहत ह,
    तउ उ सर्वसक्तिमान परमेस्सर क सुरच्छा मँ रहत ह।
² मइँ यहोवा स कहत हउँ, “तू मोर सुरच्छा स्थल अहा मोर गढ़।
    हे परमेस्सर, मइँ तोहरे भरोसे हउँ।”
³ यहोवा तोहका सबहिं छिपे भए खतरा स बचाइ।
    उ तोहका सब खउफनाक विपत्तियन स बचाइ।
⁴ तू परमेस्सर क सरण मँ संरच्छण पावइ बरे जाइ सकत ह।
    उ तोहार अइसे रच्छा करी जइसे एक ठु पंछी आपन पखना फइलाइके आपन बच्चन क रच्छा करत ह।
    परमेस्सर क बिस्सास एक बिसाल ढाल क नाईं अहइ जउन चारिहुँ कइँती स रच्छा करत ह।
⁵ राति मँ तोहका कउनो क भय नाहीं होइ,
    अउ दुस्मन क बाणन स तू दिन मँ डेराब्या नाहीं।
⁶ तोहका अँधियारे मँ आवइवालन रोगन
    अउ उ खउफनाक रोग स जउन दुपहर मँ आवत हीं डर नाहीं होइ।
⁷ तू हजार दुस्मनन क हराइ देब्या।
    तोहार खुद दाहिना हाथ दस हजार दुस्मनन क हराइ।
    अउर तोहार दुस्मन तोहका छुइ तलक नाहीं पइहीं।
⁸ जरा लखा, अउर तोहका देखाँइ देइ कि
    उ पचे कुटिल मनई सजा पाइ चुका अहइँ।
⁹ काहेकि तू यहोवा क भरोसे अहा।
    तू परम परमेस्सर क आपन सरणस्थल बनाया ह।
¹⁰ तोहरे संग कउनो भी बुरी बात नाहीं घटी।
    कउनो भी रोग तोहरे घर क नजदीक नाहीं आइ।
¹¹ काहेकि परमेस्सर आपन सरगदूतन क तू जहाँ भी जाब्या हुआँ तोहार रच्छा करइ बरे नियुक्त करी।
¹² ओकर सरगदूतन तोहका आपन हाथन पइ ऊपर उठइहीं,
    ताकि तोहार गोड़ चट्टान स न टकराइ।
¹³ तू कोबरा अउर नाग पइ बगैर कउनो नोस्कान क चलब्या;
    तू सेर अउर अजगर क कुचरब्या।
¹⁴ यहोवा कहत ह, “मइँ आपन सेवकन क रच्छा करब जउन मोहसे पिरेम करत ह।
    मइँ ओनॅ व्यक्ति क पालन-पोसन करब जउन मोर उपासना करत ह।”
¹⁵ उ सहारा पावइ बरे मोका गोहरइहीं, मइँ ओनकर जवाब देब।
    उ पचे जब कस्ट मँ होइहीं मइँ ओनके संग रहब।
    मइँ ओनकर बचाव करब अउर ओनका आदर देब।
¹⁶ मइँ आपन व्यक्तियन क एक लम्बी उमिर क आसीस देब।
    अउर मइँ ओका ओकर आपन बचान क सक्ति दिखाउब।

⁹ हे यहोवा, तोहार दुस्मनन बर्बाद कइ दीन्ह जइहीं।
    उ सबहिं मनई जउन बुरा काम करत हीं, तितर-बितर कइ दीन्ह जइहीं।
¹⁰ मुला तू मोका जंगली बर्धा क नाईं मज़बूत बनाया ह।
    हम बरियार भेड़ा स बन जाब जेकर कर्रे सींग होत हीं तू मोह पइ खास तेल उड़ेर्या ह जउन ठंडापन देत ह।
¹¹ मइँ लखेउँ ह कि मोर दुस्मन मोका लखत हीं;
    मइँ सुनेउँ ह कि दुट्ठ लोग मोह पइ हमला करइ बरे तइयार बाटेन।

¹² नीक मनइयन लबानोन क बड़वार देवदार बृच्छ क तरह अहइँ
    जउन यहोवा क मन्दिर मँ रोपा ग अहइँ।
¹³ नीक मनइयन बाढ़त भए ताड़ क बृच्छ क नाई अहइँ,
    जउन हमार परमेस्सर क मन्दिर क आँगन मँ फलदार होत अहइँ।
¹⁴ उ पचे जब तलक बुढ़वा होइहीं तब तलक उ पचे फल देत रइहीं।
    उ पचे हरे भरे मोटा बृच्छ जइसे होइहीं।
¹⁵ उ पचे हर कउनो क इ देखाँवइ बरे हुआँ अहइँ कि यहोवा बिस्सास योग्य अहइ।
    उ मोर चट्टान अहइ।
    ओहमाँ कछू बुराइ नाहीं बाटइ।

² “कउनो अइसा नाहीं अहइ जउन यहोवा क नाईं पवित्तर अहइ।
    तोहार अलावा कउनो परमेस्सर नाहीं।
    हम लोगन क परमेस्सर क नाईं कउनो चट्टान नाहीं अहइ।

³ “बन्द कइ द्या डींग मारब,
    घमण्ड भरी बात जिन करा।
काहेकी यहोवा परमेस्सर अहइ सब कछु जानत ह।
    परमेस्सर मनइयन क राह देखाँवत ह अउ ओनकइ निआव करत ह।
⁴ सक्तीसाली जोधा क धनुस टूटत हीं,
    अउ दुर्बल सक्तीसाली बनत हीं।
⁵ जउन लोगन क पास पाछे टेमॅ मँ खाइ बरे ढेर क खइया रहेन
    अब ओका रोटी प्राप्त करइ बरे काम करइ क होइ।
मुला जउन लोग बीत गवा टेमॅ मँ भूखा रहेन,
    अब ओका देर तलक भूखा नाहीं रहइ क होइ।
मेहरारु जउन बच्चा क पइदा नाहीं कइ सकत रहेन,
    अब सात गदेलन की मँ अहइँ।
मुला जेकर पास ढेर गदेलन रहेन,
    उ दुःखी अहइ काहेकि उ पचे अब मरि गएन।

⁶ “यहोवा लोगन क मउत देत ह,
    अउ उ ओन सब क जिआवत ह।
यहोवा लोगन क नरके मँ पठवत ह,
    अउर उ फुन स ओन सब क ऊपर उठावत ह।
⁷ यहोवा मनइयन क दीन बनवत ह,
    अउ उहइ मनइयन क धनी बनवत ह।
यहोवा मनइयन क विनम्र बनवत ह,
    अउ उ मनइयन क बड़कवा बनावत ह।
⁸ यहोवा गरीबन क धूरि स उठावत ह।
    यहोवा गरीबन क दुखे स उबारत ह।
यहोवा गरीबन क राजा क संग बइठावत ह।
    उ गरीबन क खास मनई बनवत ह अउ उ ओनका मान्य मेहमान बनवत ह।
यहोवा समूचइ दुनिया क रचेस ह।
    उ सारे जग क खंभा प टेकाएस ह।

⁹ “यहोवा आपन पवित्तर लोगन क रच्छा करत ह।
    उ ओनका ठोकर खाई स बचावत ह।
मुला पापी मनइयन क नास कइ दीन्ह जाई।
    उ पचे घनघोर अँधियारे मँ भहरइहीं।
    ओकर सक्ती ओकर विजय प्राप्त करइ मँ मददगार नाहीं होइ।
¹⁰ यहोवा आपन दुस्मनन क नास करत ह।
    सर्वोच्य परमेस्सर अकास मँ लोगन क खिलाफ गरजब।
यहोवा जमीन क छोर ताईं निआव करिहीं।
    उ आपन राजा क सक्ती देइहीं।
    उ आपन राजा क बरिआर करी।”